ANNESS

Programm ta’ ħidma għall-2008 dwar strumenti ta’ taħriġ fil-qasam tas-sikurezza ta’ l-ikel, is-saħħa ta’ l-annimali, il-benessri ta’ l-annimali u s-saħħa tal-pjanti

TAĦRIĠ

1)   Linji Baġitarji: 17 04 07 01 u 17 04 04 01

Bażi ġuridika:

—	Ir-Regolament (KE) Nru 882/2004, l-Artikolu 51 u l-Artikolu 66 (1)b;

—	Id-Direttiva tal-Kunsill, l-Artikolu 2 (1)(i) tagħha.

L-azzjoni li se tiġi ffinanzjata minn dan il-baġit għandha l-għan li tiżviluppa, torganizza u twettaq korsijiet ta’ taħriġ u workshops jew seminars fil-Komunità u f’pajjiżi terzi biex tiżgura li ħaddiema li jwettqu kontrolli uffiċjali huma mħarrġa kif xieraq. Permezz ta’ dawn il-korsijiet u seminars ta’ taħriġ, uffiċjali tal-gvern, awtoritajiet nazzjonali u esperti tal-laboratorji, għandhom jiġu mgħarrfa u mħarrġa dwar il-leġiżlazzjoni Komunitarja dwar l-għalf u l-ikel u r-rekwiżiti ta’ kontroll għall-għalf u l-ikel li jista’ jiġi permess fis-swieq Komunitarji.

Il-Kummissjoni tikkontribwixxi għat-taħriġ ta’ uffiċjali fl-Istati Membri billi tissupplimenta t-taħriġ miksub f’livell nazzjonali b’taħriġ f’aspetti li huma rilevanti minn perspettiva Komunitarja.

Għall-2008, l-azzjonijiet ta’ taħriġ se jkunu dwar is-suġġetti li ġejja:

—	Proċeduri ta’ kontroll għall-ikel u l-għalf imsejsa fuq prinċipji ta’ l-HACCP (Analiżi tal-Periklu u l-Punti ta’ Kontroll Kritiċi); metodi ta’ verifika biex ikun ivverifikat it-twettiq tas-sistemi HACCP,

—	Spezzjonijiet ta’ kontroll veterinarju u tas-sikurezza ta’ l-ikel f’Postijiet ta’ Spezzjoni fuq il-Fruntiera (ajruporti, portijiet u toroq/ferroviji),

—	L-Iġjene u l-Kontroll ta’ l-Ikel: prodotti tal-ħut, tal-laħam u tal-ħalib,

—	Il-ħarsien mill-kontroll u l-qerda ta’ l-Enċefalopatija Sponġiformi li Tinxtered,

—	Kontrolli tas-Saħħa tal-Pjanti (ir-reġim tal-kwarantina tal-pjanti tal-KE għall-patata, ir-reġim intern tal-kwarantina tal-pjanti tal-KE, ir-reġim tal-kwarantina tal-pjanti tal-KE għal importazzjonijiet),

—	Prodotti ta’ Ħarsien għal Pjanti (aspetti ta’ sikurezza għall-ikel u l-għalf): valutazzjoni u reġistrazzjoni,

—	Żoonożi u kriterji mikrobijoloġiċi fi prodotti ta’ l-ikel,

—	Il-Benessri ta’ l-Annimali: l-istordament u l-qtil ta’ annimali f’biċċeriji u f’sitwazzjonijiet ta’ kontroll ta’ mard u l-benessri ta’ l-annimali matul it-trasport,

—	Il-liġi dwar l-ikel, il-liġi dwar l-għalf, ir-regoli dwar is-saħħa u l-benessri ta’ l-annimali u s-saħħa tal-pjanti. (8 800 000 EUR).

Finanzjament: permezz ta’ akkwist pubbliku.

L-ammont baġitarju globali riservat għall-akkwisti matul is-sena jammonta għal 8 800 000 EUR.

Għal kull waħda mill-kwistjonijiet tekniċi msemmija hawn fuq se jiġi ffirmat kuntratt wieħed, jew aktar, ta’ servizz speċifiku. Huwa stmat li se jiġu ffirmati madwar 14-il kuntratt ta’ servizz. Kuntratturi esterni huma nvoluti l-aktar fl-aspetti organizattivi u loġistiċi ta’ l-attivitajiet ta’ taħriġ.

L-għan huwa li titnieda proċedura ta’ akkwist kemm jista’ jkun malajr (bejn Marzu u Mejju) biex il-kuntratti jiġu ffirmati matul l-2008.

2)   Linja baġitarja: 17 01 04 05

Bażi ġuridika:

—	Ir-Regolament (KE) Nru 882/2004, l-Artikolu 66 (1)(ċ);

L-azzjoni li se tiġi ffinanzjata minn dan il-baġit għandha l-għan li tikseb rispons dwar it-taħriġ. Ir-rispons huwa wieħed mill-elementi prinċipali fil-qasam ta’ taħriġ aħjar għal ikel aktar sikur. Il-produzzjoni ta’ rapport dwar l-attivitajiet ta’ l-2007 hija parti minn dan.

Ir-rispons dwar it-taħriġ se jinġabar ukoll permezz ta’ valutazzjoni ex-post. Formoli/kwestjonarji għal dan il-għan se jitqassmu lil sezzjoni trażversali ta’ parteċipanti wara l-attendenza tagħhom f’avveniment ta’ taħriġ biex ikun ikkalkulat l-impatt tat-taħriġ fuq il-ħajja professjonali tagħhom.

Fl-aħħarnett, biex il-programmi ta’ taħriġ jiġu organizzati aħjar, jeħtieġ li jiġu ffinanzjati tagħmir u strumenti ta’ l-IT, kif ukoll materjal promozzjonali, u appoġġ ta’ tagħrif u komunikazzjoni. (308 000 EUR)

Finanzjament: kuntratti ta’ qafas eżistenti

Huwa stmat li se jiġu ffirmati madwar erba’ kuntratti ta’ servizz.

Qafas ta’ żmien indikattiv għal iffirmar tal-kuntratti: bejn Marzu u Lulju.

Taqsira

Nru	Isem	Linja Baġitarja	Bażi ġuridika	Ammont f'EUR
1	Taħriġ: kuntratti esterni għat-twettiq ta’ programmi ta’ taħriġ	17 04 07 01	Ir-Regolament (KE) Nru 882/2004	8 350 000
		17 04 04 01	Id-Direttiva tal-Kunsill 2000/29/KE	450 000
2	Taħriġ: Rapport annwali, ex-post, valutazzjoni, tagħmir u strumenti ta’ l-IT, materjal promozzjonali, appoġġ ta’ tagħrif u komunikazzjoni	17 01 04 05	Ir-Regolament (KE) Nru 882/2004	308 000
Total				9 108 000