12.12.2006   

MT

Il-Ġurnal Uffiċjali ta’ l-Unjoni Ewropea

22

(1)

Ir-Regolament (KE) Nru 2232/96 jistabbilixxi proċedura għall-istabbiliment ta' regoli fir-rigward ta sustanzi li jagħtu t-togħma użati jew maħsuba għall-użu fi jew fuq l-ikel. Dak ir-Regolament jipprovdi għall-adozzjoni ta' reġistru ta' sustanzi li jagħtu t-togħma “ir-reġistru”) wara notifika mill-Istati Membri ta' lista tas-sustanzi li jagħtu t-togħma li jistgħu jintużaw fi jew fuq ikel kummerċjalizzat fit-territorju tagħhom u fuq il-bażi ta' studju mill-Kummissjoni ta' dik in-notifika. Dak ir-reġistru kien adottat permezz tad-Deċiżjoni tal-Kummissjoni 1999/217/KE (2)

(2)

Minbarra dan, ir-Regolament (KE) Nru 2232/96 jipprovdi għal programm għall-evalwazzjoni tas-sustanzi li jagħtu togħma sabiex jiġi stabbilit jekk jissodisfawx il-kriterji ġenerali għall-użu ta' dawn is-sustanzi kif stabbilit fl-Anness għal dak ir-Regolament.

(3)

L-Awtorità Ewropea Dwar is-Sigurtà ta' l-Ikel (“l-Awtorità”) ikkonkludiet fl-opinjoni tagħha tat-13 ta' Lulju 2004 dwar il-para-hydroxybenzoates, li l-propyl 4-hydroxybenzoate (FL 09.915) kellu effett fuq l-ormoni sesswali u l-organi riproduttivi tal-firien żgħar tas-sess maskili. L-Awtorità ma setgħetx tirrakkomanda doża aċċettabbli ta' kuljum (ADI) għal din is-sustanza minħabba li mhuwiex possibbli li jintgħaraf b’mod ċar doża li m’għandhiex effett avvers osservat (NOAEL: no-observed-adverse-effect-level). L-użu tal-propyl 4-hydroxybenzoate bħala sustanza li tagħti t-togħma fl-ikel mhuwiex aċċettabbli, għaliex ma jissodisfax il-kriterji ġenerali għall-użu ta' sustanzi li jagħtu t-togħma kif stipulati fl-Anness għar-Regolament (KE) Nru 2232/96. B'konsegwenza, il-propyl 4-hydroxybenzoate għandu jitneħħa minn fuq ir-reġistru.

(4)

L-Awtorità kkonkludiet fl-opinjoni tagħha tas-7 ta' Diċembru 2004 dwar dialkooliċi, diketoni u idroxiketoni li l-pentane-2,4-dione (FL 07.191) huwa ġenotossiku in vitro u in vivo. Għalhekk l-użu tiegħu bħala sustanza li tagħti t-togħma mhux aċċettabbli, minħabba li ma jissodisfax il-kriterji ġenerali għall-użu ta' sustanzi li jagħtu t-togħma kif stipulati fl-Anness għar-Regolament (KE) Nru 2232/96. B'konsegwenza, il-pentane-2,4-dione għandu jitneħħa minn fuq ir-reġistru.

(5)

Fl-applikazzjoni tar-Regolament (KE) Nru 2232/96 u r-Rakkomandazzjoni tal-Kummissjoni 98/282/KE tal-21 ta' April 1998 dwar il-mezzi li bihom l-Istati Membri u l-Istati firmatarji tal-Ftehim dwar iż-Żona Ekonomika Ewropea għandhom iħarsu l-proprjetà intellettwali fir-rigward ta' l-iżvilupp u l-manifattura ta' sustanzi li jagħtu t-togħma msemmija fir-Regolament (KE) Nru 2232 tal-Parlament Ewropew u tal-Kunsill (3), għal numru ta' sustanzi, l-Istati Membri notifikanti talbu li għandhom ikunu rreġistrati b'tali mod li jitħarsu d-drittijiet tal-proprjetà intellettwali tal-manifattur.

(6)

Il-protezzjoni għal dawn is-sustanzi, elenkati f'Parti B tar-reġistru, hija limitata għal perjodu massimu ta' ħames snin mid-data li fiha tasal in-notifika tagħhom. Dak il-perjodu issa skada għal 28 sustanza li b'konsegwenza għandhom jiġu ttrasferiti għall-Parti A tar-reġistru.

(7)

Id-Deċiżjoni 1999/217/KE għandha għalhekk tiġi emendata kif suppost.

(8)

Il-miżuri li hemm f'din id-Deċiżjoni huma fi qbil ma' l-opinjoni tal-Kumitat Permanenti fuq il- Katina ta' l-Ikel u s-Saħħa ta' l-Annimali,