30.5.2006

MT

Il-Ġurnal Uffiċjali ta’ l-Unjoni Ewropea

176

---

ID-DEĊIŻJONI TAL-KUNSILL

tad-19 ta' Lulju 2004

li tistabbilixxi Kunsilli Konsultattivi Reġjonali taħt il-Politika Komuni tas-Sajd

(2004/585/KE)

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 37 tiegħu,

Wara li kkunsidra l-proposta tal-Kummissjoni,

Wara li kkunsidra l-opinjoni tal-Parlament Ewropew (1),

Wara li kkunsidra l-opinjoni tal-Kumitat Ekonomiku u Soċjali Ewropew (2),

Billi:

(1)

Ir-Regolament tal-Kunsill (KE) Nru 2371/2002 ta' l-20 ta' Diċembru 2002 dwar il-konservazzjoni u l-isfruttament sostenibbli ta' riżorsi tas-sajd taħt il-Politika Komuni tas- Sajd (3) u b'mod partikolari l-Artikoli 31 u 32 tiegħu, jipprovdi għal forom ġodda ta' parteċipazzjoni minn dawk li għandhom interess fil-Politika Komuni tas-Sajd permezz ta' l-istabbiliment tal-Kunsilli Konsultattivi Reġjonali.

(2)	Approċ konsistenti għall-istabbiliment ta' Kunsilli Konsultattivi Reġjonali jeħtieġ li huma jikkorrispondu ma' unitajiet ta' amministrazzjoni bbażati fuq kriterji bijoloġiċi u li jkunu limitati fl-għadd biex joffru pariri li jagħmlu sens u għal raġunijiet prattiċi.

(3)

Billi l-Kunsilli Konsultattivi Reġjonali huma organizzazzjonijiet immexxija minn min għandu nteress, huma għandhom jadattaw l-istruttura tagħhom għall-karatteristiċi speċifiċi tas-sajd u tar-reġjuni konċernati. Madankollu, hu meħtieġ qafas ġenerali għall-istabbiliment tal-Kunsilli Konsultattivi Reġjonali.

(4)

Fl-interessi ta' l-effiċjenza, hu meħtieġ li jiġi llimitat id-daqs tal-Kunsilli Konsultattivi Reġjonali waqt li jiġi assigurat li jinkludu l-interessi kollha affettwati mill-Politika Komuni tas-Sajd u waqt li jiġi rikonoxxut il-primat ta' l-interessi tas-sajd meta wieħed jikkunsidra l-effetti fuqhom ta' deċiżjonijiet u politiki ta' amministrazzjoni.

(5)	Biex tiġi assigurata konsistenza dwar kwistjonijiet ta' nteress komuni għal iktar minn Kunsill Konsultattiv Reġjonali wieħed, hu essenzjali li jiġu stabbiliti kuntatti bejn il-Kunsilli Konsultattivi Reġjonali differenti.

(6)

In vista tal-kompiti tal-Kumitat Konsultattiv dwar is-Sajd u l-Akwakultura mġedded bid-Deċiżjoni tal-Kummissjoni 1999/478/KE (4), li hu magħmul minn rappreżentanti ta' firxa wiesa' ta' organizzazzjonijiet u nteressi Ewropej, il-ħidma tal-Kunsilli Konsultattivi Reġjonali għandha tiġi kkoordinata ma' dik ta' l-imsemmi Kumitat li lilu għandhom jintbagħtu wkoll ir-rapporti tagħhom.

(7)	Biex jassigura l-istabbiliment effettiv tal-Kunsilli Konsultattivi Reġjonali, hu essenzjali li fondi pubbliċi jikkontribwixxu għall-ispejjeż tagħhom fil-fażi tal-bidu u għall-ispejjeż ta' interpretazzjoni u traduzzjoni.

(8)

Ammont finanzjarju ta' referenza, fis-sens tal-punt 34 tal-Ftehim Interistituzzjonali tas-6 ta' Mejju 1999 bejn il-Parlament Ewropew, il-Kunsill u l-Kummissjoni dwar dixxiplina tal-budget u titjib fil-proċedura tal-budget  (5) hu inkluż f'din id-Deċiżjoni għaż-żmien kollu tad-disposizzjonijiet ta' finanzjar, mingħajr ma dan jaffettwa s-setgħat ta' l-awtorità tal-budget kif imfissra fit-Trattat,

IDDEĊIEDA KIF ĠEJ:

Artikolu 1

Definizzjonijiet

Għall-finijiet ta' din id-Deċiżjoni għandhom japplikaw id-definizzjonijiet li ġejjin:

(1)	“Stat Membru konċernat” għandha tfisser Stat Membru li għandu nteress ta' sajd fiż-żona jew sajd kopert minn Kunsill Konsultattiv Reġjonali;

(2)	“Settur tas-sajd” għandha tfisser is-sotto-settur li jaqbad (il-ħut) inklużi sidien ta' bastimenti, sajjieda fuq skala żgħira, sajjieda mpjegati, organizzazzjonijiet ta' produtturi kif ukoll, fost l-oħrajn, min jipproċessa, kummerċjanti u organizzazzjonijiet oħra tas-suq u ċirkoli tan-nisa;

(3)	“Gruppi oħra ta' nteress” għandha tfisser, fost l-oħrajn, organizzazzjonijiet u gruppi ambjentali, produtturi ta' l-akwakultura, konsumaturi u sajjieda dilettanti jew sportivi.

Artikolu 2

Stabbiliment ta' Kunsilli Konsultattivi Reġjonali

1.   Qed jiġi stabbilit Kunsill Konsultattiv Reġjonali għal kull wieħed minn dawn li ġejjin:

(a)	Il-baħar Baltiku

(b)	Il-baħar Mediterranju

(ċ)	Il-baħar tat-Tramuntana

(d)	Ibħra tal-Majjistral

(e)	Ibħra tal-Lbiċ

(f)	L-istoks Pelaġiċi

(g)	Flotta tal-baħar miftuħ/vjaġġi twal

2.   Iż-żoni ġeografiċi koperti minn kull Kunsill Konsultattiv Reġjonali huma stabbiliti fl-Anness I. Kull Kunsill Konsultattiv Reġjonali jista' joħloq sotto-diviżjonijiet biex jittratta kwistjonijiet li jkopru sajd speċifiku u reġjuni bijoloġiċi.

Artikolu 3

Proċedura

1.   Rappreżentanti tas-settur tas-sajd u gruppi oħra li għandhom interess f'wieħed mill-Kunsilli Konsultattivi Reġjonali għandhom iressqu talba dwar l-operat ta' dak il-Kunsill Konsultattiv Reġjonali quddiem l-Istati Membri konċernati u quddiem il-Kummissjoni. It-talba għandha tkun kompatibbli ma' l-oġġettivi, prinċipji u linji gwida tal-Politika Komuni tas-Sajd kif stabbilit fir-Regolament (KE) Nru 2371/2002 u għandha tinkludi:

(a)	dikjarazzjoni ta' objettivi

(b)	prinċipji dwar l-operat

(ċ)	regoli ta' proċedura inizjali

(d)	l-istima tal-budget

(e)	lista provviżorja ta' organizzazzjonijiet.

2.   L-Istati Membri konċernati għandhom jistabbilixxu jekk l-applikazzjoni hijiex rappreżentattiva u skond id-dispożizzjonijiet stabbiliti f'din id-Deċiżjoni, jekk meħtieġ, wara diskussjonijiet ma' min għandu interess, u għandhom, bi qbil komuni, jibgħatu rakkomandazzjoni lill-Kummissjoni dwar dak il-Kunsill Konsultattiv Reġjonali.

3.   Wara valutazzjoni tar-rakkomandazzjoni u emendi possibbli fit-talba, il-Kummissjoni għandha tadotta deċiżjoni kemm jista' jkun malajr u għandha, f'kull każ, timmira biex tadottaha mhux iżjed tard minn tliet xhur wara, waqt li tispeċifika d-data minn meta l-Kunsill Konsultattiv Reġjonali jrid jibda jaħdem. Id-Deċiżjoni għandha tiġi ppubblikata fil-Ġurnal Uffiċjali ta' l-Unjoni Ewropea.

Artikolu 4

Struttura

1.   Kull Kunsill Konsultattiv Reġjonali għandu jkun magħmul minn assemblea ġenerali u kumitat eżekuttiv.

2.   L-assemblea ġenerali għandha tiltaqa' għall-inqas darba fis-sena biex tapprova r-rapport annwali u l-pjan strateġiku annwali mfassal mill-kumitat eżekuttiv.

3.   L-assemblea ġenerali għandha taħtar kumitat eżekuttiv ta' mhux iżjed minn erba' u għoxrin membru. Il-kumitat eżekuttiv għandu jamministra l-ħidma tal-Kunsill Konsultattiv Reġjonali u jadotta r-rakkomandazzjonijiet tiegħu.

Artikolu 5

Sħubija

1.   Il-Kunsilli Konsultattivi Reġjonali għandhom ikunu magħmula minn rappreżentanti mis-settur tas-sajd u gruppi oħra ta' nteress affettwati mill-Politika Komuni tas-Sajd.

2.   Organizzazzjonijiet Ewropej u nazzjonali li jirrappreżentaw lis-settur tas-sajd u l-gruppi ta' interess oħra jistgħu jipproponu membri lill-Istati Membri konċernati. L-Istati Membri konċernati għandhom jaqblu dwar il-membri ta' l-assemblea ġenerali.

3.   Fl-assemblea ġenerali u l-kumitat eżekuttiv, żewġ terzi tas-siġġijiet għandhom jiġu allokati għar-rappreżentanti tas-settur tas-sajd u terz għar-rappreżentanti tal-gruppi ta' interess l-oħra affettwati mill-Politika Komuni tas-Sajd.

4.   Mill-inqas rappreżentant wieħed tas-sotto-settur tal-qabda mill-Istat Membru konċernat għandu jkun rappreżentat fil-kumitat eżekuttiv.

Artikolu 6

Parteċipazzjoni minn dawk mhux membri

1.   Xjentisti minn istituti ta' l-Istati Membri konċernati jew korpi internazzjonali għandhom jiġu mistiedna jieħdu sehem bħala esperti fil-ħidma tal-Kunsilli Konsultattivi Reġjonali. Jista' wkoll jiġi mistieden kwalunkwe xjentist kwalifikat ieħor.

2.   Il-Kummissjoni u amministrazzjonijiet nazzjonali u reġjonali ta' l-Istati Membri konċernati għandu jkollhom id-dritt li jieħdu sehem fi kwalunkwe laqgħa ta' Kunsill Konsultattiv Reġjonali bħala osservaturi attivi.

3.   Rappreżentant tal-Kumitat Konsultattiv dwar is-Sajd u l-Akwakultura għandu jkollu d-dritt li jieħu sehem fi kwalunkwe laqgħa ta' Kunsill Konsultattiv Reġjonali bħala osservatur attiv.

4.   Rappreżentanti tas-settur tas-sajd u gruppi ta' nteress oħra minn pajjiżi terzi, nklużi rappreżentanti minn Organizzazzjonijiet Reġjonali tas-Sajd, li għandhom interess fis-sajd fiż-żona jew sajd kopert minn Kunsill Konsultattiv Reġjonali jistgħu jiġu mistiedna jieħdu sehem f'dak il-Kunsill Konsultattiv Reġjonali bħala osservaturi attivi meta jiġu diskussi kwistjonijiet li jaffettwawhom.

5.   Il-laqgħat ta' l-assemblea ġenerali għandhom ikunu miftuħa għall-pubbliku. Il-laqgħat tal-kumitat eżekuttiv għandhom ikunu miftuħa għall-pubbliku sakemm, f'każijiet eċċezzjonali, ma jiġix deċiż mod ieħor b'maġġoranza tal-kumitat eżekuttiv.

Artikolu 7

Funzjonament

1.   Kunsilli Konsultattivi Reġjonali għandhom jadottaw il-miżuri meħtieġa għall-organizzazzjoni tagħhom inkluzi, kif xieraq, segretarjat u gruppi ta' ħidma.

2.   Kunsilli Konsultattivi Reġjonali għandhom jadottaw il-miżuri meħtieġa biex jassiguraw trasparenza fl-istadji kollha tal-proċess tat-teħid ta' deċiżjonijiet tagħhom. Rakkomandazzjonijiet adottati mill-kumitat eżekuttiv għandhom ikunu disponibbli immedjatament għall-assemblea ġenerali, għall-Kummissjoni, għall-Istati Membri konċernati u fuq talba, għal kwalunkwe membru tal-pubbliku.

3.   Il-membri tal-kumitat eżekuttiv għandhom, fejn hu possibbli, jadottaw rakkomandazzjonijiet b'kunsens. Jekk ma jistgħax jintlaħaq kunsens, l-opinjonijiet ta' membri li ma jaqblux għandhom jiġu reġistrati fir-rakkomandazzjonijiet adottati mill-maġġoranza tal-membri preżenti li jkunu qed jivvotaw. Meta tirċievi r-rakkomandazzjonijiet bil-miktub il-Kummissjoni u, fejn hu rilevanti, l-Istati Membri konċernati għandhom jirrisponduhom b'mod preċiż f'perijodu raġonevoli ta' żmien u, mhux iżjed tard minn tliet xhur wara.

4.   Kull Kunsill Konsultattiv Reġjonali għandu jaħtar president b'kunsens. Il-president għandu jaġixxi b'mod imparzjali.

5.   L-Istati Membri konċernati għandhom jagħtu s-sostenn xieraq, inkluża għajnuna loġistika, biex jiffaċilitaw il-funzjonament tal-Kunsill Konsultattiv Reġjonali.

Artikolu 8

Koordinazzjoni bejn Kunsilli Konsultattivi Reġjonali

Jekk kwistjoni tkun ta' nteress komuni għal żewġ Kunsilli Konsultattivi Reġjonali jew iżjed, huma għandhom jikkoordinaw il-pożizzjonijiet tagħhom biex jadottaw rakkomandazzjonijiet konġunti dwar dik il-kwistjoni.

Artikolu 9

Finanzjar

1.   Kunsill Konsultattiv Reġjonali li jkun kiseb personalità ġuridika jista' japplika għal għajnuna finanzjarja mill-Komunita.

2.   Għajnuna tal-bidu mill-Komunità tista' tingħata għall-ispejjeż tal-funzjonament ta' Kunsill Konsultattiv Reġjonali fl-ewwel ħames snin tiegħu skond il-kondizzjonijiet stabbiliti fl-Anness II, Parti 1.

3.   Għajnuna mill-Komunità tista' tingħata għall-ispejjeż ta' l-interpretazzjoni u traduzzjoni tal-laqgħat tal-Kunsilli Konsultatattivi Reġjonali kif stabbilit fl-Anness II Parti 2.

4.   L-ammont finanzjarju ta' riferiment għall-implimentazzjoni ta' din l-azzjoni għall-perijodu 2004-2011 għandu jkun ta' EUR 7 596 000. Għall-perijodu wara l-31 ta' Diċembru 2006, l-ammont għandu jitqies li ġie kkonfermat jekk għal din il-fażi, jkun konsistenti mal-perspettivi finanzjarji fis-seħħ għall-perjodu li jibda fl-2007. L-approprjazzjonijiet annwali għandhom jiġu awtorizzati mill-awtorità tal-budget fil-limiti tal-perspettiva finanzjarja.

Artikolu 10

Rapport Annwali u Verifika

1.   Kull Kunsill Konsultattiv Reġjonali għandu jibgħat rapport annwali dwar l-attivitajiet tiegħu lill-Kummissjoni, lill-Istati Membri konċernati u lill-Kumitat Konsultattiv dwar is-Sajd u l-Akwakultura qabel il-31 ta' Marzu tas-sena wara dik koperta mir-rapport.

2.   Il-Kummissjoni jew il-Qorti ta' l-Awdituri jistgħu, fi kwalunkwe żmien, jirranġaw biex issir verifika jew minn korp barrani magħżul minnha jew mill-Kummissjoni jew mid-dipartimenti tal-Qorti ta' l-Awdituri nfushom.

3.   Kull Kunsill Konsultattiv Reġjonali għandu jaħtar awditur awtorizzat għat-tul tal-perijodu meta hu jkun qed jibbenefika minn fondi Komunitarji.

Artikolu 11

Reviżjoni

Tliet snin wara d-data meta jibda jaħdem l-aħħar Kunsill Konsultattiv Reġjonali, jew, mhux iżjed tard mit-30 ta' Ġunju 2007, il-Kummissjoni għandha tirrapporta lill-Parlament Ewropew u lill-Kunsill dwar l-implimentazzjoni ta' din id-Deċiżjoni u l-funzjonament tal-Kunsilli Konsultattivi Reġjonali.

Artikolu 12

Dħul fis-seħħ

Din id-Deċiżjoni għandha tidħol fis-seħħ fis-seba' jum wara li tkun ġiet ippublikata fil-Ġurnal Uffiċjali ta' l-Unjoni Ewropea.

---

(1)  Opinjoni mogħtija fl-1 ta' April 2004 (għadha mhux pubblikata fil-Ġurnal Uffiċjali).

(2)  Opinjoni mogħtija fis-26 ta' Frar 2004 (għadha mhux pubblikata fil-Ġurnal Uffiċjali).

(3)  ĠU L 358, tal-31.12.2002, p. 59. Regolament kif l-aħħar emendat mir-Regolament tal-Kunsill (KE) Nru 1242/2004 (ĠU L 236, tas-7.7.2004, p. 1).

(4)  ĠU L 187, ta' l-20.7.1999, p. 70.

(5)  ĠU C 172, tat-18.6.1999, p. 1. Ftehim kif l-aħħar emendat mid-Deċiżjoni tal-Parlament Ewropew u tal-Kunsill 2003/429/KE (ĠU L 147, ta' l-14.6.2003, p. 25).

---

---

---