32004D0185

Id-Deċiżjoni tal-Kunsill

tad-19 ta' Frar 2004

li tikkonċerna l-adozzjoni ta' program supplimentari tar-riċerka li għandu jiġi implimentat miċ-Ċentru Konġunt tar-Riċerka għal Komunità Ewropea dwar l-Enerġija Atomika

(2004/185/Euratom)

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea dwar l-Enerġija Atomika u b'mod partikolari l-Artikolu 7 tiegħu,

Wara li kkunsidra l-proposta mill-Kummissjoni mogħtija wara konsultazzjoni mal-Kumitat Xjentifiku u Tekniku,

Wara li kkunsidra l-opinjoni tal-Bord tal-Gvernaturi taċ-Ċentru Konġunt tar-Riċerka (JRC),

Billi:

(1) Fil-qafas taż-żona ta' riċerka Ewropea, il-programm supplimentari tar-riċerka li jinvolvi r-reattur bi fluss għoli (HFR) huwa wieħed mill-mezzi prinċipali li jinsab fid-disposizzjoni ta' l-Unjoni sabiex jikkontribwixxi għal teknoloġiji nukleari mingħajr periklu, għar-riċerka dwar il-materjali għall-fużjoni termonukleari, għal riċerka fundamentali, għal riċerka medika u applikazzjonijiet mediċi u għal taħriġ f'dawn l-oqsma.

(2) Il-kontribuzzjonijiet finanzjarji għal dan il-programm supplimentari jiġu direttament mill-Olanda u minn Franza,

ADOTTA DIN ID-DEĊIŻJONI:

Artikolu 1

Il-programm ta' riċerka supplimentari dwar l-operat tal-HFR, minhawn 'il quddiem imsejjaħ "il-programm", li l-għanijiet tiegħu huma mniżżla fl-Anness I, qiegħed jiġi adottat permezz ta' din id-Deċiżjoni għal perjodu ta' tliet snin, li jibdew mill-1 ta' Jannar 2004.

Artikolu 2

Il-kontribuzzjonijiet finanzjarji stmati u li huma neċessarji għall-eżekuzzjoni tal-programm jammontaw għal xi EUR 30,6 miljun. It-tqassim tal-kontribuzzjonijiet qiegħda tingħata fl-Anness II. Din tinkludi disposizzjoni għad-dekommissjoni tar-reattur.

Artikolu 3

Il-Kummissjoni għandha tkun responsabbli għal implimentazzjoni tal-programm, u għal dan il-għan, għandha tagħmel użu mis-servizzi tal-JRC. Il-Bord tal-Gvernaturi tal-JRC għandhom jinżammu nformati dwar l-implimentazzjoni tal-programm.

Artikolu 4

Il-Kummissjoni għandha ta' kull sena, qabel il-15 ta' Ġunju, tagħti lil Parlament Ewropew, lill-Kunsill u lill-Kumitat Ekonomiku u Soċjali Ewropew rapport dwar l-implimentazzjoni ta' din id-Deċiżjoni.

Artikolu 5

Din id-Deċiżjoni hija indirizzata lill-Istati Membri.

Magħmula fi Brussel, 9 ta' Frar 2004.

Għall Kunsill

Il-President

M. McDowell

--------------------------------------------------

ANNESS I

GĦANIJIET XJENTIFIĊI U TEKNIĊI

L-għanijiet tal-programm huma primarjament:

1. Sabiex jipprovdi aktar minn 250 ġurnata fis-sena ta' operazzjoni tal-HFR sabiex jiggarantixxi d-disponibbiltà ta' newtroni għal esperimenti.

2. Sabiex jippermetti l-użu razzjonali ta' dan ir-reattur skond il-bżonnijiet ta' l-istituzzjonijiet tar-riċerka li jkunu jeħtieġu l-appoġġ ta' HFR f'oqsma bħal: it-titjib tas-sigurtà eżistenti tar-reatturi nukleari, saħħa, inkluż l-iżvilupp ta' isotopi mediċi biex iwieġbu għal mistoqsijiet mediċi u l-ittestjar ta' tekniki mediċi terapewtiċi, il-fużjoni, riċerka u taħriġ fundamentali u l-immaniġjar ta' l-iskart, inkluża l-possibbiltà li jiġi żviluppat karburanti nukleari għall-eliminazzjoni tal-plutonju tal-grad ta' armi.

--------------------------------------------------

ANNESS II

SKOMPOSIZZJONI TAL-KONTRIBUZZJONIJIET

Il-kontribuzzjonijiet tal-programm għandhom jiġu mill-Olanda u minn Franza.

It-tqassim tal-kontribuzzjonijiet hi kif ġejja:

L-Olanda: EUR 29,75 miljun

Franza: EUR 0,90 miljun

Total: EUR 30,65 miljun

--------------------------------------------------