This document is an excerpt from the EUR-Lex website
Document 32001R0939
Commission Regulation (EC) No 939/2001 of 14 May 2001 laying down detailed rules for the application of Council Regulation (EC) No 104/2000 as regards the grant of flat-rate aid for certain fishery products
IR-Regolament tal-Kummissjoni (KE) Nru 939/2001 tal-14 ta' Mejju 2000 li jistabilixxi regoli dettaljati għall-applikazzjoni tar-Regolament tal-Kunsill (KE) Nru 104/2000 rigward l-għoti ta' għajnuna b'rata fissa għal ċerti prodotti tas-sajd
IR-Regolament tal-Kummissjoni (KE) Nru 939/2001 tal-14 ta' Mejju 2000 li jistabilixxi regoli dettaljati għall-applikazzjoni tar-Regolament tal-Kunsill (KE) Nru 104/2000 rigward l-għoti ta' għajnuna b'rata fissa għal ċerti prodotti tas-sajd
ĠU L 132, 15.5.2001, p. 10–13
(ES, DA, DE, EL, EN, FR, IT, NL, PT, FI, SV) Dan id-dokument ġie ppubblikat f’edizzjoni(jiet) speċjali
(CS, ET, LV, LT, HU, MT, PL, SK, SL, BG, RO, HR)
No longer in force, Date of end of validity: 31/12/2013; Imħassar b' 32013R1420
Official Journal L 132 , 15/05/2001 P. 0010 - 0013
IR-Regolament tal-Kummissjoni (KE) Nru 939/2001 tal-14 ta' Mejju 2000 li jistabilixxi regoli dettaljati għall-applikazzjoni tar-Regolament tal-Kunsill (KE) Nru 104/2000 rigward l-għoti ta' għajnuna b'rata fissa għal ċerti prodotti tas-sajd IL-KUMMISSJONI TAL-KOMUNITAJIET EWROPEJ, Wara li kunsidrat it-Trattat li jistabbilixxi il-Komunità Ewropea, Wara li kunsidrat ir-Regolament tal-Kunsill (KEE) Nru 104/2000 tas-17 ta' Diċembru 1992 dwar l-organizzazzjoni komuni tas-suq fil-prodotti tas-sajd u l-akwakultura [1], u b'mod partikolari l-Artikolu 24(8) tiegħu, Billi: (1) L-Artikolu 24 tar-Regolament (KE) Nru 104/2000, li rrevoka r-Regolament tal-Kunsill (KEE) Nru 3759/92 [2] b'effett mill-1 ta' Jannar 2001, jipprovdi biex għajnuna b'rata fissa tingħata taħt ċerti kondizzjonijiet lil organizzazzjonijiet tal-produtturi li jiritiraw mis-suq il-prodotti elenkati fl-Anness IV ta' dak ir-Regolament. (2) Fl-interess ta' l-armonizzazzjoni u s-simplifikazzjoni, il-proċeduri meħtieġa fil-kuntest ta' għajnuna b'rata fissa għandhom ikunu l-istess bħal dawk li japplikaw għall-kumpens finanzjarju u l-għajnuna għall-konservazzjoni, kif stabbiliti fir-Regolament tal-Kummissjoni (KE) Nru 2509/2000 tal-15 ta' Novembru 2000 li jistabbilixxi r-regoli dettaljati għat-tħaddim tar-Regolament tal-Kunsill (KE) Nru 104/2000 dwar l-għoti ta' kumpens finanzjarju għall-irtirar ta' ċerti prodotti tas-sajd [3] u r-Regolament tal-Kummissjoni (KE) Nru 2814/2000 tal-21 ta' Diċembru 2000 li jistabbilixxi r-regoli dettaljati għat-tħaddim tar-Regolament tal-Kunsill (KE) Nru 104/2000 dwar l-għoti ta' għajnuna carry-over għal ċerti prodotti tal-sajd [4]. (3) Il-kondizzjonijiet għall-għoti ta' għajnuna b'rata fissa għandhom għalhekk jiġu stabbiliti abbażi tar-Regolament tal-Kummissjoni (KEE) Nru 4176/88 tat-28 ta' Diċembru 1988 li jistabbilixxi r-regoli dettaljati għal-għoti ta' għajnuna b'rata fissa għal ċerti prodotti tas-sajd [5], skond kif l-aħħar emendat permezz tar-Regolament (KE) Nru 3516/93 [6], għandhom jiġu revokati. L-Artikolu 6(1) tar-Regolament tal-Kunsill (KE) Nru 2406/96 tas-26 ta' Novembru 1996 li jistabblixxi standards komuni għall-marketing ta' ċerti prodotti tas-sajd [7], skond kif l-aħħar emendat permezz tar-Regolament (KE) Nru 2578/2000 [8], jipprovdi li l-prodotti li jiġu klassifikati bħala kategorija B m'humiex eliġibbli għall-assistenza finanzjarja mogħtija dwar l-irtirar kif previst fl-organizzazzjoni tas-suq komuni. Peress li prodotti ta' kwalità Extra "E" u "A" biss huma eliġibbli għall-għajnuna b'rata fissa deskritta fl-Artikolu 24 tar-Regolament (KE) Nru 104/2000, il-kalkolu tal-kwantitajiet eliġibbli għal din l-għajnuna għandu jiġi ibbażat biss fuq dawn il-kategoriji ta' prodotti. (4) Għandhom jiġu stabbiliti l-kondizzjonijiet li jridu jiġu osservati mill-organizzazzjonijiet tal-produtturi fil-kuntest ta' l-iskema tal-għajnuna b'rata fissa. (5) L-għajnuna b'rata fissa tista' titħallas biss fl-aħħar tas-sena tas-sajd. Iżda, għandu jkun hemm disposizzjoni għall-possibiltà li jingħataw flus bil-quddiem bil-kondizzjoni li tiġi depożitata garanzija. (6) L-Istati Membri għandhom jiġu awtorizzati biex jistabbilixxu l-valur standard użat biex tiġi kalkulata l-għajnuna b'rata fissa analizzata skond id-destinazzjoni tal-prodotti rtirati kif previst fir-Regolament tal-Kummissjoni (KEE) Nru 1501/83 tad-9 ta' Ġunju 1983 dwar it-tneħħija ta' ċerti prodotti tas-sajd li kienu suġġetti għall-miżuri biex jistabilizzaw is-suq [9], kif l-aħħar emendat permezz tar-Regolament (KEE) Nru 1106/90 [10]. (7) Bħala għajnuna biex tiġi garantita l-kwalità tal-prodott u t-tqegħid fis-suq ta' dawn il-prodotti, il-kondizzjonijiet minimi applikabbli għall-ipproċessar, u l-kondizzjonijiet li għandhom x'jaqsmu mal-ħażna u r-rilaxx mill-ġdid fis-suq tal-prodotti pproċessati għandhom jiġu stabbiliti. (8) Ir-riċevituri tal-għajnuna għandhom iżommu reġistru dwar l-istokk li jkun fih iċ-ċifri tar-rilaxx fis-suq, l-irtirar mis-suq u l-ammonti (f'kilogrammi) li jitħallew minn xahar għal ieħor sabiex tiżdied l-effiċjenza tal-verifiki u dawn għandhom jagħtu din l-informazzjoni lill-Istat Membru. Ikun biżżejjed għall-finijiet tal-ġestjoni tajba tal-mekkaniżmu li jintalbu r-reġistri dwar l-istokk matul il-perjodi minimi tal-ħażna. (9) Il-miżuri previsti f'dan ir-Regolament huma skond l-opinjoni tal-Kumitat għall-Ġestjoni tal-Prodotti tas-Sajd, ADOTTAT DAN IR-REGOLAMENT: KAPITOLU I Disposizzjonijiet ġenerali Artikolu 1 Biex jikkwalifikaw għall-għajnuna b'rata fissa, l-organizzazzjonijiet tal-produtturi għandhom jibagħtu lill-awtoritajiet kompetenti fl-Istat Membru l-lista ta' prodotti elenkati skond il-kategorija u l-prezz awtonomu ta' l-irtirar imsemmi fl-Artikolu 24(1) tar-Regolament (KE) Nru 104/2000 qabel il-bidu tas-sena tas-sajd. L-organizzazzjonijiet tal-produtturi jistgħu japplikaw prezz awtonomu ta' l-iritirar li jaqbeż il-livell massimu msemmi fl-Artikolu 24(1)(a) tar-Regolament (KE) Nru 104/2000 għal kategorija waħda ta' prodott jew aktar. Iżda, dawn jitilfu l-jedd għall-għajnuna b'rata fissa għall-kategorija jew il-kategoriji li dwarhom jinqabeż il-livell massimu. Artikolu 2 L-għajnuna b'rata fissa għandha titħallas lill-organizzazzjoni tal-produtturi konċernata biss kemm-il darba l-awtoritajiet kompetenti fl-Istat Membru in kwistjoni jkunu sodisfatti li l-kwantitajiet li dwarhom issir l-applikazzjoni għall-għajnuna ma jaqbżux il-limitu mogħti fl-Artikolu 24(5) tar-Regolament (KE) Nru 104/2000. KAPITOLU II Il-kondizzjonijiet biex tingħata l-għajnuna bir-rata fissa kif imsemmi fl-Artikolu 24(2) tar-Regolament (KE) Nru 104/2000 (minn issa 'l quddiem imsejjaħ "kumpens b'rata fissa") Artikolu 3 Ir-rekwiżiti stabbiliti fl-Artikoli minn 1 sa 4 u l-Artikolu 7 tar-Regolament (KE) Nru 2509/2000 għandhom jgħoddu mutatis mutandis għall-għoti ta' kumpens b'rata fissa. Artikolu 4 L-Istati Membri għandhom jistabbilixxu l-valur standard li għandu jintuża biex jiġu kkalkulati l-kumpens b'rata fissa u l-flus mogħtija bil-quddiem marbuta magħhom, analizzati skond id-destinazzjoni tal-prodotti irtirati kif imsemmi fl-Artikolu 1(b), (ċ), u (d) tar-Regolament (KEE) Nru 1501/83. Il-valur standard għandu jiġi stabbilit fil-bidu tas-sena tas-sajd u għandu jkun l-istess għall-organizzazzjonijiet tal-produtturi kollha rikonoxxuti mill-Istat Membru konċernat, billi tintuża bħala bażi l-medja ta' l-introjti mit-tneħħija permezz tal-ħwienet fl-Istati Membri konċernati matul is-sitt xhur ta' qabel ma jiġi stabbilit dak il-valur. Dak il-livell għandu jiġi emendat jekk bidliet sinifikanti u fit-tul jiġu notati fl-introjti fis-suq ta' l-Istat Membru konċernat. KAPITOLU III Il-kondizzjonijiet biex tingħata l-għajnuna bir-rata fissa msemmija fl-Artikolu 24(2) tar-Regolament (KE) Nru 104/2000 (minn issa 'l quddiem magħrufa bħala "il-premju bir-rata fissa") Artikolu 5 1. L-ammont tal-premju bir-rata fissa għandu jiġi stabbilit qabel il-bidu ta' kull sena tas-sajd skond il-proċedura msemmija fl-Artikolu 38(2) tar-Regolament (KE) Nru 104/2000. L-ammont għandu jiġi stabbilit skond il-piż unitarju, li għandu jiġi applikat għall-piż nett ta' kull prodott elenkat fl-Anness IV ta' dak ir-Regolament. 2. L-ammont tal-premju bir-rata fissa għandu jiġi kalkolat abbażi ta' l-ispejjeż tekniċi reali u finanzjarji ta' l-operat meħtieġa għall-istabbiltà u l-ħażna tal-prodotti in kwistjoni kif irreġistrati fil-Komunità matul is-sena tas-sajd preċedenti. 3. Dawn li ġejjin għandhom jitqiesu bħala spejjeż tekniċi: (a) spejjeż ta' l-enerġija; (b) spejjeż relattati max-xogħol tal-ħażna u r-rilaxx mill-ħażna; (ċ) spiża ta'materjal għall-ippakkjar dirett; (d) spejjeż ta' proċessar (ingredjenti); (e) spiża tat-trasport mill-post tal-ħatt għall-post ta' l-ipproċessar. 4. L-ispejjeż finanzjarji għandhom ikunu somma b'rata fissa ta' 10 ewro kull tunnellata metrika għas-sena 2001. Minn hemm 'il quddiem l-ammont bir-rata fissa għandu jiġi aġġustat kull sena billi tintuża r-rata ta' l-interessi stabbilita ta' kull sena skond l-Artikolu 5 tar-Regolament tal-Kunsill (KEE) Nru 1883/78 [11]. 5. Il-livell tal-premju bir-rata fissa stabbilit għas-sena tas-sajd in kwistjoni għandu jgħodd għall-prodotti li jidħlu fil-ħażna matul dik is-sena, irrispettivament mit-tmiem tal-perjodu tal-ħażna. Artikolu 6 L-Artikolu 3(1) u (2) u l-Artikolu 4 tar-Regolament (KE) Nru 2814/2000 għandhom jgħoddu mutatis mutandis għall-għoti tal-premju bir-rata fissa. Artikolu 7 Il-premju bir-rata fissa għandu jitħallas lill-organizzazzjoni tal-produtturi konċernata biss kemm-il darba l-awtoritajiet kompetenti fl-Istat Membru konċernat jissodisfaw ruħhom li l-kwantitajiet li dwarhom tkun saret applikazzjoni għall-premju ikunu ġew ġew ipproċessati jew maħżuna, jew ippreservati, u sussegwentement maħruġa lura fis-suq, skond l-Artikolu 4 tar-Regolament (KE) Nru 2814/2000. KAPITOLU IV Disposizzjonijiet finali Artikolu 8 1. L-applikazzjonijiet għall-premju tal-għajnuna bir-rata fissa għandhom jitressqu mill-organizzazzjoni tal-produtturi kkonċernata lill-awtoritajiet kompenti ta' l-Istat Membru mhux aktar tard minn erba' xhur wara t-tmiem tas-sena tas-sajd in kwistjoni. Dawn għandu jkollhom ta' lanqas l-informazzjoni stabbilita fl-Anness. 2. Premji bil-quddiem għandhom jingħataw kull xahar fuq talba tal-organizzazzjoni tal-produtturi konċernata għall-kwantitajiet iritrati jew imħollija, bil-kondizzjoni li din tagħmel garanzija ta' mill-inqas 105 % ta' l-ammont avanzat. 3. L-ammont tal-ħlas jew ħlasijiet bil-quddiem għandu jiġi stabbilit abbażi tal-proporzjon proviżorju tal-kwantitajiet irtirati meta mqabbla mal-kwantitajiet maħruġa għall-bejgħ matul il-perjodu in kwistjoni. Il-kalkolu tal-ammont għandu jiġi aġġustat kull xahrejn wara x-xahar in-kwistjoni abbażi tat-transazzjonijiet li jkunu attwalment saru u ġew irrapportati bl-użu tal-mudell stabbilit fl-Anness. 4. L-awtoritajiet nazzjonali għandhom iħallsu l-għajnuna bir-rata fissa sa tmien xhur mit-tmiem tas-sena tas-sajd. Kull Stat Membru għandu jinnotifika lill-Istati Membri l-oħra u lill-Kummissjoni bl-isem u l-indirizz tal-korp nominat sabiex iħallas l-għajnuna bir-rata fissa. Artikolu 9 1. L-Istati Membri għandhom jintroduċu sistema ta' verifiki sabiex jiċċekkjaw li l-informazzjoni mogħtija fl-applikazzjonijiet għall-ħlas tkun tikkorrispondi mal-kwantitajiet attwalment maħruġa għall-bejgħ u rtirati mis-suq mill-organizzazzjoni tal-produtturi konċernata. 2. L-organizzazzjonijiet tal-produtturi għandhom jiżguraw li l-benefiċjarji tal-għajnuna jżommu reġistru ta' l-istokk skond il-mudell stabbilit fl-Anness. 3. L-organizzazzjonijiet tal-produtturi għandhom jikkomunikaw id-data, l-ispeċi u l-kwantità tal-prodotti rtirati jew imħollija lill-Istat Membru kull xahar. Artikolu 10 L-Istati Membri għandhom jinfurmaw lill-Kummissjoni bil-miżuri meħuda skond dan ir-Regolament malli dawn jiġu addottati, u f'kull każ qabel l-1 ta' Lulju 2001. Dawn għandhom jinfurmaw lill-Kummissjoni bil-miżuri eżistenti fil-qasam kopert bl-Artikolu 9(1) qabel l-1 ta' Lulju 2001. Artikolu 11 Ir-Regolament (KEE) Nru 4176/88 qed jiġi revokat. Artikolu 12 Dan ir-Regolament għandu jidħol fis-seħħ fis-seba' jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej. Dan għandu jibda jgħodd mill-1 ta' Ġunju 2001. Dan ir-Regolament għandu jorbot fl-intier tiegħu u japplika direttament fl-Istati Membri kollha. Magħmul fi Brussell, fl-14 ta' Mejju 2001. Għall-Kummissjoni. Franz Fischler Membru tal-Kummissjoni. [1] ĠU L 17, 21.01.2000, p. 22. [2] ĠU L 388, 31.12.1992, p. 1. [3] ĠU L 289, 16.11.2000, p. 11. [4] ĠU L 326, 22.12.2000, p. 34. [5] ĠU L 367, 31.12.1988, p. 63. [6] ĠU L 320, 22.12.1993, p. 10. [7] ĠU L 334, 23.12.1996, p. 1. [8] ĠU L 298, 25.11.2000, p. 1. [9] ĠU L 152, 10.06.1983, p. 22. [10] ĠU L 111, ta' l-1.5.1990, p. 50. [11] ĠU L 216, tal-5.8.1978, p. 1. -------------------------------------------------- ANNESS +++++ TIFF +++++ --------------------------------------------------