This document is an excerpt from the EUR-Lex website
Document 31997R0686
Council Regulation (EC) No 686/97 of 14 April 1997 amending Regulation (EEC) No 2847/93 establishing a control system applicable to the common fisheries policy
Ir-Regolament tal-Kunsill (KE) Nru 686/97 ta' l-14 ta'April 1997 li jemenda r-Regolament (KEE) Nru 2847/93 li jistabbilixxi sistema ta' kontroll applikabbli għall-politika komuni tas-sajd
Ir-Regolament tal-Kunsill (KE) Nru 686/97 ta' l-14 ta'April 1997 li jemenda r-Regolament (KEE) Nru 2847/93 li jistabbilixxi sistema ta' kontroll applikabbli għall-politika komuni tas-sajd
ĠU L 102, 19.4.1997, p. 1–3
(ES, DA, DE, EL, EN, FR, IT, NL, PT, FI, SV) Dan id-dokument ġie ppubblikat f’edizzjoni(jiet) speċjali
(CS, ET, LV, LT, HU, MT, PL, SK, SL, BG, RO, HR)
No longer in force, Date of end of validity: 31/12/2010
Official Journal L 102 , 19/04/1997 P. 0001 - 0003
Ir-Regolament tal-kunsill (KE) Nru 686/97 ta' l-14 ta'April 1997 li jemenda r-Regolament (KEE) Nru 2847/93 li jistabbilixxi sistema ta' kontroll applikabbli għall-politika komuni tas-sajd IL-KUNSILL TA' L-UNJONI EWROPEA, Wara li kkunsidrat it-Trattat li jistabilixxi l-Komunità Ewropea, u partikolarment l-Artikolu 43 miġjub fih, Wara li kkunsidraw il-proposta mressqa mill-Kummissjoni [1], Wara li kkunsidra l-opinjoni tal-Parlament Ewropew [2]; Filwaqt li lis-skorti tal-ħut ġew sfruttati żżejjed matul dawn l-aħħar snin, u għaldaqstant hemm bżonn ta' ħidmiet sinjifikanti ta' sorveljanza u ta' kontroll tal-attivitajiet tas-sajd sabiex tiġi rmedjata din is-sitwazzjoni; Filwaqt li hemm il-bżonn ta' miżuri effettivi taħt il-profil ta' ġestjoni u ta' spejjeż, u li jtejbu d-disponibilità u l-eżattezza tal-informazzjoni, bħall-introduzzjoni ta' sistemi ta' sorveljanza ta' bastimenti bis-satellita; Filwaqt li, skond l-Artikolu 3 ta' Regolament (KEE) Nru 2847/93 [3], il-Kunsill jista' jiddeċiedi li tiġi stabbilita sistema ta' kontroll kontinwu ta' lokazzjoni għall-bastimenti tas-sajd tal-Komunità; Filwaqt li l-esperjenza miksuba fl-applikazzjoni ta' proġetti pilota li għandhon jiġu mwettqa mill-Istati Membri skond ir-Regolament tal-Kummissjoni (KE) Nru 897/94 tat-22 ta'April 1994 li jiddetta regoli dettaljati għall-applikazzjoni tar-Regolament tal-Kunsill (KEE) Nru 2847/93 f'dak li għandu x'jaqsam ma' proġetti pilota dwar kontrolli kontinwi ta' lokazzjoni ta' bastimenti tas-sajd tal-Komunità [4], uriet li bosta sistemi ta' kontrolli ta' bastimenti bis-satellita jistgħu jintużaw sabiex jistabbilixxu l-lokazzjoni tal-bastimenti tas-sajd; Billi l-kontroll kontinwu bis-satellita ta' ċertu kategoriji ta' bastimenti tas-sajd tal-Komunità għandu jġib ‘il quddiem l-ħidma amministrattiva, is-sorveljanza ta' inħawi sensittivi, il-kontrolli doppji tal-ġurnali t'abbord, u l-kontrolli tal-iżbarkar; Billi s-sistema ta' kontroll ta' bastimenti bis-satellita għandha tapplika għal bastimenti tas-sajd tal-Komunità li jaħdmu fl-ibħra ta' pajjiżi terzi biss fil-każ fejn il-pajjiż jew pajjiżi terzi in kwistjoni aċċettaw l-obligazzjoni li japplikaw sistema ta' kontroll ta' bastimenti bis-satellita għall-bastimenti tagħhom li jaħdmu fl-ibħra tal-Komunità; Billi huwa xieraq li jaċċettaw l-obbligu li japplikaw sistema ta' kontroll ta' bastimenti bis-satellita għal ċerti bastimenti tal-Komunità li jaħdmu esklussivament f'sajd mal-kosta u sajd ta' vjaġġi qosra; Billi s-sistema ta' kontroll ta' bastimenti bis-satellita għandha tassigura li komunikazzjonijiet minn bastimenti tal-Komunità jaslu għand l-Istat tal-bandiera tal-bastiment u mill-kosta tal-Istat Membru fl-istess ħin; Billi huwa xieraq li jkun hemm il-ħsieb li jitwaqqfu sistemi alternattivi għas-sistema ta' kontroll ta' bastimenti bis-satellita; filwaqt li Stat Membru li jitlob għal din il-possibiltà għandu jagħti prova li s-sistema alternattiva hi effettiva daqs is-sistema ta' kontroll ta' bastimenti bis-satellita, ADOTTAT DAN IR-REGOLAMENT: Artikolu 1 L-Artikolu 3 tar- Regolament (KEE) Nru 2847/93 hu minn issa mibdul bit-test segwenti: "Artikolu 3 1. Kull Stat Membru għandu jistabilixxi sistema ta' kontroll ta' bastimenti bis-satellita, minn issa ‘l quddiem issir referenza għaliha bħala "VMS", sabiex jikkontrolla l-lokazzjoni tal-bastimenti tas-sajd tal-Komunità. Il-VMS għandha tapplika mhux aktar tard mit-30 ta'Ġunju 1998 għall-bastimenti tas-sajd kollha tal-Komunità li huma akbar minn 20 metru bejn il-perpendikulari jew 24 metru tul b'kollox għal kwalunkwe waħda mill-kategorji segwenti: - bastimenti li jaħdmu fl-ibħra ewlenin, minbarra fil-baħar Mediterran, - bastimenti li jaħdmu fl-ibħra ta' pajjiżi terzi, sakemm ikunu saru klawsoli fil-Ftehim mal-pajjiż terz jew pajjiżi terzi relevanti għall-applikazzjoni ta' VMS għall-bastimenti ta' tali pajjiż jew pajjiżi li jaħdmu fl-ibħra tal-Komunità, - bastimenti li jaqbdu l-ħut li jibdluhom fi smida u żejt. 2. Il-VMS għandha tapplika mhux aktar tard mill-1 ta' Jannar 2000 għall-bastimenti kollha tas-sajd tal-Komunità li huma akbar minn 20 metru bejn il-perpendikulari jew 24 metru tul b'kollox kull fejn joperaw. Madankollu, il-bastimenti tas-sajd tal-Komunità li jaħdmu fl-ibħra ta' pajjiż jew pajjiżi terzi jkunu suġġetti għall-applikazzjoni ta' VMS biss fejn tali pajjiż jew pajjiżi terzi jkunu aċċettaw l-obbligazzjoni li japplikaw VMS għall-bastimenti tagħhom li jaħdmu fl-ibħra tal-Komunità. 3. Minkejja l-klawsoli ta' paragrafi 1 u 2 fuq, l-VMS m'għandiex tapplika għal bastimenti: (a) li joperaw esklussivament fi 12-il mil nawtiku mill-linja bażi tal-Istat Membru tal-bandiera; jew (b) li qatt ma għamlu aktar minn 24 siegħa fil-baħar mill-ħin tat-tluq sa meta jirritornaw lura fil-port. 4. Meta Stat Membru jimponi VMS fuq bastimenti li jtajru l-bandiera tiegħu u li ma jaqawx fl-iskop ta' paragrafi 1 sa 3, dawk il-bastimenti jkunu eliġibbli għall-istess għajnuna finanzjarja li tapplika għall-bastimenti li japplikaw VMS taħt paragrafi 1 u 2. 5. L-Istati Membri għandhom jassiguraw li jiġi nstallat b'mod effettiv apparat ta' mmarkar bis-satellita fuq bastimenti tas-sajd tal-Komunità li jtajru l-bandiera tagħhom li għalihom għandha tapplika VMS. L-apparat ta' mmarkar bis-satellita jippermetti bastiment tas-sajd li jikkomunika permezz ta' satellita mal-Istat tal-bandiera u mal-Istat Membru kostali kkonċernat fl-istess ħin, il-posizzjoni ġeografika tiegħu u fejn hemm bżonn ir-rapporti ta' ħidma li għalihom hemm referenza fl-Artikolu 19b. Fil-każ ta' forza maġġuri għandha tiġi kkomunikata informazzjoni relevanti permezz tar-radju fuq stazzjon tar-radju approvat taħt regoli tal-Komunità għar-riċeviment ta' din l-informazzjoni jew bil-mezzi speċifikati fl-Artikolu 19ċ. 6. Is-sidien tal-bastimenti tas-sajd tal-Komunità li għalihom tapplika VMS għandhom jassiguraw li l-apparati ta' mmarkar bis-satellita jaħdmu tajjeb f'kull ħin u li l-informazzjoni li għaliha hemm referenza fil-paragrafu 5 qed tiġi trasmessa. It-trasmissjoni għandha ssir bil-frekwenza ta' kuljum meħtieġa sabiex jiġi assigurat li l-Istat Membru tal-bandiera u/jew l-Istat Membru kostali jkun jista' jikkontrolla l-bastimenti b'mod effettiv. 7. L-Istati Membri għandhom jistabilixxu u jħaddmu ċentri ta' kontrolli tas-sajd, minn issa ‘l quddiem issir referenza għalihom bħala "FMS", li għandhom jikkontrollaw l-attivitajiet u l-kapaċita' tas-sajd. Il-FMS għandhom jibdew jaħdmu mhux aktar tard mit-30 ta' Ġunju 1998. Il-FMS ta' Stat Membru partikulari għandhom jikkontrollaw l-bastimenti li jtajru l-bandiera tiegħu, mingħajr ma jagħtu każ tal-ibħra li jkunu joperaw fihom jew il-port li jkunu qegħdin fih, kif ukoll ta' bastimenti tas-sajd tal-Komunità li jtajru l-bandiera ta' Stati Membri oħra u ta' bastimenti tas-sajd ta' pajjiżi terzi li għalihom tapplika VMS fl-ibħra taħt is-sovranita' jew il-ġurisdizzjoni ta' dak l-Istat Membru partikolari. 8. Kull Stat Membru tal-bandiera għandu jaħtar l-awtoritajiet kompetenti responsabbli għal-FMS u għandu jieħu l-miżuri adattati sabiex ikun żgurat li l-FMS tiegħu għandu r-riżorsi xierqa għall-persunal u huwa ekwippaġġat b' hardware u software tal-komputer li jippermetti pproċessar tad-data u trasmissjoni tad-data elettronika. L-Istati Membri għandhom jipprovdu għal proċeduri ta' back-up u rkupru fil-każ ta' falliment tas-sistema. L-Isati Membri jistgħu iħaddmu FMS flimkien. 9. L-Istat Membru tal-bandiera għandu jieħu l-miżuri neċessarji sabiex ikun żgurat li d-data li jirċievu l-bastimenti tas-sajd tiegħu li għalih tapplika VMS tkun rreġistrata b'mod li tkun tista' tinqara mill-kompjuter għal perjodu ta' tliet snin. L-Istat Membru kostali għandu jieħu l-miżuri neċessarji sabiex ikun żgurat li d-data li jirċievu l-bastimenti tas-sajd li jtajru l-bandiera ta' Stat Membru ieħor jew ta' pajjiż terz li għalihom tapplika VMS tkun rreġistrata b'mod ili tkun tista' tinqara mill-kompjuter għal perjodu ta' tliet snin. Il-Kummissjoni għandu jkollha aċċess għal dawn il-files tal-kompjuter fuq bażi ta' talba speċifika. Il-klawsoli ta' l-Artikolu 37 għandhom japplikaw. 10. Regoli dettaljati għall-implimentazzjoni ta' dan l-Artikolu għandhom jiġu deċiżi bi qbil mal-proċedura dettata fl-Artikolu 36. B'mod partikolari, fuq bażi ta' applikazzjoni ta' Stat Membru u bi qbil mal-klawsoli ta' l-Artikolu 36, il-Kummissjoni tista tiddeċiedi li tiġi applikata sistema alternattiva għal-VMS, waqt li jiġi kkunsidrat it-tip ta' sistema ta' kontroll propost, it-tip ta' bastiment jew bastimenti tas-sajd, il-post jew postijiet fejn isir is-sajd, l-ispeċi mmirati u t-tul tal-vjaġġi tas-sajd. Is-sistema alternattiva għandha tkun effettiva daqs VMS u tapplika fuq bażi mhux diskriminatorja.'" Artikolu 2 Dan ir-Regolament għandu jidħol fis-seħħ fis-seba' jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej. Dan ir-Regolament għandu jorbot fl-intier tiegħu u japplika direttament fl-Istati Membri kollha. Magħmul fil-Lussemburgu, fl-14 ta' April 1997. Għall-Kunsill Il-President J. Van Aartsen [1] ĠU C 209, tal-20.7.1996, p. 7. [2] ĠU C 20, tal-20.1.1997. [3] ĠU L 261, tal-20.10.1993, p. 1. Regolament kif l-aħħar emendat bir-Regolament (KE) Nru 2489/96 (ĠU L 338, tat-28.12.1996, p. 12). [4] ĠU L 104, tat-23.4.1994, p. 18. Regolament kif emendat bir-Regolament (KE) Nru 376/96 (ĠU L 51, ta' l-1.3.1996, p. 31). --------------------------------------------------