31995R2479

Ir-Regolament tal-Kummissjoni (KE) Nru 2479/95

tal-25 ta' Ottubru 1995

li jaddatta għall-progress tekniku r-Regolament tal-Kunsill (KEE) Nru 3821/85 dwar it-tagħmir ta' l-irrekordjar tat-trasport bit-triq

(Test b'relevanza ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KEE) Nru 3821/85 ta' l-20 ta' Diċembru 1985 dwar it-tagħmir ta' l-irrekordjar tat-trasport bit-triq [1], kif emendat l-aħħar mill-Att ta' l-Adeżjoni ta' l-Awstrija, il-Finlandja, u l-Isvezja, u b'mod partikolari l-Artikolu 17 tiegħu,

Billi huwa meħtieġ li jiġu eliminati l-possibilitajiet ta' frodi fl-użu tat-tagħmir elettroniku ta' l-irrekordjar fit-trasport bit-triq;

Billi fid-dawl ta' l-esperjenza u invista tal-progress tekniku fil-preżent huwa possibbli li jiġu protetti l-fili li jikkonnettjaw l-apparat mat-trasmettitur ta' l-impuls biex dawn isiru invjolabbli b'mezzi oħra għajr l-għata kontinwu ta' l-azzar protett kontra s-sadid li jkun miksi bil-plastik bit-trufijiet irbattuti, kif bħalissa huwa pprovdut għal dak il-għan;

Billi, wara li kkunsidrat kemm iservi t-tagħmir eżistenti li jirrekordja, hemm il-ħtieġa li tiġi implimentata din it-teknoloġija ġdida fin-normi tal-kostruzzjoni u ta' l-istallazzjoni tat-tagħmir elettroniku ta' l-irrekordjar tal-Komunità;

Billi l-miżuri pprovduti f'dan ir-Regolament huma skond l-opinjoni mogħtija mill-Kumitat għall-Adattament tar-Regolament (KE) Nru 3821/85 għall-Progress Tekniku,

ADOTTAT DAN IR-REGOLAMENT:

L-Artikolu 1

Il-Punt 5 tal-Kapitolu V ta' l-Anness I tar-Regolament (KEE) Nru 3821/85 qiegħed jiġi sostitwit minn dan li ġej:

"5. Il-fili li jikkonnettjaw it-tagħmir ta' l-irrekordjar mat-trasmettitur għandhom ikunu protetti minn għata kontinwu ta' l-azzar protett kontra s-sadid li jkun miksi bil-plastik bit-trufijiet irbattuti ħlief fejn protezzjoni ekwivalenti kontra l-manipulazzjoni tkun iggarantita b'mezzi oħra (per eżempju b'monitoraġġ elettroniku bħal ma hu l-encryption senjaletiku) li jkun kapaċi li jimmarka l-preżenza ta' kwalunkwe mekkanizmu, li ma jkunx neċessarju għall-operat korrett tat-tagħmir ta' l-irrekordjar u li jkollu l-iskop li jippreveni l-operat preċiż tat-tagħmir ta' l-irrekordjar b'short circuiting jew interruzzjoni jew permezz ta' modifika tad-data elettronika mis-sensor tal-veloċità u tad-distanza. Ġonta, li tkun komposta minn connections issiġillati, titqies bħala kontinwa fis-sens ta' dan ir-Regolament.

Il-monitoraġġ elettroniku hawn fuq imsemmi jista' jiġi ssostitwit minn kontroll elettroniku li jassigura li t-tagħmir ta' l-irrekordjar ikun kapaċi jirrekordja kwalunkwe moviment tal-vettura, indipendentement mis-sinjal tal-veloċità u s-sensor tad-distanza."

L-Artikolu 2

Dan ir-Regolament għandu jidħol fis-seħħ fit-tielet ġurnata wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan għandu jgħodd mill-1 ta' Jannar 1996.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fil-25 ta' Ottubru 1995.

Għall-Kummissjoni

Neil KINNOCK

Membru tal-Kummissjoni

[1] ĠU L 370, tal-31.12.1985, p. 8.

--------------------------------------------------