31992R3280

Ir-Regolament tal-Kunsill (KEE) Nru 3280/92

tad- 9 ta’ Novembru 1992

li jemenda r-Regolament (KEE) Nru 1576/89 li jistabilixxi r-regoli ġenerali dwar id-definizzjoni, id-deskrizzjoni u l-preżentazzjoni tax-xorb alkoħoliku.

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabbilixxi l-Komunità Ekonomika Ewropea, u b’mod partikolari l-Artikoli 43 u100a tiegħu,

Wara li kkunsidra l-proposta mill-Kummissjoni [1],

B’kooperazzjoni mal-Parlament Ewropew [2],

Wara li kkunsidra l-opinjoni tal-Kumitat Ekonomiku u Soċjali [3],

Billi l-użu ta’ kapsuli li fihom iċ-ċomb jew il-fojl bħala għata għall-mezzi ta’ għeluq fuq reċipjenti li fihom jitpoġġew fuq is-suq l-inbejjed aromatizzati, ix-xorb aromatizzat b’bażi ta’ inbid u l-cocktails aromatizzati magħmula mill-prodotti ta’ l-inbid għandu jiġi projbit sabiex ma jkunx hemm ir-riskju ta’ kontaminazzjoni, b’mod partikolari b’kuntatt aċċidentali ma’ dawk il-prodotti, u r-riskju ta’ tniġġiż ta’ l-ambjent minn skart li jkun fih ċomb li jinsab f’dawn il-kapsuli jew fojl; billi, madanakollu, il-manifatturi u l-utenti ta’ dawn il-kapsuli jew fojl għandhom jingħataw ż-żmien sabiex jaġġustaw u dana billi l-imsemmija projbizzjoni tibda tapplika mill-1 ta’ Jannar 1993 biss; billi huwa meħtieġ li l-prodotti li jkunu jinsabu fi fliexken bil-kapsuli b’bażi ta’ ċomb jew fojl qabel id-data hawn fuq imsemmija jitħallew jinbiegħu sakemm jispiċċa l-istokk kollu;

Billi għaldaqstant ir-Regolament (KEE) Nru 1576/89 [4] għandu jiġi emendat,

ADOTTAT DAN IR-REGOLAMENT:

Artikolu 1

Il-punt li ġej huwa miżjud ma’ l-Artikolu 7(2) tar-Regolament (KEE) Nru 1576/89:

"(e) Sa mill-1 ta’ Jannar 1993, ix-xorb alkoħoliku li jaqa’ taħt dan ir-Regolament ma jistax jinżamm bil-għan li jinbiegħ jew jitqiegħed fuq is-suq f’kontenituri li jkollhom mezzi ta’ għeluq mgħottija b’kapsuli b’bażi ta’ ċomb jew fojl. Mandanakollu, il-bejgħ ta’ xorb alkoħoliku fi fliexken li jkun attrezzati qabel dik id-data b’kapsuli jew fojl bħal dawn huwa awtorizzat sakemm jispiċċaw il-ħażniet."

Artikolu 2

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fid-9 ta’ Novembru 1992.

Għall-Kunsill

D. Hurd

Il-President

[1] ĠU Ċ 69, 18.3.1992, p. 12.

[2] ĠU Ċ 241, 21.9.1992, p. 98 au Deċiżjoni tat-28 ta’ Ottubru 1992 (għadha ma ġietx ippubblikata fil-Ġurnal Uffiċjali).

[3] ĠU Ċ 169, 6.7.1992, p. 1.

[4] ĠU L 160, 12.6.1989, p. 1.

--------------------------------------------------