31987R3846

Ir-Regolament tal-Kummissjoni (KEE) Nru 3846/87

tas-17 ta’ Diċembru 1987

li jistabbilixxi nomenklatura ta’ prodotti agrikoli għal rifużjoni ta' l-esportazzjoni

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ekonomika Ewropea,

Wara li kkunsidrat ir-Regolament tal-Kunsill (KEE) Nru 2727/75 tad-29 ta’ Ottubru 1975 dwar l-organizzazzjoni komuni tas-suq fiċ-ċereali [1], kif l-aħħar emendat bir-Regolament (KEE) Nru 1900/87 [2], u b’mod partikolari bl-Artikolu 16 tat-Trattat, u d-disposizzjonijiet li jikkorrispondu tar-regolamenti l-oħra dwar l-organizzazzjoni komuni tas-swieq tal-prodotti agrikoli,

Billi, skond ir-Regolament tal-Kunsill (KEE) Nru 2658/87 [3], għandha tidħol fis-seħħ nomenklatura ta’ oġġetti magħquda, ibbażata fuq dik is-sistema armonizzata u li tissodisfa kemm it-Tariffa Doganali Komuni u l-ħtiġiet ta’ l-istatistiċi tal-kummerċ estern tal-Komunità, fl-1 ta’ Jannar 1988;

Billi d-deskrizzjoni tal-prodott u n-numri ta’ tariffi li għandhom jintwerew fl-annessi għar-Regolamenti tal-Kummissjoni li jistabbilixxu r-rifużjoni ta’ l-esportazzjoni fuq il-prodotti agrikoli għandha tiġi fformulata billi tintuża n-nomenklatura magħquda bħala bażi;

Billi biex tiġi żgurata preżentazzjoni uniformi tal-listi ta’ prodotti agrikoli fuq liema jiġu mogħtija r-rifużjonijiet u biex tiġi żgurata l-applikazzjoni ta’ dawn, għandha tiġi mfassla nomenklatura għall-prodotti agrikoli sabiex din tintuża b’konnessjoni mar-rifużjonijiet ta’ l-esportazzjoni;

Billi huwa neċessarju f’ċerti każi, minħabba l-mod ta’ kif taħdem l-iskema tar-rifużjonijiet ta’ l-esportazzjoni, li jsiru sud-diviżjonijiet fin-nomenklatura magħquda; billi biex jiġu identifikati dawn is-sud-diviżjonijiet u sabiex jiġi ffaċilitat l-ipproċessar ta’ data li għandha x’taqsam ma’ prodotti li jaqgħu taħthom, għandhom jiġu mfassla kodiċijiet numeriċi bbażati fuq in-nomenklatura magħquda;

Billi fejn tiġi stabbilita rifużjoni fuq xi prodotti li jaqgħu taħt sub-intestatura ta' nomenklatura magħquda, jeħtieġ, sabiex tinżamm nomenklatura koerenti għar-rifużjonijiet u sabiex ikun jista' jsir l-ipproċessar mill-kompjuter, li tissemma' wkoll il-parti tas-sub-intestatura tan-nomenklatura magħquda fir-rigward ta’ liema ma tkun stabbilita l-ebda rifużjoni;

Billi l-miżuri li għalihom hemm provdut f’dan ir-Regolament huma skond l-opinjoni tal-kumitati amministrattivi rilevanti,

ADOTTAT DAN IR-REGOLAMENT:

Artikolu 1

B'dan il-mezz qiegħda tiġi introdotta nomenklatura ta’ prodotti agrikoli għall-użu b’konnessjoni mar-rifużjoni ta’ l-esportazzjoni, minn hawn ’il quddiem issir referenza għaliha bħala ‘in-nomenklatura tar-rifużjoni’, ibbażata fuq in-nomenklatura magħquda.

In-nomenklatura tar-rifużjoni għandha tkun kif murija fl-Anness ta’ hawnhekk.

Għandha tinkludi wkoll is-sud-diviżjonijiet addizzjonali għal dawk tan-nomenklatura magħquda, meħtieġa għad-deskrizzjoni ta’ l-oġġetti li għalihom jingħataw ir-rifużjonijiet ta' l-esportazzjoni, u n-numri tal-kodiċi kif speċifikati fl-Artikolu 2.

Artikolu 2

1. Kull sub-intestatura tan-nomenklatura tar-rifużjoni għandha tkun ipprovduta b’kodiċi numerika ta’ ħdax-il ċifra konsekuttiva kif ġej:

(a) l-ewwel tmien ċifri għandhom ikunu dawk tal-kodiċi numerika għas-sub-intestatura tan-nomenklatura magħquda relevanti;

(b) id-disa’, l-għaxar u l-ħdax-il ċifra għandhom jidentifikaw is-sub-intestatura tan-nomenklatura tar-rifużjoni. Jekk sub-intestatura ta' nomenklatura magħquda ma tkunx sud-diviża aktar f’nomenklatura tar-rifużjoni l-aħħar tliet ċifri għandhom ikunu ‘000’;

2. Fil-każ tat-tabakk, għandha tiġi miżjuda it-12-il figura mal-kodiċi tal-prodott meta jiġu ppubblikati l-ammonti tar-rifużjoni, għall-iskop li tiġi identifikata s-sena tal-ħsad.

Artikolu 3

In-nomenklatura tar-rifużjoni għandha tiġi użata mill-Kummissjoni u mill-Istati Membri għall-applikazzjoni tal-miżuri tal-Komunità li għandhom x’jaqsmu mar-rifużjoni ta’ l-esportazzjoni fuq prodotti agrikoli, u għandhom jiddaħħlu l-kodiċijiet numeriċi fuq id-dokumenti pprovduti għal dan l-iskop.

L-Istati Membri jistgħu jgħaqqdu n-nomenklatura tar-rifużjoni ma’ nomenklaturi oħra.

Il-Kummissjoni għandha tippubblika fil-Ġurnal Uffiċjali tal-Komunitajiet Ewropej, il-verżjoni sħiħa tan-nomenklatura tar-rifużjoni, kif issegwi mid-disposizzjonijiet regolatorji fuq l-arranġamenti ta’ l-esportazzjoni għall-prodotti agrikoli, jiġifieri biex tkun użata mill-1 ta’ Jannar ta’ kull sena.

Artikolu 4

Dan ir-Regolament għandu jidħol fis-seħħ fl-1 ta’ Jannar 1988.

Dan ir-Regolament għandu jorbot fl-intier tiegħu u jkun direttament applikabbli fl-Istati Membri kollha.

Magħmul fi Brussel, 17 ta’ Diċembru 1987.

Għall-Kummissjoni

Franza Andriessen

Il-Viċi-President

[1] ĠU L 281, 1.11.1975, p. 1.

[2] ĠU L 182, 3.7.1987, p. 40.

[3] ĠU L 256, 7.9.1987, p. 1.

--------------------------------------------------

ANNESS

NOMENKLATURA TA' PRODOTTI AGRIKOLI GĦAR-RIFUŻJONIJIET TA’ L-ESPORTAZZJONI

KONTENUT

1. Dqiq, tħin oħxon bil-qoxra, tħin oħxon ta' ċereali, qamħ jew segala

--------------------------------------------------