FTEHIM

għal kooperazzjoni xjentifika u teknoloġika bejn l-Unjoni Ewropea u r-Repubblika Għarbija tal-Eġittu li jistabbilixxi t-termini u l-kundizzjonijiet għall-parteċipazzjoni tar-Repubblika Għarbija tal-Eġittu fis-Sħubija fir-Riċerka u l-Innovazzjoni fiż-Żona tal-Mediterran (PRIMA)

L-UNJONI EWROPEA, (minn hawn 'il quddiem “l-Unjoni”),

minn naħa waħda,

u

R-REPUBBLIKA GĦARBIJA TAL-EĠITTU, (minn hawn 'il quddiem “l-Eġittu”),

min-naħa l-oħra,

minn hawn 'il quddiem “il-Partijiet”,

Billi l-Ftehim Ewro-Mediterranju li jistabbilixxi Assoċjazzjoni bejn il-Komunità Ewropea u l-Istati Membri tagħha, minn naħa waħda, u r-Repubblika Għarbija tal-Eġittu, min-naħa l-oħra (1) (il-“Ftehim Ewro-Mediterranju”), li daħal fis-seħħ fl-1 ta' Ġunju 2004, jipprevedi kooperazzjoni xjentifika u teknoloġika;

Billi l-Ftehim bejn il-Komunità Ewropea u r-Repubblika Għarbija tal-Eġittu dwar il-kooperazzjoni xjentifika u teknoloġika (2), li daħal fis-seħħ fis-27 ta' Frar 2008, jistabbilixxi qafas formali għall-kooperazzjoni tal-Partijiet fir-riċerka xjentifika u teknoloġika;

Billi d-Deċiżjoni (UE) 2017/1324 tal-Parlament Ewropew u tal-Kunsill (3) tirregola t-termini u l-kundizzjonijiet għall-parteċipazzjoni tal-Istati Membri tal-Unjoni u tal-Pajjiżi Assoċjati ma' Orizzont 2020 li huma Stati Parteċipanti tal-inizjattiva, b'mod partikolari l-obbligi finanzjarji tagħhom u l-parteċipazzjoni fl-istrutturi regolatorji tal-inizjattiva;

Billi skont it-termini tad-Deċiżjoni (UE) 2017/1324, l-Eġittu jsir Stat Parteċipant fil-parteċipazzjoni tal-Unjoni fis-Sħubija fir-Riċerka u l-Innovazzjoni fiż-Żona tal-Mediterran (“PRIMA”) soġġett għall-konklużjoni ta' ftehim internazzjonali għal kooperazzjoni xjentifika u teknoloġika mal-Unjoni li jistabbilixxi t-termini u l-kundizzjonijiet għall-parteċipazzjoni tal-Eġittu fi PRIMA;

Billi l-Eġittu esprima x-xewqa tiegħu li jissieħeb fi PRIMA bħala Stat Parteċipant, fl-istess livell tal-Istati Membri tal-Unjoni u tal-Pajjiżi Assoċjati ma' Orizzont 2020 li jipparteċipaw fi PRIMA;

Billi huwa meħtieġ ftehim internazzjonali bejn l-Unjoni u l-Eġittu biex jiġu rregolati d-drittijiet u l-obbligi tal-Eġittu bħala Stat Parteċipant fi PRIMA;

Billi l-kooperazzjoni u l-koordinazzjoni sħiħa bejn l-awtoritajiet kompetenti taż-żewġ Partijiet huma essenzjali għall-implimentazzjoni ta' dan il-Ftehim;

FTIEHMU KIF ĠEJ:

Artikolu 1

L-iskop

L-iskop ta' dan il-Ftehim huwa li jiġu stabbiliti t-termini u l-kundizzjonijiet għall-parteċipazzjoni tal-Eġittu fis-Sħubija fir-Riċerka u l-Innovazzjoni fiż-Żona tal-Mediterran (“PRIMA”).

Artikolu 2

Termini u kundizzjonijiet għall-parteċipazzjoni tal-Eġittu fi PRIMA

It-termini u l-kundizzjonijiet għall-parteċipazzjoni tal-Eġittu fi PRIMA għandhom ikun dawk stabbiliti fid-Deċiżjoni (UE) 2017/1324. Il-Partijiet għandhom jikkonformaw mal-obbligi stabbiliti bid-Deċiżjoni (UE) 2017/1324 u għandhom jieħdu l-miżuri xierqa, b'mod partikolari billi jipprovdu l-assistenza kollha meħtieġa sabiex jiżguraw l-applikazzjoni tal-Artikolu 10(2) u l-Artikolu 11(3) u (4) ta' dik id-Deċiżjoni. L-arranġamenti dettaljati għall-assistenza għandhom jiġu miftiehma bejn il-Partijiet, peress li dawn l-arranġamenti huma essenzjali għall-kooperazzjoni ta' bejniethom skont dan il-Ftehim.

Artikolu 3

Applikazzjoni territorjali

Dan il-Ftehim għandu japplika, minn naħa waħda, għat-territorji li fihom jiġu applikati t-Trattat dwar il-Funzjonament tal-Unjoni Ewropea u t-Trattat dwar l-Unjoni Ewropea u, min-naħa l-oħra, għat-territorju tal-Eġittu.

Artikolu 4

Applikazzjoni proviżorja, dħul fis-seħħ u durata

1.   Dan il-Ftehim għandu jiġi approvat mill-Partijiet skont il-proċeduri tagħhom stess.

2.   Dan il-Ftehim għandu jidħol fis-seħħ fid-data li fiha ż-żewġ Partijiet ikunu nnotifikaw lil xulxin permezz tal-kanali diplomatiċi li l-proċeduri msemmija fil-paragrafu 1 ġew konklużi. Wara l-iffirmar tiegħu u sakemm jidħol fis-seħħ, il-Partijiet għandhom japplikaw dan il-Ftehim b'mod proviżorju mid-data li fiha l-Unjoni tirċievi n-notifika mill-Eġittu dwar it-tlestija tal-proċeduri msemmija fl-ewwel paragrafu.

3.   Dan il-Ftehim għandu jibqa' fis-seħħ sakemm id-Deċiżjoni (UE) 2017/1324 tibqa' fis-seħħ, diment li ma jiġix terminat minn waħda mill-Partijiet skont l-Artikolu 5.

Artikolu 5

Terminazzjoni

1.   Kwalunkwe Parti tista' tittermina dan il-Ftehim fi kwalunkwe mument b'avviż bil-miktub li jinforma lill-Parti l-oħra bl-intenzjoni li tittermina dan il-Ftehim.

It-terminazzjoni għandha ssir effettiva sitt xhur wara d-data li fiha l-avviż bil-miktub ikun wasal għand id-destinatarju.

2.   Il-proġetti u l-attivitajiet li jkunu għaddejjin fil-mument tat-terminazzjoni ta' dan il-Ftehim għandhom jissoktaw sakemm jitlestew skont il-kundizzjonijiet stabbiliti f'dan il-Ftehim.

3.   Il-Partijiet għandhom jirriżolvu b'kunsens komuni kull konsegwenza oħra tat-terminazzjoni.

Artikolu 6

Riżoluzzjoni tat-tilwim

Il-proċedura ta' riżoluzzjoni tat-tilwim prevista fl-Artikolu 82 tal-Ftehim Ewro-Mediterranju għandha tapplika għat-tilwim kollu marbut mal-applikazzjoni jew l-interpretazzjoni ta' dan il-Ftehim.

Dan il-Ftehim għandu jitfassal b'kopji duplikati bil-Bulgaru, biċ-Ċek, bid-Daniż, bl-Estonjan, bil-Finlandiż, bil-Franċiż, bil-Ġermaniż, bil-Grieg, bl-Ingliż, bil-Kroat, bil-Latvjan, bil-Litwan, bil-Malti, bl-Olandiż, bil-Pollakk, bil-Portugiż, bir-Rumen, bis-Slovakk, bis-Sloven, bl-Ispanjol, bit-Taljan, bl-Ungeriż, bl-Iżvediż u bl-Għarbi, bit-testi kollha ugwalment awtentiċi.

(1)  ĠU L 304, 30.9.2004, p. 39.

(2)  ĠU L 182, 13.7.2005, p. 12.

(3)  Id-Deċiżjoni (UE) 2017/1324 tal-Parlament Ewropew u tal-Kunsill tal-4 ta' Lulju 2017 dwar il-parteċipazzjoni tal-Unjoni fis-Sħubija fir-Riċerka u l-Innovazzjoni fiż-Żona tal-Mediterran (PRIMA) li pparteċipaw fiha b'mod konġunt diversi Stati Membri (ĠU L 185, 18.7.2017, p. 1).