ID-DEĊIŻJONI NRU 1/2005 TAL-KUMITAT

tas-7 ta' Marzu 2005

stabbilit taħt il-Ftehim bejn il-Komunità Ewropea u l-Konfederazzjoni Żvizzera dwar Għarfien Reċiproku marbut ma' l-elenkar tal-Korp ta' Evalwazzjoni tal-Konformità li jaqa' taħt il-Kapitolu Settorjali dwar is-Sistemi ta' tagħmir u ħarsien maħsuba għall-użu f'atmosfera potenzjalment splussiva

(2005/291/KE)

IL-KUMITAT,

Wara li kkunsidra l-Ftehim bejn il-Komunità Ewropea u l-Konfederazzjoni Żvizzera dwar Għarfien Reċiproku marbut ma' evalwazzjoni tal-konformità, u b'mod partikolari l-Artikolu 10.4(a) u 11 tiegħu,

Billi l-Kumitat Konġunt għandu jieħu deċiżjoni li jelenka Korp jew Korpi ta' Evalwazzjoni tal-Konformità taħt Kapitolu Settorjali ta' l-Anness 1 tal-Ftehim;

IDDEĊIEDA KIF ĠEJ:

1.   Il-Korp ta' Evalwazzjoni tal-Konformità fl-Anness A jiżdied mal-lista ta' Korpi Żvizzeri ta' Evalwazzjoni tal-Konformità taħt il-Kapitolu Settorjali għas-Sistemi ta' tagħmir u ħarsien maħsuba għall-użu f'atmosfera potenzjalment splussiva fl-Anness 1 tal-Ftehim

2.   Il-firxa speċifika ta' l-inklużjoni fil-lista, f'termini ta' proċeduri ta' evalwazzjoni ta' prodotti u tal-konformità, tal-Korp għall-Evalwazzjoni tal-Konformità indikat fl-Anness A, ġiet mifthema mill-Partijiet u se tinżamm minnhom.

Din id-Deċiżjoni, magħmula f'żewġ kopji, għandha tiġi ffirmata minn rappreżentanti tal-Kumitat li huma awtorizzati li joperaw f'isem il-Partijiet għall-għan lil jemendaw il-Ftehim. Din id-Deċiżjoni tidħol fis-seħħ mid-data li fiha titniżżel l-aħħar firma.