(1)

Ir-Regolament (KE) Nru 999/2001 jistabbilixxi r-regoli għall-prevenzjoni, il-kontroll u l-eradikazzjoni tal-enċefalopatiji sponġiformi trażmissibbli (“TSEs”) fl-annimali. Dan japplika għall-produzzjoni u għall-kummerċjalizzazzjoni tal-annimali ħajjin u tal-prodotti li joriġinaw mill-annimali u, f’ċerti każijiet speċifiċi, għall-esportazzjonijiet tagħhom.

(2)

L-Anness X tar-Regolament (KE) Nru 999/2001 jistabbilixxi l-metodi tat-teħid ta’ kampjuni u tal-laboratorju għas-sejbien tat-TSEs.

(3)

Fl-Anness X, il-Kapitolu C tal-punt 3.2, l-ittri (a) u (b) tar-Regolament (KE) Nru 999/2001, ġie stabbilit l-obbligu li ssir eżaminazzjoni ulterjuri ta’ kampjuni ġejjin minn każijiet suspettużi kif ukoll ta’ kampjuni li jkunu ttieħdu waqt il-monitoraġġ tat-TSE li jkunu rriżultaw pożittivi fl-eżaminazzjoni ta’ konferma. Dan ir-rekwiżit ġie introdott bir-Regolament tal-Kummissjoni (KE) Nru 36/2005 (2) biex jinvestiga l-preżenza possibbli tal-BSE fl-annimali ruminanti żgħar.

(4)

Fit-28 ta’ Jannar 2005, ġie kkonfermat l-ewwel każ ta’ BSE f’annimal ruminant żgħir taħt kundizzjonijiet naturali f’mogħża maqtula fi Franza. Konsegwentement, ir-Regolament tal-Kummissjoni (KE) Nru 214/2005 (3) żied ir-rekwiżiti tal-ittestjar għall-mogħoż.

(5)

Minħabba l-identifikazzjoni ta’ żewġ każijiet possibbli ta’ kontaminazzjoni ta’ BSE fin-nagħaġ fi Franza u każ ieħor f’Ċipru fl-2006, ir-Regolament tal-Kummissjoni (KE) Nru 1041/2006 (4) estenda l-programm ta’ monitoraġġ fin-nagħaġ ibbażat fuq stħarriġ statistikament validu sabiex tiġi ddeterminata l-prevalenza probabbli tal-BSE fin-nagħaġ. Sussegwentement, dawn il-każijiet ġew ikkonfermati li huma każijiet ta’ scrapie u mhux ta’ BSE.

(6)

Dawn il-programmi ta’ monitoraġġ ġew riveduti mir-Regolament tal-Kummissjoni (KE) Nru 727/2007 (5) fid-dawl tar-riżultati ta’ sentejn ta’ ttestjar intensifikat li ma wassal għall-identifikazzjoni tal-ebda każ addizzjonali tal-BSE fl-annimali ovini u kaprini.

(7)

Wara eżaminazzjoni sistematika ulterjuri ta’ każijiet pożittivi ta’ TSE fl-annimali ovini u kaprini sa mill-2005, ma nstabux iktar każijiet pożittivi jew suspettużi ta’ BSE.

(8)

Minħabba l-assenza ta’ każijiet pożittivi jew suspettużi tal-BSE fl-annimali ovini u kaprini sa mill-2005, huwa xieraq li l-ittestjar diskriminatorju fil-każ ta’ każijiet pożittivi jew suspettużi ta’ BSE f’annimali ovini u kaprini huwa limitat għall- “każ ta’ indiċi” kif definit fil-punt 2(c) tal-Anness I tar-Regolament (KE) Nru 999/2001.

(9)

Barra minn hekk, il-punt 3.2(c)(ii) tal-Kapitolu C tal-Anness X tar-Regolament (KE) Nru 999/2001 jitlob li l-każijiet tat-TSE li fihom il-BSE ma tistax tiġi eskluża mill-ittestjar molekolari primarju jenħtieġ li jiġu sottomessi għal test molekulari sekondarju f’wieħed mit-tliet laboratorji elenkati f’dak il-punt.

(10)

Din il-lista ġiet stabbilita bir-Regolament (KE) Nru 36/2005 fuq il-bażi tal-metodi u l-kompetenzi tal-laboratorji disponibbli fl-2005. Hija qatt ma ġiet aġġornata minn dak iż-żmien.

(11)

Huwa xieraq li tiġi żgurata aktar flessibbiltà fir-rigward tal-metodu ta’ ttestjar molekulari sekondarju, li d-disinn tiegħu jenħtieġ li jiġi approvat fuq bażi ta’ każ b’każ mil-laboratorju ta’ referenza tal-UE b’kont meħud tal-aħħar għarfien xjentifiku. L-għażla tal-laboratorju ta’ prestazzjoni jenħtieġ li tkun ukoll aktar flessibbli sabiex isir l-aħjar użu tal-aħħar għarfien xjentifiku u għarfien espert tal-laboratorju.

(12)

Għaldaqstant jenħtieġ li jiġu emendati l-ittri (a), (b) u (c) tal-punt 3.2 tal-Kapitolu C tal-Anness X tar-Regolament (KE) Nru 999/2001 skont dan.

(13)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,