(1)

Ir-Regolament Delegat tal-Kummissjoni (UE) 2020/592 (2) introduċa għadd ta’ derogi għar-regoli eżistenti, fost l-oħrajn fis-settur tal-inbid, bil-għan li jipprovdu ftit nifs lill-produtturi tal-inbid u jgħinuhom ilaħħqu mal-impatt tal-pandemija tal-COVID-19. Madankollu, minkejja l-utilità ta’ dawk il-miżuri, is-suq tal-inbid ma rnexxilux jerġa’ jikseb il-bilanċ tiegħu bejn il-provvista u d-domanda u mhuwiex mistenni li jirkuprah fi żmien qasir jew medju minħabba l-pandemija li għaddejja bħalissa.

(2)

Barra minn hekk, il-miżuri adottati biex tiġi indirizzata l-pandemija tal-COVID-19 qed jitkomplew fil-biċċa l-kbira tal-Istati Membri u madwar id-dinja. Dawk il-miżuri jinkludu l-impożizzjoni ta’ restrizzjonijiet fir-rigward tad-daqs tal-laqgħat u ċ-ċelebrazzjonijiet soċjali, u fir-rigward tal-possibbiltajiet li wieħed jiekol u jixrob barra minn daru. Il-lockdowns għadhom qed jiġu imposti f’ċerti oqsma, flimkien mat-tħassir ta’ avvenimenti pubbliċi u festini privati. L-effett indirett ta’ dawn ir-restrizzjonijiet irriżulta fi tnaqqis ulterjuri fil-konsum tal-inbid fl-Unjoni u fi tnaqqis ikkonfermat fl-esportazzjoni tal-inbid lejn pajjiżi terzi. Barra minn hekk, l-inċertezza dwar id-durata tal-kriżi, li huwa mistenni li se testendi lil hinn mill-aħħar tas-sena 2020, qed tikkawża ħsara fit-tul lis-settur tal-inbid tal-Unjoni peress li l-konsum tal-inbid aktarx mhux se jirkupra u s-swieq tal-esportazzjoni se jintilfu. Din it-taħlita ta’ fatturi qed ikollha impatt negattiv sinifikanti fuq l-ipprezzar fis-suq tal-inbid tal-Unjoni. Il-ħażniet li kienu diġà f’livell rekord fil-bidu tas-sena ta’ kummerċjalizzazzjoni 2019-2020 żdiedu. Fl-aħħar nett, il-ħsad għoli li jmiss tal-2020, li huwa mistenni li jaqbeż il-ħsad tal-2019 b’madwar 10 miljun ettolitru ta’ nbid, se jservi biss biex ikompli jaggrava s-sitwazzjoni.

(3)

Konsegwentement, minħabba d-durata twila tar-restrizzjonijiet imposti mill-Istati Membri biex jindirizzaw il-pandemija tal-COVID-19 u l-ħtieġa li jinżammu fis-seħħ ir-restrizzjonijiet, it-tfixkil ekonomiku serju fl-iżbokki ewlenin għall-inbid u l-effetti negattivi li jirriżultaw fuq id-domanda għall-inbid huma aggravati.

(4)

Fid-dawl ta’ dan it-tfixkil tas-suq eċċezzjonalment qawwi u tal-akkumulazzjoni ta’ ċirkostanzi diffiċli li s-settur tal-inbid qed jaffaċċja, li għandu l-oriġini tiegħu fl-impożizzjoni mill-Istati Uniti ta’ tariffi fuq l-importazzjonijiet tal-inbejjed tal-Unjoni f’Ottubru 2019 u li issa qed ikompli bit-tneħħija tal-miżuri restrittivi li għaddejjin minħabba l-pandemija dinjija tal-COVID-19, l-operaturi fis-settur tal-inbid tal-Unjoni għadhom qed jiltaqgħu ma’ diffikultajiet eċċezzjonali. Għalhekk hija meħtieġa aktar għajnuna lis-settur tal-inbid.

(5)

L-implimentazzjoni kontinwa tal-miżuri biex tiġi indirizzata l-kriżi u ż-żidiet fil-kontribuzzjoni massima tal-Unjoni introdotti bir-Regolament Delegat (UE) 2020/592 urew li mhumiex biżżejjed biex titjieb is-sitwazzjoni finanzjarja tal-operaturi fis-settur tal-inbid. B’mod partikolari, dawk il-miżuri huma kruċjali biex jitneħħew mis-suq tal-Unjoni kwantitajiet ta’ nbid, li altrimenti jaffettwaw b’mod negattiv il-prezzijiet tas-suq, u biex jitjieb il-fluss tal-flus tal-operaturi permezz ta’ kontribuzzjoni finanzjarja proprja mnaqqsa għall-operazzjonijiet tagħhom. Madankollu, l-implimentazzjoni tar-Regolament Delegat (UE) 2020/592, kif emendat dan l-aħħar bir-Regolament Delegat (UE) 2020/1275 (3), uriet li l-iskadenza attwali tal-15 ta’ Ottubru 2020 stabbilita fl-Artikolu 10 tar-Regolament Delegat (UE) 2020/592, ma tippermettix li l-miżuri kollha meħtieġa jiġu implimentati b’mod effiċjenti mill-Istati Membri u mill-operaturi fis-settur tal-inbid. B’mod partikolari, minħabba s-sitwazzjoni sanitarja instabbli u ż-żmien imprevedibbli tar-restrizzjonijiet nazzjonali differenti imposti biex jikkontrollawha, kien diffiċli għall-Istati Membri biex jippjanaw u jintroduċu miżuri addizzjonali fil-programmi ta’ appoġġ tagħhom fis-settur tal-inbid sabiex l-operaturi jkunu jistgħu jibbenefikaw mill-miżuri u l-finanzjament miżjud sal-iskadenza tal-15 ta’ Ottubru 2020. L-estensjoni ta’ din l-iskadenza sal-15 ta’ Ottubru 2021 tippermetti lill-Istati Membri jintroduċu wħud mill-miżuri lejn tmiem l-istaġun, u tipprovdi lill-operaturi b’possibbiltajiet addizzjonali biex japplikaw għall-appoġġ. Tali estensjoni mhux biss tgħin biex jiġi indirizzat it-tfixkil attwali fis-suq, iżda tikkontribwixxi wkoll għall-prevenzjoni ta’ deterjorament ulterjuri tas-sitwazzjoni peress li l-pandemija tal-COVID-19 hija mistennija li tkompli wara tmiem is-sena 2020, u għalhekk matul parti sinifikanti tas-sena finanzjarja 2021.

(6)

Għalhekk, huwa meqjus neċessarju li l-applikazzjoni tal-miżuri stabbiliti fl-Artikoli 2, 3 u 4 u fl-Artikoli 5a sa 9 tar-Regolament Delegat (UE) 2020/592 tiġi estiża sal-15 ta’ Ottubru 2021.

(7)

Għaldaqstant, jenħtieġ li r-Regolament Delegat (UE) 2020/592 jiġi emendat skont dan.

(8)

Għal raġunijiet imperattivi ta’ urġenza, b’mod partikolari meta wieħed iqis it-tfixkil kontinwu fis-suq, l-effetti qawwija tagħha fuq is-settur tal-inbid tal-Unjoni u l-kontinwazzjoni tagħha u d-deterjorament probabbli tagħha, jeħtieġ li tittieħed azzjoni immedjata u li tiġi żgurata b’mod urġenti l-implimentazzjoni kontinwa tal-miżuri diġà fis-seħħ bil-għan li jittaffew dawk l-effetti negattivi. Il-posponiment ta’ azzjoni immedjata jista’ jkun theddida li tiggrava t-tfixkil fis-suq fis-settur tal-inbid, u dan kieku jkun ta’ detriment għall-kundizzjonijiet tal-produzzjoni u l-kundizzjonijiet tas-suq f’dak is-settur. Fid-dawl ta’ dan, dan ir-Regolament jenħtieġ li jiġi adottat skont il-proċedura ta’ urġenza stabbilita fl-Artikolu 228 tar-Regolament (UE) Nru 1308/2013.

(9)

Fid-dawl tal-ħtieġa li tittieħed azzjoni immedjata, biex jiġi evitat tfixkil fl-implimentazzjoni tal-miżuri li jindirizzaw il-kriżi fis-settur tal-inbid tal-Unjoni u biex tiġi żgurata tranżizzjoni bla xkiel bejn is-sentejn finanzjarji, jenħtieġ li dan ir-Regolament jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea u japplika b’mod retroattiv mis-16 ta’ Ottubru 2020,