Strateġija tal-UE dwar l-Unjoni tas-Sigurtà

 

SOMMARJU TA’:

Komunikazzjoni dwar l-istrateġija tal-UE dwar l-Unjoni tas-Sigurtà

X’INHU L-GĦAN TAL-KOMUNIKAZZJONI?

• Din tistabbilixxi l-prijoritajiet ewlenin biex tiġi żgurata s-sigurtà fiżika u diġitali tal-Unjoni Ewropea (UE) u ċ-ċittadini tagħha matul il-5 snin li ġejjin.
• Huwa jikkonċentra fuq prijoritajiet u azzjonijiet fejn l-UE tista’ żżid il-valur biex tappoġġja lill-pajjiżi tal-UE fit-trawwim tas-sigurtà għal dawk kollha li jgħixu fl-Ewropa.

PUNTI EWLENIN

Is-sigurtà hija kwistjoni li taffettwa l-oqsma kollha tal-ħajja. Għal din ir-raġuni, l-UE ddeċidiet li tieħu approċċ olistiku għas-sigurtà. Din il-komunikazzjoni tipprovdi qafas ġenerali għall-appoġġ tal-politiki nazzjonali billi tantiċipa u tindirizza t-theddid li qed jevolvi kemm jekk ikunu online/offline, diġitali/fiżiċi jew interni/esterni.

L-istrateġija tistabbilixxi 4 prijoritajiet strateġiċi fil-livell tal-UE.

• 1.

  L-iżgurar ta’ ambjent ta’ sigurtà li jkun reżistenti għall-futur għall-individwi

  L-infrastrutturi kritiċi* li nużaw fil-ħajja tagħna ta’ kuljum għandhom ikunu sikuri u reżiljenti u t-teknoloġiji li niddependu fuqhom għandhom jiġu protetti minn attakki ċibernetiċi dejjem aktar sofistikati, kemm jekk minn ġewwa kif ukoll jekk minn barra l-UE.

  L-azzjonijiet ewlenin li għandhom jittieħdu se jinkludu:

  • it-tisħiħ tal-leġiżlazzjoni tal-UE dwar l-infrastrutturi kritiċi (id-Direttiva 2008/114/KE — ara s-sommarju) u dwar is-sistemi ta’ informazzjoni tan-network (id-Direttiva (UE) 2016/1148 — ara s-sommarju);
  • iż-żieda tar-reżiljenza operazzjonali tas-settur finanzjarju;
  • il-ħolqien ta’ strateġija taċ-ċibersigurtà tal-UE u ta’ unità ċibernetika konġunta tal-UE;
  • l-inkoraġġiment ta’ kooperazzjoni aktar b’saħħitha dwar il-protezzjoni tal-ispazji pubbliċi u l-kondiviżjoni tal-aħjar prattika dwar l-użu ħażin tad-drones.
• 2.

  L-indirizzar tat-theddid li qed jevolvi

  Din il-prijorità tkopri aspetti bħaċ-ċiberkriminalità (eż. serq ta’ identità jew serq tad-data tan-negozju), kontenut illegali online (abbuż sesswali tat-tfal jew inċitament għall-mibegħda jew it-terroriżmu) u t-theddid ibridu (kombinazzjonijiet ta’ attivitajiet konvenzjonali/mhux konvenzjonali u militari/mhux militari).

  L-istrateġija tipproponi serje ta’ azzjonijiet, bħall-iżgurar li l-leġiżlazzjoni dwar iċ-ċiberkriminalità tiġi infurzata u adattata għall-iskop tagħha, ir-reviżjoni tal-protokoll operazzjonali tal-UE għall-ġlieda kontra t-theddid ibridu u t-tfassil ta’ strateġija aktar effettiva kontra l-abbuż sesswali tat-tfal.

• 3.

  Il-protezzjoni tal-Ewropej mit-terroriżmu u l-kriminalità organizzata

  L-istrateġija tenfasizza l-mod kif it-terroriżmu u r-radikaliżmu jiswew il-ħajjiet u jiddestabbilizzaw is-soċjetà u l-fatt li l-kriminalità organizzata hija responsabbli għal telf ekonomiku ta’ bejn EUR 218 u EUR 282 biljun kull sena.

  Azzjonijiet li jridu jittieħdu jinkludu:

  • l-iżvilupp ta’ aġenda kontra t-terroriżmu u inizjattivi aktar b’saħħithom kontra r-radikalizzazzjoni;
  • aktar kooperazzjoni ma’ pajjiżi mhux tal-UE u ma’ organizzazzjonijiet internazzjonali;
  • aġenda kontra l-kriminalità organizzata u pjan ta’ azzjoni kontra t-traffikar tal-migranti;
  • aġenda u pjan ta’ azzjoni dwar id-drogi 2021-2025;
  • pjan ta’ azzjoni 2020-2025 tal-UE dwar it-traffikar tal-armi tan-nar;
  • ir-reviżjoni tal-leġiżlazzjoni dwar l-iffriżar u l-konfiska tal-assi (ir-Regolament (UE) 2018/1805 – ara s-sommarju), dwar l-uffiċċji għall-irkupru tal-assi (id-Deċiżjoni 2007/845/ĠAI – ara s-sommarju) u dwar ir-reat ambjentali (id-Direttiva 2008/99/KE – ara s-sommarju).
• 4.

  L-iżvilupp ta’ ekosistema Ewropea tas-sigurtà b’saħħitha

  Prijorità kollettiva għall-gvernijiet tal-UE, l-awtoritajiet tal-infurzar tal-liġi, in-negozji, l-NGOs u l-individwi hija li jiġġieldu l-kriminalità u jippromwovu l-ġustizzja billi jikkooperaw aktar mill-qrib u jaqsmu l-informazzjoni. Dan ifisser li jiġi żgurat li l-fruntieri esterni tal-UE jkunu b’saħħithom biex jipprovdu sigurtà għall-pubbliku u għaż-żona Schengen ta’ vvjaġġar mingħajr fruntieri. Dan ifisser ukoll investiment fir-riċerka u l-innovazzjoni tas-sigurtà f’teknoloġiji u tekniki ġodda biex jiġi miġġieled u antiċipat it-theddid, u fil-ħiliet u s-sensibilizzazzjoni sabiex in-negozji, l-amministrazzjonijiet u l-individwi jkunu ppreparati aħjar.

  L-azzjonijiet li jistgħu jittieħdu biex tiġi żviluppata ekosistema Ewropea ta’ sigurtà aktar b’saħħitha jinkludu:

  • “kodiċi possibbli tal-UE għall-kooperazzjoni tal-pulizija” u l-koordinazzjoni tal-pulizija fi kriżi;
  • mandat aktar b’saħħtu għall-Europol;
  • Eurojust aktar b’saħħitha li tgħaqqad l-awtoritajiet ġudizzjarji u tal-infurzar tal-liġi;
  • ir-reviżjoni tad-direttiva dwar l-informazzjoni antiċipata dwar il-passiġġieri (id-Direttiva 2004/82/KE — ara s-sommarju);
  • kooperazzjoni aktar b’saħħitha bejn l-UE u l-Interpol.

  Il-Kummissjoni Ewropea:

  • ippreżentat, fl-istess ħin mal-istrateġija, tliet inizjattivi speċifiċi biex timplimenta l-għanijiet tagħha:
    • Strateġija tal-UE għal ġlieda aktar effettiva kontra l-abbuż tat-tfal,
    • aġenda ġdida tal-UE u pjan ta’ azzjoni dwar id-drogi,
    • pjan ta’ azzjoni tal-UE dwar it-traffikar tal-armi tan-nar;
  • se tirrapporta regolarment dwar il-progress li jkun sar lill-Parlament Ewropew u lill-Kunsill, li diġà approvaw il-prijoritajiet tal-istrateġija, u lill-partijiet ikkonċernati.

SFOND

• Ir-rispons politiku inizjali tal-UE għaż-żieda fit-theddid għas-sigurtà ġie mal-aġenda Ewropea tal-Kummissjoni dwar is-sigurtà 2015-2020 (ara s-sommarju). Dan tfassal wara l-attakki ta’ Charlie Hebdo f’Jannar 2015 f’Pariġi.
• F’Lulju 2020, il-Kummissjoni ħarġet dokument ta’ ħidma dwar l-implimentazzjoni tal-leġiżlazzjoni dwar l-affarijiet interni fil-qasam tas-sigurtà interna għall-perjodu 2017-2020.
• Għal aktar informazzjoni, ara:
  • strateġija tal-unjoni tas-sigurtà 2020-2025 (il-Kummissjoni Ewropea).

TERMINI EWLENIN

DOKUMENT EWLIENI

Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar l-Istrateġija tal-UE dwar l-Unjoni tas-Sigurtà (COM(2020) 605 final, 24.7.2020)

DOKUMENTI RELATATI

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — L-Aġenda u l-Pjan tal-Azzjoni tal-UE dwar id-Drogi 2021-2025 (COM(2020) 606 final, 24.7.2020)

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni –– Strateġija tal-UE għal ġlieda aktar effettiva kontra l-abbuż sesswali tat-tfal (COM(2020) 607 final, 24.7.2020)

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Pjan ta’ azzjoni 2020-2025 tal-UE dwar it-traffikar tal-armi tan-nar (COM(2020) 608 final, 24.7.2020)

Id-Dokument ta’ ħidma tal-persunal tal-Kummissjoni: Implimentazzjoni tal-leġiżlazzjoni dwar l-Affarijiet Interni fil-qasam tas-sigurtà interna — 2017-2020 (SWD(2020) 135 final, 9.7.2020)

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Introduzzjoni sigura tal-5G fl-UE — Implimentazzjoni tas-sett ta’ għodod tal-UE (COM(2020) 50 final, 29.1.2020)

Ir-Regolament (UE) 2019/452 tal-Parlament Ewropew u tal-Kunsill tad-19 ta’ Marzu 2019 li jistabbilixxi qafas għall-iskrinjar tal-investimenti diretti barranin fl-Unjoni (ĠU L 79I, 21.3.2019, pp. 1-14)

L-emendi suċċessivi għar-Regolament (UE) 2019/452 ġew inkorporati fit-test oriġinali. Din il-verżjoni konsolidata għandha valur dokumentarju biss.

Ir-Regolament (UE) 2018/1805 tal-Parlament Ewropew u tal-Kunsill tal-14 ta’ Novembru 2018 dwar ir-rikonoxximent reċiproku ta’ ordnijiet ta’ ffriżar u ordnijiet ta’ konfiska (ĠU L 303, 28.11.2018, pp. 1-38)

Il-Komunikazzjoni Konġunta lill-Parlament Ewropew u lill-Kunsill — Reżiljenza, Deterrenza u Difiża: Il-Bini ta’ ċibersigurtà b’saħħitha għall-UE (JOIN(2017) 450, 13.9.2017)

Id-Direttiva (UE) 2016/1148 tal-Parlament Ewropew u tal-Kunsill tas-6 ta’ Lulju 2016 dwar miżuri għal livell għoli komuni ta’ sigurtà tan-netwerks u tas-sistemi tal-informazzjoni madwar l-Unjoni (ĠU L 194, 19.7.2016, pp. 1-30)

Il-Komunikazzjoni mill-Kummissjoni lill-Parlament Ewropew, lill-Kunsill Ewropew u lill-Kunsill azzjoni fuq l-Aġenda Ewropea dwar is-Siġurtà biex jiġi miġġieled it-terroriżmu u titwitta t-triq lejn Unjoni ta’ Sigurtà effettiva u ġenwina (COM(2016) 230 final, 20.4.2016)

Il-Komunikazzjoni konġunta lill-Parlament Ewropew u lill-Kunsill — Qafas Konġunt biex jiġi miġġieled it-theddid ibridu, ir-reazzjoni tal-Unjoni Ewropea (JOIN(2016) 18 final, 6.4.2016)

L-Abbozz ta’ Konklużjonijiet tal-Kunsill dwar l-Istrateġija ta’ Sigurtà Interna Mġedda għall-Unjoni Ewropea 2015-2020, 10 ta’ Ġunju 2015

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — L-Aġenda Ewropea dwar is-Sigurtà (COM(2015) 185 final, 28.4.2015)

Id-Direttiva 2011/93/UE tal-Parlament Ewropew u tal-Kunsill tat-13 ta’ Diċembru 2011 dwar il-ġlieda kontra l-abbuż sesswali u l-isfruttament sesswali tat-tfal u l-pedopornografija, u li tissostitwixxi d-Deċiżjoni Kwadru tal-Kunsill 2004/68/ĠAI (ĠU L 335, 17.12.2011, pp. 1-14)

Ara l-verżjoni konsolidata.

Id-Direttiva tal-Kunsill 2008/114/KE tat-8 ta’ Diċembru 2008 dwar l-identifikazzjoni u l-indikazzjoni ta’ l-Infrastruttura Kritika Ewropea u l-valutazzjoni tal-ħtieġa għat-titjib tal-ħarsien tagħhom (ĠU L 345, 23.12.2008, pp. 75-82)

Id-Direttiva 2008/99/KE tal-Parlament u tal-Kunsill tad-19 ta’ Novembru 2008 dwar il-protezzjoni tal-ambjent permezz tal-liġi kriminali (ĠU L 328, 6.12.2008, pp. 28–37)

Id-Deċiżjoni tal-Kunsill 2007/845/ĠAI tas-6 ta’ Diċembru 2007 dwar il-kooperazzjoni bejn l-Uffiċċji għall-Irkupru tal-Assi tal-Istati Membri fil-qasam tar-rintraċċar u l-identifikazzjoni ta’ rikavati mill-kriminalità, jew proprjetà oħra relatata magħha (ĠU L 332, 18.12.2007, pp. 103-105)

Id-Direttiva tal-Kunsill 2004/82/KE tad-29 ta’ April 2004 dwar l-obbligu ta’ trasportaturi li jikkomunikaw data dwar il-passiġġieri (ĠU L 261, 6.8.2004, pp. 24-27)

l-aħħar aġġornament 04.12.2020