Il-ġlieda kontra r-reżistenza għall-antimikrobiċi f’approċċ ta’ ‘saħħa waħda’ — rakkomandazzjoni tal-Kunsill

 

SOMMARJU TA’:

Rakkomandazzjoni tal-Kunsill dwar it-tisħiħ tal-azzjonijiet tal-UE fil-ġlieda kontra r-reżistenza għall-antimikrobiċi f’approċċ ta’ ‘saħħa waħda’

X’INHU L-GĦAN TAR-RAKKOMANDAZZJONI?

• Ir-rakkomandazzjoni tindirizza l-Istati Membri tal-Unjoni Ewropea (UE) u lill-Kummissjoni Ewropea u għandha l-għan li tikkumbatti r-reżistenza għall-antimikrobiċi (AMR)* f’approċċ ta’ “saħħa waħda”.
• Ir-rakkomandazzjoni tipprova tħeġġeġ l-użu prudenti ta’ antimikrobiċi bħal antibijotiċi fis-saħħa umana u s-saħħa tal-annimali permezz ta’ serjè ta’ miżuri, bil-għan li tnaqqas ir-riskju li mikroorganiżmi jsiru reżistenti għal intervenzjonijiet mediċi.
• Dan hu parti minn pakkett li hu maħsub li jirriforma l-leġiżlazzjoni farmaċewtika tal-UE.

PUNTI EWLENIN

Prinċipju ewlieni tar-rakkomandazzjoni hu li AMR hu kwistjoni ta’ “saħħa waħda” li jfisser li jiġbor is-saħħa umana, is-saħħa tal-annimal, is-saħħa tal-pjanti u l-ambjent. Bħala theddida multidimesjonali, transkonfinali għas-saħħa, AMR ma jistax ikun indirizzat b’mod indipendenti jew minn pajjiżi individwali biss.

Ir-rakkomandazzjoni tħeġġeġ lill-Istati Membri biex:

• jintroduċu pjanijiet nazzjonali ta’ azzjoni kontra l-AMR sa Ġunju 2024, abbażi tal-approċċ “saħħa waħda”;
• itejbu s-sorveljanza u l-monitoraġġ ta’ AMR u l-konsum tal-antimikrobiċi;
• isaħħu l-prevenzjoni u l-kontroll tal-infezzjoni;
• isaħħu l-politika tal-użu tajjeb tal-antimikrobiċi u l-użu prudenti ta’ antimikrobiċi;
• jieħdu miżuri nazzjonali xierqa biex jiksbu l-miri għall-AMR u l-konsum tal-antimikrobiċi fis-saħħa umana sal-2030, li fosthom hemm:
  • it-tnaqqis tal-konsum totali tal-antibijotiċi fil-bnedmin b’20%;
  • tal-inqas 65% tal-konsum totali tal-antibijotiċi jridu jiġu milll-grupp tal-“aċċess” ta’ antibijotiċi kif stipulat fil-klassifikazzjoni AWaRe* tal-Organizzazzjoni Dinjija tas-Saħħa,
  • riduzzjoni tal-inċidenza ta’ infezzjonijiet taċ-ċirkulazzjoni tad-demm fil-ġisem bi tliet batterji reżistenti għal antibijotiċi.

Din tagħti merħba lir-rwol tal-Kummissjoni biex:

• tappoġġja u tikkumplimenta l-attivitajiet ta’ sensibilizzazzjoni tal-Istati Membri biex iqajmu kuxjenza fuq AMR u tappoġġja lill-Istati Membri fit-taħriġ kontinwu u tagħlim tul il-ħajja ta’ professjonisti li jaħdmu f’xi settur “tas-saħħa”;
• trawwem ir-riċerka u l-iżvilupp, u inċentivi għall-innovazzjoni fi u aċċess għall-antimikrobiċi u kontramiżuri oħra mediċi AMR;
• iżżid il-kooperazzjoni fuq AMR bejn Stati Membri u aġenziji rilevanti tal-UE bħaċ-Ċentru Ewropew għall-Prevenzjoni u Kontroll tal-Mard, l-Aġenzija Ewropea għall-Kimika, l-Aġenzija Ewropea għall-Ambjent, l-Awtorità Ewropea għas-Sikurezza tal-Ikel u l-Aġenzija Ewropea għall-Mediċini;
• issaħħaħ inizjattivi globali fuq AMR.

SFOND

Identifikat bħala wieħed mill-aqwa tliet theddid ta’ prijorità tas-saħħa li l-UE qed tiffaċċja, AMR hu dak li jiġri meta mikroorganiżmi potenzjalment perikolużi, bħal batterja, jevolvu u jieqfu jirrispondu għal antibijotiċi li qabel kien ikollhom suċċess meta jittrattaw bihom. Hu stmat li iktar minn 35,000 persuna tmut kull sena fl-UE bħala konsegwenza diretta ta’ infezzjoni minħabba batteriju reżistenti għal antibijotiċi. AMR:

• jagħmel l-infezzjonijiet iktar diffiċli biex tittratta;
• iwassal għal riskju ogħla ta’ mard, mard sever u mewt;
• jeffettwa l-kura tas-saħħa u l-produzzjoni tal-ikel; u
• jeffettwa l-bnedmin, annimali u pjanti, flimkien mal-ambjent.

Għal aktar informazzjoni, ara:

• Rakkomandazzjoni tal-Kunsill (il-Kummissjoni Ewropea).
• Pjan ta’ Azzjoni Ewropew għal Saħħa Waħda kontra r-Reżistenza għall-Antimikrobiċi (AMR) (il-Kummissjoni Ewropea).

TERMINI EWLENIN

DOKUMENT PRINĊIPALI

Rakkomandazzjoni tal-Kunsill dwar it-tisħiħ tal-azzjonijiet tal-UE għall-ġlieda kontra r-reżistenza għall-antimikrobiċi f’approċċ “Saħħa Waħda” (ĠU L 220, 22.6.2023, pp. 1–20).

DOKUMENTI RELATATI

Ir-Regolament (UE) Nru 2022/2371 tal-Parlament Ewropew u tal-Kunsill tat-23 ta’ Novembru 2022 dwar theddid għas-saħħa transkonfinali serju u li jħassar id-Deċiżjoni Nru 1082/2013/UE (ĠU L 314, 6.12.2022, pp. 26–63).

Ir-Regolament (UE) Nru 2021/522 tal-Parlament Ewropew u tal-Kunsill tal-24 ta’ Marzu 2021 li jistabbilixxi Programm għall-azzjoni tal-Unjoni fil-qasam tas-saħħa (“il-Programm l-UE għas-Saħħa”) għall-perjodu 2021-2027, u li jħassar ir-Regolament (UE) Nru 282/2014(ĠU L 107, 26.3.2021, pp. 1–29).

Komunikazzjoni tal-Kummissjoni lill-Kunsill u lill-Parlament Ewropew — Pjan ta’ Azzjoni Ewropew Saħħa Waħda kontra r-Reżistenza Antimikrobika (AMR) (COM(2017) 339 final, 29.6.2017).

Avviż tal-Kummissjoni — Il-Linji Gwida tal-UE għall-użu prudenti tal-antimikrobiċi fis-saħħa tal-bniedem (ĠU L 212, 1.7.2017, pp. 1-12).

Ir-Regolament (UE) 2016/429 tal-Parlament Ewropew u tal-Kunsill tad-9 ta’ Marzu 2016 dwar il-mard trasmissibbli tal-annimali u li jemenda u jħassar ċerti atti fil-qasam tas-saħħa tal-annimali (“Liġi Dwar is-Saħħa tal-Annimali”) (ĠU L 84, 31.3.2016, pp. 1–208).

Emendi suċċessivi għar-Regolament (UE) 2016/429 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

Komunikazzjoni mill-Kummissjoni lill-Parlament Ewropew u lill-Kunsill — Pjan ta’ Azzjoni kontra t-theddid li qed jiżdied ta’ Reżistenza Antimikrobika (COM(2011) 748 final, 15.11.2011).

Rakkomandazzjoni tal-Kunsill tad-9 ta’ Ġunju 2009 dwar is-sikurezza tal-pazjent, inkluż il-prevenzjoni minn u l-kontroll ta’ infezzjonijiet assoċjati mal-kura tas-saħħa (ĠU L 151, 3.7.2009, pp. 1–6).

Rakkomandazzjoni tal-Kunsill 2002/77/KE tal-15 ta’ Novembru 2001 dwar l-użu prudenti ta’ aġenti tal-antimikrobiċi fil-mediċina umana (ĠU L 34, 5.2.2022, pp.13–16).

l-aħħar aġġornament 12.06.2024