Id-deċiżjonijiet u r-regolamenti kollettivament jistabbilixxu i-miżuri restrittivi tal-Unjoni Ewropea (UE) bħal projbizzjoni fuq vjaġġar, iffriżar tal-assi u restrizzjonijiet kummerċjali b’rispons għall-gwerra Russa ta’ aggressjoni kontra l-Ukraina.
L-14-il pakkett ta’ miżuri, adottatif’Ġunju 2024, daħħal miżuri ulterjuri biex jagħmlu l-evitar tal-miżuri restrittivi tal-UE aktar diffiċli u jimmiraw ċerti setturi ta’ valur għoli tal-ekonomija Russa.

PUNTI EWLENIN

Is-sanzjonijiet oriġinali fuq ir-Russja, li bdew mill-2014, kienu emendati bosta drabi, pereżempju biex jaġġornaw il-listi ta’ individwi jew biex jtawlu s-sanzjonijiet eżistenti.
Mid-deċiżjoni tar-Russja fi Frar 2022 biex tirrikonoxxi ż-żoni mhux ikkontrollati mill-gvern tal-oblasts ta’ Donetsk u Luhansk tal-Ukrajna bħala entitajiet indipendenti u l-invażjoni sussegwenti tal-Ukrajna, l-UE adottat l-ikbar sett ta’ miżuri restrittivi ta’ qatt qabel, f’serjè ta’ deċiżjonijiet li jinkludu 14-il pakkett u li jimmiraw bosta setturi tal-ekonomija Russa u individwi li jappoġġjaw il-gwerra ta’ aggressjoni tar-Russja.

Sanzjonijiet immirati

L-UE stabbiliet diversi tipi ta’ sanzjonijiet b’miri u objettivi differenti. Dawn jinkludu:

Sanzjonijiet individwali li jimmiraw individwi, entitajiet u korpi li jkunu wettqu, fost l-oħrajn, atti li jimminaw jew jheddu l-integrità, is-sovranità u l-indipendenza territorjali tal-Ukrajna. Dawn is-sanzjonijiet jinkludu:

l-iffriżar tal-assi miżmuma fl-UE;
il-projbizzjoni taċ-ċittadini u l-kumpaniji tal-UE milli agħmlu l-fondi disponibbli;
il-projbizzjoni tal-ivvjaġġar ta’ individwi, il-prevenzjoni tagħhom milli jidħlu jew jgħaddu minn territorji tal-UE;
kriterja unika ta’ elenkar li timmira individwi jew entitajiet mhux tal-UE li jiffaċilitaw ksur tal-projbizzjoni kontra l-evażjoni tas-sanzjonijiet tal-UE minn individwi jew entitajiet.

Il-listi ta’ individwi, korpi u entitajiet jiġu aġġornati regolarment. Dawn ġew estiżi wkoll biex jinkludu xi entitajiet ikkontrollati mir-Russja bbażati fil-Krimea u Sevastopol annessi illegalment.

Il-pakkett ta’ sanzjonijiet ta’ Ġunju 2024 jelenka:

69 individwu addizzjonali, li jinkludu diretturi/eżekuttivi ta’ kumpaniji involuti fl-industrija militari, it-trasport ta’ provvisti militari lill-armata u l-evażjoni tas-sanzjonijiet, flimkien ma’ żewġ atturi magħrufa tajjeb tal-propaganda u negozjanti u individwi responsabbli għad-deportazzjoni illeġali tat-tfal Ukreni għar-Russja;
47 entità li joperaw fi jew li huma konnessi mal-kumpless militari-industrjali, inklużi entitajiet li jimmanifatturaw tagħmir militari u teknoloġija militari (jiġifieri vetturi, missili u armamenti) u li jittrasportaw tagħmir militari, media propagandista u organizzazzjonijiet mhux governattivi involuti fid-deportazzjoni ta’ tfal Ukreni;
il-pakkett jestendi wkoll il-projbizzjoni fuq ix-xandir għall-erba’ ħwienet tal-media il-Voice of Europe, RIA, Novosti, lzvestia u Rossiiskaja Gazeta).

Is-sanzjonijiet ekonomiċi b’miri speċifiċi jinkludu dawn li ġejjin.

Is-settur finanzjarju, inkluż:
- restrizzjonijiet sinifikanti fuq l-aċċess tar-Russja għas-swieq kapitali u servizzi tal-UE;
- l-iskonnettjar ta’ banek ewlenin Russi mis-sistema SWIFT (Soċjetà għat-Telekomunikazzjoni Finanzjarja MondjaliI Interbankarja;
- projbizzjoni fuq l-għoti ta’ servizzi ta’ klassifikazzjoni tal-kreditu, kriptoassi, pariri dwar fiduċjarji u assistenza finanzjarja għall-kummerċ jew l-investiment, u projbizzjoni sħiħa ta’ tranżazzjonijiet fuq banek Russi ewlenin;
- projbizzjoni fuq ċittadini tal-UE li jkollhom pożizzjonijiet f’korpi governattivi ta’ persuni ġuridiċi, entitajiet jew korpi posseduti jew ikkontrollati mill-istat Russu;
- projbizzjoni fuq ċittadini jew persuni fiżiċi Russi li jirresjedu fir-Russja u li jkollhom xi pożizzjoni f’korpi governattivi tas-sidien/operaturi ta’ infrastruttura kritika*, infrastruttura kritika Ewropea* jew entitajiet kritiċi;
- sanzjonijiet fuq istituzzjonijiet finanzjarji bl-użu ta’ SPFS Russa (is-sistema ta’ trasferiment ta’ messaġġ finanzjarji) biex tevadi miżuri restrittivi u l-projbizzjoni fuq banek tal-UE li jużaw is-sistema.
Is-settur tal-enerġija, inklużi projbizzjonijiet fuq:
- faħam mir-Russja u fjuwils fossili solidi oħrajn;
- l-importazzjoni, xiri jew trasferiment mir-Russja ta’ żejt grezz u prodotti tal-petroleum raffinati ‘l fuq mill-prezz iffissat magħruf bħala l-limitu massimu tal-prezz taż-żejt (b’eċċezzjijiet limitati temporanji għal ċerti Stati Membri dipendenti ferm tal-UE);
- l-esportazzjoni tal-fjuwil tal-ġettijiet lejn ir-Russja;
- investimenti ġodda fis-settur tal-minjieri tar-Russja;
- li jipprovdu l-kapaċità ta’ ħżin tal-gass lil ċittadini Russi, persuni fiżiċi li jirresjedu fir-Russja jew persuni ġuridiċi, entitajiet jew korpi stabbiliti fir-Russja;
- ir-riesportazzjoni ta’ gass naturali likwefat, flimkien ma’ projbizzjoni fuq investiment fi proġetti ta’ gass naturali likwifat Russi.
L-ispazju tal-ajru, it-trasport marittimu u bit-triq, inkluż:
- il-projbizzjoni fuq l-esportazzjoni, xiri, provvista jew trasferiment tal-ajruplani kollha, partijiet ta’ ajruplan u tagħmir kollu flimkien ma’ prodotti użati fis-settur tal-avjazzjoni, lir-Russja;
- l-għeluq tal-ispazju tal-ajru tal-UE għal ajruplani posseduti minn, irreġistrati jew ikkontrollati mir-Russja, inklużi ġetts ta’ oligarki;
- projbizzjoni fuq l-esportazzjoni ta’ oġġetti tan-navigazzjoni marittima u teknoloġija tal-komunikazzjoni tar-radju lejn ir-Russja;
- projbizzjoni fuq bastimenti Russi li jaċċessaw portijiet jew locks tal-UE;
- l-elenkar ta’ 27 bastiment addizzjonali, li kienu pprojbiti milli jaċċessjaw l-aċċess għal portijiet u xatbiet (inklużi servizzi relatati) biex jindirizzaw dak li jsejħulu l-flotta mistura;
- projbizzjoni fuq l-operaturi tat-trasport bit-triq Russi jew Belarussi milli jidħlu fl-UE;
- projbizzjoni tat-trasport stradali fuq operaturi tal-UE posseduti minn individwi Russi;
- projbizzjoni fuq it-tranżazzjonijiet mar-Reġistru Marittimu Russu tat-Tbaħħir;
- projbizzjoni fuq l-inżul, it-tluċ jew it-titjir fuq it-territorju tal-UE kemm għal inġenji tal-ajru Russi bl-ekwipaġġ kif ukoll għal dawk mingħajr ekwipaġġ;
- projbizzjoni fuq l-esportazzjonijiet diretti ta’ magni ta’ drones lejn ir-Russja;
- obbligu għal operaturi tal-ajruplani ta’ titjiriet mhux skedati bejn ir-Russja u l-UE jew fuq l-ispazju tal-ajru tal-UE, operati direttament minn jew permezz ta’ pajjiż mhux tal-UE, biex jipprovdi l-informazzjoni rilevanti kollha fir-rigward tat-titjira lill-awtoritajiet kompetenti tagħhom fuq talba mill-Istat Membru kompetenti.
Djamanti, inklużi
- il-pakkett ta’ miżuri tal-UE ta’ Diċembru 2023 li jipprojbixxu l-importazzjoni, xiri jew trasferiment dirett jew indirett mir-Russja ta’ djamanti naturali u sintetiċi, flimkien ma’ ġojjellerija tad-djamanti, mill-1 ta’ Jannar 2024;
- il-pakkett ta’ Ġunju 2024 li jipprovdi projbizzjoni fuq l-importazzjoni indiretta tad-djamanti Russi, li għalih id-dħul fis-seħħ irid jiġi kkoordinat mill-G7.
Kontroll tal-esportazzjoni u l-finanzjament tal-esportazzjoni, inkluż:
- restrizzjoni komprensiva fuq l-esportazzjoni fuq it-tagħmir, it-teknoloġija u s-servizzi għall-industrija tal-enerġija fir-Russja (b’xi eċċezzjonijiet);
- restrizzjoni fuq l-esportazzjoni ta’ karti tal-flus denominati fl-euro u l-bejgħ ta’ titoli trasferibbli denominati fl-euro;
- restrizzjoni fuq oġġetti li jistgħu jikkontribwixxu għad-difiża u setturi tas-sigurtà militari u teknoloġiċi Russi;
- obbligu għal kumpaniji omm tal-UE biex jagħmlu l-aħjar sforzi tagħhom biex jassikuraw li s-sussidjarj tagħhom f’pajjiżi mhux tal-UE jikkonformaw mas-sanzjonijiet tal-UE.
Embargo fuq l-armi, inklużi:
- projbizzjoni fuq il-bejgħ, il-forniment, it-trasferiment jew l-esportazzjoni ta’ armi u materjal relatat tat-tipi kollha lejn ir-Russja;
- projbizzjonijiet ta’ esportazzjoni fuq armi tan-nar ċivili;
- projbizzjoni fuq tranżitu permezz tat-territorju Russu ta’ armi tan-nar, il-partijiet jew komponent essenzjali tagħhom u fuq munizzjoni esportat mill-UE.
Oġġetti ta’ użu doppju u oġġetti ta’ teknoloġija avanzata, inklużi:
- il-projbizzjoni tal-esportazzjoni għal oġġetti ta’ użu doppju u oġġetti avanzati oħra u teknoloġiji li jistgħu jikkontribwixxu għat-tisħiħ teknoloġiku tad-difiża u s-settur tas-sigurtà tar-Russja;
- il-lista ta’ oġġetti ristretti li jinkludu magni drone, tagħmir addizzjonali kimiku u bijoloġiku, aġenti tal-kontroll ta’ rewwixti u komponenti elettroniċi, ġeneraturi, drones ġugarelli, laptops, hard drives, komponenti tal-IT, tagħmir għal viżjoni fid-dlam u tan-navigazzjoni bir-radju, kameras, lentijiet, elementi u komposti rari, ċirkwiti integrati elettroniċi, kameras termografiċi, komposti elettroniċi, materjali semi-kondutturi, tagħmir għal manifattura u tal-ittestjar għal ċirkwiti elettroniċi integrati u bords stampati ta’ ċirkwiti, prekursuri għal materjali enerġetiċi, prekursuri għal armi kimiċi, komponenti ottiċi, strumenti navigazzjonali, metalli użati fis-settur tad-difiża u tagħmir tal-baħar;
- kimiċi, inklużi minerali manganiżi u komposti ta’ element rari, plastiks, magni tal-iskavar, monitors u tagħmir elettriku ser ikun ukoll ristrett bl-14-il pakkett.
- l-introduzzjoni ta’ klawżola ta’ esklużjoni tar-Russja għal esportaturi tal-UE li permezz tagħha huma kuntrattwalment jipprojbixxu r-riesportazzjoni ta’ prodotti sensittivi u teknoloġija sensittiva (inklużi oġġetti tal-kamp tal-battalja) lir-Russja;
- il-projbizzjoni fuq tranżitu permezz tat-territorju tar-Russja ta’oġġetti ta’ użu doppju u teknoloġija esportati mill-UE biex jimminizzaw ir-riskju li s-sanzjonijiet tal-UE jkunu evitati, flimkien ma’ oġġetti u teknoloġija li tista’ tikkontribwixxi għat-tisħiħ militari u teknoloġiku tar-Russja jew għall-iżvilupp tas-settur tad-difiża jew tas-sigurtà, l-oġġetti u teknoloġija adatta għall-użu fl-industriji tal-avjazzjoni jew spazju, u fjuwil tal-ġett u addittivi tal-fjuwil esportati mill-UE għal pajjiżi mhux tal-UE, il-pakkett ta’ Diċembru 2023 estenda l-projbizzjoni ta’ tranżitu għall-oġġetti tal-kamp tal-battalja kollha;
- il-pakkett ta’ Ġunju 2023 żied 87 entità mal-lista ta’ dawk li direttament jappoġġjaw il-kumpless militari-industrjali tar-Russja fil-gwerra tagħha ta’ aggressjoni kontra l-Ukraina — il-lista tinkludi entitajiet f’pajjiżi mhux tal-UE li jipproduċu u jesportaw droni lir-Russja, flimkien ma oħrajn involuti fl-evitar tas-sansjonijiet u jfornu komponenti elettroniċi lir-Russja;
- il-pakkett ta’ Diċembru 2023 jirrekjedi li esportaturi tal-UE jipprojbixxu kuntrattwalment ir-riesportazzjoni lir-Russja u r-riesportazzjoni għall-użu fir-Russja ta’ oġġetti partikolarment sensittivi u teknoloġija, meta tbigħ, tforni, tittrasferixxihom jew tesporthom lejn pajjiż mhux tal-UE bl-eċċezzjoni ta’ pajjiżi sieħba. Dan ir-rekwiżit jirrelata għal prodotti pprojbiti użati fis-sistemi militari Russi fil-kamp tal-battalja fl-Ukrajna jew li huma kritiċi għall-iżvilupp, produzzjoni jew użu ta’ dawk is-sistemi militari Russi, flimkien ma’ oġġetti tal-avjazzjoni u armi.
- il-pakkett ta’ Diċembru 2023 estenda wkoll il-lista ta’ oġġetti ristretti li jistgħu jikkontribwixxu għat-tisħiħ tad-difiża u s-settur tas-sigurtà tar-Russja biex ikopri kimiċi, batteriji tal-litju, termostats, muturi DC u servomotors għal vetturi tal-ajru mingħajr ekwipaġġ (UAVs), għodda tal-magni u partijiet tal-magni.
Restrizzjonijiet kummerċjali u projbizzjonijiet fuq prodotti, inklużi ħadid, azzar, faħam, siment, bitum u asfalt, karbonju, lastiku sintetiku, frott tal-baħar, elju, deheb u oġġetti oħra ta’ lussu ta’ oriġini Russa.
Projbizzjoni fuq l-esportazzjoni ta’ prodotti f’żoni fejn ir-Russja għandha dipendenza għolja fuq l-UE (inklużi semikondutturi, makkinarju sensittiv, trasportazzjoni u sustanzi kimiċi).
Projbizzjoni fuq il-provvista ta’ servizzi ta’ kontabilità, awditjar, awditu statutorju, żamma ta’ rekords finanzjarji u konsulenza dwar it-taxxa, konsulenza dwar in-negozju u maniġerjali, servizzi ta’ relazzjonijiet pubbliċi, servizzi arkitettoniċi u ta’ inġinerija, servizzi ta’ konsulenza IT u servizzi ta’ konsulenza legali lill-gvern Russu u lil persuni ġuridiċi, entitajiet jew korpi stabbiliti fir-Russja. Il-pakkett ta’ Diċembru 2023 jestendi din il-lista biex tinkludi software għal maniġment korporattiv u għal disinji u manifattura industrjali.
Projbizzjoni fuq il-provvista ta’ reklamar, riċerka dwar is-suq u servizzi ta’ opinjoni pubblika dwar votazzjoni flimkien ma’ ttestjar tal-prodott u servizzi ta’ spezzjoni teknika.
Projbizzjoni dwar it-trasportazzjoni ta’ prodotti fl-UE bit-triq permezz ta’ trailers u semi-trailers reġistrati fir-Russja, inkluż meta jkunu trasportati minn trakkijiet reġistrati barra mir-Russja.
Projbizzjoni fuq l-aċċess għal portijiet u xatbiet tal-UE minn kwalunkwe bastiment li jieħu sehem fi trasferimenti ta’ minn vapur għal vapur, jekk l-awtoritajiet kompetenti jkollhom raġuni kredibbli biex jissuspettaw li l-bastiment jew tkun bi ksur tal-projbizzjoni fuq l-importazzjoni ta’ żejt grezz Russu ttrasportat bil-baħar jew prodotti tal-petroleum fl-UE jew li jittrasporta żejt grezz Russu jew prodotti tal-petroleum mixtrija ogħla mil-limitu massimu tal-prezz maqbul mill-Koalizzjoni tal-Limitu Massimu tal-Prezz
Projbizzjoni fuq l-importazzjoni ta’ oġġetti minn żoni tal-Ukrajna mhux taħt il-kontroll tal-gvern, inkluż l-oblasts ta’ Donetsk, Luhansk, Zaporizhia u Kherson, u mill-Krimea u Sevastopol annessi illegalment
Projbizzjoni fuq l-importazzjoni fuq prodotti li jiġġeneraw dħul sinifikanti għar-Russja (u b’hekk il-gwerra ta’ aggressjoni tagħha kontra l-Ukraina tkompli), bħal ħadid fondut grezz u spiegeleisen (liga ta’ ħadid u manganiż użati fil-produzzjoni tal-azzar), wajers tar-ram, wajers tal-aluminju, foil, tubi u pajpijiet. Projbizzjoni ġdida fuq l-importazzjoni ddaħħlet fuq propan likwifat, b’perjodu ta’ tranżizzjonali ta’ 12-il xahar.
Projbizzjoni fuq ix-xiri, importazzjoni, trasferiment jew esportazzjoni ta’ oġġetti ta’ propjetà u oġġetti oħra ta’ importanza arkeoloġika, storika, kulturali, xjentifika jew reliġjuża rari, li għalihom hemm raġunijiet kredibbli li tissuspetta li l-oġġetti jkunu tneħħew illegalment mill-Ukrajna.

Ġiet introdotta għodda ta’ ċirkomvenzjoni bħala parti mill-pakkett ta’ sanzjonijiet ta’ Ġunju 2023 biex tindirizza ċ-ċirkomvenzjoni dejjem tikber tas-sanzjonijiet tal-UE. Biex ma tħallix lir-Russja tuża r-riżorsi li jippermettulha li ssegwi l-gwerra ta’ aggressjoni tagħha kontra l-Ukraina, l-għodda tieħu l-forma ta’ miżuri xierqa individwali biex tindirizza l-involviment ta’ operaturi f’pajjiż mhux tal-UE fil-faċilitatar taċ-ċirkomvenzjoni. Minn hemm ‘il quddiem, fejn tippersisti ċ-ċirkomvenzjoni sostantanzjali u sistematika, l-UE għandha l-possibbilità li tieħu miżuri eċċezzjonali u tal-aħħar istanza Meta jiġri dan, il-Kunsill tal-Unjoni Ewropea, jista’, b’unamità jiddeċiedi li jirrestrinġi l-bejgħ, il-provvista, it-trasferiment jew l-esportazzjoni ta’ prodotti u teknoloġija li l-esportazzjoni tagħhom għar-Russja tkun diġà pprojbita fir-rigward ta’ pajjiżi mhux tal-UE li l-ġuriżdizzjonijiet tagħhom juru li jkunu ta’ riskju kontinwu u partikolarment għoli li jkun użat għal ċirkomvenzjoni. Biex ikompli jfixkel iċ-ċirkomvenzjoni, il-pakkett ta’ Diċembru 2023 jirrestrinġi wkoll lil ċittadini Russi milli jippossiedu, jikkontrollaw jew jżommu pożizzjonijiet fuq korpi governattivi ta’ persuni ġuridiċi, entitajiet jew korpi li jipprovdu kartieri tal-assi kripto, kontijiet jew servizzi ta’ kustodja lil persuni jew residenti Russi.

Restrizzjonijiet fuq media Russa jinkludu s-sospensjoni ta’ trażmissjoni, distribuzzjoni u xandir minn numru ta’ entitajiet posseduti mill-istat sabiex titwaqqaf il-propaganda sistematika, manipulazzjoni tal-media u diżinformazzjoni. Il-pakkett ta’ sanzjonijiet ta’ Ġunju 2024 issospenda l-liċenzji ta’ xandir ta’ erba’ organizzazzjonijiet oħra għall-azzjonijiet ta’ propaganda kontinwa u kkonċertata mmirati lejn is-soċjetà ċivili tal-UE u pajjiżi ġirien, li jgħawġu u jimmanipulaw serjament il-fatti. Il-pakkett jintroduċi wkoll miżuri li jirrestrinġu appoġġ finanzjarju lil partiti politiċi, organizzazzjonijiet mhux governattivi, gruppi ta’ riflessjoni u servizzi tal-media li jiġu mir-Russja u l-affiljati tagħha, sabiex jikkumbatti l-interferenza u propaganda Russa.

Sanzjonijiet fuq il-Belarussja iddaħħlu fid-dawl tas-sitwazzjoni f’dak il-pajjiż u l-involviment tal-Belarussja fl-aggressjoni Russa kontra l-Ukraina (ara s-sommarju).

Malajr wara l-adozzjoni tal-14-il pakkett ta’ sanzjonijiet kontra r-Russja, kien adottat il-pakkett ta’ alinjament tal-Belarussja fid-29 ta’ Ġunju 2024. Is-sanzjonijiet fuq il-Belarussja ‘l biċċa l-kbira pproduċew miżuri settorjali li ttieħdu kontra r-Russja sabiex jagħlqu lakunijiet eżistenti u biex jillimitaw possibbiltajiet ta’ ċirkomvenzjoni. Dan il-pakkett jinkludi projbizzjoni fuq l-esportazzjoni fuq oġġetti ta’ użu doppju u avanzati u teknoloġiji, flimkien ma’ projbizzjonijiet fuq l-importazzjoni ta’ deheb, djamanti, elju, faħam u prodotti minerali, inkluż żejt grezz. Hu jkompli jwessa’ wkoll il-projbizzjoni tat-trasport stradali u jirrifletti l-klawżola tal-aħjar sforzi għal sussidjarji tal-operaturi f’pajjiżi mhux tal-UE. Fl-aħħarnett, iżid klawżola tal-eskliżjoni tal-Belarussja għal esportaturi tal-UE.

Is-sanzjonijiet fuq individwi u entitajiet Iranjani daħlu fid-dawl tar-rwol tagħhom fl-iżvilupp u twassil ta’ UAVs użati mir-Russja fil-gwerra tagħha kontra l-Ukraina.

Fl-20 ta’ Lulju 2023, il-Kunsill waqqaf qafas ġdid għal miżuri restrittivi fid-dawl tal-appoġġ militari tal-Iran għall-gwerra ta’ aggressjoni tar-Russja kontra l-Ukraina, li jipprojbixxi l-esportazzjoni mill-UE għall-Iran ta’ komponenti użati fil-kostruzzjoni u produzzjoni ta’ UAVs u jipprovdi għal restrizzjonijiet għal vjaġġar u miżuri ta’ ffriżar tal-assi li jistgħu jkunu imposti kontra individwi responsabblii għal, li jappoġġjaw jew li jkunu involuti fil-produzzjoni ta’ UAV tal-Iran (ara s-sommarju). Dan ir-reġim il-ġdid jikkumplimenta t-tliet pakketti ta’ sanzjonijiet li kienu adottati qabel relatati ma’ drones li jimmiraw individwi u entitajiet. Fl-istess jum, il-Kunsill ddeċieda wkoll li jelenka sitt individwi Iranjani taħt żewġ reġimi ta’ sanzjonijiet diġà eżistenti għall-appoġġ militari tal-Iran għall-gwerra ta’ aggressjoni tar-Russja kontra l-Ukraina (drones) u għar-reġim tas-Sirja (sistemi ta’ difiża tal-ajru)
Fil-31 ta’ Mejju 2024, il-Kunsill adotta miżuri restrittivi kontra sitt individwi u tliet entitajiet għar-rwoli tagħhom fit-trasferiment ta’ UAVs lir-Russja b’appoġġ tal-gwerra tagħha ta’ aggressjoni kontra l-Ukraina jew it-trasferiment ta’ UAVs jew missili lil gruppi u entitajiet armati li jimminaw il-paċi u s-sigurtà fil-Lvant Nofsani u r-reġjun tal-Baħar l-Aħmar, jew għall-involviment tagħhom fil-programm ta’ UAV tal-Iran.
Fl-24 ta’ Ġunju 2024, entità Iranjana kienet elenkata minħabba l-involviment tagħha fil-programmi tal-UAV u tal-missili tal-Iran u fit-trasferiment ta’ UAVs Iranjani lir-Russja b’appoġġ għall-gwerra tagħha ta’ aggressjoni kontra l-Ukraina.

Miżuri diplomatiċi jinkludu s-sospensjoni ta’ vjaġġar mingħajr bżonn ta’ viża għal diplomatiċi u l-faċilitatar tal-viża għal detenturi ta’ passaport ta’ servizz u negozjanti.

Eżenzjonijiet

Biex jissalvagwardjaw is-sigurtà globali tal-ikel u tal-enerġija, is-sanzjonijiet ma jimmirawx l-esportazzjoni tar-Russja ta’ prodotti agrikoli u tal-ikel, inklużi qamħ u fertilizzanti, jew il-provvista ta’ prodotti taż-żejt u tal-petroleum lil pajjiżi mhux tal-UE.
L-assi ta’ ċerti individwi li għandhom rwol sinifikanti fil-kummerċ internazzjonali tal-prodotti agrikoli u alimentari, inkluż qamħ u fertilizzanti, qabel il-elenkar tagħhom, jistgħu ma jibqgħux iffriżati; il-fondi u r-riżorsi ekonomiċi jistgħu jsiru disponibbli għalihom ukoll.
Is-sanzjonijiet tal-UE ma jżommux lill-pajjiżi mhux tal-UE u liċ-ċittadini tagħhom barra mill-UE milli jixtru prodotti farmaċewtiċi jew mediċi mir-Russja.
“Klawżola ta’ emerġenza” tippermetti t-trasport ta’ żejt lil hinn mil-limitu massimu tal-prezz, il-provvediment ta’ assistenza teknika, servizzi ta’ sensorija jew finanzjarji, jew assistenza finanzjarja relatata mat-trasport tagħha lil pajjiżi mhux tal-UE, biex b’mod urġenti jevitaw jew jnaqqsu avvenimenti li x’aktarx ikollhom impatt serju fuq is-saħħa u s-sikurezza umana jew l-ambjent, jew bħala rispons għal diżastru naturali.

Annessi għad-deċiżjonijiet u regolamenti varji jinkludu l-listi tal-individwi, entitajiet, korpi, prodotti u teknoloġija li ġiet affettwata mill-miżuri restrittivi.

MINN META BDEW JAPPLIKAW ID-DEĊIŻJONIJIET U R-REGOLAMENTI?

Id-Deċiżjoni 2014/119/PESK u r-Regolament (UE) Nru 208/2014 ilhom japplikaw mis-6 ta’ Marzu 2014.

Id-Deċiżjoni 2014/145/PESK u r-Regolament (UE) Nru 269/2014 ilhom japplikaw mis-17 ta’ Marzu 2014.

Id-Deċiżjoni 2014/386/PESK u r-Regolament (UE) Nru 692/2014 ilhom japplikaw mill-25 ta’ Ġunju 2014.

Id-Deċiżjoni 2014/512/PESK u r-Regolament (UE) Nru 833/2014 ilhom japplikaw mill-1 ta’ Awwissu 2014.

Id-Deċiżjoni ta’ Implimentazzjoni (PESK) 2022/263 u r-Regolament ta’ Implimentazzjoni (UE) 2022/263 ilhom japplikaw mit-24 ta’ Frar 2022.

SFOND

Għal aktar informazzjoni, ara:

Relazzjonijiet bejn l-UE u l-Ukrajna — skeda informattiva (is-Servizz Ewropew għall-Azzjoni Esterna)
Sanzjonijiet tal-UE kontra r-Russja fuq l-Ukrajna (il-Kunsill tal-Unjoni Ewropea)
Is-sanzjonijiet tal-UE kontra r-Russja wara l-invażjoni tal-Ukrajna — skeda informattiva (i-Kummissjoni Ewropea).
Is-sanzjonijiet tal-UE kontra r-Russja (il-Kunsill tal-Unjoni Ewropea).
Ir-rispons tal-UE għall-gwerra ta’ aggressjoni tar-Russja kontra l-Ukraina (il-Kunsill tal-Unjoni Ewropea).
Delegazzjoni tal-Unjoni Ewropea lill-Ukrajna (Servizz għall-Azzjoni Esterna Ewropea).

TERMINI EWLENIN

Infrastruttura kritika. Assi, faċilità, tagħmir, network jew sistema, jew parti minn assi, faċilità, tagħmir, network jew sistema, li hija meħtieġa għall-għoti ta’ servizz essenzjali.

Infrastruttura kritika Ewropea. Infrastruttura kritika, li t-tfixkil jew qerda tagħha taffettwa b’mod sinifikanti żewġ Stati Membri jew aktar, jew xi Stat Membru uniku jekk l-infrastruttura kritika tkun ġo Stat Membru ieħor. Dan jinkludi effetti li jirriżultaw minn dipendenzi transsettorjali fuq tipi ta’ infrastruttura oħrajn.

DOKUMENTI PRINĊIPALI

Id-Deċiżjoni tal-Kunsill 2014/119/PESK tal-5 ta’ Marzu 2014 dwar miżuri restrittivi diretti kontra ċerti persuni, entitajiet u korpi fid-dawl tas-sitwazzjoni fl-Ukrajna (ĠU L 66, 6.3.2014, pp. 26-30).

L-emendi suċċessivi għad-Deċiżjoni 2014/119/PESK ġew inkorporati fit-test oriġinali. Din il-verżjoni konsolidata għandha valur dokumentarju biss.

Ir-Regolament tal-Kunsill (UE) Nru 208/2014 tal-5 ta’ Marzu 2014 dwar miżuri restrittivi diretti kontra ċerti persuni, entitajiet u korpi fid-dawl tas-sitwazzjoni fl-Ukrajna (ĠU L 66, 6.3.2014, pp. 1-10).

Ara l-verżjoni konsolidata.

Id-Deċiżjoni tal-Kunsill 2014/145/PESK tas-17 ta’ Marzu 2014 dwar miżuri restrittivi fir-rigward ta’ azzjonijiet li jdgħajfu jew jheddu l-integrità territorjali, is-sovranità u l-indipendenza tal-Ukrajna (ĠU L 78, 17.3.2014, pp. 16-21).

Ara l-verżjoni konsolidata.

Ir-Regolament tal-Kunsill (UE) Nru 269/2014 tas-17 ta’ Marzu 2014 dwar miżuri restrittivi fir-rigward ta’ azzjonijiet li jdgħajfu jew jheddu l-integrità territorjali, is-sovranità u l-indipendenza tal-Ukrajna (ĠU L 78, 17.3.2014, pp. 6-15).

Ara l-verżjoni konsolidata.

Id-Deċiżjoni tal-Kunsill 2014/386/PESK tat-23 ta’ Ġunju 2014 dwar restrizzjonijiet fuq oġġetti li joriġinaw fil-Krimea jew Sevastopol, minħabba l-annessjoni illegali tal-Krimea u Sevastopol (ĠU L 183, 24.6.2014, pp. 70-71).

Ara l-verżjoni konsolidata.

Ir-Regolament tal-Kunsill (UE) Nru 692/2014 tat-23 ta’ Ġunju 2014 dwar restrizzjonijiet fuq l-importazzjoni fl-Unjoni ta’ oġġetti li joriġinaw fil-Krimea jew Sevastopol, minħabba l-annessjoni illegali tagħhom (ĠU L 183, 24.6.2014, pp. 9-14).

Ara l-verżjoni konsolidata.

Id-Deċiżjoni tal-Kunsill 2014/512/PESK tal-31 ta’ Lulju 2014 dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU L 229, 31.7.2014, pp. 13-17).

Ara l-verżjoni konsolidata.

Ir-Regolament tal-Kunsill (UE) Nru 833/2014 tal-31 ta’ Lulju 2014 dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU L 229, 31.7.2014, pp. 1-11).

Ara l-verżjoni konsolidata.

Id-Deċiżjoni tal-Kunsill (PESK) 2022/266 tat-23 ta’ Frar 2022 dwar miżuri restrittivi b’reazzjoni għar-rikonoxximent taż-żoni mhux ikkontrollati mill-gvern tal-oblasts tal-Ukrajna ta’ Donetsk u Luhansk u d-deċiżjoni li jintbagħtu l-forzi armati Russi f’dawk iż-żoni (ĠU L 42 I, 23.2.2022, pp. 109-113).

Ara l-verżjoni konsolidata.

Ir-Regolament tal-Kunsill (UE) 2022/263 tat-23 ta’ Frar 2022 dwar miżuri restrittivi b’reazzjoni għar-rikonoxximent taż-żoni mhux ikkontrollati mill-gvern tal-oblasts ta’ Donetsk u Luhansk tal-Ukraina u l-ordni tal-forzi armati Russi f’dawk iż-żoni (ĠU L 42 I, 23.2.2022, pp. 77-94).

Ara l-verżjoni konsolidata.

DOKUMENTI RELATATI

Il-Lista Militari Komuni tal-Unjoni Ewropea adottata mill-Kunsill fid-19 ta’ Frar 2024 (tagħmir kopert mill-Pożizzjoni Komuni tal-Kunsill 2008/944/PESK li tiddefinixxi r-regoli komuni li jirregolaw il-kontroll ta’ esportazzjonijiet ta’ teknoloġija u tagħmir militari) (li taġġorna u tissostitwixxi l-Lista Militari Komuni tal-Unjoni Ewropea adottata mill-Kunsill fl-20 ta’ Frar 2023) (PESK) (ĠU C., C/2024/1945, 1.3.2024).

Rettifika

Id-Deċiżjoni tal-Kunsill (PESK) 2024/1770 tat-24 ta’ Ġunju 2024 dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU L., 2024/1770, 24.6.2024).

Id-Deċiżjoni tal-Kunsill (PESK) 2024/1744 tat-24 ta’ Ġunju 2024 li temenda d-Deċiżjoni 2014/512/PESK dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU L., 2024/1744, 24.6.2024).

Ir-Regolament ta’ Implimentazzjoni tal-Kunsill (UE) 2024/1776 tat-24 ta’ Ġunju 2024 li jemenda r-Regolament (UE) Nru 2024/1428 li jemenda r-Regolament (UE) Nru. 833/2014 dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU L., 2024/1776, 24.6.2024).

Id-Deċiżjoni tal-Kunsill (PESK) 2024/2026 tat-22 ta’ Lulju 2024 li temenda d-Deċiżjoni 2014/512/PESK dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU L., 2024/2026, 23.7.2024).

Ir-Regolament tal-Kunsill (UE) 2023/1529 tal-20 ta’ Lulju 2023 dwar miżuri restrittivi fid-dawl tal-appoġġ militari tal-Iran għall-gwerra ta’ aggressjoni tar-Russja kontra l-Ukrajna (ĠU L 186, 25.7.2023, pp. 1-15).

Ara l-verżjoni konsolidata.

Id-Deċiżjoni tal-Kunsill (PESK) 2023/1532 tal-20 ta’ Lulju 2023 dwar miżuri restrittivi fid-dawl tal-appoġġ militari tal-Iran għall-gwerra ta’ aggressjoni tar-Russja kontra l-Ukrajna (ĠU L 186, 25.7.2023, pp. 20-27).

Ara l-verżjoni konsolidata.

Id-Deċiżjoni tal-Kunsill (PESK) 2023/2871 tat-18 ta’ Diċembru 2023 li temenda d-Deċiżjoni 2014/145/PESK dwar miżuri restrittivi fir-rigward ta’ azzjonijiet li jipperikolaw jew jheddu l-integrità territorjali, is-sovranità u l-indipendenza tal-Ukrajna (ĠU L., 2023/2871, 18.12.2023).

Ir-Regolament (UE) 2023/2873 tat-18 ta’ Diċembru 2023 li jemenda r-Regolament (UE) 269/2014 dwar miżuri restrittivi fir-rigward ta’ azzjonijiet li jipperikolaw jew jheddu l-integrità territorjali, is-sovranità u l-indipendenza tal-Ukrajna (ĠU L., 2023/2873, 18.12.2023).

Id-Deċiżjoni tal-Kunsill (PESK) 2023/2874 tat-18 ta’ Diċembru 2023 li temenda d-Deċiżjoni 2014/512/PESK dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU L., 2023/2874, 18.12.2023).

Ir-Regolament ta’ Implimentazzjoni tal-Kunsill (UE) 2023/2875 tat-18 ta’ Diċembru 2023 li jemenda r-Regolament ta’ Implimentazzjoni (UE) Nru. 269/2014 dwar miżuri restrittivi fir-rigward ta’ azzjonijiet li jipperikolaw jew jheddu l-integrità territorjali, is-sovranità u l-indipendenza tal-Ukrajna (ĠU L., 2023/2875, 18.12.2023).

Ir-Regolament tal-Kunsill (UE) 2023/2878 tat-18 ta’ Diċembru 2023 li jemenda r-Regolament (UE) Nru 833/2014 dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU L., 2023/2878, 18.12.2023).

Ir-Regolament (KE) 2021/821 tal-Parlament Ewropew u tal-Kunsill tal-20 ta’ Mejju 2021 li jistabbilixxi reġim tal-Unjoni għall-kontroll tal-esportazzjonijiet, is-senserija, l-assistenza teknika, it-transitu u t-trasferiment ta’ oġġetti b’użu doppju (riformulazzjoni) (ĠU L 206, 11.6.2021, p. 1-461).

Ara l-verżjoni konsolidata.

Verżjoni konsolidata tat-Trattat dwar il-Funzjonament tal-Unjoni Ewropea — Parti Ħamsa — L-azzjoni esterna tal-Unjoni — Titolu IV — Miżuri restrittivi — Artikolu 215 (ex Artikolu 301 TEC) (ĠU C 202, 7.6.2016, p. 144).

Id-Deċiżjoni tal-Kunsill 2012/642/PESK tal-15 ta’ Ottubru 2012 dwar miżuri restrittivi kontra l-Belarussja (ĠU L 285, 17.10.2012, pp. 1-52).

Ara l-verżjoni konsolidata.

Ir-Regolament tal-Kunsill (KE) Nru 765/2006 tat-18 ta’ Mejju 2006 dwar miżuri restrittivi kontra l-President Lukashenko u ċerti uffiċjali tal-Belarussja (ĠU L 134, 20.5.2006, pp. 1-11).

Ara l-verżjoni konsolidata.

l-aħħar aġġornament 19.09.2024

Fuq

Choose the experimental features you want to try

Titolu u referenza

Miżuri restrittivi tal-UE fid-dawl tal-invażjoni Russa fl-Ukrajna

SOMMARJU TA’:

X’INHU L-GĦAN TAD-DEĊIŻJONIJIET U TAR-REGOLAMENTI?

PUNTI EWLENIN

MINN META BDEW JAPPLIKAW ID-DEĊIŻJONIJIET U R-REGOLAMENTI?

SFOND

TERMINI EWLENIN

DOKUMENTI PRINĊIPALI

DOKUMENTI RELATATI