Bank Ċentrali Ewropew — regoli tal-proċedura

PUNTI EWLENIN

Il-Kunsill Governattiv

• Il-Kunsill Governattiv huwa magħmul minn:
  • is-sitt membri tal-Bord Eżekuttiv u
  • il-gvernaturi tal-banek ċentrali nazzjonali tal-pajjiżi taż-żona tal-euro.
• Il-Kunsill Governattiv jiltaqa’ darbtejn fix-xahar. Il-laqgħat jistgħu jissejħu wkoll mill-President fuq it-talba ta’ mill-inqas tlieta mill-membri tiegħu.
• L-attendenza hija ristretta għall-membri tiegħu, għall-President tal-Kunsill tal-Unjoni Ewropea u għal membru tal-Kummissjoni Ewropea. Normalment kull gvernatur jista’ jkun akkumpanjat minn persuna waħda.
• Kworum ta’ żewġ terzi tal-membri bi drittijiet tal-vot huwa neċessarju sabiex issir votazzjoni.
• Il-President jista’ jagħti bidu għal votazzjoni sigrieta fil-Kunsill Governattiv jekk mitlub minn mill-inqas tlieta mill-membri tiegħu. Id-deċiżjonijiet jistgħu jittieħdu permezz ta’ proċedura bil-miktub, sakemm ma joġġezzjonawx mill-anqas tliet membri.
• Il-Kunsill Governattiv jista’ jistabbilixxi u jxolji kumitati biex jassistu fil-ħidma tal-korpi ta’ teħid ta’ deċiżjonijiet tal-BĊE.
• Il-Kunsill Governattiv jadotta regolamenti, linji gwida, deċiżjonijiet, rakkomandazzjonijiet u opinjonijiet tal-BĊE. Jista’ jiddelega ċerti setgħat lill-Bord Eżekuttiv għall-implimentazzjoni ta’ regolamenti u ta’ linji gwida.

Il-Bord Eżekuttiv

• Il-Bord Eżekuttiv jadotta struzzjonijiet tal-BĊE. F’ċerti ċirkustanzi, dan jista’ jadotta deċiżjonijiet, rakkomandazzjonijiet u opinjonijiet.
• Il-Bord Eżekuttiv jiddeċiedi dwar in-numru, l-isem u l-kompetenza rispettiva ta’ kull qasam ta’ xogħol tal-BĊE. Il-Bord Eżekuttiv jikkonsulta mal-Kunsill Governattiv fuq tali deċiżjonijiet, li jsiru pubbliċi.

Il-Kunsill Ġenerali

• Il-Kunsill Ġenerali jista’ jippreżenta osservazzjonijiet lill-Kunsill Governattiv dwar ċerti kwistjonijiet, inklużi rakkomandazzjonijiet fil-qasam tal-istatistika, ir-rapport annwali u kundizzjonijiet tal-impjieg tal-persunal.

Id-Deċiżjoni 2004/257/KE ġiet emendata diversi drabi:

• Id-Deċiżjoni 2009/328/KE introduċiet sistema ta’ rotazzjoni li permezz tagħha l-Gvernaturi tal-Banek Ċentrali Nazzjonali għandhom id-dritt jivvutaw darba kull wieħed fil-Kunsill Governattiv.
• Id-Deċiżjoni 2014/179/UE tirrikjedi li l-Kunsill Governattiv jadotta u jaġġorna kodiċi ta’ kondotta għall-membri u għall-membri supplenti tiegħu, kif ukoll biex jistabbilixxi kumitat ta’ verifika ta’ livell għoli biex jissaħħu kemm il-livelli interni kif ukoll dawk esterni ta’ kontroll, u b’hekk tissaħħaħ il-governanza korporattiva tal-BĊE.
• Id-Deċiżjoni (UE) 2015/716 iġġib id-deċiżjoni konformi mar-Regolament (UE) Nru 1024/2013 li kien ta lill-BĊE kompiti speċjali dwar il-politiki relatati mas-superviżjoni prudenzjali tal-istituzzjonijiet ta’ kreditu. Id-deċiżjoni tiċċara l-istanzi fejn id-deċiżjonijiet jistgħu jittieħdu skont proċedura bil-miktub.
• Id-Deċiżjoni (UE) 2016/1717 tittratta atti ġuridiċi bħal-linji gwida u l-istruzzjonijiet tal-BĊE u kif dawn jiġu nnotifikati lill-banek ċentrali nazzjonali u lill-awtoritajiet. Issa d-deċiżjonijiet tal-BĊE indirizzati lill-entitajiet taħt superviżjoni jew lill-entitajiet li applikaw għall-awtorizzazzjoni biex jibdew negozju bħala istituzzjoni ta’ kreditu, u d-deċiżjonijiet li jimponu sanzjonijiet fuq partijiet terzi għandhom jiġu ffirmati mis-segretarju tal-Kunsill Governattiv (minflok mill-President tal-BĊE b’destinatarji) sabiex tiġi ċċertifikata l-konformità mad-deċiżjoni tal-Kunsill Governattiv.