Is-sikurezza alimentari – materjali sikuri li jiġu f’kuntatt mal-ikel

SOMMARJU TA’:

Ir-Regolament (KE) Nru 1935/2004 dwar materjali u oġġetti maħsuba biex jiġu f’kuntatt mal-ikel

X’INHU L-GĦAN TAR-REGOLAMENT?

Dan jistabbilixxi regoli komuni għat-tqegħid fis-suq ta’ materjali li jiġu f’kuntatt mal-ikel (FCMs), inklużi l-imballaġġ tal-ikel, l-oġġetti tal-kċina, il-pożati u t-tagħmir għall-ipproċessar tal-ikel, li huma maħsuba jew li x’aktarx jiġu f’kuntatt mal-ikel, jew jittrasferixxu l-kostitwenti tagħhom (sustanzi li jista’ jkun fihom) fl-ikel.
Dan ifittex li jipproteġi s-saħħa tal-bniedem u l-interessi tal-konsumaturi u jiżgura li l-prodotti użati jistgħu jinbiegħu fi kwalunkwe post fiż-Żona Ekonomika Ewropea – żona li tinkludi l-Istati Membri tal-Unjoni Ewropea (UE), l-Iżlanda, il-Liechtenstein u n-Norveġja – li fiha hemm il-moviment ħieles ta’ persuni, merkanzija, servizzi u kapital.

PUNTI EWLENIN

L-FCMs għandhom jiġu manifatturati f’konformità ma’ prattika tajba ta’ manifattura sabiex, f’kundizzjonijiet normali jew prevedibbli ta’ użu, ma jittrasferixxux il-kostitwenti tagħhom għall-ikel fi kwantitajiet li jistgħu:
- jipperikolaw is-saħħa tal-bniedem;
- jintroduċu bidla inaċċettabbli fil-kompożizzjoni tal-ikel; jew
- jintroduċu deterjorament fit-togħma jew fil-konsistenza tal-ikel.
Il-leġiżlazzjoni tinkludi 17-il grupp ta’ materjali u oġġetti li għalihom jistgħu jiġu adottati miżuri speċifiċi.
Dawn il-miżuri speċifiċi jistgħu jinkludu lista ta’ sustanzi awtorizzati li huma permessi li jintużaw fil-livell tal-UE fil-manifattura tal-FCMs u restrizzjonijiet, bħal limiti speċifiċi fuq il-migrazzjoni (it-trasferiment ta’ kostitwenti).
Ir-Regolament jistabbilixxi wkoll il-proċess għal applikazzjoni għall-użu ta’ sustanza ġdida fejn teżisti tali lista, bħal fil-każ tal-plastik tal-FCMs. Għandu jiġi sottomess dossier lill-awtorità nazzjonali rilevanti, li mbagħad tibagħtu lill-Awtorità Ewropea dwar is-Sigurtà fl-Ikel.
L-FCMs li ma jkunux diġà f’kuntatt mal-ikel meta jinbiegħu lill-konsumaturi, bħal oġġetti tal-kċina u pożati, għandhom jiġu identifikati bħala “għal kuntatt mal-ikel” jew ikunu akkumpanjati mis-simbolu tal-inbid u tal-furketta stabbilit fl-Anness II tar-regolament, jekk l-użu maħsub tal-oġġett bħala FCM ma jkunx ċar. Informazzjoni oħra biex jiġi żgurat l-użu sikur tal-oġġett tal-FCM għandha tiġi pprovduta wkoll fejn rilevanti.
Għandu jkun hemm fis-seħħ miżuri ta’ traċċabilità biex jagħmluha possibbli li kwalunkwe prodott difettuż jinġabar lura jew li l-pubbliku jiġi pprovdut b’informazzjoni speċifika.
Ir-regoli ma japplikawx għal:
- materjali u oġġetti antiki;
- kisi li jkopri, pereżempju, qxur tal-ġobon, prodotti ppreparati tal-laħam jew tal-frott, li jifformaw parti mill-ikel jew li jistgħu jittieklu miegħu.

MINN META BEDA JAPPLIKA R-REGOLAMENT?

Dan ilu japplika mit-3 ta’ Diċembru 2004, ħlief għall-miżuri ta’ traċċabbiltà, li ilhom japplikaw mis-27 ta’ Ottubru 2006.

SFOND

Għal aktar informazzjoni, ara

Is-sikurezza alimentari – Materjali li jiġu f’kuntatt mal-ikel (Il-Kummissjoni Ewropea).

DOKUMENT EWLIENI

Ir-Regolament (KE) Nru 1935/2004 tal-Parlament Ewropew u tal-Kunsill tas-27 ta’ Ottubru 2004 dwar materjali u oġġetti maħsuba biex jiġu f’kuntatt ma’ l-ikel u li jħassar id-Direttivi 80/590/KEE u 89/109/KEE (ĠU L 338, 13.11.2004, pp. 4–17).

L-emendi suċċessivi għar-Regolament (KE) Nru 1935/2004 ġew inkorporati fit-test bażiku. Din il-verżjoni konsolidata għandha biss valur dokumentarju.

l-aħħar aġġornament 7.1.2022

Top

Choose the experimental features you want to try