(1)

Il-Patt Ekoloġiku Ewropew stabbilit fil-komunikazzjoni tal-Kummissjoni tal-11 ta’ Diċembru 2019 huwa l-istrateġija ta’ tkabbir sostenibbli tal-Ewropa u għandha l-għan li tittrasforma l-Unjoni f’soċjetà ġusta u għanja, b’ekonomija moderna, kompetittiva, newtrali għall-klima u ċirkolari u ambjent ħieles mis-sustanzi tossiċi. Dan jistabbilixxi l-objettiv ambizzjuż li jiġi żgurat li l-Unjoni ssir l-ewwel kontinent newtrali għall-klima sal-2050. Dan jirrikonoxxi l-vantaġġi tal-investiment fis-sostenibbiltà kompetittiva tal-Unjoni billi tinbena Ewropa aktar ġusta, aktar ekoloġika u aktar diġitali. Il-prodotti jaqdu rwol ċentrali f’din it-tranżizzjoni ekoloġika. Filwaqt li jissottolinja li l-proċessi tal-produzzjoni u x-xejriet tal-konsum attwali għadhom lineari wisq u jiddependu minn throughput ta’ materjali ġodda estratti, innegozjati u pproċessati f’oġġetti li finalment jintremew bħala skart jew emissjonijiet, il-Patt Ekoloġiku Ewropew jenfasizza l-ħtieġa urġenti għal tranżizzjoni lejn mudell ta’ ekonomija ċirkolari u jenfasizza l-progress sinifikanti li għad irid isir. Dan jidentifika wkoll l-effiċjenza enerġetika bħala prijorità għad-dekarbonizzazzjoni tas-settur tal-enerġija u biex jintlaħqu l-objettivi klimatiċi fl-2030 u fl-2050.

(2)

Biex titħaffef it-tranżizzjoni lejn mudell ta’ ekonomija ċirkolari, il-Kummissjoni fasslet aġenda orjentata lejn il-futur fil-komunikazzjoni tagħha tal-11 ta’ Marzu 2020 dwar Pjan ta’ Azzjoni ġdid dwar l-Ekonomija Ċirkolari għal Ewropa aktar nadifa u aktar kompetittiva (CEAP), bl-objettiv li tagħmel il-qafas regolatorju adattat għal futur sostenibbli. Is-CEAP jissottolinja li, “għaċ-ċittadini, l-ekonomija ċirkolari se tipprovdi prodotti ta’ kwalità għolja, funzjonali u sikuri, li jkunu effiċjenti u affordabbli, idumu jservu aktar u li jkunu ddisinjati għal użu mill-ġdid, tiswija u riċiklaġġ ta’ kwalità għolja.”. Kif stabbilit fis-CEAP, bħalissa ma hemm l-ebda sett komprensiv ta’ rekwiżiti biex jiġi żgurat li l-prodotti kollha imqiegħda fis-suq tal-Unjoni jsiru dejjem aktar sostenibbli u jissodisfaw il-kriterji taċ-ċirkolarità. B’mod partikolari, id-disinn tal-prodott ma jippromwovix biżżejjed is-sostenibbiltà tul iċ-ċiklu tal-ħajja kollu. Minħabba f’hekk, il-prodotti qed jiġu sostitwiti ta’ spiss, u dan jinvolvi użu sinifikanti tal-enerġija u tar-riżorsi sabiex jiġu prodotti u distribwiti prodotti ġodda u jintremew dawk qodma. Għadu diffiċli wisq għall-operaturi ekonomiċi u għaċ-ċittadini biex jagħmlu għażliet sostenibbli fir-rigward tal-prodotti, peress li l-informazzjoni rilevanti u l-għażliet affordabbli biex jagħmlu dan huma nieqsa. Dan iwassal għal opportunitajiet mitlufa għas-sostenibbiltà u għal operazzjonijiet li jżommu l-valur, domanda limitata għal materjali sekondarji u ostakli għall-adozzjoni ta’ mudelli ta’ negozju ċirkolari.

(3)

Suq intern li jiffunzjona bis-sħiħ għall-prodotti sostenibbli huwa prerekwiżit għall-istabbiliment ta’ ekonomija ċirkolari fl-Unjoni. Rekwiżiti komuni tal-ekodisinn fil-livell tal-Unjoni jippermettu l-iżvilupp, l-użu u l-espansjoni ta’ mudelli ta’ negozju ġodda tal-ekonomija ċirkolari fis-suq intern kollu. Tali miżuri jtaffu wkoll il-piż fuq il-kumpaniji u jipprovdu lill-industrija u lill-konsumaturi aċċess għal data affidabbli u ċara, u b’hekk jippermettu li jsiru għażliet aktar sostenibbli.

(4)

Il-komunikazzjoni tal-Kummissjoni tal-10 ta’ Marzu 2020 dwar Strateġija Industrijali Ġdida għall-Ewropa tistabbilixxi l-ambizzjoni komprensiva tal-Unjoni li trawwem “tranżizzjoni doppja” lejn in-newtralità klimatika u t-tmexxija diġitali. Din tirrifletti l-Patt Ekoloġiku Ewropew fl-enfasi fuq ir-rwol ewlieni li l-industrija tal-Ewropa trid taqdi f’dak il-għan, billi tnaqqas l-impronta tal-karbonju u l-impronta tal-materjali tagħha u tintegra ċ-ċirkolarità fl-ekonomija kollha, u tissottolinja l-ħtieġa li nimxu lil hinn mill-mudelli tradizzjonali, u nirrivoluzzjonaw il-mod kif niddisinjaw, nagħmlu, nużaw u narmu l-prodotti, kif ukoll il-ħtieġa ta’ provvista sikura ta’ materja prima. Ir-riċiklaġġ u l-użu tal-materja prima sekondarja se jgħinu biex titnaqqas id-dipendenza tal-Unjoni. Il-komunikazzjoni tal-Kummissjoni tal-5 ta’ Mejju 2021 intitolata “Aġġornament tal-Istrateġija Industrijali l-Ġdida tal-2020: Nibnu Suq Uniku aktar b’saħħtu għall-irkupru tal-Ewropa” jsaħħaħ il-messaġġi prinċipali tal-Istrateġija tal-2020 u jiffoka fuq it-tagħlimiet mill-kriżi tal-COVID-19, inkluża l-ħtieġa li titrawwem ir-reżiljenza.

(5)

Fin-nuqqas ta’ liġi tal-Unjoni, diġà tfaċċaw approċċi nazzjonali diverġenti għat-titjib tas-sostenibbiltà ambjentali tal-prodotti, li jvarjaw minn rekwiżiti ta’ informazzjoni dwar it-tul ta’ żmien tal-kompatibbiltà tas-software tal-apparati elettroniċi għal rapportar tal-obbligi dwar l-immaniġġar ta’ oġġetti durabbli mhux mibjugħa. Din hija indikazzjoni li aktar sforzi nazzjonali biex jinkisbu l-għanijiet li jfittex li jilħaq dan ir-Regolament aktarx iwasslu għal aktar frammentazzjoni tas-suq intern. Għalhekk, sabiex isir kontribut favur il-funzjonament tas-suq intern filwaqt li jiġi żgurat livell għoli ta’ protezzjoni ambjentali, huwa meħtieġ qafas regolatorju ambizzjuż biex jiġu introdotti progressivament rekwiżiti tal-ekodisinn għall-prodotti. Dan ir-Regolament se jistabbilixxi tali qafas, billi jagħmel l-approċċ tal-ekodisinn stabbilit inizjalment fid-Direttiva 2009/125/KE tal-Parlament Ewropew u tal-Kunsill (3) applikabbli għall-aktar firxa wiesgħa possibbli ta’ prodotti.

(6)

Dan ir-Regolament se jappoġġa xejriet tal-produzzjoni u tal-konsum li jkunu allinjati mal-miri kumplessivi tas-sostenibbiltà tal-Unjoni, inklużi dawk klimatiċi, ambjentali, u dawk b’rabta mal-enerġija, l-użu tar-riżorsi u l-bijodiversità, filwaqt li jibqa’ fi ħdan il-limiti planetarji, billi jistabbilixxi qafas leġiżlattiv li jikkontribwixxi biex ikun possibbli li l-prodotti jkunu adatti għal ekonomija newtrali għall-klima, effiċjenti fir-riżorsi u ċirkolari, filwaqt li jitnaqqas l-iskart u jiġi żgurat li l-prestazzjoni ta’ dawk li jinsabu fuq quddiem nett fis-sostenibbiltà ssir in-norma b’mod progressiv. Jenħtieġ li jipprevedi l-istabbiliment ta’ rekwiżiti ġodda tal-ekodisinn biex jittejbu d-durabbiltà, l-affidabbiltà, il-possibbiltà ta’ tiswija, il-possibbiltà ta’ titjib fil-kwalità, il-possibbiltà ta’ użu mill-ġdid u r-riċiklabbiltà, jittejbu l-possibbiltajiet għar-rinnovazzjoni u għall-manutenzjoni ta’ prodotti, tiġi indirizzata l-preżenza ta’ sustanzi kimiċi perikolużi fil-prodotti, tiżdied l-effiċjenza enerġetika u fir-riżorsi ta’ prodotti, inkluż fir-rigward tal-possibbiltà ta’ rkupru tal-materja prima strateġika u kritika, tonqos il-ġenerazzjoni mistennija tagħhom tal-iskart u jiżdied il-kontenut riċiklat fil-prodotti, filwaqt li jiġu żgurati l-prestazzjoni u s-sikurezza tagħhom, ikunu possibbli l-manifattura mill-ġdid u r-riċiklaġġ ta’ kwalità għolja u jonqsu l-impronta tal-karbonju u dik ambjentali.

(7)

Ir-rekwiżiti tal-ekodisinn jenħtieġ li jindirizzaw ukoll il-prattiki assoċjati ma’ obsolexxenza prematura. Tali prattiki għandhom impatt negattiv kumplessiv fuq l-ambjent fil-forma ta’ żieda fl-iskart u użu tal-enerġija u tal-materjali, li jistgħu jitnaqqsu permezz tar-rekwiżiti tal-ekodisinn filwaqt li jikkontribwixxu għal konsum sostenibbli.

(8)

Il-Parlament Ewropew, fir-riżoluzzjoni tiegħu tal-25 ta’ Novembru 2020“Lejn suq uniku aktar sostenibbli għall-impriżi u l-konsumaturi” (4), laqa’ l-promozzjoni ta’ prodotti durabbli li huma aktar faċli biex jissewwew, jintużaw mill-ġdid u jiġu rriċiklati. Fir-riżoluzzjoni tiegħu tal-10 ta’ Frar 2021 dwar il-Pjan ta’ Azzjoni ġdid għall-Ekonomija Ċirkolari (5), il-Parlament Ewropew issottolinja li prodotti u materjali sostenibbli, ċirkolari, sikuri u mhux tossiċi jenħtieġ li jsiru n-norma fis-suq tal-Unjoni u mhux l-eċċezzjoni u jenħtieġ li jitqiesu bħala l-għażla prestabbilita li tkun attraenti, affordabbli u aċċessibbli għall-konsumaturi kollha. Il-Parlament Ewropew appella wkoll għal miri vinkolanti tal-Unjoni biex jitnaqqsu b’mod sinifikanti l-impronti tal-materjali u tal-konsum tal-Unjoni. Qies li t-tranżizzjoni lejn ekonomija ċirkolari tista’ tipprovdi soluzzjonijiet biex jiġu indirizzati l-isfidi ambjentali attwali u l-kriżi ekonomika li ġabet magħha l-pandemija tal-COVID-19. Il-Kunsill, fil-konklużjonijiet tiegħu dwar “Nagħmlu l-Irkupru Ċirkolari u Ekoloġiku” adottati fil-11 ta’ Diċembru 2020, laqa’ wkoll l-intenzjoni tal-Kummissjoni li tippreżenta proposti leġiżlattivi bħala parti minn qafas ta’ politika komprensiv u integrat dwar il-prodotti sostenibbli li jippromwovi n-newtralità klimatika, l-effiċjenza enerġetika u fir-riżorsi u ekonomija ċirkolari mhux tossika, li jipproteġi s-saħħa pubblika u l-bijodiversità, u jagħti s-setgħa u jipproteġi lill-konsumaturi u lix-xerrejja pubbliċi.

(9)

Dan ir-Regolament se jikkontribwixxi għall-ksib tal-objettivi tal-Unjoni b’rabta mal-klima u mal-enerġija. F’konformità mal-għanijiet stabbiliti fil-Ftehim ta’ Pariġi, adottat fit-12 ta’ Diċembru 2015 fl-ambitu tal-Konvenzjoni Qafas tan-Nazzjonijiet Uniti dwar it-Tibdil fil-Klima (6) (il-“Ftehim ta’ Pariġi”), approvat mill-Unjoni fil-5 ta’ Ottubru 2016 (7), ir-Regolament (UE) 2021/1119 tal-Parlament Ewropew u tal-Kunsill (8) jistabbilixxi impenn vinkolanti tal-Unjoni għat-tnaqqis domestiku tal-emissjonijiet netti tal-gassijiet serra ta’ mill-anqas 55 % sal-2030 u jnaqqax fil-leġiżlazzjoni l-mira tan-newtralità klimatika fl-ekonomija kollha sal-2050. Fl-2021, il-Kummissjoni adottat il-Pakkett “Lesti għall-mira ta’ 55 %” biex tagħmel il-politiki tal-Unjoni dwar il-klima u l-enerġija adatti għall-ksib ta’ dawn l-objettivi. Biex dan isir, f’konformità mal-prinċipju “l-effiċjenza enerġetika tiġi l-ewwel” minqux fid-Direttiva (UE) 2018/2002 tal-Parlament Ewropew u tal-Kunsill (9), it-titjib fl-effiċjenza enerġetika jeħtieġ li jiżdied b’mod sinifikanti, sa madwar 36 % f’termini tal-konsum finali tal-enerġija sal-2030. Ir-rekwiżiti tal-prodotti stabbiliti fl-ambitu ta’ dan ir-Regolament se jaqdu rwol sinifikanti fl-ilħuq ta’ dik il-mira billi jnaqqsu b’mod sostanzjali l-impronta enerġetika tal-prodotti. Dawk ir-rekwiżiti tal-effiċjenza enerġetika se jnaqqsu wkoll il-vulnerabbiltà tal-konsumatur għaż-żidiet fil-prezzijiet tal-enerġija. Kif rikonoxxut mill-Ftehim ta’ Pariġi, it-titjib tas-sostenibbiltà tal-konsum u tal-produzzjoni se jaqdi wkoll rwol importanti fl-indirizzar tat-tibdil fil-klima.

(10)

Dan ir-Regolament se jikkontribwixxi wkoll biex jintlaħqu l-objettivi ambjentali usa’ tal-Unjoni. It-tmien Programm ta’ Azzjoni Ambjentali stabbilit bid-Deċiżjoni (UE) 2022/591 tal-Parlament Ewropew u tal-Kunsill (10) jonqox f’qafas legali l-objettiv tal-Unjoni li tibqa’ fi ħdan il-limiti planetarji u jidentifika l-kundizzjonijiet abilitanti biex jinkisbu l-objettivi prijoritarji, li jinkludu t-tranżizzjoni lejn ekonomija ċirkolari mhux tossika. Il-Patt Ekoloġiku Ewropew jappella wkoll biex l-Unjoni timmonitorja, tirrapporta, tipprevjeni u tirrimedja aħjar it-tniġġis tal-arja, tal-ilma, tal-ħamrija u tal-prodotti għall-konsumatur. Dan ifisser li s-sustanzi kimiċi, il-materjali u l-prodotti jridu jkunu sikuri u sostenibbli fil-livell tad-disinn u tul iċ-ċiklu tal-ħajja tagħhom, filwaqt li jwasslu għal ċikli ta’ materjali mhux tossiċi kif stabbilit fil-komunikazzjoni tal-Kummissjoni tat-12 ta’ Mejju 2021 dwar Pjan ta’ Azzjoni tal-UE: “Lejn Tniġġis Żero għall-Arja, għall-Ilma u għall-Ħamrija” u l-komunikazzjoni tal-Kummissjoni tal-14 ta’ Ottubru 2020 rigward Strateġija dwar is-Sustanzi Kimiċi għas-Sostenibbiltà – Lejn Ambjent Ħieles mit-Tossiċità li tappella għat-tħaddin tal-għanijiet ta’ tniġġis żero fil-produzzjoni u fil-konsum. Barra minn hekk, kemm il-Patt Ekoloġiku Ewropew kif ukoll is-CEAP jirrikonoxxu li s-suq intern tal-Unjoni jipprovdi massa kritika li kapaċi tinfluwenza l-istandards globali dwar is-sostenibbiltà tal-prodott u d-disinn tal-prodott. Dan ir-Regolament għalhekk se jaqdi rwol sinifikanti lejn il-kisba ta’ diversi miri stabbiliti fl-ambitu tal-Għanijiet ta’ Żvilupp Sostenibbli tal-Aġenda 2030 tan-Nazzjonijiet Uniti għall-Iżvilupp Sostenibbli, kemm fl-Unjoni kif ukoll barra mill-Unjoni, b’mod partikolari l-miri fl-ambitu tal-Għan ta’ Żvilupp Sostenibbli nru 12 (“Konsum u produzzjoni responsabbli”).

(11)

Id-Direttiva 2009/125/KE stabbiliet qafas għall-iffissar ta’ rekwiżiti tal-ekodisinn għal prodotti relatati mal-enerġija. Flimkien mar-Regolament (UE) 2017/1369 tal-Parlament Ewropew u tal-Kunsill (11), din naqqset b’mod sinifikanti d-domanda għall-enerġija primarja tal-Unjoni għall-prodotti u huwa stmat li dak l-iffrankar se jkompli jiżdied. Il-miżuri ta’ implimentazzjoni adottati fl-ambitu tad-Direttiva 2009/125/KE inkludew ukoll rekwiżiti dwar aspetti taċ-ċirkolarità, bħad-durabbiltà, il-possibbiltà ta’ tiswija u r-riċiklabbiltà. Fl-istess ħin, l-istrumenti bħall-Ekotikketta tal-UE, introdotti bir-Regolament (KE) Nru 66/2010 tal-Parlament Ewropew u tal-Kunsill (12), jew il-kriterji tal-UE għall-akkwist pubbliku ekoloġiku stabbiliti fil-komunikazzjoni tal-Kummissjoni tas-16 ta’ Lulju 2008 intitolata “Akkwist pubbliku għal ambjent aħjar” għandhom ambitu usa’ iżda jħallu inqas impatt minħabba l-limitazzjonijiet tal-approċċi volontarji.

(12)

Id-Direttiva 2009/125/KE b’mod ġenerali rnexxielha trawwem l-effiċjenza enerġetika u xi aspetti taċ-ċirkolarità ta’ prodotti relatati mal-enerġija, u l-approċċ tagħha fir-rigward tal-ekodisinn għandu l-potenzjal li jindirizza b’mod progressiv is-sostenibbiltà tal-prodotti kollha. Biex jitwettqu l-impenji tal-Patt Ekoloġiku Ewropew, dan l-approċċ jenħtieġ li jiġi estiż għal gruppi ta’ prodotti oħra u jindirizza sistematikament aspetti ewlenin biex tiżdied is-sostenibbiltà ambjentali tal-prodotti b’rekwiżiti vinkolanti. Billi jiżgura li l-prodotti li jissodisfaw dawk ir-rekwiżiti biss jitqiegħdu fis-suq tal-Unjoni, dan ir-Regolament mhux biss se jtejjeb il-moviment liberu ta’ tali prodotti billi jevita d-disparitajiet nazzjonali, iżda wkoll inaqqas l-impatti ambjentali negattivi taċ-ċiklu tal-ħajja tal-prodotti li għalihom jiġu stabbiliti tali rekwiżiti.

(13)

Biex jinħoloq qafas regolatorju armonizzat, effettiv u li jibqa’ validu fil-futur, jeħtieġ li jkun permess l-istabbiliment ta’ rekwiżiti tal-ekodisinn għall-oġġetti fiżiċi kollha mqiegħda fis-suq jew imqiegħda fis-servizz, inklużi komponenti bħal tajers u prodotti intermedji. Il-kontenut diġitali li jkun parti integrali minn prodott fiżiku jiġi inkluż ukoll fil-kamp ta’ applikazzjoni. Dan jenħtieġ li jippermetti lill-Kummissjoni tqis l-usa’ firxa ta’ prodotti possibbli meta tipprijoritizza l-istabbiliment tar-rekwiżiti tal-ekodisinn u b’hekk timmassimizza l-effettività tagħhom. Meta meħtieġ, jenħtieġ li jiġu pprovduti eżenzjonijiet speċifiċi meta jiġu stabbiliti r-rekwiżiti tal-ekodisinn, b’mod partikolari meta r-rekwiżiti tal-ekodisinn ma jkunux meħtieġa biex jikkontribwixxu għas-sostenibbiltà ambjentali ta’ prodotti speċifiċi, jew pereżempju għal prodotti b’użu partikolari, prodotti bi skop partikolari li ma setax jiġi ssodisfat meta tali prodotti jikkonformaw mar-rekwiżiti tal-ekodisinn jew prodotti fabbrikati fi kwantitajiet żgħar ħafna, jew meta jitqiesu l-ispeċifiċitajiet u d-daqs tas-suq tal-prodott. Barra minn hekk, jenħtieġ lidan ir-Regolament ma japplikax għal prodotti li għalihom diġà huwa ċar li r-rekwiżiti tal-ekodisinn mhumiex se jkunu xierqa jew meta oqfsa oħra jipprevedu l-istabbiliment ta’ tali rekwiżiti. Dan jenħtieġ li jkun il-każ għall-ikel u għall-għalf kif definit fir-Regolament (KE) Nru 178/2002 tal-Parlament Ewropew u tal-Kunsill (13), għall-prodotti mediċinali kif definit fid-Direttiva 2001/83/KE tal-Parlament Ewropew u tal-Kunsill (14), għall-prodotti mediċinali veterinarji kif definit fir-Regolament (UE) 2019/6 tal-Parlament Ewropew u tal-Kunsill (15), għall-pjanti ħajjin, annimali u mikroorganiżmi, għall-prodotti li joriġinaw mill-bniedem, u għall-prodotti ta’ pjanti u annimali relatati direttament mar-riproduzzjoni futura tagħhom u għall-vetturi kif imsemmi fl-Artikolu 2(1) fir-Regolament (UE) Nru 167/2013 tal-Parlament Ewropew u tal-Kunsill (16), fl-Artikolu 2(1) tar-Regolament (UE) Nru 168/2013 tal-Parlament Ewropew u tal-Kunsill (17) u fl-Artikolu 2(1) tar-Regolament (UE) 2018/858 tal-Parlament Ewropew u tal-Kunsill (18),fir-rigward ta’ dawk l-aspetti tal-prodotti li għalihom ir-rekwiżiti huma stabbiliti fl-ambitu tal-atti leġiżlattivi settorjali tal-Unjoni applikabbli għal dawk il-vetturi. Dawk il-vetturi huma soġġetti għal diversi rekwiżiti speċifiċi għall-prodott u sistemi tal-approvazzjoni tat-tip armonizzati differenti fl-ambitu tal-atti ġuridiċi tal-Unjoni, bħad-Direttivi 2000/53/KE (19) u 2005/64/KE (20) tal-Parlament Ewropew u tal-Kunsill u r-Regolament (UE) 2018/858. Rekwiżiti armonizzati addizzjonali għall-vetturi jenħtieġ li jiġu limitati għal aspetti li bħalissa mhumiex indirizzati, pereżempju r-rekwiżiti ambjentali għat-tajers. Jenħtieġ, madankollu, li r-roti elettriċi u l-iscooters elettriċi ma jkunux esklużi mill-kamp ta’ applikazzjoni ta’ dan ir-Regolament.

(14)

Id-Direttiva (UE) 2024/1275 tal-Parlament Ewropew u tal-Kunsill (21) tirrikjedi li l-Istati Membri jistabbilixxu rekwiżiti minimi ta’ rendiment fl-użu tal-enerġija għall-elementi tal-bini li jagħmlu parti mill-involukru tal-bini u rekwiżiti tas-sistema fir-rigward tar-rendiment ġenerali fl-użu tal-enerġija, l-installazzjoni kif suppost u d-dimensjonar, l-aġġustament u l-kontroll xierqa tas-sistemi tekniċi tal-bini fil-bini ġdid jew eżistenti. Hija konsistenti mal-objettivi ta’ dan ir-Regolament li dawk ir-rekwiżiti minimi ta’ rendiment fl-użu tal-enerġija jistgħu f’ċerti ċirkostanzi jillimitaw l-installazzjoni ta’ prodotti relatati mal-enerġija li jikkonformaw ma’ dan ir-Regolament u l-atti delegati tiegħu, dment li tali rekwiżiti ma jikkostitwux ostaklu mhux ġustifikat għas-suq.

(15)

Biex tittejjeb is-sostenibbiltà ambjentali tal-prodotti u jiġi żgurat il-moviment liberu tal-prodotti fis-suq intern, jenħtieġ li tiġi delxefegata lill-Kummissjoni s-setgħa li tadotta atti f’konformità mal-Artikolu 290 tat-Trattat dwar il-Funzjonament tal-Unjoni Ewropea (TFUE) biex tissupplimenta dan ir-Regolament billi tistabbilixxi rekwiżiti tal-ekodisinn. Dawk ir-rekwiżiti tal-ekodisinn jenħtieġ li bħala regola japplikaw għal gruppi speċifiċi ta’ prodotti, bħal magni tal-ħasil tal-ħwejjeġ għal użu domestiku jew u magni tal-ħasil u tat-tnixxif tal-ħwejjeġ għall-użu domestiku. Biex tiġi massimizzata l-effettività tar-rekwiżiti tal-ekodisinn u tittejjeb b’mod effiċjenti s-sostenibbiltà ambjentali tal-prodotti, jenħtieġ li jkun possibbli wkoll li rekwiżit orizzontali tal-ekodisinn wieħed jew aktar jiġu stabbiliti għal firxa usa’ ta’ gruppi ta’ prodotti, bħall-apparati elettroniċi jew it-tessuti. Jenħtieġ li jiġu stabbiliti rekwiżiti orizzontali tal-ekodisinn meta s-similaritajiet tekniċi tal-gruppi ta’ prodotti jippermettu li s-sostenibbiltà ambjentali tagħhom tittejjeb abbażi tal-istess rekwiżiti. Huwa importanti li jiġu żviluppati rekwiżiti orizzontali b’mod partikolari rigward id-durabbiltà u l-possibbiltà ta’ tiswija.

(16)

Ir-rekwiżiti tal-ekodisinn jenħtieġ li, kif xieraq, jinkludu rekwiżiti ta’ prestazzjoni jew rekwiżiti ta’ informazzjoni, jew it-tnejn. Jenħtieġ li dawk ir-rekwiżiti jintużaw biex jittejbu l-aspetti tal-prodott rilevanti għas-sostenibbiltà ambjentali, bħad-durabbiltà, il-possibbiltà ta’ użu mill-ġdid, il-possibbiltà ta’ tiswija,l-effiċjenza enerġetika, ir-riċiklabbiltà, u l-impronta tal-karbonju u dik ambjentali. Ir-rekwiżiti tal-ekodisinn jenħtieġ li jkunu trasparenti, oġġettivi, proporzjonati u f’konformità mar-regoli kummerċjali internazzjonali.

(17)

Is-settur tal-oġġetti secondhand jaqdi rwol importanti fil-promozzjoni tal-produzzjoni u tal-konsum sostenibbli, inkluż fl-iżvilupp ta’ mudelli ta’ negozju ċirkolari ġodda, u jikkontribwixxi biex jittawwal it-tul tal-ħajja ta’ prodott u jiġi evitat li jsir skart. Il-prodotti secondhand, b’mod partikolari prodotti li jgħaddu minn rinnovazzjoni jew tiswija, li joriġinaw mill-Unjoni mhumiex prodotti ġodda u jistgħu jiċċirkolaw fis-suq intern mingħajr il-ħtieġa li jikkonformaw mal-atti delegati li jistabbilixxu r-rekwiżiti tal-ekodisinn li daħlu fis-seħħ wara t-tqegħid tagħhom fis-suq. Madankollu, il-prodotti manifatturati mill-ġdid huma meqjusa prodotti ġodda u jiġu soġġetti għar-rekwiżiti tal-ekodisinn jekk jaqgħu fil-kamp ta’ applikazzjoni ta’ att delegat.

(18)

Ladarba att delegat li jistabbilixxi rekwiżiti tal-ekodisinn jiġi adottat mill-Kummissjoni għal grupp ta’ prodotti partikolari, l-Istati Membri jenħtieġ li, sabiex jiġi żgurat il-funzjonament tas-suq intern, ma jibqgħux jitħallew jistabbilixxu rekwiżiti nazzjonali ta’ prestazzjoni abbażi tal-parametri tal-prodott koperti minn tali rekwiżiti ta’ prestazzjoni stabbiliti f’dak l-att delegat, u ma jibqgħux jitħallew jistabbilixxu rekwiżiti nazzjonali ta’ informazzjoni abbażi tal-parametri tal-prodott koperti minn tali rekwiżiti ta’ informazzjoni stabbiliti f’dak l-att delegat. Sabiex tittejjeb is-sostenibbiltà ambjentali tal-prodotti u jiġi żgurat il-moviment liberu tagħhom fis-suq intern, jenħtieġ li l-Kummissjoni tingħata s-setgħa li tistabbilixxi li ma huwa meħtieġ l-ebda rekwiżit tal-ekodisinn fil-forma ta’ rekwiżiti ta’ prestazzjoni jew fil-forma ta’ rekwiżiti ta’ informazzjoni fir-rigward ta’ xi parametru speċifiku tal-prodott jekk rekwiżit relatat ma’ dak il-parametru speċifiku tal-prodott ikollu impatt negattiv fuq ir-rekwiżiti tal-ekodisinn meqjusa għal dak il-grupp ta’ prodotti.

(19)

Meta tistabbilixxi r-rekwiżiti tal-ekodisinn, il-Kummissjoni jenħtieġ li tqis in-natura u l-iskop tal-prodotti kkonċernati kif ukoll il-karatteristiċi tas-swieq rilevanti. Pereżempju, it-tagħmir tad-difiża jeħtieġ li jkun jista’ jopera f’kundizzjonijiet speċifiċi u xi drabi ħorox, u dak jeħtieġ li jitqies meta jiġu stabbiliti r-rekwiżiti tal-ekodisinn. Ċerta informazzjoni dwar it-tagħmir tad-difiża jenħtieġ li ma tiġix divulgata u jenħtieġ li tiġi protetta. Għalhekk, jenħtieġ li r-rekwiżiti tal-ekodisinn ma jiġux stabbiliti għall-prodotti bl-iskop uniku li jaqdu d-difiża jew is-sigurtà nazzjonali. Importanti li għal tagħmir militari jew sensittiv ta’ tip ieħor, ir-rekwiżiti tal-ekodisinn iqisu l-ħtiġijiet tas-sigurtà u l-karatteristiċi tas-suq tad-difiża, kif definit fid-Direttiva 2009/81/KE tal-Parlament Ewropew u tal-Kunsill (22). Bl-istess mod, l-industrija spazjali hija strateġika għall-Ewropa kif ukoll biex l-Ewropa ma tkunx dipendenti mil-lat teknoloġiku. Peress li t-teknoloġiji spazjali joperaw f’kundizzjonijiet estremi, kwalunkwe rekwiżit tal-ekodisinn għall-prodotti spazjali jenħtieġ li jibbilanċja l-kunsiderazzjonijiet tas-sostenibbiltà mar-reżiljenza u mal-prestazzjoni mistennija. Barra minn hekk, għall-apparati mediċi kif definit fl-Artikolu 2(1) tar-Regolament (UE) 2017/745 tal-Parlament Ewropew u tal-Kunsill (23) u l-apparati mediċi dijanjostiċi in vitro kif definit fl-Artikolu 2(2) tar-Regolament (UE) 2017/746 tal-Parlament Ewropew u tal-Kunsill (24), il-Kummissjoni jenħtieġ li tqis il-ħtieġa li ma jiġux affettwati b’mod negattiv is-saħħa u s-sikurezza tal-pazjenti u tal-utenti. Barra minn hekk, jenħtieġ li l-Kummissjoni, meta tivvaluta l-karatteristiċi tas-suq u tipprepara r-rekwiżiti tal-ekodisinn, tistinka biex tqis il-karatteristiċi nazzjonali, bħall-kundizzjonijiet klimatiċi differenti fl-Istati Membri u l-prattiki u t-teknoloġiji użati fl-Istati Membri b’effetti ambjentali ta’ benefiċċju ppruvati.

(20)

Biex jiġi evitat il-piż regolatorju, jenħtieġ li tiġi żgurata l-konsistenza bejn dan ir-Regolament u r-rekwiżiti stabbiliti f’liġijiet oħra tal-Unjoni, speċjalment dawk li jikkonċernaw il-prodotti, is-sustanzi kimiċi, l-imballaġġ u l-iskart. Madankollu, jenħtieġ li l-eżistenza ta’ setgħat fl-ambitu ta’ liġijiet oħra tal-Unjoni biex jiġu stabbiliti rekwiżiti bl-istess effetti tar-rekwiżiti skont dan ir-Regolament jew b’effetti simili għal dawk ta’ dan ir-Regolament ma tillimitax is-setgħat inklużi f’dan ir-Regolament, dment li ma jkunx speċifikat f’dan ir-Regolament.

(21)

Meta tipprepara r-rekwiżiti tal-ekodisinn, il-Kummissjoni jenħtieġ li tqis għadd ta’ elementi, jiġifieri l-prijoritajiet tal-Unjoni, il-liġi rilevanti tal-Unjoni u nazzjonali, ftehimiet internazzjonali rilevanti kif ukoll miżuri ta’ awtoregolamentazzjoni u standards rilevanti. Jenħtieġ li l-Kummissjoni tqis ukoll il-prijoritajiet għall-klima, l-ambjent, l-effiċjenza enerġetika, l-effiċjenza fir-riżorsi u s-sigurtà, inkluża l-ekonomija ċirkolari mhux tossika, u prijoritajiet u miri relatati oħra tal-Unjoni. Huwa importanti li tingħata attenzjoni lill-objettivi tat-tmien Programm ta’ Azzjoni Ambjentali stabbilit fid-Deċiżjoni (UE) 2022/591, inkluż li, sa mhux aktar tard mill-2050, in-nies ikunu qed jgħixu tajjeb, fi ħdan il-limiti planetarji f’ekonomija favur il-benesseri, il-prinċipju ta’ “la tagħmilx ħsara” u l-ġerarkija tal-iskart kif definit fid-Direttiva 2008/98/KE tal-Parlament Ewropew u tal-Kunsill (25), kif ukoll l-impenji tal-Unjoni li tipproteġi u tirrestawra l-bijodiversità kif espressi wkoll fil-komunikazzjoni tal-Kummissjoni tal-20 ta’ Mejju 2020 dwar Strateġija tal-UE għall-Bijodiversità għall-2030 – Inreġġgħu n-natura lura f’ħajjitna u l-Qafas Globali tal-Bijodiversità ta’ Kunming-Montreal adottat fil-15-il laqgħa tal-Konferenza tal-Partijiet (COP 15) għall-Konvenzjoni dwar id-Diversità Bijoloġika tan-Nazzjonijiet Uniti.

(22)

L-atti delegati li jistabbilixxu r-rekwiżiti tal-ekodisinn jenħtieġ li, kif kien il-każ għall-miżuri ta’ implimentazzjoni fl-ambitu tad-Direttiva 2009/125/KE, isirulhom valutazzjoni tal-impatt u konsultazzjoni mal-partijiet ikkonċernati apposta, u jenħtieġ li jitfasslu f’konformità mal-linji gwida tal-Kummissjoni għal Regolamentazzjoni Aħjar, u jinkludu valutazzjoni tad-dimensjoni internazzjonali u tal-impatti fuq pajjiżi terzi. Il-Kummissjoni jenħtieġ li tibbaża l-valutazzjoni tal-impatt tagħha fuq l-aħjar evidenza disponibbli u tqis kif xieraq l-aspetti kollha taċ-ċiklu tal-ħajja tal-prodott. Meta tipprepara r-rekwiżiti tal-ekodisinn, il-Kummissjoni jenħtieġ li tuża approċċ xjentifiku kif ukoll tqis l-informazzjoni teknika rilevanti użata bħala bażi għal, b’mod partikolari, ir-Regolament (KE) Nru 66/2010, jew derivata minnha, mid-Direttiva 2010/75/UE tal-Parlament Ewropew u tal-Kunsill (26), il-kriterji tekniċi ta’ skrinjar adottati skont ir-Regolament (UE) 2020/852 tal-Parlament Ewropew u tal-Kunsill (27) u l-kriterji tal-UE għall-akkwist pubbliku ekoloġiku.

(23)

Sabiex titqies id-diversità tal-prodotti, il-Kummissjoni jenħtieġ li tagħżel il-metodi biex tivvaluta l-istabbiliment tar-rekwiżiti tal-ekodisinn u, kif xieraq, tiżviluppahom aktar. Tali metodi għandhom ikunu abbażi tan-natura tal-prodott, tal-aspetti l-aktar rilevanti tiegħu u tal-impatti tiegħu fuq iċ-ċiklu tal-ħajja tiegħu. Meta tagħmel dan, il-Kummissjoni jenħtieġ li tqis l-esperjenza tagħha fil-valutazzjoni tal-istabbiliment tar-rekwiżiti fl-ambitu tad-Direttiva 2009/125/KE u l-isforzi kontinwi biex jiġu żviluppati u mtejba għodod ta’ valutazzjoni bbażati fuq ix-xjenza, inklużi l-aġġornament tal-metodoloġija għall-ekodisinn ta’ prodotti relatati mal-enerġija, u l-metodu tal-Impronta Ambjentali tal-Prodotti stabbilit fir-Rakkomandazzjoni tal-Kummissjoni (UE) 2021/2279 (28), inkluż fir-rigward tal-ħżin temporanju tal-karbonju, kif ukoll l-iżvilupp ta’ standards minn organizzazzjonijiet internazzjonali u Ewropej tal-istandardizzazzjoni, inkluż dwar l-effiċjenza materjali tal-prodotti relatati mal-enerġija. Filwaqt li tibni fuq dawk l-għodod u tuża studji dedikati meta jkun meħtieġ, il-Kummissjoni jenħtieġ li tkompli ssaħħaħ l-aspetti taċ-ċirkolarità, bħad-durabbiltà, il-possibbiltà ta’ tiswija inkluż punteġġ għat-tiswija, ir-riċiklabbiltà, il-possibbiltà ta’ użu mill-ġdid, l-identifikazzjoni ta’ sustanzi kimiċi li jfixklu l-użu mill-ġdid u r-riċiklaġġ fil-valutazzjoni tal-prodotti, f’konformità ma’ approċċ taċ-ċiklu tal-ħajja bil-ħsieb tat-tħejjija tar-rekwiżiti tal-ekodisinn, u jenħtieġ li tiżviluppa metodi jew għodod ġodda meta jkun xieraq. L-informazzjoni relatata mal-indikaturi ambjentali taċ-ċiklu tal-ħajja, bħall-impronta tal-karbonju, jenħtieġ li jiġu kkalkolati fid-dawl ta’ metodi konsolidati fil-livell internazzjonali li diġà huma implimentati fil-liġi tal-Unjoni. Huwa importanti wkoll li jitqiesu l-metodi xjentifiċi rakkomandati minn organizzazzjonijiet ta' standardizzazzjoni internazzjonali u Ewropej. B’mod partikolari, għal dak li għandu x’jaqsam mal-immudellar tal-enerġija użata fil-proċessi tal-manifattura, jenħtieġ li tingħata kunsiderazzjoni partikolari lill-immudellar tat-taħlita tal-enerġija li jkun iqis ukoll kwistjonijiet bħall-ftehimiet dwar ix-xiri tal-enerġija, il-garanziji tal-oriġini u l-ġenerazzjoni proprja tal-elettriku. Jistgħu x’aktarx ikunu meħtieġa wkoll approċċi ġodda għat-tħejjija ta’ kriterji obbligatorji tal-akkwist pubbliku u għall-projbizzjonijiet fuq il-qerda ta’ prodotti tal-konsumatur mhux mibjugħa.

(24)

Ir-rekwiżiti tal-prestazzjoni jenħtieġ li jkunu relatati ma’ parametru tal-prodott magħżul rilevanti għall-aspett tal-prodott fil-mira li għalih ikun ġie identifikat potenzjal għal titjib tas-sostenibbiltà ambjentali. Tali rekwiżiti jistgħu jinkludu livelli minimi jew massimi ta’ prestazzjoni fir-rigward tal-parametru tal-prodott, rekwiżiti mhux kwantitattivi li jkollhom l-għan li jtejbu l-prestazzjoni fir-rigward tal-parametru tal-prodott, jew rekwiżiti relatati mal-prestazzjoni funzjonali ta’ prodott biex jiġi żgurat li r-rekwiżiti tal-prestazzjoni magħżula ma jħallux impatt negattiv fuq il-kapaċità tal-prodott li jwettaq il-funzjoni li għaliha jkun ġie ddisinjat u kummerċjalizzat. Fir-rigward tal-livelli minimi jew massimi, dawn jistgħu pereżempju jieħdu l-forma ta’ limitu fuq il-konsum tal-enerġija fil-fażi tal-użu jew fuq il-kwantitajiet ta’ materjal partikolari inkorporat fil-prodott, rekwiżit għal kwantitajiet minimi ta’ kontenut riċiklat, jew limitu fuq kategorija speċifika ta’ impatt ambjentali jew fuq aggregazzjoni tal-impatti ambjentali rilevanti kollha. Eżempju ta’ rekwiżit mhux kwantitattiv huwa l-projbizzjoni ta’ soluzzjoni teknika speċifika li tkun ta’ detriment għall-possibbiltà ta’ tiswija tal-prodott. Ir-rekwiżiti tal-prestazzjoni se jintużaw biex tiġi żgurata t-tneħħija tal-prodotti bl-agħar prestazzjoni mis-suq u biex gradwalment ikun hemm tranżizzjoni għall-prodotti bl-aħjar prestazzjoni meta dak ikun meħtieġ biex jikkontribwixxi għall-objettivi ta’ sostenibbiltà ambjentali ta’ dan ir-Regolament. Ir-rekwiżiti tal-prestazzjoni jistgħu jikkonċernaw ukoll l-użu tar-riżorsi, inklużi r-rekwiżiti relatati mal-użu ta’ riżorsi rinnovabbli jew materjali b’kontenut b’bażi bijoloġika fil-prodott u jindirizzaw ir-rilaxx ta’ nanoplastiks u ta’ mikroplastiks. Meta tipprevedi kombinazzjoni ta’ rekwiżiti, jenħtieġ li l-Kummissjoni tivvalutahom fit-totalità tagħhom u tidentifika l-kombinazzjoni ta’ rekwiżiti li twassal għall-ogħla benefiċċji għas-sostenibbiltà ambjentali.

(25)

Sabiex tiġi żgurata l-konsistenza, ir-rekwiżiti tal-prestazzjoni jenħtieġ li jikkomplementaw l-implimentazzjoni tal-liġi tal-Unjoni dwar l-iskart. Filwaqt li r-rekwiżiti għat-tqegħid fis-suq tal-imballaġġ bħala prodott finali huma stabbiliti fl-ambitu tad-Direttiva tal-Parlament Ewropew u tal-Kunsill 94/62/KE (29), dan ir-Regolament jista’ jikkomplementa dik id-Direttiva billi jistabbilixxi rekwiżiti bbażati fuq il-prodott li jiffukaw fuq l-imballaġġ ta’ prodotti speċifiċi meta jitqiegħdu fis-suq. Meta rilevanti, tali rekwiżiti komplementari jenħtieġ li jikkontribwixxu b’mod partikolari biex jimminimizzaw l-ammont ta’ imballaġġ użat, u b’hekk jikkontribwixxu għall-prevenzjoni tal-ġenerazzjoni tal-iskart fl-Unjoni.

(26)

Is-sikurezza kimika hija element rikonoxxut tas-sostenibbiltà tal-prodott. Hija bbażata fuq il-perikli intrinsiċi tas-sustanzi kimiċi għas-saħħa jew għall-ambjent flimkien ma’ esponiment speċifiku jew ġeneriku, u hija indirizzata mil-liġi tal-Unjoni dwar is-sustanzi kimiċi, bħar-Regolamenti (KE) Nru 1935/2004 (30), (KE) Nru 1907/2006 (31), (KE) Nru 1272/2008 (32), (KE) Nru 1223/2009 (33), (UE) 2017/745 u (UE) 2019/1021 (34) u d-Direttiva 2009/48/KE (35) tal-Parlament Ewropew u tal-Kunsill. Dan ir-Regolament jenħtieġ li ma jipprevedix ir-restrizzjoni ta’ sustanzi bbażati prinċipalment fuq is-sikurezza kimika, kif isir fl-ambitu ta’ liġijiet oħra tal-Unjoni. Il-liġi tal-Unjoni dwar is-sustanzi kimiċi diġà tipprevedi r-restrizzjoni ta’ sustanzi jew taħlitiet relatati mas-sikurezza jew mar-riskju, meta meħtieġ. Madankollu, l-istabbiliment tar-rekwiżiti ta’ prestazzjoni jenħtieġ ukoll li, meta xieraq, inaqqas riskji sinifikanti għas-saħħa tal-bniedem jew għall-ambjent.Ir-rekwiżiti ta’ informazzjoni rigward il-preżenza ta’ sustanzi ta’ tħassib, se jikkontribwixxu wkoll għat-tnaqqis tal-esponiment għas-sustanzi kimiċi, filwaqt li jżidu mal-miżuri ta’ ġestjoni tar-riskju pprovduti minn liġijiet oħra tal-Unjoni. Bl-istess mod, dan ir-Regolament jenħtieġ li ma jippermettix ir-restrizzjoni ta’ sustanzi għal raġunijiet relatati mas-sikurezza tal-ikel. Madankollu, il-liġi tal-Unjoni dwar is-sustanzi kimiċi u l-ikel ma tipprovdix għall-indirizzar tal-impatti fuq is-sostenibbiltà li mhumiex relatati mas-sikurezza tas-sustanzi kimiċi jew mas-sikurezza tal-ikel permezz ta’ restrizzjonijiet fuq ċerti sustanzi. Biex tingħeleb dik il-limitazzjoni, dan ir-Regolament jenħtieġ li jipprevedi, f’ċerti kundizzjonijiet, ir-restrizzjoni ta’ sustanzi preżenti fi prodotti jew użati fil-proċessi tal-manifattura tagħhom li jaffettwaw b’mod negattiv is-sostenibbiltà tal-prodotti. Dan ir-Regolament jenħtieġ li jikkomplementa, meta meħtieġ, iżda la jidduplika u lanqas jissostitwixxi r-restrizzjonijiet fuq sustanzi koperti mid-Direttiva 2011/65/UE tal-Parlament Ewropew u tal-Kunsill (36), li għandha bħala l-objettiv tagħha l-protezzjoni tas-saħħa tal-bniedem u l-protezzjoni ambjentali, inklużi rkupru u rimi li jħarsu l-ambjent tal-iskart minn tagħmir elettriku u elettroniku.

(27)

Jenħtieġ li, meta l-Kummissjoni tistabbilixxi r-rekwiżiti ta’ prestazzjoni, tkun tista’ tintroduċi rekwiżiti li jipprevjenu li ċerti sustanzi jiġu inklużi fi prodott. Jenħtieġ li l-identifikazzjoni ta’ tali sustanzi tkun parti mill-valutazzjoni tal-Kummissjoni qabel l-istabbiliment tar-rekwiżiti tal-ekodisinn għal grupp speċifiku ta’ prodotti, u jenħtieġ li f’dik il-valutazzjoni l-Kummissjoni tqis, pereżempju, jekk sustanza tagħmilx l-użu mill-ġdid jew ir-riċiklaġġ ta’ prodott aktar ikkumplikat, jew jekk taffettwax b’mod negattiv il-proprjetajiet tal-materjal riċiklat, pereżempju minħabba l-kulur jew ir-riħa tagħha. Meta jkun diġà ġie stabbilit, għal grupp ta’ prodotti, li sustanza hija waħda li tfixkel iċ-ċirkolarità, dan jista’ jkun indikazzjoni li din tfixkel ukoll iċ-ċirkolarità għal gruppi oħra ta’ prodotti. L-identifikazzjoni, u r-restrizzjoni possibbli, ta’ sustanza jenħtieġ li jagħtu lok ukoll għal rekwiżit ta’ informazzjoni.

(28)

Biex tittejjeb is-sostenibbiltà ambjentali tal-prodotti, ir-rekwiżiti ta’ informazzjoni jenħtieġ li jkunu relatati ma’ parametru tal-prodott magħżul rilevanti għall-aspett tal-prodott, bħall-impronta ambjentali u tal-karbonju tal-prodott u d-durabbiltà tiegħu. Dawn jenħtieġ li jirrikjedu li l-manifattur jagħmel disponibbli informazzjoni dwar il-prestazzjoni tal-prodott fir-rigward ta’ parametru tal-prodott magħżul jew informazzjoni oħra li tista’ tinfluwenza l-mod kif il-prodott jiġi ttrattat minn partijiet oħra minbarra l-manifattur sabiex tittejjeb il-prestazzjoni b’rabta ma’ tali parametru. Tali rekwiżiti ta’ informazzjoni jenħtieġ li jiġu stabbiliti jew flimkien mar-rekwiżiti tal-prestazzjoni fuq l-istess parametru tal-prodott, inkella minflokhom, kif ikun xieraq. Huwa importanti li l-Kummissjoni tiġġustifika kif xieraq id-deċiżjoni tagħha li tistabbilixxi biss rekwiżiti ta’ informazzjoni minflok rekwiżiti ta’ prestazzjoni. Meta att delegat jinkludi rekwiżiti ta’ informazzjoni, jenħtieġ li dan jindika l-metodu biex l-informazzjoni meħtieġa ssir disponibbli u aċċessibbli b’mod faċli, bħall-inklużjoni tagħha fuq sit web b’aċċess liberu, fil-passaport diġitali tal-prodott jew fuq it-tikketta tal-prodott.Jenħtieġ li l-informazzjoni essenzjali relatata mas-saħħa, mas-sikurezza u mad-drittijiet tal-utenti finali dejjem tiġi pprovduta lill-konsumaturi permezz ta’ mezzi fiżiċi u tkun aċċessibbli permezz ta’ mezz ta’ data inkluż fuq il-prodott. Ir-rekwiżiti ta’ informazzjoni huma meħtieġa biex joħolqu t-tibdil meħtieġ fl-imġiba ħalli jiġi żgurat li jinkisbu l-objettivi tas-sostenibbiltà ambjentali ta’ dan ir-Regolament. L-informazzjoni rilevanti għat-teħid ta’ deċiżjoni infurmata dwar ix-xiri ta’ prodott jenħtieġ li tiġi pprovduta lill-konsumatur qabel ix-xiri tal-prodott. Billi jipprovdu mezz xieraq għax-xerrejja u għall-awtoritajiet pubbliċi biex iqabblu l-prodotti abbażi tas-sostenibbiltà ambjentali tagħhom, ir-rekwiżiti ta’ informazzjoni huma mistennija li jixprunaw lill-konsumaturi u lill-awtoritajiet pubbliċi lejn għażliet aktar sostenibbli. Ir-rekwiżiti ta’ informazzjoni jenħtieġ li jikkontribwixxu wkoll għal rati ta’ ġbir imtejba mill-Istati Membri għal gruppi ta’ prodotti rilevanti, b’mod partikolari għal dawk li għalihom jeżisti potenzjal sinifikanti ta’ użu mill-ġdid u rinnovazzjoni, bħall-mobiles li għalihom ir-rata ta’ ġbir fl-Istati Membri ma taqbiżx il-5 %, pereżempju billi jiffaċilitaw l-informazzjoni dwar skemi ta’ teħid lura permezz ta’ inċentivi finanzjarji u sistemi ta’ rifużjoni tad-depożitu, garanziji tal-privatezza tad-data, bażijiet tad-data ta’ punti fejn wieħed jista’ jħalli l-prodott, u informazzjoni personalizzata dwar it-tmiem tal-ħajja permezz ta’ passaport diġitali tal-prodott, dwar il-valur tal-prodott u dwar l-aħjar prattiki dwar ir-rimi xieraq.

(29)

Meta l-atti delegati jinkludu rekwiżiti ta’ informazzjoni, dawn jistgħu wkoll, barra minn hekk, jiddeterminaw il-klassijiet ta’ prestazzjoni b’rabta ma’ parametru tal-prodott wieħed jew aktar rilevanti, sabiex jiffaċilitaw it-tqabbil bejn il-prodotti. Il-klassijiet ta’ prestazzjoni jenħtieġ li jippermettu d-differenzjazzjoni tal-prodotti abbażi tas-sostenibbiltà relattiva tagħhom u jistgħu jintużaw kemm mill-konsumaturi kif ukoll mill-awtoritajiet pubbliċi. Bħala tali, huma maħsuba biex jixprunaw is-suq lejn prodotti aktar sostenibbli.

(30)

Ir-rekwiżiti ta’ informazzjoni rigward il-possibbiltà ta’ tiswija u d-durabbiltà jaqdu rwol ewlieni biex il-konsumaturi jkunu jistgħu jagħmlu konsum sostenibbli. Dan ir-Regolament jenħtieġ li jippermetti l-istabbiliment ta’ punteġġi għall-possibbiltà ta’ tiswija jew tad-durabbiltà għall-prodotti fejn tali punteġġi jitqiesu xierqa għall-għan li jiġu pprovdutibenefiċċji ambjentali u informazzjoni aktar ċara lill-konsumaturi. Sabiex il-konsumaturi jkunu jistgħu jivvalutaw u jqabblu l-prodotti b’mod effettiv, huwa importanti li l-format, il-kontenut u l-wiri ta’ tali punteġġi tal-possibbiltà ta’ tiswija u tad-durabbiltà jinkludu lingwaġġ u pittogrammi faċli biex jinftiehmu u li l-punteġġ tal-possibbiltà ta’ tiswija jkun ibbażat fuq metodoloġija armonizzata speċifikata għall-prodott jew għall-grupp ta’ prodotti li taggrega l-parametri, bħad-disponibbiltà u l-prezz tal-ispare parts, kemm huwa faċli li jiżżarma l-prodott u d-disponibbiltà tal-għodod f’punteġġ wieħed.

(31)

L-informazzjoni dwar il-preżenza ta’ sustanzi ta’ tħassib fil-prodotti hija element ewlieni biex jiġu identifikati u promossi prodotti li huma sostenibbli. Il-kompożizzjoni kimika tal-prodotti tiddetermina b’mod wiesa’ l-funzjonalitajiet u l-impatti tagħhom, kif ukoll il-possibbiltà għall-użu mill-ġdid tagħhom jew għall-irkupru ladarba jsiru skart. Il-komunikazzjoni tal-Kummissjoni tal-14 ta’ Ottubru 2020“Strateġija dwar is-Sustanzi Kimiċi għas-Sostenibbiltà Lejn Ambjent Ħieles mit-Tossiċità” tappella biex tiġi minimizzata l-preżenza ta’ sustanzi ta’ tħassib fil-prodotti, u tiġi żgurata d-disponibbiltà tal-informazzjoni dwar il-kontenut kimiku u l-użu sikur, billi jiddaħħlu rekwiżiti ta’ informazzjoni u tiġi traċċata l-preżenza ta’ sustanzi ta’ tħassib tul iċ-ċiklu tal-ħajja tal-materjali u tal-prodotti. Ir-Regolament (KE) Nru 1272/2008 u liġijiet eżistenti oħra dwar is-sustanzi kimiċi bħar-Regolament (KE) Nru 1223/2009 diġà jiżguraw komunikazzjoni dwar perikli għas-saħħa jew għall-ambjent ikkawżati minn ċerti sustanzi ta’ tħassib waħedhom jew f’taħlita. L-utenti tas-sustanzi u tat-taħlitiet jenħtieġ li jiġu pprovduti wkoll b’informazzjoni pertinenti. Barra minn hekk, l-utenti ta’ prodotti għajr sustanzi jew taħlitiet, u dawk responsabbli mill-immaniġġjar tal-iskart minn tali prodotti, jenħtieġ li jirċievu wkoll informazzjoni rilevanti, inkluża informazzjoni primarjament relatata mal-perikli tas-sustanzi kimiċi għas-saħħa jew għall-ambjent. Għalhekk, dan ir-Regolament jenħtieġ li jipprovdi l-istabbiliment ta’ rekwiżiti relatati mat-traċċar u mal-komunikazzjoni ta’ informazzjoni dwar is-sostenibbiltà, inkluża l-preżenza ta’ sustanzi ta’ tħassib fil-prodotti matul iċ-ċiklu tal-ħajja tagħhom, bil-ħsieb ukoll li dawn jiġu ddekontaminati u rkuprati meta jsiru skart. Tali qafas jenħtieġ li jkollu l-għan li jkopri b’mod progressiv is-sustanzi ta’ tħassib fil-prodotti kollha elenkati fil-pjanijiet ta’ ħidma li serjiġu adottati mill-Kummissjoni. Tali rekwiżiti rigward it-traċċar ta’ sustanzi ta’ tħassib jenħtieġ li jiġu inklużi b’mod awtomatiku meta rekwiżit ta’ informazzjoni jkollu jiġi stabbilit fl-ambitu ta’ dan ir-Regolament, għajr meta tali rekwiżit ta’ informazzjoni jkun parti minn rekwiżiti orizzontali tal-ekodisinn. Sabiex jitqiesu l-kriterji li jridu jiġu ssodisfati mir-rekwiżiti tal-ekodisinn, u b’mod partikolari biex jiġi evitat piż amministrattiv sproporzjonat fuq l-operaturi ekonomiċi, jenħtieġ li l-Kummissjoni tkun tista’, kif xieraq għall-grupp ta’ prodotti kkonċernat, tistabbilixxi limiti fuq il-konċentrazzjoni ta’ sustanzi fil-prodott jew fil-komponenti rilevanti li jagħtu lok għar-rekwiżit ta’ traċċar, tistabbilixxi skadenzi differenzjati għall-applikazzjoni u, f’każijiet debitament ġustifikati, tipprovdi derogi mir-rekwiżit ta’ traċċar. Meta tistabbilixxi d-dettall tal-informazzjoni meħtieġa u l-limiti, jenħtieġ li l-Kummissjoni tqis ir-rekwiżiti ta’ informazzjoni u l-limiti eżistenti fl-ambitu tal-liġi tal-Unjoni, b’mod partikolari fl-ambitu tar-Regolamenti (KE) Nru 1907/2006 u (KE) Nru 1272/2008, u leġiżlazzjoni settorjali oħra dwar il-prodotti. Tista’ tapplika deroga bbażata fuq il-fattibbiltà teknika f’każijiet li fihom il-preżenza ta’ sustanza fi prodott ma tkunx tista’ tiġi vverifikata bit-teknoloġiji attwalment disponibbli.

(32)

Ir-rekwiżiti ta’ informazzjoni stabbiliti fl-ambitu ta’ dan ir-Regolament jenħtieġ li jinkludu r-rekwiżit li passaport diġitali tal-prodotti jsir disponibbli. Il-passaport diġitali tal-prodotti huwa għodda importanti biex l-informazzjoni ssir disponibbli għall-atturi tul il-katina tal-valur kollha u d-disponibbiltà ta’ passaport diġitali tal-prodotti mistennija ttejjeb b’mod sinifikanti t-traċċabbiltà minn tarf sa tarf ta’ prodott tul il-katina tal-valur tiegħu. Fost affarijiet oħra, il-passaport diġitali tal-prodotti mistenni jgħin lill-klijenti jagħmlu għażliet infurmati billi jtejjeb l-aċċess tagħhom għall-informazzjoni rilevanti, jippermetti lill-operaturi ekonomiċi, jiġifieri lill-manifatturi, lir-rappreżentanti awtorizzati, lill-importaturi, lid-distributuri, lin-negozjanti u lill-fornituri ta’ servizz ta’ eżekuzzjoni, u lil atturi oħra tal-katina tal-valur, bħal klijenti, sewwejja professjonisti, operaturi indipendenti, rinnovaturi, manifatturi mill-ġdid, riċiklaturi, awtoritajiet doganali u tas-sorveljanza tas-suq, organizzazzjonijiet tas-soċjetà ċivili, riċerkaturi, trade unions u l-Kummissjoni, jew kwalunkwe organizzazzjoni li taġixxi għalihom, jaċċessaw, jintroduċi jew jaġġornaw id-data rilevanti u jippermetti lill-awtoritajiet nazzjonali kompetenti jwettqu dmirijiethom, mingħajr ma titqiegħed il-periklu l-protezzjoni ta’ informazzjoni kummerċjali kunfidenzjali. Għal dak il-għan, huwa importanti li l-passaport diġitali tal-prodotti jkun faċli għall-utent u li d-data li jkun hemm fih tkun preċiża, kompluta, u aġġornata. Il-passaport diġitali tal-prodotti jenħtieġ li, meta neċessarju, jkun ikkomplementat b’forom mhux diġitali tat-trażmissjoni tal-informazzjoni, bħall-informazzjoni fil-manwal tal-prodott jew fuq it-tikketta. Barra minn hekk, jenħtieġ li jkun possibbli li l-passaport diġitali tal-prodotti jintuża għall-għoti ta’ informazzjoni li tirrigwarda l-grupp ta’ prodotti rilevanti skont liġijiet oħra tal-Unjoni.

(33)

Biex titqies in-natura tal-prodott u tas-suq tiegħu, l-informazzjoni li trid tiġi inkluża fil-passaport diġitali tal-prodotti jenħtieġ li tiġi eżaminata bir-reqqa fuq bażi ta’ każ b’każ meta jitħejjew regoli speċifiċi għall-prodott. Biex jiġi ottimizzat l-aċċess għad-data li tirriżulta filwaqt li jiġu protetti wkoll id-drittijiet tal-proprjetà intellettwali, il-passaport diġitali tal-prodotti jeħtieġ li jitfassal u jiġi implimentat b’mod li jippermetti aċċess differenzjat għad-data fil-passaport diġitali tal-prodotti skont it-tip ta’ data u t-tipoloġija tal-partijiet ikkonċernati. Bl-istess mod, biex jiġu evitati kostijiet għall-kumpaniji u għall-pubbliku li jkunu sproporzjonati għall-benefiċċji usa’, il-passaport diġitali tal-prodotti jenħtieġ li jkun speċifiku għall-mudell tal-oġġett, tal-lott jew tal-prodott, skont, pereżempju, il-kumplessità tal-katina tal-valur, id-daqs, in-natura jew l-impatti tal-prodotti kkunsidrati. Jenħtieġ li l-valutazzjonijiet tal-impatt imwettqa meta jkunu qed jitħejjew atti delegati li jistabbilixxu rekwiżiti tal-ekodisinn janalizzaw ukoll il-kostijiet u l-benefiċċji tal-istabbiliment ta’ rekwiżiti ta’ informazzjoni permezz ta’ passaporti diġitali tal-prodotti fil-livell tal-mudell, tal-lott jew tal-oġġett. It-terminu “mudell” normalment jirreferi għal verżjoni ta’ prodott li l-unitajiet kollha tiegħu jkollhom l-istess karatteristiċi tekniċi rilevanti għar-rekwiżiti tal-ekodisinn u l-istess identifikatur tal-mudell, it-terminu “lott” normalment jirreferi għal subsett ta’ mudell speċifiku magħmul mill-prodotti kollha prodotti f’impjant speċifiku tal-manifattura f’mument ta’ żmien speċifiku u t-terminu “oġġett” normalment jirreferi għal unità waħda ta’ mudell. Il-valutazzjoni tal-impatt jenħtieġ ukoll, sal-punt li l-passaport diġitali tal-prodotti jiddependi minn standards li mhumiex mingħajr ħlas, tqis jekk tali dipendenza hijiex xierqa u kif jistgħu jiġu evitati kostijiet sproporzjonati għall-intrapriżi mikro, żgħar u ta’ daqs medju (SMEs).

(34)

Peress li liġi oħra tal-Unjoni tistabbilixxi rekwiżiti ta’ informazzjoni għall-prodotti u tistabbilixxi sistemi biex l-informazzjoni ssir disponibbli għall-operaturi ekonomiċi u għall-klijenti, il-Kummissjoni jenħtieġ li tikkunsidra li torbot ir-rekwiżiti ta’ informazzjoni fl-ambitu ta’ dan ir-Regolament ma’ dawk ir-rekwiżiti, bħal pereżempju l-obbligu li jiġu pprovduti skedi tad-data dwar is-sikurezza għas-sustanzi u għat-taħlitiet skont ir-Regolament (KE) Nru 1907/2006. Meta jkun fattibbli, jenħtieġ li l-Kummissjoni torbot ukoll il-passaport diġitali tal-prodotti ma’ bażijiet tad-data u għodod eżistenti tal-Unjoni bħar-Reġistru Ewropew tal-Prodotti għat-Tikkettar tal-Enerġija (EPREL) jew il-bażi tad-data għal informazzjoni dwar Sustanzi ta’ Tħassib F’oġġetti, bħala tali jew f’oġġetti kumplessi (Prodotti) (SCIP).

(35)

Sabiex ma jkunx hemm dewmien bla bżonn fl-istabbiliment ta’ rekwiżiti tal-ekodisinn għajr dawk li jikkonċernaw il-passaport diġitali tal-prodotti jew biex jiġi żgurat li l-passaporti diġitali tal-prodotti jistgħu jiġu implimentati b’mod effettiv, jenħtieġ li l-Kummissjoni titħalla teżenta lil gruppi ta’ prodotti mir-rekwiżiti tal-passaport diġitali tal-prodotti jekk l-ispeċifikazzjonijiet tekniċi ma jkunux disponibbli fir-rigward tar-rekwiżiti essenzjali għad-disinn tekniku u għall-operat tal-passaport diġitali tal-prodotti. Bl-istess mod, sabiex jiġi evitat kwalunkwe piż amministrattiv bla bżonn fuq l-operaturi ekonomiċi, jenħtieġ li l-Kummissjoni titħalla teżenta lil gruppi ta’ prodotti mir-rekwiżiti tal-passaport diġitali tal-prodotti f’każ li liġijiet oħra tal-Unjoni diġà jinkludu sistema għall-forniment diġitali ta’ informazzjoni dwar il-prodott li tippermetti lill-atturi tul il-katina tal-valur jaċċessaw informazzjoni rilevanti dwar il-prodott u tiffaċilita l-verifika tal-konformità tal-prodott mill-awtoritajiet nazzjonali kompetenti. Dawk l-eżenzjonijiet jenħtieġ li jiġu rieżaminati perjodikament filwaqt li titqies disponibbiltà ulterjuri tal-ispeċifikazzjonijiet tekniċi.

(36)

L-identifikazzjoni unika tal-prodotti hija element fundamentali biex it-traċċabbiltà tkun possibbli tul il-katina tal-provvista. Għalhekk, il-passaport diġitali tal-prodotti jenħtieġ li jkun marbut ma’ identifikatur uniku tal-prodott. Barra minn hekk, meta xieraq, il-passaport diġitali tal-prodotti jenħtieġ li jkun marbut ma identifikatur uniku tal-operatur u ma’ identifikatur uniku tal-faċilità li jkunu jippermettu t-traċċar tal-atturi u tal-faċilitajiet tal-manifattura relatati ma’ dak il-prodott. Sabiex jiżguraw l-interoperabbiltà, il-mezz ta’ data,l-identifikatur uniku tal-operatur u l-identifikatur uniku tal-faċilità li jippermettu t-traċċabbiltà jenħtieġ li jinħarġu f’konformità ma’ standards rikonoxxuti internazzjonalment. Jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE biex temenda dan ir-Regolament billi tissostitwixxi jew iżżid standards li f’konformità magħhom jistgħu jinħarġu l-mezz ta’ data, l-identifikatur uniku tal-operatur u l-identifikatur uniku tal-faċilità, fid-dawl tal-progress tekniku jew xjentifiku. Dan jenħtieġ li jiżgura li d-data li jkun hemm fil-passaport diġitali tal-prodotti tkun tista’ tiġi rreġistrata u trażmessa mill-operaturi ekonomiċi kollha, kif ukoll li tiġi ggarantita l-kompatibbiltà tal-identifikaturi uniċi ma’ komponenti esterni bħal pereżempju l-apparati tal-iskennjar. Barra minn hekk, jenħtieġ li d-data tkun trasferibbli permezz ta’ network interoperabbli miftuħ għall-iskambju tad-data mingħajr intrappolament tal-klijentela.

(37)

L-informazzjoni diġitalizzata dwar il-prodott u ċ-ċiklu tal-ħajja tiegħu jew, meta applikabbli, il-passaport tiegħu jenħtieġ li tkun faċilment aċċessibbli bl-iskennjar ta’ mezz ta’ data, bħal marka tal-ilma jew kodiċi ta’ rispons rapidu (QR). Meta possibbli, il-mezz ta’ data jenħtieġ li jkun fuq il-prodott innifsu biex jiġi żgurat li d-data tibqa’ aċċessibbli tul iċ-ċiklu tal-ħajja tiegħu. Madankollu, jenħtieġ li jkunu possibbli derogi skont in-natura, id-daqs jew l-użu tal-prodotti kkonċernati.

(38)

Sabiex jiġi żgurat aċċess għall-passaport diġitali tal-prodotti għall-perjodu speċifikat fl-atti delegati, inkluż wara insolvenza, likwidazzjoni jew waqfien tal-attività fl-Unjoni, l-operatur ekonomiku li jqiegħed il-prodott fis-suq, jenħtieġ li jagħmel disponibbli kopja ta’ riżerva tal-passaport diġitali tal-prodotti permezz ta’ fornitur ta’ servizzi ta’ passaporti diġitali tal-prodotti li jkun parti terza indipendenti.

(39)

Biex tkun żgurata l-introduzzjoni effettiva tal-passaport diġitali tal-prodotti, id-disinn tekniku, ir-rekwiżiti tad-data u t-tħaddim tiegħu jenħtieġ li jkunu konformi ma’ sett ta’ rekwiżiti tekniċi essenzjali li jipprovdu bażi għall-użu konsistenti tal-passaport diġitali tal-prodotti fis-setturi kollha. Jenħtieġ li jiġu stabbiliti speċifikazzjonijiet tekniċi biex tiġi żgurata l-implimentazzjoni effettiva ta’ dawk ir-rekwiżiti essenzjali, fil-forma ta’ standards armonizzati li għalihom ir-referenzi ġew ippubblikati f’Il-Ġurnal Uffiċjali tal-Unjoni Ewropea jew, bħala għażla ta’ riżerva, speċifikazzjonijiet komuni adottati mill-Kummissjoni permezz ta’ atti ta’ implimentazzjoni. Id-disinn tekniku jenħtieġ li jiżgura li l-passaport diġitali tal-prodotti jġorr id-data b’mod sigur, filwaqt li jirrispetta r-regoli tal-privatezza. Huwa neċessarju li l-passaport diġitali tal-prodott jiġi żviluppat fi djalogu miftuħ mas-sħab internazzjonali, sabiex jitqiesu l-fehmiet tagħhom meta jiġu żviluppati l-ispeċifikazzjonijiet tekniċi u biex jiġi żgurat li dawn jgħinu biex jitneħħew l-ostakli kummerċjali għal prodotti aktar ekoloġiċi b’ċikli tal-ħajja u ċirkolarità estiżi, jitnaqqsu l-kostijiet għall-investimenti sostenibbli, il-konformità, u tiġi appoġġata l-innovazzjoni. Sabiex tkun tista’ ssir l-implimentazzjoni effettiva, huwa importanti li l-ispeċifikazzjonijiet tekniċi u r-rekwiżiti relatati mat-traċċabbiltà tul il-katina tal-valur tiġi żviluppata, sa fejn ikun possibbli, abbażi ta’ approċċ kunsenswali u tal-involviment, ir-rieda, u l-kollaborazzjoni effettiva ta’ sett varjat ta’ atturi, inklużi korpi ta’ standardizzazzjoni, assoċjazzjonijiet tal-industrija, negozji ġodda, organizzazzjonijiet tal-konsumaturi, esperti, organizzazzjonijiet mhux governattivi (NGOs) u sħab internazzjonali, inklużi ekonomiji li qed jiżviluppaw.

(40)

Jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE biex tissupplimenta dan ir-Regolament billi tiddefinixxi b’mod ċar ir-rwol u r-responsabbiltajiet tal-atturi differenti bħal pereżempju l-aġenziji emittenti u l-fornituri tas-servizzi li se jkunu involuti fil-ħolqien, fl-awtentikazzjoni, fl-ipproċessar u fil-ħżin tad-data u, possibbilment fl-irtirar ta’ elementi importanti tal-passaport diġitali tal-prodotti, bħall-identifikaturi uniċi u l-mezzi ta’ data. Il-Kummissjoni tista’, sa dak il-punt, twettaq valutazzjoni tal-impatt biex tinvestiga jekk huwa xieraq li tiżviluppa skema ta’ ċertifikazzjoni għall-fornituri ta’ servizzi ta’ passaporti diġitali tal-prodotti.

(41)

Sabiex jiġi żgurat li l-passaport diġitali tal-prodotti jkun flessibbli, aġli u mmexxi mis-suq u li jevolvi f’konformità mal-mudelli ta’ negozju, mas-swieq u mal-innovazzjoni, jenħtieġ li dan ikun ibbażat fuq sistema ta’ data deċentralizzata u jiġi stabbilit u miżmum mill-operaturi ekonomiċi. Madankollu, għal finijiet ta’ infurzar u monitoraġġ, huwa meħtieġ li l-awtoritajiet nazzjonali kompetenti u l-Kummissjoni jkollhom aċċess dirett għal rekord tal-identifikaturi uniċi kollha marbuta ma’ prodotti mqiegħda fis-suq jew fis-servizz. Għal dak il-għan, jenħtieġ li l-Kummissjoni tistabbilixxi u żżomm reġistru tal-passaporti diġitali tal-prodotti biex taħżen tali data (ir-“reġistru”). Meta meħtieġ, biex jiġi ffaċilitat aktar l-infurzar, il-Kummissjoni jenħtieġ li, kif xieraq, tispeċifika data oħra inkluża fil-passaport diġitali tal-prodotti li jeħtieġ li tinħażen fir-reġistru.

(42)

Jenħtieġ li l-Kummissjoni tistabbilixxi u żżomm aġġornat web portal faċli għall-utent u disponibbli għall-pubbliku fejn il-partijiet ikkonċernati bħall-klijenti, l-operaturi ekonomiċi u atturi rilevanti oħra, ikollhom aċċess għad-data inkluża fil-passaporti diġitali tal-prodotti u l-possibbiltà li jfittxu għal u jqabblu d-data inkluża f’dawk il-passaporti f’konformità mad-drittijiet ta’ aċċess rispettivi tagħhom speċifikati fl-atti delegati li jistabbilixxu r-rekwiżiti tal-ekodisinn. Jenħtieġ li l-web portal jipprovdi links għal data diġà maħżuna mill-operatur ekonomiku fil-passaport deċentralizzat tiegħu tal-prodotti.

(43)

Kwalunkwe pproċessar ta’ data personali skont dan ir-Regolament irid ikun f’konformità mar-regoli applikabbli dwar il-protezzjoni tad-data personali. L-ipproċessar ta’ data personali mill-awtoritajiet nazzjonali kompetenti fl-Istati Membri jrid isir f’konformità mar-Regolament (UE) 2016/679 tal-Parlament Ewropew u tal-Kunsill (37) filwaqt li tingħata attenzjoni partikolari lill-prinċipji tal-protezzjoni tad-data fil-livell tad-disinn u b’mod prestabbilit. Kwalunkwe pproċessar ta’ data personali mill-Kummissjoni, b’mod partikolari dik maħżuna fir-reġistru, irid isir f’konformità mar-Regolament (UE) 2018/1725 tal-Parlament Ewropew u tal-Kunsill (38). Jenħtieġ li d-data personali tal-klijenti ma tinħażinx fil-passaport diġitali tal-prodotti.

(44)

L-infurzar effettiv fir-rigward ta’ prodotti mqiegħda fis-suq tal-Unjoni, kemm jekk prodotti internament kif ukoll jekk importati, huwa essenzjali biex jintlaħqu l-għanijiet ta’ dan ir-Regolament. Għalhekk, ladarba l-Kummissjoni tkun stabbiliet ir-reġistru, l-awtoritajiet doganali jenħtieġ li jkollhom aċċess dirett għalih permezz tal-Ambjent ta’ Tieqa Unika tal-UE għad-Dwana stabbilit bir-Regolament (UE) 2022/2399 tal-Parlament Ewropew u tal-Kunsill (39). Ir-rwol tal-awtoritajietdoganali jenħtieġ li jkun li jivverifikaw bħala minimu li l-identifikatur uniku ta’ reġistrazzjoni ta’ prodott li huwa meħtieġ li jiġi pprovdut jew magħmul disponibbli lilhom u l-kodiċi tal-komodità rilevanti jikkorrispondu għad-data maħżuna fir-reġistru.. Dan jippermetti lill-awtoritajiet doganali jivverifikaw li jeżisti passaport diġitali tal-prodotti għall-prodotti importati. Meta xieraq, il-Kummissjoni jenħtieġ li tistabbilixxi fl-att ta’ implimentazzjoni tagħha dwar ir-reġistru l-obbligi meħtieġa għall-operaturi ekonomiċi biex iżommu aġġornata d-data maħżuna fir-reġistru.

(45)

Id-data inkluża fil-passaport diġitali tal-prodotti tista’ tippermetti lill-awtoritajiet doganali jsaħħu u jiffaċilitaw il-ġestjoni tar-riskju u tippermetti li l-kontrolli fil-fruntiera jkunu mmirati aħjar. Għalhekk, jenħtieġ li l-awtoritajiet doganali jkunu jistgħu jirkupraw u jużaw d-data inkluża fil-passaport diġitali tal-prodotti u fir-reġistru relatat għat-twettiq tal-kompiti tagħhom f’konformità mal-liġi tal-Unjoni inkluż għall-ġestjoni tar-riskju f’konformità mar-Regolament (UE) Nru 952/2013 tal-Parlament Ewropew u tal-Kunsill (40).

(46)

Sabiex il-konsumaturi jitħeġġu jagħmlu għażliet sostenibbli, jenħtieġ li t-tikketti, meta jkunu meħtieġa mill-atti delegati adottati skont dan ir-Regolament, jipprovdu informazzjoni ċara u li tinftiehem faċilment li tippermetti tqabbil effettiv tal-prodotti, pereżempju billi jindikaw il-klassijiet tal-prestazzjoni. Speċifikament għall-konsumaturi, it-tikketti fiżiċi jistgħu jkunu sors addizzjonali ta’ informazzjoni fil-post tal-bejgħ. Dawn jenħtieġ li jipprovdu bażi viżiva rapida għall-konsumaturi biex jiddistingwu bejn il-prodotti abbażi tal-prestazzjoni tagħhom b’rabta ma’ parametru speċifiku tal-prodott jew sett ta’ parametri tal-prodott. Jenħtieġ li, meta xieraq, jagħmlu wkoll possibbli l-aċċess għal informazzjoni addizzjonali billi jkollhom fuqhom referenzi speċifiċi bħall-indirizzi tas-siti web, il-kodiċijiet QR dinamiċi, il-links għat-tikketti online jew kwalunkwe mezz xieraq orjentat lejn il-konsumatur. Il-Kummissjoni jenħtieġ li tistabbilixxi fl-att delegat rilevanti l-aktar mod effettiv biex turi dawn it-tikketti, inkluż fil-każ ta’ bejgħ mill-bogħod online, filwaqt li tqis l-implikazzjonijiet għall-klijenti u għall-operaturi ekonomiċi u l-karatteristiċi tal-prodotti kkonċernati. Il-Kummissjoni jenħtieġ li tkun tista’ tirrikjedi wkoll li t-tikketta tiġi stampata fuq l-imballaġġ tal-prodott.

(47)

Ir-Regolament (UE) 2017/1369 li jistabbilixxi qafas dwar it-tikkettar tal-enerġija japplika, b’mod parallel għal dan ir-Regolament, għall-prodotti relatati mal-enerġija. It-tikketti tal-enerġija huma strument ta’ suċċess fir-rigward tal-għoti tal-informazzjoni xierqa lill-konsumaturi għall-prodotti relatati mal-enerġija. Il-klassijiet ta’ prestazzjoni ddeterminati fl-ambitu ta’ dan ir-Regolament jenħtieġ li, meta xieraq, ikunu inkorporati fit-tikketta tal-enerġija bħala informazzjoni supplimentari kif previst fl-Artikolu 16 tar-Regolament (UE) 2017/1369. Meta l-informazzjoni rilevanti dwar il-prestazzjoni ta’ prodott b’rabta ma’ parametru ta’ prodott ma tkunx tista’ tiġi inkluża bħala informazzjoni supplimentari fit-tikketta tal-enerġija, jenħtieġ li l-Kummissjoni, meta xieraq, tkun tista’ tirrikjedi l-istabbiliment ta’ tikketta f’konformità ma’ dan ir-Regolament minflok it-tikketta tal-enerġija, li fiha tista’ tiġi inkorporata l-informazzjoni rilevanti tat-tikketta tal-enerġija.

(48)

Hemm bżonn li l-konsumaturi jiġu protetti minn informazzjoni qarrieqa li tista’ xxekkel l-għażliet tagħhom għal prodotti aktar sostenibbli. Għal dik ir-raġuni, jenħtieġ li jkun ipprojbit li jitqiegħdu fis-suq jew fis-servizz il-prodotti li jkollhom fuqhom tikketti jew ikunu akkumpanjati b’tikketti li x’aktarx iqarrqu jew iħawdu lill-klijenti billi jimitaw it-tikketti previsti f’dan ir-Regolament, jew li huma akkumpanjati bi kwalunkwe informazzjoni oħra li x’aktar tqarraq jew tħawwad lill-klijenti fir-rigward tat-tikketti previsti f’dan ir-Regolament. L-Ekotikketta tal-UE jew ekotikketti oħra EN ISO 14024 tat-tip I rikonoxxuti uffiċjalment fil-livell nazzjonali jew reġjonali jridu jitqiesu bħala tikketti qarrieqa jew li jħawdu, dment li l-kriterji żviluppati fl-ambitu ta’ dawk l-iskemi ta’ tikkettar ikunu tal-anqas stretti daqs ir-rekwiżiti tal-ekodisinn.

(49)

Biex l-objettivi tal-Patt Ekoloġiku Ewropew jinkisbu bl-aktar mod effiċjenti u biex l-ewwel jiġu indirizzati l-prodotti li jħallu l-akbar impatt, il-Kummissjoni jenħtieġ li twettaq prijoritizzazzjoni tal-prodotti li jridu jiġu regolati fl-ambitu ta’ dan ir-Regolament u r-rekwiżiti li se japplikaw għalihom. Abbażi tal-proċess segwit għall-prijoritizzazzjoni fl-ambitu tad-Direttiva 2009/125/KE, jenħtieġ li l-Kummissjoni tadotta pjan ta’ ħidma, li jkopri mill-anqas tliet snin, li jistabbilixxi lista ta’ gruppi ta’ prodotti li għalihom biħsiebha tadotta atti delegati kif ukoll l-aspetti tal-prodotti li għalihom biħsiebha tadotta atti delegati ta’ applikazzjoni orizzontali. Il-Kummissjoni jenħtieġ li tibbaża l-prijoritizzazzjoni tagħha fuq sett ta’ kriterji li jappartjenu b’mod partikolari għall-kontribut potenzjali tal-atti delegati għall-objettivi tal-Unjoni b’rabta mal-klima, l-ambjent u l-enerġija u l-potenzjal tagħhom għat-titjib tal-aspetti tal-prodotti magħżula mingħajr ma tasal għal kostijiet sproporzjonati għall-operaturi pubbliċi u ekonomiċi. L-Istati Membri u l-partijiet ikkonċernati jenħtieġ li jiġu kkonsultati wkoll permezz tal-Forum dwar l-Ekodisinn li għandu jiġi stabbilit mill-Kummissjoni. Minħabba l-komplementarjetajiet bejn dan ir-Regolament u r-Regolament (UE) 2017/1369 għall-prodotti relatati mal-enerġija, l-iskedi ta’ żmien għall-pjan ta’ ħidma fl-ambitu ta’ dan ir-Regolament u għall-pjan ta’ ħidma previst fl-Artikolu 15 tar-Regolament (UE) 2017/1369 jenħtieġ li jiġu allinjati.Meta tiddefinixxi l-prijorità tal-prodotti intermedji, jenħtieġ li l-Kummissjoni tqis ukoll il-konsegwenzi għall-prodotti finali li jkunu magħmula minn tali prodotti intermedji. Meta titqies l-importanza tagħhom biex jintlaħqu l-objettivi tal-Unjoni b’rabta mal-enerġija, il-pjani ta’ ħidma jenħtieġ li jinkludu sehem adegwat ta’ azzjonijiet relatati ma’ prodotti relatati mal-enerġija. Il-vetturi kif imsemmi fl-Artikolu 2(1) tar-Regolament (UE) Nru 167/2013, fl-Artikolu 2(1) tar-Regolament (UE) Nru 168/2013 u fl-Artikolu 2(1) tar-Regolament (UE) 2018/858 diġà huma soġġetti għal dispożizzjonijiet komprensivi, inklużi rekwiżiti ambjentali speċifiċi, u għalhekk jenħtieġ li ma jingħatawx prijorità għall-istabbiliment ta’ rekwiżiti tal-ekodisinn. Għall-ewwel pjan ta’ ħidma, jenħtieġ li l-Kummissjoni tagħti prijorità lill-ħadid, lill-azzar, lill-aluminju, lit-tessuti, b’mod partikolari l-ilbies, xedd is-saqajn, l-għamara, inklużi s-saqqijiet, it-tajers, id-deterġenti, iż-żebgħa, il-lubrikanti, is-sustanzi kimiċi, il-prodotti relatati mat-teknoloġiji tal-informazzjoni u tal-komunikazzjoni u prodotti elettroniċi oħrajn, u prodotti relatati mal-enerġija li għalihom ir-rekwiżiti tal-ekodisinn iridu jiġu stabbiliti għall-ewwel darba jew li għalihom il-miżuri eżistenti adottati skont id-Direttiva 2009/125/KE jridu jiġu rieżaminati skont dan ir-Regolament. Il-Kummissjoni jenħtieġ li tipprovdi ġustifikazzjoni xierqa f’każ li tiddeċiedi li timmodifika dik il-lista.

(50)

L-industrija tas-siment, peress li hija wieħed mill-aktar setturi b’intensità għolja ta’ enerġija, materjali u karbonju, bħalissa hija responsabbli għal madwar 7 % tal-emissjonijiet globali u 4 % tal-emissjonijiet tas-CO2 tal-Unjoni, u dan jagħmilha settur fundamentali għall-allinjament malajr kemm jista’ jkun mal-ftehim ta’ Pariġi dwar il-klima u l-objettivi tal-Unjoni b’rabta mal-klima. Filwaqt li l-prodotti għall-bini, inkluż is-siment, iridu jkunu koperti skont Regolament tal-Parlament Ewropew u tal-Kunsill li jistabbilixxi kundizzjonijiet armonizzati għall-kummerċjalizzazzjoni tal-prodotti għall-bini (ir-“Regolament dwar il-prodotti għall-bini”), dawn jibqgħu fil-kamp ta’ applikazzjoni ta’ dan ir-Regolament. Sabiex jiġi evitat nuqqas ta’ rekwiżiti tal-prodotti meħtieġa b’mod urġenti biex jintlaħqu l-objettivi tagħna b’rabta mal-klima u mal-ambjent, fl-assenza ta’ rekwiżiti adegwati ta’ prestazzjoni u ta’ informazzjoni għal dawn il-prodotti skont ir-Regolament dwar il-prodotti għall-bini jenħtieġ li l-Kummissjoni tadotta atti li jistabbilixxu rekwiżiti tal-ekodisinn għas-siment mhux qabel il-31 ta’ Diċembru 2028 u mhux aktar tard mill-1 ta’ Jannar 2030.

(51)

Fl-indirizzar tal-prodotti għall-bini, dan ir-Regolament jenħtieġ li jistabbilixxi rekwiżiti għall-prodotti finali biss meta l-obbligi maħluqa mir-Regolament dwar il-prodotti għall-bini u l-implimentazzjoni tiegħu x’aktarx li ma jilħqux biżżejjed l-objettivi ta’ sostenibbiltà ambjentali li dan ir-Regolament qed ifittex li jilħaq. Barra minn hekk, meta tfassal il-pjanijiet ta’ ħidma, il-Kummissjoni jenħtieġ li tqis li, b’kontinwazzjoni tal-prattika attwali, ir-Regolament dwar il-prodotti għall-bini, tagħti prevalenza lir-rekwiżiti ta’ sostenibbiltà stabbiliti fl-ambitu ta’ dan ir-Regolament. Dan jenħtieġ li jkun il-każ pereżempju għall-apparati tat-tisħin, għall-bojlers, għall-pompi tas-sħana, għall-apparati tat-tisħin tal-ilma u tal-post, għall-fannijiet, għas-sistemi tat-tkessiħ u tal-ventilazzjoni u għall-prodotti fotovoltajċi, esklużi pannelli fotovoltajċi integrati fil-bini. Ir-Regolament dwar il-prodotti għall-binijista’ japplika għal dawk il-prodotti b’mod komplementari meta meħtieġ, prinċipalment fir-rigward tal-aspetti tas-sikurezza, filwaqt li jqis ukoll liġijiet oħra tal-Unjoni dwar prodotti bħal apparati tal-gass, makkinarju u tagħmir b’vultaġġ baxx.

(52)

Sabiex tiġi żgurata li ssir konsultazzjoni xierqa mal-partijiet interessati kollha, jenħtieġ li l-Kummissjoni tistabbilixxi Forum dwar l-Ekodisinn, magħmul minn esperti ddeżinjati mill-Istati Membri u minn partijiet interessati oħra, bħar-rappreżentanti tal-industrija, fosthom l-SMEs, is-settur tas-snajja’, l-impriżi soċjali, it-trade unions, il-kummerċjanti, il-bejjiegħa bl-imnut, l-importaturi, l-organizzazzjoniji ambjentali u tal-konsumatur, l-atturi involuti fl-attivitajiet tal-ekonomika ċirkolari, l-organizzazzjonijiet Ewropej fil-qasam tal-istandardizzazzjoni kif ukoll ir-riċerkaturi. Fi ħdan il-Forum dwar l-Ekodisinn, il-Kummissjoni jenħtieġ li tistabbilixxi Grupp ta’ Esperti tal-Istati Membri, li jenħtieġ li jikkontribwixxi għat-tħejjija ta’ rekwiżiti ġodda tal-ekodisinn, għall-valutazzjoni tal-miżuri ta’ awtoregolamentazzjoni, għall-iskambju ta’ informazzjoni u tal-aħjar prattiki bejn l-Istati Membri dwar miżuri li jsaħħu l-konformità ma’ dan ir-Regolament, bħall-edukazzjoni u l-kampanji ta’ informazzjoni jew l-għoti ta’ appoġġ lill-SMEs, kif ukoll għall-istabbiliment tal-prijoritajiet.

(53)

Sabiex titħeġġeġ l-awtoregolamentazzjoni bħala alternattiva valida għall-approċċi regolatorji, dan ir-Regolament jenħtieġ li, b’żieda fuq id-Direttiva 2009/125/KE, jinkludi l-possibbiltà għall-industrija li tippreżenta miżuri ta’ awtoregolamentazzjoni għall-prodotti li ma jkunux inklużi fil-pjan ta’ ħidma. Il-miżuri ta’ awtoregolamentazzjoni jenħtieġ li jiġu allinjati mal-objettivi ta’ dan ir-Regolament. Il-Kummissjoni jenħtieġ li tivvaluta l-miżuri ta’ awtoregolamentazzjoni proposti mill-industrija, flimkien mal-informazzjoni u l-evidenza ppreżentati mill-firmatarji, fid-dawl, fost oħrajn, tal-impenji kummerċjali internazzjonali tal-Unjoni u l-ħtieġa li tiġi żgurata l-konsistenza mal-liġi tal-Unjoni. Ikun xieraq ukoll, pereżempju fid-dawl tal-iżviluppi rilevanti tas-suq jew dawk teknoloġiċi fi ħdan il-grupp ta’ prodotti kkonċernat, li l-Kummissjoni tkun tista’ titlob verżjoni riveduta tal-miżura ta’ awtoregolamentazzjoni kull meta jitqies meħtieġ. Ladarba miżura ta’ awtoregolamentazzjoni tiġi elenkata f’att ta’ implimentazzjoni li jkun fih lista ta’ miżuri ta’ awtoregolamentazzjoni li jissodisfaw il-kriterji stabbiliti f’dan ir-Regolament, ikun hemm aspettattiva leġittima għall-operaturi ekonomiċi li l-Kummissjoni l-ewwel se tqis il-kontenut ta’ tali miżura qabel ma tipproponi att delegat li jistabbilixxi r-rekwiżiti tal-ekodisinn għal dan il-grupp ta’ prodotti speċifiku. Madankollu, il-Kummissjoni jenħtieġ li tkun tista’ tadotta rekwiżiti tal-ekodisinn li japplikaw ukoll għall-prodotti kollha jew għal uħud minnhom koperti minn miżura ta’ awtoregolamentazzjoni rikonoxxuta għall-aspetti tal-prodotti mhux indirizzati minn dik il-miżura ta’ awtoregolamentazzjoni. Meta l-Kummissjoni tqis li miżura ta’ awtoregolamentazzjoni ma tkunx għadha tissodisfa l-kriterji stabbiliti f’dan ir-Regolament, jenħtieġ li tneħħiha minn dak l-att ta’ implimentazzjoni. Konsegwentement, jenħtieġ li jkun possibbli li jiġu stabbiliti r-rekwiżiti tal-ekodisinn għall-gruppi ta’ prodotti li qabel ġew indirizzati minn dik il-miżura ta’ awtoregolamentazzjoni.

(54)

L-SMEs jistgħu jibbenefikaw ħafna minn żieda fid-domanda għal prodotti sostenibbli iżda jistgħu wkoll jiffaċċjaw kostijiet u diffikultajiet minħabba wħud mir-rekwiżiti. Jenħtieġ li l-Kummissjoni, meta tħejji r-rekwiżiti tal-ekodisinn, tqis l-impatt tagħhom fuq l-SMEs, b’mod partikolari fuq il-mikrointrapriżi, attivi fis-settur tal-prodotti rilevanti. L-Istati Membri u l-Kummissjoni jenħtieġ li, fl-oqsma ta’ responsabbiltà rispettivi tagħhom, jipprovdu informazzjoni adegwata inkluża gwida, joffru taħriġ immirat u speċjalizzat, u jipprovdu assistenza u appoġġ speċifiċi, inkluż appoġġ finanzjarju, lill-SMEs attivi fil-manifattura ta’ prodotti li għalihom huma stabbiliti r-rekwiżiti tal-ekodisinn. Dawk l-azzjonijiet huma partikolarment importanti għall-gruppi ta’ prodotti li fihom il-preżenza tal-SMEs hija rilevanti. Jenħtieħ li l-Kummissjoni, meta jkun xieraq, tappoġġa l-kalkolu tal-impronta ambjentali tal-prodott billi toffri l-għodod diġitali, pereżempju għodod għall-kalkolu tal-valutazzjoni taċ-ċiklu tal-ħajja, u tappoġġa l-implimentazzjoni tal-passaport diġitali tal-prodotti. Huwa importanti li l-Kummissjoni tipprovdi appoġġ finanzjarju lir-rappreżentanti tal-SMEs, b’mod partikolari dawk tal-mikrointrapriżi, biex tippermetti l-parteċipazzjoni effettiva tagħhom fil-Forum dwar l-Ekodisinn u li tipprovdi lill-SMEs informazzjoni li tkun aċċessibbli faċilment dwar l-appoġġ u l-programmi finanzjarji disponibbli. Jenħtieġ li l-azzjonijiet mill-Istati Membri jittieħdu f’konformità mar-regoli applikabbli dwar l-għajnuna mill-Istat. Meta jiżviluppaw u jimplimentaw dawk l-azzjonijiet, l-Istati Membri jistgħu jafdaw fuq l-appoġġ mogħti mill-programmi u l-inizjattivi tal-Unjoni għall-SMEs.

(55)

Il-qerda ta’ prodotti tal-konsumatur mhux mibjugħa, bħat-tessuti u xedd is-saqajn, mill-operaturi ekonomiċi qed issir problema ambjentali mifruxa madwar l-Unjoni, b’mod partikolari minħabba t-tkabbir rapidu tal-bejgħ online. Dan jammonta għal telf ta’ riżorsi ekonomiċi ta’ valur peress li l-merkanzija tkun qed tiġi prodotta, trasportata u wara tinqered mingħajr ma qatt tintuża għall-iskop intenzjonat tagħha. Għalhekk, fl-interess tal-protezzjoni ambjentali, dan ir-Regolament jeħtieġ li jistabbilixxi qafas biex tiġi evitata l-qerda ta’ prodotti mhux mibjugħa li jkunu maħsuba primarjament għall-konsumaturi, inklużi l-prodotti li ma jkunux ġew offruti għall-bejgħ jew prodotti rritornati mill-konsumaturi abbażi tad-dritt ta’ reċess tagħhom kif stabbilit mid-Direttiva 2011/83/UE tal-Parlament Ewropew u tal-Kunsill (41) jew matul kwalunkwe perjodu ta’ reċess itwal mogħti mill-kummerċjant. Il-kunċett ta’ qerda kif deskritt f’dan ir-Regolament jenħtieġ li jkopri l-aħħar tliet attivitajiet fil-ġerarkija tal-iskart, jiġifieri riċiklaġġ, irkupru u rimi oħra. Il-preparazzjoni għall-użu mill-ġdid, inklużi r-rinnovazzjoni u l-manifattura mill-ġdid, jenħtieġ li ma jitqisux bħala qerda. Il-prevenzjoni tal-qerda tal-prodotti se tnaqqas l-impatt ambjentali tagħhom billi tnaqqas il-ġenerazzjoni tal-iskart u billi tiġi diżinċentivata l-produzzjoni żejda. L-operaturi ekonomiċi jenħtieġ li jieħdu l-miżuri neċessarji biex jipprevjenu l-ħtieġa li jinqerdu prodotti tal-konsumatur mhux mibjugħa. Barra minn hekk, minħabba li diversi Stati Membri introduċew leġiżlazzjoni nazzjonali dwar il-qerda ta’ prodotti tal-konsumatur mhux mibjugħa u b’hekk ħolqu distorsjonijiet fis-suq, huma meħtieġa regoli armonizzati dwar il-qerda ta’ prodotti tal-konsumatur mhux mibjugħa biex jiġi żgurat li d-distributuri, il-bejjiegħa bl-imnut u operaturi ekonomiċi oħra jkunu soġġetti għall-istess regoli u inċentivi fl-Istati Membri kollha.

(56)

Biex tiġi diżinċentivata l-qerda ta’ prodotti tal-konsumatur mhux mibjugħa u biex tinħoloq aktar data dwar it-tħaddim ta’ din il-prattika, dan ir-Regolament jenħtieġ li jintroduċi obbligu ta’ trasparenza għall-operaturi ekonomiċi, bl-eċċezzjoni tal-intrapriżi żgħar u ta’ daqs medju, li jimponilhom jiddivulgaw l-informazzjoni dwar l-għadd u l-piż tal-prodotti tal-konsumatur mhux mibjugħa li jintremew fis-sena tal-anqas f’paġna faċilment aċċessibbli fis-sit web tagħhom. Meta applikabbli, jenħtieġ li jkollhom il-possibbiltà li jinkludu dik l-informazzjoni fir-rapport ta’ ġestjoni tagħhom skont id-Direttiva 2013/34/UE tal-Parlament Ewropew u tal-Kunsill (42). L-obbligu jenħtieġ li jibda japplika għall-intrapriżi ta’ daqs medju sitt snin wara d-dħul fis-seħħ ta’ dan ir-Regolament. L-operatur ekonomiku jenħtieġ li jindika t-tip jew il-kategorija ta’ prodott, ir-raġunijiet għar-rimi tal-prodotti u għall-konsenja tagħhom għal operazzjonijiet sussegwenti ta’ trattament tal-iskart kif ukoll il-miżuri meħuda u l-miżuri ppjanati biex tiġi evitata l-qerda ta’ prodotti tal-konsumatur mhux mibjugħa.

(57)

Il-volumi għolja bla bżonn tal-produzzjoni u ż-żmien qasir li matulu jintużaw it-tessuti, li l-akbar sehem tal-konsum tagħhom fl-Unjoni huwa l-ilbies, jikkawżaw impatt ambjentali sinifikanti kif deskritt fil-komunikazzjoni tal-Kummissjoni tat-30 ta’ Marzu 2022 dwar “Strateġija tal-UE għal Tessuti Sostenibbli u Ċirkolari”. Tessuti prodotti ġodda iżda li ma jinbigħux u speċjalment l-ilbies huma fost l-oġġetti li qed jiġi rrapportat li qed jinqerdu. Jenħtieġ li l-ilbies jiġi apprezzat aktar, u jintlibes u jiġi ndukrat għal żmien itwal minn kif huwa l-każ fil-kultura tal-moda mgħaġġla tal-lum. Minn perspettiva tal-ekonomija ċirkolari, tali ħela ta’ riżorsi ta’ valur tikkontradixxi b’mod ċar l-objettivi ta’ dan ir-Regolament. Għalhekk huwa ġustifikat li tiġi pprojbita l-qerda ta’ lbies u aċċessorji tal-ħwejjeġ kif ukoll xedd is-saqajn tal-konsumatur mhux mibjugħa.

(58)

Sabiex jitqies l-impatt ambjentali tal-qerda ta’ tipi oħra ta’ prodotti tal-konsumatur mhux mibjugħa, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE biex temenda dan ir-Regolament billi żżid prodotti ġodda fil-lista ta' prodotti tal-konsumatur li l-qerda tagħhom mill-operaturi ekonomiċi hija pprojbita. Minħabba l-firxa wiesgħa ta’ prodotti li jistgħu potenzjalment jinqerdu mingħajr ma qatt jinbiegħu jew jintużaw, jeħtieġ li l-Kummissjoni tivvaluta sa liema punt fil-prattika sseħħ tali qerda ta’ prodotti, filwaqt li titqies l-informazzjoni li titqiegħed għad-dispożizzjoni tal-operaturi ekonomiċi meta xieraq. Biex ikun żgurat li dan l-obbligu jkun proporzjonat, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE biex tissupplimenta dan ir-Regolament billi tistabbilixxi derogi speċifiċi li skonthom il-qerda ta’ prodotti tal-konsumatur mhux mibjugħa xorta tista’ tkun permessa, pereżempju fid-dawl ta’ tħassib dwar is-saħħa u s-sikurezza. Biex tiġi mmonitorjata l-effettività ta’ tali projbizzjoni u tiġi diżinċentivata ċ-ċirkomvenzjoni, jenħtieġ li l-operaturi ekonomiċi jkunu meħtieġa jiddivulgaw l-għadd u l-piż ta’ prodotti tal-konsumatur mhux mibjugħa li jintremew, ir-raġunijiet għar-rimi ta’ dawk il-prodotti u d-derogi applikabbli. Fl-aħħar nett, biex jiġi evitat kwalunkwe piż amministrattiv bla bżonn għall-intrapriżi żgħar u ta’ daqs medju, jenħtieġ li dawn jiġu eżentati mill-projbizzjoni li jeqirdu prodotti speċifiċi stabbiliti f’dan ir-Regolament. Dik il-projbizzjoni jenħtieġ li tibda tapplika għal intrapriżi ta’ daqs medju sitt snin wara d-dħul fis-seħħ ta’ dan ir-Regolament. Madankollu, meta jkun hemm evidenza raġonevoli li l-intrapriżi żgħar u ta’ daqs medju jistgħu jintużaw biex tiġi evitata din il-projbizzjoni, jenħtieġ li l-Kummissjoni tkun tista’ tirrikjedi fl-atti delegati, li l-projbizzjoni li jinqerdu l-prodotti tal-konsumatur mhux mibjugħa jew l-obbligu ta’ divulgazzjoni japplikaw għal dawk l-intrapriżi għal prodotti speċifiċi.

(59)

Jenħtieġ li l-Istati Membri ma jiġux preklużi milli jintroduċu jew iżommu miżuri nazzjonali fir-rigward tal-qerda ta’ prodotti tal-konsumatur mhux mibjugħa għal prodotti li mhumiex soġġetti għall-projbizzjoni fl-ambitu ta’ dan ir-Regolament, dment li tali miżuri jkunu konformi mal-liġi tal-Unjoni.

(60)

Abbażi tal-informazzjoni divulgata mill-operaturi ekonomiċi u ta’ evidenza oħra disponibbli, jenħtieġ li l-Kummissjoni tippubblika, fuq is-sit web tagħha, informazzjoni konsolidata dwar il-qerda ta’ prodotti tal-konsumatur mhux mibjugħa u jenħtieġ li tidentifika fil-pjan ta’ ħidma l-prodotti li għalihom jenħtieġ li tiġi kkunsidrata l-projbizzjoni tal-qerda. It-tagħmir elettriku u elettroniku jenħtieġ li jiġi kkunsidrat għall-inklużjoni fl-ewwel pjan ta’ ħidma.

(61)

L-operaturi ekonomiċi jenħtieġ li jkunu responsabbli għall-konformità tal-prodotti mar-rekwiżiti tal-ekodisinn, b’rabta mar-rwoli rispettivi tagħhom fil-katina tal-provvista, sabiex ikun żgurat il-moviment liberu ta’ dawk il-prodotti fis-suq intern u biex tittejjeb is-sostenibbiltà tagħhom. L-operaturi ekonomiċi li jintervjenu fil-katina tal-provvista u tad-distribuzzjoni jenħtieġ li jieħdu miżuri xierqa biex jiżguraw li jagħmlu disponibbli biss fis-suq prodotti li jkunu konformi ma’ dan ir-Regolament u mal-atti delegati adottati skontu.

(62)

Minħabba li l-manifatturi jkollhom għarfien dettaljat tad-disinn u tal-proċess tal-produzzjoni, jenħtieġ li dawn ikunu responsabbli biex iwettaq il-proċedura tal-valutazzjoni tal-konformità applikabbli jew li titwettaq f’isimhom.

(63)

Sabiex jitħares il-funzjonament tas-suq intern, jeħtieġ li jiġi żgurat li l-prodotti minn pajjiżi terzi li jidħlu fis-suq tal-Unjoni jkunu konformi ma’ dan ir-Regolament u mal-atti delegati adottati skontu, kemm jekk jiġu importati bħala prodotti, kif ukoll bħala komponenti jew prodotti intermedji. B’mod partikolari, jeħtieġ li jiġi żgurat li l-manifatturi jkunu wettqu proċeduri xierqa ta’ valutazzjoni tal-konformità fir-rigward ta’ dawk il-prodotti. Għalhekk jenħtieġ li l-importaturi jkunu meħtieġa jiżguraw li l-prodotti li jqiegħdu fis-suq ikunu konformi ma’ dawk ir-rekwiżiti u li l-markatura CE u d-dokumentazzjoni mfassla mill-manifatturi jkunu disponibbli għall-ispezzjoni tal-awtoritajiet nazzjonali kompetenti. Jenħtieġ li l-importaturi jiġu rikjesti biex, meta applikabbli, jiġi żgurat li passaport diġitali tal-prodotti jkun disponibbli għal dawk il-prodotti.

(64)

Meta jqiegħed prodott fis-suq, l-importaturi jenħtieġ li fuq il-prodott jindikaw isimhom, l-isem kummerċjali rreġistrat jew it-trademark irreġistrata kif ukoll l-indirizz postali li fih u mezz elettroniku ta’ komunikazzjoni li permezz tiegħu jkunu jistgħu jiġu kkuntattjati. Jenħtieġ li jiġu previsti derogi f’każijiet meta d-daqs tal-prodott ma jippermettix dawn l-indikazzjonijiet jew meta l-importaturi jkollhom jiftħu l-imballaġġ biex ipoġġu l-isem u l-indirizz fuq il-prodott jew meta l-prodott ikun żgħir wisq fid-daqs biex fuqu titwaħħal din l-informazzjoni.

(65)

Peress li d-distributuri jagħmlu prodotti disponibbli fis-suq wara li dawk il-prodotti jkunu tqiegħdu hemmhekk mill-manifattur jew mill-importatur, jenħtieġ li jaġixxu bl-attenzjoni dovuta b’rabta mar-rekwiżiti applikabbli tal-ekodisinn. Id-distributuri jenħtieġ li jiżguraw wkoll li l-immaniġġar tagħhom tal-prodotti ma jaffettwax ħażin il-konformità ta’ dawn il-prodotti ma’ dan ir-Regolament jew mal-atti delegati adottati skontu.

(66)

Billi d-distributuri u l-importaturi huma qrib tas-suq u jaqdu rwol importanti biex jiżguraw il-konformità tal-prodott, jenħtieġ li dawn ikunu involuti fil-kompiti tas-sorveljanza tas-suq li jitwettqu mill-awtoritajiet nazzjonali kompetenti, u jenħtieġ li dawn jitħejjew biex jipparteċipaw b’mod attiv, billi jipprovdu l-informazzjoni kollha neċessarja lil dawk l-awtoritajiet dwar il-prodott ikkonċernat.

(67)

Peress li n-negozjanti joffru prodotti għall-bejgħ, kiri jew lokazzjoni b’opzjoni ta’ xiri, jew juru prodotti lill-klijenti jew lill-installaturi, in-negozjanti jeħtieġ li jiżguraw li l-klijenti tagħhom, inklużi l-klijenti potenzjali, ikunu jistgħu jaċċessaw b’mod effettiv l-informazzjoni meħtieġa fl-ambitu ta’ dan ir-Regolament, inkluż fil-każ ta’ bejgħ mill-bogħod. B’mod partikolari, dan ir-Regolament jenħtieġ li jirrikjedi li n-negozjanti jiżguraw li l-passaport diġitali tal-prodotti jkun aċċessibbli għall-klijenti tagħhom, inklużi l-klijenti potenzjali, u li t-tikketti jintwerew b’mod ċar, f’konformità mar-rekwiżiti applikabbli. In-negozjanti jenħtieġ li jikkonformaw ma’ dak l-obbligu kull darba li prodott jiġi offrut għall-bejgħ, għall-kiri jew għal lokazzjoni b’opzjoni ta’ xiri.

(68)

Biex tiġi ffaċilitata l-għażla ta’ prodotti aktar sostenibbli, it-tikketti, meta meħtieġ, jenħtieġ li jintwerew b’mod viżibbli u identifikabbli b’mod ċar. Jenħtieġ li jkunu identifikabbli bħala t-tikketti li jappartjenu għall-prodott inkwistjoni, mingħajr ma l-klijenti, inkluż l-klijenti potenzjali, jkollhom jaqraw l-isem tad-ditta u n-numru tal-mudell fuq it-tikketti. It-tikketti jenħtieġ li jattiraw l-attenzjoni tal-klijenti li jkun qed ifittex qalb il-prodotti murija. Biex jiġi żgurat li t-tikketti ikunu aċċessibbli għall-klijenti meta jkunu qed jikkunsidraw li jixtru prodott, kemm in-negozjant kif ukoll l-operatur ekonomiku responsabbli jenħtieġ li juruhom kull meta jirreklamaw il-prodott, anke f’każijiet ta’ bejgħ mill-bogħod, inkluż online.

(69)

L-importaturi jew id-distributuri li jew iqiegħdu fis-suq prodott kopert minn att delegat adottat skont dan ir-Regolament bl-isem jew bit-trademark tagħhom stess, inkella jimmodifikaw tali prodott qabel ma jitqiegħed fis-servizz b’tali mod li tista’ tiġi affettwata l-konformità ma’ dan ir-Regolament jew mal-att delegat rilevanti, jenħtieġ li jitqies bħala l-manifattur u jenħtieġ li jassumi l-obbligi tal-manifattur.

(70)

Il-fornituri tas-swieq online jaqdu rwol kruċjali fil-katina tal-provvista, u b’hekk jippermettu lill-operaturi ekonomiċi jilħqu għadd kbir ta’ klijenti. Minħabba r-rwol importanti tagħhom bħala intermedjarji bejn l-operaturi ekonomiċi u l-klijenti fil-bejgħ tal-prodotti, il-fornituri tas-swieq online jenħtieġ li jassumu r-responsabbiltà li jindirizzaw il-bejgħ ta’ prodotti li ma jikkonformawx mar-rekwiżiti tal-ekodisinn u jenħtieġ li jikkooperaw mal-awtoritajiet tas-sorveljanza tas-suq. Id-Direttiva 2000/31/KE tal-Parlament Ewropew u tal-Kunsill (43) tipprovdi l-qafas ġenerali għall-kummerċ elettroniku u tistabbilixxi ċerti obbligi għall-pjattaformi online. Ir-Regolament (UE) 2065/2065 tal-Parlament Ewropew u tal-Kunsill (44) jirregola r-responsabbiltà u l-obbligu ta’ rendikont tal-fornituri ta’ servizzi intermedjarji online fir-rigward ta’ kontenut illegali, inklużi prodotti li ma jikkonformawx mar-rekwiżiti tal-ekodisinn. Filwaqt li titkompla l-ħidma abbażi ta’ dak il-qafas ġenerali, jenħtieġ li jiddaħħlu rekwiżiti speċifiċi biex jiġi indirizzat b’mod effettiv il-bejgħ online ta’ prodotti mhux konformi.

(71)

Huwa essenzjali li l-fornituri tas-swieq online jikkooperaw mill-qrib mal-awtoritajiet tas-sorveljanza tas-suq. L-obbligu ta’ kooperazzjoni mal-awtoritajiet tas-sorveljanza tas-suq huwa impost fuq il-fornituri tas-servizzi tas-soċjetà tal-informazzjoni skont l-Artikolu 7(2) tar-Regolament (UE) 2019/1020 tal-Parlament Ewropew u tal-Kunsill (45) fir-rigward ta’ prodotti koperti minn dak ir-Regolament, inklużi prodotti li għalihom huma stabbiliti rekwiżiti tal-ekodisinn fl-ambitu ta’ dan ir-Regolament. Għal dak il-għan, jenħtieġ li japplikaw, l-obbligi ġenerali kif stabbiliti fil-Kapitolu IV tar-Regolament (UE) 2022/2065, b’mod partikolari l-obbligu relatat mal-konformità fil-livell tad-disinn għall-fornituri tas-swieq online fl-Artikolu 31 tar-Regolament (UE) 2022/2065. Għall-finijiet tal-Artikolu 31(3) tar-Regolament (UE) 2022/2065, jenħtieġ li l-fornituri tas-swieq online jużaw, fost l-oħrajn, l-informazzjoni għad-dispożizzjoni fl-interfaċċja pubblika tal-utenti tas-sistema ta’ informazzjoni u komunikazzjoni msemmija fir-Regolament (UE) 2019/1020. Il-fornituri tas-swieq online jenħtieġ li jikkooperaw ukoll mal-awtoritajiet tas-sorveljanza tas-suq biex jindirizzaw kontenut illegali relatat ma’ prodotti mhux konformi. Azzjonijiet fil-qafas ta’ dik il-kooperazzjoni jenħtieġ li jinkludu l-istabbiliment ta’ skambju regolari u strutturat ta’ informazzjoni dwar l-azzjoni meħuda mill-fornituri tas-swieq online, inkluża t-tneħħija ta’ offerti tal-prodott. Il-fornituri tas-swieq online jenħtieġ li jagħtu wkoll aċċess għall-interfaċċji tagħhom biex jgħinu lill-awtoritajiet tas-sorveljanza jidentifikaw prodotti mhux konformi mibjugħa online. Barra minn hekk, huwa possibbli li l-awtoritajiet tas-sorveljanza tas-suq ikollhom bżonn ukoll li jiġbru xi data mis-swieq online.

(72)

L-Artikolu 14 tar-Regolament (UE) 2019/1020 jagħti lill-awtoritajiet tas-sorveljanza tas-suq is-setgħa, meta ma jkun hemm l-ebda mezz effettiv ieħor disponibbli biex jiġi eliminat riskju serju, li jirrikjedu t-tneħħija tal-kontenut li jirreferi għall-prodotti mhux konformi minn interfaċċja online. Is-setgħat fdati lill-awtoritajiet tas-sorveljanza tas-suq mill-Artikolu 14 ta’ dak ir-Regolament jenħtieġ li japplikaw ukoll fil-kuntest ta’ dan ir-Regolament. Madankollu, għas-sorveljanza effettiva tas-suq fl-ambitu ta’ dan ir-Regolament u biex ikun evitat li l-prodotti mhux konformi jkunu preżenti fis-suq tal-Unjoni, jenħtieġ li dawk is-setgħat japplikaw fil-każijiet kollha meħtieġa u proporzjonati, inkluż għall-prodotti li joħolqu riskju mhux daqstant serju. Dawk is-setgħat jenħtieġ li jiġu eżerċitati f’konformità mal-Artikolu 9 tar-Regolament (UE) 2022/2065.

(73)

L-iżgurar tat-traċċabbiltà ta’ prodott tul il-katina kollha tal-provvista jiffaċilita l-kompitu tal-awtoritajiet tas-sorveljanza tas-suq li jittraċċaw lill-operaturi ekonomiċi li jkunu qiegħdu fis-suq jew li jkunu għamlu disponibbli fis-suq prodotti mhux konformi. Għalhekk, jenħtieġ li l-operaturi ekonomiċi jkunu meħtieġa jżommu l-informazzjoni dwar it-tranżazzjonijiet tagħhom għal ċertu perjodu ta’ żmien.

(74)

Biex titħaffef u tiġi ffaċilitata l-verifika tal-konformità tal-prodotti mqiegħda fis-suq, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE biex tissupplimenta dan ir-Regolament billi tirrikjedi li l-operaturi ekonomiċi, meta meħtieġ, jagħmlu partijiet speċifiċi tad-dokumentazzjoni teknika disponibbli b’mod diġitali kemm għall-awtoritajiet nazzjonali kompetenti kif ukoll għall-Kummissjoni. Dan ikun jippermetti lill-awtoritajiet nazzjonali kompetenti jaċċessaw tali informazzjoni mingħajr talba, filwaqt li jkompli jiggarantixxi l-protezzjoni tas-sigrieti kummerċjali u tad-drittijiet ta’ proprjetà intellettwali. Mezzi possibbli biex tali informazzjoni ssir disponibbli b’mod diġitali jenħtieġ li bħala regola jinkludu passaport diġitali tal-prodotti, jew permezz tal-inklużjoni fil-parti tal-konformità tal-bażi tad-data tal-prodotti msemmija fir-Regolament (UE) 2017/1369, jew fuq sit web tal-operatur ekonomiku. Tali obbligu jenħtieġ li ma jneħħix mid-dritt tal-awtoritajiet nazzjonali kompetenti li jaċċessaw partijiet oħra tad-dokumentazzjoni teknika fuq talba.

(75)

Sabiex tkun tista’ ssir stima aħjar tal-penetrazzjoni fis-suq tal-prodotti rilevanti, biex l-istudji li jikkontribwixxu għall-abbozzar jew għall-aġġornament tar-rekwiżiti tal-ekodisinn u tal-pjanijiet ta’ ħidma jkunu aktar infurmati, u biex tiġi megħjuna l-identifikazzjoni tas-sehem mis-suq ta’ gruppi ta’ prodotti speċifiċi sabiex jitħaffu l-formulazzjoni jew ir-rieżami tar-rekwiżiti tal-ekodisinn, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE biex tissupplimenta dan ir-Regolament billi tirrikjedi l-ġbir ta’ data adegwata u affidabbli dwar il-bejgħ tal-prodotti, billi tippermetti l-ġbir ta’ tali data mill-Kummissjoni jew f’isimha direttament mingħand il-manifatturi jew il-bejjiegħa bl-imnut. Meta tadotta regoli dwar il-monitoraġġ u r-rapportar, il-Kummissjoni jenħtieġ li tqis il-ħtieġa li tiġi massimizzata d-data disponibbli dwar il-penetrazzjoni tas-suq u l-ħtieġa li jiġi minimizzat il-piż amministrattiv għall-operaturi ekonomiċi speċjalment għall-SMEs.

(76)

Sabiex ittejjeb ir-rekwiżiti futuri tal-ekodisinn u ttejjeb il-fiduċja tal-utenti finali fir-rigward tal-identifikazzjoni u tal-korrezzjoni ta’ devjazzjonijiet bejn il-parametri tal-enerġija fl-użu u parametri oħra tal-prestazzjoni meta mkejla taħt kundizzjonijiet ta’ ttestjar u l-funzjonament reali, il-Kummissjoni jenħtieġ li jkollha aċċess għal data data ta’ natura mhux personali dwar il-konsum reali tal-enerġija tal-prodotti waqt l-użu u meta rilevanti għal parametri oħra tal-prestazzjoni. Għal dak il-għan, jenħtieġ li tiġi delegata lill-Kummissjoni s-setgħa li tadotta atti delegati skont l-Artikolu 290 tat-TFUE biex tissupplimenta dan ir-Regolament billi tirrikjedi li prodotti individwali, b’mod simili għall-vetturi tat-triq, jirreġistraw il-konsum tal-enerġija waqt l-użu tagħhom u l-parametri ta’ prestazzjoni rilevanti oħra u juru d-data relatata lill-utent finali. Għall-prodotti konnessi mal-internet, jenħtieġ li tiġi delegata lill-Kummissjoni s-setgħa li tadotta atti delegati biex tissupplimenta dan ir-Regolament billi tirrikjedi li l-operaturi ekonomiċi jiġbru b’mod remot data ta’ natura mhux personali waqt l-użu u jirrapportaw tali data lill-Kummissjoni, peress li huwa essenzjali li tiġi identifikata l-prestazzjoni tal-prodotti u li l-pubbliku jiġi infurmat. Għal prodotti li l-prestazzjoni tagħhom fl-użu tiddependi b’mod sinifikanti wkoll minn kundizzjonijiet klimatiċi jew ġeografiċi, jenħtieġ li tinġabar, tiġi rrapportata informazzjoni klimatika jew ġeografika ġenerali wkoll, b’tali mod li ma jippermettix id-determinazzjoni tal-pożizzjoni ġeografika speċifika tal-individwi u tal-apparati. L-utenti finali jenħtieġ li jagħtu espressament il-kunsens tagħhom għall-ġbir ta’ informazzjoni li jqisu xierqa li jikkondividu. Il-ġbir ta’ informazzjoni dwar l-imġiba tal-apparati li jseħħ f’kuntest li fih individwu jista’ raġonevolment jistenna li ma tkun qed issir l-ebda osservazzjoni jew reġistrazzjoni, jew ġbir ta’ informazzjoni li jista’ jipprovdi jew li jista’ jippermetti l-identifikazzjoni ta’ individwi jew l-inferenza tal-imġiba tagħhom jenħtieġ li ma jkunx permess.

(77)

Sabiex tgħin biex tiġi ffaċilitata l-verifika tal-konformità mar-rekwiżiti tal-ekodisinn, inkluż biex jiġu ffaċilitati l-valutazzjoni tal-konformità u s-sorveljanza tas-suq, jenħtieġ li l-Kummissjoni tingħata s-setgħa li tirrikjedi, meta jkun debitament ġustifikat, li l-atturi fil-katina tal-provvista jagħtu, mingħajr ħlas, informazzjoni dwar dak li jipprovdu, bħall-kwantità u t-tip jew il-kompożizzjoni kimika tal-materjali użati jew il-proċess ta’ produzzjoni użat, jew informazzjoni dwar il-kundizzjonijiet tal-forniment tas-servizzi tagħhom. Jenħtieġ li jkun possibbli wkoll li l-manifatturi jitħallew ikollhom aċċess għad-dokumenti li jkun fihom tali informazzjoni jew għall-faċilitajiet proprji tal-atturi fil-katina tal-provvista sabiex ikunu jistgħu jaċċessaw direttament l-informazzjoni meħtieġa jekk l-atturi fil-katina tal-provvista ma jagħtux l-informazzjoni mitluba fi żmien raġonevoli. Jenħtieġ ukoll li l-Kummissjoni tingħata s-setgħa li tippermetti lill-korpi nnotifikati u lill-awtoritajiet nazzjonali jivverifikaw il-preċiżjoni tal-informazzjoni relatata mal-attivitajiet tal-atturi fil-katina tal-provvista.

(78)

Sabiex tiġi żgurata l-applikazzjoni effettiva u armonizzata tar-rekwiżiti tal-ekodisinn stabbiliti fl-ambitu ta’ dan ir-Regolament, inkluż dwar aspetti bħall-użu tal-enerġija jew l-effiċjenza enerġetika, id-durabbiltà u l-affidabbiltà, u l-kontenut riċiklat, il-konformità ma’ dawk ir-rekwiżiti jenħtieġ li titkejjel bl-użu ta’ metodi affidabbli, preċiżi u riproduċibbli li jqisu l-metodi l-aktar avvanzati rikonoxxuti b’mod ġenerali. L-atti delegati li jistabbilixxu r-rekwiżiti tal-ekodisinn għall-prodotti jenħtieġ li bħala regola jinkludu l-ispeċifikazzjonijiet għat-testijiet, il-kejl jew il-kalkoli meħtieġa biex tiġi stabbilita jew ivverifikata l-konformità. Barra minn hekk, jenħtieġ li tiġi delegata lill-Kummissjoni s-setgħa li tadotta atti f’konformità mal-Artikolu 290 tat-TFUE biex tissupplimenta dan ir-Regolament billi tirrikjedi l-użu ta’ għodod diġitali li jirriflettu r-rekwiżiti ta’ kalkolu applikabbli, sabiex tiġi żgurata l-applikazzjoni armonizzata tagħhom.

(79)

Sabiex jiġi żgurat li r-rekwiżiti tal-ekodisinn jiksbu l-effetti maħsuba tagħhom, dan ir-Regolament jenħtieġ li jistabbilixxi dispożizzjonijiet komprensivi u ġenerali li huma applikabbli għall-prodotti kollha koperti mir-rekwiżiti tal-ekodisinn u jipprojbixxi ċ-ċirkomvenzjoni ta’ tali rekwiżiti. Għalhekk, kwalunkwe prattika li twassal għal bidla mhux ġustifikata fil-prestazzjoni tal-prodott matul l-ittestjar tal-konformità jew fi żmien perjodu qasir wara li l-prodott jitqiegħed fis-servizz, li twassal għal prestazzjoni ddikjarata li tirrappreżenta ħażin il-prestazzjoni reali tal-prodott waqt l-użu jenħtieġ li tiġi pprojbita.

(80)

Fejn xieraq, jenħtieġ li jkun possibbli li l-atti delegati li jistabbilixxu r-rekwiżiti tal-ekodisinn jirreferu għall-użu ta’ standards biex tiġi stabbilita jew ivverifikata l-konformità. Sabiex jiġi żgurat li ma jkunx hemm ostakli għall-kummerċ fis-suq intern, jenħtieġ li tali standards jiġu armonizzati fil-livell tal-Unjoni. Ladarba tkun ġiet adottata referenza għal tali standards f’konformità mar-Regolament (UE) Nru 1025/2012 tal-Parlament Ewropew u tal-Kunsill (46) u ppubblikata f’Il-Ġurnal Uffiċjali tal-Unjoni Ewropea, il-prodotti f’konformità ma’ tali standards jenħtieġ li jitqiesu f’konformità mar-rekwiżiti tal-ekodisinn adottati skont dan ir-Regolament sal-punt li jkunu koperti mill-istandards armonizzati rilevanti. Bl-istess mod, il-metodi għat-testijiet, il-kejl jew il-kalkolu li jkunu f’konformità mal-istandards armonizzati jenħtieġ li jitqiesu f’konformità mar-rekwiżitigħal metodi ta’ testjar, kejl u kalkolu stabbiliti fl-atti delegati rilevanti li jistabbilixxu r-rekwiżiti tal-ekodisinn, sa fejn ikunu koperti mill-istandards armonizzati rilevanti.

(81)

Il-qafas ta’ standardizzazzjoni attwali tal-Unjoni, li huwa bbażat fuq il-prinċipji ta’ Approċċ Ġdid stabbiliti fir-Riżoluzzjoni tal-Kunsill tas-7 ta’ Mejju 1985 dwar approċċ ġdid għall-armonizzazzjoni teknika u l-istandards (47) u fuq ir-Regolament (UE) Nru 1025/2012, jirrappreżenta l-qafas awtomatiku biex jiġu mfassla standards li jipprevedu għal preżunzjoni ta’ konformità mar-rekwiżiti rilevanti stabbiliti f’dan ir-Regolament. Fin-nuqqas ta’ referenzi rilevanti għall-istandards armonizzati, jenħtieġ li l-Kummissjoni tkun tista’ tadotta atti ta’ implimentazzjoni li jistabbilixxu speċifikazzjonijiet komuni, bħala soluzzjoni ta’ riżerva eċċezzjonali biex tiġi ffaċilitata l-konformità mar-rekwiżiti tal-ekodisinn mill-manifattur, pereżempju meta l-proċess ta’ standardizzazzjoni jiġi mblukkat minħabba nuqqas ta’ kunsens bejn il-partijiet ikkonċernati jew meta jkun hemm dewmien fl-istabbiliment ta’ standard armonizzat u l-iskadenza preskritta ma tkunx tista’ tiġi rispettata. Tali dewmien jista’ pereżempju jseħħ meta ma tintlaħaqx il-kwalità meħtieġa. Barra minn hekk, ir-rikors għal din is-soluzzjoni jenħtieġ li jkun possibbli meta l-Kummissjoni tkun irrestrinġiet jew irtirat ir-referenzi għall-istandards armonizzati rilevanti f’konformità mar-Regolament (UE) Nru 1025/2012. Il-konformità mal-ispeċifikazzjonijiet komuni jenħtieġ li tagħti lok ukoll għall-preżunzjoni tal-konformità. Sabiex tiġi żgurata l-effiċjenza, jenħtieġ li l-Kummissjoni tinvolvi lill-partijiet ikkonċernati rilevanti fil-proċess tal-istabbiliment ta’ speċifikazzjonijiet komuni li jkopru r-rekwiżiti tal-ekodisinn ta’ dan ir-Regolament.

(82)

Sabiex l-operaturi ekonomiċi jkunu jistgħu juru, u l-awtoritajiet kompetenti jkunu jistgħu jivverifikaw, li l-prodotti mqiegħda fis-suq jikkonformaw mar-rekwiżiti tal-ekodisinn adottati skont dan ir-Regolament, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE biex tissupplimenta dan ir-Regolament billi tistabbilixxi proċeduri ta’ valutazzjoni tal-konformità li huma xierqa u proporzjonati għan-natura tal-prodott ikkonċernat u tal-parametri tal-prodott regolati. Biex tiġi żgurata l-konsistenza ma’ liġijiet oħra tal-Unjoni, il-proċeduri ta’ valutazzjoni tal-konformità jenħtieġ li jintgħażlu minn fost dawk tal-modulu ta’ kontroll intern tal-produzzjoni inkluż f’dan ir-Regolament u tal-moduli inklużi fid-Deċiżjoni Nru 768/2008/KE tal-Parlament Ewropew u tal-Kunsill (48), li jvarjaw mill-anqas stretti għall-aktar stretti. Biex jiġi żgurat aktar li l-modulu applikabbli jkun xieraq u proporzjonat għan-natura tal-prodott ikkonċernat u għall-parametri tal-prodott regolati, jenħtieġ li l-Kummissjoni, fejn meħtieġ, tadatta l-modulu magħżul b’mod xieraq.

(83)

Jenħtieġ li l-manifatturi jfasslu dikjarazzjoni ta’ konformità tal-UE biex jipprovdu informazzjoni dwar il-konformità tal-prodotti ma’ dan ir-Regolament. Il-manifatturi jistgħu jkunu meħtieġa wkoll, minn liġijiet oħra tal-Unjoni, ifasslu dikjarazzjoni ta’ konformità tal-UE. Biex jiġi żgurat aċċess effettiv għall-informazzjoni għal finijiet ta’ sorveljanza tas-suq, jenħtieġ li titfassal dikjarazzjoni ta’ konformità unika tal-UE fir-rigward tal-liġijiet kollha tal-Unjoni. Biex jitnaqqas il-piż amministrattiv fuq l-operaturi ekonomiċi, jenħtieġ li jkun possibbli li dik id-dikjarazzjoni ta’ konformità unika tal-UE tkun dossier magħmul minn dikjarazzjonijiet individwali rilevanti ta’ konformità tal-UE.

(84)

Ir-Regolament (KE) Nru 765/2008 tal-Parlament Ewropew u tal-Kunsill (49) jistabbilixxi regoli dwar l-akkreditament tal-korpi ta’ valutazzjoni tal-konformitàu jistabbilixxi prinċipji ġenerali li jirregolaw il-markatura CE u r-relazzjoni tagħha ma’ markaturi oħra. Jenħtieġ li dak ir-Regolament ikun applikabbli għall-prodotti koperti minn dan ir-Regolament sabiex jiġi żgurat li l-prodotti li jibbenefikaw mill-moviment liberu tal-merkanzija fl-Unjoni jissodisfaw ir-rekwiżiti li jipprovdu livell għoli ta’ protezzjoni tal-interessi pubbliċi bħas-saħħa tal-bniedem, is-sikurezza u l-ambjent. Meta jkunu ġew adottati rekwiżiti tal-ekodisinn għal prodott, il-markatura CE jenħtieġ li tindika l-konformità ta’ dak il-prodott ma’ dan ir-Regolament u r-rekwiżiti tal-ekodisinn adottati skont dan, sa fejn dawn ikunu relatati mal-prodott. Meta jitqies li dan ir-Regolament jipprevedi l-istabbiliment ta’ rekwiżiti tal-ekodisinn għal firxa kbira ta’ prodotti, jenħtieġ li l-atti delegati li jistabbilixxu dawk ir-rekwiżiti jistabbilixxu regoli dwar il-markatura tal-konformità fir-rigward tar-rekwiżiti tal-ekodisinn sabiex tiġi żgurata l-konsistenza mar-rekwiżiti fl-ambitu tal-liġi tal-Unjoni applikabbli għall-prodotti koperti, tipprevjeni l-konfużjoni ma’ markaturi oħra u timminimizza l-piż amministrattiv fuq l-operaturi ekonomiċi.

(85)

Uħud mill-moduli ta’ valutazzjoni tal-konformità stabbiliti fid-Deċiżjoni Nru 768/2008/KE jirrikjedu l-intervent tal-korpi ta’ valutazzjoni tal-konformità. Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, jenħtieġ li dawk il-korpi jiġu notifikati lill-Kummissjoni mill-awtoritajiet tal-Istati Membri.

(86)

Sabiex jiġi żgurat livell konsistenti ta’ kwalità fit-twettiq tal-valutazzjoni tal-konformità, jeħtieġ li jiġu stabbiliti rekwiżiti għall-awtoritajiet tan-notifika involuti fil-valutazzjoni, fin-notifika u fil-monitoraġġ tal-korpi nnotifikati. B’mod partikolari, jenħtieġ li l-Istati Membri jiżguraw li l-awtorità tan-notifika tkun oġġettiva u imparzjali fir-rigward tal-attività tagħha. Barra minn hekk, jenħtieġ li l-awtoritajiet tan-notifika jkunu meħtieġa jissalvagwardjaw il-kunfidenzjalità tal-informazzjoni li jiksbu, iżda jenħtieġ ukoll li jkunu jistgħu jiskambjaw informazzjoni dwar il-korpi nnotifikati mal-awtoritajiet nazzjonali, mal-awtoritajiet tan-notifika ta’ Stati Membri oħra u mal-Kummissjoni biex tiġi żgurata l-konsistenza fil-valutazzjoni tal-konformità. Biex jiġu stabbiliti u mmonitorjati b’mod effettiv il-kompetenza u l-indipendenza tal-korpi applikanti, l-awtoritajiet tan-notifika jenħtieġ li jivvalutaw biss il-korp ġuridiku speċifiku li japplika għan-notifika, mingħajr ma jqisu l-kredenzjali tal-kumpaniji prinċipali jew oħt. Għall-istess raġuni, l-awtoritajiet tan-notifika jenħtieġ li jivvalutaw lill-korpi applikanti b’relazzjoni mar-rekwiżiti u l-kompiti ta’ valutazzjoni tal-konformità rilevanti kollha, abbażi ta’ standards armonizzati għar-rekwiżiti u kompiti koperti minn dawk l-istandards.

(87)

Minħabba r-rwol ċentrali tagħhom biex jiżguraw l-affidabbiltà tal-valutazzjonijiet tal-konformità fir-rigward tar-rekwiżiti tal-ekodisinn, huwa essenzjali li l-awtoritajiet tan-notifika jkollhom biżżejjed persunal kompetenti u finanzjament għad-dispożizzjoni tagħhom biex iwettqu l-kompiti tagħhom kif xieraq.

(88)

Huwa essenzjali li l-korpi nnotifikati kollha jwettqu l-funzjonijiet tagħhom fl-istess livell u taħt kundizzjonijiet ta’ kompetizzjoni u awtonomija ugwali. Għalhekk, jenħtieġ li jiġu stabbiliti rekwiżiti għall-korpi ta’ valutazzjoni tal-konformità li jixtiequ jiksbu l-istatus ta’ korp innotifikat sabiex jipprovdu attivitajiet ta’ valutazzjoni tal-konformità. Jenħtieġ li dawk ir-rekwiżiti jkomplu japplikaw biex jiġi żgurat li tinżamm il-kompetenza tal-korp innotifikat. Biex tkun żgurata l-awtonomija tiegħu, il-korp innotifikat u l-persunal li jimpjega jenħtieġ li jkunu mitluba jżommu l-indipendenza mill-operaturi ekonomiċi fil-katina tal-valur tal-prodotti li fir-rigward tagħhom ikun ġie notifikat u minn kumpaniji oħra, inklużi assoċjazzjonijiet tan-negozju u kumpaniji prinċipali u oħt, sussidjarji u sottokuntratturi.

(89)

Jekk korp ta’ valutazzjoni tal-konformità juri konformità mal-kriterji stabbiliti fi standards armonizzati, jenħtieġ li jiġi preżunt li jikkonforma mar-rekwiżiti korrispondenti stabbiliti f’dan ir-Regolament.

(90)

Il-korpi ta’ valutazzjoni tal-konformità sikwit jissottokuntrattaw partijiet mill-attivitajiet tagħhom marbuta mal-valutazzjoni tal-konformità jew jirrikorru għal sussidjarja. Biex jiġi żgurat li l-prodotti mqiegħda fis-suq tal-Unjoni jikkonformaw mar-rekwiżiti tal-ekodisinn, is-sottokuntratturi tal-valutazzjoni tal-konformità u s-sussidjarji jenħtieġ li jissodisfaw l-istess rekwiżiti bħall-korpi nnotifikati b’rabta mat-twettiq tal-kompiti ta’ valutazzjoni tal-konformità fl-ambitu ta’ dan ir-Regolament. Biex jiġi żgurat li dak ikun il-każ, il-korpi nnotifikati rilevanti jenħtieġ li jistabbilixxu proċeduri għall-monitoraġġ kontinwu tal-kompetenza, tal-attivitajiet u tal-prestazzjoni tas-sottokuntratturi jew tas-sussidjarji tagħhom, permezz ta’ pereżempju matriċi tal-kwalifiki.

(91)

Sabiex l-awtoritajiet tan-notifika jistabbilixxu u jimmonitorjaw il-kompetenza u l-indipendenza tal-korpi applikanti, il-korpi nnotifikati jenħtieġ li jkunu u jibqgħu awtonomi. Għalhekk, ċerti attivitajiet u proċessi ta’ teħid ta’ deċiżjonijiet, kemm fir-rigward tal-valutazzjoni tal-konformità tal-prodotti kif ukoll ta’ attivitajiet oħra interni għall-korp innotifikat, jenħtieġ li jitwettqu esklużivament mill-korp innotifikat individwali stess.

(92)

Biex jiġi ffaċilitat il-proċess tal-istabbiliment u tal-monitoraġġ tal-kompetenza u tal-indipendenza tal-korpi applikanti, jenħtieġ li l-korpi applikanti jipprovdu deskrizzjoni ta’ kif il-persunal rilevanti u l-istatus u l-kompiti ta’ dak il-persunal jikkorrispondu għall-kompiti tal-valutazzjoni tal-konformità, li fir-rigward ta’ dawk il-korp biħsiebhom jiġu nnotifikati, bħal pereżempju fil-forma ta’ matriċi tal-kwalifiki, biex b’hekk jippermettu lill-awtorità tan-notifika tivvaluta b’mod aktar effettiv l-adegwatezza tal-persunal u l-awtonomija kontinwa tal-korpi nnotifikati. Il-korpi nnotifikati jenħtieġ li jiżguraw rotazzjoni fost il-persunal li jwettaq kompiti differenti ta’ valutazzjoni tal-konformità.

(93)

Billi s-servizzi offruti mill-korpi nnotifikati fi Stat Membru jafu jkunu relatati ma’ prodotti mqiegħda fis-suq fl-Unjoni kollha, huwa xieraq li l-Istati Membri l-oħra u l-Kummissjoni jingħataw l-opportunità li jqajmu oġġezzjonijiet rigward korp innotifikat.

(94)

Sabiex tiġi ffaċilitata u aċċellerata l-proċedura ta’ valutazzjoni tal-konformità, u jiġi żgurat trattament ugwali għall-operaturi ekonomiċi, huwa kruċjali li l-korpi nnotifikati japplikaw il-proċeduri ta’ valutazzjoni tal-konformità b’mod konsistenti u mingħajr ma joħolqu piż żejjed għall-operaturi ekonomiċi.

(95)

Qabel ma tittieħed deċiżjoni finali dwar jekk il-prodott jistax jingħata ċertifikat ta’ konformità, jenħtieġ li l-operatur ekonomiku li jkun jixtieq iqiegħed dak il-prodott fis-suq jitħalla jissupplimenta d-dokumentazzjoni rilevanti darba biss. Din il-limitazzjoni hija meħtieġa biex jiġi żgurat li l-korpi nnotifikati ma jkunux jistgħu jassistu lill-manifatturi biex jagħmlu bidliet sa ma tinkiseb il-konformità, għax dan ikun ifisser li s-servizz ipprovdut ikun simili għal servizz ta’ konsultazzjoni u fil-prattika jista’ jdgħajjef in-natura ta’ interess pubbliku tal-kompiti tal-korpi nnotifikati. Fejn xieraq, il-korpi nnotifikati jenħtieġ li jkunu jistgħu wkoll jirrestrinġu, jissospendu jew jirtiraw kwalunkwe ċertifikat jew deċiżjoni ta’ approvazzjoni.

(96)

Biex jiġu ffaċilitati l-identifikazzjoni u s-soluzzjoni ta’ każijiet ta’ nuqqas ta’ konformità tal-korpi nnotifikati, tal-manifatturi jew tal-prodotti, il-korpi nnotifikati jenħtieġ li jgħaddu b’mod proattiv l-informazzjoni rilevanti għad-dispożizzjoni tagħhom lill-awtoritajiet tan-notifika jew lill-awtoritajiet tas-sorveljanza tas-suq.

(97)

Huwa essenzjali li jiġi żgurat skambju effiċjenti ta’ informazzjoni bejn il-korpi nnotifikati u l-awtoritajiet tas-sorveljanza tas-suq, inkluż minn Stati Membri oħra. Għal dak il-għan, jenħtieġ li l-awtoritajiet tan-notifika u l-korpi nnotifikati jiżguraw is-segwitu għal talbiet għall-informazzjoni mingħand l-awtoritajiet tas-sorveljanza tas-suq.

(98)

Jenħtieġ li l-Kummissjoni tippermetti koordinazzjoni u kooperazzjoni xierqa bejn il-korpi nnotifikati. Biex tiġi żgurata l-applikazzjoni armonizzata tar-rekwiżiti tal-ekodisinn, il-korpi nnotifikati jenħtieġ li jiddiskutu suġġetti ta’ diverġenza possibbli u jikkoordinaw dwarhom. F’dak il-proċess, jenħtieġ li jqisu kwalunkwe gwida u rakkomandazzjoni rilevanti maħruġa mill-kumitati tekniċi kompetenti tal-korpi Ewropej tal-istandardizzazzjoni.

(99)

Sabiex il-konsumaturi jiġu inċentivati jagħmlu għażliet sostenibbli, b’mod partikolari meta l-prodotti li jkunu aktar sostenibbli ma jkunux affordabbli biżżejjed, jistgħu jiġu previsti mekkaniżmi bħall-eco-vouchers u t-tassazzjoni ekoloġika. Meta l-Istati Membri jiddeċiedu li jagħmlu użu minn inċentivi biex jippremjaw il-prodotti bl-aħjar prestazzjoni, jenħtieġ li jagħmlu dan billi jimmiraw dawk l-inċentivi lejn l-aktar żewġ klassijiet ta’ prestazzjoni ppopolati li ġew stabbiliti mill-atti delegati adottati skont dan ir-Regolament, mhux neċessarjament meħuda b’mod kumulattiv, f’każ li xi klassijiet tal-prestazzjoni jiġu stabbiliti b’rabta ma’ aktar minn parametru wieħed. Għall-prodotti relatati mal-enerġija koperti mir-Regolament (UE) 2017/1369 jew għat-tajers koperti minn rekwiżiti tat-tikkettar fir-rigward tal-effiċjenza fl-użu tal-fjuwils u parametri oħra fl-ambitu tar-Regolament (UE) 2020/740 tal-Parlament Ewropew u tal-Kunsill (50), il-kriterji stabbiliti fl-ambitu ta’ dawn iż-żewġ strumenti jenħtieġ li japplikaw minflok dawk skont dan ir-Regolament. Madankollu, l-Istati Membri jenħtieġ li ma jkunux jistgħu jipprojbixxu t-tqegħid fis-suq ta’ prodott abbażi tal-klassi ta’ prestazzjoni tiegħu. L-introduzzjoni ta’ inċentivi tal-Istati Membri jenħtieġ li tkun mingħajr preġudizzju għall-applikazzjoni tar-regoli tal-Unjoni dwar l-għajnuna mill-Istat.

(100)

L-akkwist pubbliku jammonta għal 14 % tal-PDG tal-Unjoni. Biex jikkontribwixxu għall-objettiv li tintlaħaq in-newtralità klimatika, tittejjeb l-effiċjenza enerġetika u l-effiċjenza fir-riżorsi u t-tranżizzjoni lejn ekonomija ċirkolari li tipproteġi s-saħħa pubblika u l-bijodiversità, billi jiżguraw li jkun hemm biżżejjed domanda għal prodotti aktar ambjentalment sostenibbli, l-awtoritajiet kontraenti u l-entitajiet kontraenti jenħtieġ li, fejn xieraq, jallinjaw l-akkwist tagħhom ma’ rekwiżiti speċifiċi tal-akkwist pubbliku ekoloġiku. Meta mqabbla ma’ approċċ volontarju, rekwiżiti obbligatorji ta’ akkwist pubbliku ekoloġiku se jiżguraw li jiġi massimizzat l-ingranaġġ tal-infiq pubbliku biex tingħata spinta lid-domanda għal prodotti bi prestazzjoni aħjar. Huwa importanti li l-Istati Membri jipprovdu assistenza lill-awtoritajiet kontraenti nazzjonali biex itejbu l-ħiliet tal-persunal inkarigat mill-akkwist pubbliku ekoloġiku u jħarrġu lil tali persunal mill-ġdid. Dawk ir-rekwiżiti tal-akkwist pubbliku ekoloġiku jenħtieġ li jkunu rekwiżiti minimi, li jfisser li l-awtoritajiet kontraenti u l-entitajiet kontraenti jenħtieġ li jkunu jistgħu jistabbilixxu rekwiżiti addizzjonali u aktar eżiġenti. Dawk ir-rekwiżiti jenħtieġ li jkunu trasparenti, oġġettivi u mhux diskriminatorji. Il-proċedura tal-akkwist pubbliku jenħtieġ li titwettaq mill-awtoritajiet kontraenti u mill-entitajiet kontraenti f’konformità mad-Direttivi 2014/24/UE (51) u 2014/25/UE (52) tal-Parlament Ewropew u tal-Kunsill, u mal-leġiżlazzjoni settorjali applikabbli, kif ukoll mal-impenji internazzjonali tal-Unjoni, inkluż il-Ftehim dwar l-Akkwist Pubbliku u ftehimiet internazzjonali oħra li l-Unjoni hija marbuta bihom. Dawk ir-rekwiżiti huma mingħajr preġudizzju għall-possibbiltà li l-awtoritajiet kontraenti u l-entitajiet kontraenti jiddependu fuq derogi jew eżenzjonijiet fir-rigward ta’ kuntratti pubbliċi stabbiliti fil-liġi tal-Unjoni, b’mod partikolari d-Direttivi 2014/24/UE u 2014/25/UE. Ir-rekwiżiti stabbiliti għal gruppi ta’ prodotti speċifiċi jenħtieġ li jiġu rispettati mhux biss meta dawk il-prodotti jinxtraw direttament f’kuntratti pubbliċi ta’ provvista iżda wkoll f’kuntratti pubbliċi ta’ xogħlijiet jew ta’ servizzi pubbliċi, meta dawk il-prodotti jkunu se jintużaw għal attivitajiet li jikkostitwixxu s-suġġett ta’ dawk il-kuntratti. Dawk ir-rekwiżiti jenħtieġ li jiġu stabbiliti fir-rigward tal-aspetti tal-prodotti indirizzati fl-att delegat li jirregola l-prodotti inkwistjoni. Bħala parti minn dawk ir-rekwiżiti, il-Kummissjoni jaf tistabbilixxi speċifikazzjonijiet tekniċi obbligatorji minimi li jirrikjedu li l-prodotti jikkonformaw mal-aħjar livelli ta’ prestazzjoni possibbli kif stabbilit fl-atti delegati rilevanti, inkluż meta disponibbli mal-ogħla żewġ klassijiet ta’ prestazzjoni jew ta’ punteġġi. B’riżultat ta’ dan, pereżempju, ikun obbligatorju għall-awtoritajiet kontraenti u għall-entitajiet kontraenti li jirrikjedu li l-prodotti tal-offerenti jissodisfaw rekwiżiti speċifiċi tal-impronta tal-karbonju. F’konformità mal-qafas tal-akkwist pubbliku, jenħtieġ li dawk l-ispeċifikazzjonijiet tekniċi obbligatorji minimi jevitaw li jnaqqsu l-kompetizzjoni b’mod artifiċjali u jevitaw li jiffavorixxu operatur ekonomiku speċifiku.Il-Kummissjoni jaf tistabbilixxi wkoll kriterji minimi obbligatorji għall-aġġudikazzjoni inkluża l-assenjazzjoni ta’ ponderazzjoni speċifika, bejn 15 % u 30 %, għal dawk il-kriterji bl-iskop li jiġi żgurat li dawn ikunu jistgħu jinfluwenzaw b’mod sinifikanti l-għażla tal-prodotti favur dawk li jkunu l-aktar ambjentalment sostenibbli. B’riżultat ta’ dan, pereżempju, ikun obbligatorju għall-awtoritajiet kontraenti u għall-entitajiet kontraenti li jagħtu lill-kontenut riċiklat tal-prodotti inkwistjoni ponderazzjoni minima bejn 20 % u 30 %. B’konsegwenza ta’ dan, l-awtoritajiet kontraenti u l-entitajiet kontraenti, fil-proċedura speċifika tal-aġġudikazzjoni, ikollhom il-possibbiltà li jassenjaw ponderazzjoni ogħla minn 30 %, iżda mhux anqas minn 20 % għall-kontenut riċiklat. Jenħtieġ li tingħata preferenza lill-kriterji għall-aġġudikazzjoni fuq l-ispeċifikazzjonijiet tekniċi meta jkun hemm inċertezzi dwar id-disponibbiltà jew il-kost tal-prodotti bl-ogħla prestazzjoni fis-suq tal-Unjoni. Il-Kummissjoni jaf tistabbilixxi wkoll kundizzjonijiet u miri ta’ prestazzjoni fil-kuntratt li jistipulaw, pereżempju, li l-awtoritajiet kontraenti u l-entitajiet kontraenti jenħtieġ li jaġġudikaw mill-anqas 50 % tal-akkwist annwali tagħhom ta’ ċerti prodotti lil dawk b’aktar minn 70 % ta’ materjal riċiklabbli. B’riżultat ta’ dan, l-Istati Membri xorta jistgħu jistabbilixxu miri ogħla għall-akkwist ta’ dawk il-prodotti. Meta tiżviluppa atti ta’ implimentazzjoni u b’mod partikolari meta tikkunsidra l-fattibbiltà ekonomika għall-awtoritajiet kontraenti u l-entitajiet kontraenti, il-Kummissjoni jenħtieġ li tqis l-aħjar prodotti u soluzzjonijiet ambjentali possibbli disponibbli fis-suq, l-effetti tar-rekwiżiti fuq il-kompetizzjoni u l-fatt li awtoritajiet kontraenti differenti u l-entitajiet kontraenti fi Stati Membri differenti jaf ikollhom kapaċitajiet baġitarji differenti jew restrizzjonijiet oħra bħal fir-rigward tal-kundizzjonijiet klimatiċi jew infrastruttura tan-networks.

(101)

Jenħtieġ li l-Istati Membri ma jiġux preklużi milli jintroduċu jew iżommu miżuri nazzjonali dwar l-akkwist pubbliku ekoloġiku fir-rigward ta’ gruppi ta’ prodotti li għalihom għadhom ma ġewx stabbiliti rekwiżiti tal-akkwist pubbliku fl-ambitu ta’ dan ir-Regolament, jew milli jintroduċu rekwiżiti nazzjonali aktar stretti fir-rigward ta’ prodotti li jaqgħu fil-kamp ta’ applikazzjoni tal-atti ta’ implimentazzjoni li jistabbilixxu rekwiżiti tal-akkwist pubbliku ekoloġiku, dment li tali miżuri u rekwiżiti jkunu konformi mal-liġi tal-Unjoni.

(102)

L-infurzar effettiv tar-rekwiżiti tal-ekodisinn huwa essenzjali biex tiġi żgurata kompetizzjoni ugwali fis-suq tal-Unjoni u jiġi żgurat li jinkisbu l-benefiċċji u l-kontribut mistennija minn dan ir-Regolament biex jinkisbu l-objettivi tal-Unjoni b’rabta mal-klima, mal-enerġija u maċ-ċirkolarità. Għalhekk, jenħtieġ li r-Regolament (UE) 2019/1020, li jistabbilixxi qafas orizzontali għas-sorveljanza tas-suq u l-kontroll tal-prodotti li jidħlu fis-suq tal-Unjoni, japplika għall-prodotti li għalihom huma stabbiliti rekwiżiti tal-ekodisinn skont dan ir-Regolament, sakemm ma jkun hemm l-ebda dispożizzjoni speċifika bl-istess objettiv, natura jew effett f’dan ir-Regolament. Barra minn hekk, biex jitnaqqsu l-livelli problematiċi ta’ nuqqas ta’ konformità tal-prodotti koperti mill-miżuri ta’ implimentazzjoni adottati fl-ambitu tad-Direttiva 2009/125/KE, biex jiġi evitat b’mod aktar effettiv in-nuqqas ta’ konformità mar-rekwiżiti futuri tal-ekodisinn, u filwaqt li jitqiesu l-kamp ta’ applikazzjoni usa’ u ż-żieda fl-ambizzjoni ta’ dan ir-Regolament meta mqabbel mad-Direttiva 2009/125/KE, dan ir-Regolament jenħtieġ li jkun fih regoli addizzjonali speċifiċi li jikkomplementaw il-qafas maħluq mir-Regolament (UE) 2019/1020. Dawk ir-regoli jenħtieġ li jkunu mmirati lejn aktar tisħiħ tal-ippjanar, tal-koordinazzjoni u tal-appoġġ tal-isforzi tal-Istati Membri u jenħtieġ li jipprovdu għodod addizzjonali għall-Kummissjoni biex tgħin tiżgura li l-awtoritajiet tas-sorveljanza tas-suq jieħdu azzjoni biżżejjed li tevita n-nuqqas ta’ konformità mar-rekwiżiti tal-ekodisinn.

(103)

Minbarra l-awtoritajiet tas-sorveljanza tas-suq, anke l-awtoritajiet doganali jaqdu rwol importanti fl-infurzar ta’ dan ir-Regolament fir-rigward ta’ oġġetti importati u jistgħu jistrieħu fuq ir-Regolament tal-Kunsill (KE) Nru 515/97 (53) għal dak l-iskop.

(104)

Biex jiġi żgurat li kontrolli xierqa jitwettqu fuq skala adegwata b’rabta mar-rekwiżiti tal-ekodisinn, fl-istrateġija nazzjonali ta’ sorveljanza tas-suq previst fl-Artikolu 13 tar-Regolament (UE) 2019/1020, l-Istati Membri jenħtieġ li jfasslu sezzjoni ddedikata li telenka l-prodotti jew ir-rekwiżiti li jkunu identifikaw bħala prijoritajiet għas-sorveljanza tas-suq fl-ambitu ta’ dan ir-Regolament u l-attivitajiet ippjanati biex jitnaqqas jew jintemm in-nuqqas ta’ konformità tal-prodotti rilevanti jew mar-rekwiżiti rilevanti tal-ekodisinn.

(105)

Il-prijoritajiet għas-sorveljanza tas-suq fl-ambitu ta’ dan ir-Regolament jenħtieġ li jiġu identifikati abbażi ta’ kriterji oġġettivi bħal-livelli ta’ nuqqas ta’ konformità osservati jew l-impatti ambjentali li jirriżultaw min-nuqqas ta’ konformità. L-attivitajiet ippjanati biex jiġu indirizzati dawk il-prijoritajiet jenħtieġ li, min-naħa tagħhom, ikunu proporzjonati għall-fatti li jwasslu għall-prijoritizzazzjoni tagħhom.

(106)

Abbażi tad-data mdaħħla fis-sistema ta’ informazzjoni u komunikazzjoni msemmija fir-Regolament (UE) 2019/1020, il-Kummissjoni jenħtieġ li tfassal rapport li jkun fih informazzjoni dwar in-natura u l-għadd ta’ kontrolli mwettqa, dwar il-livelli ta’ nuqqas ta’ konformità identifikati u dwar in-natura u s-severità tal-penali imposti fir-rigward tan-nuqqas ta’ konformità mar-rekwiżiti tal-ekodisinn matul l-erba’ snin kalendarji preċedenti. Ir-rapport jenħtieġ li jkun fih paragun tal-attivitajiet tal-Istati Membri mal-attivitajiet ippjanati, mal-parametri referenzjarji indikattivi u ma’ lista ta’ prijoritajiet għall-awtoritajiet tas-sorveljanza tas-suq. Meta tikkunsidra l-adozzjoni ta’ atti ta’ implimentazzjoni f’konformità mal-Artikolu 11(4) tar-Regolament (UE) 2019/1020, jenħtieġ li l-Kummissjoni tqis ir-riżultati ta’ dawk ir-rapporti li tkun fasslet skont dan ir-Regolament abbażi tal-informazzjoni mdaħħla mill-awtoritajiet tas-sorveljanza tas-suq fis-sistema ta’ informazzjoni u komunikazzjoni msemmija fir-Regolament (UE) 2019/1020, u jenħtieġ li tindirizza, kif xieraq, il-prodotti jew il-gruppi ta’ prodotti koperti minn atti delegati adottati skont dan ir-Regolament li fir-rigward tagħhom ikunu ġew identifikati kontinwament riskji speċifiċi jew ksur serju, sabiex jiġi żgurat livell għoli ta’ konformità ma’ dan ir-Regolament.

(107)

Biex tissaħħaħ aktar il-koordinazzjoni tal-awtoritajiet tas-sorveljanza tas-suq, il-grupp ta’ kooperazzjoni amministrattiva (“ADCO”) stabbilit skont ir-Regolament (UE) 2019/1020 jenħtieġ li, għall-finijiet tal-identifikazzjoni tal-prodotti jew tar-rekwiżiti identifikati bħala prijoritajiet għas-sorveljanza tas-suq fl-ambitu ta’ dan ir-Regolament u l-attivitajiet ippjanati biex jitnaqqas jew jintemm in-nuqqas ta’ konformità ma’ dan ir-Regolament, jiltaqa’ f’intervalli regolari u jidentifika prijoritajiet komuni għas-sorveljanza tas-suq li jridu jitqiesu fl-istrateġiji nazzjonali ta’ sorveljanza tas-suq tal-Istati Membri, prijoritajiet għall-għoti ta’ appoġġ mill-Unjoni, u rekwiżiti adottati skont dan ir-Regolament li huma applikati jew interpretati b’mod differenti, u li għalhekk iwasslu għal distorsjoni tas-suq.

(108)

Biex tappoġġa lill-Istati Membri fl-isforzi tagħhom biex jiżguraw li tittieħed azzjoni suffiċjenti li tevita n-nuqqas ta’ konformità mar-rekwiżiti tal-ekodisinn, il-Kummissjoni jenħtieġ li, fejn rilevanti, tuża l-miżuri ta’ appoġġ previsti fir-Regolament (UE) 2019/1020. Il-Kummissjoni jenħtieġ li torganizza u, fejn xieraq, tiffinanzja, proġetti konġunti ta’ sorveljanza tas-suq u ttestjar f’oqsma ta’ interess komuni, investimenti konġunti fil-kapaċitajiet ta’ sorveljanza tas-suq u programmi ta’ taħriġ komuni għall-persunal tal-awtoritajiet tas-sorveljanza tas-suq, l-awtoritajiet doganali, l-awtoritajiet tan-notifika u l-korpi nnotifikati. Barra minn hekk, il-Kummissjoni jenħtieġ li tfassal linji gwida dwar kif iridu jiġu applikati u infurzati r-rekwiżiti adottati skont dan ir-Regolament fejn meħtieġ biex tiġi żgurata l-applikazzjoni armonizzata tagħhom.

(109)

Il-prodotti jenħtieġ li jitqiegħdu fis-suq biss jekk ma jippreżentawx riskju. Sabiex ikun hemm allinjament aħjar man-natura speċifika tar-rekwiżiti tal-ekodisinn u biex jiġi żgurat li l-enfasi tal-isforzi tas-sorveljanza tas-suq tkun fuq in-nuqqas ta’ konformità ma’ tali rekwiżiti, prodott li jippreżenta riskju jenħtieġ li, għall-finijiet ta’ dan ir-Regolament, jiġi definit bħala prodott li, billi ma jikkonformax ma’ rekwiżit tal-ekodisinn jew minħabba li operatur ekonomiku responsabbli ma jikkonformax ma’ rekwiżit tal-ekodisinn, jista’ jaffettwa b’mod negattiv l-ambjent jew interessi pubbliċi oħra protetti minn dak ir-rekwiżit. Dik id-definizzjoni aktar speċifika jenħtieġ li tintuża meta jiġu applikati l-Artikoli 19 u 20 tar-Regolament (UE) 2019/1020.

(110)

Jenħtieġ li tkun teżisti proċedura li fil-qafas tagħha l-partijiet interessati jiġu informati b’miżuri maħsuba li jittieħdu fir-rigward ta’ prodotti li jippreżentaw riskju. Jenħtieġ li din tippermetti wkoll lill-awtoritajiet tas-sorveljanza tas-suq fl-Istati Membri, b’kooperazzjoni mal-operaturi ekonomiċi rilevanti, jaġixxu fi stadju bikri fir-rigward ta’ tali prodotti. Għal dak il-għan, jenħtieġ li l-klawżola ta’ salvagwardja attwalment inkluża fid-Direttiva 2009/125/KE tiġi aġġornata u allinjata mal-proċeduri ta’ salvagwardja inklużi f’leġiżlazzjoni oħra tal-Unjoni dwar l-armonizzazzjoni u fid-Deċiżjoni Nru 768/2008/KE.

(111)

L-awtoritajiet tas-sorveljanza tas-suq jenħtieġ li jkollhom id-dritt li jirrikjedu li l-operaturi ekonomiċi jieħdu azzjoni korrettiva abbażi ta’ sejbiet li jew prodott ma jkunx konformi mar-rekwiżiti tal-ekodisinn jew li l-operatur ekonomiku jkun kiser ir-regoli dwar it-tqegħid fis-suq ta’ prodotti jew regoli oħra indirizzati lilu.

(112)

Fl-adozzjoni ta’ atti delegati skont l-Artikolu 290 tat-TFUE, hu partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (54). B’mod partikolari, biex tiġi żgurata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(113)

Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni fir rigward ta’: (a) l-istabbiliment ta’ proċeduri għall-ħruġ u għall-verifika tal-kredenzjali diġitali għall-aċċess għad-data maħżuna fil-passaport diġitali tal-prodotti mill-operaturi ekonomiċi u mill-atturi rilevanti l-oħra abbażi tad-drittijiet rispettivi tagħhom; (b) l-ispeċifikazzjoni tal-arranġamenti ta’ implimentazzjoni għall-interkonnessjoni tar-reġistru u s-Sistema tal-Iskambju taċ-Ċertifikati tat-Tieqa Unika Doganali tal-UE inkluża l-komunikazzjoni tal-identifikatur uniku tar-reġistrazzjoni; (c) l-istabbiliment ta’ rekwiżiti komuni għall-preżentazzjoni tat-tikketti; (d) l-adozzjoni u l-aġġornament ta’ lista ta’ miżuri ta’ awtoregolamentazzjoni stabbiliti bħala alternattivi validi għal att delegat adottat skont dan ir-Regolament; (e) it-tfassil tad-dettalji u tal-format għad-divulgazzjoni tal-informazzjoni dwar prodotti tal-konsumatur mhux mibjugħa li jkunu ġew skartati; (f) l-istabbiliment, l-emendar jew it-tħassir ta’ speċifikazzjonijiet komuni li jkopru r-rekwiżiti tal-ekodisinn, ir-rekwiżiti essenzjali għall-passaporti diġitali tal-prodotti jew għall-metodi ta’ ttestjar, kejl jew kalkolu; (g) l-istabbiliment ta’ rekwiżiti minimi għall-għoti ta’ kuntratti pubbliċi għax-xiri ta’ prodotti koperti mir-rekwiżiti tal-ekodisinn, jew għal xogħlijiet jew servizzi fejn dawk il-prodotti jintużaw għal attivitajiet li jikkostitwixxu s-suġġett ta’ dawk il-kuntratti; u (h) id-deċiżjoni, skont il-proċedura ta’ salvagwardja tal-Unjoni, dwar jekk miżura nazzjonali hijiex ġustifikata jew le. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (55).

(114)

Biex tissaħħaħ il-fiduċja fil-prodotti mqiegħda fis-suq, b’mod partikolari fir-rigward tal-konformità tal-prodotti mar-rekwiżiti tal-ekodisinn, il-pubbliku jeħtieġ li jiġi żgurat li l-operaturi ekonomiċi li jqiegħdu prodotti mhux konformi fis-suq ikunu soġġetti għal penali. Għalhekk jeħtieġ li l-Istati Membri jistabbilixxu regoli dwar il-penali applikabbli għall-ksur ta’ dan ir-Regolament u jiżguraw li dawk ir-regoli jiġu implimentati. Il-penali previsti jenħtieġ li jkunu effettivi, proporzjonati u dissważivi u jenħtieġ li tal-anqas jinkludu multi u esklużjoni limitata fiż-żmien mill-proċeduri tal-akkwist pubbliku. Mingħajr preġudizzju għall-awtonomija proċedurali tal-Istati Membri u għad-diskrezzjoni tal-awtoritajiet kompetenti u l-imħallfin li jimponu penali xierqa fil-każijiet individwali, jenħtieġ li jiġu stabbiliti kriterji komuni mhux eżawrjenti għad-determinazzjoni tat-tipi u l-livelli ta’ penali li jridu jiġu imposti f’każ ta’ ksur ta’ dan ir-Regolament biex tiġi ffaċilitata applikazzjoni aktar konsistenti tal-penali. Jenħtieġ li dawkn il-kriterji jinkludu, fost l-oħrajn, in-natura, il-gravità u t-tul tal-ksur, is-sitwazzjoni finanzjarja tal-persuna fiżika jew ġuridika miżmuma responsabbli kif indikat pereżempju mill-fatturat totali jew l-introjtu annwali, u l-benefiċċji ekonomiċi derivati mill-ksur u ġenerati minnu, sa fejn dawk il-benefiċċji jkunu jistgħu jiġu ddeterminati.

(115)

Jenħtieġ li l-Kummissjoni twettaq evalwazzjoni ta’ dan ir-Regolament. Skont il-paragrafu 22 tal-Ftehim Interistituzzjonali dwar it-Tfassil Aħjar tal-Liġijiet, jenħtieġ li dik l-evalwazzjoni tkun ibbażata fuq il-ħames kriterji ta’ effiċjenza, effettività, rilevanza, koerenza u valur miżjud tal-UE u jenħtieġ li tipprovdi l-bażi għal valutazzjonijiet tal-impatt ta’ miżuri ulterjuri possibbli. Jenħtieġ li l-Kummissjoni tippreżenta lill-Parlament Ewropew, lill-Kunsill, lill-Kumitat Ekonomiku u Soċjali Ewropew, u lill-Kumitat tar-Reġjuni rapport dwar l-implimentazzjoni ta’ dan ir-Regolament u l-impatt tiegħu fuq is-sostenibbiltà ambjentali tal-prodotti u l-funzjonament tas-suq intern. Fejn xieraq, jenħtieġ li r-rapport ikun akkumpanjat minn proposta biex jiġu emendati d-dispożizzjonijiet rilevanti ta’ dan ir-Regolament.

(116)

Huwa xieraq li l-Kummissjoni tivvaluta l-benefiċċji potenzjali tal-istabbiliment ta’ rekwiżiti anke fir-rigward tal-aspetti soċjali tal-prodotti. Bħala parti minn dik il-valutazzjoni, il-Kummissjoni jenħtieġ li tikkunsidra sa liema punt dawk ir-rekwiżiti jistgħu jikkomplementaw il-liġi tal-Unjoni biex b’hekk tindirizza l-impatti negattivi fuq id-drittijiet tal-bniedem u d-drittijiet soċjali li jirriżultaw mill-operazzjonijiet tal-kumpaniji u mill-prodotti. Jenħtieġ għalhekk li l-Kummissjoni twettaq evalwazzjoni fi żmien erba’ snin mid-data tad-dħul fis-seħħ ta’ dan ir-Regolament dwar il-benefiċċji potenzjali tal-inklużjoni ta’ rekwiżiti ta’ sostenibbiltà soċjali fil-kamp ta’ applikazzjoni ta’ dan ir-Regolament. Il-Kummissjoni jenħtieġ li tissottometti rapport dwar l-evalwazzjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew, u lill-Kumitat tar-Reġjuni. Fejn xieraq, jenħtieġ li r-rapport ikun akkumpanjat minn proposta leġiżlattiva biex jiġi emendat dan ir-Regolament.

(117)

Sabiex jiġi ffaċilitat l-infurzar privat ta’ dan ir-Regolament, il-konsumaturi li jkunu sofrew dannu minħabba n-nuqqas ta’ konformità ta’ prodott mar-rekwiżiti tal-ekodisinn jenħtieġ li jkollhom id-dritt li jitolbu kumpens għal dik il-ħsara mill-manifattur tal-prodott, jew, jekk il-manifattur ma jkunx stabbilit fl-Unjoni, mill-importatur jew mir-rappreżentant awtorizzat tal-manifattur, jew, jekk l-ebda wieħed minn dawk l-operaturi ekonomiċi ma jkun stabbilit fl-Unjoni, mill-fornitur ta’ servizz ta’ eżekuzzjoni. Jenħtieġ li tali dritt għal kumpens ikun mingħajr preġudizzju għal rimedji oħra disponibbli għall-konsumaturi skont il-liġi tal-Unjoni, bħar-rimedji kontra l-bejjiegħ f’każ ta’ nuqqas ta’ konformità tal-oġġetti mibjugħa f’konformità mad-Direttiva (UE) 2019/771 tal-Parlament Ewropew u tal-Kunsill (56). Barra minn hekk, jenħtieġ li l-Istati Membri ma jiġux prevenuti milli jżommu jew jintroduċu d-drittijiet għall-konsumaturi għal rimedji oħra f’konformità mal-liġi nazzjonali, bħat-tiswija jew is-sostituzzjoni ta’ prodotti li jiksru r-rekwiżiti tal-ekodisinn.

(118)

Il-konsumaturi jenħtieġ li jkunu intitolati li jinfurzaw id-drittijiet tagħhom fir-rigward tal-obbligi imposti fuq il-manifatturi u, meta applikabbli, l-importaturi, ir-rappreżentanti awtorizzati u l-fornituri ta’ servizz ta’ eżekuzzjoni skont dan ir-Regolament permezz ta’ azzjonijiet rappreżentattivi f’konformità mad-Direttiva (UE) 2020/1828 tal-Parlament Ewropew u tal-Kunsill (57). Għal dak l-iskop, jenħtieġ li dan ir-Regolament jipprevedi li d-Direttiva (UE) 2020/1828 tkun applikabbli għall-azzjonijiet rappreżentattivi li jikkonċernaw il-ksur ta’ dan ir-Regolament mill-manifatturi u, meta applikabbli, mill-importaturi, mir-rappreżentanti awtorizzati u mill-fornituri ta’ servizz ta’ eżekuzzjoni li jikkwalifikaw bħala kummerċjanti skont l-Artikolu 3, il-punt (2), ta’ dik id-Direttiva li jagħmlu ħsara jew li jistgħu jagħmlu ħsara lill-interessi kollettivi tal-konsumaturi. L-Anness I ta’ dik id-Direttiva jenħtieġ għalhekk li jiġi emendat kif xieraq. Huwa f’idejn l-Istati Membri li jiżguraw li dik l-emenda tkun riflessa fil-miżuri ta’ traspożizzjoni tagħhom adottati f’konformità ma’ dik id-Direttiva, għalkemm l-adozzjoni ta’ miżuri ta’ traspożizzjoni nazzjonali f’dak ir-rigward mhijiex kundizzjoni għall-applikabbiltà ta’ dik id-Direttiva għal dawk l-azzjonijiet rappreżentattivi. L-applikabbiltà ta’ dik id-Direttiva għall-azzjonijiet rappreżentattivi mressqa kontra l-ksur mill-manifatturi u, meta applikabbli, mill-importaturi, mir-rappreżentanti awtorizzati u mill-fornituri ta’ servizzi ta’ eżekuzzjoni tad-dispożizzjonijiet ta’ dan ir-Regolament li jagħmlu ħsara jew li jistgħu jagħmlu ħsara lill-interessi kollettivi tal-konsumaturi jenħtieġ li tibda mid-data tad-dħul fis-seħħ ta’ dan ir-Regolament.

(119)

Huwa neċessarju li r-rekwiżiti tal-ekodisinn japplikaw għall-aktar firxa wiesgħa possibbli ta’ prodotti, u mhux biss għall-prodotti relatati mal-enerġija, u li d-definizzjoni tar-rekwiżiti tal-ekodisinn titwessa’ biex tinkludi l-aspetti kollha taċ-ċirkolarità. Huwa neċessarju wkoll li dan ir-Regolament jiġi allinjat mal-Qafas Leġiżlattiv il-Ġdid stabbilit fir-Regolament (KE) Nru 765/2008 u fid-Deċiżjoni Nru 768/2008/KE, u li jittejbu d-dispożizzjonijiet relatati mas-sorveljanza tas-suq. Id-Direttiva 2009/125/KE jenħtieġ li għalhekk tiġi sostitwita. Sabiex tiġi żgurata ċ-ċertezza legali għall-operaturi ekonomiċi kollha mid-data tad-dħul fis-seħħ ta’ dan ir-Regolament u biex jiġi żgurat ambjent ekwu għan-negozji li joperaw fis-suq intern, id-dispożizzjonijiet li jistabbilixxu l-obbligi ta’ trasparenza relatati mar-rimi ta’ prodotti tal-konsumatur mhux mibjugħa, ċirkomvenzjoni, u s-sorveljanza tas-suq jenħtieġ li tkun ta’ applikazzjoni uniformi għall-operaturi kollha madwar l-Unjoni. Għalhekk, jenħtieġ li d-Direttiva 2009/125/KE tiġi sostitwita minn Regolament.

(120)

Il-Pjan ta’ Ħidma dwar l-Ekodisinn u t-Tikkettar tal-Enerġija 2022-2024, stabbilit fil-Komunikazzjoni tal-Kummissjoni tal-4 ta’ Mejju 2022, identifika l-prijoritajiet politiċi għall-ħidma fuq prodotti relatati mal-enerġija. Meta d-dispożizzjonijiet ta’ dan ir-Regolament jidħlu fis-seħħ, il-ħidma preparatorja li tivvaluta l-fattibbiltà tar-rekwiżiti tal-ekodisinn skont id-Direttiva 2009/125/KE ser tkun fi stadju sostanzjalment avvanzata għall-pannelli fotovoltajċi, għall-ħiters tal-post u dawk ikkombinati, għall-ħiters tal-ilma, għall-ħiters tal-post lokali tal-fjuwil solidu, għall-kundizzjonaturi tal-arja inklużi l-pompi tas-sħana arja-arja u l-fannijiet għall-użu personali, għall-bojlers tal-fjuwil solidu, għall-unitajiet tal-ventilazzjoni, għall-vacuum cleaners, għall-apparati tat-tisjir, għall-pompi tal-ilma, għall-fannijiet industrijali, għaċ-ċirkolaturi, għall-provvisti tal-elettriku esterni, għall-kompjuters, għas-servers u għall-prodotti tal-ħżin tad-data, għat-transformers tal-enerġija, għat-tagħmir professjonali għar-refriġerazzjoni u t-tagħmir għall-immaġnijiet. Bis-saħħa ta’ dik il-ħidma preparatorja ġew identifikati bosta oqsma fejn l-enerġija u l-materjal jistgħu jiġu ffrankati, u saru konsultazzjonijiet estensivi maċ-ċittadini u mal-partijiet ikkonċernati. Jekk il-ħidma preparatorja tinbeda mill-ġdid, dan ir-Regolament iddewwem b’mod konsiderevoli l-adozzjoni tar-rekwiżiti rigward l-iffrankar tal-enerġija u tal-materjal għal dawk il-prodotti. Sabiex jiġi żgurat li l-ħidma preparatorja ma tintilifx, huwa għalhekk meħtieġ li jiġu previsti regoli tranżizzjonali li jippermettu li jiġu adottati miżuri ta’ implimentazzjoni dwar dawk il-prodotti skont id-Direttiva 2009/125/KE, sal-31 ta’ Diċembru 2026. Barra minn hekk, u sabiex jiġi żgurat il-funzjonament xieraq tal-miżuri ta’ implimentazzjoni adottati skont l-Artikolu 15 tad-Direttiva 2009/125/KE, jenħtieġ li jiġu adottati emendi meħtieġa li jindirizzaw il-kwistjonijiet tekniċi jekk rilevanti f’konformità mad-dispożizzjonijiet rilevanti ta’ dik id-Direttiva dwar l-Ekodisinn, sal-31 ta’ Diċembru 2030.

(121)

Sabiex jiġu żgurati ċ-ċertezza legali u l-kontinwità għall-prodotti mqiegħda fis-suq jew fis-servizz f’konformità mal-miżuri ta’ implimentazzjoni adottati skont id-Direttiva 2009/125/KE, fil-verżjoni tagħha applikabbli fid-data tad-dħul fis-seħħ ta’ dan ir-Regolament, dawk il-miżuri jenħtieġ li jibqgħu fis-seħħ wara dik id-data, u sakemm jiġu revokati b’att delegat adottat skont dan ir-Regolament. Għall-istess raġunijiet, għadd ta’ dispożizzjonijiet tad-Direttiva 2009/125/KE jenħtieġ li jkomplu jkollhom effett sħiħ fil-kuntest tal-applikazzjoni ta’ dawn il-miżuri ta’ implimentazzjoni. Dan jikkonċerna b’mod partikolari d-dispożizzjonijiet tad-Direttiva 2009/125/KE li jeskludu l-mezzi tat-trasport għall-merkanzija jew għall-persuni mill-kamp ta’ applikazzjoni tagħha, l-istabbiliment ta’ definizzjonijiet rilevanti għall-miżuri ta’ implimentazzjoni, l-iffissar ta’ responsabbiltajiet tal-operaturi ekonomiċi fir-rigward tal-prodotti mqiegħda fis-suq, l-ispeċifikazzjoni tad-dettalji tal-proċeduri rilevanti ta’ valutazzjoni tal-konformità u tad-dikjarazzjoni ta’ konformità tal-KE, l-istabbiliment ta’ preżunzjoni ta’ konformità għall-prodotti li jkunu ngħataw l-Ekotikketta tal-UE u l-iffaċilitar ta’ azzjoni meħtieġa fir-rigward tal-istandards armonizzati. Minħabba l-importanza li jiġi żgurat il-moviment liberu tal-merkanzija, li jiġu pprojbiti prattiki li jbiddlu b’mod illegali l-prestazzjoni tal-prodotti biex jinkiseb riżultat aktar favorevoli u jiġi żgurat infurzar xieraq tar-rekwiżiti tal-ekodisinn, id-dispożizzjonijiet rilevanti ta’ dan ir-Regolament jenħtieġ li jkunu applikabbli għall-prodotti relatati mal-enerġija mqiegħda fis-suq skont il-miżuri ta’ implimentazzjoni skont id-Direttiva 2009/125/KE.

(122)

Minħabba li l-objettivi ta’ dan ir-Regolament, jiġifieri li titjieb is-sostenibbiltà ambjentali tal-prodotti u li jiġi żgurat il-moviment liberu fis-suq intern tal-prodotti li għalihom huma stabbiliti rekwiżiti tal-ekodisinn, ma jistgħux jintlaħqu b’mod suffiċjenti mill-Istati Membri, iżda jistgħu pjuttost, minħabba l-iskala u l-effetti tagħhom, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ biex jinkisbu dawk l-objettivi,