(1)

Id-Direttiva tal-Kummissjoni 2005/3/KE (2) daħħlet S-metolaklor bħala sustanza attiva fl-Anness I tad-Direttiva tal-Kunsill 91/414/KEE (3).

(2)

Skont l-Artikolu 78(3) tar-Regolament (KE) Nru 1107/2009, is-sustanzi attivi inklużi fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4).

(3)

Kif mogħti fil-Parti A tal-Anness tar-Regolament ta’ Implimentazzjoni (UE) Nru 540/2011, l-approvazzjoni tas-sustanza attiva S-metolaklor tiskadi fil-15 ta’ Novembru 2024.

(4)

F’konformità mal-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (5) u fil-perjodu ta’ żmien previst f’dak l-Artikolu, tressqu applikazzjonijiet għat-tiġdid tal-approvazzjoni tas-sustanza attiva S-metolaklor lill-Ġermanja, l-Istat Membru relatur, u lil Franza, l-Istat Membru korelatur.

(5)

L-applikanti ressqu l-fajls supplimentari meħtieġa lill-Istat Membru relatur, lill-Istat Membru korelatur, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 6 tar-Regolament ta’ Implimentazzjoni (UE) Nru 844/2012. L-Istat Membru relatur sab li l-applikazzjonijiet kienu kompluti.

(6)

L-Istat Membru relatur ħejja abbozz tar-rapport ta’ valutazzjoni tat-tiġdid b’konsultazzjoni mal-Istat Membru korelatur, u bagħtu lill-Awtorità u lill-Kummissjoni fis-6 ta’ Settembru 2018.

(7)

L-Awtorità ppubblikat il-fajl sommarju supplimentari. L-Awtorità bagħtet ukoll l-abbozz tar-rapport ta’ valutazzjoni tat-tiġdid lill-applikanti u lill-Istati Membri għall-kummenti tagħhom, u nediet konsultazzjoni pubblika dwaru. L-Awtorità għaddiet il-kummenti li rċeviet lill-Kummissjoni.

(8)

Fid-29 ta’ Settembru 2022, billi l-oqsma kollha tal-valutazzjoni, ħlief għall-proprjetajiet li jfixklu s-sistema endokrinali, kienu tlestew u li ġew identifikati diversi oqsma kritiċi ta’ tħassib, il-Kummissjoni stiednet lill-Awtorità tipprovdi r-riżultati tal-valutazzjoni tar-riskju tas-sustanza attiva S-metolakor, inkluż il-konklużjoni tagħha dwar jekk is-sustanza attiva S-metolaklor tistax tkun mistennija li tissodisfa l-kriterji tal-approvazzjoni stabbiliti fl-Artikolu 4 tar-Regolament (KE) Nru 1107/2009 minbarra l-valutazzjoni sħiħa tal-proprjetajiet li jfixklu s-sistema endokrinali.

(9)

Fit-3 ta’ Frar 2023, l-Awtorità kkomunikat lill-Kummissjoni l-konklużjoni tagħha (6) dwar jekk jistax ikun mistenni li S-metolaklor tissodisfa l-kriterji tal-approvazzjoni previsti fl-Artikolu 4 tar-Regolament (KE) Nru 1107/2009.

(10)

L-Awtorità identifikat diversi oqsma kritiċi ta’ tħassib. L-ewwel nett, hija kkonkludiet li hemm potenzjal ta’ prezenza fl-ilma ta’ taħt l-art tas-sustanza attiva S-metolaklor u l-metaboliti rilevanti tagħha li huma attivi erbiċidalment li taqbeż il-limitu parametriku tal-ilma tax-xorb ta’ 0,1 μg/L, abbażi ta’ data ta’ monitoraġġ u li, barra minn hekk, dawn il-metaboliti huma mbassra li se jaqbżu 0,1 μg/L fix-xenarji kollha għall-użi rappreżentattivi kollha bbażati fuq l-immudellar tal-ilma ta’ taħt l-art. Barra minn hekk, l-Awtorità sabet potenzjal għoli ta’ esponiment għall-ilma ta’ taħt l-art li jaqbeż il-limitu parametriku tal-ilma tax-xorb ta’ 0,1 μg/L għall-metaboliti li huma tossikoloġikament rilevanti minħabba tħassib jew lakuni fid-data dwar il-ġenotossiċità u/jew il-karċinoġeniċità. Fl-aħħar nett, l-Awtorità identifikat ukoll riskju għoli għall-mammiferi li jieklu l-ħniex minħabba avvelenament sekondarju.

(11)

Skont id-dispożizzjonijiet tal-Artikolu 14 tar-Regolament ta’ Implimentazzjoni (UE) Nru 844/2012, f’Mejju 2023 il-Kummissjoni ressqet għall-eżaminazzjoni tal-Kumitat Permanenti dwar il-Pjanti, l-Annimali, l-Ikel u l-Għalf, abbozz tar-rapport tat-tiġdid u abbozz ta’ dan ir-Regolament. L-abbozz tar-rapport tat-tiġdid ġie ffinalizzat mill-Kumitat Permanenti fit-12 ta’ Lulju 2023.

(12)

Il-Kummissjoni stiednet lill-applikanti jippreżentaw il-kummenti tagħhom dwar il-konklużjonijiet tal-Awtorità. Barra minn hekk, f’konformità mal-Artikolu 14(1), it-tielet subparagrafu, tar-Regolament ta’ Implimentazzjoni (UE) Nru 844/2012, il-Kummissjoni stiednet lill-applikant biex iressaq il-kummenti tiegħu dwar l-abbozz tar-rapport tat-tiġdid. L-applikanti ressqu l-kummenti tagħhom, li ġew eżaminati bir-reqqa.

(13)

Madankollu, minkejja l-argumenti li ressqu l-applikanti, it-tħassib rigward is-sustanza attiva ma setax jiġi eliminat.

(14)

B’konsegwenza ta’ dan, fir-rigward ta’ użu rappreżentattiv wieħed jew aktar ta’ mill-inqas prodott wieħed għall-protezzjoni tal-pjanti li fih is-sustanza attiva S-metolaklor, ma ġiex stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati. Għalhekk, jixraq li l-approvazzjoni ta’ dik is-sustanza attiva ma tiġġeddidx.

(15)

Għalhekk, jenħtieġ li r-Regolament ta’ Implimentazzjoni (UE) Nru 540/2011 jiġi emendat skont dan.

(16)

Jenħtieġ li l-Istati Membri jingħataw żmien biżżejjed biex jirtiraw l-awtorizzazzjonijiet tal-prodotti għall-protezzjoni tal-pjanti li fihom is-sustanza attiva S-metolaklor.

(17)

Rigward il-prodotti għall-protezzjoni tal-pjanti li fihom is-sustanza attiva S-metolaklor, fil-każ li l-Istati Membri jagħtu perjodu ta’ grazzja f’konformità mal-Artikolu 46 tar-Regolament (KE) Nru 1107/2009, jenħtieġ li dak il-perjodu jiskadi sa mhux iktar tard mit-23 ta’ Lulju 2024.

(18)

Ir-Regolament ta’ Implimentazzjoni tal-Kummissjoni (UE) 2023/918 (7) estenda l-perjodu ta’ approvazzjoni tas-sustanza attiva S-metolaklor sal-15 ta’ Novembru 2024 sabiex il-proċess ta’ tiġdid ikun jista’ jitlesta qabel ma jiskadi l-perjodu ta’ approvazzjoni ta’ dik is-sustanza. Madankollu, peress li ttieħdet deċiżjoni dwar in-nuqqas ta’ tiġdid tal-approvazzjoni qabel dak il-perjodu ta’ approvazzjoni estiż, jenħtieġ li dan ir-Regolament japplika qabel dik id-data.

(19)

Ir-Regolament ma jipprevjenix it-tressiq ta’ applikazzjoni oħra għall-approvazzjoni ta’ S-metolaklor skont l-Artikolu 7 tar-Regolament (KE) Nru 1107/2009.

(20)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,