(1)

Ir-Regolament tal-Kummissjoni (UE) Nru 231/2012 (2) jistabbilixxi l-ispeċifikazzjonijiet għall-addittivi tal-ikel elenkati fl-Annessi II u III tar-Regolament (KE) Nru 1333/2008.

(2)

L-ispeċifikazzjonijiet għall-addittivi tal-ikel jistgħu jiġu aġġornati f’konformità mal-proċedura komuni msemmija fl-Artikolu 3(1) tar-Regolament (KE) Nru 1331/2008 tal-Parlament Ewropew u tal-Kunsill (3), fuq l-inizjattiva tal-Kummissjoni jew wara li ssir applikazzjoni minn Stat Membru jew minn parti interessata.

(3)

Il-mono- u d-digliċeridi tal-aċidi grassi (E471) hija sustanza awtorizzata f’oġġetti tal-ikel diversi, f’konformità mal-Annessi II u III tar-Regolament (KE) Nru 1333/2008.

(4)

Fis-26 ta’ Settembru 2017, l-Awtorità ħarġet opinjoni xjentifika dwar l-evalwazzjoni mill-ġdid tal-mono- u d-digliċeridi tal-aċidi grassi (E471) bħala addittiv tal-ikel (4), fejn ikkonkludiet li ma kienx hemm bżonn ta’ konsum aċċettabbli ta’ kuljum numeriku u li l-addittiv tal-ikel ma kien qajjem ebda tħassib għas-sikurezza meta jintuża fl-ikel għall-popolazzjoni ġenerali. L-awtorità esprimiet il-fehma li l-użi fl-ikel għat-trabi taħt l-età ta’ 16-il ġimgħa jkunu jeħtieġu valutazzjoni tar-riskju speċifika. L-Awtorità rrakkomandat xi modifiki fl-ispeċifikazzjonijiet għall-addittiv tal-ikel E471 stabbiliti fir-Regolament (UE) Nru 231/2012.

(5)

Wara l-pubblikazzjoni ta’ dik l-opinjoni xjentifika, bħala parti mill-valutazzjoni mill-ġdid tas-sikurezza tal-addittivi tal-ikel permessi fil-kategorija tal-ikel 13.1 (ikel għat-trabi u għat-tfal iż-żgħar) tal-Anness II tar-Regolament (KE) Nru 1333/2008, il-Kummissjoni talbet lill-Awtorità tindirizza l-lakuni fid-data speċifikati fir-rakkomandazzjonijiet ta’ dik l-opinjoni xjentifika.

(6)

Fid-29 ta’ Novembru 2018, l-Awtorità nediet sejħa pubblika għal data teknika u tossikoloġika dwar l-addittiv tal-ikel E471. Dan offra l-opportunità lill-partijiet interessati jipprovdu l-informazzjoni mitluba għat-tlestija tal-valutazzjoni tar-riskju tagħha ta’ E471 bħala addittiv tal-ikel fl-ikel għall-gruppi kollha tal-popolazzjoni u li jivvalutaw is-sikurezza tiegħu meta jintuża fl-ikel għat-trabi ta’ taħt is-16-il ġimgħa.

(7)

Fl-2020, kien hemm notifika tal-RASFF dwar sejbiet ta’ livelli għoljin ta’ esteri tal-aċidi grassi gliċidiliċi ġenotossiċi u karċinoġeniċi (espressi bħala gliċidol) fl-addittiv tal-ikel E471 użat fil-produzzjoni ta’ dilka għall-ħobż. Abbażi ta’ dik in-notifika u sakemm isiru r-rakkomandazzjonijiet tal-Awtorità għall-iffissar tal-limiti massimi għall-esteri gliċidiliċi tal-aċidi grassi fl-addittiv tal-ikel, ittieħdu azzjonijiet ta’ segwitu abbażi tal-Artikolu 14 tar-Regolament (KE) Nru 178/2002 tal-Parlament Ewropew u tal-Kunsill (5). F’kampjuni kummerċjali tal-addittiv tal-ikel analizzati mill-industrija bi tweġiba għas-sejħa għad-data matul l-istess perjodu instabet firxa wiesgħa ta’ konċentrazzjonijiet u livelli għoljin ta’ esteri gliċidiliċi (espressi bħala gliċidol).

(8)

Meta jitqies li l-addittiv tal-ikel E 471 huwa awtorizzat fil-kwantitajiet quantum satis fil-kategoriji tal-ikel li għalihom huwa previst li jiġu ffissati livelli massimi għall-preżenza tal-esteri gliċidiliċi tal-aċidi grassi, jew li diġà huma fis-seħħ, jenħtieġ li jiġu stabbiliti l-livelli massimi għall-esteri gliċidiliċi tal-aċidi grassi (espressi bħala gliċidol) fl-addittiv tal-ikel E471 biex jiġi evitat it-tqegħid fis-suq ta’ ikel mhux sikur.

(9)

Fl-opinjoni xjentifika tagħha adottata fit-30 ta’ Settembru 2021 (6), l-Awtorità kkonkludiet li ma hemmx lok ta’ tħassib dwar is-sikurezza meta l-addittiv tal-ikel E471 jintuża fil-kategoriji tal-ikel 13.1.1 (formuli tat-trabi) u 13.1.5.1 (ikel djetetiku għat-trabi għal skopijiet mediċi speċjali u formuli speċjali għat-trabi) tal-Anness II tar-Regolament (KE) Nru 1333/2008 u f’konformità mal-Anness III ta’ dak ir-Regolament. L-awtorità rrakkomandat li l-ispeċifikazzjonijiet attwali għall-mono- u d-digliċeridi tal-aċidi grassi (E471) jiġu adattati, b’mod partikolari billi jitnaqqsu l-limiti massimi għall-elementi tossiċi u jiddaħħlu l-limiti massimi għall-impuritajiet u għall-kostitwenti li jqajmu tħassib dwar is-sikurezza.

(10)

Għalhekk, fid-dawl tar-rakkomandazzjoni tal-Awtorità u l-livelli massimi għal ċerti kontaminanti fl-ikel kif stabbiliti fir-Regolament tal-Kummissjoni (UE) 2023/915 (7), jixraq li jiġu emendati l-ispeċifikazzjonijiet għall-mono- u d-digliċeridi tal-aċidi grassi (E471). Id-definizzjoni tal-addittiv tal-ikel jenħtieġ li tiġi emendata sabiex l-użu tal-gliċerol għall-produzzjoni tal-addittiv tal-ikel jiġi ristrett għall-gliċerol li jikkonforma mal-ispeċifikazzjonijiet tal-addittiv tal-ikel E422. Jenħtieġ li jiġi stabbilit kontenut massimu ta’ aċidu eruċiku fl-entrata attwali “assaġġ” għall-mono- u d-digliċeridi tal-aċidi grassi (E471). Jenħtieġ li jitnaqqsu l-limiti massimi attwali għall-arseniku, għaċ-ċomb, għall-merkurju u għall-kadmju u li jiġu stabbiliti l-limiti massimi għas-somma ta’ 3-monokloropropandiol (3-MCPD) u tal-esteri tat-3-MCPD tal-aċidi grassi (espressi bħala 3-MCPD), u għall-esteri gliċidiliċi tal-aċidi grassi (espressi bħala gliċidol) f’konformità mal-opinjoni tal-Awtorità. Sabiex jiġi eskluż esponiment għoli għal dawk l-impuritajiet u l-komponenti ta’ tħassib li jirriżultaw mill-konsum tal-ikel li fih l-addittiv tal-ikel E 471 minn konsumaturi vulnerabbli, jeħtieġ li jiġu stabbiliti limiti massimi aktar stretti għall-aċidu eruċiku u għas-somma ta’ 3-monokloropropanediol (3-MCPD) u tal-esteri tat-3-MCPD tal-aċidi grassi (espressi bħala 3-MCPD) applikabbli għall-ikel għat-trabi u għat-tfal iż-żgħar (8). Dawk il-limiti massimi jqisu l-livell li attwalment jista’ jinkiseb b’mod raġonevoli bl-applikazzjoni ta’ prattiki tajba ta’ manifattura.

(11)

Minħabba li qegħdin jiġu implimentati tekniki ġodda ta’ manifattura li jirriżultaw fil-produzzjoni ta’ mono- u digliċeridi tal-aċidi grassi (E471) b’livelli aktar baxxi tal-esteri gliċidiliċi tal-aċidi grassi (espressi bħala gliċidol), jixraq li l-manifatturi ta’ dan l-addittiv tal-ikel jingħataw perjodu tranżizzjonali biex jilħqu livell massimu ta’ 5 mg/kg għall-esteri gliċidiliċi tal-aċidi grassi (espressi bħala gliċidol) fl-addittiv tal-ikel E471. Madankollu, billi l-esteri gliċidiliċi tal-aċidi grassi għandhom il-potenzjal li jkun ġenotossiċi u karċinoġeniċi, jenħtieġ li japplika livell massimu intermedju ta’ 10 mg/kg għall-esteri gliċidiliċi tal-aċidi grassi (espressi bħala gliċidol) mid-data tad-dħul fis-seħħ ta’ dan ir-Regolament, minbarra fejn jintużaw fl-ikel għat-trabi u għat-tfal iż-żgħar.

(12)

Meta jitqies li l-Awtorità ma identifikatx tħassib immedjat dwar is-saħħa relatat mal-preżenza tal-elementi tossiċi, l-aċidu eruċiku, is-somma ta’ 3-monokloropropandiol (3-MCPD), u tal-esteri tat-3-MCPD tal-aċidi grassi, u l-esteri gliċidiliċi tal-aċidi grassi, jixraq li għal perjodu tranżizzjonali jiġi permess l-użu tal-addittiv tal-ikel mono- u digliċeridi tal-aċidi grassi E471 li tqiegħed fis-suq b’mod legali qabel id-data tad-dħul fis-seħħ ta’ dan ir-Regolament, u li jkun permess li l-oġġetti tal-ikel li jkun fihom dan l-addittiv, jibqgħu jitqiegħdu fis-suq fil-perjodu tranżizzjonali u jibqgħu fis-suq sad-data ta’ durabbiltà minima tiegħu jew “id-data sa meta jista’ jintuża l-aħħar”. Madankollu, minħabba l-vulnerabbiltà tat-trabi u tat-tfal iż-żgħar, l-addittiv tal-ikel mono- u digliċeridi tal-aċidi grassi (E471) li ma jikkonformax mal-livell massimu għall-esteri gliċidiliċi tal-aċidi grassi stabbilit f’dan ir-Regolament għall-użu fl-ikel għat-trabi u għat-tfal iż-żgħar ma għandux jitħalla jiżdied ma’ tali ikel wara d-data tad-dħul fis-seħħ ta’ dan ir-Regolament u jenħtieġ li l-kummerċjalizzazzjoni ta’ dawk l-oġġetti tal-ikel tkun permessa biss jekk ikunu diġà tqiegħdu fis-suq b’mod legali qabel dik id-data.

(13)

Għall-istess raġunijiet u meta jitqies il-kontenut imnaqqas fih ta’ esteri gliċidiliċi tal-aċidi grassi, jenħtieġ li l-addittiv tal-ikel mono- u digliċeridi tal-aċidi grassi (E471) li jikkonforma mal-livell massimu intermedju mnaqqas għall-esteri gliċidiliċi tal-aċidi grassi (espressi bħala gliċidol) jitħalla jintuża sakemm jispiċċaw l-istokkijiet, u l-oġġetti tal-ikel li fihom dan l-addittiv tal-ikel għandhom jitħallew jitqiegħdu fis-suq u jibqgħu fis-suq sad-data ta’ durabbiltà minima tagħhom, jew “id-data sa meta jistgħu jintużaw l-aħħar”.

(14)

Għaldaqstant jenħtieġ li r-Regolament (UE) Nru 231/2012 jiġi emendat skont dan.

(15)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,