(1)

Ir-Regolament tal-Kummissjoni (KE) Nru 1881/2006 (2) jiffissa l-livelli massimi ta’ ċerti kontaminanti, inklużi d-diossini u l-poliklorobifenili (PCBs) simili għad-diossini, fl-oġġetti tal-ikel.

(2)

Fl-2018, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar ir-riskji għas-saħħa tal-annimali u dik pubblika relatati mal-preżenza ta’ diossini u PCBs simili għad-diossini fl-għalf u fl-ikel (3). L-Awtorità stabbiliet doża tollerabbli fil-ġimgħa ta’ 2 pg TEQ (ekwivalenza tossika)/kg piż tal-ġisem/ġimgħa għas-somma ta’ diossini u PCBs simili għad-diossini. L-istimi tal-esponiment kroniku fid-dieta tal-bniedem għad-diossini u l-PCBs simili għad-diossini bbażati fuq id-data disponibbli dwar l-okkorrenza jindikaw eċċess sinifikanti tad-doża tollerabbli fil-ġimgħa għall-popolazzjonijiet tal-gruppi tal-etajiet kollha.

(3)

Fl-opinjoni xjentifika tagħha l-Awtorità tirrakkomanda li jiġu evalwati mill-ġdid d-WHO2005-TEFs (Fatturi ta’ Ekwivalenza Tossika) attwali sabiex tqis id-data l-ġdida in vivo u in vitro, b’mod partikolari fir-rigward tal-PCB-126.

(4)

L-Organizzazzjoni Dinjija tas-Saħħa (WHO) qiegħda attwalment twettaq rieżami tal-valuri tad-WHO 2005-TEF, li għandu jitlesta fl-2023.

(5)

Sakemm jitlesta dak ir-rieżami u sabiex sadanittant jiġi previst livell għoli ta’ protezzjoni għas-saħħa tal-bniedem, huwa xieraq li jiġu stabbiliti livelli massimi għad-diossini u għas-somma ta’ diossini u PCBs simili għad-diossini għal oġġetti tal-ikel li għadhom mhumiex koperti mil-leġiżlazzjoni tal-Unjoni u li għalihom id-data ta’ okkorrenza, reċentement saret disponibbli fil-bażi tad-data tal-Awtorità, bħal-laħam u l-prodotti tal-laħam minn kaprini, żwiemel, fniek, ċingjali, għasafar tal-kaċċa u ċriev u fwied tal-kaprini, taż-żwiemel u tal-għasafar tal-kaċċa, u li jiġi estiż il-livell massimu eżistenti għall-bajd tat-tiġieġ għall-bajd tal-pollam kollha bl-eċċezzjoni tal-bajd tal-wiżż.

(6)

Barra minn hekk, minħabba li mhux biss il-laħam tal-muskoli mill-appendiċi tal-granċijiet u l-krustaċji simili għall-granċijiet huwa kkunsmat iżda wkoll il-laħam tal-muskoli mill-addome ta’ dawn il-krustaċji, b’mod partikolari l-granċ Ċiniż, huwa xieraq li l-livelli massimi japplikaw ukoll għal-laħam tal-muskoli tal-addome ta’ dawn il-krustaċji.

(7)

Barra minn hekk, filwaqt li jitqies id-data disponibbli dwar l-okkorrenza u l-importanza li jiġi żgurat livell għoli ta’ protezzjoni tas-saħħa tal-bniedem, b’mod partikolari għall-gruppi vulnerabbli tal-popolazzjoni, huwa xieraq li diġà jitbaxxew il-livelli massimi għad-diossini u s-somma ta’ diossini u PCBs simili għad-diossini fil-ħalib u fil-prodotti tal-ħalib.

(8)

Għaldaqstant, jenħtieġ li r-Regolament (KE) Nru 1881/2006 jiġi emendat skont dan.

(9)

Jenħtieġ li jiġi pprovdut perjodu ta’ żmien raġonevoli għall-operaturi tan-negozji tal-ikel biex ikunu jistgħu jadattaw għal-livelli massimi stabbiliti f’dan ir-Regolament.

(10)

Filwaqt li jitqies li ċerti oġġetti tal-ikel koperti minn dan ir-Regolament għandhom ħajja tal-prodott fuq l-ixkaffa twila, oġġetti tal-ikel li tqiegħdu fis-suq legalment qabel id-data tal-applikazzjoni ta’ dan ir-Regolament jenħtieġ li jitħallew jibqgħu fis-suq.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,