(1)

Ir-Regolament (UE) 2016/429 jistabbilixxi regoli dwar il-mard tal-annimali li huwa trażmissibbli lill-annimali jew lill-bniedem, inkluż regoli għaċ-ċertifikati tas-saħħa tal-annimali meħtieġa biex jakkumpanjaw id-dħul fl-Unjoni u l-movimenti fl-Unjoni tal-konsenji ta’ annimali akkwatiċi u ċerti prodotti li ġejjin mill-annimali akkwatiċi. Jagħti wkoll is-setgħa lill-Kummissjoni biex tadotta atti ta’ implimentazzjoni li jistabbilixxu regoli għall-mudelli tal-formoli ta’ dawk iċ-ċertifikati tas-saħħa tal-annimali, kif ukoll regoli dwar l-informazzjoni li trid tiġi inkluża f’ċerti dokumenti u dikjarazzjonijiet meħtieġa għad-dħul fl-Unjoni ta’ tali konsenji.

(2)

Barra minn hekk, dak ir-Regolament jagħti s-setgħa lill-Kummissjoni biex tistabbilixxi regoli speċjali dwar il-mudelli tal-formoli taċ-ċertifikati tas-saħħa tal-annimali, tad-dikjarazzjonijiet u ta’ dokumenti oħra għall-annimali akkwatiċi li għalihom l-applikazzjoni tar-regoli stabbiliti f’dak ir-Regolament tista’ ma tkunx adegwata, filwaqt li titqies, inter alia, id-destinazzjoni finali tal-konsenja. Ir-Regolament (UE) 2016/429 jipprevedi wkoll li dawk iċ-ċertifikati tas-saħħa tal-annimali jistgħu jinkludu informazzjoni oħra meħtieġa skont leġiżlazzjoni oħra tal-Unjoni. Għaldaqstant, jenħtieġ li l-mudell taċ-ċertifikat tas-saħħa tal-annimali jiġi stabbilit f’dan ir-Regolament.

(3)

L-Artikolu 213(2) u l-Artikolu 224(4) tar-Regolament (UE) 2016/429 jagħtu wkoll is-setgħa lill-Kummissjoni biex tistabbilixxi permezz ta’ atti ta’ implimentazzjoni, regoli dwar il-mudelli taċ-ċertifikati tas-saħħa tal-annimali għal ċerti movimenti ta’ annimali akkwatiċi u ta’ ċerti prodotti li ġejjin minnhom. Għalhekk, jenħtieġ li l-mudell taċ-ċertifikati għall-movimenti ta’ tali konsenji fl-Unjoni jiġi stabbilit f’dan ir-Regolament.

(4)

L-Artikoli 238(3) u 239(3) tar-Regolament (UE) 2016/429 jagħtu s-setgħa lill-Kummissjoni biex tistabbilixxi, permezz ta’ atti ta’ implimentazzjoni, regoli dwar il-mudelli taċ-ċertifikati tas-saħħa tal-annimali, tad-dikjarazzjonijiet u ta’ dokumenti oħrajn għad-dħul fl-Unjoni ta’ annimali akkwatiċi li għalihom l-Unjoni mhijiex id-destinazzjoni finali. Għaldaqstant, jenħtieġ li l-mudell taċ-ċertifikat tas-saħħa tal-annimali jiġi stabbilit f’dan ir-Regolament.

(5)

Il-mudelli taċ-ċertifikati tas-saħħa tal-annimali stabbiliti f’dan ir-Regolament jenħtieġ li jkun fihom garanziji rilevanti sabiex jiġi żgurat li l-konsenji ta’ annimali akkwatiċi u ta’ ċerti prodotti li ġejjin mill-annimali akkwatiċi li jidħlu fl-Unjoni u li jiċċaqilqu fl-Unjoni ma joħolqux riskju sinifikanti għas-saħħa tal-annimali jew għas-saħħa pubblika. Tali garanziji jiddependu, inter alia, fuq il-mard rilevanti elenkat fl-Artikolu 5 u fl-Anness II tar-Regolament (UE) 2016/429 kif ukoll fuq il-kategorizzazzjoni tagħhom kif previst fl-Artikolu 9(1) ta’ dak ir-Regolament u fl-Anness tar-Regolament ta’ Implimentazzjoni tal-Kummissjoni (UE) 2018/1882 (3).

(6)

Ir-Regolament (UE) 2017/625 jistabbilixxi regoli għat-twettiq tal-kontrolli uffiċjali u attivitajiet uffiċjali oħra mwettqa mill-awtoritajiet kompetenti tal-Istati Membri sabiex jivverifikaw il-konformità mill-operaturi mar-regoli tal-Unjoni fl-oqsma msemmija fl-Artikolu 1(2) ta’ dak ir-Regolament, li jinkludu, inter alia, l-ikel u s-sikurezza tal-ikel kif ukoll is-saħħa tal-annimali u t-trattament xieraq tal-annimali. Iċ-ċertifikati uffiċjali huma definiti fir-Regolament (UE) 2017/625 bħala karta jew dokument elettroniku ffirmat mill-uffiċjal li jiċċertifika u li jipprovdi assigurazzjoni dwar il-konformità ma’ rekwiżit wieħed jew aktar stabbiliti fir-regoli msemmija fl-Artikolu 1(2) tiegħu. Dak ir-Regolament jagħti s-setgħa lill-Kummissjoni biex tistabbilixxi permezz ta’ atti ta’ implimentazzjoni, regoli dwar il-mudelli taċ-ċertifikati uffiċjali u għall-ħruġ ta’ tali ċertifikati.

(7)

Il-punt (c) tal-ewwel paragrafu tal-Artikolu 90 tar-Regolament (UE) 2017/625 jagħti s-setgħa lill-Kummissjoni biex tistabbilixxi permezz ta’ atti ta’ implimentazzjoni regoli dwar il-proċeduri li jridu jiġu segwiti għall-ħruġ ta’ ċertifikati ta’ sostituzzjoni. Għalhekk, huwa xieraq li jiġu stabbiliti rekwiżiti komuni fir-rigward tas-sostituzzjoni taċ-ċertifikati tas-saħħa tal-annimali f’dan ir-Regolament.

(8)

Sabiex jiġi evitat l-użu ħażin u l-abbuż, huwa importanti li jiġu stabbiliti regoli dwar il-każijiet fejn jista’ jinħareġ ċertifikat tas-saħħa tal-annimali ta’ sostituzzjoni kif ukoll ir-rekwiżiti li jridu jiġu ssodisfati biex jiġu sostitwiti ċ-ċertifikati tas-saħħa tal-annimali. Jenħtieġ li l-każijiet jiġu limitati għal żbalji amministrattivi, jew fil-każijiet fejn iċ-ċertifikat inizjali jkun saritlu ħsara jew intilef.

(9)

Ir-Regolament Delegat tal-Kummissjoni (UE) 2020/691 (4) jistabbilixxi regoli supplimentari fir-rigward tal-istabbilimenti tal-akkwakultura rreġistrati u approvati li jżommu annimali tal-akkwakultura u tat-trasportaturi tal-annimali akkwatiċi. B’mod partikolari, dak ir-Regolament jipprevedi regoli supplimentari fir-rigward tal-approvazzjoni tal-istabbilimenti tal-akkwakultura li jżommu annimali tal-akkwakultura li jippreżentaw riskju sinifikanti għat-trażmissjoni ta’ mard li jaffettwa lill-annimali akkwatiċi. Għalhekk, ċerti mudelli taċ-ċertifikati tas-saħħa tal-annimali stabbiliti f’dan ir-Regolament jenħtieġ li jinkludu l-garanziji rilevanti sabiex jiġi żgurat li l-istabbiliment ikun ġie approvat f’konformità mar-regoli stabbiliti fir-Regolament Delegat (UE) 2020/691. Barra minn hekk, dan ir-Regolament jenħtieġ li jqis ukoll id-definizzjonijiet stabbiliti fir-Regolament Delegat (UE) 2020/691.

(10)

Barra minn hekk, ir-Regolamenti Delegati tal-Kummissjoni (UE) 2020/692 (5) u 2020/990 (6) jistabbilixxu regoli li jissupplimentaw dawk stabbiliti fir-Regolament (UE) 2016/429. Ir-Regolament Delegat (UE) 2020/692 jistabbilixxi, inter alia, ir-rekwiżiti rilevanti dwar is-saħħa tal-annimali għad-dħul fl-Unjoni ta’ annimali akkwatiċi u ċerti prodotti li joriġinaw mill-annimali akkwatiċi. Għalhekk, il-mudelli taċ-ċertifikati tas-saħħa tal-annimali stabbiliti f’dan ir-Regolament jenħtieġ li jqisu l-garanziji rilevanti stabbiliti f’dawk ir-Regolamenti. Barra minn hekk, dan ir-Regolament jenħtieġ li jqis ukoll id-definizzjonijiet stabbiliti fir-Regolament Delegat (UE) 2020/692.

(11)

Ir-Regolament Delegat (UE) 2020/990 jistabbilixxi regoli speċifiċi dwar il-movimenti fl-Unjoni ta’ konsenji ta’ annimali akkwatiċi u ta’ prodotti li ġejjin mill-annimali akkwatiċi, inkluż ir-rekwiżiti għas-saħħa tal-annimali u għaċ-ċertifikazzjoni f’dan ir-rigward. B’mod partikolari, dak ir-Regolament jistabbilixxi ċerti regoli dwar il-kontenut taċ-ċertifikati tas-saħħa tal-annimali għall-annimali akkwatiċi u għal ċerti prodotti li ġejjin mill-annimali akkwatiċi. Għalhekk, il-mudelli taċ-ċertifikati tas-saħħa tal-annimali stabbiliti f’dan ir-Regolament jenħtieġ li jqisu r-regoli supplimentari stabbiliti fir-Regolament (UE) 2020/990. Barra minn hekk, dan ir-Regolament jenħtieġ li jqis ukoll id-definizzjonijiet stabbiliti fir-Regolament Delegat (UE) 2020/990.

(12)

Ir-Regolament ta’ Implimentazzjoni (UE) 2018/1882 jistabbilixxi d-definizzjoni ta’ “mard tal-kategorija D” li għalih huma meħtieġa miżuri biex jinżamm milli jinfirex. Barra minn hekk, dak ir-Regolament ta’ Implimentazzjoni jistipula li r-regoli għall-prevenzjoni u l-kontroll tal-mard għall-mard elenkat imsemmi fl-Artikolu 9(1) tar-Regolament (UE) 2016/429 għandhom japplikaw għall-kategoriji tal-mard elenkat għall-ispeċijiet u għall-gruppi ta’ speċijiet elenkati msemmija fit-tabella stabbilita fl-Anness ta’ dak ir-Regolament. Dik it-tabella telenka, inter alia, l-ispeċijiet vetturi għall-mard li jaffettwa l-annimali akkwatiċi. Għaldaqstant, dan jenħtieġ li jitqies fil-mudelli taċ-ċertifikati tas-saħħa tal-annimali stabbiliti f’dan ir-Regolament.

(13)

Il-mudelli taċ-ċertifikati tas-saħħa tal-annimali għall-movimenti fl-Unjoni u għad-dħul fl-Unjoni ta’ konsenji ta’ annimali akkwatiċi u ta’ ċerti prodotti li ġejjin mill-annimali akkwatiċi jenħtieġ li jkun fihom dettalji dwar il-konsenja u informazzjoni speċifika dwar is-saħħa tal-annimali ċċertifikata minn veterinarju uffiċjali. Fil-każ ta’ movimenti fl-Unjoni, il-mudelli taċ-ċertifikati tas-saħħa tal-annimali jenħtieġ li jkun fihom ukoll parti ddedikata biex tirreġistra l-kontrolli uffiċjali mwettqa matul tali movimenti u fil-post tad-destinazzjoni, kif ukoll ir-riżultati ta’ dawk il-kontrolli uffiċjali.

(14)

Ir-Regolament ta’ Implimentazzjoni tal-Kummissjoni (UE) 2020/2235 (7) jistabbilixxi l-mudelli taċ-ċertifikati tas-saħħa tal-annimali, il-mudelli taċ-ċertifikati uffiċjali u l-mudelli taċ-ċertifikati tas-saħħa tal-annimali/uffiċjali għall-moviment fl-Unjoni ta’ konsenji ta’ annimali u ta’ prodotti. Dak ir-Regolament ta’ Implimentazzjoni jipprevedi l-kompatibbiltà ta’ tali ċertifikati mas-Sistema tal-Kontroll tal-Kummerċ u tal-Esperti Veterinarji (TRACES) u jiffaċilita s-sistema taċ-ċertifikazzjoni fl-Unjoni. Għalhekk, il-mudelli taċ-ċertifikati tas-saħħa tal-annimali stabbiliti f’dan ir-Regolament għall-moviment fl-Unjoni ta’ konsenji ta’ annimali akkwatiċi u ta’ ċerti prodotti li ġejjin mill-annimali akkwatiċi jenħtieġ li jitfasslu abbażi tal-mudell taċ-ċertifikat tas-saħħa tal-annimali għall-moviment fl-Unjoni ta’ annimali u ta’ prodotti stabbiliti fil-Kapitolu 1 tal-Anness I tar-Regolament ta’ Implimentazzjoni (UE) 2020/2235.

(15)

Barra minn hekk, sabiex tiġi żgurata l-konsistenza u biex titjieb l-effiċjenza taċ-ċertifikazzjoni tas-saħħa tal-annimali, il-mudell taċ-ċertifikat tas-saħħa tal-annimali għad-dħul fl-Unjoni ta’ konsenji ta’ annimali akkwatiċi stabbilit f’dan ir-Regolament jenħtieġ li jitfassal abbażi tal-mudell taċ-ċertifikat uffiċjali għad-dħul fl-Unjoni ta’ annimali, prodotti li ġejjin mill-annimali, prodotti komposti, prodotti ġerminali, prodotti sekondarji mill-annimali, ġelbin għall-konsum mill-bniedem u żrieragħ maħsuba għall-produzzjoni ta’ ġelbin għall-konsum mill-bniedem stabbilit fil-Kapitolu 3 tal-Anness I tar-Regolament ta’ Implimentazzjoni (UE) 2020/2235.

(16)

Ir-Regolament (UE) 2017/625 jipprevedi li l-konsenji ta’ annimali u oġġetti jridu jkunu akkumpanjati minn ċertifikat uffiċjali maħruġ fuq karta jew f’forma elettronika. Barra minn hekk, ir-Regolament (UE) 2016/429 jipprevedi li ċ-ċertifikati tas-saħħa tal-annimali maħruġa f’forma elettronika, inkluż dawk iċ-ċertifikati tas-saħħa tal-annimali li jakkumpanjaw il-konsenji li jidħlu fl-Unjoni, jistgħu jissostitwixxu ċ-ċertifikati tas-saħħa tal-annimali maħruġa fuq karta. Għalhekk, huwa xieraq li jiġu stabbiliti rekwiżiti komuni fir-rigward tal-ħruġ ta’ ċertifikati tas-saħħa tal-annimali għal konsenji ta’ annimali akkwatiċi u ta’ ċerti prodotti li ġejjin mill-annimali akkwatiċi kemm fuq karta kif ukoll f’forma elettronika flimkien mar-rekwiżiti stabbiliti fl-Artikolu 217 tar-Regolament (UE) 2016/429 u fil-Kapitolu VII tat-Titolu II tar-Regolament (UE) 2017/625. Dawn ir-rekwiżiti komuni jenħtieġ li jiġu stabbiliti f’dan ir-Regolament.

(17)

Ir-Regolament (UE) 2017/625 jipprevedi li s-Sistema Integrata ta’ Ġestjoni għall-Kontrolli Uffiċjali (IMSOC) trid tippermetti l-produzzjoni, l-immaniġġjar u t-trażmissjoni taċ-ċertifikati uffiċjali, inkluż fil-forma elettronika. Ir-Regolament ta’ Implimentazzjoni tal-Kummissjoni (UE) 2019/1715 (8), jipprevedi li s-sistema TRACES hija l-komponent ta’ IMSOC li jippermetti li l-proċess kollu tal-produzzjoni taċ-ċertifikati jitwettaq b’mod elettroniku, u b’hekk jiġu evitati prattiki frodulenti jew qarrieqa fir-rigward taċ-ċertifikati tas-saħħa tal-annimali jew taċ-ċertifikati uffiċjali. Għalhekk, sabiex jiġi żgurat livell xieraq ta’ sigurtà tal-mezzi elettroniċi taċ-ċertifikazzjoni elettronika u filwaqt li jitqies l-għan li jiġi armonizzat il-proċess ta’ ċertifikazzjoni, il-mudelli taċ-ċertifikati tas-saħħa tal-annimali stabbiliti f’dan ir-Regolament jenħtieġ li jkunu kompatibbli mas-sistema TRACES.

(18)

Ir-Regolament tal-Kummissjoni (KE) Nru 1251/2008 (9) jistabbilixxi regoli speċifiċi għar-rekwiżiti taċ-ċertifikazzjoni għat-tqegħid fis-suq u għall-importazzjoni fl-Unjoni ta’ annimali tal-akkwakultura u prodotti minnhom. Madankollu, ir-regoli stabbiliti f’dak ir-Regolament diġà ġew sostitwiti bir-regoli stabbiliti fir-Regolamenti Delegati (UE) 2020/990 u (UE) 2020/692, u l-mudelli taċ-ċertifikati stabbiliti fir-Regolament (KE) Nru 1251/2008 iridu jiġu sostitwiti bil-mudelli taċ-ċertifikati tas-saħħa tal-annimali stabbiliti f’dan ir-Regolament. Għaldaqstant, sabiex tiġi evitata duplikazzjoni tar-regoli, ir-Regolament (KE) Nru 1251/2008 jenħtieġ li jitħassar.

(19)

Huwa xieraq li jiġi introdott perjodu tranżizzjonali biex titqies is-sitwazzjoni speċifika tal-awtoritajiet kompetenti fil-pajjiżi terzi li jridu jagħmlu l-arranġamenti meħtieġa biex jiżguraw il-konformità ma’ dan ir-Regolament u s-sitwazzjoni speċifika tal-vjeġġi tal-konsenji ta’ annimali akkwatiċi u ta’ prodotti li ġejjin mill-annimali akkwatiċi akkumpanjati minn ċertifikati tas-saħħa tal-annimali maħruġa f’konformità mar-Regolament (KE) Nru 1251/2008 qabel id-data tal-applikazzjoni ta’ dan ir-Regolament.

(20)

Billi r-Regolament (UE) 2016/429 japplika b’effett mill-21 ta’ April 2021, dan ir-Regolament jenħtieġ li japplika wkoll minn dik id-data.

(21)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

“kontenitur” tfisser kontenitur kif definit fil-punt (1) tal-Artikolu 2 tar-Regolament Delegat (UE) 2020/990;

(2)

“dgħajsa barrada” tfisser dgħajsa barrada kif definit fil-punt (2) tal-Artikolu 2 tar-Regolament Delegat (UE) 2020/990;

(3)

“lixka tas-sajd” tfisser lixka tas-sajd kif definit fil-punt (4) tal-Artikolu 2 tar-Regolament Delegat (UE) 2020/990;

(4)

“miżuri nazzjonali” tfisser miżuri nazzjonali kif definit fil-punt (5) tal-Artikolu 2 tar-Regolament Delegat (UE) 2020/990;

(5)

“ħabitat” tfisser ħabitat kif definit fil-punt (6) tal-Artikolu 2 tar-Regolament Delegat (UE) 2020/990;

(6)

“pajjiż terz, territorju jew żona tiegħu elenkati” tfisser pajjiż terz, territorju, żona jew kompartiment kif definit fil-punt (1) tal-Artikolu 2 tar-Regolament Delegat (UE) 2020/692;

(7)

“Stat Membru, żona jew kompartiment ħielsa mill-mard” tfisser Stat Membru, żona jew kompartiment kif definit fil-punt (7) tal-Artikolu 2 tar-Regolament Delegat (UE) 2020/990;

(8)

“programm ta’ eradikazzjoni” tfisser programm ta’ eradikazzjoni kif definit fil-punt (8) tal-Artikolu 2 tar-Regolament Delegat (UE) 2020/990.

(a)

AQUA-INTRA-ESTAB imfassal f’konformità mal-mudell stabbilit fil-Kapitolu 1 tal-Anness I, għall-annimali akkwatiċi maħsuba għall-istabbilimenti tal-akkwakultura;

(b)

AQUA-INTRA-RELEASE mfassal f’konformità mal-mudell stabbilit fil-Kapitolu 2 tal-Anness I, għall-annimali akkwatiċi maħsuba għar-rilaxx fl-ambjent naturali;

(c)

AQUA-INTRA-HC imfassal f’konformità mal-mudell stabbilit fil-Kapitolu 3 tal-Anness I, għall-annimali akkwatiċi maħsuba għall-konsum mill-bniedem;

(d)

AQUA-INTRA-RESTRICT imfassal f’konformità mal-mudell stabbilit fil-Kapitolu 4 tal-Anness I, għall-annimali akkwatiċi soġġetti għal restrizzjonijiet tal-moviment jew miżuri ta’ emerġenza fir-rigward tal-mard elenkat jew tal-mard emerġenti;

(e)

AQUA-INTRA-BAIT imfassal f’konformità mal-mudell stabbilit fil-Kapitolu 5 tal-Anness I, għall-annimali akkwatiċi maħsuba għall-użu bħala lixka ħajja tas-sajd;

(f)

PAO-AQUA-INTRA-PROCESS imfassal f’konformità mal-mudell stabbilit fil-Kapitolu 6 tal-Anness I, għall-prodotti li ġejjin mill-annimali tal-akkwakultura għajr l-annimali tal-akkwakultura ħajjin, maħsuba għal proċessar ulterjuri;

(g)

PAO-AQUA-INTRA-RESTRICT imfassal f’konformità mal-mudell stabbilit fil-Kapitolu 7 tal-Anness I, għall-prodotti li ġejjin mill-annimali tal-akkwakultura għajr l-annimali tal-akkwakultura ħajjin soġġetti għal restrizzjonijiet tal-moviment jew miżuri ta’ emerġenza fir-rigward tal-mard elenkat jew tal-mard emerġenti.