(1)

Fit-13 ta’ Novembru 2017, il-Kunsill adotta d-Deċiżjoni (PESK) 2017/2074 (1) dwar miżuri restrittivi fid-dawl tas-sitwazzjoni fil-Venezwela.

(2)

Il-Kunsill issottolinja li l-miżuri restrittivi huma gradwali, immirati, flessibbli u riversibbli, ma jaffettwawx lill-popolazzjoni ġenerali u għandhom l-għan li jrawmu proċess kredibbli u sinifikattiv li jista’ jwassal għal soluzzjoni negozjata u paċifika.

(3)

Fid-dawl tad-deterjorazzjoni kontinwa tas-sitwazzjoni fil-Venezwela, fit-22 ta’ Jannar 2018 il-Kunsill adotta d-Deċiżjoni (PESK) 2018/90 (2) li ddeżinjat seba’ persuni fil-lista ta’ persuni fiżiċi u ġuridiċi, entitajiet u korpi fl-Anness I għad-Deċiżjoni (PESK) 2017/2074.

(4)

Fit-28 ta’ Mejju 2018, il-Kunsill adotta konklużjonijiet li ddikjaraw li l-elezzjonijiet presidenzjali bikrija fil-Venezwela flimkien mal-elezzjonijiet reġjonali li saru fl-20 ta’ Mejju 2018 la kienu ħielsa u lanqas ġusti. L-Unjoni appellat li jsiru elezzjonijiet presidenzjali ġodda u ddikkjarat li hija ser taġixxi malajr bil-għan li timponi miżuri restrittivi addizzjonali li jkunu mmirati u riversibbli.

(5)

Fil-25 ta’ Ġunju 2018, bħala segwitu għall-konklużjonijiet tal-Kunsill tat-28 ta’ Mejju 2018, il-Kunsill adotta d-Deċiżjoni (PESK) 2018/901 (3) li ddeżinjat ħdax-il persuna.

(6)

Fil-25 ta’ Ottubru 2018, ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (ir-“Rappreżentant Għoli”) ħarġet dikjarazzjoni f’isem l-Unjoni li ddikjarat li l-Unjoni kienet għadha konvinta li jista’ jkun hemm biss soluzzjoni demokratika, politika u paċifika għall-kriżi attwali u ssottolinjat l-impenn tal-Unjoni li tuża l-istrumenti politiċi kollha tagħha biex tikkontribwixxi għall-kisba ta’ soluzzjoni bħal din.

(7)

Fis-6 ta’ Novembru 2018, il-Kunsill adotta d-Deċiżjoni (PESK) 2018/1656 (4) li ġeddiet il-miżuri restrittivi fis-seħħ minħabba s-sitwazzjoni fil-Venezwela fid-dawl tal-kriżi politika, ekonomika u soċjali kontinwa u li qed taggrava f’dak il-pajjiż.

(8)

F’Jannar, Frar, Marzu u April 2019, ir-Rappreżentant Għoli ħarġet dikjarazzjonijiet f’isem l-Unjoni dwar is-sitwazzjoni fil-Venezwela li enfasizzaw ir-rieda tal-Unjoni li tkompli tagħmel kull sforz possibbli sabiex jerġgħu jiġu stabbiliti d-demokrazija u l-istat tad-dritt, sabiex tieħu azzjoni ulterjuri u biex tirreaġixxi permezz ta’ miżuri xierqa għal deċiżjonijiet u azzjonijiet li jkomplu jdgħajfu l-istituzzjonijiet u l-prinċipji demokratiċi, l-istat tad-dritt u r-rispett għad-drittijiet tal-bniedem.

(9)

Fit-8 ta’ Lulju 2019, il-Kunsill adotta d-Deċiżjoni (PESK) 2019/1171 (5) li aġġornat id-dikjarazzjoni tar-raġunijiet għal tliet persuni elenkati.

(10)

Fis-16 ta’ Lulju 2019, ir-Rappreżentant Għoli ħarġet dikjarazzjoni f’isem l-UE li ddikjarat li r-rapport tal-Kummissarju Għoli tan-Nazzjonijiet Uniti għad-Drittijiet tal-Bniedem ikkonferma b’mod ċar u dettaljat il-grad u s-severità tal-ksur tad-drittijiet tal-bniedem, l-erożjoni tal-istat tad-dritt u ż-żarmar tal-istituzzjonijiet demokratiċi fil-Venezwela. L-Unjoni indikat ukoll li lesta tibda l-ħidma lejn l-applikazzjoni ta’ miżuri mmirati għal dawk il-membri tal-forzi tas-sigurtà involuti fit-tortura u ksur serju ieħor tad-drittijiet tal-bniedem.

(11)

Fis-26 ta’ Settembru 2019, bħala segwitu għad-dikjarazzjoni tas-16 ta’ Lulju 2019 u fid-dawl tas-sitwazzjoni serja kontinwa fil-Venezwela, il-Kunsill adotta d-Deċiżjoni (PESK) 2019/1596 (6) li ddeżinjat seba’ persuni.

(12)

F’dak il-kuntest, u f’konformità mal-Artikolu 13 tad-Deċiżjoni (PESK) 2017/2074, il-Kunsill irreveda l-miżuri restrittivi fis-seħħ fid-dawl tas-sitwazzjoni fil-Venezwela.

(13)

Wara li qies il-kriżi politika, ekonomika, soċjali u umanitarja li għaddejja bħalissa fil-Venezwela u b’azzjonijiet persistenti li jdgħajfu d-demokrazija, l-istat tad-dritt u r-rispett għad-drittijiet tal-bniedem, jenħtieġ li l-miżuri restrittivi fis-seħħ, inkluż id-deżinjazzjonijiet kollha, jiġġeddu sal-14 ta’ Novembru 2020. Dawn il-miżuri ma jaffettwawx lill-popolazzjoni ġenerali u jistgħu jitreġġgħu lura fid-dawl tal-progress li jkun sar lejn ir-restawr tad-demokrazija, l-istat tad-dritt u r-rispett għad-drittijiet tal-bniedem fil-Venezwela.

(14)

Id-deżinjazzjonijiet individwali li jinsabu fl-Anness I għad-Deċiżjoni (PESK) 2017/2074 ġew riveduti u l-informazzjoni dwar tmien persuni jenħtieġ li tiġi emendata.

(15)

Barra minn hekk, jenħtieġ li tiżdied dispożizzjoni fid-Deċiżjoni (PESK) 2017/2074 li tispeċifika li l-Kunsill u r-Rappreżentant Għoli jistgħu jipproċessaw data personali sabiex iwettqu l-kompiti tagħhom skont dik id-Deċiżjoni.

(16)

Għalhekk jenħtieġ li d-Deċiżjoni (PESK) 2017/2074 tiġi emendata skont dan,

(1)

Jiddaħħal l-Artikolu li ġej:

(*1)  Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).”."

(2)

L-ewwel paragrafu tal-Artikolu 13 huwa sostitwit b’dan li ġej:

”Din id-Deċiżjoni għandha tapplika sal-14 ta’ Novembru 2020.”.

(3)

L-Anness I huwa emendat skont l-Anness għal din id-Deċiżjoni.