15.6.2012   

MT

Il-Ġurnal Uffiċjali tal-Unjoni Ewropea

L 154/12

(1)

L-Artikolu 14(1)(d) tar-Regolament (KE) Nru 834/2007 jistabbilixxi r-regoli ġenerali tal-produzzjoni għall-għalf organiku fir-rigward tal-provvista tal-għalf. F’dak l-approċċ, l-għalf prodott fl-azjenda stess itemm iċ-ċiklu tal-produzzjoni organika fl-azjenda. Il-produzzjoni tal-għalf fl-azjenda u/jew l-użu ta’ riżorsi tal-għalf mir-reġjun inaqqsu t-trasport u huma ta’ benefiċċju għall-ambjent u għan-natura. B’hekk, sabiex l-għanijiet organiċi tar-Regolament (KE) Nru 834/2007 jintlaħqu aħjar u fid-dawl tal-esperjenza, huwa xieraq li jiġi stabbilit sehem minimu tal-għalf prodott fl-azjenda stess għall-ispeċi tal-ħnieżer u tat-tjur u li jiżdied is-sehem minimu għall-erbivori.

(2)

Il-leġiżlazzjoni orizzontali għall-materjali tal-għalf u għall-għalf kompost u l-addittivi tal-għalf inklużi fih ġiet irreveduta bir-Regolament (KE) Nru 767/2009 tal-Parlament Ewropew u tal-Kunsill tat-13 ta’ Lulju 2009 dwar it-tqegħid fis-suq u l-użu ta’ għalf, li jemenda r-Regolament (KE) Nru 1831/2003 tal-Parlament Ewropew u tal-Kunsill u li jħassar id-Direttiva tal-Kunsill 79/373/KEE, id-Direttiva tal-Kummissjoni 80/511/KEE, id-Direttivi tal-Kunsill 82/471/KEE, 83/228/KEE, 93/74/KEE, 93/113/KE u 96/25/KE u d-Deċiżjoni tal-Kummissjoni 2004/217/KE (2). Għalhekk, l-Artikoli u l-Annessi rilevanti tar-Regolament tal-Kummissjoni (KE) Nru 889/2008 (3) għandhom jiġu adattati.

(3)

L-iżvilupp ta’ regoli armonizzati tal-produzzjoni organika għat-tjur żgħar fil-livell tal-Unjoni huwa kumpless għaliex l-opinjonijiet dwar il-ħtiġijiet tekniċi jvarjaw ħafna bejn il-partijiet ikkonċernati. Sabiex ikun hemm lok għal iżjed żmien biex jiġu żviluppati regoli ddettaljati għall-produzzjoni ta’ għewietaq organiċi, jeħtieġ li r-regola eċċezzjonali dwar l-użu ta’ għewietaq mhux organiċi tiġi estiża.

(4)

Il-produzzjoni tal-għelejjel organiċi tal-proteini waqgħet lura mid-domanda. B’mod partikolari, fis-suq tal-Unjoni, il-provvista tal-proteini organiċi għadha mhix biżżejjed, f’termini tal-kwalità u tal-kwantità, sabiex jintlaqħu l-ħtiġijiet ta’ nutriment tal-ħnieżer u tat-tjur imrobbija fi rziezet organiċi. Għaldaqstant, huwa xieraq li jiġi permess proporzjon żgħir ta’ għalf mhux organiku tal-proteini bħala regola eċċezzjonali għal perjodu taż-żmien limitat.

(5)

Sabiex l-użu tat-terminu “organiku” u tal-logo organiku tal-UE fit-tikkettar tal-għalf prodott minn ingredjenti organiċi ikun speċifikat u ċċarat iżjed, id-dispożizzjonijiet rilevanti tar-Regolament (KE) Nru 889/2008 għandhom jerġgħu jinkitbu mill-ġdid.

(6)

L-użu ta’ addittivi tal-għalf jista’ jiġi permess fil-produzzjoni tal-għalf organiku b’ċerti kundizzjonijiet. L-Istati Membri applikaw għal numru ta’ sustanzi ġodda, li jridu jiġu awtorizzati skont l-Artikolu 16(1) tar-Regolament (KE) Nru 834/2007. Abbażi tar-rakkomandazzjonijiet tal-grupp ta’ esperti li jagħti pariri tekniċi dwar il-produzzjoni organika (EGTOP) (4), li kkonkluda li l-addittivi tal-għalf format tas-sodju, ferroċanur tas-sodju, natrolit-fonolit u klinoptilolit jikkonformaw mal-għanijiet u l-prinċipji organiċi, dawk is-sustanzi għandhom jiddaħħlu fl-Anness VI għar-Regolament (KE) Nru 889/2008.

(7)

Fit-Taqsima A tal-Anness VIII għar-Regolament (KE) Nru 889/2008 instab żball fir-rekwiżiti għall-użu ta’ estratti tal-klin bħala addittiv organiku tal-ikel u għaldaqstant dan l-iżball għandu jiġi kkoreġut.

(8)

Għaldaqstant, ir-Regolament (KE) Nru 889/2008 għandu jiġi emendat skont dan.

(9)

Sabiex l-operaturi jkollhom il-permess ikomplu jużaw ir-regoli eċċezzjonali tal-produzzjoni b’rabta mal-għalf u mal-għewietaq mhux organiċi wara d-data ta’ skadenza attwali ta’ dawk ir-regoli, l-emendi għar-regoli eċċezzjonali magħmulin b’dan ir-Regolament għandhom japplikaw mill-1 ta’ Jannar 2012 bil-għan li jiġu evitati l-ostakli fil-produzzjoni organika u t-tfixkil tagħha.

(10)

Il-miżuri previsti f’dan ir-Regolament huma skont l-opinjoni tal-Kumitat regolatorju għall-produzzjoni organika,

(1)

L-Artikolu 19 huwa sostitwit b’dan li ġej:

“Artikolu 19

Għalf mill-azjenda stess u minn sorsi oħrajn

1.   Fil-każ tal-erbivori, ħlief matul il-perjodu ta’ kull sena meta l-annimali jkunu fi tranżumanza suġġetta għall-Artikolu 17(4), mill-inqas 60 % tal-għalf għandu jiġi mill-unità agrikola stess jew f’każ li dan ma jkunx jista’ jsir, dan għandu jkun prodott f’kooperazzjoni ma’ rziezet organiċi oħrajn fl-istess reġjun.

2.   Fil-każ tal-majjali u tat-tjur, mill-inqas 20 % tal-għalf għandu jiġi mill-unità agrikola stess jew, f’każ li dan ma jkunx jista’ jsir, dan għandu jkun prodott fl-istess reġjun f’kooperazzjoni ma’ rziezet organiċi oħrajn jew ma’ operaturi kummerċjali organiċi tal-għalf oħrajn.

3.   Fil-każ tan-naħal, fl-aħħar tal-istaġun tal-produzzjoni l-kaxxi tan-naħal (l-iġbħa) għandhom jitħallew b’biżżejjed għasel u għabra tad-dakra għal matul ix-xitwa.

L-għalf tal-kolonji tan-naħal għandu jkun awtorizzat biss meta l-ħajja fil-kaxxi tan-naħal tkun fil-periklu minħabba l-kundizzjonijiet klimatiċi. Il-kaxxi tan-naħal għandhom jingħalfu bl-għasel organiku, bil-ġulepp taz-zokkor organiku jew biz-zokkor organiku.”

(2)

L-Artikolu 22 huwa sostitwit b’dan li ġej:

“Artikolu 22

L-użu ta’ ċerti prodotti u sustanzi fl-għalf

Għall-finijiet tal-Artikolu 14(1)(d)(iv) tar-Regolament (KE) Nru 834/2007, is-sustanzi li ġejjin biss jistgħu jintużaw fl-ipproċessar tal-ikel organiku u fl-għalf tal-annimali organiċi:

(3)

Fl-Artikolu 24, il-paragrafu 2 huwa sostitwit b’dan li ġej:

“2.   Il-prodotti fitoterapewtiċi, il-mikronutrijenti u l-prodotti elenkati fit-Taqsima 1 tal-Anness V u fit-Taqsima 3 tal-Anness VI għandhom jintużaw bi preferenza għal trattament veterinarju allopatiku kimikament issintesizzat jew għall-antibijotiċi, sakemm l-effett terapewtiku tagħhom huwa effettiv għall-ispeċi tal-annimal u għall-kundizzjoni li għaliha hu maħsub it-trattament.”

(4)

Fl-Artikolu 25k(1), il-punt (d) huwa sostitwit b’dan li ġej:

(5)

Fl-Artikolu 25m, il-paragrafu 1 huwa sostitwit b’dan li ġej:

“1.   Il-materjali tal-għalf li joriġinaw mill-minerali jistgħu jintużaw fl-akkwakultura organika jekk ikunu elenkati fit-Taqsima 1 tal-Anness V biss.”

(6)

Fil-punt (b) tal-Artikolu 42, id-data tal-“31 ta’ Diċembru 2011” hija sostitwita bid-data tal-“31 ta’ Diċembru 2014”

(7)

L-Artikolu 43 huwa sostitwit b’dan li ġej:

“Artikolu 43

L-użu ta’ għalf mhux organiku tal-proteini li joriġina mill-pjanti u mill-annimali għall-bhejjem

Meta l-kundizzjonijiet stabbiliti fl-Artikolu 22(2)(b) tar-Regolament (KE) Nru 834/2007 ikunu japplikaw u meta l-bdiewa ma jkunux jistgħu jakkwistaw għalf tal-proteini li jkun ġej biss mill-produzzjoni organika, jista’ jintuża proporzjon limitat ta’ għalf mhux organiku tal-proteini għall-ispeċi tal-ħnieżer u tat-tjur.

Il-perċentwal massimu ta’ għalf mhux organiku tal-proteini awtorizzat għal kull perjodu ta’ 12-il xahar għal dawk l-ispeċijiet għandu jkun ta’ 5 % għas-snin tal-kalendarju tal-2012, l-2013 u l-2014.

Iċ-ċifri għandhom jiġu kkalkulati kull sena bħala perċentwal tal-materja niexfa tal-għalf mill-agrikoltura.

L-operatur għandu jżomm evidenza dokumentata tal-ħtieġa li tintuża din id-dispożizzjoni.”

(8)

L-Artikoli 59 u 60 huma sostitwiti b’dan li ġej:

“Artikolu 59

L-ambitu, l-użu tal-marki kummerċjali u d-deskrizzjonijiet tal-bejgħ

Dan il-Kapitolu ma għandux japplika għall-ikel tal-annimali domestiċi u għall-għalf tal-annimali bil-pil.

Il-marki kummerċjali u d-deskrizzjonijiet tal-bejgħ li jkollhom indikazzjoni msemmija fl-Artikolu 23(1) tar-Regolament (KE) Nru 834/2007 jistgħu jintużaw biss jekk l-ingredjenti kollha li joriġinaw mill-pjanti jew mill-annimali jkunu ġejjin mill-metodu ta’ produzzjoni organika u jekk mill-inqas 95 % tal-materja niexfa tal-prodott tkun magħmula mit-tali ingredjenti.

Artikolu 60

Indikazzjonijiet dwar l-għalf ipproċessat

1.   It-termini msemmija fl-Artikolu 23(1) tar-Regolament (KE) Nru 834/2007 u l-logo organiku tal-UE jistgħu jintużaw fuq l-għalf ipproċessat dejjem jekk jitħarsu r-rekwiżiti kollha li ġejjin:

2.   Id-dikjarazzjoni li ġejja, suġġetta għar-rekwiżiti stabbiliti fil-punti (a) u (b) tal-paragrafu 1, hija permessa fil-każ ta’ prodotti li jinkludu kwantitajiet varjabbli ta’ materjali tal-għalf mill-metodu ta’ produzzjoni organika u/jew materjali tal-għalf minn prodotti f’konverżjoni għall-agrikoltura organika u/jew prodotti kif imsemmi fl-Artikolu 22 ta’ dan ir-Regolament:

‘jistgħu jintużaw fil-produzzjoni organika skont ir-Regolamenti (KE) Nru 834/2007 u (KE) Nru 889/2008’.”

(9)

L-Annessi V u VI huma sostitwiti bit-test mogħti fl-Anness għal dan ir-Regolament.