Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32011D0326

2011/326/UE: Deċiżjoni ta’ Implimentazzjoni tal-Kunsill tat- 30 ta’ Mejju 2011 li temenda d-Deċiżjoni ta’ Implimentazzjoni tal-Kunsill 2011/77/UE dwar l-għoti ta’ assistenza finanzjarja tal-Unjoni lill-Irlanda

ĠU L 147, 2.6.2011, p. 17–19 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dec_impl/2011/326/oj

2.6.2011   

MT

Il-Ġurnal Uffiċjali tal-Unjoni Ewropea

L 147/17

DEĊIŻJONI TA’ IMPLIMENTAZZJONI TAL-KUNSILL

tat-30 ta’ Mejju 2011

li temenda d-Deċiżjoni ta’ Implimentazzjoni tal-Kunsill 2011/77/UE dwar l-għoti ta’ assistenza finanzjarja tal-Unjoni lill-Irlanda

(2011/326/UE)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament tal-Kunsill (UE) Nru 407/2010 tal-11 ta’ Mejju 2010 li jistabbilixxi mekkaniżmu Ewropew ta’ stabbilizzazzjoni finanzjarja (1), u b’mod partikolari l-Artikolu 3(2) tiegħu,

Wara li kkunsidra l-proposta mill-Kummissjoni Ewropea,

Billi:

(1)

Fuq talba tal-Irlanda, il-Kunsill taha assistenza finanzjarja (Deċiżjoni ta’ Implimentazzjoni 2011/77/UE (2)) b’appoġġ għal programm qawwi ta’ riforma ekonomika u finanzjarja bil-għan li terġa’ tinkiseb il-fiduċja, u b’hekk l-ekonomija tkun tista’ tirritorna lejn tkabbir sostenibbli, u tiġi protetta l-istabbiltà finanzjarja fl-Irlanda, fiż-żona tal-euro u fl-Unjoni.

(2)

F’konformità mal-Artikolu 3(9) tad-Deċiżjoni ta’ Implimentazzjoni 2011/77/UE, il-Kummissjoni, flimkien mal-Fond Monetarju Internazzjonali (“FMI”) u f’kooperazzjoni mal-Bank Ċentrali Ewroepw (“BĊE”), għamlet l-ewwel reviżjoni tal-progress tal-awtoritajiet dwar l-implimentazzjoni tal-miżuri maqbula kif ukoll dwar l-effettività u l-impatt ekonomiku u soċjali ta’ dawk il-miżuri.

(3)

Skont il-projezzjonijiet attwali tal-Kummissjoni għat-tkabbir nominali tal-PDG (–3,6 % fl-2010, 1,3 % fl-2011, 2,8 % fl-2012 u 4,0 % fl-2013), il-perkors għall-aġġustament fiskali huwa konformi mar-Rakkomandazzjoni tal-Kunsill tas-7 ta’ Diċembru 2010 bil-għan li tinġieb fi tmiemha s-sitwazzjoni ta’ defiċit eċċessiv fl-Irlanda, skont l-Artikolu 126(7) tat-Trattat, u huwa konsistenti ma’ perkors għall-proporzjon ta’ dejn relatat mal-PDG ta’ 96,2 % fl-2010, 112,0 % fl-2011, 117,9 % fl-2012 u 120,3 % fl-2013. Għaldaqstant, il-proporzjon ta’ dejn relatat mal-PDG ikun stabbilizzat fl-2013 u, minn hemm 'il quddiem jaqbad it-triq lejn it-tnaqqis, dejjem jekk ikun hemm progress ulterjuri fit-tnaqqis tad-defiċit. Id-dinamika tad-dejn tiġi effettwata minn diversi operazzjonijiet ‘barra mill-baġit’, inkluż injezzjoni ta' kapital fil-banek fl-2011 b’effett nett ta’ żieda fid-dejn ta’ madwar 6 punti perċentwali ta’ PDG, suppożizzjoni biex jinżammu riżervi għoljin ta’ flus kontanti, u diferenzi bejn il-pagamenti dovuti u dawk ta’ interessi fi flus kontanti.

(4)

Ir-rikapitalizzazzjoni ta’ Allied Irish Bank, Bank of Ireland, u EBS Building Society sabiex il-proporzjon tal-kapital ewlieni Tier 1 tagħhom jilħaq livell ta’ 12 % (abbażi tar-Reviżjoni Prudenzjali tal-Valutazzjoni tal-Kapital 2010 “PCAR”), li kellha ssir sa Frar tal-2011, ġiet posposta mill-gvern li kien fl-aħħar tal-mandat tiegħu minħabba l-elezzjoni ġenerali li kienet fil-qrib.

(5)

Fil-31 ta’ Marzu 2011, il-Bank Ċentrali tal-Irlanda ħabbar ir-riżultati tal-PCAR u r-Reviżjoni Prudenzjali tal-Valutazzjoni tal-Likwidità (“PLAR”). Abbażi ta’ dawn il-valutazzjonijiet, l-erba’ banek domestiċi parteċipanti (Allied Irish Bank, Bank of Ireland, EBS Building Society u Irish Life & Permanent) instabu li kellhom bżonn total ta’ EUR 24 biljun f’kapital addizzjonali, inkluż kapital kontinġenti ta’ EUR 3 biljuni, biex jibqgħu kapitalizzati b’mod adegwat f’xenarju ta’ stress.

(6)

Fil-31 ta’ Marzu 2011 il-gvern il-ġdid, li ġie ffurmat wara l-elezzjoni tal-25 ta’ Frar 2011, ħabbar l-istrateġija tiegħu biex isaħħaħ u jirriforma l-banek domestiċi, li tinkludi li jiġi żgurat li tintlaħaq il-ħtieġa ta’ kapitalizzazzjoni identifikata mill-eżerċizzju tal-PCAR/PLAR. Sal-aħħar ta’ Lulju 2011 din għandha ġġib il-proporzjon tal-kapital ewlieni Tier 1 tal-banek domestiċi (suġġett għall-aġġustament adattat għall-bejgħ mistenni tal-assi fil-każ ta’ Irish Life & Permanent) 'il fuq sew mil-livell previst li jiġi milħuq sa Frar 2011.

(7)

Il-Bank Ċentrali tal-Irlanda għandu jirrikjedi lil Allied Irish Bank, Bank of Ireland, EBS Building Society u Irish Life & Permanent biex ilaħħqu mal-proporzjoni tas-self relatat mad-depożitu (“LDR”) ta’ 122,5 % sal-aħħar tal-2013, filwaqt li jevitaw il-bejgħ mgħaġġel tal-assi. Barra minn hekk, l-awtoritajiet Irlandiżi għandhom jagħmlu monitoraġġ mill-qrib tal-evoluzzjoni tal-proporzjon tal-Indiċi Nett ta’ Stabbiltà tal-Finanzjamenti u l-proporzjon tal-Kopertura tal-Likwidità tal-banek sabiex jiżguraw il-konverġenza mal-istandards emerġenti fi ħdan il-qafas ta’ Basel III. L-awtoritajiet għandhom jiżguraw li l-miri jintlaħqu billi jistabbilixxu qafas kredibbli għall-monitoraġġ tal-progress ibbażat fuq miri intermedji u jinċentivaw kif jixraq l-arranġamenti amministrattivi fi ħdan il-banek.

(8)

Hekk kif il-gvern il-ġdid beda jamministra, nieda reviżjoni komprensiva tan-nefqa biex jidentifika tfaddil effiċjenti u biex jallinja mill-qrib il-prijoritajiet li jsostnu l-konsolidazzjoni fiskali ma’ dawk għall-irkupru nazzjonali stabbiliti fil-Programm tal-Gvern (2011-16) imħabbar fis-7 ta’ Marzu 2011.

(9)

Fid-dawl ta’ dawn l-iżviluppi, id-Deċiżjoni ta’ Implimentazzjoni 2011/77/UE għandha tiġi emendata,

ADOTTA DIN ID-DEĊIŻJONI:

Artikolu 1

L-Artikolu 3 tad-Deċiżjoni ta’ Implimentazzjoni 2011/77/UE huwa emendat kif ġej:

(1)

Fil-paragrafu 5, il-punt (a) huwa sostitwit b’dan li ġej:

‘(a)

tieħu azzjoni sabiex tiżgura li l-banek domestiċi huma kapitalizzati b’mod adegwat fil-forma ta' ekwità, jekk meħtieġ, sabiex jiġi żgurat li dawn jirrispettaw ir-rekwiżit regolatorju minimu ta’ proporzjon tal-kapital ewlieni Tier 1 ta’ 10,5 % matul il-programm ta’ assistenza finanzjarja tal-UE kollu, filwaqt li jsir proċess ta’ tnaqqis lejn il-mira tal-proporzjon tas-self relatat mad-depożiti ta’ 122,5 % sal-aħħar tal-2013;’.

(2)

Il-paragrafu 7 huwa emendat kif ġej:

(a)

Fil-punt (b) tiżdied is-sentenza li ġejja:

‘F’konsultazzjoni mal-Kummissjoni Ewropea, il-FMI u l-BĊE, l-Irlanda tista' tintroduċi bidliet baġitarji għal dawn il-miżuri speċifikati hawn fuq biex tirrealizza kompletament l-effiċjenzi li għandhom jiġu identifikati mir-Reviżjoni Komprensiva tan-Nefqa li għaddejja u l-prijoritajiet tal-Programm għall-Gvern, konsistenti mal-għan ġenerali biex ikun żgurat li l-baġit għall-2012 irendi konsolidazzjoni fiskali ta’ mill-inqas EUR 3,6 biljun;’.

(b)

Il-punt (e) huwa sostitwit b’dan li ġej:

‘(e)

l-adozzjoni ta' miżuri li jirrinforzaw strateġija baġitarja kredibbli u li jsaħħu l-qafas baġitarju. L-Irlanda għandha tadotta u timplimenta r-regola fiskali li kwalunkwe dħul addizzjonali mhux ippjanat bejn l-2011 u l-2015 jiġi allokat għat-tnaqqis tad-defiċit u d-dejn. L-Irlanda għandha tistabbilixxi kunsill fiskali konsultattiv biex jipprovdi valutazzjoni indipendenti dwar il-pożizzjoni u l-previżjonijiet baġitarji tal-gvern. L-Irlanda għandha tadotta liġi dwar ir-responsabbiltà fiskali li tintroduċi qafas ta’ infiq fuq perijodu ta’ żmien medju b’limiti multiannwali vinkolanti fuq l-infiq f’kull qasam. Din għandha ssir billi jitqiesu kwalunkwe riformi dwar governanza ekonomika riveduta fil-livell tal-Unjoni u tibni fuq ir-riformi fis-seħħ;’.

(c)

Il-punt (g) huwa sostitwit b’dan li ġej:

‘(g)

ir-rikapitalizzazzjoni tal-banek domestiċi sal-aħħar ta’ Lulju 2011 (suġġett għall-aġġustament adattat għall-bejgħ mistenni tal-assi fil-każ ta’ Irish Life & Permanent) f’konformità mas-sejbiet tal-PLAR u l-PCAR tal-2011, kif imħabbar mill-Bank Ċentrali tal-Irlanda fil-31 ta’ Marzu 2011;’.

(d)

Il-punt (l) huwa sostitwit b’dan li ġej:

‘(l)

biex titjieb il-kompetizzjoni fis-swieq miftuħa. Għal dan il-għan, il-leġislazzjoni għandha tiġi rriformata biex tiġġenera deterrenza aktar kredibbli billi tiżgura d-disponibbiltà ta’ sanzjonijiet effettivi għall-ksur tal-liġi Irlandiża tal-kompetizzjoni u l-Artikoli 101 u 102 tat-Trattat kif ukoll tiżgura l-funzjonament effettiv tal-Awtorità tal-Kompetizzjoni. Barra minn hekk, sakemm idum il-programm, l-awtoritajiet għandhom jiżguraw li ma jingħatawx eżenzjonijiet ulterjuri għall-qafas tal-liġi tal-kompetizzjoni sakemm ma jkunux kompletament konsistenti mal-miri tal-programm ta’ assistenza finanzjarja tal-Unjoni u l-ħtiġijiet tal-ekonomija;’.

(e)

Il-punti li ġejjin huma miżjuda:

‘(n)

isir proċess ta’ diżingranar lejn il-mira tal-proporzjonijiet tas-self relatat mad-depożitu stabbilit skont il-PLAR tal-2011;

(o)

il-preparazzjoni ta’ pjan biex isostni s-solvenza u l-vijabbiltà tal-istituzzjonijiet mhux kapitalizzati biżżejjed fis-settur tal-unjoni tal-kreditu, inkluż billi l-Bank Ċentrali tal-Irlanda jingħata l-poteri meħtieġa biex jippromwovi grad ogħla ta’ konsolidazzjoni tas-settur permezz ta’ fużjonijiet fejn jixraq, b’appoġġ finanzjarju mill-gvern jekk ġustifikat;

(p)

is-sottomissjoni ta’ leġislazzjoni lill-Oireachtas biex jassistu lill-banek kooperattivi (credit unions) b’qafas regolatorju imsaħħaħ inkluż amministrazzjoni aktar effettiva u rekwiżiti regolatorji.’.

(3)

Il-paragrafu 8 huwa emendat kif ġej:

(a)

Fil-punt (a), tiżdied is-sentenza li ġejja:

‘F’konsultazzjoni mal-Kummissjoni Ewropea, il-FMI u l-BĊE, l-Irlanda tista' tintroduċi bidliet baġitarji f’dawn il-miżuri speċifikati hawn fuq biex tirrealizza kompletament l-effiċjenzi li għandhom jiġu identifikati mir-Reviżjoni Komprensiva tan-Nefqa li għaddejja u l-prijoritajiet tal-Programm għall-Gvern, konsistenti mal-għan ġenerali biex ikun żgurat li l-baġit għall-2013 irendi konsolidazzjoni fiskali ta’ mill-inqas EUR 3,1 biljun;’.

(b)

Il-punt li ġej huwa miżjud:

‘(c)

Isir proċess ta' diżingranar tal-banek domestiċi lejn il-miri tal-proporzjon tas-self relatat mad-depożitu stabbiliti skont il-PLAR tal-2011.’.

Artikolu 2

Din id-Deċiżjoni hija indirizzata lill-Irlanda.

Artikolu 3

Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.

Magħmul fi Brussell, it-30 ta’ Mejju 2011.

Għall-Kunsill

Il-President

CSÉFALVAY Z.

(1)  ĠU L 118, 12.5.2010, p. 1.

(2)  ĠU L 30, 4.2.2011, p. 34.

Top