Този документ е извадка от уебсайта EUR-Lex.
Документ 32023R0949
Commission Implementing Regulation (EU) 2023/949 of 12 May 2023 authorising the placing on the market of iron milk caseinate as a novel food and amending Implementing Regulation (EU) 2017/2470 (Text with EEA relevance)
Regolament ta’ Implimentazzjoni tal-Kummissjoni (UE) 2023/949 tat-12 ta’ Mejju 2023 li jawtorizza l-introduzzjoni fis-suq tal-kaseinat tal-ħadid tal-ħalib bħala ikel ġdid u li jemenda r-Regolament ta’ Implimentazzjoni (UE) 2017/2470 (Test b’relevanza għaż-ŻEE)
Regolament ta’ Implimentazzjoni tal-Kummissjoni (UE) 2023/949 tat-12 ta’ Mejju 2023 li jawtorizza l-introduzzjoni fis-suq tal-kaseinat tal-ħadid tal-ħalib bħala ikel ġdid u li jemenda r-Regolament ta’ Implimentazzjoni (UE) 2017/2470 (Test b’relevanza għaż-ŻEE)
C/2023/3054
ĠU L 128, 15.5.2023г., стр. 60—66
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
В сила
15.5.2023 |
MT |
Il-Ġurnal Uffiċjali tal-Unjoni Ewropea |
L 128/60 |
REGOLAMENT TA’ IMPLIMENTAZZJONI TAL-KUMMISSJONI (UE) 2023/949
tat-12 ta’ Mejju 2023
li jawtorizza l-introduzzjoni fis-suq tal-kaseinat tal-ħadid tal-ħalib bħala ikel ġdid u li jemenda r-Regolament ta’ Implimentazzjoni (UE) 2017/2470
(Test b’relevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2015/2283 tal-Parlament Ewropew u tal-Kunsill tal-25 ta’ Novembru 2015 dwar ikel ġdid, li jemenda r-Regolament (UE) Nru 1169/2011 tal-Parlament Ewropew u tal-Kunsill u li jħassar ir-Regolament (KE) Nru 258/97 tal-Parlament Ewropew u tal-Kunsill u r-Regolament tal-Kummissjoni (KE) Nru 1852/2001 (1), u b’mod partikolari, l-Artikolu 12(1) tiegħu,
Billi:
(1) |
Ir-Regolament (UE) 2015/2283 jipprevedi li huwa biss ikel ġdid awtorizzat u elenkat fil-lista tal-Unjoni ta’ ikel ġdid li jista’ jiġi introdott fis-suq fl-Unjoni. |
(2) |
Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni ta’ ikel ġdid. |
(3) |
Fis-16 ta’ Ġunju 2020, il-kumpanija Société des Produits Nestlé S.A. (“l-applikant”) ressqet applikazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 biex tintroduċi bħala ikel ġdid fis-suq tal-Unjoni l-proteinat tal-ħadid tal-ħalib, kumpless ta’ ħadid bil-kaseina miksub mill-ħalib bovin stabbilizzat permezz tal-fosfat. L-applikant talab li l-proteinat tal-ħadid tal-ħalib jintuża bħala sors ta’ ħadid fil-ħalib u fil-prodotti tat-trab tal-ħalib, fis-soft drinks ikkummerċjalizzati b’rabta mal-eżerċizzju fiżiku, fit-trab tat-taħlitiet tax-xorb tal-kawkaw, fit-trab jew fis-sostituti tal-kafe abbażi tal-malt, fil-bars taċ-ċereali, fin-noodles minbarra l-glass noodles, fil-kubi jew fil-granulati tal-istokk (bażijiet tal-brodu), fis-sostituti ta’ ikla unika għall-kontroll tal-piż, fis-sostitut tad-dieta kollha għall-kontroll tal-piż kif definit fl-Artikolu 2 tar-Regolament (UE) Nru 609/2013 tal-Parlament Ewropew u tal-Kunsill (3), fl-ikel għal skopijiet mediċi speċjali kif definit fl-Artikolu 2 tar-Regolament (UE) Nru 609/2013 minbarra l-ikel għat-trabi u għat-tfal żgħar, u f’supplimenti tal-ikel kif definit fl-Artikolu 2 tad-Direttiva 2002/46/KE tal-Parlament Ewropew u tal-Kunsill (4) maħsub għall-popolazzjoni ġenerali minbarra t-trabi u t-tfal żgħar. Il-livell tal-użu proposti fis-supplimenti tal-ikel indikati fl-applikazzjoni kienu ta’ massimu ta’ 700 mg/jum li jikkorrispondi għal massimu ta’ 14 mg ħadid kuljum. L-applikant ippropona wkoll li jenħtieġ li s-supplimenti tal-ikel li fihom il-proteinat tal-ħadid tal-ħalib ma jintużawx jekk jiġi kkonsmat ikel ieħor bil-proteinat tal-ħadid tal-ħalib dakinhar stess. |
(4) |
Fil-16 ta’ Ġunju 2020, l-applikant għamel ukoll talba lill-Kummissjoni għall-protezzjoni tad-data proprjetarja għal studju in vitro dwar id-diġestibilità tal-proteinat tal-ħadid tal-ħalib f’kondizzjonijiet gastriċi simulati (5); għaċ-ċertifikati tal-analiżijiet tal-kompożizzjoni tal-lottijiet tal-produzzjoni tal-proteinat tal-ħadid (6); għal studju in vitro dwar l-impatt tal-aċidu askorbiku fuq il-bijodisponibbiltà tal-ħadid tal-proteinat tal-ħadid tal-ħalib (7); għal studju inkroċjat randomizzat fuq il-bniedem dwar il-bijodisponibbiltà tal-ħadid mill-ħalib sħiħ li fih il-proteinat tal-ħadid tal-ħalib meta mqabbel mas-sulfat ferruż (8); studju dwar it-tossiċità orali akuta fir-rodituri (9); għal rapport dwar il-valutazzjoni tal-konsum tal-proteinat tal-ħadid tal-ħalib li jirriżulta mill-użi proposti (10); għal strateġija u r-riżultati ta’ studju tar-riċerka fil-litteratura mmexxija mill-applikant (11); u għal studju dwar il-bijoaċċessibbiltà tal-ħadid mill-kumplessi tal-kaseina tal-ħadid prodotti mill-ħalib (12), imressqa b’appoġġ għall-applikazzjoni. |
(5) |
Fid-9 ta’ Ottubru 2020, il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) twettaq valutazzjoni tal-proteinat tal-ħadid tal-ħalib bħala ikel ġdid f’konformità mal-Artikolu 10(3) tar-Regolament (UE) 2015/2283, u valutazzjoni dwar il-bijodisponibbiltà tal-ħadid fil-kuntest tad-Direttiva 2002/46/KE. |
(6) |
Fl-4 ta’ Awwissu 2022, l-Awtorità adottat l-opinjoni xjentifika tagħha dwar is-“Sikurezza tal-proteinat tal-ħadid tal-ħalib bħala ikel ġdid skont ir-Regolament (UE) 2015/2283 u l-bijodisponibilità tal-ħadid minn dan is-sors fil-kuntest tad-Direttiva 2002/46/KE” (13) f’konformità mal-Artikolu 11 tar-Regolament (UE) 2015/2283. |
(7) |
Il-Kummissjoni qieset li t-terminu “proteinat tal-ħadid tal-ħalib” użat biex jiddeskrivi l-identità tal-ikel ġdid hu pjuttost wiesgħa peress li jkun jinkorpora kwalunkwe proteina tal-ħalib bovin li tista’ tintuża filwaqt li l-ikel ġdid hu magħmul bl-użu tal-kaseina b’mod speċifiku. Għaldaqstant, it-terminu “kaseinat tal-ħadid tal-ħalib” ikun terminu aktar akkurat biex jiddeskrivih. Għalhekk, il-Kummissjoni talbet lill-applikant jaċċetta l-isem “kaseinat tal-ħadid tal-ħalib” għall-ikel ġdid minflok “proteinat tal-ħadid tal-ħalib”. Bħala tweġiba għat-talba tal-Kummissjoni, l-applikant qabel mal-isem “kaseinat tal-ħadid tal-ħalib” tal-ikel ġdid. |
(8) |
Fl-opinjoni xjentifika tagħha, l-Awtorità kkonkludiet li l-kaseinat tal-ħadid tal-ħalib huwa sikur fil-kondizzjonijiet tal-użu proposti għall-popolazzjonijiet fil-mira proposti, u li huwa sors li minnu l-ħadid huwa bijodisponibbli. Madankollu, f’dik l-opinjoni, l-Awtorità nnutat li, peress li ma kinitx stabbiliet Limitu Massimu tollerabbli (Upper Intake Limit, “UL”), il-konsum tal-ħadid minn xi ikel u minn xi supplimenti tal-ikel li fihom l-ikel ġdid seta’ jaqbeż il-livelli ta’ gwida għall-popolazzjoni li ġew stabbiliti mill-Istati Membri, u li l-konsum ikkombinat tal-ħadid mill-ikel u mis-supplimenti tal-ikel li fihom l-ikel ġdid u mid-dieta fl-isfond, ikun għoli. Fid-dawl tal-kunsiderazzjonijiet tal-Awtorità u tar-rwol ċentrali tal-ħadid fil-fiżjoloġija, fit-tkabbir u fl-iżvilupp tal-bniedem, b’mod partikolari fl-istadji bikrija tal-ħajja, u tal-linja pjuttost fina bejn l-effetti ta’ benefiċċju u dawk negattivi tal-ħadid fuq is-saħħa skont il-konsum, il-Kummissjoni tqis li huwa meħtieġ approċċ prekawzjonarju. |
(9) |
Għalhekk, il-Kummissjoni talbet lill-applikant biex jikkunsidra mill-ġdid il-livelli tal-kaseinat tal-ħadid tal-ħalib proposti fl-applikazzjoni tiegħu għal uħud mill-oġġetti tal-ikel li x’aktarx jikkontribwixxu l-aktar għall-konsum ta’ kuljum tal-ħadid, jiġifieri, il-ħalib u l-prodotti tal-ħalib (livelli sa 950 mg/100 g jew ml li jkunu jikkorrispondu għal massimu ta’ 19 mg ta’ ħadid/100 g jew ml ta’ ikel), it-taħlitiet tax-xorb tal-kawkaw (livelli sa 800 mg/100 g jew ml li jkunu jikkorrispondu għal massimu ta’ 16 mg ta’ ħadid/100 g jew ml ta’ ikel), il-bars taċ-ċereali (livelli sa 700 mg/100 g jew ml li jkunu jikkorrispondu għam massimu ta’ 14 mg ta’ ħadid/100gr jew ml ta’ ikel), u għas-supplimenti tal-ikel (livelli sa 700 mg/jum li jkunu jikkorrispondu għal massimu ta’ 14 mg ta’ ħadid kuljum). Bħala tweġiba għat-talba tal-Kummissjoni, l-applikant immodifika t-talba tiegħu u ppropona l-użu tal-kaseinat tal-ħadid tal-ħalib fil-ħalib u fil-prodotti tal-ħalib f’livelli li ma jisbqux il-500 mg/100 g massimu ta’ 10 mg ta’ ħadid/100 g jew ml ta’ ikel, fit-taħlitiet tax-xorb tal-kawkaw f’livelli li ma jisbqux il-400 mg/100 g jew ml ta’ ikel li jikkorrispondu għal massimu ta’ 8 mg ta’ ħadid/100 g jew ml ta’ ikel, u fil-bars taċ-ċereali f’livelli li ma jisbqux it-350 mg/100 g jew ml ta’ ikel li jikkorrispondu għal massimu ta’ 7 mg ta’ ħadid/100 g jew ml ta’ ikel. L-applikant immodifika wkoll it-talba tiegħu fir-rigward tal-użu tal-kaseinat tal-ħadid tal-ħalib fis-supplimenti tal-ikel, u ppropona l-użu tiegħu f’livelli li ma jisbqux is-700 mg kuljum li jikkorrispondu għal massimu ta’ 14 mg ta’ ħadid kuljum fis-supplimenti tal-ikel maħsuba għall-popolazzjoni adulta, u f’livelli li ma jisbqux it-350 mg kuljum li jikkorrispondu għal massimu ta’ 7 mg ta’ ħadid kuljum fis-supplimenti tal-ikel maħsuba għat-tfal u għall-adolexxenti taħt it-18-il sena, minbarra t-trabi u t-tfal żgħar. Barra minn hekk, l-applikant indika li se jaġġusta l-livelli tal-kaseinat tal-ħadid tal-ħalib fl-ikel u fis-supplimenti tal-ikel introdotti fis-suq ta’ Stat Membru biex jillimita l-livelli massimi korrispondenti tal-ħadid għall-valuri ta’ gwida stabbiliti minn dak l-Istat Membru għal kull grupp ta’ età tal-popolazzjoni. Il-Kummissjoni tqis li l-użi riveduti jissodisfaw il-kondizzjonijiet għall-introduzzjoni fis-suq tal-kaseinat tal-ħadid tal-ħalib f’konformità mal-Artikolu 12(1) tar-Regolament (UE) 2015/2283. |
(10) |
Għalhekk, dik l-opinjoni xjentifika tipprovdi biżżejjed raġunijiet biex jiġi stabbilit li l-kaseinat tal-ħadid tal-ħalib, meta jintuża bħala sors ta’ ħadid fil-ħalib u fil-prodotti tat-trab tal-ħalib, fis-soft drinks ikkummerċjalizzati b’rabta mal-eżerċizzju fiżiku, fit-trab tat-taħlitiet tax-xorb tal-kawkaw, fit-trab jew fis-sostituti tal-kafe abbażi tal-malt, fil-bars taċ-ċereali, fin-noodles minbarra glass noodles, fil-kubi jew fil-granulati tal-istokk (bażijiet tal-brodu), fis-sostituti ta’ ikla unika għall-kontroll tal-piż, fis-sostitut tad-dieta kollha għall-kontroll tal-piż kif definit fl-Artikolu 2 tar-Regolament (UE) Nru 609/2013, fl-ikel għal skopijiet mediċi speċjali kif definit fl-Artikolu 2 tar-Regolament (UE) Nru 609/2013 minbarra l-ikel għat-trabi u għat-tfal żgħar, u fis-supplimenti tal-ikel kif definiti fl-Artikolu 2 tad-Direttiva 2002/46/KE f’livelli li ma jisbqux is-700 mg/jum (14 mg ta’ ħadid/jum) f’supplimenti tal-ikel maħsuba għall-popolazzjoni adulta, u f’ livelli li ma jisbqux it-350 mg/jum (7 mg ta’ ħadid/jum) f’supplimenti tal-ikel maħsuba għat-tfal u l-adolexxenti taħt l-età ta’ 18-il sena, minbarra t-trabi u t-tfal żgħar, jissodisfa l-kondizzjonijiet għall-introduzzjoni tiegħu fis-suq f’konformità mal-Artikolu 12(1) tar-Regolament (UE) 2015/2283. |
(11) |
Fl-opinjoni xjentifika tagħha, l-Awtorità nnotat li l-konklużjoni tagħha dwar is-sikurezza tal-ikel ġdid kienet ibbażata fuq id-data xjentifika mill-istudju in vitro dwar id-diġestibilità tal-kaseinat tal-ħadid tal-ħalib f’kondizzjonijiet gastriċi simulati; fuq iċ-ċertifikati tal-analiżi tal-kompożizzjoni tal-lottijiet tal-produzzjoni tal-kaseinat tal-ħadid tal-ħalib; fuq l-istudju in vitro dwar l-impatt tal-aċidu askorbiku fuq il-bijodisponibbiltà tal-ħadid tal-kaseinat tal-ħadid tal-ħalib; u, fuq l-istudju inkroċjat randomizzat fuq il-bniedem dwar il-bijodisponibbiltà tal-ħadid mill-ħalib sħiħ li fih il-kaseinat tal-ħadid tal-ħalib meta mqabbel mas-sulfat ferruż, li jinsab fil-fajl tal-applikant, li mingħajru ma setax jivvaluta l-ikel ġdid u jasal għall-konklużjoni tiegħu. |
(12) |
Il-Kummissjoni talbet lill-applikant biex jiċċara aktar il-ġustifikazzjoni mogħtija fir-rigward tal-pretensjoni proprjetarja tiegħu fuq dik id-data u l-istudji xjentifiċi, u biex jiċċara t-talba tiegħu għal dritt esklużiv ta’ referenza għalihom f’konformità mal-Artikolu 26(2)(b) tar-Regolament (UE) 2015/2283. |
(13) |
L-applikant iddikjara li kellu drittijiet proprjetarji u esklużivi ta’ referenza għad-data u għall-istudji xjentifiċi mressqa b’appoġġ għall-applikazzjoni, jiġifieri l-istudju in vitro dwar id-diġestibilità tal-kaseinat tal-ħadid tal-ħalib f’kondizzjonijiet gastriċi simulati; iċ-ċertifikati tal-analiżijiet tal-kompożizzjoni tal-lottijiet tal-produzzjoni tal-kaseinat tal-ħadid tal-ħalib; l-istudju in vitro dwar l-impatt tal-aċidu askorbiku fuq il-bijodisponibbiltà tal-ħadid tal-kaseinat tal-ħadid tal-ħalib; u, l-istudju inkroċjat randomizzat fuq il-bniedem dwar il-bijodisponibbiltà tal-ħadid mill-ħalib sħiħ li fih il-kaseinat tal-ħadid tal-ħalib meta mqabbel mas-sulfat ferruż, u li l-partijiet terzi ma jistgħux jaċċessaw, jużaw jew jirreferu legalment għal dik id-data. |
(14) |
Il-Kummissjoni vvalutat l-informazzjoni kollha pprovduta mill-applikant u qieset li l-applikant wera b’mod sostanzjali biżżejjed li kien issodisfa r-rekwiżiti stipulati fl-Artikolu 26(2) tar-Regolament (UE) 2015/2283. Għalhekk, l-istudji u d-data xjentifika mill-istudju in vitro dwar id-diġestibilità tal-kaseinat tal-ħadid tal-ħalib f’kondizzjonijiet gastriċi simulati; iċ-ċertifikati tal-analiżijiet tal-kompożizzjoni tal-lottijiet tal-produzzjoni tal-kaseinat tal-ħadid tal-ħalib; l-istudju in vitro dwar l-impatt tal-aċidu askorbiku fuq il-bijodisponibbiltà tal-ħadid tal-kaseinat tal-ħadid tal-ħalib; u, l-istudju inkroċjat randomizzat fuq il-bniedem dwar il-bijodisponibbiltà tal-ħadid mill-ħalib sħiħ li fih il-kaseinat tal-ħadid tal-ħalib meta mqabbel mas-sulfat ferruż, jenħtieġ li jiġu protetti f’konformità mal-Artikolu 27(1) tar-Regolament (UE) 2015/2283. Għaldaqstant jenħtieġ li l-applikant biss ikun awtorizzat jintroduċi l-kaseinat tal-ħadid tal-ħalib fis-suq fl-Unjoni għal perjodu ta’ 5 snin mid-dħul fis-seħħ ta’ dan ir-Regolament. |
(15) |
Madankollu, ir-restrizzjoni tal-awtorizzazzjoni tal-kaseinat tal-ħadid tal-ħalib u tar-referenza għad-data xjentifika fil-fajl tal-applikant għall-użu tiegħu biss ma twaqqafx lil applikanti sussegwenti milli japplikaw għal awtorizzazzjoni biex jintroduċu l-istess ikel ġdid fis-suq, dment li l-applikazzjoni tagħhom tissejjes fuq informazzjoni miksuba legalment li tappoġġa din l-awtorizzazzjoni. |
(16) |
Fi qbil mal-kondizzjonijiet tal-użu tas-supplimenti tal-ikel li fihom il-kaseinat tal-ħadid tal-ħalib kif propost mill-applikant, u mal-opinjoni tal-Awtorità fir-rigward tal-konsum pjuttost għoli tal-ħadid mill-konsum kombinat tal-ħadid mill-ikel u mis-supplimenti tal-ikel li fihom l-ikel ġdid u d-dieta tal-isfond, huwa meħtieġ li l-konsumaturi jiġi mgħarrfa permezz tat-tikkettar xieraq li jenħtieġ li s-supplimenti tal-ikel li fihom il-kaseinat tal-ħadid tal-ħalib ma jiġux ikkunsmati mit-trabi u mit-tfal ta’ taħt it-3 snin u jenħtieġ li ma jiġux kkunsmati jekk ikel ieħor li fih il-kaseinat tal-ħadid tal-ħalib miżjud jew ikel ieħor b’komposti miżjuda li fihom il-ħadid jiġu kkunsmati dakinhar stess. |
(17) |
Minħabba li s-sors tal-ikel ġdid ġej mill-ħalib bovin, li huwa elenkat fl-Anness II tar-Regolament (UE) Nru 1169/2011 tal-Parlament Ewropew u tal-Kunsill (14) bħala wieħed minn għadd ta’ sustanzi jew prodotti li jikkawżaw l-allerġiji jew l-intolleranzi, l-ikel li jkun fih il-kaseinat tal-ħadid tal-ħalib, jenħtieġ li jkun ittikkettat kif xieraq skont ir-rekwiżiti tal-Artikolu 21 ta’ dak ir-Regolament. |
(18) |
Jenħtieġ li l-kaseinat tal-ħadid tal-ħalib jiddaħħal fil-lista tal-Unjoni tal-ikel ġdid stabbilita fir-Regolament ta’ Implimentazzjoni (UE) 2017/2470. Għalhekk, jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat skont dan. |
(19) |
Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DAN IR-REGOLAMENT:
Artikolu 1
1. Il-kaseinat tal-ħadid tal-ħalib huwa awtorizzat li jiġi introdott fis-suq fl-Unjoni.
Il-kaseinat tal-ħadid tal-ħalib għandu jiddaħħal fil-lista tal-Unjoni tal-ikel ġdid stabbilita fir-Regolament ta’ Implimentazzjoni (UE) 2017/2470.
2. L-Anness tar-Regolament ta’ Implimentazzjoni (UE) 2017/2470 huwa emendat f’konformità mal-Anness ta’ dan ir-Regolament.
Artikolu 2
Il-kumpanija “Société des Produits Nestlé S.A.” (15) biss hija awtorizzata li tintroduċi fis-suq tal-Unjoni l-ikel ġdid, imsemmi fl-Artikolu 1, għal perjodu ta’ 5 snin mill-4 ta’ Ġunju 2023, sakemm xi applikant sussegwenti ma jiksibx awtorizzazzjoni għal dak l-ikel ġdid mingħajr referenza għad-data xjentifika protetta skont l-Artikolu 3 jew bi ftehim ma’ “Société des Produits Nestlé S.A.”.
Artikolu 3
Id-data xjentifika li tinsab fil-fajl tal-applikazzjoni u li tissodisfa l-kondizzjonijiet stabbiliti fl-Artikolu 26(2) tar-Regolament (UE) 2015/2283 ma għandhiex tintuża għall-benefiċċju ta’ applikant sussegwenti tul perjodu ta’ 5 snin mid-data tad-dħul fis-seħħ ta’ dan ir-Regolament mingħajr il-qbil ta’ “Société des Produits Nestlé S.A.”.
Artikolu 4
Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istat Membri kollha.
Magħmul fi Brussell, it-12 ta’ Mejju 2023.
Għall-Kummissjoni
Il-President
Ursula VON DER LEYEN
(1) ĠU L 327, 11.12.2015, p. 1.
(2) Ir-Regolament ta’ Implimentazzjoni tal-Kummissjoni (UE) 2017/2470 tal-20 ta’ Diċembru 2017 li jistabbilixxi l-lista tal-Unjoni tal-ikel ġdid skont ir-Regolament (UE) 2015/2283 tal-Parlament Ewropew u tal-Kunsill dwar ikel ġdid (ĠU L 351, 30.12.2017, p. 72).
(3) Ir-Regolament (UE) Nru 609/2013 tal-Parlament Ewropew u tal-Kunsill tat-12 ta’ Ġunju 2013 dwar ikel maħsub għat-trabi u t-tfal żgħar, ikel għal skopijiet mediċi speċjali, u bħala sostitut tad-dieta kollha għall-kontroll tal-piż u li jħassar id-Direttiva tal-Kunsill 92/52/KEE, id-Direttivi tal-Kummissjoni 96/8/KE, 1999/21/KE, 2006/125/KE u 2006/141/KE, id-Direttiva 2009/39/KE tal-Parlament Ewropew u tal-Kunsill u r-Regolamenti tal-Kummissjoni (KE) Nru 41/2009 u (KE) Nru 953/2009 (ĠU L 181, 29.6.2013, p. 35).
(4) Id-Direttiva 2002/46/KE tal-Parlament Ewropew u tal-Kunsill tal-10 ta’ Ġunju 2002 dwar l-approssimazzjoni tal-liġijiet tal-Istati Membri dwar is-supplimenti tal-ikel (ĠU L 183, 12.7.2002, p. 51).
(5) Société des Produits Nestlé S.A. (2020, mhux ippubblikat).
(6) Société des Produits Nestlé S.A. (2020, mhux ippubblikat).
(7) Sabatier M, Rytz A, Husny J, Dubascoux S, Nicolas M, Dave A, Singh H, Bodis M and Glahn RP, 2020 Impact of ascorbic acid on the in vitro iron bioavailability of a casein-based ironfortificant. Nutrients, 12, 2776.https://doi.org/10.3390/nu12092776.
(8) Henare SJ, Singh NN, Ellis AM, Moughan PJ, Thompson AK and Walczyk T, 2019. Iron bioavailability of a casein-based iron fortificant compared with that of ferrous sulfate in whole milk: a randomized trial with a crossover design in adult women. The American Journal of Clinical Nutrition, 110, 1362–1369.
(9) Société des Produits Nestlé S.A. (2019, mhux ippubblikat).
(10) Société des Produits Nestlé S.A. (2020, mhux ippubblikat).
(11) Société des Produits Nestlé S.A. (2020, mhux ippubblikat).
(12) Société des Produits Nestlé S.A. (2021, mhux ippubblikat).
(13) EFSA Journal 2022;20(9):7549.
(14) Ir-Regolament (UE) Nru 1169/2011 tal-Parlament Ewropew u tal-Kunsill tal-25 ta’ Ottubru 2011 dwar l-għoti ta’ informazzjoni dwar l-ikel lill-konsumaturi, li jemenda r-Regolamenti (KE) Nru 1924/2006 u (KE) Nru 1925/2006 tal-Parlament Ewropew u tal-Kunsill u li jħassar id-Direttiva tal-Kummissjoni 87/250/KEE, id-Direttiva tal-Kunsill 90/496/KEE, id-Direttiva tal-Kummissjoni 1999/10/KE, id-Direttiva 2000/13/KE tal-Parlament Ewropew u tal-Kunsill, id-Direttivi tal-Kummissjoni 2002/67/KE u 2008/5/KE u r-Regolament tal-Kummissjoni (KE) Nru 608/2004 (ĠU L 304, 22.11.2011, p. 18).
(15) Indirizz: Avenue Nestlé 55, 1800 Vevey, l-Iżvizzera.
ANNESS
L-Anness tar-Regolament ta’ Implimentazzjoni (UE) 2017/2470 huwa emendat kif ġej:
(1) |
fit-Tabella 1 (Ikel ġdid awtorizzat), tiddaħħal l-entrata li ġejja:
|
(2) |
fit-Tabella 2 (Speċifikazzjonijiet), tiddaħħal l-entrata li ġejja:
|