Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32017R2454

Regolament tal-Kunsill (UE) 2017/2454 tal-5 ta' Diċembru 2017 li jemenda r-Regolament (UE) Nru 904/2010 dwar il-kooperazzjoni amministrattiva u l-ġlieda kontra l-frodi fil-qasam tat-taxxa fuq il-valur miżjud

ĠU L 348, 29.12.2017, p. 1–6 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force: This act has been changed. Current consolidated version: 18/08/2020

ELI: http://data.europa.eu/eli/reg/2017/2454/oj

29.12.2017   

MT

Il-Ġurnal Uffiċjali tal-Unjoni Ewropea

L 348/1

REGOLAMENT TAL-KUNSILL (UE) 2017/2454

tal-5 ta' Diċembru 2017

li jemenda r-Regolament (UE) Nru 904/2010 dwar il-kooperazzjoni amministrattiva u l-ġlieda kontra l-frodi fil-qasam tat-taxxa fuq il-valur miżjud

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 113 tiegħu,

Wara li kkunsidra l-proposta mill-Kummissjoni Ewropea,

Wara li l-abbozz tal-att leġislattiv intbagħat lill-parlamenti nazzjonali,

Wara li kkunsidra l-opinjoni tal-Parlament Ewropew (1),

Wara li kkunsidra l-opinjoni tal-Kumitat Ekonomiku u Soċjali Ewropew (2),

Filwaqt li jaġixxi skont proċedura leġislattiva speċjali,

Billi:

(1)

Ir-Regolament tal-Kunsill (UE) Nru 904/2010 (3) jistabbilixxi r-regoli dwar l-iskambju u l-ħżin ta' informazzjoni mill-Istati Membri sabiex jiġu stabbiliti l-iskemi speċjali previsti fil-Kapitolu 6 tat-Titolu XII tad-Direttiva tal-Kunsill 2006/112/KE (4).

(2)

L-estensjoni mill-1 ta' Jannar 2021 ta' dawk l-iskemi speċjali għall-bejgħ mill-bogħod ta' oġġetti u ta' servizzi għajr servizzi ta' telekomunikazzjoni, ta' xandir jew servizzi fornuti b'mod elettroniku teħtieġ l-estensjoni tal-kamp ta' applikazzjoni tar-regoli ta' dan ir-Regolament dwar il-forniment ta' informazzjoni u t-trasferiment ta' flus bejn l-Istat Membru tal-identifikazzjoni u l-Istati Membri tal-konsum.

(3)

Minħabba l-kamp ta' applikazzjoni estiż tal-iskemi speċjali biex ikopru wkoll il-bejgħ mill-bogħod ta' oġġetti u s-servizzi kollha, l-għadd ta' tranżazzjonijiet li jridu jiġu rrapportati fid-denunzja tal-VAT ser jiżdied b'mod konsiderevoli. Sabiex l-Istat Membru ta' identifikazzjoni jkollu żmien suffiċjenti biex jittratta d-denunzji tal-VAT sottomessi minn persuni taxxabbli taħt l-iskema speċjali, jenħtieġ li l-iskadenza għat-trasferiment tal-informazzjoni tad-denunzja tal-VAT u l-ammont ta' VAT imħallas lil kull Stat Membru ta' konsum tiġi estiża b'10 ijiem.

(4)

L-estensjoni tal-iskemi speċjali għall-bejgħ mill-bogħod ta' oġġetti importati minn territorji terzi jew pajjiżi terzi teħtieġ li l-awtorità doganali tal-Istat Membru tal-importazzjoni tkun tista' tidentifika l-importazzjonijiet ta' oġġetti f'konsenji żgħar li għalihom it-taxxa fuq il-valur miżjud (VAT) trid titħallas permezz ta' waħda mill-iskemi speċjali. Għalhekk jenħtieġ li n-numru ta' identifikazzjoni li taħtu titħallas il-VAT jiġi kkomunikat bil-quddiem sabiex l-awtoritajiet doganali jkunu jistgħu jivverifikaw il-validità tiegħu mal-importazzjoni tal-oġġetti.

(5)

Il-persuni taxxabbli li jużaw tali skemi speċjali jistgħu jkunu soġġetti għal talbiet għal rekords u għal inkjesti amministrattivi mill-Istat Membru ta' identifikazzjoni u mill-Istati Membri kollha tal-konsum fejn jiġu fornuti l-oġġetti jew is-servizzi. Sabiex jitnaqqas il-piż amministrattiv u l-kostijiet tal-konformità għan-negozji kif ukoll għall-amministrazzjonijiet tat-taxxa ta' diversi talbiet għal rekords u inkjesti amministrattivi u sabiex jiġi evitat xogħol doppju, jenħtieġ li tali talbiet u inkjesti jkunu kkoordinati kemm jista' jkun mill-Istat Membru ta' identifikazzjoni.

(6)

Sabiex jiġi ssimplifikat il-ġbir tad-data statistika rigward l-applikazzjoni tal-iskemi speċjali, jenħtieġ li l-Kummissjoni tkun awtorizzata tieħu informazzjoni aggregata ta' statistika u dijanjostika, bħall-għadd ta' tipi differenti ta' messaġġi elettroniċi skambjati bejn l-Istati Membri, relatati mal-iskemi speċjali, bl-eċċezzjoni tad-data fir-rigward ta' persuni taxxabbli individwali.

(7)

Jenħtieġ li l-informazzjoni li trid tiġi sottomessa mill-persuna taxxabbli u li trid tintbagħat bejn l-Istati Membri għall-applikazzjoni tal-iskemi speċjali, kif ukoll dettalji tekniċi, inkluż messaġġi elettroniċi komuni, għas-sottomissjoni mill-persuna taxxabbli jew għat-trasmissjoni ta' din l-informazzjoni bejn l-Istati Membri tiġi adottata f'konformità mal-proċedura ta' komitoloġija prevista f'dan ir-Regolament.

(8)

B'kont meħud taż-żmien meħtieġ sabiex jiddaħħlu fis-seħħ il-miżuri neċessarji għall-implimentazzjoni ta' dan ir-Regolament u sabiex l-Istati Membri jadattaw is-sistema informatika tagħhom għar-reġistrazzjoni u għad-dikjarazzjoni u ħlas tal-VAT kif ukoll sabiex jieħdu kont tal-emendi introdotti mill-Artikolu 2 tad-Direttiva tal-Kunsill (UE) 2017/2455 (5), jenħtieġ li dan ir-Regolament japplika mid-data tal-applikazzjoni ta' dawk l-emendi.

(9)

Għaldaqstant, jenħtieġ li r-Regolament (UE) Nru 904/2010 jiġi emendat skont dan,

ADOTTA DAN IR-REGOLAMENT:

Artikolu 1

Ir-Regolament (UE) Nru 904/2010 huwa emendat kif ġej:

(1)

fl-Artikolu 1, il-paragrafu 4 huwa sostitwit b'dan li ġej:

“4.   Dan ir-Regolament jistabbilixxi wkoll regoli u proċeduri għall-iskambju b'mezzi elettroniċi ta' informazzjoni dwar il-VAT fuq oġġetti u servizzi fornuti skont l-iskemi speċjali previsti fil-Kapitolu 6 tat-Titolu XII tad-Direttiva tal-Kunsill 2006/112/KE u wkoll għal kwalunkwe skambju sussegwenti ta' informazzjoni u, safejn ikunu kkonċernati oġġetti u servizzi koperti mill-iskemi speċjali, għat-trasferiment ta' flus bejn l-awtoritajiet kompetenti tal-Istati Membri.”.

(2)

fl-Artikolu 2, il-paragrafu 2 huwa sostitwit b'dan li ġej:

“2.   Id-definizzjonijiet li jinsabu fl-Artikoli 358, 358a, 369a u 369 l tad-Direttiva 2006/112/KE għall-finijiet ta' kull skema speċjali għandhom japplikaw ukoll għall-finijiet ta' dan ir-Regolament.”.

(3)

fl-Artikolu 17(1), il-punt (d) huwa sostitwit b'dan li ġej:

“(d)

l-informazzjoni li huwa jiġbor skont l-Artikoli 360, 361, 364, 365, 369c, 369f, 369 g, 369o, 369p, 369s u 369t tad-Direttiva 2006/112/KE.”.

(4)

fl-Artikolu 17(1), jiddaħħal il-punt li ġej:

“(e)

data dwar in-numri ta' identifikazzjoni tal-VAT imsemmija fl-Artikolu 369q tad-Direttiva 2006/112/KE li tkun ħarġet u, għal kull numru ta' identifikazzjoni tal-VAT maħruġ minn kwalunkwe Stat Membru, il-valur totali ta' importazzjonijiet ta' oġġetti eżentati taħt l-Artikolu 143(1), punt (ca), matul kull xahar.”.

(5)

fl-Artikolu 17, il-paragrafu 2 jinbidel b'dan li ġej:

“2.   Id-dettalji tekniċi li jikkonċernaw it-tiftix awtomatizzat tal-informazzjoni msemmija fil-punti (b), (c), (d) u (e) tal-paragrafu 1 għandhom jiġu adottati skont il-proċedura prevista fl-Artikolu 58(2).”.

(6)

l-Artikolu 31 huwa emendat kif ġej:

(a)

il-paragrafu 1 jinbidel b'dan li ġej:

“1.   L-awtoritajiet kompetenti ta' kull Stat Membru għandhom jiżguraw li persuni involuti fil-provvista intra-Komunitarja ta' oġġetti jew servizzi u persuni taxxabbli mhux stabbiliti li jfornu servizzi, huma permessi jiksbu, għall-finijiet ta' tali tranżazzjonijiet, konferma elettronika tal-validità tan-numru ta' identifikazzjoni tal-VAT ta' kwalunkwe persuna speċifikata kif ukoll l-isem u indirizz assoċjati. Din l-informazzjoni għandha tikkorrispondi mad-data msemmija fl-Artikolu 17.”;

(b)

jitħassar il-paragrafu 3.

(7)

il-Kapitolu XI huwa emendat kif ġej:

(a)

l-intestatura tat-Taqsima 2 tinbidel b'dan li ġej:

“Dispożizzjonijiet applikabbli mill-1 ta' Jannar 2015 sal-31 ta' Diċembru 2020”;

(b)

tiżdied it-Taqsima li ġejja:

“TAQSIMA 3

Dispożizzjonijiet applikabbli mill-1 ta' Jannar 2021

Subtaqsima 1

Dispożizzjoni ġenerali

Artikolu 47a

Id-dispożizzjonijiet ta' din it-Taqsima għandhom japplikaw mill-1 ta' Jannar 2021.

Subtaqsima 2

Skambju ta' informazzjoni

Artikolu 47b

1.   L-Istati Membri għandhom jipprevedu li l-informazzjoni pprovduta mill-persuna taxxabbli li tuża l-iskema speċjali fit-Taqsima 2 tal-Kapitolu 6 tat-Titolu XII tad-Direttiva 2006/112/KE lill-Istat Membru ta' identifikazzjoni meta tibda l-attivitajiet tagħha skont l-Artikolu 361 ta' dik id-Direttiva għandha tiġi ppreżentata b'mezzi elettroniċi. Dettalji simili għall-identifikazzjoni tal-persuna taxxabbli li tuża l-iskema speċjali fit-Taqsima 3 tal-Kapitolu 6 tat-Titolu XII tad-Direttiva 2006/112/KE meta tibda l-attivitajiet tagħha skont l-Artikolu 369c ta' dik id-Direttiva għandhom jiġu ppreżentati b'mezzi elettroniċi. Kwalunkwe bidla fl-informazzjoni pprovduta skont l-Artikolu 361(2) u 369c tad-Direttiva 2006/112/KE għandha wkoll tiġi ppreżentata b'mezzi elettroniċi.

2.   L-Istat Membru ta' identifikazzjoni għandu jittrasmetti l-informazzjoni msemmija fil-paragrafu 1 b'mezzi elettroniċi lill-awtoritajiet kompetenti tal-Istati Membri l-oħrajn fi żmien 10 ijiem mill-aħħar tax-xahar li matulu kienet riċevuta l-informazzjoni mill-persuna taxxabbli li tuża waħda mill-iskemi speċjali fit-Taqsimiet 2 u 3 tal-Kapitolu 6 tat-Titolu XII tad-Direttiva 2006/112/KE. Bl-istess mod, l-Istat Membru ta' identifikazzjoni għandu jgħarraf lill-awtoritajiet kompetenti tal-Istati Membri l-oħrajn dwar in-numri ta' identifikazzjoni tal-VAT imsemmija f'dawn it-taqsimiet 2 u 3.

3.   L-Istat Membru ta' identifikazzjoni għandu jgħarraf b'mezzi elettroniċi mingħajr dewmien lill-awtoritajiet kompetenti tal-Istati Membri l-oħrajn jekk il-persuna taxxabbli li tuża waħda mill-iskemi speċjali fit-Taqsimiet 2 u 3 tal-Kapitolu 6 tat-Titolu XII tad-Direttiva 2006/112/KE tkun eskluża minn dik l-iskema speċjali.

Artikolu 47c

1.   L-Istati Membri għandhom jipprevedu li l-informazzjoni pprovduta mill-persuna taxxabbli li tuża l-iskema speċjali fit-Taqsima 4 tal-Kapitolu 6 tat-Titolu XII tad-Direttiva 2006/112/KE jew l-intermedjarju tagħha, lill-Istat Membru ta' identifikazzjoni meta tibda l-attivitajiet tagħha skont l-Artikolu 369p(1), (2) u (2a) ta' dik id-Direttiva għandha tiġi ppreżentata b'mezzi elettroniċi. Kwalunkwe bidla f'din l-informazzjoni pprovduta skont l-Artikolu 369p(3) tad-Direttiva 2006/112/KE għandha wkoll tiġi ppreżentata b'mezzi elettroniċi.

2.   L-Istat Membru ta' identifikazzjoni għandu jibgħat l-informazzjoni msemmija fil-paragrafu 1 b'mezzi elettroniċi lill-awtoritajiet kompetenti tal-Istati Membri l-oħrajn fi żmien 10 ijiem mill-aħħar tax-xahar li matulu kienet riċevuta l-informazzjoni mill-persuna taxxabbli li tuża l-iskema speċjali fit-Taqsima 4 tal-Kapitolu 6 tat-Titolu XII tad-Direttiva 2006/112/KE jew, fejn applikabbli, l-intermedjarju tagħha. Bl-istess mod, l-Istat Membru ta' identifikazzjoni għandu jgħarraf lill-awtoritajiet kompetenti tal-Istati Membri l-oħrajn bin-numru ta' identifikazzjoni tal-VAT individwali allokat għall-applikazzjoni ta' din l-iskema speċjali.

3.   L-Istat Membru ta' identifikazzjoni għandu mingħajr dewmien jgħarraf b'mezzi elettroniċi lill-awtoritajiet kompetenti tal-Istati Membri l-oħrajn jekk il-persuna taxxabbli li tuża l-iskema speċjali fit-Taqsima 4 tal-Kapitolu 6 tat-Titolu XII tad-Direttiva 2006/112/KE jew, fejn applikabbli, l-intermedjarju tagħha, ikunu imħassra mir-reġistru ta' identifikazzjoni.

Artikolu 47d

1.   L-Istati Membri għandhom jipprevedu li d-denunzja tal-VAT bid-dettalji msemmija fl-Artikoli 365, 369 g u 369t tad-Direttiva 2006/112/KE għandha tiġi ppreżentata b'mezzi elettroniċi.

2.   L-Istat Membru ta' identifikazzjoni għandu jibgħat l-informazzjoni msemmija fil-paragrafu 1 b'mezzi elettroniċi lill-awtorità kompetenti tal-Istat Membru tal-konsum ikkonċernat mhux aktar tard minn 20 jum wara l-aħħar tax-xahar li fih kienet riċevuta d-denunzja.

L-Istat Membru ta' identifikazzjoni għandu jibgħat ukoll l-informazzjoni prevista fil-paragrafi 2 tal-Artikolu 369 g tad-Direttiva 2006/112/KE lill-awtorità kompetenti ta' kull Stat Membru ieħor li minnu ntbagħtu jew kienu ttrasportati l-oġġetti u l-informazzjoni prevista fil-paragrafu 3 tal-Artikolu 369 g tad-Direttiva 2006/112/KE lill-awtorità kompetenti ta' kull Stat Membru tal-istabbiliment ikkonċernat.

L-Istati Membri li jeżiġu li d-denunzja tal-VAT issir f'munita nazzjonali għajr l-euro, għandhom jikkonvertu l-ammonti f'euro permezz tar-rata tal-kambju valida għall-aħħar ġurnata tal-perijodu tat-taxxa. Il-kambju għandu jsir wara li jkunu ppubblikati mill-Bank Ċentrali Ewropew ir-rati tal-kambju għal dik il-ġurnata, jew, jekk m'hemmx pubblikazzjoni f'dik il-ġurnata, fil-ġurnata ta' pubblikazzjoni li jkun imiss.

Artikolu 47e

L-Istat Membru ta' identifikazzjoni għandu mingħajr dewmien jittrasmetti b'mezzi elettroniċi lill-Istat Membru tal-konsum l-informazzjoni meħtieġa biex kull ħlas jitqabbel ma' denunzja rilevanti tal-VAT.

Artikolu 47f

1.   L-Istat Membru ta' identifikazzjoni għandu jiżgura li l-ammont li ħallsu l-persuna taxxabbli li tuża waħda mill-iskemi speċjali stipulati fil-Kapitolu 6 tat-Titolu XII tad-Direttiva 2006/112/KE jew, jekk applikabbli, l-intermedjarju tagħha, huwa ttrasferit fil-kont tal-bank denominat f'euro li ntgħażel mill-Istat Membru tal-konsum li lilu huwa dovut il-pagament.

L-Istati Membri li jeżiġu li l-pagamenti jsiru f'munita nazzjonali għajr l-euro għandhom jikkonvertu l-ammonti f'euro permezz tar-rata ta' kambju valida għall-aħħar data tal-perijodu tat-taxxa. Il-kambju għandu jsir wara li jkunu ppubblikati mill-Bank Ċentrali Ewropew ir-rati tal-kambju għal dik il-ġurnata, jew, jekk m'hemmx pubblikazzjoni f'dik il-ġurnata, fil-ġurnata ta' pubblikazzjoni li jkun imiss.

It-trasferiment għandu jsir mhux aktar tard minn 20 jum wara l-aħħar tax-xahar li fih sar il-ħlas.

2.   Jekk il-persuna taxxabbli li tagħmel użu minn waħda mill-iskemi speċjali jew, jekk applikabbli, l-intermedjarju tagħha, ma jħallsux it-taxxa kollha dovuta, l-Istat Membru ta' identifikazzjoni għandu jiżgura li l-pagament jiġi ttrasferit lill-Istati Membri tal-konsum b'mod proporzjonat għat-taxxa dovuta f'kull Stat Membru. L-Istat Membru ta' identifikazzjoni għandu jinforma b'mezzi elettroniċi lill-awtoritajiet kompetenti tal-Istati Membri tal-konsum b'dan.

Artikolu 47g

L-Istati Membri għandhom jinnotifikaw b'mezzi elettroniċi lill-awtoritajiet kompetenti tal-Istati Membri l-oħrajn dwar in-numri ta' kontijiet bankarji rilevanti għar-riċezzjoni tal-pagamenti skont l-Artikolu 47f.

L-Istati Membri għandhom mingħajr dewmien jinnotifikaw b'mezzi elettroniċi lill-awtoritajiet kompetenti tal-Istati Membri l-oħrajn u lill-Kummissjoni dwar tibdil fir-rati tat-taxxa applikabbli għal provvisti ta' oġġetti u servizzi li għalihom japplikaw l-iskemi speċjali.

Subtaqsima 3

Kontroll ta' tranżazzjonijiet u ta' persuni taxxabbli

Artikolu 47h

Mal-importazzjoni tal-oġġetti li fuqhom għandha tkun iddikjarata l-VAT taħt l-iskema speċjali prevista fit-Taqsima 4 tal-Kapitolu 6 tat-Titolu XII tad-Direttiva 2006/112/KE, l-Istati Membri għandhom jagħmlu verifika elettronika tal-validità tan-numru ta' identifikazzjoni individwali tal-VAT allokat skont l-Artikolu 369q ta' dik id-Direttiva u kkomunikat mhux aktar tard mill-preżentazzjoni tad-dikjarazzjoni tal-importazzjoni.

Artikolu 47i

1.   Sabiex jikseb ir-rekords miżmuma minn persuna taxxabbli jew minn intermedjarju skont l-Artikoli 369, 369k u 369x tad-Direttiva 2006/112/KE, l-Istat Membru tal-konsum għandu l-ewwel jagħmel talba lill-Istat Membru ta' identifikazzjoni b'mezzi elettroniċi.

2.   Fejn l-Istat Membru ta' identifikazzjoni jirċievi talba msemmija fil-paragrafu 1, huwa għandu jibgħat dik it-talba b'mezzi elettroniċi u mingħajr dewmien lill-persuna taxxabbli jew lill-intermedjarju tagħha.

3.   L-Istati Membri għandhom jipprevedu li, fuq talba, persuna taxxabbli jew l-intermedjarju tagħha jippreżentaw ir-rekords mitlubin b'mezzi elettroniċi lill-Istat Membru ta' identifikazzjoni. L-Istati Membri għandhom jaċċettaw li r-rekords jistgħu jiġu ppreżentati permezz ta' formola standard.

4.   L-Istat Membru ta' identifikazzjoni għandu jibgħat ir-rekords miksuba b'mezzi elettroniċi u mingħajr dewmien lill-Istat Membru rikjedenti tal-konsum.

5.   Fejn l-Istat Membru rikjedenti tal-konsum ma jirċevix ir-rekords fi żmien 30 jum mid-data li fiha tkun saret it-talba, dak l-Istat Membru jista' jieħu kwalunkwe azzjoni skont il-leġislazzjoni nazzjonali tiegħu sabiex jikseb tali rekords.

Artikolu 47j

1.   Jekk l-Istat Membru ta' identifikazzjoni jiddeċiedi li jwettaq fit-territorju tiegħu inkjesta amministrattiva fuq persuna taxxabbli li tuża waħda mill-iskemi speċjali pprovduti fil-Kapitolu 6 tat-Titolu XII tad-Direttiva 2006/112/KE jew, jekk applikabbli, fuq intermedjarju, huwa għandu jinforma bil-quddiem lill-awtoritajiet kompetenti tal-Istati Membri l-oħrajn kollha rigward l-inkjesta.

L-ewwel subparagrafu għandu japplika biss fir-rigward ta' inkjesta amministrattiva li tikkonċerna skemi speċjali.

2.   Mingħajr preġudizzju għall-Artikolu 7(4), jekk l-Istat Membru tal-konsum jiddeċiedi li hemm bżonn li ssir inkjesta amministrattiva, huwa għandu l-ewwel jikkonsulta mal-Istat Membru ta' identifikazzjoni dwar il-bżonn li ssir tali inkjesta.

F'każijiet fejn jintlaħaq qbil fuq il-bżonn li ssir inkjesta amministrattiva, l-Istat Membru ta' identifikazzjoni għandu jgħarraf lill-Istati Membri l-oħrajn.

Dan m'għandux jipprekludi lill-Istati Membri milli jieħdu kwalunkwe azzjoni skont il-leġislazzjoni nazzjonali tagħhom.

3.   Kull Stat Membru għandu jikkomunika lill-Istati Membri l-oħrajn u lill-Kummissjoni d-dettalji tal-awtorità kompetenti responsabbli għall-koordinazzjoni tal-inkjesti amministrattivi fi ħdan dak l-Istat Membru.

Subtaqsima 4

Informazzjoni statistika

Artikolu 47k

L-Istati Membri għandhom jippermettu lill-Kummissjoni tieħu informazzjoni direttament minn messaġġi ġġenerati mis-sistema kompjuterizzata msemmija fl-Artikolu 53 għal finijiet ta' statistika u dijanjostiċi aggregati skont il-punti (d) u (e) tal-Artikolu 17(1). Din l-informazzjoni ma għandhiex tinkludi data rigward il-persuni taxxabbli individwali.

Subtaqsima 5

L-għoti ta' setgħat ta' implimentazzjoni

Artikolu 47l

Għall-iskop tal-applikazzjoni uniformi ta' dan ir-Regolament, il-Kummissjoni tingħata s-setgħa li tadotta l-miżuri li ġejjin skont il-proċedura msemmija fl-Artikolu 58(2):

(a)

id-dettalji tekniċi, inkluż messaġġ elettroniku komuni, għall-għoti tal-informazzjoni msemmija fl-Artikoli 47b(1), 47c(1), u 47d(1), u l-formola standard kif imsemmija fl-Artikolu 47i(3);

(b)

id-dettalji tekniċi, inkluż messaġġ elettroniku komuni, għall-għoti tal-informazzjoni msemmija fl-Artikoli 47b(2) u (3), 47c(2) u (3), 47d(2), 47e, 47f(2), 47i(1), (2) u (4) u 47j(1), (2) u (4) kif ukoll il-mezzi tekniċi għat-trasmissjoni ta' din l-informazzjoni;

(c)

id-dettalji tekniċi għat-trasmissjoni bejn l-Istati Membri tal-informazzjoni msemmija fl-Artikolu 47 g;

(d)

id-dettalji tekniċi li jikkonċernaw il-verifika tal-informazzjoni msemmija fl-Artikolu 47h mill-Istat Membru tal-importazzjoni;

(e)

l-informazzjoni ta' statistika u dijanjostika aggregata li trid tittieħed mill-Kummissjoni kif imsemmija fl-Artikolu 47k kif ukoll il-mezzi tekniċi biex tittieħed din l-informazzjoni.”.

(8)

fl-Anness I, il-punt 1 jinbidel b'dan li ġej:

“1.

il-bejgħ mill-bogħod (l-Artikolu 33 tad-Direttiva 2006/112/KE);”.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Huwa għandu japplika mill-1 ta' Jannar 2021.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, il-5 ta' Diċembru 2017.

Għall-Kunsill

Il-President

T. TÕNISTE

(1)  Opinjoni tat-30 ta' Novembru 2017 (għadha mhux ippubblikata fil-Ġurnal Uffiċjali).

(2)  ĠU C 345, 13.10.2017, p. 79.

(3)  Regolament tal-Kunsill (UE) Nru 904/2010 tas-7 ta' Ottubru 2010 dwar il-kooperazzjoni amministrattiva u l-ġlieda kontra l-frodi fil-qasam tat-taxxa fuq il-valur miżjud (ĠU L 268, 12.10.2010, p. 1).

(4)  Direttiva tal-Kunsill 2006/112/KE tat-28 ta' Novembru 2006 dwar is-sistema komuni ta' taxxa fuq il-valur miżjud (ĠU L 347, 11.12.2006, p. 1).

(5)  Direttiva tal-Kunsill (UE) 2017/2455 tal-5 ta' Diċembru 2017 li temenda d-Direttiva 2006/112/KE u d-Direttiva 2009/132/KE fir-rigward ta' ċerti obbligi tat-taxxa fuq il-valur miżjud għall-provvisti ta' servizzi u għall-bejgħ mill-bogħod ta' oġġetti (ara paġna 7 ta' dan il-Ġurnal Uffiċjali).

Top