12.1.2012   

MT

Il-Ġurnal Uffiċjali tal-Unjoni Ewropea

L 8/36

(1)

Fit-22 ta’ Ottubru 2010, il-Kummissjoni rċeviet ilment skont l-Artikolu 5 tar-Regolament Bażiku dwar dumping dannuż allegat ta’ importazzjonijiet ta’ aċetat tal-vinil (minn hawn ’il quddiem “il-prodott ikkonċernat”) li joriġinaw mill-Istati Uniti tal-Amerika (“USA”).

(2)

L-ilment sar minn Ineos Oxide Ltd (“l-ilmentatur”) li jirrappreżenta proporzjon kbir, f’dan il-każ iżjed minn 25 % tal-produzzjoni totali tal-industrija tal-Unjoni tal-prodott ikkonċernat.

(3)

Fl-4 ta’ Diċembru 2010, il-Kummissjoni ħabbret, permezz ta’ notifika ppubblikata f’Il-Ġurnal Uffiċjali tal-Unjoni Ewropea  (2), it-tnedija ta’ proċediment tal-antidumping fir-rigward ta’ importazzjonijiet fl-Unjoni ta’ aċetat tal-vinil li joriġinaw mill-Istati Uniti tal-Amerika.

(4)

Il-Kummissjoni, permezz tar-Regolament (KE) Nru 821/2011 (3) (ir-“Regolament provviżorju”) imponiet dazju provviżorju antidumping fuq l-importazzjonijiet tal-aċetat tal-vinil attwalment taħt il-kodiċi tan-NM 2915 32 00, u li joriġina mill-Istati Uniti tal-Amerika.

(5)

Permezz ta’ ittra tal-4 ta’ Novembru 2011 lill-Kummissjoni, l-ilmentatur irtira formalment l-ilment tiegħu.

(6)

Skont l-Artikolu 9(1) tar-Regolament bażiku, il-proċediment jista’ jintemm meta jiġi rtirat l-ilment, sakemm tali tmiem ma jkunx fl-interess tal-Unjoni.

(7)

Il-Kummissjoni qieset li l-proċediment attwali għandu jintemm peress li l-investigazzjoni ma sabet ebda konsiderazzjonijiet li juru li dan it-tmiem ma jkunx fl-interess tal-Unjoni. Il-partijiet interessati ġew mgħarrfa b’dan u ngħataw l-opportunità li jikkummentaw. Ma tressqu ebda kummenti li jindikaw li dan it-tmiem ma jkunx fl-interess tal-Unjoni.

(8)

Wara l-iżvelar, kien hemm parti waħda li sostniet li ma kellhiex tiġi eskluża mid-definizzjoni tal-industrija tal-Unjoni, jew li alternattivament, ir-Regolament provviżorju għandu jiġi emendat biex jinkludi lil din il-parti fid-definizzjoni. F’dan ir-rigward ta’ min jinnota li s-sejbiet tar-Regolament provviżorju, abbażi tal-informazzjoni li nkisbet waqt l-investigazzjoni, kienu biss provviżorji, kif jingħad fil-premessa (31) tar-Regolament provviżorju stess. Billi l-proċedimenti antidumping intemmu mingħajr l-impożizzjoni ta’ miżuri definittivi, wara li ġie rtirat l-ilment, mhuwiex xieraq, f’deċiżjoni ta’ terminazzjoni, la li jingħataw deċiżjonijiet definittivi u lanqas li jiġi emendat Regolament provviżorju.

(9)

Ta’ min ifakkar li s-sejbiet disponibbli kienu ta’ natura provviżorja. Għaldaqstant kull każ fil-ġejjieni marbut mal-prodott jew mal-partijiet interessati f’dan il-proċediment se jkun ivvalutat fuq il-merti tiegħu stess.

(10)

Għalhekk il-Kummissjoni tikkonkludi li l-proċediment kontra antidumping li jikkonċerna l-importazzjonijiet fl-Unjoni tal-prodott ikkonċernat li joriġina mill-Istati Uniti tal-Amerika, għandu jintemm mingħajr l-impożizzjoni ta’ miżuri antidumping.

(11)

Kull dazju li nġabar provviżorjament abbażi tar-Regolament (UE) Nru 821/2011 għandu jiġi rilaxxat.