30.5.2006   

MT

Il-Ġurnal Uffiċjali ta’ l-Unjoni Ewropea

19

(1)

Permezz tar-Regolament (KE) Nru 821/94 (2), konsegwentement għal reviżjoni ta' l-iskadenza, il-Kunsill impona dazji anti-dumping definittivi fuq importazzjonijiet ta' silicon carbide, li joriġinaw mir-Repubblika tal-Poplu taċ-Ċina, mill-Federazzjoni Russa u mill-Ukrajna. Fl-istess żmien, il-Kummissjoni aċċettat permezz tad-Deċiżjoni tagħha 94/202/KE (3) impenn offrut mill-Gvern tar-Russja, konġuntement ma' V/O Stankoimport, Moska, ir-Russja. Permezz tar-Regolament (KE) Nru 1100/2000 (4), konsegwentement għar-reviżjoni ta' l-iskadenza, il-Kunsill impona dazji anti-dumping definittivi fuq importazzjonijiet fil-Komunità ta' silicon carbide (“il-prodott ikkonċernat”) li joriġinaw mir-Repubblika tal-Poplu taċ-Ċina (RPĊ), mill-Federazzjoni Russa (ir-Russja) u mill-Ukrajna (l-Ukrajna) u l-Kummissjoni estendiet l-impenn aċċettat permezz tad-Deċiżjoni 94/202/KE għal kumpannija Russa “V/O Stankoimport”.

(2)

Ir-rata tad-dazju applikabbli għall-prezz nett, liberu-fil-fruntiera-Komunitarja, qabel id-dazju, huwa ffissat għal 23,3 % għal importazzjonijiet tal-prodott ikkonċernat li joriġinaw mir-Russja.

(3)

Ir-rata tad-dazju applikabbli għall-prezz nett, liberu-fil-fruntiera-Komunitarja, qabel id-dazju, huwa ffissat għal 24 % għal importazzjonijiet tal-prodott ikkonċernat li joriġinaw mill-Ukrajna.

(4)

Fl-20 ta' Marzu 2004 il-Kummissjoni ħabbret permezz tal-pubblikazzjoni ta' avviż fil-Ġurnal Uffiċjali ta' l-Unjoni Ewropea  (5) l-bidu ta' reviżjoni interim parzjali tal-miżuri fis-seħħ (“il-miżuri”) skond l-Artikoli 11(3) u 22(ċ) tar-Regolament bażi.

(5)

Ir-reviżjoni ġiet mibdija fuq l-inizjattiva tal-Kummissjoni sabiex jiġi eżaminat jekk, bħala konsegwenza tat-tkabbir ta' l-Unjoni Ewropea fl-1 ta' Mejju 2004 (“it-tkabbir”) u, b'kunsiderazzjoni ta' l-aspett ta' l-interess Komunitarju, hemmx il-bżonn li jiġu adattati l-miżuri sabiex jiġi evitat effett għal għarrieda u eċċessivament negattiv fuq il-partijiet kollha nteressati inklużi utenti, distributuri u konsumaturi.

(6)

Il-partijiet kollha nteressati magħrufa lill-Kummissjoni, inkluża l-industrija Komunitarja, assoċjazzjonijiet ta' produtturi jew utenti fil-Komunità, produtturi esportaturi fil-pajjiż ikkonċernat, importaturi u l-assoċjazzjonijiet tagħhom u l-awtoritajiet pertinenti tal-pajjiżi kkonċernati kif ukoll partijiet interessati fl-għaxar Stati Membri ġodda li ngħaqdu ma' l-Unjoni Ewropea fl-1 ta' Mejju 2004 (“l-UE10”) kienu avżati bil-bidu ta' l-investigazzjoni u kienu mogħtija l-opportunità li jagħmlu magħrufa l-fehmiet tagħhom bil-miktub, li jippreżentaw informazzjoni u li jipprovdu prova ta' sostenn fil-limitu taż-żmien indikat fl-avviż tal-bidu. Il-partijiet interessati kollha li għamlu tali talba u li urew li kien hemm raġunijiet għala huma kellhom jingħataw widen ġew mogħtija udjenza.

(7)

F'dan ir-rigward, il-partijiet interessati li ġejjin taw il-fehmiet tagħhom:

(8)

Il-prodott in eżami huwa l-istess bħal fl-investigazzjoni oriġinali, li jaqa' taħt il-kodiċi NM 2849 20 00.

(9)

Il-proċess ta' produzzjoni tas-silicon carbide huwa tali li l-prodott miksub awtomatikament jikkomprendi varjetà ta' kwalitajiet ta' silicon carbide li jistgħu jiġu klassifikati f'żewġ gradi prinċipali: kristallin u metallurġiku. Il-grad kristallin, li huwa klassifikat aktar taħt it-tipi iswed u aħdar, huwa normalment użat fil-manifattura ta' għodda abrażivi, roti tal-mola, prodotti refrattarji ta' kwalità għolja, ċeramika, materjali tal-plastik etc., waqt li l-grad metallurġiku huwa normalment użat f'xogħol ta' funderija u ta' kalkara ta' funderija bħala silicon carrier. Bħal fl-investigazzjonijiet preċedenti, iż-żewġ gradi għandhom ikunu kkunsidrati bħala prodott wieħed għall-iskop ta' din l-investigazzjoni.

(10)

L-esportatur Russu soġġett għall-impenn espona li l-volum ta' importazzjonijiet li għalih japplika l-impenn kien ġie stabbilit abbażi tal-bejgħ tiegħu lis-suq ta' l-UE15 u li, għalhekk, l-impenn għandu jiġi rivedut sabiex jittieħed kont dovut tas-suq ta' l-UE25. Huwa ddikjara li tali reviżjoni kienet meħtieġa sabiex ma jkunx hemm diskriminazzjoni favur l-esportaturi l-oħra tal-prodott ikkonċernat lejn l-UE.

(11)

L-Istati Membri taw il-fehmiet tagħhom u l-maġġoranza tagħhom jappoġġaw l-adattament tal-miżuri sabiex jittieħed kont tat-tkabbir.

(12)

Saret analiżi tad-data u l-informazzjoni disponibbli li kkonfermat li l-volum ta' importazzjonijiet tal-prodott ikkonċernat mir-Russja lejn l-UE10 kien notevoli. Billi l-volum ta' importazzjonijiet soġġetti għall-impenn preżentement fis-seħħ kien ġie stabbilit abbażi ta' l-importazzjonijiet fl-UE15, ma ġiex ikkunsidrat il-volum miżjud ta' importazzjonijiet lejn l-UE25.

(13)

Fid-dawl ta' dan t'hawn fuq, ġie konkluż li sabiex jittieħed kont tat-Tkabbir huwa xieraq li jiġu adottati l-miżuri li jipprovdu għall-volum addizzjonali ta' importazzjonijiet fis-suq ta' l-UE10.

(14)

Il-volum oriġinali ta' importazzjonijiet soġġett għall-impenn għall-UE15 kien ġie kalkolat u stabbilit għal kull sena sussegwenti fit-tieni nofs tas-sena kurrenti bħala proporzjon tal-konsum Komunitarju abbażi tas-sena li tippreċedi dik kurrenti. L-ammont taż-żieda fil-volum ta' importazzjonijiet soġġett għall-impenn ġie kalkolat bl-istess metodu ta' kalkolu.

(15)

Ghaldaqstant, huwa maħsub li jkun xieraq li l-Kummissjoni tkun tista' taċċetta proposta għal impenn modifikat li jirrifletti s-sitwazzjoni wara t-Tkabbir u li jkun abbażi tal-metodu deskritt fil-premessa 11.

(16)

L-awtoritajiet Ukrajini u produtturi esportaturi Ukrajini ddikjaraw li minħabba l-livell għoli ta' dazji anti-dumping u bħala konsegwenza ta' l-estensjoni tal-miżuri lill-UE10, il-flussi kummerċjali tradizzjonali tagħhom lejn l-UE10 ikunu disturbati b'mod sinifikattiv.

(17)

Huma lmentaw partikolarment, li ż-żidiet f'daqqa waħda u severi fil-prezzijiet ipprovokati mid-dazji anti-dumping għamlu l-prodott projbittivament għali għall-produzzjoni ta' briquettes metallurġiċi.

(18)

L-industrija Komunitarja ddikjarat li hija ma topponi l-ebda proposta għal miżuri intermedji meħuda matul perjodu ta' transizzjoni li ma jolqtux ħażin is-sitwazzjoni tagħha.

(19)

L-awtoritajiet tar-Repubblika Ċeka, ta' l-Ungerija u tar-Repubblika Slovakka kienu tal-fehma li miżuri speċjali transitorji għandhom japplikaw għal importazzjonijiet tal-prodott ikkonċernat mill-Ukrajna wara t-Tkabbir. Kien argumentat li l-prodott ikkonċernat huwa ta' importanza sinifikattiva għall-utenti finali industrijali fl-UE10 għaliex dan m'huwiex prodott f'dawn il-pajjiżi.

(20)

Għaldaqstant, uħud minn dawn l-awtoritajiet huma tal-fehma li l-miżuri anti-dumping għandhom jiġu sospiżi fir-rigward ta' l-importazzjonijiet tal-prodott ikkonċernat li joriġina mill-Ukrajna.

(21)

Abbażi tad-data u l-informazzjoni disponibbli, saret analiżi li kkonfermat li l-volumi ta' importazzjonijiet tal-prodott ikkonċernat ġejjin mill-Ukrajna lejn l-UE10 kienu notevoli fl-2003.

(22)

Billi l-prodott ikkonċernat huwa ta' importanza sinifikattiva għall-utenti finali industrijali tradizzjonali fl-UE10 u billi d-dazju anti-dumping huwa ta' livell relattivament għoli, għaldaqstant ġie konkluż li huwa fl-interess Komunitarju li jiġu adattati gradwalment il-miżuri li preżentement hemm fis-seħħ sabiex jiġi evitat effett għal għarrieda u eċċessivament negattiv fuq il-partijiet kollha nteressati.

(23)

Dawn id-diversi aspetti u interessi ġew meqjusa u kkunsidrati bħala ħaġa waħda. Joħroġ minn dan li l-interessi ta' l-importaturi u l-utenti fl-UE10 ikunu milquta sostanzjalment ħażin bl-applikazzjoni għal għarrieda tal-miżuri eżistenti jekk dawn ma jiġux adattati temporanjament.

(24)

Madankollu, b'kuntrast, kif kien ikkonfermat mill-interess stess ta' l-industrija Komunitarja, l-interessi tagħha ma jiġux milquta eċċessivament ħażin jekk il-miżuri kellhom ikunu adattati temporanjament billi attwalment ma jistgħux jissodisfaw interament id-domandi tal-klijenti fl-UE10.

(25)

F'tali ċirkostanzi, wieħed jista' raġonevolment jikkonkludi li m' huwiex fl-interess tal-Komunità li l-miżuri eżistenti jiġu applikati mingħajr adattament u li l-adattament temporanju tal-miżuri eżistenti fir-rigward ta' importazzjonijiet tal-prodott ikkonċernat fl-UE10 ma għandux ikun tali li jimmina konsiderevolment il-livell mixtieq tal-protezzjoni tal-kummerċ.

(26)

Għal dan l-iskop, modi differenti kienu eżaminati kif l-aħjar tiġi protetta l-industrija Komunitarja minn dumping dannuż waqt li, fl-istess ħin, jiġi meħud kont ta' l-aspetti ta' l-interess Komunitarju billi jitnaqqas l-impatt ekonomiku tad-dazji anti-dumping fuq ix-xerrejja tradizzjonali fl-Istati Membri ġodda matul il-perjodu ta' aġġustament ekonomiku wara t-Tkabbir.

(27)

Kien ikkunsidrat li dan jista' jinkiseb billi l-volumi tradizzjonali ta' l-esportazzjoni mill-Ukrajna lejn l-UE10 jitħallew jidħlu liberi mid-dazji anti-dumping għal perjodu transitorju. F'dan il-kuntest, kwalunkwe esportazzjoni lejn l-UE10 aktar minn dawn il-volumi ta' esportazzjoni tradizzjonali tiġi soġġetta għad-dazji anti-dumping normali, kif ikunu wkoll esportazzjonijiet lejn l-UE15.

(28)

Wara li saret stima tal-metodi differenti kif l-aħjar jitħallew ikomplu dawn il-flussi tradizzjonali ta' esportazzjonijiet lejn l-UE10, kien ikkunsidrat li l-mezz l-aktar xieraq kien li jiġu aċċettati mpenji volontarji mill-parti kollaboranti b'elementi għal limiti massimi kwantitattivi. Għaldaqstant, skond l-Artikolu 8 (2) tar-Regolament bażi, il-Kummissjoni ssuġġeriet impenji lill-produttur esportatur ikkonċernat u, bħala riżultat, kien ġie sussegwentement offrut impenn wieħed minn produttur esportatur wieħed tal-prodott ikkonċernat fl-Ukrajna.

(29)

F'dan il-kuntest, ta' min jinnota li skond l-Artikolu 22 (ċ) tar-Regolament bażi, ġew meħuda in konsiderazzjoni ċ-ċirkostanzi speċjali tat-Tkabbir meta l-kondizzjonijiet ta' l-impenn ġew stabbiliti. Huma jikkostitwixxu miżura speċjali billi jipprovdu mod temporanju ta' adattament tal-miżuri eżistenti għall-UE25.

(30)

Volumi ta' importazzjonijiet (“limiti massimi”) ġew għalhekk stabbiliti għall-produttur esportatur fl-Ukrajna, bl-użu bħala bażi tal-volumi ta' esportazzjoni tradizzjonali tagħhom lejn l-UE10 fl-2001, 2002 u 2003. Ta' min jinnota, madankollu, li żidiet abnormali fil-volumi ta' l-esportazzjoni lejn l-UE10 osservati fl-aħħar ftit xhur ta' l-2003 u fl-ewwel xhur ta' l-2004 ġew imnaqqsa mill-volumi tradizzjonali użati fid-determinazzjoni tal-limiti massimi.

(31)

Meta jbiegħu fl-UE10 taħt il-kondizzjonijiet ta' l-impenji tagħhom, il-produtturi esportaturi kkonċernati għandhom jaqblu li jirrispettaw ġeneralment is-sistemi tradizzjonali ta' bejgħ lill-klijenti ndividwali fl-UE10. Il-produtturi esportaturi għandhom għalhekk ikunu jafu li kwalunkwe offerta ta' mpenn tista' tkun ikkunsidrata prattikabbli, u għalhekk aċċettabbli, biss jekk, għall-bejgħ kopert mill-impenji, huma jibqgħu jżommu ġeneralment tali sistemi tradizzjonali ta' kummerċ mal-klijenti tagħhom fl-UE10.

(32)

Il-produtturi esportaturi għandhom ukoll ikunu jaf li, taħt il-kondizzjonijiet ta' l-impenji, jekk jinstab li dawn is-sistemi ta' bejgħ jinbidlu notevolment, jew il-monitoraġġ ta' dawn l-impenji isir b'xi mod diffiċli jew impossibbli, il-Kummissjoni għandha d-dritt li tirtira l-aċċettazzjoni ta' l-impenn tal-kumpannija u b'hekk jiġu mposti dazji anti-dumping definittivi fil-livell speċifikat fir-Regolament (KE) Nru 1100/2000 jew inkella tista' taġġusta l-livell tal-limitu massimu, jew tista' tgħaddi għal azzjoni korrettiva oħra.

(33)

Għaldaqstant, kwalunkwe offerta ta' mpenn li tirrispetta l-kondizzjonijiet imsemmija hawn fuq tista' tiġi aċċettata mill-Kummissjoni permezz ta' Regolament tal-Kummissjoni.

(34)

Fid-dawl ta' dan t' hawn fuq, huwa meħtieġ li wieħed jaħseb, fil-każ li l-Kummissjoni taċċetta impenji permezz ta' Regolament tal-Kummissjoni sussegwenti, għall-possibilita li jiġu eżentati importazzjonijiet lejn il-Komunità, li jsiru skond il-kondizzjonijiet ta' tali mpenji, mid-dazju anti-dumping impost mir-Regolament (KE) Nru 1100/2000 billi jiġi emendat dak ir-Regolament,