Pubblikazzjoni ta’ applikazzjoni għar-reġistrazzjoni ta’ isem skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2023/C 199/08)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1) fi żmien 3 xhur mid-data ta’ din il-pubblikazzjoni.

DOKUMENT UNIKU

“Meso turopoljske svinje”

Nru tal-UE: PDO-HR-02858 — 2.8.2022

DOP (X) IĠP ( )

1.   Isem/Ismijiet

“Meso turopoljske svinje”

2.   Stat Membru jew pajjiż terz

Ir-Repubblika tal-Kroazja

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta’ prodott

Klassi 1.1. Laħam frisk (u l-ġewwieni)

3.2.   Deskrizzjoni tal-prodott li għalih japplika l-isem f’(1)

Il-“Meso turopoljske svinje” huwa l-laħam frisk u partijiet oħra li jittieklu tal-karkassa ta’ rġiel ikkastrati u nisa tar-razza awtoktona tal-ħanżir Turopolje, li huma mwielda, imrobbija u skarnati fiż-żona ġeografika ddefinita fil-punt 4.

Il-“Meso turopoljske svinje” jiġi kkumerċjalizzat frisk jew iffriżat bħala nofs karkassi mlestija, partijiet minn nofs karkassi bl-għadma (qatgħat primarji) u bħala laħam mingħajr għadam (bil-biċċa jew imqatta’, bl-ingrossa jew imballat).

L-età tal-ħnieżer meta jiġu skarnati tkun mill-inqas 12-il xahar. Jistgħu jintużaw biss karkassi mlestija tal-kategorija T1 (ħnieżer imsemmna) u T2 (ħnieżer imsemmna b’piż finali ogħla). Il-ħxuna minima tax-xaħam tad-dahar imkejla fuq l-M. gluteus medius skont il-metodu ZP (ta’ żewġ punti) trid tkun ta’ 30 mm.

Il-valur tal-pH tal-laħam (imkejjel fuq l-M. longissimus dorsi) huwa fil-limiti tal-kwalità normali għall-majjal (pH1 > 6,0 u pH2 bejn 5,5 u 6,1), b’kulur tal-laħam ta’ CIE L* < 50 u CIE a* > 15.

Il-“Meso turopoljske svinje” għandu kulur aktar ħamrani u aktar skur, struttura muskolari aktar kompatta u inqas tnixxija mill-wiċċ mill-majjal tal-produzzjoni standard. Għandu grad intrinsikament ogħla ta’ akkumulazzjoni ta’ xaħam, speċjalment fil-parti taħt il-ġilda u bejn il-muskoli. It-tessut xaħmi mkessaħ huwa sod, u ta’ lewn abjad ileqq.

Meta jiġi kkunsmat, il-laħam imsajjar ikollu konsistenza elastika u mmerrqa, mimli togħma u aroma speċifika mix-xaħam imdewweb tal-laħam.

3.3.   Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

Matul il-perjodu tat-treddigħ, mill-età ta’ 3 ġimgħat sa madwar 10 ijiem wara l-ftim, il-qżieqeż jistgħu jiġu mitmugħin taħlita lesta ta’ għalf għall-ħnieżer li jreddgħu b’mill-inqas 18 % proteina mhux raffinata, u b’mill-inqas 16 % proteina mhux raffinata sal-bidu tat-tismin. Wara l-ftim, sakemm jibda t-tismin, l-għalf kompost prodott fir-razzett jista’ jintuża wkoll biex jiġu mitmugħa l-qżieqeż, li l-bażi tiegħu (minimu ta’ 70 %) hija magħmula minn ċereali (qamħirrum, xgħir, qamħ, tritikal) b’suppliment ta’ proteini u vitamini u minerali meħtieġa għal dieta bbilanċjata. Il-qżieqeż jiġu mitmugħa ikliet, u jrid ikollhom disponibbli f’kull mument provvista suffiċjenti ta’ ilma tax-xorb frisk. Waqt it-trobbija, il-qżieqeż irid ikollhom aċċess għal għalf oħxon.

It-tismin jibda mill-età ta’ bejn 4 u 6 xhur. Il-ħnieżer tas-simna jingħataw taħlita ta’ ħaxix u sorsi naturali oħra ta’ ikel disponibbli lokalment (ħxejjex aromatiċi, frott tas-siġar, frott selvaġġ, għeruq, tuberi, faqqiegħ, insetti, dud, bebbux, qxur, eċċ.), li jsibuh billi jirgħu u jħaffru, b’suppliment ta’ għalf ta’ kuljum biex jissupplimenta t-tismin. Mill-inqas 75 % tas-suppliment tal-konċentrat irid ikun magħmul minn ċereali, b’suppliment ta’ proteini u vitamini u minerali meħtieġa għal dieta bbilanċjata (minimu ta’ 12 % proteini mhux raffinati). Il-konsum massimu ta’ kuljum ta’ dan l-għalf huwa limitat għal 2 % tal-piż ħaj tal-annimal, jew eċċezzjonalment għal sa 3 % f’każ ta’ diżastri naturali (nixfiet, għargħar, maltempati bis-silġ, eċċ.) meta r-ragħa ma jkunx possibbli. Irid ikun hemm disponibbli suppliment ta’ għalf oħxon għall-ħnieżer tas-simna: alfalfa u ħuxlief tal-alfalfa friski, taħlitiet ta’ silla/ħaxix, silaġġ tal-ħuxlief, qara’ aħmar, ġdur, ħxejjex tal-brassika, patata, ħurrieq, frott u ħxejjex, nuħħala tal-qamħ, u polpa tal-pitravi.

L-għalf kollu – ħlief l-għalf li għalih ma tistax tiġi prodotta kwantità suffiċjenti (supplimenti ta’ proteini, minerali u vitamini) minħabba limitazzjonijiet lokali, jew li ma jistax jinkiseb lokalment minħabba diżastri naturali – irid jiġi miż-żona ġeografika tal-produzzjoni. Eċċezzjonalment, f’każ ta’ diżastri naturali (nixfiet, għargħar, maltempati bis-silġ) li jipprevjenu l-produzzjoni tal-għalf meħtieġ fiż-żona definita, l-istess tip ta’ għalf jista’ jinkiseb minn żoni oħra, li għalihom is-sid jeħtieġlu jipprovdi evidenza dokumentata. L-ammont massimu ta’ għalf li jista’ jiġi minn barra ż-żona ġeografika msemmija fil-punt 4 ma jistax jaqbeż il-50 % tal-materja niexfa fuq bażi annwali….

3.4.   Passi speċifiċi tal-produzzjoni li jridu jsiru fiż-żona ġeografika ddefinita

L-istadji kollha tal-produzzjoni tal-“Meso turopoljske svinje”, inklużi t-twellid u t-trobbija, it-tismin u l-iskarnar tal-ħnieżer, iridu jsiru fiż-żona ġeografika msemmija fil-punt 4.

Eċċezzjonalment, l-annimali għat-tnissil jistgħu jiġu minn barra ż-żona ddefinita jekk ikun hemm rekwiżiti żootekniċi ġġustifikati (eż. l-introduzzjoni ta’ demm ġdid).

L-istabbilimenti kollha rreġistrati jew approvati involuti fil-katina tal-produzzjoni tal-“Meso turopoljske svinje” (farms u biċċeriji) iridu jkunu jinsabu fiż-żona ġeografika ddefinita.

3.5.   Regoli speċifiċi dwar it-tqattigħ, it-taħkik, l-ippakkjar, eċċ.

Il-“Meso turopoljske svinje” jista’ jinbiegħ bħala laħam imkessaħ (frisk) jew iffriżat, bil-biċċa jew imqatta’, bl-ingrossa jew imballat.

3.6.   Regoli speċifiċi dwar it-tikkettar

Meta jitqiegħed fis-suq fil-forma ta’ nofs karkassi u qatgħat primarji, u għat-tipi kollha ta’ imballaġġ għall-bejgħ bl-imnut, it-tikketta tal-prodott trid tinkludi, minbarra d-dettalji stabbiliti fil-leġiżlazzjoni, l-isem tad-denominazzjoni tal-oriġini u s-simbolu komuni għall-“Meso turopoljske svinje”.

Illustrazzjoni tas-simbolu komuni:

L-utenti kollha tad-denominazzjoni ta’ oriġini “Meso turopoljske svinje” li jqiegħdu fis-suq prodott li jikkonforma mal-Ispeċifikazzjoni tal-Prodott tiegħu għandhom id-dritt li jużaw is-simbolu komuni, taħt l-istess kundizzjonijiet.

4.   Definizzjoni fil-qosor taż-żona ġeografika

Iż-żona tal-produzzjoni tal-“Meso turopoljske svinje” hija limitata għaż-żona tal-Kroazja kontinentali, li tikkonsisti minn 13-il kontea u l-belt ta’ Zagreb. Tinsab esklużivament fil-konfini amministrattivi tal-bliet u l-muniċipalitajiet tal-kontej li ġejjin: Zagreb, Sisak-Moslavina, Varaždin, Vukovar-Syrmia, Osijek-Baranja, Slavonski Brod-Posavina, Požega-Slavonia, Virovitica-Podravina, Bjelovar-Bilogora, Koprivnica-Križevci, Međimurje, Krapina-Zagorje, Karlovac, u l-belt ta’ Zagreb.

5.   Rabta maż-żona ġeografika

Speċifiċità taż-żona ġeografika

Ir-razza tal-ħanżir Turopolje toriġina miż-żona ta’ Turopolje, li f’termini ta’ riżalt u ġeografija hija pjanura fuq pjastra alluvjali bejn Posavina (artijiet baxxi mistagħdra tul ix-xmara Sava) fit-Tramuntana u l-Għoljiet ta’ Vukomerić (serbut ta’ muntanji baxxi u ċatti) fin-Nofsinhar. Il-pjanura ta’ Turopolje hija maqsuma mix-xmara Odra u t-tributarji tagħha, li regolarment jgħerrqu d-depressjonijiet minħabba l-impermeabilità tat-terren tal-madwar (ħamrija taflija tqila mineroġenika/mistagħdra) sal-livelli għoljin ta’ ilma tar-rebbiegħa u tal-ħarifa.

Il-komunitajiet tal-pjanti l-aktar sinifikanti f’din iż-żona jinkludu l-ballut komuni (Quercus robur) u mergħat mistagħdra b’ħaxix irqiq (Deschampsietum caespitosae).

Bħall-biċċa l-kbira tal-Kroazja kontinentali, din iż-żona għandha klima moderatament sħuna u mxarrba. It-temperatura medja annwali tal-arja hija ta’ 10,2 °C, il-preċipitazzjoni annwali hija 893 mm, u l-umdità relattiva medja hija ta’ 78,6 %. It-temperatura medja tal-arja matul il-perjodu tal-veġetazzjoni (April-Settembru) hija ta’ 16,7 °C. Għall-veġetazzjoni tal-foresti, huwa importanti li l-preċipitazzjoni titqassam b’mod ugwali matul is-sena kollha u li aktar minn 50 % tal-preċipitazzjoni tagħmel matul il-perjodu tal-veġetazzjoni. Il-preċipitazzjoni hija l-aktar baxxa fix-xitwa. Karatteristiċi klimatiċi u tar-riżalt simili li jsawru ż-żoni l-kbar miksija bil-foresti u l-mergħat fil-pjanuri tal-għargħar tul ix-xmajjar huma wkoll karatteristiċi taż-żoni l-oħra tal-Kroazja kontinentali li għalihom infirxet it-trobbija tal-ħnieżer ta’ Turopolje.

L-abbundanza ta’ foresti, b’mod partikolari tal-ballut, il-bosta mogħdijiet tal-ilma u l-klima moderata ta’ Turopolje ilhom għal ħafna żmien jiffavorixxu l-iżvilupp tat-trobbija tal-ħnieżer. Għal sekli sħaħ, it-trobbija tal-ħnieżer ta’ Turopolje kienet importanti għall-għajxien tal-abitanti lokali, li ilhom nissiela eċċellenti tal-ħnieżer minn żmien il-qedem. Hemm mitqlu evidenza bil-miktub tat-tradizzjoni twila tat-trobbija tal-ħnieżer f’din iż-żona – b’mod partikolari diversi digrieti, deċiżjonijiet u rekords li jsemmu bdiewa prominenti tal-ħnieżer u l-kundizzjonijiet għaż-żamma tal-majjali fil-foresta, li jirregolaw it-tariffi tas-simna jew jimponu penali għas-serq tal-ħnieżer – misjuba f’reġistri muniċipali, rekords storiċi u sorsi letterarji lokali oħra li jmorru lura sal-1352.

Fit-tieni nofs tas-seklu 19 u l-ewwel nofs tas-seklu 20, iż-żona fejn kien jiġi mnissel il-ħanżir ta’ Turopolje espandiet minn Turopolje lejn Sisak u Draganić, u aktar tard lejn parti mis-Slavonja u Podravina, saħansitra sal-fruntiera mal-Ungerija, u b’hekk il-ħanżir ta’ Turopolje sar l-aktar razza mifruxa ta’ ħanżir fil-Kroazja. Pereżempju, fl-1921 kienu qed jitrabbew madwar 85 000 ħanżir ta’ Turopolje, uħud minnhom għall-esportazzjoni.

Bit-tranżizzjoni mit-trobbija estensiva tal-ħnieżer għal dik intensiva f’nofs is-seklu 20, ir-razza tal-ħnieżer ta’ Turopolje tilfet l-importanza ekonomika tagħha u kważi spiċċat. Il-qawmien mill-ġdid tat-trobbija beda fl-1996, meta r-razza ġiet inkluża fil-programm tal-Istat għat-tiġdid u l-protezzjoni in situ.

Minħabba l-karatteristiċi tal-produzzjoni inferjuri tagħhom meta mqabbla ma’ razez oħra, il-ħnieżer awtoktoni ta’ Turopolje llum huma rari, u jitrabbew kważi esklużivament fiż-żona ġeografika ddefinita fil-punt 4. F’din iż-żona, il-ħnieżer għadhom jitrabbew bl-użu ta’ teknoloġija tradizzjonali lokali b’input baxx żviluppata fil-passat biż-żamma barra tal-ħnieżer ta’ Turopolje f’ekosistema ta’ foresti u mergħat mistagħdra fi pjanuri tal-għargħar. B’dan it-tip ta’ trobbija tal-ħnieżer, il-ħnieżer jikbru bil-mod, jimirħu ħielsa, u jieklu ħaxix u sorsi naturali oħra ta’ ikel disponibbli (ħxejjex aromatiċi, ġandar u frott ieħor tas-siġar, frott selvaġġ, għeruq, tuberi, faqqiegħ, insetti, dud, bebbux, qxur, eċċ.), li jsibu huma stess billi jirgħu u jħaffru, b’suppliment minimu ta’ għalf ikkonċentrat.

It-teknoloġija b’input baxx involuta fit-trobbija tal-ħnieżer ta’ Turopolje barra hija unika għaż-żona ġeografika ddefinita fil-punt 4, fejn ilha tiġi applikata għal sekli sħaħ. Barra miż-żona ġeografika, it-trobbija tal-ħnieżer hija aktar intensiva, bi proporzjon ogħla ta’ taħlita tal-għalf fid-dieta, ftit moviment, u nuqqas ta’ sorsi naturali tal-ikel, li jaffettwa b’mod negattiv il-karatteristiċi tal-laħam tal-ħnieżer ta’ Turopolje, b’mod partikolari l-kulur u l-istruttura, kif ukoll it-togħma u l-aroma tal-laħam tagħhom.

Speċifiċità tal-prodott

Il-ħanżir ta’ Turopolje huwa maħsub li feġġ fil-bidu tal-Medjuevu permezz tal-inkroċjar tar-razez bejn ħanżir domestikat lokalment li l-forma oriġinali tiegħu kienet iċ-ċingjal Mediterranju (Sus mediterraneus) u ħanżir tar-razza Šiška – dixxendent dirett taċ-ċingjal Ewropew (Sus scrofa ferus), li ġabuh magħhom f’dan ir-reġjun it-tribujiet Slavi li kienu għadhom kif waslu fiż-żona. Il-ħanżir li rriżulta kien adattabbli u reżistenti għall-kundizzjonijiet tat-temp u għall-mard, u sab postu tajjeb ħafna fl-ekosistema ta’ Turopolje. Ir-razza ġiet żviluppata lokalment, mingħajr l-ebda influwenza esterna sinifikanti, u huwa għalhekk li llum ir-razza Turopolje turi distanza ġenetika ċara mir-razez tal-ħnieżer kemm fil-viċin kif ukoll fil-bogħod.

Il-ħnieżer tas-simna tar-razza Turopolje huma kkaratterizzati minn rata ta’ tkabbir aktar bil-mod u karkassa iqsar bi proporzjon iżgħar ta’ laħam minn razez oħra ta’ ħnieżer, filwaqt li l-akkumulazzjoni ta’ xaħam, speċjalment fil-parti taħt il-ġilda u bejn il-muskoli, hija ogħla b’mod sinifikanti. (Karolyi et al., 2019: Turopolje Pig. F’: European Local Pig Breeds – Diversity and Performance. A study of project TREASURE (M. Čandek-Potokar, R. Nieto Linan (ed.), IntechOpen, pp. 271–274).

Minħabba l-età akbar tagħhom meta jiġu skarnati u l-ammont akbar ta’ attività fiżika waqt li jkunu barra, il-laħam tal-ħnieżer għandu kulur aktar ħamrani u aktar skur, struttura muskolari aktar kompatta u inqas tnixxija mill-wiċċ mill-majjal tal-produzzjoni standard, mingħajr l-hekk imsejħa karatteristiċi PSE (pale, soft u exudative bil-Malti pallidu, artab u jnixxi) li spiss jidhru f’ġenotipi sensittivi għall-istress minħabba mutazzjonijiet fil-ġeni, li ma ġewx irreġistrati f’dawn ir-razez. Dan huwa kkonfermat minn studji li juru li l-pH tal-laħam (imkejjel fuq l-M. longissimus dorsi) huwa fil-limiti tal-kwalità normali għall-majjal (pH1 > 6,0 u pH2 bejn 5,5 u 6,1), b’kulur tal-laħam ta’ CIE L* < 50 u CIE a* > 15.

Il-laħam tal-ħanżir ta’ Turopolje minn dejjem kien apprezzat ħafna u spiss kien meqjus superjuri għal-laħam ta’ razez oħra ta’ ħnieżer; Ritzoffy (1931) jattribwixxi l-kwalità ogħla, il-fibra irqaq u l-kulur u t-togħma karatteristiċi tal-laħam tal-ħanżir ta’ Turopolje għall-injezzjoni tad-demm Mediterranju. Studji xjentifiċi riċenti kkonfermaw l-irquqija (dijametru iżgħar) tal-fibri tal-muskoli fil-laħam tal-ħanżir ta’ Turopolje meta mqabbel ma’ razez inkroċjati industrijali ta’ majjali (Đikić et al., 2010: Biological characteristics of Turopolje pig breed as factors in renewing and preservation of population. Stočarstvo 64 (2–4), p. 86).

L-interess pubbliku fil-ħanżir ta’ Turopolje għadu preżenti sal-lum, kif muri minn ħafna kontenut fil-media stampata u elettronika. Stħarriġ tal-preferenzi tal-konsumaturi kkonferma li l-konsumaturi Kroati huma ġeneralment familjari mal-ħanżir ta’ Turopolje (89,5 % ta’ dawk li wieġbu) u jirrikonoxxu l-kwalità tal-laħam u l-prodotti tiegħu, filwaqt li kważi nofs dawk kollha li wieġbu (47 %) u l-biċċa l-kbira ta’ dawk li wieġbu fil-livell lokali (55–57 %) iqisuhom aħjar mil-laħam u l-prodotti ta’ razez ta’ ħnieżer moderni (l-Anness 5.4, Cerjak 2019: Znanje i preferencije potrošača prema turopoljskoj svinji i proizvodima od turopoljske svinje [L-għarfien u l-preferenzi tal-konsumaturi għall-ħanżir ta’ Turopolje u l-prodotti tiegħu], l-Università tal-Agrikoltura ta’ Zagreb, pp. 1–40).

Rabta kawżali bejn iż-żona ġeografika u l-kwalità jew il-karatteristiċi tal-prodott (għal DOP) jew il-kwalità, ir-reputazzjoni jew karatteristiċi oħra speċifiċi talprodott (għal IĠP)

Il-protezzjoni tal-prodott “Meso turopoljske svinje” hija bbażata fuq il-kwalità speċifika tal-laħam li tirriżulta mill-bażi ġenetika, mill-mod kif jinżammu u jiġu mitmugħa l-ħnieżer, u mill-età li fiha jiġu skarnati l-ħnieżer.

Il-ġeografija u r-riżalt, u l-fatturi klimatiċi u bijotiċi tal-ekosistemi tal-foresti fl-artijiet baxxi ta’ Pokuplje u Posavina, iffavorixxew l-iżvilupp bikri tat-trobbija tal-ħnieżer fiż-żona ta’ Turopolje, li l-abitanti tagħha ilhom nissiela eċċellenti tal-ħnieżer minn żmien il-qedem. Il-ħanżir ta’ Turopolje – waħda mill-eqdem razez ta’ ħnieżer fl-Ewropa – żviluppa mingħajr l-ebda influwenza esterna sinifikanti, fuq perjodu twil ta’ żmien, li matulu l-interazzjoni kontinwa bejn il-ġenotip u l-ambjent wasslet lir-razza biex tadatta għar-riżorsi naturali taż-żona u tużahom. Reżistenti għat-temp u l-mard, bi bżonnijiet modesti u kapaċità li jsibu l-ikel waħedhom, il-ħnieżer minn dejjem kienu kapaċi jgħixu barra, u huwa għalhekk li kienu jqattgħu l-biċċa l-kbira tas-sena jirgħu fil-foresta, fejn kellhom il-ħaxix u l-ġandar bħala s-sors ewlieni tal-enerġija mill-ikel tagħhom, u jissodisfaw ir-rekwiżiti tal-proteini tagħhom bit-tħaffir. Din it-teknoloġija b’input baxx (l-ikel u l-kapaċità taż-żamma) b’użu sħiħ tar-riżorsi naturali nżammet fit-trobbija ta’ din ir-razza sal-lum.

Il-metodu tat-tnissil, li jinkludi r-ragħa liberu fil-foresti u f’mergħat u t-tmigħ minn sorsi tal-ikel disponibbli b’mod naturali, u l-karatteristiċi intrinsiċi tar-razza bħar-robustezza, iż-żieda bil-mod fil-piż u l-kapaċità għal tkabbir kumpensatorju u akkumulazzjoni ta’ xaħam, flimkien man-nuqqas ta’ għażla intensiva jew kwalunkwe inkroċjar tar-razez sinifikanti, sawru l-karatteristiċi tat-tkabbir tal-ħnieżer ta’ Turopolje, li jaffettwaw b’mod dirett l-iżvilupp tat-tessut tal-ġisem u l-karatteristiċi speċifiċi tal-“Meso turopoljske svinje”. Il-fatt li l-ħnieżer jibqgħu barra, l-attività muskolari akbar tagħhom, flimkien mal-età akbar tal-ħnieżer tas-simna meta jiġu skarnati, iwasslu għal akkumulazzjoni akbar tal-pigment muskolari, li jagħti lil-laħam kulur aktar ħamrani u aktar skur. Il-kulur tal-laħam u l-bejken ukoll huwa aktar sostenibbli, minħabba għażla aktar varjata ta’ ikel u t-teħid ta’ antiossidanti naturali u sustanzi oħra li jgħinu jistabbilizzaw it-tessut. Id-dijametru iżgħar tal-fibri tal-muskoli jagħti lil-laħam sawra aktar fina. Il-laħam huwa wkoll kumpatt u mingħajr tnixxija mill-wiċċ. Fl-istess ħin, it-tkabbir kumpensatorju b’dieta li tagħti ammont kbir ta’ enerġija fl-istadji finali tat-tnissil matul l-istaġun tal-ħarifa wara tkabbir aktar dgħajjef fir-rebbiegħa u fis-sajf iwassal għal żvilupp rapidu tat-tessut xaħmi f’razez b’potenzjal baxx ta’ tkabbir tal-muskoli, bħall-ħanżir ta’ Turopolje. Għalhekk, il-laħam tal-ħanżir ta’ Turopolje għandu grad intrinsikament ogħla ta’ akkumulazzjoni ta’ xaħam, speċjalment fil-parti ta’ taħt il-ġilda u bejn il-muskoli, u huwa għalhekk li, meta jiġi kkunsmat, il-laħam imsajjar ikollu konsistenza elastika u mmerrqa, ikun mimli togħma u b’aroma speċifika mix-xaħam imdewweb tal-laħam.

Minħabba t-tnissil barra u l-kwalità tal-laħam, il-biċċa l-kbira tal-konsumaturi tal-lum, speċjalment dawk lokali, iqisu li l-laħam tal-ħanżir ta’ Turopolje huwa superjuri għal dak tal-majjal standard, u ta’ valur tas-suq akbar.

Referenza għall-pubblikazzjoni tal-Ispeċifikazzjoni tal-Prodott

https://poljoprivreda.gov.hr/UserDocsImages/dokumenti/hrana/proizvodi_u_postupku_zastite-zoi-zozp-zts/Specifikacija_Meso_turopoljske%20svinje.pdf

---

(1)  ĠU L 343, 14.12.2012, p. 1.