Pubblikazzjoni ta’ applikazzjoni għal emenda tal-Unjoni għall-Ispeċifikazzjoni tal-Prodott għal isem fis-settur tal-inbid skont l-Artikolu 97(3) tar-Regolament (UE) Nru 1308/2013 tal-Parlament Ewropew u tal-Kunsill

(2022/C 74/07)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 98 tar-Regolament (UE) Nru 1308/2013 tal-Parlament Ewropew u tal-Kunsill (1) fi żmien xahrejn mid-data ta’ din il-pubblikazzjoni.

APPLIKAZZJONI GĦAL EMENDA TAL-UNJONI GĦALL-ISPEĊIFIKAZZJONI TAL-PRODOTT

Jumilla

PDO-ES-A0109-AM05

Data tal-applikazzjoni: 10 ta’ Frar 2021

1.   Grupp applikant u interess leġittimu

Consejo Regulador D.O. Jumilla (Bord Regolatorju għad-Denominazzjoni ta’ Oriġini Jumilla)

Assoċjazzjoni li tikkonsisti mill-vitikulturi u mill-fabbriki tal-inbid kollha li jkabbru l-għeneb u jipproduċu, jaħżnu jew jibbottiljaw inbid maħsub jew intitolat għad-DOP Jumilla.

2.   Intestatura fl-Ispeċifikazzjoni tal-Prodott affettwata mill-emenda/i

☐	Isem il-prodott

☐	Kategorija tal-prodott tad-dwieli

☐

Rabta

☒	Restrizzjonijiet tal-kummerċjalizzazzjoni

3.   Deskrizzjoni u raġunijiet għall-emenda

L-ippakkjar fiż-żona ġeografika demarkata u t-tneħħija tal-għażla li l-inbid protett jitmexxa bl-ingrossa f’fabbriki tal-inbid li ma humiex koperti mid-DOP.

a)	L-intestaturi tal-Ispeċifikazzjoni tal-Prodott affettwati: 8. Rekwiżiti applikabbli

b)	Taqsimiet tad-Dokument Uniku affettwati: 9. Kundizzjonijiet ulterjuri

Raġuni(jiet)

Hija emenda tal-Unjoni li taqa’ f’waħda mill-kategoriji previsti fl-Artikolu 14(1) tar-Regolament (UE) 2019/33, speċifikament: restrizzjonijiet ulterjuri fuq il-kummerċjalizzazzjoni tal-prodott.

Skont l-Artikolu 4 tar-Regolament (UE) 2019/33, il-ġustifikazzjoni għall-emenda hija kif ġej:

Raġunijiet relatati mal-kwalità

—

Il-produzzjoni tal-inbejjed Jumilla (DOP) ma tispiċċax bil-proċess ta’ trasformazzjoni tal-most f’inbid permezz tal-fermentazzjoni alkoħolika u proċessi supplimentari oħrajn, iżda pjuttost bl-ippakkjar. Dan irid jitqies bħala l-aħħar stadju fil-produzzjoni ta’ dawn l-inbejjed, peress li jinvolvi prattiki enoloġiċi oħra li jistgħu jaffettwaw il-karatteristiċi speċjali, jiġifieri l-filtrazzjoni, l-istabbilizzazzjoni u diversi tipi ta’ miżuri korrettivi. Barra minn hekk, f’ħafna każijiet, huwa neċessarju perjodu ta’ maturazzjoni fil-flixkun, li jseħħ fuq l-ixtillieri tal-fliexken tal-fabbriki tal-inbid iċċertifikati, sabiex l-inbid lest jikseb palat mimli. Tabilħaqq, it-tagħlimiet kollha meħuda mill-fatt li l-inbid kien jitħalla jitneħħa miż-żona demarkata bl-ingrossa wrew lill-produtturi l-importanza ta’ dan l-aħħar stadju fil-produzzjoni tal-inbid. Din id-denominazzjoni ta’ oriġini ġiet rikonoxxuta fi Spanja fl-1966. Bħall-bqija tas-settur, tul l-istorja twila tagħha sar progress konsiderevoli fir-rekwiżiti tal-kwalità tant li, illum il-ġurnata, il-monitoraġġ bir-reqqa tal-ibbottiljar huwa prerekwiżit tal-kwalità. Għal din ir-raġuni, is-settur stess jixtieq jiżgura li l-ebda nbid li huwa intitolat juża l-isem Jumilla ma jevita dan il-monitoraġġ. Huwa biżżejjed li jiġi nnotat li 20 sena ilu, fl-istaġun 2000-2001, 86 % tal-inbid ta’ din id-DOP kien esportat bl-ingrossa, filwaqt li issa dan jirrappreżenta biss madwar 4 %.

—

Barra minn hekk, huwa ċar li t-trasport fuq distanzi twal jew għal perjodi twal iżid ir-riskju ta’ tibdiliet fil-prodott, bħal ossidazzjoni jew bidliet fit-temperatura, li jaffetwaw b’mod negattiv il-kwalità. Jekk dawn il-konsenji jitħallew isiru, dan ibaxxi l-kwalità. Tabilħaqq, il-produtturi tant kemm huma konxji minn dan li l-volum imqiegħed fis-suq bl-ingrossa issa huwa frazzjoni tat-total mibjugħ mid-DOP.

—

Sabiex tiġi ssalvagwardjata bis-sħiħ il-kwalità tal-prodott, l-ibbottiljar għandu jsir mill-produtturi ċċertifikati li jappartjenu għad-DOP, jiġifieri fiż-żona demarkata. Dawn il-produtturi huma direttament responsabbli għall-prestiġju tal-prodott, u huma l-benefiċjarji tiegħu, li altrimenti jista’ jispiċċa kompromess.

Garanzija tal-oriġini

—

Maħtur mill-awtorità kompetenti Spanjola u akkreditat mill-Korp Nazzjonali ta’ Akkreditament skont ISO 17065 dwar iċ-ċertifikazzjoni tal-prodott, il-korp ta’ kontroll huwa attiv fil-konfini taż-żona demarkata. Hija meħtieġa traċċabbiltà sħiħa biex tiġi ggarantita l-oriġini proprja tal-materja prima u l-produzzjoni. Il-korp ta’ kontroll biss jista’ jwettaq dawn l-eżerċizzji, u għal raġunijiet loġistiċi u finanzjarji, ma jistax iżur fabbriki tal-inbid fi Stati Membri oħra jew f’pajjiżi terzi sabiex jiggarantixxi l-oriġini tal-inbid ibbottiljat hemmhekk.

—

Meta l-inbid bl-ingrossa jintbagħat lil operaturi barra mill-kamp ta’ applikazzjoni tiegħu, il-korp ta’ kontroll jagħti garanzija fil-forma ta’ nota ta’ konsenja li tikkonferma l-oriġini tal-prodott u l-konformità tiegħu mal-Ispeċifikazzjonijiet għal Jumilla sal-punt tad-dispaċċ. Madankollu, meta ma jkunx hemm kontroll sussegwenti, din il-garanzija tal-oriġini tkun inutli għall-finijiet tad-DOP u titlef il-validità tagħha. Huwa minnu li r-regoli tal-UE jipprevedu kooperazzjoni mal-korpi ta’ kontroll fil-pajjiżi ta’ destinazzjoni. Iżda l-esperjenza turi li din hija limitata għall-kontrolli tas-soltu mwettqa mill-produtturi. Ma hemm l-ebda kontroll proprju tar-rekwiżiti għall-istadju tal-ibbottiljar skont l-Ispeċifikazzjoni rilevanti. Speċifikament, kull flixkun irid juri garanzija tal-oriġini fil-forma ta’ tikketta sekondarja jew siġill bin-numru. Madankollu, l-operazzjonijiet tal-ibbottiljar barra miż-żona demarkata ma jitolbux dawn l-elementi mill-korp ta’ kontroll. Dan ifisser li ma jintużawx tikketti sekondarji u siġilli bin-numru minkejja li huma meħtieġa mill-Ispeċifikazzjoni. Is-sitwazzjoni hija saħansitra agħar meta l-ibbottiljar isir f’pajjiż terz, u xi 75 % ta’ Jumilla mibjugħ bl-ingrossa jmur f’pajjiżi barra mill-UE. F’każijiet bħal dawn, lanqas biss hemm mekkaniżmu fis-seħħ biex jitwettqu kontrolli fuq dawn l-inbejjed. Barra minn hekk, huwa impossibbli li l-korp ta’ kontroll ikun jaf kif dawn il-prodotti se jispiċċaw fis-suq: bl-isem tad-DOP, b’isem ieħor jew imħalltin ma’ nbejjed oħra.

Garanzija tal-kontroll

—

Qabel din l-applikazzjoni għal emenda, il-konsenji bl-ingrossa tal-inbid protett kienu akkumpanjati minn ċertifikat tal-oriġini fuq talba tal-operatur irreġistrat. Abbażi tar-raġunijiet stipulati hawn fuq, u abbażi tal-esperjenza, u minħabba n-nuqqas ta’ assigurazzjoni tal-kwalità u kontroll inerenti għall-konsenji bl-ingrossa, jidher li ma huwiex xieraq li jkomplu jinħarġu ċertifikati għal inbejjed li ma jibqgħu soġġetti għall-ebda kontroll qabel ma jitqiegħdu fis-suq.

—

Il-volumi tal-esportazzjonijiet bl-ingrossa qed jonqsu gradwalment maż-żmien, kif juru biċ-ċar iċ-ċifri attwali. Bħala eżempju, matul l-istaġun 2010-2011, ġew esportati 20 704 ettolitri, madwar 25 % tal-produzzjoni. Fl-istaġun 2019-2020, iċ-ċifra kienet 8 939 ettolitru, madwar 4 % tal-produzzjoni. Sa issa, fl-istaġun tal-2021, ma kien hemm l-ebda konsenja ta’ nbid bl-ingrossa. Dan ikompli jnaqqas il-ġustifikazzjoni għal kwalunkwe tentattiv mill-korp taċ-ċertifikazzjoni li jwettaq kontrolli peress li l-volumi huma żgħar ħafna u mxerrda ħafna madwar destinazzjonijiet differenti.

—

Barra minn hekk, il-korp ta’ kontroll stess u l-awtorità kompetenti tiegħu jemmnu li, fir-realtà, dawn l-inbejjed jispiċċaw jitqiegħdu fis-suq mingħajr id-DOP Jumilla. Għalhekk, l-ebda wieħed mill-produtturi li jibbottiljaw l-inbid tad-DOP Jumilla ma huwa se jkollu jibdel il-prattiki tiegħu u lanqas ma huma se jiġu affettwati l-interessi tagħhom. L-ebda wieħed mill-produtturi li jesportaw bl-ingrossa ma wera li ma jaqbilx ma’ din il-miżura, li ġiet approvata mill-fabbriki tal-inbid u mill-vitikulturi kollha li jappartjenu għad-Denominazzjoni ta’ Oriġini. Ma kien hemm l-ebda intervent matul il-proċedura ta’ oġġezzjoni nazzjonali għall-approvazzjoni ta’ din l-emenda għall-Ispeċifikazzjoni.

—

Il-Korp Nazzjonali ta’ Akkreditament, li kull sena jwettaq awditu tax-xogħol tal-korp ta’ kontroll, ikkummenta dwar it-telf tal-kontroll fuq il-volumi esportati fil-garanzija tal-korp ta’ kontroll. Din l-emenda se ssolvi wkoll problemi bħal dawn, li jistgħu jimminaw l-istatus tal-korp ta’ kontroll bħala korp taċ-ċertifikazzjoni għall-inbid.

DOKUMENT UNIKU

1.   Isem/ismijiet għar-reġistrazzjoni

Jumilla

2.   Tip ta’ indikazzjoni ġeografika

DOP – Denominazzjoni ta’ Oriġini Protetta

3.   Kategoriji tal-prodotti tad-dwieli

1.

Inbid

3.	Inbid likur

4.   Deskrizzjoni tal-inbid/inbejjed

1.   Inbejjed bojod (Jumilla u Jumilla Dulce)

Dehra: tvarja minn lewn l-azzar għal lewn it-topazju. Ċar u jgħajjat.

Aroma: frott frisk. L-inbejjed ħelwin jista’ jkollhom noti ta’ frott imqadded.

Togħma: bilanċ ta’ aċidità u ħlewwa. Fl-inbejjed ħelwin, il-ħlewwa tippredomina fuq l-aċidità.

Ir-rekwiżiti analitiċi mhux inklużi fit-tabella huma f’konformità mal-leġiżlazzjoni tal-UE dwar l-inbid li tinsab fis-seħħ.

Karatteristiċi analitiċi
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)	11
Aċidità totali minima	4 grammi għal kull litru espressi bħala aċidu tartariku
Aċidità volatili massima (f’milliekwivalenti għal kull litru)	13,3
Total massimu ta’ diossidu tal-kubrit (f’milligrammi għal kull litru)

2.   Inbejjed rożè (Jumilla u Jumilla Dulce)

DESKRIZZJONI TESTWALI KONĊIŻA

Dehra: tvarja minn lewn il-lampun roża għal lewn is-salamun ċar. Ċar u jgħajjat.

Aroma: frott frisk. Frott aħmar. L-inbejjed ħelwin jista’ jkollhom noti ta’ frott imqadded.

Togħma: aċidità bbilanċjata. Fl-inbejjed ħelwin, il-ħlewwa tippredomina fuq l-aċidità.

Ir-rekwiżiti analitiċi mhux inklużi fit-tabella huma f’konformità mal-leġiżlazzjoni tal-UE dwar l-inbid li tinsab fis-seħħ.

Karatteristiċi analitiċi
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)	11,5
Aċidità totali minima	4 grammi għal kull litru espressi bħala aċidu tartariku
Aċidità volatili massima (f’milliekwivalenti għal kull litru)	13,3
Total massimu ta’ diossidu tal-kubrit (f’milligrammi għal kull litru)

3.   Inbejjed rożè (Jumilla Monastrell)

DESKRIZZJONI TESTWALI KONĊIŻA

Dehra: tvarja minn lewn il-lampun roża għal lewn is-salamun ċar. Ċar u jgħajjat.

Aroma: frott frisk. Frott aħmar. L-inbejjed ħelwin jista’ jkollhom noti ta’ frott imqadded.

Togħma: aċidità bbilanċjata. Fl-inbejjed ħelwin, il-ħlewwa tippredomina fuq l-aċidità.

Ir-rekwiżiti analitiċi mhux inklużi fit-tabella huma f’konformità mal-leġiżlazzjoni tal-UE dwar l-inbid li tinsab fis-seħħ.

Karatteristiċi analitiċi
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)	12
Aċidità totali minima	4 grammi għal kull litru espressi bħala aċidu tartariku
Aċidità volatili massima (f’milliekwivalenti għal kull litru)	13,3
Total massimu ta’ diossidu tal-kubrit (f’milligrammi għal kull litru)

4.   Inbejjed ħomor (Jumilla Monastrell)

DESKRIZZJONI TESTWALI KONĊIŻA

Dehra: tvarja minn vjola għal aħmar lewn il-briks, l-inbejjed ħelwin jistgħu jiżviluppaw sfumatura tal-okra. Ċar u jgħajjat.

Aroma: frott aħmar. Frott iswed. L-inbejjed ħelwin għandhom noti ta’ frott imqadded.

Togħma: aċidità bbilanċjata. Tannika. Fl-inbejjed ħelwin, il-ħlewwa tippredomina fuq l-aċidità.

Ir-rekwiżiti analitiċi mhux inklużi fit-tabella huma f’konformità mal-leġiżlazzjoni tal-UE dwar l-inbid li tinsab fis-seħħ.

Karatteristiċi analitiċi
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)	12,5
Aċidità totali minima	4 grammi għal kull litru espressi bħala aċidu tartariku
Aċidità volatili massima (f’milliekwivalenti għal kull litru)	13,3
Total massimu ta’ diossidu tal-kubrit (f’milligrammi għal kull litru)

5.   Inbejjed ħomor (Jumilla u Jumilla Dulce)

DESKRIZZJONI TESTWALI KONĊIŻA

Dehra: tvarja minn vjola għal aħmar lewn il-briks, l-inbejjed ħelwin jistgħu jiżviluppaw sfumatura tal-okra. Ċar u jgħajjat.

Aroma: frott aħmar. Frott iswed. L-inbejjed ħelwin għandhom noti ta’ frott imqadded.

Togħma: aċidità bbilanċjata. Tannika. Fl-inbejjed ħelwin, il-ħlewwa tippredomina fuq l-aċidità.

Ir-rekwiżiti analitiċi mhux inklużi fit-tabella huma f’konformità mal-leġiżlazzjoni tal-UE dwar l-inbid li tinsab fis-seħħ.

Karatteristiċi analitiċi
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)	12
Aċidità totali minima	4 grammi għal kull litru espressi bħala aċidu tartariku
Aċidità volatili massima (f’milliekwivalenti għal kull litru)	13,3
Total massimu ta’ diossidu tal-kubrit (f’milligrammi għal kull litru)

6.   Inbejjed likuri (Tinto Monastrell)

DESKRIZZJONI TESTWALI KONĊIŻA

Dehra: tvarja minn aħmar lewn iċ-ċirasa għal okra. Ċar u jgħajjat.

Aroma: frott iswed. Frott imqadded.

Togħma: il-ħlewwa tippredomina fuq l-aċidità. Tannika.

Ir-rekwiżiti analitiċi mhux inklużi fit-tabella huma f’konformità mal-leġiżlazzjoni tal-UE dwar l-inbid li tinsab fis-seħħ.

Karatteristiċi analitiċi
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)	15
Aċidità totali minima
Aċidità volatili massima (f’milliekwivalenti għal kull litru)
Total massimu ta’ diossidu tal-kubrit (f’milligrammi għal kull litru)

5.   Prattiki tal-produzzjoni tal-inbid

a.   Prattiki enoloġiċi speċifiċi

Metodu tal-kultivazzjoni

Il-vinji koperti mid-denominazzjoni ta’ oriġini protetta Jumilla jistgħu jkunu soġġetti għal metodi ta’ kultivazzjoni estensiva jew ta’ kultivazzjoni intensiva.

Kultivazzjoni estensiva: għall-vinji li fihom, għal raġunijiet ta’ terren, altitudni, xita u fatturi ambjentali oħra, id-densità tat-tħawwil tikkonforma mal-parametri agrikoli li ġejjin: massimu ta’ 1 900 pjanta għal kull ettaru u minimu ta’ 1 100 pjanta għal kull ettaru.

Kultivazzjoni intensiva: għall-vinji li, għal darba oħra skont il-kundizzjonijiet ambjentali, jikkonformaw mal-parametri agrikoli li ġejjin: id-densità tat-tħawwil għandha tkun bejn 3 350 u 1 500 pjanta għal kull ettaru.

L-għeneb jinħasad b’tali mod li ma jagħmilx ħsara lill-kwalità tiegħu. Għall-inbejjed koperti mid-DOP, jintuża biss għeneb f’saħħtu li jkun misjur biżżejjed u f’minimu ta’ 10,70o Baumé għall-għeneb abjad, u 11o Baumé għall-għeneb aħmar.

L-għeneb Monastrell maħsub biex jintuża għall-inbid likur irid ikun f’minimu ta’ 13o Baumé meta jinħasad.

Waqt l-għasir, il-most u l-inbid jiġu soġġetti għal pressjonijiet li jagħtu rendiment massimu li, wara t-trasformazzjoni, ma jistax jaqbeż l-74 litru ta’ nbid lest għal kull 100 kilogramma ta’ għeneb.

Għall-fini tal-kalkolu tal-proċessi ta’ tqaddim, l-ewwel jum ta’ Ottubru ta’ kull sena jittieħed bħala l-bidu.

b.   Rendimenti massimi għal kull ettaru

1.

Varjetajiet ħomor ikkultivati b’mod mifrux 5 000 kilogramma ta’ għeneb għal kull ettaru 37 ettolitru għal kull ettaru

2.

Varjetajiet bojod ikkultivati b’mod mifrux 5 625 kilogramma ta’ għeneb għal kull ettaru 41,62 ettolitru għal kull ettaru

3.

Kultivazzjoni intensiva 8 750 kilogramma ta’ għeneb għal kull ettaru 64,75 ettolitru għal kull ettaru

6.   Definizzjoni taż-żona demarkata

Iż-żona ta’ produzzjoni għall-inbejjed koperti mid-denominazzjoni ta’ oriġini protetta Jumilla tinkludi art li tinsab fil-muniċipalitajiet ta’ Jumilla, fil-provinċja ta’ Murcia, u Fuentealamo, Albatana, Ontur, Hellín, Tobarra u Montealegre del Castillo fil-provinċja ta’ Albacete.

7.   Varjetà jew varjetajiet tad-dwieli li minnhom jinkiseb l-inbid / jinkisbu l-inbejjed

AIRÉN

CABERNET SAUVIGNON

CHARDONNAY

GARNACHA TINTA

GARNACHA TINTORERA

MACABEO - VIURA

MALVASIA AROMATICA - MALVASIA DE SITGES

MERLOT

MONASTRELL

MOSCATEL DE GRANO MENUDO

PEDRO XIMENEZ

PETIT VERDOT

SAUVIGNON BLANC

SYRAH

TEMPRANILLO - CENCIBEL

VERDEJO

8.   Deskrizzjoni tar-rabta/rabtiet

8.1.   Inbid

L-aktar għenba importanti hija l-Monastrell, varjetà robusta ħafna adattata perfettament għall-kundizzjonijiet ħarxa taż-żona, bin-nixfa, is-sjuf sħan ħafna u l-ġlatiet tar-rebbiegħa tagħha. Tipproduċi nbejjed b’palat qawwi, rikki, u b’kontenut għoli ta’ alkoħol u aċidità b’aromi karatteristiċi għoljin ta’ frott misjur u b’astrinġenza integrata sew.

Il-varjetajiet awtorizzati l-oħra jikkumplimentaw b’mod perfett lill-Monastrell, billi jistabbilizzaw il-kulur u jżidu l-aċidità u l-kapaċità tat-tqaddim, kif ukoll jarmonizzaw l-aromi perfettament.

8.2.   Inbejjed likuri

Dawn l-inbejjed huma magħmulin mill-Monastrell, varjetà li tagħtihom intensità tal-kulur li tvarja minn medja sa qawwija ħafna, potenzjalment kważi opaka, b’riżultat tat-temperaturi għoljin li huma karatteristiċi taż-żona.

9.   Rekwiżiti oħra applikabbli (ippakkjar, tikkettar, rekwiżiti addizzjonali)

Tikkettar

Qafas legali:

Fil-leġiżlazzjoni nazzjonali

Tip ta’ rekwiżit ieħor:

Dispożizzjonijiet addizzjonali relatati mat-tikkettar

Deskrizzjoni tar-rekwiżit:

L-isem tad-denominazzjoni ta’ oriġini protetta jrid jidher b’mod prominenti fuq it-tikketti, f’tipa li trid tkun ta’ mill-inqas 3 millimetri u b’tul massimu ta’ 10 millimetri.

L-isem irid jidher ħdejn il-kliem “Denominación de Origen Protegida” jew “Denominación de Origen”, li jrid ikun f’tipa b’tul ta’ mill-inqas 2 millimetri, iżda li dejjem għandu jkun iżgħar mill-isem tad-DOP li jkun hemm miegħu.

Ir-referenzi l-oħrajn se jkunu dawk stabbiliti fil-leġiżlazzjoni ġenerali dwar it-tikkettar tal-inbid, u fir-regoli u r-regolamenti speċifiċi dwar it-tikkettar stabbiliti mill-Bord Regolatorju u li huma attwalment fis-seħħ.

L-ippakkjar irid jinkludi siġilli tal-kwalità, tikketti sekondarji jew tikketti bin-numru maħruġa mill-Bord Regolatorju. Dawn iridu jitwaħħlu mill-fabbrika tal-inbid u jridu jkunu viżibbli fuq l-ippakkjar b’mod li jipprevjeni l-użu mill-ġdid tagħhom.

Trasport tal-inbejjed

Qafas ġuridiku

Għal organizzazzjoni li timmaniġġa d-DOP/IĠP, meta previst mill-Istati Membri.

Tip ta’ rekwiżit ulterjuri

Ippakkjar fiż-żona ġeografika demarkata

Deskrizzjoni tar-rekwiżit

L-inbid protett irid jiġi ppakkjat biss f’faċilitajiet li jinsabu fiż-żona ta’ produzzjoni tad-DOP Jumilla.

Sabiex jiġi żgurat l-użu xieraq tad-DOP, l-inbejjed protetti kollha jridu jintbagħtu fl-ippakkjar.

Il-produzzjoni tal-inbejjed bid-denominazzjoni ta’ oriġini ma tispiċċax bil-proċess tat-trasformazzjoni tal-most f’inbid permezz tal-fermentazzjoni alkoħolika u proċessi supplimentari oħra, iżda pjuttost bl-ippakkjar. Dan irid jitqies bħala l-aħħar stadju fil-produzzjoni ta’ dawn l-inbejjed, peress li jinvolvi prattiki enoloġiċi oħra li jistgħu jaffettwaw il-karatteristiċi speċjali, jiġifieri: il-filtrazzjoni, l-istabbilizzazzjoni u diversi tipi ta’ miżuri korrettivi. Barra minn hekk, f’ħafna każijiet, huwa neċessarju perjodu ta’ maturazzjoni fil-flixkun sabiex l-inbid lest jikseb palat mimli. Barra minn hekk, huwa ċar li t-trasport fuq distanzi twal jew għal perjodi twal iżid ir-riskju ta’ tibdiliet fil-prodott, bħal ossidazzjoni jew bidliet fit-temperatura, li jaffettwaw il-kwalità b’mod ħażin. Għalhekk, sabiex tiġi ppreservata l-kwalità tal-inbid, huwa meħtieġ li dan jiġi bbottiljat fiż-żona demarkata tad-DOP.

Il-korp ta’ kontroll huwa maħtur mill-awtorità kompetenti Spanjola u akkreditat mill-Korp Nazzjonali ta’ Akkreditament skont ISO 17065 dwar iċ-ċertifikazzjoni tal-prodotti. Fil-każ ta’ volumi bl-ingrossa mibgħuta lil operaturi barra miż-żona demarkata, il-korp ta’ kontroll jista’ jiggarantixxi l-oriġini u l-konformità mad-DOP Jumilla sal-punt tad-dispaċċ biss. Madankollu, għal raġunijiet ta’ loġistika u spejjeż, il-korp ta’ kontroll ma jistax jopera f’pajjiżi ta’ destinazzjoni fejn, fil-prattika, lanqas l-awtoritajiet kompetenti nazzjonali ma jwettqu kontrolli. Madwar 75 % tal-konsenji bl-ingrossa jmorru lejn pajjiżi terzi. Konsegwentement, il-korp ta’ kontroll ma jafx kif dawn l-inbejjed jitqiegħdu fis-suq. Dak li jaf huwa li l-fliexken ma jurux it-tikketta sekondarja jew is-siġill bin-numru kif meħtieġ peress li ma ssir l-ebda talba għal dawn mill-operazzjonijiet tal-ibbottiljar. Dan ifisser li ma għandux ikun hemm operazzjonijiet ta’ bbottiljar li jinvolvu Jumilla (DOP) barra miż-żona demarkata. Għalhekk, sabiex tiġi ggarantita l-oriġini u sabiex jiġi ssalvagwardjat il-kontroll, huwa neċessarju li l-inbid kollu jiġi bbottiljat fiż-żona ġeografika demarkata.

Link għall-ispeċifikazzjoni tal-prodott

https://www.mapa.gob.es/es/alimentacion/temas/calidad-diferenciada/pcdopjumillamodificacionmayoram05limpio_tcm30-556674.pdf

---

(1)  ĠU L 347, 20.12.2013, p. 671.