—

tiddikjara r-rikors ammissibbli u fondat;

—

tannulla d-deċiżjoni kkontestata kollha kemm hi;

—

tikkundanna lill-konvenuta għall-ispejjeż;

—

tordna kull miżura oħra meħtieġa fl-interess tal-ġustizzja.

1.

L-ewwel motiv ibbażat fuq il-fatt li l-konvenuta aġixxiet ultra vires u kisret l-Artikolu 51(7) tar-Regolament REACH (2) billi adottat id-deċiżjoni kkontestata sabiex tkopri aspetti li dwarhom il-Kumitat tal-Istati Membri tal-Aġenzija Ewropea għas-Sustanzi Kimiċi (iktar ’il quddiem l-“Aġenzija”) kien wasal għal ftehim unanimu, filwaqt li din id-dispożizzjoni tippermetti lill-Kummissjoni tadotta deċiżjoni biss meta l-Kumitat tal-Aġenzija “jonqos milli jilħaq ftehim unanimu”.

2.

It-tieni motiv ibbażat fuq il-fatt li l-konvenuta wettqet żball manifest ta’ evalwazzjoni u kisret l-Artikolu 13(3) tar-Regolament REACH, għaliex it-twettiq ta’ testijiet fuq l-etere tad-dimetil (iktar ’il quddiem is-“sustanza”) fil-konċentrazzjonijiet imposti mid-deċiżjoni kkontestata ma huwiex teknikament possibbli u jmur kontra l-metodi ta’ ttestjar preskritti fil-miżuri msemmija fl-Artikolu 13(3) tar-Regolament REACH.

3.

It-tielet motiv ibbażat fuq il-fatt li l-konvenuta wettqet żball manifest ta’ evalwazzjoni billi talbet testijiet li ser jipproduċu l-ebda informazzjoni rilevanti dwar is-sustanza.

4.

Ir-raba’ motiv ibbażat fuq il-fatt li l-konvenuta wettqet żball manifest ta’ evalwazzjoni u ma osservatx il-kolonna 2 tal-punt 8.7.3 tal-Anness X tar-Regolament REACH billi talbet iż-żieda tal-koorti 2A/2B mal-istudju estiż tat-tossiċità riproduttiva fuq ġenerazzjoni waħda.

5.

Il-ħames motiv ibbażat fuq il-fatt li l-konvenuta aġixxiet ultra vires u ma osservatx il-kolonna 1 tal-punt 8.7.3 tal-Anness X tar-Regolament REACH kif ukoll l-Artikolu 25 tal-imsemmi regolament billi talbet studju preliminari għall-individwazzjoni tad-doża.

6.

Is-sitt motiv ibbażat fuq il-fatt li l-konvenuta aġixxiet ultra vires u kisret l-Artikolu 41 tar-Regolament REACH kif ukoll l-Anness XI tar-Regolament REACH billi ma ppermettietx lir-rikorrenti, fir-rigward tal-allegat nuqqas ta’ konformità mar-rekwiżiti REACH, jippreżentaw aġġustament tar-rekwiżiti fil-qasam tat-testijiet, minflok it-tesijiet mitluba.

7.

Is-seba’ motiv ibbażat fuq il-fatt li l-konvenuta aġixxiet ultra vires u kisret l-Artikolu 41 tar-Regolament REACH billi waslet, permezz tad-deċiżjoni kkontestata, għal konklużjoni dwar aġġustament eventwali bbażat fuq l-approċċ ta’ read-across.

8.

It-tmien motiv ibbażat fuq il-fatt li l-konvenuta wettqet żball manifest ta’ evalwazzjoni, ma ħaditx inkunsiderazzjoni informazzjoni rilevanti u ma osservatx il-kolonna 2 tal-punt 8.7.2 tal-Anness IX tar-Regolament REACH billi talbet studju tat-tossiċità fl-iżvilupp ta’ qabel it-twelid (metodu ta’ ttestjar: B.31 tal-UE/OECD TG 414) li għandu jitwettaq fuq il-fniek permezz ta’ inalazzjoni.

9.

Id-disa’ motiv ibbażat fuq il-fatt li l-konvenuta kisret il-prinċipju ta’ proporzjonalità tad-dritt tal-Unjoni u tal-Artikolu 25 tar-Regolament REACH (a) billi talbet testijiet li huma inutli u mhux adatti, minħabba li huwa teknikament impossibbli li dawn jitwettqu kif titlob il-konvenuta u għaliex, ladarba jkunu twettqu, ma jipproduċu l-ebda informazzjoni rilevanti dwar is-sustanza, (b) billi talbet studju preliminari għall-individwazzjoni tad-doża li hija inutli wkoll fid-dawl tat-telf konsiderevoli u kbir ta’ ħajja tal-annimali li jmur kontra r-rekwiżiti previsti fl-Artikolu 25 tar-Regolament REACH, u (c) billi warrbet l-għażla inqas oneruża.