26.1.2013   

MT

Il-Ġurnal Uffiċjali tal-Unjoni Ewropea

C 25/1

(1)

Il-konnettività mal-broadband hija ta' importanza strateġika għat-tkabbir Ewropew u għall-innovazzjoni fis-setturi kollha tal-ekonomija u għall-koeżjoni soċjali u territorjali. L-Istrateġija Ewropa 2020 (“UE2020”) tenfasizza l-importanza tal-implimentazzjoni tal-broadband bħala parti minn strateġija tat-tkabbir tal-UE għall-10 snin li ġejjin u tistabbilixxi miri ambizzjużi għall-iżvilupp tal-broadband. Waħda mill-inizjattivi ewlenin tagħha, l-Aġenda Diġitali għall-Ewropa (“ADE”) (1), tirrikonoxxi l-benefiċċji soċjoekonomiċi tal-broadband u tenfasizza l-importanza tiegħu għall-kompetittività, l-inklużjoni soċjali u l-impjiegi. L-ilħiq tal-għan tal-Ewropa 2020 ta' tkabbir intelliġenti, sostenibbli u inklużiv jiddependi wkoll mill-proviżjoni ta' aċċess mifrux u bi prezz konvenjenti għal infrastruttura u servizzi tal-internet b’veloċità għolja. Fattur kruċjali għall-Ewropa hu li twieġeb għall-isfida tal-iffinanzjar ta' infrastruttura tal-broadband ta' kwalità tajba u bi prezz konvenjenti biex tiżdied il-kompetittività u l-innovazzjoni tagħha, tipprovdi opportunitajiet ta’ xogħol għaż-żgħażagħ, tipprevjeni d-delokalizzazzjoni tal-attività ekonomika u tiġbed l-investimenti interni. L-ADE ttenni l-għan tal-UE2020 li l-broadband bażiku jkun disponibbli għall-Ewropej kollha sal-2013 u tfittex li tiżgura li, sal-2020, (i) l-Ewropej kollha jkollhom aċċess għal Internet b’veloċitajiet ħafna ogħla ta’ aktar minn 30 Mbps u (ii) 50 % jew aktar tad-djar Ewropej jabbonaw għal konnessjonijiet tal-Internet ta’ 'l fuq minn 100 Mbps.

(2)

Sabiex jintlaħaq l-għan ta’ aċċess ta’ veloċitajiet tal-internet ogħla minn 30 Mbps, huwa stmat (2) li huwa meħtieġ sa EUR 60 biljun ta’ investiment u sa EUR 270 biljun għal mill-inqas 50 % tal-unitajiet domestiċi biex jaċċessaw konnessjonijiet tal-internet ogħla minn 100 Mbps (3). Investimenti bħal dawn għandhom jiġu primarjament minn investituri kummerċjali. Madankollu, ma jistgħux jintlaħqu l-għanijiet tal-ADE mingħajr ma jkun hemm is-sostenn permezz ta’ fondi pubbliċi. Għal din ir-raġuni, l-ADE tistieden lill-Istati Membri jużaw “il-finanzjament pubbliku f’konformità mar-regoli tal-UE dwar il-kompetizzjoni u l-għajnuna mill-Istat” biex jilħqu l-kopertura, il-veloċità u l-adozzjoni tal-miri ta’ attwazzjoni definiti f'UE2020 (4). Huwa mistenni li d-domanda għal servizzi li jirrikjedu kapaċità għolja jiżdiedu fil-futur, hekk kif il-cloud computing, użu aktar intens tat-teknoloġiji peer to peer, in-netwerks soċjali u s-servizzi ta’ vidjow b'talba jiġu żviluppati aktar.

(3)

Is-settur tal-komunikazzjoni elettronika għadda minn proċess ta' liberalizzazzjoni bir-reqqa u issa huwa suġġett għal regolamentazzjoni settorjali. Il-qafas regolatorju tal-UE għall-komunikazzjoni elettronika jipprovdi wkoll regoli ta' armonizzazzjoni relatati mal-aċċess għall-broadband (5). Fir-rigward ta’ netwerks tradizzjonali tal-broadband, sa issa s-swieq bl-ingrossa huma suġġetti għal regolazzjoni ex ante f'ħafna mill-Istati Membri. L-approċċ regolatorju rnexxa biex irawwem swieq kompetittivi, biex iħeġġeġ l-investiment u biex iżid l-għażla tal-konsumaturi: pereżempju, l-ogħla kopertura u adozzjoni tal-broadband tinsab fl-Istati Membri fejn teżisti kompetizzjoni fl-infrastruttura, flimkien ma' regolamentazzjoni ex ante effettiva li tippromwovi l-kompetizzjoni fis-servizzi. Implimentazzjoni ulterjuri tan-netwerks tal-broadband u b’mod partikulari tan-netwerks ta’ Aċċess tal-Ġenerazzjoni li Jmiss (“NGA”) tkompli tirrekjedi l-intervent tal-awtoritajiet regolatorji nazzjonali (“NRAs”) minħabba r-rwol tagħhom fis-settur tal-kommunikazzjoni elettronika.

(4)

Huwa aktar u aktar importanti li l-fondi pubbliċi jintużaw b’mod għaqli f’dan is-settur u li l-Kummissjoni tiżgura li l-għajnuna mill-Istat tkun kumplimentari u ma tissostitwixxix l-investimenti tal-operaturi fis-suq. Kwalunkwe intervent mill-Istat għandu jillimita kemm jista’ jkun ir-riskju li jaqta’ barra l-investimenti privati, li jbiddel l-inċentivi tal-investiment kummerċjali u fl-aħħar mill-aħħar li jwassal għal distorsjoni tal-kompetizzjoni li tmur kontra l-interess komuni tal-Unjoni Ewropea.

(5)

Fil-Komunikazzjoni tagħha dwar il-Modernizzazzjoni tal-Għajnuna mill-Istat (SAM), il-Kummissjoni tinnota li l-politika tal-għajnuna mill-Istat għandha tiffoka fuq l-iffaċilitar ta’ għajnuna mfassla sew immirata lejn fallimenti fis-suq u għanijiet ta’ interess Ewropew komuni (6). Il-miżuri ta’ għajnuna mill-Istat jistgħu, taħt ċerti kundizzjonijiet, jikkoreġu fallimenti fis-suq, biex b'hekk jittejjeb il-funzjonament effiċjenti tas-swieq u titkattar il-kompetittività. Barra minn hekk, jekk is-swieq jipprovdu riżultati effiċjenti imma dawn jiġu kkunsidrati bħala mhux sodisfaċenti mil-lenti tal-politika ta’ koeżjoni, l-għajnuna mill-Istat tista' tintuża biex jinkiseb riżultat tas-suq li jkun aktar mixtieq u ġust. B'mod partikulari, intervent immirat sew mill-Istat fil-qasam tal-broadband jista' jikkontribwixxi għat-tnaqqis tal-“firda diġitali” (7) bejn żoni jew reġjuni fejn jiġu offruti servizzi tal-broadband kompetittivi u bi prezzijiet konvenjenti u nħawi fejn dan mhux il-każ.

(6)

Madankollu, kieku l-għajnuna mill-Istat għall-broadband kellha tintuża f'żoni fejn l-operaturi tas-suq normalment jagħżlu li jinvestu jew ikunu diġà investew, dan ikun jista' jimmina b’mod konsiderevoli sa mill-bidu nett l-inċentivi tal-investituri kummerċjali biex jinvestu fil-broadband. F'każijiet bħal dawn, l-għajnuna mill-Istat għall-broadband tista' tispiċċa biex issir kontroproduttiva għall-għan li wieħed ikun jixtieq jilħaq. L-għan tal-kontroll tal-għajnuna mill-Istat fil-qasam tal-broadband huwa li jiġi żgurat li l-miżuri ta’ għajnuna mill-Istat jirriżultaw f'livell ogħla, jew f’rata aktar mgħaġġla, ta' kopertura u penetrazzjoni tal-broadband milli kien iseħħ mingħajr l-għajnuna mill-Istat, filwaqt li jiġu appoġġati l-kwalità ogħla, is-servizzi bi prezz aktar konvenjenti u l-investimenti favur il-kompetizzjoni. L-effetti pożittivi tal-għajnuna għandhom jegħlbu d-distorsjonijiet tal-kompetizzjoni.

(7)

B’reazzjoni għat-talba tal-Kummissjoni biex jagħmlu hekk fl-ADE, ħafna mill-Istati Membri żviluppaw strateġiji nazzjonali għall-broadband biex jintlaħqu l-għanijiet tal-ADE fit-territorji rispettivi tagħhom. Il-biċċa l-kbira ta’ dawn l-istrateġiji jipprevedu l-użu ta’ fondi pubbliċi biex jestendu l-kopertura tal-broadband f’żoni fejn l-operaturi kummerċjali ma għandhom l-ebda inċentiv biex jinvestu fihom u biex jaċċelleraw l-implimentazzjoni ta’ netwerks ta' aċċess b’veloċità għolja ħafna u tal-ġenerazzjoni li jmiss.

(8)

Dawn il-Linji Gwida jiġbru fil-qosor il-prinċipji tal-politika tal-Kummissjoni fir-rigward tal-applikazzjoni tar-regoli tat-Trattat dwar l-għajnuna mill-Istat għal miżuri li jappoġġaw l-implimentazzjoni ta' netwerks tal-broadband inġenerali (it-Taqsima 2). Jispjegaw l-applikazzjoni ta' dawn il-prinċipji fil-valutazzjoni tal-miżuri tal-għajnuna li jappoġġaw l-introduzzjoni rapida tal-broadband bażiku u n-netwerks tal-ġenerazzjoni li jmiss (NGA) b’veloċità għolja ħafna (fit-Taqsima 3). Il-Kummissjoni se tapplika l-linji gwida meta tkun qed tivvaluta l-għajnuna mill-Istat għall-broadband. B'hekk tkabbar iċ-ċertezza legali u t-trasparenza tal-mod kif tieħu d-deċiżjonijiet.

(9)

Skont l-Artikolu 107 (1) tat-Trattat dwar il-Funzjonament tal-Unjoni Ewropea (“TFUE”), “kull għajnuna, ta' kwalunkwe forma, mogħtija minn Stat Membru jew permezz ta’ riżorsi tal-Istat, li twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew ċerti produtturi għandha, safejn tolqot il-kummerċ bejn l-Istati Membri, tkun inkompatibbli mas-suq intern”. Minn dan jirriżulta li sabiex miżura tikkwalifika bħala għajnuna mill-Istat, iridu jiġu ssodisfati l-kundizzjonijiet kumulattivi li ġejjin: (a) il-miżura trid tkun mogħtija mir-riżorsi tal-Istat, (b) trid tkun tagħti vantaġġ ekonomiku lill-impriżi, (c) il-vantaġġ irid ikun selettiv u (d) jwassal għal distorsjoni jew jhedded li jwassal għal distorsjoni tal-kompetizzjoni; (e) il-miżura trid taffettwa l-kummerċ bejn l-Istati Membri.

(10)

L-użu ta' riżorsi tal-Istat: It-trasferiment ta’ riżorsi tal-Istat jista' jieħu ħafna forom bħalma huma għotjiet diretti, rifużjonijiet tat-taxxa (8), self b’imgħax favorevoli jew tipi oħra ta' kundizzjonijiet ta’ finanzjament preferenzjali. Ikunu involuti riżorsi mill-Istat ukoll jekk l-Istat jipprovdi benefiċċji mhux finanzjarji, pereżempju jinvesti fil-kostruzzjoni ta' (parti) mill-infrastruttura tal-broadband. Ir-riżorsi mill-Istat jistgħu jintużaw (9) fil-livell nazzjonali, reġjonali jew lokali. L-iffinanzjar minn fondi Ewropej bħall-Fond Agrikolu Ewropew għall-Iżvilupp Rurali (FAEŻR) u l-Fond Ewropew għall-Iżvilupp Reġjonali (FEŻR) (10) bl-istess mod jikkostitwixxi riżorsi mill-Istat, meta dawn il-fondi jkunu allokati skont id-diskrezzjoni ta’ Stat Membru (11).

(11)

Impriża: Il-miżuri tal-Istat li jappoġġaw l-investimenti tal-broadband is-soltu jittieħdu favur attività ekonomika bħall-kostruzzjoni, l-operat u l-għoti tal-aċċess għall-infrastruttura tal-broadband jew jippermettu t-twettiq tal-konnettività għall-utenti finali. Anki l-Istat innifsu jista’ jwettaq attività ekonomika meta jopera u jisfrutta l-infrastruttura tal-broadband, jew partijiet minnha, pereżempju permezz ta’ kumpanija interna jew bħala parti mill-amministrazzjoni tal-Istat. Il-bini ta’ infrastruttura ta’ netwerk tal-broadband bil-ħsieb tal-esplojtazzjoni kummerċjali futura tagħha mill-Istat jew minn operaturi terzi wkoll jikkostitwixxi attività ekonomika (12). L-introduzzjoni ta’ netwerk tal-broadband għal skopijiet mhux kummerċjali tista’ ma tikkostitwixxix għajnuna mill-Istat (13), għaliex il-bini tan-netwerk ma jiffavorixxi l-ebda impriża (14). Madankollu, jekk netwerk bħal dan jiġi sussegwentement miftuħ għall-użu tal-investituri jew l-operaturi tal-broadband, x'aktarx tkun involuta għajnuna mill-Istat (15).

(12)

Vantaġġ: Is-soltu l-għajnuna tingħata direttament lill-investituri tan-netwerk, li fil-biċċa l-kbira tal-każi jintgħażlu permezz ta' proċess ta' sejħa kompetittiva għall-offerti. Meta l-kontribut tal-Istat ma jkunx ipprovdut b’kundizzjonijiet normali ta’ suq u b’konsegwenza ta’ dan jikkwalifika bħala għajnuna mill-Istat skont il-prinċipju tal-investitur f’ekonomija tas-suq (ara l-paragrafu (16) hawn taħt), l-użu ta’ proċess ta’ għażla kompetittiva għall-offerti jiżgura li kwalunkwe għajnuna tkun limitata għall-ammont minimu meħtieġ għall-proġett partikulari. Madankollu, dan ma jeliminax l-għajnuna, għax l-awtorità pubblika tibqa’ tipprovdi sussidju lill-offerent li jintgħażel (pereżempju fis-sens ta’ “diskrepanza tal-likwidità” jew kontribut mhux finanzjarju) u l-iskop ta’ proċedura bħal din ikun preċiżament l-għażla tal-benefiċjarju tal-għajnuna. L-appoġġ finanzjarju rċevut jippermetti lill-offerent li jintgħażel li jmexxi din l-attività kummerċjali b’kundizzjonijiet li kieku ma kinux ikunu disponibbli fis-suq. Minbarra l-benefiċjarju dirett tal-għajnuna, l-operaturi terzi li jiksbu aċċess bl-ingrossa għall-infrastruttura sussidjata jistgħu jkunu benefiċjarji indiretti (16).

(13)

Selettività: Il-miżuri tal-Istat li jappoġġaw l-implimentazzjoni ta' netwerks tal-broadband huma selettivi fin-natura tagħhom minħabba li dawn jimmiraw għal investituri tal-broadband u operaturi terzi li huma attivi biss f’ċerti sezzjonijiet tas-suq globali tas-servizzi tal-komunikazzjonijiet elettroniċi. B’kuntrast, fir-rigward tal-utenti kummerċjali finali tan-netwerk sussidjat (17), il-miżura tista’ ma tkunx selettiva sakemm l-aċċess għal infrastruttura sussidjata jkun miftuħ għas-setturi kollha tal-ekonomija. Is-selettività teżisti jekk l-implimentazzjoni tal-broadband tkun indirizzata speċifikament għal utenti kummerċjali ddedikati, pereżempju jekk l-appoġġ mill-Istat ikun immirat lejn l-implimentazzjoni ta' netwerk tal-broadband favur kumpaniji predeterminati li ma jkunux magħżula skont il-kriterji ġenerali applikabbli għall-qasam kollu li għalih l-awtorità awtorizzanti tkun responsabbli (18).

(14)

Distorsjoni tal-kompetizzjoni: Skont il-ġurisprudenza tal-Qorti tal-Ġustizzja tal-Unjoni Ewropea (“il-Qorti”), appoġġ finanzjarju jew appoġġ mhux finanzjarju jwassal għal distorsjoni fil-kompetizzjoni minħabba li jsaħħaħ il-pożizzjoni ta’ impriża meta mqabbla ma’ impriżi oħra (19). Minħabba l-għajnuna mill-Istat mogħtija lil kompetitur, jista’ jkun li operaturi eżistenti jnaqqsu l-kapaċità jew li operaturi potenzjali jiddeċiedu li ma jidħlux f’suq ġdid jew f’żona ġeografika ġdida. Huwa probabbli li d-distorsjonijiet tal-kompetizzjoni jiżdiedu jekk il-benefiċjarju tal-għajnuna jkollu pożizzjoni qawwija fis-suq. Meta l-benefiċjarju tal-għajnuna jkun diġà dominanti f’suq, il-miżura tal-għajnuna tista' ssaħħaħ din id-dominanza billi ddgħajjef iżjed ir-restrizzjoni kompetittiva li l-kompetituri jkunu jistgħu jeżerċitaw.

(15)

Effett fuq il-kummerċ: Fl-aħħar nett, safejn l-intervent mill-Istat jista' jaffettwa lill-fornituri tas-servizzi minn Stati Membri oħrajn, (anki billi jiskoraġġixxi t-twaqqif tagħhom fl-Istati Membri inkwistjoni) ikollu wkoll effett fuq il-kummerċ ladarba s-swieq għas-servizzi tal-komunikazzjonijiet elettroniċi (is-swieq bl-ingrossa u bl-imnut tal-broadband) huma miftuħin għall-kompetizzjoni bejn l-operaturi u l-fornituri tas-servizz (20).

(16)

L-Artikolu 345 tat-TFUE jipprovdi li “[i]t-Trattati għandhom ikunu bla ebda preġudizzju għas-sistema ta' proprjetà fl-Istati Membri”. Skont il-ġurisprudenza tal-Qorti, mill-prinċipju tat-trattament ugwali jirriżulta li l-kapital imqiegħed mill-Istat, direttament jew indirettament, għad-dispożizzjoni ta' impriża f'ċirkustanzi li jikkorrispondu għal kundizzjonijiet normali tas-suq ma jistax jitqies bħala għajnuna mill-Istat. Meta l-parteċipazzjoni fil-kapital jew l-injezzjoni ta' kapital minn investitur pubbliku ma jagħtux biżżejjed prospetti ta' profitabbiltà, lanqas fuq medda twila ta' żmien, tali intervent irid jitqies bħala għajnuna skont it-tifsira tal-Artikolu 107 tat-TFUE, u l-kompatibbiltà tiegħu mas-suq komuni trid tiġi evalwata biss fuq il-bażi tal-kriterji stabbiliti f'dik id-dispożizzjoni (21).

(17)

Fid-deċiżjoni tagħha ta' Amsterdam, il-Kummissjoni eżaminat l-applikazzjoni tal-prinċipju tal-investitur privat f’ekonomija tas-suq fil-qasam tal-broadband (22). Kif enfasizzat f'din id-deċiżjoni, il-konformità ta' investiment pubbliku mat-termini tas-suq trid tintwera bl-akbar reqqa u b'mod komprensiv, permezz ta' parteċipazzjoni sinifikanti ta' investituri privati jew inkella permezz tal-eżistenza ta' pjan għaqli tan-negozju li juri redditu adegwat fuq l-investiment. Meta fil-proġett jieħdu sehem investituri privati, hija kundizzjoni sine qua non li huma jridu jassumu r-riskju kummerċjali marbut mal-investiment taħt l-istess termini u kundizzjonijiet tal-investitur pubbliku. Dan japplika wkoll għal forom oħra ta' appoġġ mill-Istat bħal self b’imgħax favorevoli jew garanziji (23).

(18)

F'ċerti każi, l-Istati Membri jistgħu jikkunsidraw li l-forniment ta' netwerk tal-broadband għandu jitqies bħala servizz ta' interess ekonomiku ġenerali (“SIEĠ”) skont it-tifsira tal-Artikolu 106(2) tat-TFUE (24) u l-ġurisprudenza ta' Altmark (25) u jipprovdu l-finanzjament pubbliku fuq din il-bażi. F’dawn il-każijiet, il-miżuri tal-Istati Membri jridu jiġu vvalutati skont il-Komunikazzjoni mill-Kummissjoni dwar l-applikazzjoni tar-regoli dwar l-għajnuna mill-Istat tal-Unjoni Ewropea għall-kumpens mogħti għall-fornitura ta' servizzi ta' interess ekonomiku ġenerali (26), id-Deċiżjoni tal-Kummissjoni tal-20 ta’ Diċembru 2011 dwar l-applikazzjoni tal-Artikolu 106(2) tat-Trattat dwar il-Funzjonament tal-Unjoni Ewropea għall-għajnuna mill-Istat taħt il-forma ta’ kumpens għas-servizzi pubbliċi mogħti lil ċerti impriżi inkarigati bil-ġestjoni ta’ servizzi ta’ interess ekonomiku ġenerali (27), il-Komunikazzjoni mill-Kummissjoni dwar qafas tal-Unjoni Ewropea għall-għajnuna mill-Istat fil-forma ta’ kumpens ta' servizz pubbliku (2011) (28) u r-Regolament tal-Kummissjoni tal-25 ta’ April 2012 dwar l-applikazzjoni tal-Artikoli 107 u 108 tat-Trattat dwar il-Funzjonament tal-Unjoni Ewropea għal għajnuna de minimis mogħtija lil impriżi li jipprovdu servizzi ta' interess ekonomiku ġenerali (29). Dawn id-dokumenti tal-Kummissjoni (imseħja kollettivament bħala “l-Pakkett tas-SIEĠ”) japplikaw ukoll għall-għajnuna mill-Istat għall-implimentazzjoni tal-broadband. Dan li ġej se juri biss l-applikazzjoni ta' xi wħud mill-prinċipji ċċarati f'dawn id-dokumenti għall-finanzjament tal-broadband, fid-dawl ta’ ċerti speċifiċitajiet settorjali.

(19)

Rigward id-definizzjoni tas-SIEĠ, il-Kummissjoni diġà ċċarat, f'termini ġenerali, li l-Istati Membri ma jistgħux jgħaqqdu obbligi speċifiċi tas-servizz pubbliku ma' servizzi li diġà huma pprovduti jew li jistgħu jiġu pprovduti b'mod sodisfaċenti u taħt kundizzjonijiet, bħal ma huma l-prezz, karatteristiċi oġġettivi ta' kwalità, il-kontinwità u l-aċċess għas-servizz, li huma konsistenti mal-interess pubbliku, kif definit mill-Istat, minn impriżi li joperaw taħt kundizzjonijiet normali tas-suq (30).

(20)

Jekk dan il-prinċipju jiġi applikat għas-settur tal-broadband, il-Kummissjoni tqis li f’żoni fejn investituri privati diġà investew f’infrastruttura ta' netwerk tal-broadband (jew qed ikomplu jifirxu n-netwerk) u diġà qed jipprovdu servizzi kompetittivi tal-broadband b'kopertura adegwata tal-broadband, il-ħolqien ta' infrastruttura parallela tal-broadband li tkun kompetittiva u ffinanzjata b'fondi pubbliċi ma jistax jitqies bħala SIEĠ skont it-tifsira tal-Artikolu 106(2) tat-TFUE (31). Madankollu, fejn jista’ jintwera li investituri privati ma jkunux f’pożizzjoni li jipprovdu kopertura adegwata tal-broadband liċ-ċittadini jew lill-utenti kollha fil-futur qrib (32) u għalhekk iħallu parti sinifikanti tal-popolazzjoni mhux konnessa, jista’ jingħata kumpens għal servizz pubbliku lil impriża fdata bl-operat ta’ SIEĠ, sakemm jiġu ssodisfati l-kundizzjonijiet stabbiliti fil-komunikazzjoni tas-SIEĠ imsemmija hawn fuq. F'dan ir-rigward, in-netwerks li wieħed irid iqis biex jivvalutaw il-ħtieġa għal SIEĠ għandhom ikunu dejjem ta' tip paragunabbli, jiġifieri netwerks tal-broadband bażiku jew inkella netwerks tat-tip NGA.

(21)

Barra minn hekk, l-implimentazzjoni u t-tħaddim ta' infrastruttura tal-broadband tista' tikkwalifika bħala SĠEI biss jekk tali infrastruttura tipprovdi lill-utenti kollha f'żona partikulari b’konnettività universali, kemm għall-konsumaturi residenzjali kif ukoll għal dawk tan-negozju. L-appoġġ għall-konnessjoni ta' negozji biss ma tkunx biżżejjed (33).

(22)

In-natura obbligatorja tal-missjoni ta' SIEĠ timplika wkoll li l-fornitur tan-netwerk li jkun irid jiġi implimentat mhux se jkun jista' jirrifjuta l-aċċess bl-ingrossa għall-infrastruttura fuq bażi diskrezzjonarja u/jew diskriminatorja (għax, ngħidu aħna, jista' ma jkunx jagħmel sens kummerċjali li jipprovdi s-servizzi ta' aċċess f’żona partikulari).

(23)

Minħabba l-livell ta' kompetizzjoni li nkiseb minn mindu s-settur tal-komunikazzjoni elettronika ġie liberalizzat fl-Unjoni, u b'mod partikulari minħabba l-kompetizzjoni li teżisti llum fis-suq tal-broadband bl-imnut, għandu jkunu disponibbli għall-operaturi kollha interessati netwerk iffinanzjat pubblikament imwaqqaf fil-kuntest ta' SIEĠ. Hekk, l-għarfien ta' missjoni ta' SIEĠ għall-implimentazzjoni tal-broadband għandu jkun imsejjes fuq il-fornitura ta' infrastruttura passiva (34), newtrali (35) u miftuħa. Tali netwerk għandu jipprovdi lil dawk li jfittxu l-aċċess bil-forom kollha possibbli ta' aċċess għan-netwerk u jippermetti kompetizzjoni effettiva fil-livell tal-bejgħ bl-imnut, b'mod li jiżgura l-fornitura ta' servizzi kompetittivi u bi prezz konvenjenti lill-utenti finali (36).

(24)

Għalhekk, il-missjoni ta' SIEĠ għandha tkopri biss l-implimentazzjoni ta' netwerk tal-broadband li jipprovdi konnettività universali u l-fornitura tas-servizzi relatati ta' aċċess bl-ingrossa, mingħajr ma tinkludi s-servizzi bl-imnut tal-komunikazzjoni (37). Fejn il-fornitur tal-missjoni ta' SIEĠ ikun ukoll operatur integrat vertikalment tal-broadband, għandhom jitpoġġew fis-seħħ salvagwardji adegwati sabiex jiġu evitati kwalunkwe kunflitt ta' interess, diskriminazzjoni bla bżonn jew vantaġġ indirett moħbi ieħor (38).

(25)

Minħabba li s-suq għall-komunikazzjonijiet elettroniċi huwa liberalizzat għal kollox, missjoni ta’ SIEĠ għall-implimentazzjoni tal-broadband ma tistax tkun ibbażata fuq l-għoti ta' jedd esklużiv jew speċjali lill-fornitur tas-SIEĠ skont it-tifsira tal-Artikolu 106(1) tat-TFUE.

(26)

Għall-kalkolu tal-kumpens tas-SIEĠ il-prinċipji tal-pakkett tas-SIEĠ japplikaw b'mod sħiħ. Madankollu, fid-dawl tal-ispeċifiċitajiet tas-settur tal-broadband, huwa utli li żżid kjarifika għall-SIEĠ intenzjonat li jkopri ż-żoni ġirien mhux konnessi jew id-distretti (hekk imsejħa “white spots”) f'żoni usa' fejn xi operaturi diġà jkunu implimentaw l-infrastruttura tan-netwerk tagħhom stess jew jistgħu jippjanaw li jagħmlu hekk fil-futur qarib. F’każijiet fejn iż-żona li għaliha jkun fdat is-SIEĠ ma tkunx limitata biss għall-“white spots”, minħabba d-daqs jew il-post tagħhom, il-fornitur tas-SIEĠ jista’ jkollu bżonn jimplimenta netwerk ta' infrastruttura anke fiż-żoni li jrendu qligħ li jkunu diġà koperti minn operaturi kummerċjali. F’sitwazzjoni bħal din, kwalunkwe kumpens mogħti għandu jkopri biss l-ispejjeż għall-introduzzjoni ta’ infrastruttura fil-white spots fejn mhemmx qligħ, filwaqt li jitqies id-dħul rilevanti u qligħ raġonevoli (39).

(27)

F'ħafna ċirkustanzi, jista' jkun xieraq li l-ammont ikkumpensat jiġi ffissat fuq bażi ex ante, sabiex ikopri d-diskrepanza mistennija tal-likwidità fuq perjodu partikulari, minflok ma jistabbilixxi l-kumpens sempliċiment fuq il-bażi tal-ispejjeż u d-dħul hekk kif iseħħu. Fil-mudell preċedenti, tipikament hemm aktar inċentivi għall-kumpanija biex trażżan l-ispejjeż u tiżviluppa n-negozju maż-żmien (40). Fejn missjoni ta’ SIEĠ għall-implimentazzjoni ta’ netwerk tal-broadband ma tkunx ibbażata fuq l-implimentazzjoni ta' infrastruttura bi sjieda pubblika, għandhom jitpoġġew fis-seħħ mekkaniżmi adegwati ta' reviżjoni u ta' rkupru sabiex jiġi evitat li l-fornitur tas-SIEĠ jikseb vantaġġ bla bżonn billi jżomm is-sjieda tan-netwerk li jkun ġie ffinanzjat b'fondi pubbliċi meta tiskadi l-konċessjoni tas-SIEĠ.

(28)

Kif spjegat ukoll fil-Komunikazzjoni tal-Kummissjoni dwar il-Broadband (41), l-Istati Membri jistgħu jagħżlu diversi tipi ta' miżuri sabiex iħaffu l-implimentazzjoni tal-broadband, u b’mod partikulari netwerks NGA, minbarra li jipprovdu finanzjament dirett lill-kumpaniji. Dawn il-miżuri mhux bilfors iridu jkunu jinvolvu għajnuna mill-Istat skont it-tifsira tal-Artikolu 107(1) tat-TFUE.

(29)

Ġaladarba ġeneralment parti kbira mill-ispiża tal-implimentazzjoni tan-netwerks NGA qiegħda fix-xogħol ta' inġinerija ċivili (42), l-Istati Membri jistgħu jiddeċiedu skont il-qafas regolatorju tal-UE għall-komunikazzjonijiet elettroniċi, ngħidu aħna, li jiffaċilitaw il-proċess tal-akkwist ta' jeddijiet ta' mogħdija, jitolbu li l-operaturi tan-netwerks jikkoordinaw ix-xogħlijiet ta' inġinerija ċivili tagħhom u/jew li jaqsmu bejniethom parti mill-infrastruttura tagħhom. Bl-istess mod, Stat Membru jista’ jitlob li għal kwalunkwe xogħlijiet strutturali ġodda (inklużi netwerks ġodda tal-ilma, tal-enerġija, tat-trasport jew tad-drenaġġ) u/jew binjiet, trid titqiegħed konnessjoni xierqa għal NGA. Il-partijiet terzi jistgħu wkoll ipoġġu l-infrastruttura ta' netwerk passiv tagħhom bi spejjeż tagħhom meta jitwettqu xogħlijiet ġenerali ta' inġinerija ċivili fi kwalunkwe każ. Din l-opportunità għandha tiġi offruta b'mod trasparenti u mhux diskriminatorju lill-operaturi interessati kollha u fil-prinċipju għandha tkun miftuħa għall-utenti potenzjali kollha u mhux biss għall-operaturi elettroniċi biss (jiġifieri servizzi essenzjali tal-elettriku, il-gass, l-ilma, eċċ.) (43). Inventarju ċentralizzat tal-infrastruttura eżistenti (sussidjat jew mod ieħor), possibilment li jinkludi wkoll xogħlijiet ippjanati, jista’ jgħin fl-introduzzjoni tal-broadband kummerċjali (44). L-infrastruttura eżistenti ma tikkonċernax biss l-infrastruttura tat-telekomunikazzjoni, bħall-infrastruttura bil-wajers, bla wajers jew satellitari, iżda wkoll l-infrastrutturi alternattivi (drenaġġ, toqob tal-ispezzjonar, eċċ.) ta’ industriji oħra (bħalma huma s-servizzi pubbliċi) (45).

(30)

Meta intervent mill-Istat għall-appoġġ tal-implimentazzjoni tal-broadband ikun jissodisfa l-kundizzjonijiet definiti fit-Taqsima (9), il-kompatibbiltà tiegħu ġeneralment tiġi evalwata mill-Kummissjoni skont l-Artikolu 107 (3) (c) tat-TFUE (46). S’issa, awtoritajiet reġjonali u lokali adottaw mudelli differenti ta' interventi. Lista mhux eżawrjenti ta’ dawn il-mudelli tinsab fl-Anness. Apparti minn dawk deskritti fl-anness, l-awtoritajiet pubbliċi jistgħu wkoll jiżviluppaw mudelli oħra ta’ appoġġ għall-implimentazzjoni tal-broadband (47). Għat-tipi kollha ta' forom ta’ interventi, iridu jiġu applikati l-kriterji ta’ kompatibbiltà kollha stabbiliti f’dawn il-Linji Gwida (48).

(31)

Proġetti tal-broadband li jirċievu għajnuna mill-Istat jistgħu jiġu implimentati f’żoni assistiti fis-sens tal-Artikolu 107(3) (a) u (c) tat-TFUE, u r-regoli speċifiċi dwar l-Għajnuna Reġjonali (49). F’dan il-każ, l-għajnuna għall-broadband tista’ tikkwalifika bħala għajnuna għal investiment inizjali skont ir-regoli dwar l-għajnuna reġjonali. Meta miżura taqa' fil-kamp ta’ applikazzjoni ta' regoli bħal dawn, u meta tkun maħsuba biex tagħti għajnuna ad hoc individwali lil ditta waħda, jew għajnuna limitata għal qasam wieħed ta' attività, l-Istat Membru huwa responsabbli li juri li l-kundizzjonijiet tar-regoli dwar l-għajnuna reġjonali jkunu ġew issodisfati. Dan jinkludi b'mod partikulari li l-proġett inkwistjoni jikkontribwixxi għal strateġija koerenti għall-iżvilupp reġjonali u li, meta wieħed iqis in-natura u d-daqs tal-proġett, ma jkunx se jwassal għal distorsjonijiet mhux aċċettabbli tal-kompetizzjoni.

(32)

Fil-valutazzjoni skont l-Artikolu 107 (3) (c) tat-TFUE, il-Kummissjoni tiżgura li l-impatt pożittiv tal-miżura ta' għajnuna biex jintlaħaq għan ta' interess komuni jegħleb l-effetti negattivi potenzjali tagħha, bħad-distorsjonijiet tal-kummerċ u tal-kompetizzjoni. Dan l-eżerċizzju jitwettaq f'żewġ partijiet.

(33)

L-ewwel nett, kull miżura ta' għajnuna trid tikkonforma mal-kundizzjonijiet meħtieġa ta' hawn taħt. In-nuqqas ta' konformità ma' waħda mill-kundizzjonijiet li ġejjin se twassal li għajnuna tiġi ddikjarata inkompatibbli mas-suq intern.

(34)

It-tieni nett, jekk jiġu ssodisfati l-kundizzjonijiet meħtieġa kollha, il-Kummissjoni tibbilanċja l-effetti pożittivi tal-miżuri ta' għajnuna fil-ksib ta' għan ta' interess komuni kontra l-effetti negattivi potenzjali.

(35)

Il-passi individwali tal-valutazzjoni tal-Kummissjoni fil-qasam tal-broadband huma stabbiliti f'aktar dettall fil-paragrafi li ġejjin.

(36)

Fir-rigward tal-għan ta’ interess komuni, il-Kummissjoni se tevalwa sa liema punt l-intervent ippjanat jikkontribwixxi biex jintlaħqu l-għanijiet ta’ interess komuni spjegati hawn fuq kif speċifikati ulterjorment fl-ADE.

(37)

Ikun hemm “falliment tas-suq” jekk is-swieq, li jitħallew ifendu għal rashom, ma jintervjenux u jonqsu milli jagħtu eżitu effiċjenti għas-soċjetà. Dan jista' jseħħ pereżempju meta ċerti investimenti ma jkunux qed iseħħu anke jekk il-benefiċċju ekonomiku għas-soċjetà jegħleb l-ispejjeż (50). F’każijiet bħal dawn, l-għoti ta' għajnuna mill-Istat jista' jipproduċi effetti pożittivi u l-effiċjenza ġenerali tista’ titjieb billi jiġu aġġustati l-inċentivi ekonomiċi għall-impriżi. Fis-settur tal-broadband, waħda mill-forom ta' falliment tas-suq hija relatata mal-esternalitajiet pożittivi. Tali esternalitajiet jinqalgħu meta l-operaturi fis-suq ma jinternalizzawx il-benefiċċju sħiħ tal-azzjonijiet tagħhom. Pereżempju, id-disponibbiltà tan-netwerks tal-broadband twitti t-triq għall-forniment ta’ aktar servizzi u għall-innovazzjoni, li probabbli t-tnejn li huma jibbenefikaw aktar nies minnhom milli l-abbonati immedjati tan-netwerk. Għalhekk, ir-riżultat tas-suq ma jiġġenerax biżżejjed investiment privat fin-netwerks tal-broadband.

(38)

Minħabba l-ekonomija tad-densità, l-implimentazzjoni tan-netwerks tal-broadband ġeneralment tkun aktar profittabbli meta t-talba potenzjali tkun akbar u kkonċentrata, jiġifieri f’żoni fejn ikun hemm densità għolja ta' popolazzjoni. Minħabba l-ispejjeż fissi tal-investiment għolja, l-ispejjeż għal kull unità jiżdiedu b'mod sinifikanti hekk kif id-densità tal-popolazzjoni tonqos (51). Għaldaqstant, meta jiġu implimentati fuq termini kummerċjali, in-netwerks tal-broadband għandhom tendenza li jkopru bi qligħ parti biss tal-popolazzjoni. Madankollu, kif rikonoxxut fl-ADE, aċċess mifrux u bi prezzijiet konvenjenti għall-broadband jiġġenera esternalitajiet pożittivi minħabba l-abbiltà tiegħu li jħaffef it-tkabbir u l-innovazzjoni fis-setturi kollha tal-ekonomija. Fejn is-suq ma jipprovdix biżżejjed kopertura tal-broadband jew il-kundizzjonijiet tal-aċċess ma jkunux adegwati, l-għajnuna mill-Istat tista' tgħin biex jiġi rrimedjat dan il-falliment tas-suq.

(39)

It-tieni għan possibbli ta’ interess komuni huwa relatat mal-ekwità. Il-gvernijiet jistgħu jagħżlu li jintervjenu biex jikkoreġu l-inugwaljanzi soċjali jew reġjonali ġġenerati minn riżultat tas-suq. F’ċerti każi, wieħed jista' juża l-għajnuna mill-Istat għall-broadband bħala għodda biex jintlaħqu għanijiet relatati mal-ekwità, jiġifieri bħala mod kif jitjieb l-aċċess għal mezz essenzjali ta' komunikazzjoni u parteċipazzjoni fis-soċjetà, kif ukoll il-libertà tal-espressjoni għall-membri kollha tas-soċjetà, u b'hekk titjieb il-koeżjoni soċjali u territorjali.

(40)

L-intervent pubbliku b’appoġġ għan-netwerks tal-broadband jista' jseħħ fil-livell Statali, reġjonali jew muniċipali (52). Għalhekk, il-koordinazzjoni tad-diversi interventi hija essenzjali biex ikunu evitati x-xogħol doppju u l-inkoerenza. Biex tiġi żgurata l-konsistenza u l-koordinazzjoni tal-interventi lokali, huwa neċessarju li jiġi żgurat livell għoli ta’ trasparenza tal-inizjattivi lokali.

(41)

Kull fejn ikun possibbli, u b’mod li jiġu rispettati l-kompetenzi u l-ispeċifiċitajiet, l-Istati Membri huma mħeġġa jfasslu skemi nazzjonali li jiddefinixxu l-prinċipji ewlenin li huma l-bażi tal-inizjattivi pubbliċi u li jindikaw l-aktar karatteristiċi rilevanti tan-netwerks ippjanati (53). L-iskemi qafas nazzjonali għall-iżvilupp tal-broadband jiżguraw il-koerenza fl-użu tal-fondi pubbliċi, jnaqqsu l-piż amministrattiv fuq awtoritajiet awtorizzanti ż-żgħar u jħaffu l-implimentazzjoni tal-miżuri individwali ta' għajnuna. Aktar minn hekk, l-Istati Membri huma mħeġġa jagħtu gwida ċara fil-livell ċentrali għall-implimentazzjoni ta' proġetti broadband iffinanzjati permezz tal-għajnuna mill-Istat.

(42)

Ir-rwol tal-awtoritajiet regolatorji nazzjonali (ARN) fit-tfassil ta’ miżura ta’ għajnuna mill-Istat favur il-kompetizzjoni b'appoġġ għall-broadband huwa partikolarment importanti. L-ARN kisbu għarfien tekniku u espert minħabba r-rwol kruċjali assenjat lilhom b’regolament settorjali (54). Huma jinsabu fl-aħjar pożizzjoni biex jappoġġaw lill-awtoritajiet pubbliċi fir-rigward tal-iskemi ta' għajnuna mill-Istat u għandhom jiġu kkonsultati meta jkunu qed jiġu identifikati żoni fil-mira. L-ARN għandhom jiġu kkonsultati wkoll fir-rigward tad-determinazzjoni tal-prezzijiet u l-kundizzjonijiet tal-aċċess bl-ingrossa u fis-soluzzjoni ta’ tilwim bejn dawk li jfittxu l-aċċess u l-operatur tal-infrastruttura sussidjata. L-Istati Membri huma mħeġġa jipprovdu riżorsi meħtieġa lill-ARN biex jagħtu appoġġ bħal dan. Fejn meħtieġ, l-Istati Membri għandhom jipprovdu bażi legali xierqa għal tali involviment tal-ARN fil-proġetti broadband li jirċievu għajnuna mill-Istat. Biex iżommu mal-aħjar prassi, l-ARN għandhom jippubblikaw linji gwida għall-awtoritajiet regolatorji li jinkludu rakkomandazzjonijiet dwar l-analiżi tas-suq, prodotti ta' aċċess bl-ingrossa u prinċipji tal-ipprezzar li jqisu l-Qafas Regolatorju għall-Komunikazzjonijiet Elettroniċi u Rakkomandazzjonijiet relattivi ppubblikati mill-Kummissjoni (55).

(43)

Barra l-involviment tal-ARN, l-Awtoritajiet Nazzjonali tal-Kompetizzjoni jistgħu wkoll jipprovdu pariri siewja, b’mod partikulari fir-rigward ta’ skemi qafas kbar, li jgħinu biex jiġu stabbiliti kundizzjonijiet ekwi ta' kompetizzjoni għall-operaturi li jitfgħu l-offerti tagħhom u biex jiġi evitat li jiġi allokat lil operatur wieħed sehem għoli b’mod sproporzjonat ta' fondi mill-Istat, u b'hekk tissaħħaħ il-pożizzjoni (possibbilment diġà dominanti) tiegħu fis-suq (56). Apparti r-rwol tal-ARN, xi Stati Membri waqqfu ċentri tal-kompetenza nazzjonali biex jgħinu lil awtoritajiet żgħar u lokali biex ifasslu miżuri xierqa ta' għajnuna mill-Istat u jiżguraw il-konsistenza fl-applikazzjoni tar-regoli tal-għajnuna mill-Istat kif speċifikat f'dawn il-Linji Gwida (57).

(44)

Sabiex il-miżura titfassal b’mod xieraq, it-test tal-ibbilanċjar jitlob ukoll li l-għajnuna mill-Istat tkun strument ta' politika xieraq biex tiġi indirizzata l-problema. F'dan ir-rigward, filwaqt li f'bosta każi r-regolament ex ante ffaċilita l-implimentazzjoni tal-broadband f’żoni urbani u f’żoni b'densità ogħla tal-popolazzjoni, dan jaf ma jkunx strument suffiċjenti biex ikun jista' jseħħ il-forniment tas-servizz tal-broadband, speċjalment f’żoni li mhumiex moqdijin tajjeb fejn il-qligħ inerenti tal-investiment ikun baxx (58). Bl-istess mod, għalkemm jistgħu jikkontribwixxu b’mod pożittiv għall-penetrazzjoni tal-broadband (59), miżuri min-naħa tad-domanda favur il-broadband (bħal vawċers għall-utenti finali) mhux dejjem jistgħu jsolvu n-nuqqas tal-fornitura tal-broadband (60). Għaldaqstant, f’ċerti sitwazzjonijiet, jista' ma jkun hemm l-ebda triq ħlief dik li jingħata finanzjament pubbliku sabiex jingħeleb in-nuqqas ta' possibbiltà ta' konnettività mal-broadband. L-awtoritajiet awtorizzanti jqisu wkoll (ri)allokazzjonijiet tal-ispettru li jwasslu għall-introduzzjoni possibbli tan-netwerk fiż-żoni fil-mira li jistgħu jiksbu l-għanijiet tal-awtoritajiet awtorizzanti mingħajr id-dispożizzjoni ta' għotjiet diretti.

(45)

Rigward l-effett ta’ inċentiv tal-miżura, wieħed irid jeżamina jekk l-investiment ikkonċernat f'netwerk tal-broadband kienx isir fl-istess perjodu mingħajr l-ebda għajnuna mill-Istat. Meta operatur ikun soġġett għal ċerti obbligi biex ikopri ż-żona fil-mira (61), jista’ ma jkunx eliġibbli għall-għajnuna mill-Istat, peress li probabbli din tal-aħħar ma jkollhiex effett ta’ inċentiv.

(46)

Fil-valutazzjoni tal-karattru proporzjonali tal-miżuri nnotifikati, il-Kummissjoni enfasizzat għadd ta' kundizzjonijiet meħtieġa biex tiġi mminimizzata l-għajnuna mill-Istat involuta u d-distorsjonijiet potenzjali tal-kompetizzjoni, kif spjegat f'aktar dettall fit-Taqsimiet li ġejjin.

(47)

Madankollu, il-bidla fl-imġiba tal-benefiċjarju kaġun tal-għajnuna jista’ jkollha wkoll effetti negattivi fuq il-kompetizzjoni u l-kummerċ. Is-sinifikat tad-distorsjoni tal-kompetizzjoni jista’ jiġi evalwat f’termini tal-effetti fuq il-kompetituri. Jekk il-kompetituri jaraw nuqqas fil-profitabbiltà tal-investiment preċedenti tagħhom minħabba l-għajnuna, jistgħu jiddeċiedu li jnaqqsu l-investiment futur tagħhom stess jew anke jirtiraw mis-suq għalkollox (62). Barra minn hekk, fejn il-benefiċjarju tal-għajnuna li jrid jintgħażel wara proċess ta’ għażla kompetittiva x’aktarx se jkun impriża li diġà hija dominanti f’suq jew tista’ ssir dominanti minħabba investiment iffinanzjat mill-Istat, il-miżura ta' għajnuna tista’ ddgħajjef il-limitu kompetittiv li l-kompetitturi jeżerċitaw. Barra minn hekk, jekk miżura ta’ għajnuna mill-Istat jew il-kundizzjonijiet mehmużin magħha (inkluż il-metodu ta’ ffinanzjar meta jifforma parti integrali minnha) jinvolvu vjolazzjoni mhux separabbli tal-liġi tal-UE, l-għajnuna ma tistax tiġi ddikjarata kompatibbli mas-suq intern (63).

(48)

L-għajnuna tingħata b'mod trasparenti; b'mod partikulari, għandu jiġi żgurat li l-Istati Membri, l-operaturi ekonomiċi, il-pubbliku interessat u l-Kummissjoni jkollhom aċċess faċli għall-atti rilevanti kollha u għall-informazzjoni pertinenti dwar l-għajnuna li tingħata taħthom. Id-dettalji tal-ħtiġijiet għat-trasparenza huma speċifikati fil-paragrafu 3.4.

(49)

Skema ta’ għajnuna mill-Istat għall-broadband li tkun imfassla bir-reqqa għandha tiżgura li l-bilanċ globali tal-effetti tal-miżura jkun pożittiv.

(50)

F'dan ir-rigward, l-effett tal-miżura tal-għajnuna mill-Istat jista’ jiġi deskritt bħala bidla tal-attività meta mqabbel ma’ x’kien jiġri mingħajr l-għajnuna. L-effetti pożittivi tal-għajnuna huma marbuta direttament mal-bidla fl-imġiba tal-benefiċjarju tal-għajnuna. Din il-bidla għandha tippermetti li jintlaħaq l-għan mixtieq ta' interess komuni. Fis-settur tal-broadband, l-għajnuna twassal għall-introduzzjoni ta’ infrastruttura ġdida li ma kinitx tkun teżisti f’ċirkustanzi differenti, u b’hekk twassal għal kapaċità u veloċità addizzjonali fis-suq kif ukoll għal prezzijiet orħos u għażla aħjar għall-konsumaturi, għal kwalità ogħla u għall-innovazzjoni. Dan iwassal ukoll għal aktar aċċess għall-konsumaturi għal riżorsi onlajn u, flimkien ma' protezzjoni tal-konsumatur miżjuda f'dan il-qasam, huwa probabbli li jqanqal żieda fid-domanda. Dan jikkontribwixxi għat-tlestija ta' Suq Uniku Diġitali u joħloq benefiċċji għall-ekonomija tal-UE kollha kemm hi.

(51)

Fil-valutazzjoni tagħha, il-Kummissjoni se tikkunsidra sa liema punt in-netwerk sussidjat se jkun kapaċi jiżgura “bidla fil-pass” f'termini ta' disponibbiltà tal-broadband. “Bidla fil-pass” tista’ tintwera jekk b’riżultat tal-intervent pubbliku (1) l-offerent magħżul jagħmel investimenti ġodda sinifikanti fin-netwerk tal-broadband (64) u (2) l-infrastruttura sussidjata ġġib magħha kapaċitajiet ġodda sinifikanti għas-suq f’termini ta’ disponibbiltà u kapaċità (65), veloċitajiet u kompetizzjoni tas-servizz tal-broadband (66). Il-bidla fil-pass titqabbel ma' dik ta' introduzzjonijiet tan-netwerk eżistenti kif ukoll dawk ippjanati b'mod konkret.

(52)

Barra minn hekk, sabiex jiżgura li l-effetti negattivi fuq il-kompetizzjoni jitnaqqsu, iridu jiġu ssodisfati għadd ta' kundizzjonijiet fit-tfassil tal-miżura ta' għajnuna, kif speċifikat hawn taħt fit-taqsima (77).

(53)

Sabiex tkompli tiżgura li d-distorsjoni tal-kompetizzjoni hija limitata, il-Kummisjoni tista' titlob li ċerti skemi jkunu soġġetti għal limitu ta' żmien (normalment ta' 4 snin jew anqas) u għal evalwazzjoni sabiex tivverifika (1) jekk is-suppożizzjonijiet u l-kundizzjonijiet li wasslu għad-deċiżjoni tal-kompatibbiltà seħħewx; (2) l-effettività tal-miżura ta' għajnuna fid-dawl tal-għanijiet definiti minn qabel; (3) l-impatt tagħha fuq is-swieq u l-kompetizzjoni u li ma jseħħu l-ebda effetti ta' distorsjoni waqt l-iskema tal-għajnuna li jmorru kontra l-interessi tal-Unjoni (67). Minħabba l-għanijiet tagħha u sabiex ma titfax piż sproporzjonat fuq l-Istati Membri u fuq proġetti ta' għajnuna li jkunu iżgħar, din tapplika biss għal skemi ta’ għajnuna nazzjonali u għal skemi ta' għajnuna b'baġits għall-għajnuna kbar, li jkun fihom karatteristiċi ġodda jew meta jkunu previsti bidliet fis-suq, teknoloġiċi jew regolatorji sinifikanti. L-evalwazzjoni titwettaq minn espert indipendenti mill-awtorità li tawtorizza l-għajnuna mill-Istat fuq il-bażi ta' metodoloġija komuni (68) u ssir pubblika. L-evalwazzjoni tiġi sottomessa lill-Kummissjoni fi żmien debitu biex tippermetti l-valutazzjoni tal-estensjoni possibbli tal-miżura ta' għajnuna u fi kwalunkwe każ meta tiskadi l-iskema. L-ambitu u l-modalitajiet preċiżi tal-evalwazzjoni jiġu ddefiniti fid-deċiżjoni ta' approvazzjoni tal-miżura ta' għajnuna. Kwalunkwe miżura ta' għajnuna sussegwenti b'għan simili tqis ir-riżultati ta' dik l-evalwazzjoni.

(54)

Jekk it-test tal-ibbilanċjar juri li l-effetti negattivi jisbqu lil dawk pożittivi, il-Kummissjoni tista' tipprojbixxi l-għajnuna, jew titlob għal azzjoni ta' rimedju, fil-mod kif inhi mfassla l-għajnuna jew fil-ħsara li tagħmel lill-kompetizzjoni.

(55)

Għall-finijiet tal-evalwazzjoni tal-għajnuna mill-Istat, dawn il-Linji Gwida jiddistingwu bejn netwerks bażiċi u NGA.

(56)

Diversi pjattaformi tat-teknoloġija differenti jistgħu jitqiesu bħala netwerks bażiċi tal-broadband fosthom linji diġitali assimmetriċi tal-abbonat (sa netwerks tal-ADSL2+), kejbil non-enhanced (pereżempju DOCSIS 2.0), netwerks tal-mowbajl tat-tielet ġenerazzjoni (UMTS) u sistemi satellitari.

(57)

Fl-istadju attwali tal-iżvilupp tas-suq u dak teknoloġiku (69), in-netwerks tat-tip NGA huma netwerks ta’ aċċess li jserrħu kompletament jew parzjalment fuq elementi ottiċi (70) u li jistgħu jwasslu servizzi ta’ aċċess tal-broadband b’karatteristiċi mtejba meta mqabbla ma’ netwerks bażiċi tal-broadband eżistenti (71).

(58)

In-netwerks tat-tip NGA huma mifhuma li għallinqas għandhom il-karatteristiċi li ġejjin: (i) iwasslu servizzi b'veloċità għolja ħafna għal kull abbonat permezz ta' backhaul ottiku (jew teknoloġija ekwivalenti) qrib biżżejjed għall-post tal-utenti sabiex jiggarantixxu t-twassil attwali tal-veloċità għolja ħafna; (ii) jappoġġaw firxa ta' servizzi diġitali avvanzati fosthom servizzi konverġenti għalkollox IP, u (iii) jkollhom veloċitajiet tat-tlugħ ogħla (meta mqabbla man-netwerks bażiċi tal-broadband). Fl-istadju attwali tal-iżvilupp tas-suq u teknoloġiku, in-netwerks tat-tip NGA huma: (i) netwerks għal aċċess ibbażati fuq il-fibra ottika (FTTx) (72), (ii) netwerks bil-kejbil avvanzati u ameljorati (73) u (iii) ċerti netwerks għal aċċess bla wajers avvanzati kapaċi jwasslu veloċitajiet għolja affidabbli għal kull abbonat (74).

(59)

Huwa importanti li wieħed iżomm f'moħħu li, fuq medda twila ta' żmien, in-netwerks tat-tip NGA huma mistennija jieħdu post in-netwerks eżistenti tal-broadband bażiku u mhux biss jaġġornawhom. Minħabba li n-netwerks tat-tip NGA jirikjedu struttura differenti ta' netwerk li toffri servizzi tal-broadband ta' kwalità li tkun aħjar b'mod sinifikanti minn dawk tal-lum, kif ukoll il-forniment ta' servizzi multipli li ma jistgħux jiġu sostnuti min-netwerks ta' bħalissa tal-broadband, jista’ jkun li fil-ġejjieni se jiżviluppaw differenzi ċari bejn żoni li se jkunu koperti min-netwerks tat-tip NGA u oħrajn li mhumiex se jkunu koperti (75).

(60)

L-Istati Membri jistgħu jiddeċidu b’mod liberu x’forma se jieħu l-intervent tagħhom, sakemm dan jikkonforma mar-regoli tal-għajnuna mill-Istat. F'ċerti każi, l-Istati Membri jistgħu jiddeċiedu li jiffinanzjaw l-hekk imsejħa netwerks tal-ġenerazzjoni li jmiss (NGN), jiġifieri netwerks backhaul li ma jilħqux lill-utent aħħari. In-netwerks backhaul huma input neċessarju għall-operaturi tat-telekomunikazzjoni bl-imnut sabiex jipprovdu servizzi ta’ aċċess għall-utenti aħħarija. Dawn it-tipi ta’ netwerks huma kapaċi jsostnu kemm netwerks bażiċi kif ukoll dawk tat-tip NGA (76): hija l-għażla (ta’ investiment) tal-operaturi tat-telekomunikazzjoni x'tip ta’ infrastruttura ‘tal-aħħar mil’ jixtiequ jużaw biex jaqbdu man-netwerk backhaul (77). L-awtoritajiet pubbliċi jistgħu jiddeċiedu li jwettqu xogħlijiet ta' inġinerija ċivili biss (bħat-tħaffir fuq art pubblika, il-bini ta' tubi) sabiex jippermettu u jħaffu l-implimentazzjoni mill-operaturi kkonċernati tal-elementi proprji tan-netwerks. Barra minn hekk, meta jkun xieraq, l-awtoritajiet pubbliċi jistgħu wkoll ikunu jixtiequ li jqisu soluzzjonijiet satellitari.

(61)

Sabiex ikun evalwat il-falliment tas-suq u l-għanijiet ta’ ekwità, tista’ ssir distinzjoni bejn it-tipi ta’ żoni li jistgħu jkunu fil-mira. Din id-distinzjoni hija spjegata fit-taqsimiet li ġejjin. Fl-identifikazzjoni ta’ żoni fil-mira, kull meta l-intervent pubbliku huwa limitat għall-parti tal-backhaul tan-netwerk, il-valutazzjoni tal-għajnuna mill-Istat se tqis is-sitwazzjoni kemm fuq is-swieq tal-backhaul kif ukoll fuq is-swieq ta’ aċċess (78).

(62)

L-istandards differenti li jiġġustifikaw l-interventi pubbliċi f'dawn iż-żoni ġeografiċi se jiġu deskritti hawn taħt.

(63)

Għall-iskop li jiġu identifikati ż-żoni ġeografiċi bħala bojod, griżi jew suwed kif deskritti hawn taħt, jeħtieġ li l-awtorità li tawtorizza l-għajnuna tiddetermina jekk l-infrastrutturi tal-broadband jeżistux fiż-żona fil-mira. Sabiex jiżguraw aktar li l-intervent pubbliku ma jtellifx l-investimenti privati, l-awtoritajiet li jawtorizzaw l-għajnuna għandhom jivverifikaw ukoll jekk l-investituri privati għandhomx pjanijiet konkreti li jintroduċu l-infrastruttura tagħhom fil-futur qarib. It-terminu "futur qarib" għandu jinftiehem bħala li jirreferi għal perjodu ta' tliet snin (79). Jekk l-awtorità awtorizzanti tieħu żmien itwal għall-introduzzjoni tal-infrastruttura sussidjata, għandu jintuża l-istess tul ta' żmien għall-valutazzjoni tal-eżistenza ta’ pjanijiet ta’ investiment kummerċjali.

(64)

Sabiex tivverifika li ma hemm l-ebda investituri privati li jippjanaw li jintroduċu l-infrastruttura tagħhom stess fil-futur qarib, l-awtorità li tawtorizza l-għajnuna għandha tippubblika l-miżura ta' għajnuna ppjanata u tistieden lill-partijiet interessati biex jikkummentaw.

(65)

Jeżisti r-riskju li s-sempliċi “espressjoni ta’ interess” minn investitur privat tista’ ddewwem l-għoti tas-servizzi tal-broadband għaż-żona fil-mira jekk sussegwentement tali investiment ma jseħħx, filwaqt li fl-istess ħin l-intervent pubbliku jkun ġie mwaqqaf. L-awtorità li tawtorizza l-għajnuna, għalhekk, tista' titlob għal ċerti impenji mingħand l-investitur privat qabel ma tiddifferixxi l-intervent pubbliku. Dawn l-impenji għandhom jiżguraw li, fil-perjodu ta’ tliet snin jew fil-perjodu itwal previst għall-invstiment appoġġat, iseħħ progress sinifikanti f'termini ta' kopertura. L-awtorità tista’ titlob ukoll lill-operatur rispettiv li jidħol f’kuntratt korrispondenti li jiddeskrivi l-impenji ta’ implimentazzjoni. Dan il-kuntratt jista’ jipprevedi għadd ta’ “stadji importanti” li jkollhom jintlaħqu matul il-perjodu ta' tliet snin (80) u jrid isir rapport dwar il-progress li jkun sar. Jekk stadju importanti ma jintlaħaqx, l-awtorità li tagħti l-għajnuna tista’ mbagħad tipproċedi bil-pjanijiet tagħha għal intervent pubbliku. Din ir-regola tapplika kemm għan-netwerks bażiċi kif ukoll għal dawk tat-tip NGA.

(66)

“Żoni bojod” huma dawk iż-żoni li fihom ma hemm l-ebda infrastruttura tal-broadband u huwa improbabbli li se tiġi żviluppata fil-futur qarib. Il-miri tal-Kummissjoni għall-ADE jimmiraw lejn il-kopertura ta’ kullimkien fl-UE bis-servizzi bażiċi tal-broadband sal-2013, u ta’ mill-inqas 30 Mbps sal-2020. Għalhekk, li jkun żgurat l-investiment opportun f’żoni li għad mhumiex koperti biżżejjed hija prijorità. Il-Kummissjoni għalhekk tirrikonoxxi li, meta jipprovdu appoġġ finanzjarju għall-provvista ta’ servizzi tal-broadband f’żoni fejn il-broadband attwalment mhux disponibbli, l-Istati Membri jkunu qed jaħdmu biex jilħqu għanijiet ġenwini ta’ koeżjoni u ta’ żvilupp ekonomiku u, għalhekk, l-intervent tagħhom aktarx ikun konformi mal-interess komuni, sakemm il-kundizzjonijiet stabbiliti fit-Taqsima (77) hawn taħt jiġu ssodisfati (81).

(67)

“Żoni griżi” huma dawk iż-żoni li fihom huwa preżenti operatur wieħed ta’ netwerk u mhux probabbli li jiġi żviluppat netwerk ieħor (82) fil-futur qarib. Is-sempliċi eżistenza ta’ operatur wieħed ta' netwerk (83) ma timplikax neċessarjament li ma jeżisti l-ebda falliment tas-suq jew problema ta’ koeżjoni. Jekk dak l-operatur ikollu s-saħħa fis-suq (monopolju) jista’ jipprovdi liċ-ċittadini b’kumbinazzjoni subottimali ta’ kwalità u prezzijiet tas-servizz. Ċerti kategoriji ta’ utenti jistgħu ma jkunux moqdija adegwatament jew, fin-nuqqas ta’ tariffi regolati tal-aċċess bl-ingrossa, il-prezzijiet bl-imnut jistgħu jkunu ogħla mill-prezzijiet għall-istess servizzi offruti f'żoni jew reġjuni tal-pajjiż li jkunu aktar kompetittivi iżda paragunabbli fil-kumplament. Jekk, barra minn hekk, ikun hemm biss prospetti limitati li jidħlu fis-suq operaturi alternattivi, il-finanzjament ta’ infrastruttura alternattiva jista’ jkun miżura xierqa (84).

(68)

Mill-banda l-oħra, f'żoni fejn diġà hemm operatur wieħed ta' netwerk tal-broadband, is-sussidji għall-bini ta' netwerk alternattiv jistgħu jikkawżaw distorsjoni fid-dinamika tas-suq. Għalhekk, appoġġ mill-Istat għall-implimentazzjoni ta’ netwerks tal-broadband f’żoni “griżi” huwa ġġustifikat biss meta jista’ jiġi muri b’mod ċar li jkun hemm falliment persistenti tas-suq. Ikun neċessarju li jsiru analiżi aktar dettaljata u valutazzjoni bir-reqqa dwar il-kompatibilità.

(69)

Iż-żoni griżi jistgħu jkunu eliġibbli għall-għajnuna mill-Istat, sakemm ikunu ssodisfati l-kundizzjonijiet ta’ kompatibilità tat-Taqsima (77), jekk jiġi ppruvat li (i) l-ebda servizz bi prezzijiet konvenjenti jew adegwat ma jkun offrut biex jissodisfa l-ħtiġijiet taċ-ċittadini jew tal-utenti kummerċjali (85), u li (ii) ma jkunx hemm disponibbli miżuri li joħolqu inqas distorsjoni tas-suq (inkluża r-regolamentazzjoni ex ante) biex jintlaħqu l-istess għanijiet.

(70)

Sabiex (i) u (ii) jiġu stabbiliti, il-Kummissjoni se tevalwa b'mod partikulari jekk:

(71)

Iż-żoni griżi li jissodisfaw il-kriterji tal-eleġibbiltà fil-paragrafi ta’ hawn fuq biss se jgħaddu mit-test ta’ kompatibbiltà deskritt fit-Taqsima (77).

(72)

Meta f'żona ġeografika partikulari jkun hemm jew se jkun hemm fil-futur qarib mill-inqas żewġ netwerks bażiċi tal-broadband u s-servizzi tal-broadband ikunu fornuti f'kundizzjonijiet kompetittivi (kompetizzjoni msejsa fuq l-infrastruttura (87)), wieħed jista' jassumi li ma jkun hemm l-ebda falliment tas-suq. Għal din ir-raġuni, ma tantx hemm lok għal intervent mill-Istat biex jinġiebu aktar benefiċċji. Għall-kuntrarju, sostenn mill-Istat għall-finanzjament tal-bini ta' netwerk addizzjonali tal-broadband b’kapaċitajiet komparabbli jista’, fil-prinċipju, iwassal għal distorsjoni inaċċettabbli tal-kompetizzjoni, u għall-qlugħ 'il barra tal-investituri privati. Għalhekk, fin-nuqqas ta’ falliment tas-suq li jkun intwera b'mod ċar, il-Kummissjoni se tħares b'mod negattiv lejn miżuri li jiffinanzjaw l-introduzzjoni ta' infrastruttura addizzjonali tal-broadband f'“żona sewda” (88).

(73)

Id-distinzjoni li saret hawn fuq fit-Taqsima 3.2 bejn żoni “bojod”, “griżi” u “suwed” hija rilevanti wkoll għall-valutazzjoni ta' jekk l-għajnuna mill-Istat għan-netwerk tat-tip NGA hijiex kompatibbli mas-suq intern taħt l-Artikolu 107(3)(c).

(74)

Fil-preżent, bis-saħħa ta’ titjib fit-tagħmir attiv, ċerti netwerks bażiċi avvanzati tal-broadband jistgħu jifilħu wkoll xi servizzi tal-broadband li fil-futur x'aktarx jiġu offruti fuq netwerks tat-tip NGA (bħas-servizzi triple play) u għalhekk jikkontribwixxu biex jintlaħqu l-miri tal-ADE. Madankollu, prodotti jew servizzi ġodda li mhumiex sostitwibbli mill-perspettivi kemm tat-talba kif ukoll tal-provvista jistgħu jitfaċċaw u jkunu jeħtieġu kapaċità, affidabilità u veloċitajiet ta' tlugħ u tniżżil ikbar mill-ogħla limiti fiżiċi tal-infrastruttura bażika tal-broadband.

(75)

Għal din ir-raġuni, għall-finijiet ta’ valutazzjoni tal-għajnuna mill-Istat għal netwerks tat-tip NGA, żona fejn fil-preżent ma jeżistux netwerks tat-tip NGA u fejn x'aktarx li ma jinbnewx minn investituri privati fi żmien tliet snin, skont il-paragrafi (62) sa (64), għandha titqies bħala żona “bajda fir-rigward tal-NGA”. Tali żona hija eliġibbli għall-għajnuna mill-Istat għan-NGA sakemm il-kundizzjonijiet tal-kompatibilità indikati fit-Taqsimiet (77) u k) ikunu ssodisfati.

(76)

Żona għandha titqies bħala “griża fir-rigward tal-NGA” fejn ikun hemm biss netwerk wieħed tat-tip NGA (89) jew jekk dan ikun se jiġi implimentat fit-tliet snin li jkun imiss u ma jkunx hemm pjanijiet minn xi operatur biex ilesti netwerk tat-tip NGA fit-tliet snin li jkun imiss. Fil-valutazzjoni ta' jekk investituri oħra tan-netwerks jistgħux iqiegħdu netwerks addizzjonali tat-tip NGA fi nħawi partikulari, wieħed għandu jqis kwalunkwe miżuri regolatorji jew leġiżlattivi eżistenti li jistgħu jkunu baxxew il-barrikati għall-implimentazzjoni ta' tali netwerks (aċċess għat-tubi, il-qsim tal-infrastruttura eċċ.). Il-Kummissjoni se jkollha twettaq analiżi aktar iddettaljata sabiex tivverifika jekk ikunx meħtieġ intervent mill-Istat minħabba li intervent mill-Istat f’tali żoni jġib miegħu r-riskju għoli li jaqla’ ’l barra lill-investituri eżistenti u jgħawweġ il-kompetizzjoni. F’dan ir-rigward, il-Kummissjoni se twettaq il-valutazzjoni tagħha fuq il-bażi tal-kundizzjonijiet ta’ kompatibbiltà stabbiliti f’dawn il-Linji Gwida.

(77)

Jekk ikunu jeżistu għallinqas żewġ netwerks tat-tip NGA ta' operaturi differenti f'żona partikulari, jew ikunu se jiġu implimentati fit-tliet snin li jkun imiss, tali żona għandha fil-prinċipju titqies bħala “sewda fir-rigward tal-NGA”. Il-Kummissjoni se tikkunsidra li appoġġ statali għal netwerk addizzjonali tat-tip NGA ffinanzjat mill-Istat li jkun ekwivalenti f’żoni bħal dawn x'aktarx iwassal għal distorsjoni serja tal-kompetizzjoni u huwa inkompatibbli mas-suq intern taħt l-Artikolu 107(3)(c) tat-TFUE.

(78)

Kull miżura tal-Istat li tappoġġa l-implimentazzjoni tal-broadband għandha tissodisfa l-prinċipji kollha ta’ kompatibbiltà deskritti hawn fuq fit-Taqsima 2.5, fosthom l-għan tal-interess komuni, l-eżistenza tan-nuqqas tas-suq, l-adegwatezza u l-effett ta' inċentiv tal-miżura. Fir-rigward tal-illimitar tad-distorsjonijiet tal-kompetizzjoni, apparti t-turija ta' kif tinkiseb “bidla fil-pass” fil-każijiet kollha (fiż-żoni bojod, griżi u suwed) (90), il-kundizzjonijiet meħtieġa li ġejjin iridu jkunu sodisfatti biex juru l-proporzjonalità tal-miżura. In-nuqqas ta’ xi waħda minn dawn il-kundizzjonijiet probabbilment ikun jitlob li ssir valutazzjoni profonda (91) li tista’ twassal għall-konklużjoni li l-għajnuna hija inkompatibbli mas-suq komuni.

(79)

Bħal fil-każ tal-politika segwita fir-rigward tal-implimentazzjoni bażika tal-broadband, l-għajnuna mill-Istat favur l-implimentazzjoni tan-netwerks tat-tip NGA tista' tikkostitwixxi strument xieraq u ġustifikat, sakemm wieħed jissodisfa għadd ta' kundizzjonijiet fundamentali. Filwaqt li l-operaturi kummerċjali jieħdu d-deċiżjonijiet tal-investiment tagħhom fin-netwerks tat-tip NGA fuq il-bażi tal-qligħ mistenni, l-għażla tal-awtorità pubblika trid tqis ukoll l-interess pubbliku fil-finanzjament ta' pjattaforma miftuħa u newtrali li fuqha operaturi multipli jkunu jistgħu jikkompetu għall-provvista ta' servizzi lill-utenti finali.

(80)

Kwalunkwe miżura li tappoġġa l-implimentazzjoni tal-NGA trid tissodisfa l-kundizzjonijiet tal-kompatibilità indikati fit-Taqsima 2.5 u 3.4. Barra minn hekk, għandhom jiġu ssodisfati l-kundizzjonijiet li ġejjin filwaqt li jitqiesu s-sitwazzjonijiet speċifiċi fejn ikun se jseħħ l-investiment pubbliku f’netwerks tat-tip NGA.

(81)

Il-proġetti tal-għajnuna mill-Istat li għandhom l-għan li jiffinanzjaw in-netwerks backhaul (127) jew li huma limitati għal xogħlijiet ċivili li huma miftuħa għal aċċess għall-operaturi u t-teknoloġiji kollha jeżebixxu karatteristiċi partikularment favur il-kompetizzjoni. Din il-karatteristika titqies fil-valutazzjoni ta' proġetti bħal dawn.

(82)

Fid-dawl tal-għanijiet tal-Aġenda Diġitali, b'mod partikulari l-ksib ta' 50 % penetrazzjoni għall-konnessjonijiet tal-internet 'il fuq minn 100 Mbps, u meta wieħed iqis li b'mod speċjali fiż-żoni urbani jista' jkun hemm ħtiġijiet għola ta' prestazzjoni meta mqabbla ma' dak li l-investituri kummerċjali huma lesti li joffru fil-futur qarib, b'deroga mill-paragrafu 0, jista' jkun permess intervent pubbliku b'mod eċċezzjonali għan-netwerks tat-tip NGA li jkunu kapaċi joffru veloċitajiet ultraveloċi li jaqbżu sew il-100 Mbps.

(83)

F’żoni “suwed NGA” intervent bħal dan jista' jkun permess biss jekk il-kundizzjoni ta' "bidla fil-pass" meħtieġa mill-paragrafu (50) hija ppruvata fuq il-bażi tal-kriterji kumulattivi li ġejjin:

(84)

Fis-sitwazzjoni deskritta fil-paragrafu preċedenti, kwalunkwe netwerk sussidjat irid jirrispetta l-kundizzjonijiet ta' kompatibilità tal-paragrafi 3.4 u (79). Barra minn hekk, l-awtorità awtorizzanti trid turi wkoll li:

(85)

Huwa biss jekk jiġu ssodisfati dawn il-kundizzjonijiet addizzjonali li l-finanzjament pubbliku ta’ dawn in-netwerks ikun jista’ jiġi kkunsidrat bħala kompatibbli skont it-test tal-ibbilanċjar. Fi kliem ieħor, tali finanzjament irid iwassal għal avvanz teknoloġiku sinifikanti, sostenibbli, favur il-kompetizzjoni u mhux temporanju mingħajr ma joħloq diżinċentivi sproporzjonati għall-investimenti privati.

(86)

Dawn il-Linji Gwida se jiġu applikati mill-ewwel jum wara l-pubblikazzjoni tagħhom f’Il-Ġurnal Uffiċjali tal-Unjoni Ewropea.

(87)

Il-Kummissjoni se tapplika dawn il-Linji Gwida għall-miżuri nnotifikati kollha ta' għajnuna li dwarhom tkun mitluba tieħu deċiżjoni wara li dawn il-Linji Gwida jiġu ppubblikati fil-Ġurnal Uffiċjali, anki fejn il-proġetti jkunu ġew innotifikati qabel dik id-data.

(88)

Skont l-avviż tal-Kummissjoni dwar id-determinazzjoni tar-regoli applikabbli għall-valutazzjoni tal-għajnuna mill-Istat mhux skont il-liġi (134), il-Kummissjoni se tapplika fuq l-għajnuna mhux skont il-liġi r-regoli fis-seħħ għaż-żmien ta’ meta tkun ngħatat l-għajnuna. Għaldaqsant, ser tapplika dawn il-Linji Gwida fil-każ tal-għajnuna mhux skont il-liġi li tiġi mogħtija wara l-pubblikazzjoni tagħhom.

(89)

Il-Kummissjoni b'dan tipproponi lill-Istati Membri, fuq il-bażi tal-Artikolu 108(1) tat-TFUE, biex jieħdu miżuri xierqa u jemendaw, fejn meħtieġ, l-iskemi ta’ għajnuna rispettivi eżistenti tagħhom sabiex iġibuhom konformi mad-dispożizzjonijiet ta' dawn il-Linji Gwida fi żmien tnax-il xahar wara l-pubblikazzjoni tagħhom f’Il-Ġurnal Uffiċjali tal-Unjoni Ewropea.

(90)

L-Istati Membri huma mistiedna jagħtu l-approvazzjoni espliċita u bla kundizzjoni tagħhom għal dawn il-miżuri xierqa proposti fi żmien xahrejn mid-data tal-pubblikazzjoni ta' dawn il-Linji Gwida f’Il-Ġurnal Uffiċjali tal-Unjoni Ewropea. Fin-nuqqas ta' tweġiba, il-Kummissjoni se tassumi li l-Istat Membru inkwistjoni ma jaqbilx mal-miżuri proposti.

(91)

Il-Kummissjoni tista’ tirrevedi l-Linji Gwida attwali fuq il-bażi ta' żviluppi importanti futuri fis-suq, fit-teknoloġija u fir-regolamentazzjoni.