18.7.2018

MT

Il-Ġurnal Uffiċjali tal-Unjoni Ewropea

L 182/1

---

REGOLAMENT DELEGAT TAL-KUMMISSJONI (UE) 2018/985

tat-12 ta' Frar 2018

li jissupplimenta r-Regolament (UE) Nru 167/2013 tal-Parlament Ewropew u tal-Kunsill fir-rigward tar-rekwiżiti tal-prestazzjoni ambjentali u tal-unità tal-propulsjoni tal-vetturi għall-agrikoltura u għall-forestrija u l-magni tagħhom u li jħassar ir-Regolament Delegat tal-Kummissjoni (UE) 2015/96

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 167/2013 tal-Parlament Ewropew u tal-Kunsill tal-5 ta' Frar 2013 dwar l-approvazzjoni u s-sorveljanza tas-suq ta' vetturi għall-agrikoltura u għall-forestrija (1), u b'mod partikulari l-Artikoli 19(6) u 20(8), 28(6) u 53(12) tiegħu,

Billi:

(1)

Wara li kkunsidrat l-istrateġija Ewropea dwar vetturi nodfa u effiċjenti fl-użu tal-enerġija (2), ir-rekwiżiti tekniċi dettaljati għall-approvazzjoni tat-tip ta' vetturi għall-agrikoltura u għall-forestrija fir-rigward tal-prestazzjoni ambjentali u tal-prestazzjoni tal-unità tal-propulsjoni tagħhom jenħtieġ li jimmiraw biex itejbu l-prestazzjoni ambjentali ta' dawn il-vetturi u fl-istess ħin isaħħu l-kompetittività tal-industrija tal-vetturi tal-Unjoni.

(2)

Jenħtieġ tnaqqis konsiderevoli fl-emissjonijiet tal-idrokarburi mill-vetturi għall-agrikoltura u għall-forestrija sabiex tittejjeb il-kwalità tal-arja u jkun hemm konformità mal-valuri ta' limitu għat-tniġġis. Dan l-objettiv jenħtieġ li jinkiseb mhux biss bit-tnaqqis tal-emissjonijiet tal-idrokarburi mill-egżost jew dawk evaporattivi minn dawn il-vetturi, imma wkoll billi jitnaqqsu l-livelli tal-partikoli volatili.

(3)

Minħabba l-applikazzjoni tad-dispożizzjonijiet tar-Regolament (UE) 2016/1628 tal-Parlament Ewropew u tal-Kunsill (3) – dwar il-kategoriji tal-magni, il-limiti tal-emissjonijiet tal-egżost, iċ-ċikli tat-test, il-perjodi ta' durabbiltà tal-emissjonijiet, ir-rekwiżiti tal-emissjonijiet tal-egżost, il-monitoraġġ tal-emissjonijiet ta' magni fis-servizz u t-twettiq ta' kejl u testijiet, kif ukoll id-dispożizzjonijiet tranżizzjonali u d-dispożizzjonijiet li jippermettu l-approvazzjoni tat-tip tal-UE bikrija u l-kummerċjalizzazzjoni ta' magni tal-Istadju V – għall-prestazzjoni ambjentali ta' vetturi għall-agrikoltura u għall-forestrija, id-dispożizzjonijiet ta' dan ir-Regolament li jkopru l-aspetti li jifdal ta'approvazzjoni bħal din jenħtieġ li jiġu mmudellati mill-qrib fuq dawk li jinsabu fir-Regolament (UE) 2016/1628.

(4)

Għall-finijiet tal-istadju tal-emissjonijiet tas-sustanzi li jniġġsu mill-magni għall-magni tal-vetturi għall-agrikoltura u għall-forestrija, magħruf bħala l-“Istadju V”, li se jieħu post dak stabbilit fir-Regolament Delegat tal-Kummissjoni (UE) 2015/96 (4) jenħtieġ li jiġu ffissati limiti ambizzjużi għall-emissjonijiet tas-sustanzi li jniġġsu f'għamla ta' gass u ta' materja partikolata filwaqt li jsir allinjament mal-istandards internazzjonali sabiex jitnaqqsu l-emissjonijiet ta' materja partikolata u ta' prekursuri tal-ożonu, bħalma huma l-ossidi tan-nitroġenu u l-idrokarburi.

(5)

Jenħtieġ metodu standardizzat għall-kejl tal-konsum tal-fjuwil u tal-emissjonijiet tad-dijossidu tal-karbonju mill-magni tal-vetturi għall-agrikoltura u għall-forestrija, biex jiġi żgurat li ma jinħolqux ostakli tekniċi għall-kummerċ bejn l-Istati Membri. Għall-istess raġuni, jixraq ukoll li jiġi żgurat li l-klijenti u l-utenti jingħataw informazzjoni oġġettiva u preċiża dwar l-istess suġġetti.

(6)

Sabiex jiġi żgurat li vetturi, komponenti u unitajiet tekniċi separati ġodda mqiegħda fis-suq jipprovdu livell għoli ta' protezzjoni ambjentali, it-tagħmir u l-parts li jistgħu jiġu mmuntati fuq il-vetturi għall-agrikoltura u għall-forestrija u li jistgħu jfixklu b'mod sinifikanti l-funzjonament tas-sistemi li huma essenzjali f'termini tal-protezzjoni ambjentali jenħtieġ li jkunu soġġetti għal kontroll minn qabel minn awtorità tal-approvazzjoni qabel ma jitqiegħdu fis-suq. Għal dan l-għan, jenħtieġ li jiġu stabbiliti d-dispożizzjonijiet tekniċi għar-rekwiżiti li dawk il-parts jew dak it-tagħmir iridu jikkonformaw magħhom.

(7)

Il-progress tekniku u l-livell għoli ta' protezzjoni ambjentali jirrikjedu rekwiżiti tekniċi għall-introduzzjoni tal-Istadju V fir-rigward tal-vetturi għall-agrikoltura u għall-forestrija, li jissostitwixxi l-istadji preċedenti tal-emissjonijiet tas-sustanzi li jniġġsu mill-magni stabbiliti fir-Regolament Delegat tal-Kummissjoni (UE) 2015/96. Ir-rekwiżiti tekniċi meħtieġa, b'mod partikolari dwar il-kategoriji tal-magni, il-valuri ta' limitu u d-dati tal-implimentazzjoni f'dan ir-Regolament, jenħtieġ ikunu allinjati ma' dawk fir-Regolament (UE) 2016/1628.

(8)

Permezz tad-Deċiżjoni tal-Kunsill 97/836/KE (5), l-Unjoni ssieħbet fil-Ftehim tal-Kummissjoni Ekonomika għall-Ewropa tan-Nazzjonijiet Uniti (NU/KEE) dwar l-adozzjoni ta' preskrizzjonijiet tekniċi uniformi għal vetturi bir-roti, tagħmir u parts li jistgħu jintramaw u/jew jintużaw fuq vetturi bir-roti u l-kundizzjonijiet għar-rikonoxximent reċiproku tal-approvazzjonijiet mogħtija abbażi ta' dawn il-preskrizzjonijiet (“il-Ftehim Rivedut tal-1958”). Fil-Komunikazzjoni tagħha “CARS 2020: Pjan ta' Azzjoni għall-industrija tal-karozzi kompetittiva u sostenibbli fl-Ewropa” (6), il-Kummissjoni enfasizzat li l-aċċettazzjoni tar-regolamenti internazzjonali skont il-Ftehim tan-NU/KEE tal-1958 huwa l-aħjar mod biex jitneħħew l-ostakli mhux tariffarji għall-kummerċ. Għalhekk, jenħtieġ li jintużaw ir-referenzi għar-regolamenti korrispondenti tan-NU/KEE, meta jkun xieraq, għall-finijiet li jiġu stabbiliti r-rekwiżiti għall-approvazzjoni tat-tip tal-UE. Din il-possibbiltà hija prevista fir-Regolament (UE) Nru 167/2013.

(9)

Fir-rigward tar-rekwiżiti tal-prestazzjoni ambjentali u tal-unità tal-propulsjoni tal-vetturi għall-agrikoltura u għall-forestrija, jenħtieġ li jintużaw ir-regolamenti tan-NU/KEE fuq bażi indaqs bħal-leġiżlazzjoni tal-Unjoni sabiex ma jkunx hemm duplikazzjoni, mhux biss tar-rekwiżiti tekniċi, iżda wkoll tal-proċeduri taċ-ċertifikazzjoni u l-proċeduri amministrattivi. Jentħtieġ li l-approvazzjoni tat-tip tkun direttament ibbażata fuq standards maqbula internazzjonalment billi dak l-approċċ jista' jtejjeb l-aċċess għas-suq fil-pajjiżi terzi, b'mod partikolari f'dawk li huma partijiet kontraenti għall-Ftehim Rivedut tal-1958, u b'hekk tissaħħaħ il-kompetittività tal-industrija tal-Unjoni.

(10)

Jenħtieġ li jkun possibbli għall-magni li, qabel id-dħul fis-seħħ ta' dan ir-Regolament, ma kinux soġġetti għal approvazzjoni tat-tip relatata ma' emissjonijiet ta' inkwinanti fil-livell tal-Unjoni u għal vetturi mgħammra b'tali magni li jitqiegħdu fis-suq sad-dati obbligatorji tal-applikazzjoni tar-Regolament (UE) 2016/1628 għat-tqegħid fis-suq tal-kategorija ta' magni korrispondenti, bil-kundizzjoni li dawn jikkonformaw mar-regoli nazzjonali applikabbli.

(11)

Jenħtieġ li l-leġiżlazzjoni tal-Unjoni ma tistipulax rekwiżiti tekniċi li ma jistgħux raġonevolment jiġu sodisfatti fil-ħin. L-industrija jenħtieġ li tingħata żmien biżżejjed fir-rigward tal-applikazzjoni ta' tal-limiti tal-emissjonijiet ta' sustanzi li jniġġsu tal-Istadju V lill-magni għall-agrikoltura u għall-forestrija. Għalhekk, huwa meħtieġ li jiġu stabbiliti miżuri tranżizzjonali li jippermettu l-għoti ta' approvazzjonijiet tat-tip tal-UE u l-eżenzjonijiet skont il-leġiżlazzjoni applikabbli qabel id-data tad-dħul fis-seħħ ta' dan ir-Regolament tul perjodu ta' żmien limitat. B'mod partikolari, huwa meħtieġ li tiġi permessa, għal perjodu limitat ta' żmien, l-applikazzjoni tal-istadji tal-emissjonijiet tas-sustanzi li jniġġsu mill-magni ta' qabel l-Istadju V b'mod parallel ma' dan tal-aħħar minħabba d-diffikultajiet tekniċi li għandhom ċerti kategoriji ta' vetturi, prinċipalment tratturi b'karreġġjata dejqa, biex jikkonformaw mal-limiti tal-Istadju V mid-dati ta' applikazzjoni obbligatorji tar-Regolament (UE) 2016/1628 għat-tqegħid fis-suq tal-magni.

(12)

Sabiex jittieħed kont tal-limiti fuq il-provvista loġistika u biex ikun jista' jkun hemm fluss produttiv “eżatt fil-ħin”, u biex jiġu evitati spejjeż u piż amministrattiv bla bżonn, jenħtieġ li manifattur, bil-kunsens tal-manifattur tal-vettura oriġinali, ikun jista' jagħmel konsenja ta' magna abbażi ta' tip approvat separatament mis-sistema ta' posttrattament tal-egżost tagħha.

(13)

Id-dispożizzjonijiet dwar l-istadji tal-emissjonijiet tas-sustanzi li jniġġsu mill-magni qabel l-Istadju V huma stabbiliti fir-Regolament Delegat tal-Kummissjoni (UE) 2015/96. Dawn id-dispożizzjonijiet, li jikkonċernaw l-approvazzjoni tat-tip jew it-tqegħid fis-suq ta' tratturi, jenħtieġ li japplikaw biss sad-dati obbligatorji tal-applikazzjoni tar-Regolament (UE) 2016/1628 għall-approvazzjoni tat-tip tal-UE tal-magni jew għat-tqegħid tagħhom fis-suq, rispettivament, jew lil hinn minn dawk id-dati skont id-dispożizzjonijiet tranżizzjonali. Għalhekk, jenħtieġ li r-Regolament Delegat (UE) 2015/96 jiġi mħassar mid-data tad-dħul fis-seħħ ta' dan ir-Regolament,

ADOTTAT DAN IR-REGOLAMENT:

KAPITOLU I

SUĠĠETT U DEFINIZZJONIJIET

Artikolu 1

Suġġett

Dan ir-Regolament jistabbilixxi

(a)

ir-rekwiżiti tekniċi dettaljati, dwar il-prestazzjoni ambjentali u tal-unità ta' propulsjoni u l-livelli permissibbli tal-ħoss estern għall-approvazzjoni ta': (i) vetturi għall-agrikoltura u l-forestrija, (ii) magni fir-rigward tal-installazzjoni tagħhom u l-impatt li din ikollha fuq il-prestazzjoni tal-magna, (iii) is-sistemi, il-komponenti u l-unitajiet tekniċi separati tagħhom; u

(b)	il-proċeduri tat-test meħtieġa għall-valutazzjoni tal-konformità mar-rekwiżiti msemmija fil-punt (a).

Dan ir-Regolament jistabbilixxi wkoll ir-rekwiżiti dettaljati fir-rigward tal-proċeduri tal-approvazzjoni tat-tip u tal-konformità tal-produzzjoni.

Artikolu 2

Definizzjonijiet

Għall-finijiet ta' dan ir-Regolament, għandhom japplikaw id-definizzjonijiet li ġejjin:

(1)

“magna” tfisser konvertitur tal-enerġija, għajr turbina tal-gass, iddisinjat biex jibdel l-enerġija kimika (input) fl-enerġija mekkanika (output) bi proċess ta' kombustjoni interna; tinkludi, meta jkunu ġew installati, is-sistema ta' kontroll tal-emissjonijiet u l-interfaċċja tal-komunikazzjoni (hardware u messaġġi) bejn l-unità elettronika/unitajiet elettroniċi ta' kontroll tal-magna u kwalunkwe sistema oħra tal-motopropulsjoni jew unità oħra għall-kontroll tal-vettura li tkun meħtieġa għall-konformità mal-Kapitoli II u III tar-Regolament (UE) 2016/1628;

(2)	“tip ta' magna” tfisser grupp ta' magni li ma jkunux differenti fil-karatteristiċi essenzjali tal-magna;

(3)	“familja ta' magni” tfisser grupp ta' tipi ta' magni ta' fabbrikant li, minħabba d-disinn tagħhom, ikollhom karatteristiċi simili fir-rigward tal-emissjonijiet tal-egżost, u li jirrispettaw il-valuri tal-limitu tal-emissjonijiet applikabbli;

(4)	“magna referenzjarja” tfisser tip ta' magna magħżula minn familja ta' magni b'tali mod li l-karatteristiċi tal-emissjonijiet tagħha jkunu rappreżentattivi ta' dik il-familja ta' magni;

(5)

“magna ta' sostituzzjoni” tfisser magna li tissodisfa ż-żewġ kriterji li ġejjin: (a) tintuża esklużivament biex tissostitwixxi magna li diġà tqiegħdet fis-suq u li ġiet installata fuq vettura agrikola u forestali; (b) tkun konformi ma' stadju tal-emissjonijiet li huwa aktar baxx minn dak applikabbli fid-data tas-sostituzzjoni tal-magna;

(6)

“potenza netta” tfisser il-potenza tal-magna f'kW miksuba fuq bank tat-testijiet fit-tarf tal-krankxaft, jew l-ekwivalenti tiegħu, imkejla f'konformità mal-metodu li jintuża għall-kejl tal-potenza tal-magni interna kif speċifikat fir-Regolament tan-NU/KEE Nru 120 (7) bl-użu ta' fjuwil referenzjarju jew taħlita ta' fjuwils kif speċifikat fl-Artikolu 25(2) tar-Regolament (UE) 2016/1628;

(7)

“magna ta' tranżizzjoni” tfisser magna li jkollha data tal-produzzjoni tal-magna li tkun qabel id-data stabbilita fl-Anness III għar-Regolament (UE) 2016/1628 fir-rigward tat-tqegħid fis-suq ta' magni ta' Stadju V u li tissodisfa mill-inqas waħda mill-kundizzjonijiet li ġejjin: (a) tkun konformi mal-aħħar limiti tal-emissjonijiet applikabbli definiti fil-leġiżlazzjoni rilevanti applikabbli fl-20 ta' Lulju 2018; (b) taqa' f'medda ta' potenza, jew tintuża jew maħsuba biex tintuża f'applikazzjoni li ma kinitx soġġetta għal approvazzjoni tat-tip relatata mal-emissjonijiet tas-sustanzi li jniġġsu skont ir-Regolament Delegat (UE) 2015/96 fl-20 ta' Lulju 2018; (c) Hija magna fil-medda tal-potenza 56–130 kW, li tissodisfa r-rekwiżiti tal-Istadju IIIB u installata jew maħsuba biex tiġi installata fi trattur tal-kategoriji T2, T4.1 jew C2;

(8)

“sistema ta' posttrattament tal-egżost” tfisser katalizzatur, filtru tal-partikoli, sistema deNOx, sistema kkombinata ta' filtru tal-partikoli deNOx jew kwalunkwe mezz ieħor li jnaqqas l-emissjonijiet, bl-eċċezzjoni tar-riċirkolazzjoni tal-gass tal-egżost u t-turboċarġers, li huwa parti mis-sistema ta' kontroll tal-emissjonijiet, iżda li jiġi installat 'l isfel mill-iżbokki tal-egżost tal-magna;

(9)

“apparat għat-tnaqqis tal-ħoss estern” tfisser il-komponenti, is-sistema jew l-unità teknika separata li huma parti mill-egżost u s-sistema tas-silenzjatur, inkluż is-sistema tal-egżost, is-sistema tad-dħul tal-arja, is-silenzjatur jew kwalunkwe sistema, komponent jew unità teknika separata b'rilevanza għal-livelli permissibbli tal-ħoss estern li tipproduċi vettura agrikola jew forestali, ta' tip imwaħħal mal-vettura fil-waqt tal-approvazzjoni tat-tip jew tal-estensjoni tal-approvazzjoni-tat-tip;

(10)	“magna SI” tfisser magna li taħdem fuq il-prinċipju tqabbid bl-ispark (“SI”);

(11)	“ċinga forma ta' ċinturin” tfisser ċinga flessibbli kontinwa, magħmula minn materjal bħal-lastku, rinfurzata internament biex tippermetti l-forzi trattivi;

(12)	“ċinga forma ta' katina” tfisser katina metallika kontinwa li taqbad fuq ir-rota motorizzata u li fiha kull ħolqa għandha paletta trażversali tal-metall, li tista' tkun mgħottija bi strippa tal-lastku għall-protezzjoni tal-wiċċ tat-triq.

(13)	“magna fis-servizz” tfisser magna mħaddma f'vettura agrikola u forestali fil-kundizzjonijiet u l-piżijiet tat-tagħbija normali ta' tħaddim tagħha, u li tintuża biex isiru t-testijiet ta' monitoraġġ tal-emissjonijiet kif imsemmi fl-Artikolu 19 tar-Regolament (UE) 2016/1628;

(14)	“potenza netta massima” tfisser l-ogħla valur tal-potenza netta fuq il-kurva nominali tal-potenza b'tagħbija sħiħa għat-tip ta' magna;

(15)	“data tal-produzzjoni tal-magna” tfisser id-data, mogħtija bħala x-xahar u s-sena, meta l-magna tgħaddi mill-verifika finali, wara li tkun ħalliet il-linja tal-produzzjoni, u tkun lesta biex tiġi konsenjata jew issir disponibbli għall-konsenja;

(16)	“data tal-produzzjoni tal-vettura” tfisser ix-xahar u s-sena li fih vettura agrikola u forestali tgħaddi mill-verifika finali wara li tkun ħalliet il-linja tal-produzzjoni u li huma indikati fuq il-marka statutorja ta' dik il-vettura;

(17)	“utent finali” tfisser kwalunkwe persuna fiżika jew ġuridika, għajr il-manifattur, il-manifattur tal-vettura, l-importatur jew id-distributur, li hija responsabbli mit-tħaddim tal-magna installata f'vetturi għall-agrikoltura u għall-forestrija;

(18)

“riċirkolazzjoni tal-gass tal-egżost” jew “EGR” tfisser mezz tekniku li hija parti mis-sistema ta' kontroll tal-emissjonijiet u li tnaqqas l-emissjonijiet billi tidderieġi l-gassijiet tal-egżost li jkunu ħarġu mill-kompartiment(kompartimenti) tal-kombustjoni lura fil-magna sabiex jitħalltu mal-arja li tidħol qabel jew waqt il-kombustjoni, ħlief għall-użu ta' valve timing sabiex jiżdied l-ammont ta' gass tal-egżost residwu fil-kamra(kmamar) tal-kombustjoni li jitħallat mal-arja li tidħol qabel jew waqt il-kombustjoni;

(19)	“tbagħbis” tfisser diżattivazzjoni, aġġustament jew modifika tas-sistema ta' kontroll tal-emissjonijiet, inkluż kwalunkwe software jew element loġiku ieħor ta' kontroll ta' tali sistema, li jkollu l-effett, intenzjonat jew le, li jdgħajjef il-prestazzjoni tal-magna fir-rigward tal-emissjonijiet;

(20)	“tagħmir għall-kontroll tat-tniġġis” tfisser komponent, sistema jew unità teknika separata li jkunu parti mis-sistema għall-posttrattament tal-emissjonijiet tal-egżost

(21)

“dħul inizjali fis-servizz” tfisser: (a) meta r-reġistrazzjoni ta' vetturi agrikoli jew tal-foresti tkun obbligatorja, l-ewwel reġistrazzjoni fi Stat Membru; (b) meta r-reġistrazzjoni ta' vetturi agrikoli jew forestali tkun obbligatorja biss għaċ-ċirkolazzjoni fit-toroq jew mhijiex obbligatorja fi Stat Membru, it-tqegħid fis-suq.

KAPITOLU II

REKWIŻITI SOSTANTIVI

Artikolu 3

Emissjonijiet tas-sustanzi li jniġġsu

Il-manifattur għandu jiżgura li t-tagħmir ta' vetturi għall-agrikoltura u għall-forestrija u l-magni installati fuqhom ikunu ddisinjati, mibnija u mmuntati b'tali mod li jkunu konformi mad-dispożizzjonijiet applikabbli għall-kategoriji ta' magni NRE jew NRS stabbiliti fir-Regolament (UE) 2016/1628 u fl-atti delegati u ta' implimentazzjoni adottati bis-saħħa tiegħu, bl-adattamenti stabbiliti fil-Parti 1 tal-Anness I ta' dan ir-Regolament; ir-rekwiżiti speċifiċi stipulati fil-Parti 2 tal-Anness I ta' dan ir-Regolament għandhom jiġu wkoll irrispettati.

Alternattivament, il-vetturi għall-agrikoltura u għall-forestrija u l-magni installati fuqhom jistgħu jkunu ddisinjati, mibnija u mmuntati b'tali mod li jkunu konformi mad-dispożizzjonijiet applikabbli għall-kategorija ta' magni ATS stabbiliti fir-Regolament (UE) 2016/1628 u fl-atti delegati u ta' implimentazzjoni adottati bis-saħħa tiegħu, bl-adattamenti stabbiliti fil-Parti 1 tal-Anness I ta' dan ir-Regolament, meta tali vetturi jkunu mgħammra b'magna SI u jissodisfaw waħda iż-żewġ kundizzjonijiet li ġejjin:

(a)	Ikunu mgħammra b'sarġ u manubriju;

(b)	ikunu mgħammra bi stering u b'sits f'forma ta' bank jew b'sits individwali f'ringiela waħda jew aktar u jilħqu veloċità massima ddisinjata ta' iktar minn jew ugwali għal 25 km/h.

Ir-rekwiżiti speċifiċi stipulati fil-Parti 2 tal-Anness I ta' dan ir-Regolament għandhom jiġu rrispettati wkoll.

Artikolu 4

Livelli tal-ħoss estern

Sabiex jiġi ssodisfati r-rekwiżiti tal-Artikolu 19(4) tar-Regolament (UE) Nru 167/2013, il-manifattur għandu jiżgura li l-vetturi għall-agrikoltura u għall-forestrija u s-sistemi, il-komponenti u l-unitajiet tekniċi separati tagħhom li jistgħu jaffettwaw il-livelli tal-ħoss estern tal-vettura jiġu ddisinjati, mibnija u armati, u li l-livelli tal-ħoss estern tagħhom jiġu mkejla sabiex jikkonformaw mar-rekwiżiti stabbiliti fl-Anness II.

Artikolu 5

Prestazzjoni tal-propulsjoni

Għall-evalwazzjoni tal-prestazzjoni tal-unità tal-propulsjoni tal-vetturi għall-agrikoltura u għall-forestrija, għandu jittieħed kejl tal-potenza netta, tat-torque tal-magna u tal-konsum speċifiku tal-fjuwil mill-manifattur skont il-paragrafu 5 tar-Regolament tan-NU/KEE Nru 120, is-serje 01 ta' emendi. Matul il-kejl, il-preżenza tal-awtorità li tagħti l-approvazzjoni jew ir-rappreżentanti tas-servizz tekniku mhijiex meħtieġa.

Minflok iwettaq il-kejl stabbilit fl-ewwel paragrafu, il-manifattur tal-vettura jew tal-magna jista' jattesta l-konformità mar-rekwiżiti tal-ewwel paragrafu billi jippreżenta, lill-awtorità tal-approvazzjoni, approvazzjoni maħruġa skont ir-Regolament tan-NU/KEE Nru 120, is-serje 01 ta' emendi.

KAPITOLU III

PROĊEDURI TAL-APPROVAZZJONI TAT-TIP

Artikolu 6

Approvazzjoni tat-tip tal-UE ta' vettura agrikola u forestali fir-rigward tal-emissjonijiet tas-sustanzi li jniġġsu

1.   Approvazzjoni tat-tip tal-UE skont ir-Regolament (UE) Nru 167/2013 għandha tingħata biss lil vettura agrikola u forestali, meta din tikkonforma mar-rekwiżiti dwar l-emissjonijiet tas-sustanzi li jniġġsu stipulati fir-Regolament (UE) 2016/1628 u fl-atti delegati u ta' implimentazzjoni adottati bis-saħħa tiegħu bl-adattamenti stipulati fil-Parti 1 tal-Anness I ta' dan ir-Regolament; ir-rekwiżiti speċifiċi stipulati fil-Parti 2 tal-Anness I ta' dan ir-Regolament għandhom jiġu wkoll irrispettati.

2.   Minbarra r-rekwiżiti skont ir-Regolament (UE) Nru 167/2013 u r-Regolament ta' Implimentazzjoni tal-Kummissjoni (UE) 2015/504 (8), applikazzjoni għall-approvazzjoni tat-tip tal-UE ta' tip ta' vettura għall-agrikoltura u għall-forestrija b'tip jew familja ta' magni approvat għandha tkun akkumpanjata minn kopja taċ-ċertifikat ta' approvazzjoni tat-tip tal-UE jew ċertifikat tal-approvazzjoni maħruġ skont id-dispożizzjonijiet imsemmija fl-Artikolu 11 ta' dan ir-Regolament għat-tip ta' magna jew għall-familja ta' magni u, jekk applikabbli, għas-sistemi, il-komponenti u l-unitajiet tekniċi separati li jkunu installati fuq il-vetturi agrikola u forestali.

3.   Minbarra r-rekwiżiti skont ir-Regolament (UE) Nru 167/2013 u r-Regolament ta' Implimentazzjoni tal-Kummissjoni (UE) 2015/504, applikazzjoni għall-approvazzjoni tat-tip tal-UE ta' tip ta' vettura agrikola u forestali mingħajr tip jew familja ta' magni approvati għandha tkun akkumpanjata minn dokument ta' informazzjoni relatat mal-approvazzjoni tat-tip tal-UE ta' tip ta' (jew tip ta' vettura fir-rigward ta') installazzjoni ta' sistema ta' magni jew ta' familja ta' magni skont l-Appendiċi 1 tal-Anness I tar-Regolament (UE) 2015/504 u dokument ta' informazzjoni relatat mal-approvazzjoni tat-tip tal-UE ta' magna, familja ta' magni bħala komponent jew unità teknika separata skont l-Appendiċi 3 tal-Anness I tar-Regolament (UE) 2015/504.

Għall-finijiet ta' din l-applikazzjoni, il-manifattur għandu jressaq quddiem is-servizz tekniku responsabbli mit-twettiq tat-testijiet tal-approvazzjoni, magna ta' vettura agrikola u forestali li tikkonforma mal-karatteristiċi tat-tip ta' magna jew, fejn applikabbli, tal-magna referenzjarja.

Artikolu 7

Approvazzjoni tat-tip tal-UE ta' magna jew ta' familja ta' magni fir-rigward tal-emissjonijiet tas-sustanzi li jniġġsu

Approvazzjoni tat-tip tal-UE skont ir-Regolament (UE) Nru 167/2013 għandha tingħata biss għal tip ta' magna jew familja ta' magni jekk tikkonforma mar-rekwiżiti dwar l-emissjonijiet tas-sustanzi li jniġġsu stipulati fir-Regolament (UE) 2016/1628 u fl-atti delegati u ta' implimentazzjoni adottati bis-saħħa tiegħu bl-adattamenti stipulati fil-Parti 1 tal-Anness I ta' dan ir-Regolament; ir-rekwiżiti speċifiċi stipulati fil-Parti 2 tal-Anness I ta' dan ir-Regolament għandhom jiġu wkoll irrispettati. L-applikazzjoni għall-approvazzjoni tat-tip għandha tkun akkumpanjata mill-folder tal-informazzjoni skont l-Artikolu 2 tar-Regolament ta' Implimentazzjoni (UE) 2015/504.

Artikolu 8

Approvazzjoni tat-tip tal-UE ta' vettura agrikola u forestali fir-rigward tal-livelli ta' ħoss estern

1.   Approvazzjoni tat-tip tal-UE skont ir-Regolament (UE) Nru 167/2013 għandha tingħata biss għal vettura agrikola u forestali meta din tikkonforma mar-rekwiżiti fir-rigward tal-livelli tal-ħoss estern stabbiliti fil-paragrafi 2 sa 5 u fl-Anness II ta' dan ir-Regolament.

2.   Is-servizzi tekniċi għandhom ikejlu l-livell tal-ħoss estern tal-vetturi għall-agrikoltura u għall-forestrija tal-kategorija T mgħammra b'tajers pnewmatiċi u tal-kategorija C mgħammra b'ċineg forma ta' ċinturin, għall-finijiet tal-approvazzjoni tat-tip, skont il-kundizzjonijiet u l-metodi tat-test stabbiliti fil-punt 1.3.1 tal-Anness II.

3.   Is-servizzi tekniċi għandhom ikejlu l-livell tal-ħoss estern tal-vetturi għall-agrikoltura u għall-forestrija wieqfa tal-kategoriji T u C mgħammra b'ċineg forma ta' ċinturin, għall-finijiet tal-approvazzjoni tat-tip, skont il-kundizzjonijiet u l-metodi tat-test stabbiliti fil-punt 1.3.2 tal-Anness II. Għandhom jirreġistraw ir-riżultati b'konformità mad-dispożizzjonijiet stipulati fil-punt 1.3.2.4 tal-Anness II.

4.   Is-servizzi tekniċi għandhom ikejlu l-livell tal-ħoss estern tal-vetturi għall-agrikoltura u għall-forestrija tal-kategorija C mgħammra b'ċineg forma ta' ċinturin, għall-finijiet tal-approvazzjoni tat-tip, skont il-kundizzjonijiet u l-metodi tat-test stazzjonarju stabbiliti fil-punt 1.3.2 tal-Anness II.

5.   Is-servizzi tekniċi għandhom ikejlu l-livell tal-ħoss estern tal-vetturi għall-agrikoltura u għall-forestrija tal-kategorija C mgħammra b'ċineg forma ta' ċinturin huma u mexjin, għall-finijiet tal-approvazzjoni tat-tip, skont il-kundizzjonijiet u l-metodi tat-test stabbiliti fil-punt 1.3.3 tal-Anness II. Għandhom jirreġistraw ir-riżultati.

6.   L-applikazzjoni għall-approvazzjoni tat-tip għandha tkun akkumpanjata mill-folder tal-informazzjoni skont l-Artikolu 2 tar-Regolament ta' Implimentazzjoni (UE) 2015/504.

Artikolu 9

Estensjoni tal-approvazzjoni tat-tip tal-UE

L-approvazzjoni tat-tip tal-UE rigward ir-rekwiżiti tal-emissjonijiet tas-sustanzi li jniġġsu u tal-livell ta' ħoss estern tista' tiġi estiża mill-awtoritajiet tal-approvazzjoni tat-tip għal varjanti tal-vetturi, verżjonijiet u tipi u familji differenti ta' magni, diment li l-parametri ta' dawk il-varjanti tal-vetturi, il-verżjonijiet, it-tipi u l-familji ta' magni differenti jissodisfaw ir-rekwiżiti dwar l-emissjonijiet tas-sustanzi li jniġġsu u r-rekwiżiti tal-livelli tal-ħoss estern stabbiliti fl-Artikolu 19(3) u (4) tar-Regolament (UE) Nru 167/2013.

Artikolu 10

Bidliet sussegwenti li jaffettwaw il-prestazzjoni ambjentali u tal-propulsjoni

Il-manifattur għandu jinnotifika lill-awtorità tal-approvazzjoni mingħajr dewmien kull modifika lis-sistemi, il-komponenti u l-unitajiet tekniċi separati li tista' taffettwa l-prestazzjoni ambjentali u tal-unità tal-propulsjoni għall-vetturi għall-agrikoltura u għall-forestrija tat-tip approvat imqiegħed fis-suq skont l-Artikolu 19 tar-Regolament (UE) Nru 167/2013.

In-notifika msemmija fl-ewwel paragrafu għandha tinkludi dawn li ġejjin:

(a)	evidenza li l-bidliet imsemmija fl-ewwel paragrafu ma jiddeterjorawx il-prestazzjoni ambjentali ta' vettura f'relazzjoni mal-prestazzjoni ambjentali muri waqt l-approvazzjoni tat-tip.

(b)	deskrizzjoni tat-tip ta' magni jew tal-familja ta' magni, inkluża s-sistema ta' posttrattament tal-egżost, skont l-Artikolu 11 u l-Anness IX tar-Regolament ta' Implimentazzjoni tal-Kummissjoni (UE) 2017/656 (9);

(c)	informazzjoni skont l-Appendiċi 2 tal-Anness I tar-Regolament ta' Implimentazzjoni (UE) 2015/504.

KAPITOLU IV

EKWIVALENZA

Artikolu 11

Ekwivalenza tal-approvazzjonijiet tat-tip alternattivi

1.   L-approvazzjonijiet tat-tip tal-UE u l-marki statutorji korrispondenti ta' tipi ta' magni jew familji ta' magni mogħtija fuq il-bażi tar-Regolament (UE) 2016/1628 għandhom jiġu rikonoxxuti bħala ekwivalenti għall-approvazzjonijiet tat-tip u l-marki tal-approvazzjoni mogħtija għal magni skont dan ir-Regolament.

2.   Dikjarazzjoni ta' konformità mogħtija fuq il-bażi tal-Artikolu 31 tar-Regolament (UE) 2016/1628 għandha tiġi aċċettata mill-awtoritajiet nazzjonali għall-finijiet tal-approvazzjoni tat-tip tal-UE, skont dan ir-Regolament, ta' vetturi għall-agrikoltura u għall-forestrija mgħammra b'magni b'dik id-dikjarazzjoni ta' konformità.

3.   L-approvazzjonijiet tat-tip mogħtija għal magni u l-marki statutorji korrispondenti li jkunu f'konformità mar-regolamenti tan-NU/KEE msemmija fl-Artikolu 42(2) tar-Regolament (UE) 2016/1628 kif ukoll l-approvazzjonijiet tat-tip tal-UE mogħtija għal magni fuq il-bażi tal-atti tal-Unjoni msemmija fl-Artikolu 42(3) ta' dak ir-Regolament, għandhom jiġu rikonoxxuti bħala ekwivalenti għall-approvazzjonijiet tat-tip tal-UE mogħtija b'konformità ma' dan ir-Regolament u mal-marki statutorji korrispondenti meħtieġa skont ir-Regolament ta' Implimentazzjoni (UE) 2015/504 bil-kundizzjoni li r-rekwiżiti tal-Anness XIII tar-Regolament Delegat tal-Kummissjoni (UE) 2017/654 (10) huma ssodisfati.

KAPITOLU V

AĊĊESS GĦALL-INFORMAZZJONI DWAR IT-TISWIJA U L-MANUTENZJONI TAL-VETTURI

Artikolu 12

Obbligu tal-manifatturi tal-magni

Sabiex jitwettqu l-obbligi stabbiliti fl-Artikoli 53 sa 56 tar-Regolament (UE) Nru 167/2013 u l-Artikolu 8 tar-Regolament ta' Delega tal-Kummissjoni (UE) Nru 1322/2014 (11), meta l-manifattur ta' vettura agrikola jew forestali ma jkunx il-manifattur tal-magna, il-manifattur tal-magna għandu jagħmel disponibbli lill-manifattur tal-vettura l-informazzjoni meħtieġa biex jissodisfa dawk l-obbligi.

KAPITOLU VI

DISPOŻIZZJONIJIET FINALI

Artikolu 13

Dispożizzjonijiet tranżizzjonali

1.   Mill-21 ta' Lulju 2018

(a)	l-awtoritajiet ta' approvazzjoni ma għandhomx jirrifjutaw li jagħtu approvazzjoni tat-tip tal-UE jew approvazzjoni tat-tip nazzjonali għal tip ġdid ta' magni jew familja ġdida ta' magni meta dak it-tip ta' magni jew familja ta' magni jkunu konformi mal-Artikoli 3, 5 u 7;

(b)	l-awtoritajiet tal-approvazzjoni ma għandhomx jirrifjutaw li jagħtu approvazzjoni tat-tip tal-UE jew approvazzjoni tat-tip nazzjonali għal tip ġdid ta' vetturi meta dak it-tip ta' vetturi jikkonforma mal-Artikoli 3 sa 6 u l-Artikolu 8;

(c)

l-Istati Membri għandhom jippermettu t-tqegħid fis-suq, il-bejgħ u d-dħul fis-servizz ta' magni li jikkonformaw mal-Artikoli 3, 5 u 7 jew mal-Artikolu 11 u t-tqegħid fis-suq, il-bejgħ, ir-reġistrazzjoni u d-dħul fis-servizz ta' vetturi għall-agrikoltura u għall-forestrija li jikkonformaw mal-Artikoli 3 sa 6 u l-Artikolu 8.

2.   Sakemm id-data mandatorja tal-applikazzjoni tar-Regolament (UE) 2016/1628 fir-rigward tal-approvazzjoni tat-tip tal-UE tal-kategorija ta' magni kkonċernata, kif stabbilit fl-Anness III ta' dak ir-Regolament, l-awtoritajiet tal-approvazzjoni għandhom ikomplu jagħtu approvazzjonijiet tat-tip tal-UE u eżenzjonijiet lil tipi ta' vetturi jew tipi ta' magni u familji ta' magni għall-agrikoltura u għall-forestrija skont ir-Regolament (UE) 2015/96, fil-verżjoni tiegħu applikabbli nhar fl-20 ta' Lulju 2018.

3.   Mid-dati obbligatorji tal-applikazzjoni tar-Regolament (UE) 2016/1628 fir-rigward tat-tqegħid fis-suq tal-kategorija ta' magni kkonċernata, kif stipulat fl-Anness III ta' dak ir-Regolament, l-Istati Membri ma għandhomx jippermettu iktar it-tqegħid fis-suq, il-bejgħ, ir-reġistrazzjoni jew id-dħul fis-servizz ta' vetturi jew it-tqegħid fis-suq, il-bejgħ jew id-dħul fis-servizz ta' magni approvati għat-tip fuq il-bażi tar-Regolament (UE) 2015/96.

Sa dawn id-dati, l-Istati Membri jistgħu jippermettu t-tqegħid fis-suq, il-bejgħ, ir-reġistrazzjoni jew id-dħul fis-servizz ta' vetturi jew it-tqegħid fis-suq, il-bejgħ jew id-dħul fis-servizz ta' magni skont ir-rekwiżiti stipulati fir-Regolament Delegat r-Regolament (UE) 2015/96. L-iskema ta' flessibbiltà prevista fl-Artikolu 14 ta' dak ir-Regolament Delegat għandu japplika biss għal vetturi għall-agrikoltura u għall-forestrija mgħammra b'magni approvati skont ir-rekwiżiti tal-istadju tal-limiti tal-emissjonijiet li jippreċedi immedjatament dak applikabbli.

4.   Il-magni li ma kinux soġġetti għal approvazzjoni tat-tip relatata mal-emissjonijiet tas-sustanzi li jniġġsu skont ir-Regolament Delegat (UE) 2015/96 nhar fl-20 ta' Lulju 2018 jistgħu jkomplu jitqiegħdu fis-suq, jiġu mibjugħa jew jidħlu fis-servizz sad-data obbligatorja tal-applikazzjoni tar-Regolament (UE) 2016/1628 f'dak li jirrigwarda t-tqegħid fis-suq ta' magna tal-kategorija kkonċernata, kif stabbilit fl-Anness III għal dak ir-Regolament, fuq il-bażi tar-regoli nazzjonali fis-seħħ.

Vetturi għall-agrikoltura u għall-forestrija approvati għat-tip skont ir-Regolament (UE) Nru 167/2013 u mgħammra b'dawk il-magni jistgħu jkomplu jitqiegħdu fis-suq, jinbiegħu, jiġu rreġistrati jew jidħlu fis-servizz sal-istess dati.

5.   Il-magni ta' tranżizzjoni jistgħu jkomplu jitqiegħdu fis-suq, jiġu mibjugħa jew jidħlu fis-servizz matul l-24 xahar wara d-data obbligatorja tal-applikazzjoni tar-Regolament (UE) 2016/1628 f'dak li jirrigwarda t-tqegħid fis-suq tal-kategorija ta' magni kkonċernata, kif stabbilit fl-Anness III ta' dak ir-Regolament.

Vetturi għall-agrikoltura u għall-forestrija mgħammra b'magni ta' tranżizzjoni jistgħu jitqiegħdu fis-suq, jinbiegħu, jiġu rreġistrati jew jiddaħħlu fis-servizz matul l-24 xahar wara d-data obbligatorja tal-applikazzjoni tar-Regolament (UE) 2016/1628 f'dak li jirrigwarda t-tqegħid fis-suq tal-kategorija ta' magni kkonċernata, kif stabbilit fl-Anness III ta' dak ir-Regolament, dment li dawk il-vetturi jissodisfaw iż-żewġ kundizzjonijiet li ġejjin:

(a)	ikollhom data tal-produzzjoni qabel 18-il xahar wara d-data obbligatorja tal-applikazzjoni tar-Regolament (UE) 2016/1628 f'dak li jirrigwarda t-tqegħid fis-suq tal-kategorija ta' magni kkonċernata, kif stabbilit fl-Anness III ta' dak ir-Regolament;

(b)	ikunu mmarkati skont ir-rekwiżiti tal-punt 2.1 tal-Parti 2 tal-Anness I ta' dan ir-Regolament.

Għall-magni tal-kategorija NRE, l-Istati Membri għandhom jawtorizzaw l-estensjoni tal-perjodu ta' 24 xahar u tal-perjodu ta' 18-il xahar imsemmija fl-ewwel u t-tieni subparagrafi b'perjodu addizzjonali ta' 12-il xahar għall-manifatturi tal-vetturi bi produzzjoni annwali totali ta' inqas minn 100 unità ta' vetturi għall-agrikoltura u għall-forestrija mgħammra b'magna. Għall-finijiet tal-kalkolu ta' dik il-produzzjoni annwali totali, il-manifatturi kollha tal-vetturi taħt il-kontroll tal-istess persuna fiżika jew ġuridika għandhom jitqiesu bħala manifattur tal-vetturi wieħed.

6.   Għall-finijiet tat-tqegħid fis-suq ta' magni ta' sostituzzjoni għal vetturi għall-agrikoltura u għall-forestrija skont il-paragrafi 10 u 11 tal-Artikolu 58 tar-Regolament (UE) 2016/1628, il-manifatturi għandhom jiżguraw li l-magni ta' sostituzzjoni jikkonformaw mal-marka msemmija fil-punt 6 tal-Anness XX tar-Regolament (UE) 2015/208 (12), l-Artikolu 32(2)(e) tar-Regolament (UE) 2016/1628 u l-punti 1 u 5.4 tal-Anness IV tar-Regolament (UE) 2015/504.

Artikolu 14

Eżenzjonijiet

1.   Bil-kunsens tal-manifattur tal-vettura, manifattur tal-magni jista' jagħti lil dak il-manifattur tal-vettura, magna separatament mis-sistema ta' posttrattament tal-egżost tagħha b'konformità mad-dispożizzjonijiet stabbiliti fl-Anness X tar-Regolament (UE) 2017/654.

2.   L-Istati Membri jistgħu jawtorizzaw it-tqegħid temporanju fis-suq, għall-finijiet tal-ittestjar fuq il-post skont id-dispożizzjonijiet tal-Anness XI tar-Regolament Delegat (UE) 2017/654, ta' magni li ma kellhomx it-tip approvat tal-UE b'konformità mal-Artikoli 3, 5 u 7 ta' dan ir-Regolament.

Artikolu 15

Revoka

Ir-Regolament Delegat (UE) 2015/96 huwa b'dan revokat.

Artikolu 16

Dħul fis-seħħ u applikazzjoni

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

---

(1)  ĠU L 60, 2.3.2013, p. 1.

(2)  COM(2010)186 finali, 28.4.2010.

(3)  Ir-Regolament (UE) 2016/1628 tal-Parlament Ewropew u tal-Kunsill tal-14 ta' Settembru 2016 dwar ir-rekwiżiti relatati mal-limiti tal-emissjonijiet ta' inkwinanti gassużi u partikolati u l-approvazzjoni tat-tip għall-magni b'kombustjoni interna għal makkinarju mobbli mhux tat-triq, li jemenda r-Regolamenti (UE) Nru 1024/2012 u (UE) Nru 167/2013, u li jemenda u jirrevoka d-Direttiva 97/68/KE (ĠU L 252, 16.9.2016, p. 53).

(4)  Ir-Regolament ta' Delega tal-Kummissjoni (UE) 2015/96 tal-1 ta' Ottubru 2014 li jissupplimenta r-Regolament (UE) Nru 167/2013 tal-Parlament Ewropew u tal-Kunsill fir-rigward tar-rekwiżiti ambjentali u tar-rendiment tal-unità tal-propulsjoni tal-vetturi agrikoli u forestali (ĠU L 16, 23.1.2015, p. 1).

(5)  Id-Deċiżjoni tal-Kunsill 97/836/KE tas-27 ta' Novembru 1997 bil-għan tal-adeżjoni tal-Komunità Ewropea mal-Ftehim tal-Kummissjoni Ekonomika tan-Nazzjonijiet Uniti għall-Ewropa li jikkonċerna l-adozzjoni tal-preskrizzjonijet tekniċi uniformi għall-vetturi bir-roti, tagħmir u parts li jistgħu jkunu ffittjati u/jew ikunu użati ma' vetturi bir-roti u l-kondizzjonijiet għar-rikonoxximent reċiproku tal-approvazzjonijiet mogħtija fuq il-bażi ta' dawn il-preskrizzjonijiet (“Ftehim Rivedut tal-1958”) (ĠU L 346, 17.12.1997, p. 78).

(6)  COM(2012) 636 final tat-8 ta' Novembru 2012.

(7)  Ir-Regolament Nru 120 tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi dwar l-approvazzjoni tal-magni b'kombustjoni interna li għandhom jiġu installati fi tratturi għall-agrikoltura u għall-forestrija u f'makkinarju mobbli mhux tat-triq, fir-rigward tal-kejl tal-potenza netta, it-torque nett u l-konsum speċifiku tal-fjuwil [2015/1000] (ĠU L 166, 30.6.2015, p. 170)

(8)  Ir-Regolament ta' Implimentazzjoni tal-Kummissjoni (UE) 2015/504 tal-11 ta' Marzu 2015 li jimplimenta r-Regolament (UE) Nru 167/2013 tal-Parlament Ewropew u tal-Kunsill f'dak li għandu x'jaqsam mar-rekwiżiti amministrattivi għall-approvazzjoni u s-sorveljanza tas-suq tal-vetturi għall-agrikoltura u għall-forestrija (ĠU L 85, 28.3.2015, p. 1).

(9)  Ir-Regolament ta' Implimentazzjoni tal-Kummissjoni (UE) 2017/656 tad-19 ta' Diċembru 2016 li jistabbilixxi r-rekwiżiti amministrattivi relatati mal-limiti tal-emissjonijiet u l-approvazzjoni tat-tip għall-magni b'kombustjoni interna għal makkinarju mobbli mhux tat-triq skont ir-Regolament (UE) 2016/1628 tal-Parlament Ewropew u tal-Kunsill (ĠU L 102, 13.4.2017, p. 364).

(10)  Ir-Regolament Delegat tal-Kummissjoni (UE) 2017/654 tad-19 ta' Diċembru 2016 li jissupplimenta r-Regolament (UE) 2016/1628 tal-Parlament Ewropew u tal-Kunsill fir-rigward tar-rekwiżiti tekniċi u ġenerali relatati mal-limiti tal-emissjonijiet u l-approvazzjoni tat-tip għall-magni b'kombustjoni interna ta' makkinarju mobbli mhux tat-triq (ĠU L 102, 13.4.2017, p. 1).

(11)  Ir-Regolament ta' Delega tal-Kummissjoni (UE) Nru 1322/2014 tad-19 ta' Settembru 2014 li jissupplimenta u jemenda r-Regolament (UE) Nru 167/2013 tal-Parlament Ewropew u tal-Kunsill fir-rigward tal-bini tal-vetturi u tar-rekwiżiti ġenerali għall-approvazzjoni tal-vetturi għall-agrikoltura u għall-forestrija (ĠU L 364, 18.12.2014, p. 1).

(12)  Ir-Regolament ta' Delega tal-Kummissjoni (UE) 2015/208 tat-8 ta' Diċembru 2014 li jissupplimenta r-Regolament (UE) Nru 167/2013 tal-Parlament Ewropew u tal-Kunsill fir-rigward ta' rekwiżiti ta' sikurezza funzjonali tal-vetturi għall-approvazzjoni ta' vetturi għall-agrikoltura u l-forestrija (ĠU L 42, 17.2.2015, p. 1).

---

---

---