Sħubiji pubbliċi-privati taħt Orizzont Ewropa
SOMMARJU TA’:
Ir-Regolament (UE) 2021/2085 li jistabbilixxi l-impriżi konġunti taħt Orizzont Ewropa
X’INHU L-GĦAN TAR-REGOLAMENT?
Ir-regolament:
Regolament Emendatorju (UE) 2023/1782 jibni fuq l-Impriża Konġunta Teknoloġiji Diġitali Ewlenin u jisosstitwixxih bl-Impriża Konġunta taċ-Ċipep; dan kien adottat b’mod parallel mar-Regolament (UE) 2023/1781 (magħruf bħala l-Att dwar iċ-Ċipep), li għandu l-għan li jsaħħaħ is-settur semikonduttur tal-Unjoni Ewropea (UE).
PUNTI EWLENIN
Objettivi ġenerali
Id-disa’ impriżi konġunti huma mfassla b’mod kollettiv biex:
- isaħħu u jintegraw il-kapaċitajiet xjentifiċi, innovattivi u teknoloġiċi u l-kollaborazzjoni;
- jappoġġaw l-għarfien u l-ħiliet;
- iwettqu l-isfidi globali;
- itejbu l-kompetittività, ir-reżiljenza u s-sostenibbiltà;
- jgħinu biex tinkiseb żona ta’ riċerka Ewropea aktar b’saħħitha;
- jiżguraw it-tmexxija u r-reżiljenza globali mmexxija mis-sostenibbiltà f’teknoloġiji u industriji importanti f’konformità mal-istrateġiji industrijali u tal-intrapriżi żgħar u ta’ daqs medju, il-Patt Ekoloġiku Ewropew, il-pjan ta’ rkupru Ewropew u politiki oħra;
- itejbu l-użu ta’ soluzzjonijiet innovattivi li jindirizzaw l-isfidi tal-klima, ambjentali, tas-saħħa u sfidi globali oħra;
- jikkontribwixxu għall-prijoritajiet strateġiċi u t-tkabbir ekonomiku tal-UE;
- jgħinu biex jintlaħqu l-għanijiet tal-iżvilupp sostenibbli tan-Nazzjonijiet Uniti u n-newtralità fil-klima sal-2050, f’konformità mal-Ftehim ta’ Pariġi.
L-impriżi konġunti li ġejjin huma stabbiliti bħala korpi tal-UE għal perjodu li jintemm fil-31 ta’ Diċembru 2031, iffinanzjati taħt il-qafas finanzjarju pluriennali 2021–2027.
L-Impriża Konġunta Ewropa Ċirkolari b’Bażi Bijoloġika maħsuba biex:
- tħaffef l-iżvilupp ta’ soluzzjonijiet innovattivi b’bażi bijoloġika;
- taċċellera l-iskjerament fis-suq ta’ soluzzjonijiet eżistenti;
- tiżgura li s-sistemi industrijali b’bażi bijoloġika jaħdmu f’livell għoli.
L-Impriża Konġunta Avjazzjoni Nadifa, maħsuba biex:
- tgħin biex titnaqqas l-impronta tal-karbonju tal-avjazzjoni billi taċċellera l-iżvilupp ta’ teknoloġiji tal-avjazzjoni newtrali għall-klima;
- tiżgura li r-riċerka u l-innovazzjoni fl-aeronawtika (R & I) tikkontribwixxi għall-kompetittività tal-industrija tal-avjazzjoni tal-UE;
- tavvanza l-kapaċità tar-R & I tal-avjazzjoni tal-UE.
L-Impriża Konġunta Idroġenu Nadif, maħsuba biex:
- tgħin fl-ambizzjonijiet tal-UE biex jitnaqqsu l-emissjonijiet tal-gassijiet b’effett serra permezz tal-istrateġija tal-idroġenu 2020 għal Ewropa newtrali għall-klima;
- isaħħaħ il-kompetittività tal-katina tal-valur tal-idroġenu nadif tal-UE, billi ġġib soluzzjonijiet innovattivi nodfa fis-suq aktar malajr;
- tistimula r-R & I dwar l-idroġenu nadif.
L-Impriża Konġunta Sistema Ferrovjarja Ewropea, maħsuba biex:
- tgħin biex tinkiseb iż-żona ferrovjarja unika Ewropea;
- tiżgura tranżizzjoni rapida għal sistema ferrovjarja aktar attraenti, faċli biex tintuża, kompetittiva, affordabbli, faċli biex tinżamm, effiċjenti, integrata u sostenibbli;
- tappoġġja industrija ferrovjarja Ewropea b’saħħitha u kompetittiva globalment.
L-Impriża Konġunta Saħħa Globali EDCTP3, maħsuba biex:
- tgħin biex jitnaqqas il-piż soċjoekonomiku tal-mard infettiv fl-Afrika sub-Saħarjana bil-promozzjoni ta’ teknoloġiji ġodda jew imtejba tas-saħħa;
- isaħħu t-tħejjija u r-rispons għall-mard infettiv biex jikkontribwixxu għas-saħħa u s-sigurtà fl-Afrika sub-Saħarjana u globalment.
L-Impriża Konġunta Saħħa Innovattiva, maħsuba biex:
- toħloq ekosistema tar-R & I tas-saħħa, li tgħin biex l-għarfien xjentifiku jiġi tradott f’innovazzjonijiet;
- tiżviluppa innovazzjonijiet sikuri u kosteffettivi biex jirrispondu għal ħtiġijiet strateġiċi mhux issodisfati tas-saħħa pubblika;
- tixpruna l-innovazzjoni għal industrija tas-saħħa Ewropea kompetittiva u effettiva, strateġija industrijali għall-Ewropa u strateġija farmaċewtika għall-Ewropa.
L-Impriża Konġunta Riċerka dwar il-Ġestjoni tat-Traffiku tal-Ajru Uniku Ewropew 3, maħsuba biex:
- issaħħaħ u tintegra l-kapaċità tar-riċerka u l-innovazzjoni tal-UE fil-ġestjoni tat-traffiku tal-ajru, u tagħmilha aktar reżiljenti u skalabbli;
- issaħħaħ, permezz tal-innovazzjoni, l-kompetittività tat-trasport bl-ajru bl-ekwipaġġ u mingħajr ekwipaġġ;
- tiżviluppa u tħaffef l-adozzjoni fis-suq ta’ soluzzjonijiet innovattivi biex tistabbilixxi l-ajru uniku Ewropew bħala l-ispazju tal-ajru l-aktar effiċjenti u li ma jagħmilx ħsara lill-ambjent fid-dinja.
L-Impriża Konġunta Networks u Servizzi Intelliġenti, maħsuba biex:
- irawmu t-tmexxija teknoloġika tal-Ewropa fin-netwerks u s-servizzi intelliġenti tal-futur;
- jiksbu allinjament strateġiku aħjar mal-industrija tat-telekomunikazzjoni, flimkien mal-internet tal-oġġetti, il-cloud, u l-komponenti u t-tagħmir;
- javanzaw it-tmexxija teknoloġika u xjentifika Ewropea biex ifasslu u jħaddmu s-sistema 6G* sistemi sal-2030
- isaħħu l-iskjerament tal-infrastruttura diġitali u l-użu ta’ soluzzjonijiet diġitali fis-swieq Ewropej;
- jappoġġjaw l-allinjament ta’ netwerks u servizzi intelliġenti futuri mal-għanijiet tal-politika inkluż il-Patt Ekoloġiku Ewropew, is-sigurtà, l-etika u l-privatezza, flimkien ma’ internet sostenibbli u ċċentrat fuq il-bniedem.
L-Impriża Konġunta taċ-Ċipep maħsuba biex:
- tibni kapaċitajiet avvanzati ta’ disinn għal teknoloġiji integrati semikondutturi;
- issaħħaħ linji pilota ġodda avvanzati eżistenti u li qed jiġu żviluppati mal-UE kollha biex tippermetti l-iżvilupp u skjerament ta’ teknoloġiji tal-ogħla livell semikondutturi u teknoloġiji semikondutturi għall-ġenerazzjoni li jmiss;
- tibni kapaċitajiet ta’ teknoloġija u inġinerija avanzata biex taċċellera l-iżvilupp innovattiv ta’ ċipep kwantistiċi tal-ogħla livell u teknoloġiji semikondutturi assoċjati;
- tistabbilixxi network ta’ ċentri ta’ kompetenzi mal-UE kollha billi jsaħħu faċilitajiet eżistenti jew joħolqu faċilitajiet ġodda;
- twettaq attivitajiet ta’ “Fond għaċ-Ċipep” biex tiffaċilita aċċess għal finanzjament għad-dejn u ekwità, inkluż li tipprovdi gwida ċara, b’mod partikolari għal negozji ġodda, kumpaniji li qed jespandu, intrapriżi żgħar u ta’ daqs medju (SMEs) u mid-caps żgħar fil-katina tal-valur semikonduttura permezz ta’ faċilità ta’ taħlit taħt il-Fond InvestEU (ara s-sommarju) u permezz tal-Kunsill Ewropew għall-Innovazzjoni.
Monitoraġġ u evalwazzjoni
L-impriżi konġunti huma mmonitorjati kontinwament biex jiżguraw l-akbar impatt, l-eċċellenza xjentifika tagħhom u l-aktar użu effettiv u effiċjenti tar-riżorsi. Ir-riżultati se jgħaddu lura għand il-programm Orizzont Ewropa.
MINN META BEDA JAPPLIKA R-REGOLAMENT?
Ilu japplika mit-30 ta’ Novembru 2021.
SFOND
Għal aktar informazzjoni, ara:
TERMINI EWLENIN
6G. Il-ġenerazzjoni li jmiss tas-sistemi u servizzi ta’ mobile/ċellulari bħalissa hija qed tiżviluppa u mistennija tkun disponibbli lejn l-2030 Din ser toffri veloċitajiet ta’ komunikazzjoni aktar mgħaġġla, topera fi frekwenzi tar-radju ultragħolja u tagħmel użu minn teknoloġiji bħal intelliġenza artifiċjali.
DOKUMENT PRINĊIPALI
Ir-Regolament tal-Kunsill (UE) 2021/2085 tad-19 ta’ Novembru 2021 li jistabbilixxi l-Impriżi Konġunti fil-qafas ta’ Orizzont Ewropa u li jħassar ir-Regolamenti (KE) Nru 219/2007, (UE) Nru 557/2014, (UE) Nru 558/2014, (UE) Nru 559/2014, (UE) Nru 560/2014, (UE) Nru 561/2014 u (UE) Nru 642/2014 (ĠU L 427, 30.11.2021, pp. 17–119).
L-emendi suċċessivi għar-Regolament (UE) 2021/2085 ġew inkorporati fit-test oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Ir-Regolament (UE) 2023/1781 tal-Parlament Ewropew u tal-Kunsill tat-13 ta’ Settembru 2023 li jistabbilixxi qafas ta’ miżuri għat-tisħiħ tal-ekosistema Ewropea tas-semikondutturi u li jemenda r-Regolament (UE) 2021/694 (l-Att dwar iċ-Ċipep) (ĠU L 229, 18.9.2023, pp. 1–53).
Ir-Regolament (UE) 2021/695 tal-Parlament Ewropew u tal-Kunsill tat-28 ta’ April 2021 li jistabbilixxi Orizzont Ewropa — il-Programm Qafas għar-Riċerka u Innovazzjoni, li jistipula r-regoli tiegħu għal parteċipazzjoni u disseminazzjoni, u li jħassar ir-Regolamenti (UE) Nru 1290/2013 u (UE) Nru 1291/2013 (ĠU L 170, 12.5.2021, pp. 1–68).
Ir-Regolament (UE) 2020/852 tal-Parlament Ewropew u tal-Kunsill tat-18 ta’ Ġunju 2020 dwar l-istabbiliment ta’ qafas biex jiġi ffaċilitat l-investiment sostenibbli, u li jemenda r-Regolament (UE) 2019/2088, (ĠU L 198, 22.6.2020, pp. 13–43).
Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Il-Patt Ekoloġiku Ewropew (COM(2019) 640 final, 11.12.2019).
Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru. 966/2012 (ĠU L 193, 30.7.2018, pp. 1–222).
Ara l-verżjoni konsolidata.
Verżjoni konsolidata tat-Trattat dwar il-Funzjonament tal-Unjoni Ewropea — it-Tielet Parti — Politiki u azzjonijiet interni tal-Unjoni — Titolu XIX — Ir-riċerka u l-iżvilupp teknoloġiku u l-ispazju — l-Artikolu 187 (ex Artikolu 171 TKE) (ĠU C 202, 7.6.2016, p. 131).
l-aħħar aġġornament 13.12.2023