IL-KUMMISSJONI EWROPEA

Brussell, 17.12.2018

COM(2018) 842 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

Rapport dwar il-funzjonament tas-suq Ewropew tal-karbonju

Werrej

Lista ta’ akronimi u abbrevjazzjonijiet    

TAQSIRA................................................................................................................................................5

1.    INTRODUZZJONI..........................................................................................................................6

2.    IL-QAFAS TAL-EU ETS FIL-FAŻI 4 (2021-2030)    

2.1. EU ETS imsaħħa    

2.2. Regoli dwar ir-rilokazzjoni tal-emissjonijiet tal-karbonju mmirati aħjar    

2.3 Il-finanzjament għall-innovazzjoni bl-użu baxx tal-karbonju u l-immodernizzar tas-settur tal-enerġija    

3.1 Kopertura ta’ attivitajiet, ta’ installazzjonijiet u ta’ operaturi tal-inġenji tal-ajru    

3.2 Ir-Reġistru tal-Unjoni u r-Reġistru tat-Tranżazzjonijiet tal-Unjoni Ewropea (EUTL)    

4. IL-FUNZJONAMENT TAS-SUQ TAL-KARBONJU FL-2017    

4.1. Provvista: kwoti mqiegħda fiċ-ċirkolazzjoni    

4.1.1. Limitu massimu    

4.1.2. Kwoti maħruġa    

4.1.3. Krediti internazzjonali    

4.2. Domanda: kwoti meħuda barra miċ-ċirkolazzjoni    

4.3. Ibbilanċjar tal-provvista u tad-domanda    

5. AVJAZZJONI    

6. SORVELJANZA TAS-SUQ    

6.1. In-natura legali u t-trattament fiskali tal-kwoti tal-emissjonijiet    

7. MONITORAĠĠ, RAPPORTAR U VERIFIKA TAL-EMISSJONIJIET    

8. ĦARSA ĠENERALI LEJN L-ARRANĠAMENTI AMMINISTRATTIVI    

9. KONFORMITÀ U INFURZAR    

10. KONKLUŻJONIJIET U ASPETTATTIVI    

ANNESS    

Lista ta’ akronimi u abbrevjazzjonijiet

AVR        Regolament dwar l-Akkreditazzjoni u l-Verifika

AK        Awtorità Kompetenti

CCS        Ġbir u Ħżin tal-Karbonju

CCU        Ġbir u Użu tal-Karbonju

CDM        Mekkaniżmu għal Żvilupp Nadif

CERs        Tnaqqis Iċċertifikat ta’ Emissjonijiet

CSCF        Fattur ta' Korrezzjoni Trasversali

EA        Kooperazzjoni Ewropea għall-Akkreditazzjoni

ŻEE        Żona Ekonomika Ewropea

EEX        European Energy Exchange

BEI        Bank Ewropew tal-Investiment

ERUs        Unitajiet ta’ Tnaqqis tal-Emissjonijiet

EU ETS    Skema tal-Unjoni Ewropea għan-Negozjar ta’ Emissjonijiet

EUTL        Reġistru tat-Tranżazzjonijiet tal-Unjoni Ewropea

GHG        Gass serra

ICAO        Organizzazzjoni tal-Avjazzjoni Ċivili Internazzjonali

ICE        ICE Future Europe

JI        Implimentazzjoni Konġunta

MAR        Regolament dwar l-Abbuż tas-Suq

MiFID2    Direttiva dwar is-Swieq tal-Istrumenti Finanzjarji

MRR        Regolament dwar il-Monitoraġġ u r-Rapportar

MRVA    Monitoraġġ, Rapportar, Verifika u Akkreditazzjoni

MSR        Riżerva tal-Istabbiltà tas-Suq

NAB        Korp Nazzjonali ta’ Akkreditament

NER        Riżerva għal Min Jidħol Ġdid

PFCs        Perfluworokarburi

RES        Sorsi ta' Enerġija Rinnovabbli

TNAC        L-Għadd Totali ta’ Kwoti fiċ-Ċirkolazzjoni

SOMMARJU

1. INTRODUZZJONI

Mill-2005 ’l hawn, l-Iskema tal-UE għan-Negozjar ta’ Emissjonijiet (EU ETS) kienet ċentrali għall-istrateġija tal-UE għat-tnaqqis tal-emissjonijiet ta’ gassijiet serra (GHG) mill-industrija u mis-settur tal-enerġija. Din tikkontribwixxi b’mod sinifikanti għall-ilħuq tal-mira tal-UE li sal-2020 l-emissjonijiet GHG jitnaqqsu b’20 % mil-livelli tal-1990. Filwaqt li l-UE tinsab fit-triq it-tajba biex tisboq din il-mira 1 , it-tnaqqis tal-emissjonijiet GHG b’mill-inqas 40 % sal-2030 – bħala parti mill-qafas ta’ politika għall-klima u l-enerġija għall-2030 tal-UE – jirrikjedi progress kontinwu 2 . EU ETS li tiffunzjona tajjeb tikkostitwixxi l-mekkaniżmu ewlieni biex tintlaħaq il-mira tal-UE għall-2030, billi jiġi ffaċilitat tnaqqis ta’ 43 % tal-emissjonijiet GHG meta mqabbel mal-livelli tal-2005 fis-setturi koperti mis-sistema.

Sabiex tippermetti lill-EU ETS tissodisfa dan l-għan, fl-2015, il-Kummissjoni addottat proposta 3 biex tirrevedi l-EU ETS għar-raba’ perjodu ta’ negozjar tagħha (2021- 2030). Wara negozjati estensivi, il-Parlament Ewropew u l-Kunsill formalment appoġġjaw ir-rieżami fi Frar 2018, u d-Direttiva riveduta dwar l-EU ETS 4 daħlet fis-seħħ fit-8 ta’ April 2018.

Fl-2017, id-Direttiva dwar l-EU ETS ġiet rieżaminata ulterjorment 5 biex takkomoda l-iżvilupp ta’ miżura globali għat-tnaqqis tal-emissjonijiet tal-avjazzjoni mill-Organizzazzjoni tal-Avjazzjoni Ċivili Internazzjonali (ICAO), permezz taż-żamma ta' kopertura tas-sistemi li hija limitata għal titjiriet fi ħdan iż-Żona Ekonomika Ewropea (ŻEE). L-2017 immarkat ukoll l-iffirmar ta’ ftehim 6 bejn l-UE u l-Iżvizzera dwar il-kollegament tal-iskema tan-negozjar ta’ emissjonijiet tal-gassijiet serra Żvizzera ma' dik tal-EU ETS - l-ewwel ftehim ta' dan it-tip għall-UE.

Dan ir-Rapport dwar il-funzjonament tas-suq Ewropew tal-karbonju huwa ppreżentat f’konformità mar-rekwiżiti tal-Artikoli 10(5) u 21(2) tad-Direttiva 2003/87/KE 7 (id-Direttiva tal-EU ETS). Kif stipulat permezz tad-Direttiva, l-għan tar-rapport huwa li jipprovdi aġġornamenti regolari dwar l-iżviluppi fis-suq Ewropew tal-karbonju fuq bażi annwali.

Ir-rapport ikopri s-sena 2017, iżda jippreżenta wkoll inizjattivi proposti jew miftiehma fl-ewwel nofs tas-sena 2018. Meta mqabbel mar-rapport tas-sena l-oħra 8 , dan ir-rapport fih kapitolu ġdid dwar il-qafas tal-EU ETS fil-Fażi 4 u appendiċi ġdid dwar il-progress fl-implimentazzjoni, kif ukoll informazzjoni dwar l-indikatur tal-eċċess tar-Riżerva tal-Istabbiltà tas-Suq (MSR) tal-2018 u l-kontribuzzjonijiet tal-Istati Membri lill-MSR fl-2019. Wara r-rekwiżiti mtejba tat-trasparenza u r-rapportar tad-Direttiva riveduta dwar l-EU ETS, ir-rapport ta’ din is-sena għall-ewwel darba jipprovdi ħarsa ġenerali lejn l-ammonti attwali tal-għajnuna mill-Istat minfuqa mill-Istati Membri fuq kumpens għall-ispiża tal-karbonju indiretta fl-2017.

Sakemm ma jkunx indikat mod ieħor, id-data użata għal dan ir-rapport kienet dik disponibbli pubblikament u għad-dispożizzjoni tal-Kummissjoni sa Ġunju 2018 9 . Informazzjoni ġenerali u deskrittiva dwar l-EU ETS hija inkluża fil-kaxex matul ir-rapport kollu.

2.IL-QAFAS TAL-EU ETS FIL-FAŻI 4 (2021-2030)

Id-Direttiva riveduta dwar l-EU ETS għall-fażi 4 għandha l-għan li tiffaċilita l-ilħuq tal-għan triplu li tnaqqas l-emissjonijiet ta’ GHG b’ 43 % għas-setturi tal-EU ETS sal-2030, li tissalvagwardja l-kompetittività industrijali u li tmexxi ’l quddiem il-modernizzazzjoni u l-innovazzjoni b’emissjonijiet baxxi ta’ karbonju permezz ta’ serje ta’ miżuri interkonnessi.

Figura 1: Analiżi tal-limitu massimu tal-Fażi 4

2.1. EU ETS imsaħħa

Biex jiżdied il-pass tat-tnaqqis fl-emissjonijiet, in-numru globali ta’ kwoti ta’ emissjonijiet se jonqos b’rata annwali ta’ 2.2 % mill-2021 ’il quddiem, meta mqabbla mar rata ta' 1.74 % bħalissa. Din iż-żieda timplika tnaqqis kostanti ta’ madwar 48 miljun kwota kull sena, meta mqabblel ma’ 38 miljun bħalissa, u hija konsistenti ma’ tnaqqis ta’ 43 % tal-emissjonijiet tal-GHG mis-setturi koperti mill-ETS sal-2030, meta mqabbel mal-livelli tal-2005.

Barra minn hekk, ir-Riżerva tal-Istabbiltà tas-Suq (MSR), bħala mekkaniżmu stabbilit biex jitnaqqas l-iżbilanċ fis-suq tal-karbonju, se tkun imsaħħa b’mod sostanzjali. Bejn l-2019 u l-2023, ir-rata li biha l-kwoti se jitpoġġew fl-MSR se tiġi rduppjata għal 24 % sabiex jinkiseb bilanċ tal-kwoti ta’ emissjonijiet fis-suq tal-karbonju aktar malajr.

Biex itejjeb aktar il-funzjonament tal-EU ETS mill-2023 ’il quddiem, in-numru ta’ kwoti ta’ emissjonijiet miżmuma fl-MSR se jkun limitat għall-volum tal-irkant tas-sena ta’ qabel. Investimenti li jeċċedu dak l-ammont se jitilfu l-validità tagħhom, sakemm ma jiġix deċiż mod ieħor fl-ewwel rieżami tal-MSR fl-2021.

L-Istati Membri jistgħu b’mod volontarju jikkanċellaw kwoti mill-volum totali tal-irkant disponibbli għalihom fil-każ tal-għeluq tal-kapaċità tal-ġenerazzjoni tal-elettriku li tirriżulta minn miżuri nazzjonali addizzjonali. Jekk l-impjanti tal-enerġija jingħalqu mingħajr ma l-Istat Membru kkonċernat jagħżel li jikkanċella l-kwoti, ir-regoli tal-MSR se jaqbdu l-effett, billi jżidu l-forniment tar-riserva jew permezz ta’ ħarġiet sussegwenti ta’ kwoti mir-riserva.

Aktar informazzjoni dwar l-implimentazzjoni tad-dispożizzjonijiet tal-MSR riveduti hija disponibbli fil-kapitolu 4.3 (Ibbilanċjar tad-domanda u l-provvista).

2.2. Regoli dwar ir-rilokazzjoni tal-emissjonijiet tal-karbonju mmirati aħjar

Il-qafas eżistenti ta’ allokazzjoni bla ħlas se jinżamm b’mod wiesa’ fil-Fażi 4 biex tiġi żgurata l-prevedibbiltà u t-trasparenza għall-industrija Ewropea, biex jindirizza t-tħassib dwar il-kompetittività tal-industrija f’dinja globalizzata. L-allokazzjoni bla ħlas tibqa’ prevedibbli u trasparenti, ibbażata fuq valuri referenzjarji derivati b’referenza għall-prestazzjoni tal-installazzjonijiet li jiffurmaw l-10 % tal-aktar installazzjonijiet effiċjenti fl-UE. Madankollu, ġie introdott għadd ta’ titjib prattiku bbażat fuq l-esperjenza ta’ implimentazzjoni mill-perjodu kurrenti ta’ negozjar. 

Fil-Fażi 4, l-allokazzjoni bla ħlas se tkun iffukata fuq is-setturi bl-ogħla riskju li jirrilokaw il-produzzjoni tagħhom barra l-UE. Il-livell ta’ esponiment għar-rilaxx tal-karbonju tas-setturi se jiġi vvalutat fuq il-bażi ta’ indikatur li jirrifletti l-intensità tal-kummerċ u tal-emissjonijiet. Setturi esposti ħafna se jitqiegħdu fuq lista tar-rilaxx tal-karbonju u se jirċievu kwoti ekwivalenti għal 100 % tal-punt ta’ referenza rilevanti b’xejn. Għal setturi inqas esposti, l-allokazzjoni bla ħlas se tammonta għal 30 % sal-2026 u se tiġi eliminata gradwalment minn hemm ’il quddiem sal-2030. Il-Kummissjoni bħalissa tinsab fil-proċess li tistabbilixxi l-lista tar-rilaxx tal-karbonju għall-perjodu ta’ negozjar li jmiss (ara l-Appendiċi 6 tal-Anness) li se tkun valida għall-Fażi 4 kollha.

Sabiex jiġu evitati l-profitti mhux mistennija u jkun rifless il-progress tat-teknoloġija u l-innovazzjoni mill-2008, il-54 valur referenzjarju li jiddeterminaw il-livell ta’ allokazzjoni bla ħlas għal kull installazzjoni se jiġu aġġornati darbtejn fil-Fażi 4 abbażi ta’ data reali. Se tiġi stabbilita rata ta’ tnaqqis annwali għal kull punt ta’ referenza. Din se tvarja bejn rata annwali minima ta’ 0,2 % għas-setturi b’inqas firxa ta’ innovazzjoni u rata massima annwali ta’ 1,6 % għas-setturi b’ firxa ogħla ta’ innovazzjoni. Filwaqt li r-rata minima se tiżgura kontribut minn setturi li għandhom metodi tat-tnaqqis tal-emissjonijiet aktar bil-mod, dik massima se tipprovdi inċentiv għal setturi innovattivi biex inaqqsu l-emissjonijiet aktar malajr. Ix-xogħol fuq l-att delegat dwar ir-rieżami tar-regoli dwar l-allokazzjoni bla ħlas għall-2021-2030 għadu għaddej, filwaqt li x-xogħol fuq l-aġġornament tal-valuri referenzjarji għal allokazzjoni bla ħlas għall-2021-2025 huwa mistenni li jibda tard fl-2019 (ara l-Appendiċi 6 tal-Anness).

Barra minn hekk, l-allokazzjonijiet għal installazzjonijiet individwali jistgħu jiġu aġġustati kull sena biex jirriflettu żidiet u tnaqqis sinifikanti fil-produzzjoni. Il-limituħall-aġġustamenti huwa stabbilit għal 15 % u se jiġi vvalutat fuq il-bażi ta’ medja rikorrenti fuq perjodu ta’ sentejn. Sabiex tiġi evitata l-manipulazzjoni u l-abbuż tas-sistema ta’ aġġustament tal-allokazzjoni, il-Kummissjoni tista’ tadotta atti ta' implimentazzjoni biex tiddefinixxi arranġamenti ulterjuri għall-aġġustamenti. Ix-xogħol fuq l-att ta’ implimentazzjoni huwa mistenni li jibda tard fl-2018 (ara l-Appendiċi 6 tal-Anness).

Sabiex tiġi evitata l-applikazzjoni tal-fattur ta’ korrezzjoni trasversali (CSCF) fil-perjodu ta’ negozjar li jmiss, ġiet introdotta salvagwardja ewlenija ġdida fil-forma ta’ “bafer għall-allokazzjoni bla ħlas”. Jekk ikun meħtieġ li jiġi applikat fattur ta’ korrezzjoni, il-bafer se jintuża billi jitnaqqas is-sehem tal-kwoti li għandhom jiġu rkantati fil-Fażi 4 sa 3 % tal-kwantità totali tal-kwoti, biex b’hekk jiżdied l-ammont disponibbli għall-allokazzjoni bla ħlas. Jekk il-kwoti mwarrba għall-bafer ta’ allokazzjoni bla ħlas jibqgħu ma jintużawx, dawn se jkunu disponibbli biex jiżdiedu mal-Fondi ta’ Innovazzjoni u Modernizzazzjoni li għadhom kif ġew stabbiliti (ara s-sezzjoni 2.3).

Il-possibbiltà għall-Istati Membri li jipprovdu għajnuna mill-istat lil setturi esposti għal rilokazzjoni tal-emissjonijiet tal-karbonju minħabba l-ispiża tal-karbonju indiretta sinifikanti (jiġifieri spejjeż li jirriżultaw minn żieda fil-prezzijiet tal-elettriku) se jitkomplew fir-Fażi 4 (ara s-sezzjoni 4.1.2.1.2). Barra minn hekk, se tkun akkumpanjata minn dispożizzjonijiet imtejba ta’ trasparenza u ta' rapportar. L-Istati Membri għandhom ifittxu li jużaw mhux aktar minn 25 % tad-dħul mill-irkant għal dan il-għan, u jekk jaqbżu dan l-ammont huma jkollhom jipprovdu ġustifikazzjonijiet għal dan f’rapport għal raġunijiet ta’ trasparenza. Huma għandhom ukoll jippubblikaw regolarment l-ammont tal-kumpens imħallas lill-benefiċjarji, kemm għal kull settur kif ukoll bħala total. Fid-dawl tad-dispożizzjonijiet il-ġodda, il-Kummissjoni bdiet rieżami tal-Linji Gwida tal-Għajnuna mill-Istat tal-EU ETS 10 għall-perjodu ta’ negozjar li jmiss (ara l-Appendiċi 6 tal-Anness).

2.3 Il-finanzjament għall-innovazzjoni bl-użu baxx tal-karbonju u l-immodernizzar tas-settur tal-enerġija

Diversi mekkaniżmi ta’ finanzjament għall-użu baxx tal-karbonju se jgħinu lis-setturi industrijali u lis-settur tal-enerġija jissodisfaw l-isfidi tal-innovazzjoni u l-investiment tat-tranżizzjoni lejn ekonomija li tuża livell baxx ta’ karbonju fil-Fażi 4. Dawn jinkludu żewġ fondi ġodda:

·Il-Fond ta’ Innovazzjoni se jappoġġja, fuq bażi kompetittiva, id-dimostrazzjoni ta’ teknoloġiji innovattivi u innovazzjoni rivoluzzjonarja f’setturi koperti mill-EU ETS, inklużi sorsi rinnovabbli innovattivi, ġbir u użu tal-karbonju (CCU) u ħażna tal-enerġija. Ir-riżorsi disponibbli se jikkorrispondu għall-valur tas-suq ta’ mill-inqas 450 miljun kwota fil-ħin tal-irkant tagħhom. Dawn se jkunu ssupplimentati bi kwalunkwe baġit mhux imqassam mill-Programm NER 300, u sa 50 miljun kwota li jistgħu jkunu disponibbli għall-fond jekk mhux meħtieġ għall-bafer ta’ allokazzjoni bla ħlas kif spjegat qabel. Proġetti fl-Istati Membri kollha, inklużi proġetti fuq skala żgħira, se jkunu eliġibbli għal appoġġ mill-Fond ta’ Innovazzjoni. Ix-xogħol fuq l-istabbiliment tal-Fond ta’ Innovazzjoni beda b’konsultazzjoni pubblika fil-bidu tal-2018 11 (ara l-Appendiċi 6 tal-Anness).

·Il-Fond ta’ Modernizzazzjoni se jappoġġa investimenti fl-immodernizzar tas-settur tal-enerġija u ta’ sistemi ta’ enerġija usa’, u se jsaħħaħ l-effiċjenza tal-enerġija u l-enerġija rinnovabbli, u jiffaċilita transizzjoni ġusta fir-reġjuni dipendenti fuq il-karbonju fl-10 Stati Membri bl-inqas dħul 12 . Il-faċilitajiet tal-ġenerazzjoni tal-enerġija li jużaw fjuwils fossili solidi mhumiex se jkunu eliġibbli għall-appoġġ 13 . Il-fond se jkun ipprovdut bi kwoti li jikkorrispondu għal 2 % tal-kwantità totali fil-Fażi 4, irkantati skont ir-regoli u l-modalitajiet stabbiliti għall-irkanti li jsiru fuq il-pjattaforma komuni tal-irkant. Skont il-punt sa fejn is-sehem tal-irkant jitnaqqas għall-iskopijiet tal-bafer għall-allokazzjoni bla ħlas, l-ammont ta’ kwoti disponibbli għall-fond jista’ jiżdied sa 0.5 % tal-kwantità totali tal-kwoti. Ix-xogħol fuq l-istabbiliment tal-Fond ta’ Modernizzazzjoni beda permezz ta’ workshops preparatorji fi Stati Membri benefiċjarji li bdew f’Settembru 2018 (ara l-Appendiċi 6 tal-Anness).

Minbarra ż-żewġ fondi l-ġodda, l-allokazzjoni tranżizzjonali bla ħlas fakultattiva skont l-Artikolu 10c tad-Direttiva tal-EU ETS se tibqa’ disponibbli għall-immodernizzar tas-setturi tal-enerġija fl-istess Stati Membri bi dħul baxx, eliġibbli għall-Fond ta’ Modernizzazzjoni. It-trasparenza tal-proċeduri tal-allokazzjoni tar-riżorsi ġiet imtejba ħafna. Proġetti b’valur ta’ aktar minn EUR 12.5 miljun se jintgħażlu permezz ta’ offerti kompetittivi, filwaqt li investimenti taħt dak il-valur se jkollhom jintgħażlu abbażi ta’ kriterji ċari u trasparenti, bir-riżultati tal-għażla jkunu soġġetti għal konsultazzjoni pubblika (sakemm proġetti bħal dawn ma jintgħażlux ukoll permezz ta’ offerti kompetittivi). Id-Direttiva riveduta dwar l-EU ETS tipprovdi li l-kwoti tal-Artikolu 10c mhux allokati mit-tielet perjodu ta’ negozjar (2013-2020) jistgħu jiġu allokati fl-2021-2030 għal investimenti magħżula permezz ta’ offerti kompetittivi bħal dawn, sakemm l-Istat Membru kkonċernat ma jiddeċidix li ma jagħmilx dan kompletament jew parzjalment u jinforma lill-Kummissjoni b’dan sat-30 ta’ Settembru 2019. Barra minn hekk, skont id-dispożizzjonijiet il-ġodda, l-Istati Membri eliġibbli jistgħu jużaw l-allokazzjoni kollha tagħhom tal-Artikolu 10c kollha jew parti minnha biex jappoġġjaw investimenti fil-qafas tal-Fond għall-Modernizzazzjoni, sakemm jinnotifikaw l-ammonti rispettivi lill-Kummissjoni sat-30 ta’ Settembru 2019.

3. L-INFRASTRUTTURA TAL-EU ETS

3.1 Kopertura ta’ attivitajiet, ta’ installazzjonijiet u ta’ operaturi tal-inġenji tal-ajru    

Skont ir-rapporti tal-Artikolu 21 ippreżentati mill-pajjiżi parteċipanti 14 fl-2018, fl-2017 kien hemm total ta’ 10 688 installazzjoni permessa meta mqabbla ma’ madwar 10 790 fl-2016 u madwar 10 950 fl-2015.

Kif kien il-każ fis-snin preċedenti, il-karburanti maħruqa fl-EU ETS fl-2017, kienu għadhom fil-maġġor parti karburanti fossili. Madankollu, 28 pajjiż irrapportaw ukoll użu tal-bijomassa (meta mqabbla ma’ 29 is-sena l-oħra) b’rabta mal-2 181 installazzjoni (20.4 % tal-installazzjonijiet kollha). Dan jipparaguna ma’ 2079 installazzjoni li jiffurmaw id-19 % tal-installazzjonijiet kollha tas-sena l-oħra. Tliet pajjiżi (LI, LV u MT) ma rrapportaw l-ebda użu ta' bijomassa 15 . Fl-2017, l-emissjonijiet mill-bijomassa ammontaw għal madwar 145 miljun tunnellata ta’ CO2 (8 % tal-emissjonijiet irrapportati tal-ETS), żieda żgħira biss meta mqabbla ma’ madwar 141 miljun tunnellata ta’ CO2 fl-2016 (u wkoll madwar 8 % tal-emissjonijiet irrapportati tal-ETS). Għall-2017, l-Iżvezja biss irrapurtat użu ta’ bijokarburant għal żewġ operaturi tal-inġenji tal-ajru (għall-2016 u għall-2015, kemm il-Ġermanja kif ukoll l-Iżvezja rrappurtaw dan l-użu għal tliet u erba’ operaturi tal-inġenji tal-ajru rispettivament).

Fi ħdan il-kategoriji ta’ installazzjoni bbażati fuq l-emissjonijiet annwali 16 , id-data għall-2017 turi li, bħal fis-snin preċedenti, madwar 72 % tal-installazzjonijiet huma tal-kategorija A, kważi 21 % huma tal-kategorija B u kemxejn aktar minn 7 % huma tal-kategorija C. 6 110 installazzjoni ġew irrapportati bħala ‘installazzjonijiet b’livelli baxxi ta’ emissjonijiet’ (57 % tat-total).

L-installazzjonijiet tal-EU ETS li jinvolvu l-attivitajiet ta’ kombustjoni jistgħu jinstabu fil-pajjiżi parteċipanti kollha, filwaqt li r-raffinar taż-żejt, il-produzzjoni tal-azzar, is-siment, il-ġir, il-ħġieġ, iċ-ċeramika, il-produzzjoni tal-polpa u tal-karta jistgħu jinstabu fil-maġġor parti tagħhom. Rigward l-attivitajiet tal-EU ETS elenkati b’mod addizzjonali għal emissjonijiet mhux tas-CO2, hemm rapporti ta’ permessi maħruġa fi 12-il pajjiż għall-aluminju primarju u għall-perfluworokarburi (PFCs) (DE, FR, EL, IS, IT, NL, NO, RO, SE, SI, SK, UK), filwaqt li għall-produzzjoni ta’ aċidu nitriku u N2O hemm rapporti ta’ permessi maħruġa f’20 pajjiż (il-pajjiżi kollha għajr CY, DK, EE, ES, IE, IS, LI, LU, LV, MT, u SI). Is-setturi l-oħrajn tal-N2O – il-produzzjoni ta’ aċidu adipiku u l-produzzjoni ta’ aċidu gliossali u gliossiliku huma rrapportati fi tliet pajjiżi (DE, FR, IT) u f’żewġ pajjiżi (DE, FR), rispettivament. In-Norveġja biss iddikjarat attivitajiet għall-qbid u għall-ħażna tas-CO2.

Seba’ pajjiżi ( ES, FR, HR, IS, IT, SI, UK) użaw il-possibbiltà li jeskludu emittenti żgħar mill-EU ETS f’konformità mal-Artikolu 27 tad-Direttiva tal-EU ETS ). Emissjonijiet esklużi għall-2017 ammontaw għal 2.85 miljun tunnellata ta’ CO2 (madwar 0.16 % tal-emissjonijiet totali vverifikati).

Skont is-sottomissjonijiet tal-Artikolu 21 fl-2018, s’issa tmien pajjiżi (BE, DK, FR, HR, HU, LI, LT, NL) ħadu vantaġġ mid-dispożizzjoni offruta mill-Artikolu 13 tar-Regolament dwar il-Monitoraġġ u r-Rapportar (MRR) 17 li jawtorizzaw l-użu ta’ pjanijiet ta’ monitoraġġ issimplifikati f’każijiet ta’ riskju baxx għal installazzjonijiet stazzjonarji. In-Netherlands biss issieħeb mill-2016. Fil-każ tal-operaturi ta’ inġenji tal-ajru b’emissjonijiet baxxi, tliet pajjiżi rrapportaw użu ta’ din id-dispożizzjoni għall-2017 (BE, IS u PL).

Fl-2017, 541 operatur ta’ inġenji tal-ajru ġew irrapportati li għandhom pjan ta’ monitoraġġ (meta mqabbla mal-503 għall-2016, u 524 irrapportati għall-2015). 58 % (316) tal-operaturi rrapportati kienu kummerċjali filwaqt li t-42 % l-oħra (225) ma kinux kummerċjali 18 . Total ta’ 280 (kważi 52 %) ikkwalifikaw bħala emittenti żgħar (meta mqabbla ma’ 249 (50 %) fl-2016 u ma’ 274 (52 %) fl-2015).

3.2 Ir-Reġistru tal-Unjoni u r-Reġistru tat-Tranżazzjonijiet tal-Unjoni Ewropea (EUTL)

Ir-Reġistru tal-Unjoni u l-EUTL kienu kompletament operattivi għal 365 ġurnata erbgħa u għoxrin siegħa kuljum matul l-2017, b’interruzzjonijiet żgħar biss li jammontaw għal total ta’ madwar 17-il siegħa minħabba titjib tekniku.

Fl-2017, il-Kummissjoni bdiet tersaq lejn pjattaforma ta’ hosting aktar moderna u sigura kemm għar-Reġistru tal-Unjoni kif ukoll għall-EUTL. Il-bidla ġiet iffinalizzata f'Ġunju 2018. Barra minn hekk, il-Kummissjoni, bi qbil mal-Istati Membri, bdiet timplimenta diversi bidliet immirati biex itejbu l-effiċjenza tal-ħidma mar-Reġistru tal-Unjoni.

Fi Frar 2018, ir-Regolament dwar ir-Reġistru EU ETS 19 ġie emendat biex jimplimenta miżuri ta’ salvagwardja biex jipproteġi l-integrità ambjentali tal-EU ETS f’każijiet fejn il-liġi tal-UE tieqaf milli tapplika għal Stat Membru li jirtira mill-UE.

4. IL-FUNZJONAMENT TAS-SUQ TAL-KARBONJU FL-2017

Dan il-kapitolu jipprovdi informazzjoni dwar aspetti relatati mal-provvista u d-domanda tal-kwoti tal-EU ETS. It-taqsima tan-naħa tal-provvista tinkludi informazzjoni dwar il-limitu massimu, l-allokazzjoni bla ħlas, il-programm NER300, l-irkantar, id-deroga mill-irkantar sħiħ għas-settur tal-enerġija (l-Artikolu 10c), l-użu ta’ krediti internazzjonali, kif ukoll kapitolu dwar skemi ta’ kumpens għall-ispiża tal-karbonju indiretta.

Min-naħa tad-domanda, hija pprovduta informazzjoni dwar in-numru ta’ emissjonijiet ivverifikati u dwar il-metodi biex jiġu bbilanċjati l-provvista u d-domanda tal-kwoti, bħar-Riżerva tal-Istabbiltà tas-Suq (MSR).

4.1. Provvista: kwoti mqiegħda fiċ-ċirkolazzjoni

4.1.1. Limitu massimu

It-Tabella 1 turi ċ-ċifri għal-limitu massimu għall-installazzjonijiet stazzjonarji u n-numru ta’ kwoti tal-avjazzjoni mqiegħda kull sena fiċ-ċirkolazzjoni 20 għal kull sena matul il-Fażi 3 tal-EU ETS.

Tabella 1: Limitu massimu tal-EU ETS 2013-2020

4.1.2. Kwoti maħruġa

4.1.2.1.Allokazzjoni bla ħlas

Matul il-Fażi 3, madwar 43 % tal-kwantità totali tal-kwoti disponibbli se jiġu allokati bla ħlas lill-industrija u lill-installazzjonijiet li jiġġeneraw l-elettriku, filwaqt li s-sehem ta’ kwoti li għandhom jiġu rkantati mill-Istati Membri jammonta għal 57 %.

Ir-Riżerva għal Min Jidħol Ġdid (NER) inizjali, wara li tnaqqsu 300 miljun kwota għall-programm NER300, kellha 480.2 miljun kwota. Sa Ġunju 2018, 153.1 miljun kwota ġew riżervati għal 780 installazzjoni għall-Fażi 3 kollha. L-NER li tifdal, li tammonta għal 327.1 miljun kwota, tista’ tiġi distribwita fil-futur. Madankollu, huwa mistenni li numru sinifikanti ta’ dawn il-kwoti se jibqa’ mhux allokat.

Sa Ġunju 2018, l-allokazzjoni bla ħlas tnaqqset b’madwar 376 miljun kwota ta’ emissjoni minħabba installazzjonijiet li għalqu jew naqqsu l-produzzjoni jew il-kapaċità ta’ produzzjoni tagħhom meta mqabbla ma’ dik inizjalment użata għall-kalkolu tal-allokazzjoni tal-fażi 3.

Tabella 2: In-numru ta’ kwoti (f’miljuni) allokati għall-industrija bla ħlas mill-2013 sal-2018 23

Peress li d-domanda għal allokazzjoni bla ħlas qabżet l-ammont disponibbli, l-allokazzjoni għall-installazzjonijiet kollha skont l-EU ETS tnaqqset bl-istess perċentwal bl-applikazzjoni ta’ “fattur ta' korrezzjoni trasversali (CSCF)” 25 . F’Jannar 2017, il-Kummissjoni rrevediet 26 il-valuri CSCF oriġinali wara sentenza 27 tal-Qorti tal-Ġustizzja.

4.1.2.1.1. Il-programm NER 300

Bħala riżultat taż-żewġ sejħiet għal proposti, b’kollox ingħataw 38 proġett RES u proġett wieħed CCS, f’20 Stat Membru tal-UE u li jammontaw għal EUR 2.1 biljun. Minn dawn, sitta (6) huma operattivi: il-proġetti BEST relatati mal-bijoenerġija fl-Italja u Verbiostraw fil-Ġermanja, il-proġetti tal-enerġija mir-riħ fuq l-art f’Windpark Blaiken fl-Isvezja u f’Windpark Handalm fl-Awstrija, u l-proġetti tal-enerġija mir-riħ barra mill-kosta f’Veja Mate u f’Nordsee One fil-Ġermanja.

S’issa, b’kollox hemm 13-il proġett li laħaq id-deċiżjoni finali ta’ investiment, filwaqt li 14-il proġett ġie kkanċellat. 11-il proġett huma taħt diversi stadji ta’ tħejjija. Id-Deċiżjoni dwar NER 300 ġiet emendata fl-20 ta’ Novembru 2017 28 biex tippermetti investiment mill-ġdid tal-fondi rilaxxati mill-proġetti kanċellati tal-ewwel sejħa (EUR 487 miljun s’issa) fi strumenti finanzjarji eżistenti - il-Proġetti InnovFin Energy Demo u l-Istrument ta’ Dejn tal-Faċilità Nikkollegaw l-Ewropa, li t-tnejn huma mmexxija mill-Bank Ewropew tal-Investiment.

Il-fondi rilaxxati mill-proġetti kkanċellati tat-tieni sejħa (EUR 515 miljun s’issa) se jiżdiedu mar-riżorsi disponibbli għall-Fond ta’ Innovazzjoni (ara l-Kapitolu 2.3 u l-Appendiċi 6).

Tabella 3: Il-proġetti NER 300 li ntgħażlu fl-ewwel u fit-tieni sejħa għal proposti 29

4.1.2.1.2. Kumpens għall-ispiża tal-karbonju indiretta

Sal-lum, il-Kummissjoni approvat 12-il skema 30 ta’ kumpens għall-ispiża tal-karbonju indiretta fi 11-il Stat Membru. L-aħħar żidiet huma l-iskema ta' Walloon, li daħlet fis-seħħ fis-16.03.2018 u l-iskema Lussemburgiża, li rċeviet l-approvazzjoni għall-għajnuna mill-istat fis-6 ta’ Lulju 2018.

Kif stipulat fit-taqsima 2.2., rekwiżiti ġodda dwar it-trasparenza u r-rapportar daħlu fis-seħħ fl-2018 bħala parti mid-Direttiva riveduta tal-EU ETS. Bħala riżultat, fi żmien tliet xhur mit-tmiem ta’ kull sena, l-Istati Membri li jkollhom tali miżuri finanzjarji fis-seħħ għandhom jagħmlu disponibbli lill-pubbliku, f'forma li tkun faċilment aċċessibbli, l-ammont totali kif ukoll it-tqassim tal-kumpens ipprovdut għal kull settur u subsettur benefiċjarju.

Sommarju tad-data ppubblikata mill-Istati Membri dwar il-kumpens imħallas fl-2017 huwa ppreżentat fit-Tabella 4.

Tabella 4: Kumpens għall-ispiża tal-karbonju indiretta imħallas mill-Istati Membri fl-2017

Il-kumpens tal-ispejjeż indiretti flimkien imħallsa mill-10 Stati Membri fl-2017 ammonta għal madwar EUR 694-il miljun. L-Istati Membri li għandhom skemi ta’ kumpens fis-seħħ huma responsabbli għal madwar 70 % tal-PDG tal-UE. L-akbar riċevituri ta’ kumpens kienu, rispettivament, is-settur tal-kimika, is-settur tal-metalli mhux tal-ħadid u s-settur tal-ħadid u l-azzar.

Waħda mid-dispożizzjonijiet ta’ trasparenza fid-Direttiva dwar l-EU ETS riveduta tistabbilixxi li l-Istati Membri li nefqu aktar minn 25 % tad-dħul mill-irkant tagħhom fuq il-kumpens tal-ispejjeż indiretti fi kwalunkwe sena għandhom jippubblikaw rapport li jistabbilixxi r-raġunijiet għaliex dan l-ammont inqabeż. Għalhekk l-Istati Membri kkonċernati qabblu l-ħlasijiet tal-ispejjeż indiretti tagħhom fl-2017 mad-dħul mill-irkant fis-sena kalendarja 2016. 42 Fl-2017, il-Belġju (il-Fjandri), il-Finlandja, Franza, il-Ġermanja u n-Netherlands qabżu l-limitu ta’ 25 % u pproduċew rapport kif meħtieġ.

4.1.2.2. L-irkantar ta’ kwoti

Fl-2017, ir-Regolament dwar l-Irkantar ġie emendat biex jerġa’ japprova l-ICE Future Europe (ICE) bħala l-pjattaforma tal-irkant tar-Renju Unit mill-10 ta’ Novembru 2017. L-emenda kopriet ukoll id-dispożizzjonijiet meħtieġa minħabba l-implimentazzjoni li ġejja tar-Riżerva tal-Istabbiltà tas-Suq (MSR). Ir-Regolament dwar l-Irkantar bħalissa qed jiġi emendat ulterjorment biex l-EEX terġa’ tidħol fil-lista bħala pjattaforma tal-irkant tal-Ġermanja u biex jippermetti l-irkant tal-ewwel 50 miljun kwota għall-Fond ta’ Innovazzjoni meħuda mir-Riżerva tal-Istabbiltà tas-Suq fl-2020.

L-irkanti matul il-perjodu ta’ rapportar saru permezz tal-pjattaformi tal-irkant li ġejjin:

·European Energy Exchange AG (‘EEX’), li tirkanta bħala l-pjattaforma tal-irkant komuni għall-25 Stat Membru li ħadu sehem fi proċedura ta’ akkwist konġunt u għall-Polonja li ma ħaditx sehem fil-proċedura ta’ akkwist konġunta iżda li għadha ma għażlitx il-pjattaforma tal-irkant tagħha stess. Mill-5 ta’ Settembru 2016, l-EEX bdiet tmexxi l-irkanti bħala t-tieni pjattaforma tal-irkant komuni magħżula fit-13 ta’ Lulju 2016;

·L-EEX, f’irkant għall-Ġermanja bħala pjattaforma ta’ esklużjoni tal-irkant;

·L-ICE, f’irkant għar-Renju Unit bħala pjattaforma ta’ esklużjoni tal-irkant.

L-Iżlanda, il-Liechtenstein u n-Norveġja għadhom ma bdewx jirkantaw il-kwoti tagħhom. Għadha għaddejja l-ħidma biex tippermetti l-irkant ta’ dawn il-kwoti fuq il-pjattaforma komuni tal-irkant.

Fl-2017, l-EEX, f’irkant f’isem 27 Stat Membru rkantat 89 % mill-ammont totali rkantat, filwaqt li l-ICE rkantat 11 % mill-ammont totali f’isem ir-Renju Unit. Saru aktar minn 1270 irkant sat-30 ta’ Ġunju 2018.

It-Tabella 5 tipprovdi ħarsa ġenerali lejn il-volumi ta’ kwoti 43 rkantati minn EEX u minn ICE sat-30 ta’ Ġunju 2018, inklużi l-irkanti bikrija 44 tal-kwoti ġenerali.

Tabella 5: Volum totali tal-kwoti tal-Fażi 3 irkantati fl-2012-2018

L-irkanti ġeneralment twettqu mingħajr tfixkil u l-prezzijiet tal-bejgħ fl-irkant kienu ġeneralment konformi mal-prezzijiet tas-suq sekondarju.

Bejn Jannar 2017 u Ġunju 2018 erba’ irkanti ġew ikkanċellati jew minħabba li l-prezz tar-riżerva ma ntlaħaqx jew minħabba li l-volum tal-offerta totali naqas milli jilħaq dak tal-volum irkantat. B’dawn l-erbgħa, ġew ikkanċellati total ta’ disa’ rkanti minn aktar minn 1270 irkant li saru sa mill-aħħar tal-2012. Ħarsa ġenerali lejn il-prezzijiet tal-bejgħ fl-irkant, in-numru ta’ parteċipanti u l-proporzjon ta’ kopertura għall-irkanti ta’ kwoti ġenerali mill-2013 sat-30 ta’ Ġunju 2018 qed tingħata fl-Appendiċi 2. Il pjattaformi tal-irkant jippubblikaw ir-riżultati ddettaljati ta’ kull irkant f’siti web apposta u fi żmien xieraq. Aktar informazzjoni dwar il-prestazzjoni tal-irkanti, inkluż dwar il-parteċipazzjoni, il-proporzjon ta’ kopertura u l-prezzijiet, tista’ tinstab fir-rapporti tal-Istati Membri ppubblikati fuq is-sit web tal-Kummissjoni 45 .

Id-dħul totali ġġenerat mill-Istati Membri fl-irkanti li saru bejn l-2012 u t-30 ta’ Ġunju 2018 qabeż il-EUR 26 biljun (fl-2017 biss, id-dħul totali ġġenerat kien ta’ EUR 5.6 biljun). Id-Direttiva tal-EU ETS tipprovdi li tal-anqas 50 % tad-dħul mill-irkant, inkluż id-dħul kollu ġġenerat minn kwoti mqassma għall-finijiet tas-solidarjetà u tat-tkabbir, jenħtieġ li jintuża mill-Istati Membri għal finijiet relatati mal-klima u mal-enerġija. Skont l-informazzjoni ppreżentata lill-Kummissjoni, l-Istati Membri nefqu jew ippjanaw li jonfqu madwar 80 % ta’ dan id-dħul għal finijiet speċifiċi relatati mal-klima u mal-enerġija fl-2017 46 .

4.1.2.3. Deroga mill-irkantar sħiħ għas-settur tal-enerġija

In-numru ta’ kwoti allokati bla ħlas lill-ġeneraturi tal-elettriku fl-2017 huwa indikat fit-Tabella 1, Appendiċi 1 tal-Anness, filwaqt li n-numru massimu ta’ kwoti fis-sena huwa indikat fit-Tabella 2 tal-Appendiċi 1.

Il-valur totali tal-appoġġ tal-investiment irrapportat matul is-snin 2009 sal-2017 huwa ta’ madwar EUR 11.3 biljun. Madwar 80 % ta’ dan kien iddedikat għal titjib u modifikazzjoni fl-infrastruttura, filwaqt li l-bqija tal-investimenti kienu fit-teknoloġiji nodfa jew fid-diversifikazzjoni tal-provvista.

Il-kwoti mhux allokati jistgħu jew jiġu rkantati jew, skont id-dispożizzjonijiet tad-Direttiva tal-EU ETS riveduta, jistgħu jiġu allokati fl-2021-2030 għall-investimenti tal-Artikolu 10c magħżula permezz ta’ offerti kompetittivi (ara s-sezzjoni 2.3). Figura 2 turi n-numru ta’ kwoti li kienu allokati matul is-snin 2013-2017.

Figura 2: Kwoti allokati bla ħlas skont l-Artikolu 10c

Għall-kwoti tal-Artikolu 10c, il-figura 3 turi l-punt sa fejn dawn ġew allokati, miżjuda mal-irkanti, jew jibqgħu ma jintużawx (la allokati u lanqas miżjuda mal-irkanti). Pereżempju, 113-il miljun tal-kwoti li tnaqqsu mis-sehem tal-kwoti tal-Polonja għall-irkant bejn l-2013 u l-2017 għall-finijiet tal-Artikolu 10c, għadhom ma ġewx allokati jew miżjuda fl-irkanti.

Figura 3: Id-distribuzzjoni tal-kwoti (allokati, irkantati, li fadal mhux użati)

It-Tabella 6 turi n-numru ta’ kwoti tal-Artikolu 10c għas-snin sal-2017 li ġew irkantati fil-perjodu 2013-2017, kif ukoll in-numru ta’ kwoti li fadal mhux użati. L-aħħar kolonna tat-tabella tindika kemm kwoti s’issa jistgħu jiġu trasferiti u allokati fl-2021-2030 għal investimenti magħżula permezz ta’ proċessi ta’ offerti kompetittivi.

Tabella 6: Trattament tal-kwoti mhux użati tal-Artikolu 10c 2013-2017

4.1.3. Krediti internazzjonali

Għalkemm il-kwantità eżatta ta’ intitolamenti ta’ kreditu internazzjonali matul il-Fażijiet 2 u 3 (2008-2020) se tiddependi parzjalment fuq il-kwantità ta’ emissjonijiet ivverifikati futuri, l-analisti tas-suq jistmaw li din ser tammonta għal madwar 1.6 biljun kreditu. Mit-30 ta’ Ġunju 2018, l-għadd totali ta’ krediti internazzjonali użati jew skambjati jammonta għal 1.49 biljuni, jiġifieri aktar minn 90 % tal-istima għall-massimu awtorizzat.

Għal ħarsa ġenerali sħiħa tal-iskambju tal-krediti internazzjonali, ara l-Appendiċi 3 tal-Anness.

4.2. Domanda: kwoti meħuda barra miċ-ċirkolazzjoni

Fl-2017, ġie stmat li l-emissjonijiet mill-installazzjonijiet li qed jieħdu sehem fl-EU ETS huma stmati li żdiedu ftit b’0.18 % meta mqabbla mal-2016 abbażi tal-informazzjoni li kienet irreġistrata fir-Reġistru tal-Unjoni. Filwaqt li ż-żieda żgħira tinterferixxi mat-tendenza ta’ emissjonijiet dejjem qed jonqsu sa mill-bidu tal-Fażi 3 fl-2013, dan jista’ jiġi spjegat bi tkabbir fil-PDG reali ta’ 2.4 %, li huwa ogħla minn kwalunkwe sena mill-bidu tal-perjodu kurrenti ta’ negozjar.

Tabella 7: Emissjonijiet ivverifikati (f’miljun tunnellata ta’ ekwivalenti ta’ CO2 )

Data tal-PDG kif irrapportata fuq: http://epp.eurostat.ec.europa.eu/tgm/table.do?tab=table&init=1&plugin=1&language=en&pcode=tec00115  

(aċċessata f’Lulju 2018). L-emissjonijiet ivverifikati tal-avjazzjoni huma rrapportati b’mod separat fit-taqsima 5.

Kif turi t-tabella, iż-żieda fl-emissjonijiet kienet prinċipalment immexxija mill-industrija, filwaqt li l-emissjonijiet mis-settur tal-enerġija naqsu xi ftit.

In-numru ta’ kwoti kkanċellati fuq bażi volontarja jammonta għal 84 827 kwota fl-2017. B’kollox, ġew irreġistrati l-kanċellazzjonijiet volontarji ta’ 300 181 kwota sal-aħħar ta’ Ġunju 2018.

4.3. Ibbilanċjar tal-provvista u tad-domanda

Fil-bidu tal-Fażi 3 fl-2013, l-EU ETS kienet ikkaratterizzata minn żbilanċ strutturali kbir bejn il-provvista u d-domanda tal-kwoti, li jirriżulta f’madwar 2.1 biljun kwota. L-eċċess kien qed jonqos b’mod kostanti matul il-perjodu ta’ negozjar attwali, baqa’ stabbli fl-2014 u naqas b’mod sinifikanti għal 1.78 biljun kwota fl-2015, 1.69 biljun kwota fl-2016 u 1.65 biljun kwota fl-2017. Dan jammonta għal tnaqqis kumplessiv ta’ kważi nofs biljun fuq perjodu ta’ tliet snin. It-tnaqqis jirrifletti l-impatt tal-miżura ta’ posponiment lejn tmiem il-perjodu 49 applikata fl-2014 sal-2016, li ġiet kontrobilanċjata parzjalment minn tnaqqis fl-emissjonijiet fil-perjodu mill-2013 sal-2016.

Il-Figura 4 tippreżenta l-iżvilupp tal-bilanċ pożittiv fis-suq Ewropew tal-karbonju sal-aħħar tal-2017.

Figura 4: Żvilupp tal-bilanċ pożittiv fis-suq Ewropew tal-karbonju fl-2013-2017

Sabiex jiġi indirizzat l-iżbilanċ strutturali bejn il-provvista u d-domanda tal-kwoti, fl-2015 inħolqot ir-Riżerva tal-Istabbiltà tas-Suq (MSR) 50 sabiex tagħmel il-provvista ta’ rkant tal-kwoti tal-emissjonijiet aktar flessibbli. L-MSR se tibda topera f’Jannar 2019.

Ir-rapport dwar is-suq tal-karbonju jippermetti l-konsolidazzjoni taċ-ċifri għall-provvista u d-domanda li huma ppubblikati skont l-ordni kronoliġika tal-obbligi ta’ rapportar li jirriżultaw mid-Direttiva tal-EU ETS u d-dispożizzjonijiet ta’ implimentazzjoni tagħha. Din l-ordni kronoloġika, id-data rilevanti u l-ambitu huma deskritti fit-Tabella 2, fl-Appendiċi 4 tal-Anness. Il-Figura 5 turi l-kompożizzjoni tal-provvista u tad-domanda fl-2017. Id-data rilevanti ġiet ippubblikata wkoll bħala parti mill-komunikazzjoni dwar l-għadd totali ta’ kwoti fiċ-ċirkolazzjoni (TNAC) għall-finijiet tal-MSR 51 .

Figura 5: Kompożizzjoni tal-provvista u d-domanda kumulattivi sal-aħħar tal-2017

Provvista (kumulattiva, miljuni)     Domanda (kumulattiva, miljuni)

Bi preparazzjoni għall-MSR biex tibda topera fl-2019, minn nofs Mejju 2017 52 il-Kummissjoni ppubblikat regolarment it-TNAC għas-sena preċedenti. F’Mejju 2018, it-TNAC li jikkorrispondi għal 1 654 574 598 kwota, ġie ppubblikat għat-tieni darba 53 . Il-pubblikazzjoni tal-2018 għall-ewwel darba se twassal għal tqegħid ta’ kwoti fl-MSR, li se jnaqqas il-volum tal-irkant matul l-ewwel tmien xhur tal-2019.

Id-Direttiva riveduta dwar l-EU ETS tagħmel żewġ bidliet notevoli għall-funzjonament tal-MSR (ara wkoll it-taqsima 2.1). L-ewwel, il-perċentwal tat-TNAC li għandu jitqiegħed fir-riżerva mill-2019 sal-2023 huwa rduppjat minn 12 % għal 24 %. Dan iżid sostanzjalment il-pass fit-tnaqqis tal-eċċess. It-tieni, mill-2023, il-kwoti miżmuma fl-MSR li jaqbżu l-volum tal-irkant tas-sena preċedenti ma jibqgħux aktar validi.

Għalhekk, fuq il-bażi tat-TNAC tal-2018 u l-leġiżlazzjoni riveduta, il-volumi tal-irkant tal-2019 se jitnaqqsu b’madwar 265 miljun kwota matul l-ewwel 8 xhur tal-2019, li jikkorrispondu għal 16 % tal-eċċess. B’riżultat ta’ dan, fl-ewwel tmien xhur tal-2019 se jiġu rkantati madwar 40 % inqas ta’ kwoti milli fil-perjodu korrispondenti fl-2018. Abbażi tal-volum tal-irkant għall-2019, l-Appendiċi 7 jipprovdi informazzjoni dwar il-kontribuzzjonijiet minn Stat Membru lill-MSR minn Jannar sa Awwissu 2019.

5. AVJAZZJONI

Sakemm isseħħ l-adozzjoni tal-ICAO tal-istrumenti CORSIA rilevanti u d-deċiżjonijiet sussegwenti tal-UE dwar l-implimentazzjoni possibbli ta' CORSIA fl-UE, u biex tipprovdi ritmu kontinwu għall-proċess internazzjonali, fl-2017 l-UE ddeċidiet li testendi d-deroga attwali mill-obbligi tal-EU ETS għal titjiriet lejn u minn pajjiżi terzi sal-31 ta’ Diċembru 2023, soġġett għal rieżami. 54 B’hekk l-ambitu fi ħdan iż-ŻEE kurrenti jinżamm sal-2023. Wara dan, fin-nuqqas ta’ rieżami, dan imur lura għall-“ambitu sħiħ” oriġinali.

Barra minn hekk, id-Direttiva rieżaminata tal-EU ETS tipprevedi li l-Kummissjoni Ewropea jenħtieġ li tirrapporta lill-Parlament Ewropew u lill-Kunsill dwar il-modi kif CORSIA qed tiġi implimentata fil-liġi tal-UE permezz tar-rieżami tad-Direttiva. Din tipprovdi wkoll għall-applikazzjoni tal-fattur lineari ta’ tnaqqis ta’ 2.2 % għall-kwoti tal-avjazzjoni mill-2021.

Fl-2017, il-kwoti nħarġu skont l-ambitu fi ħdan iż-ŻEE. L-allokazzjoni bla ħlas ammontat għal kemxejn aktar minn 33.1 miljun kwota. Dan in-numru jinkludi l-allokazzjoni bla ħlas (ftit aktar minn 32.0 miljun kwota) u kważi 1.1 miljun kwota bla ħlas allokati mir-riżerva speċjali għal min jidħol ġdid u għall-operaturi li qed jikbru b’rata mgħaġġla. L-allokazzjonijiet minn din ir-riżerva huma rduppjati fl-2017-2020 peress li huma relatati mal-perjodu sħiħ tal-2013-2020.

Fir-rigward tal-iżviluppi fl-emissjonijiet tal-avjazzjoni, l-emissjonijiet ivverifikati baqgħu jiżdiedu u ammontaw għal 64.2 miljun tunnellata ta’ CO2 fl-2017, żieda ta’ 4.5 % meta mqabbla mal-2016.

Il-volum ta’ kwoti rkantati bejn Jannar u Diċembru 2017 kien ta’ madwar 4.7 miljun kwota.

It-Tabella 8 turi sommarju ta’ emissjonijiet ivverifikati, allokazzjoni bla ħlas, u volumi tal-irkant għas-settur tal-avjazzjoni sa mill-bidu tal-Fażi 3.

Tabella 8: Emissjonijiet ivverifikati u allokazzjoni għas-settur tal-avjazzjoni

Il-volumi ta’ kwoti tal-avjazzjoni rkantati matul il-perjodu 2013-2015 jirriflettu d-deċiżjoni tal-koleġiżlatur tal-2013 biex “jitwaqqaf l-arloġġ” 57 u biex l-obbligi tal-klima jiġu limitati biss għal titjiriet fi ħdan iż-ŻEE. Il-konformità għas-settur tal-avjazzjoni ġiet posposta għall-2012 u l-2013. Għalhekk, il-volumi tal-2012 ġew irkantati fl-2014, filwaqt li kien hemm konformità bejn Jannar u April tal-2015 għall-emissjonijiet tal-avjazzjoni mill-2013 u l-2014.

6. SORVELJANZA TAS-SUQ

IlMiFID2 u l-MAR, it-tnejn adottati fl-2014, jipprevedu ċerti adattamenti tar-reġim ġenerali għall-ispeċifiċitajiet tas-suq tal-karbonju (ara r-Rapport tal-2015 dwar is-Suq tal-Karbonju) 58 .

Diversi miżuri li jirregolaw aspetti ddettaljati tad-dispożizzjonijiet skont il-MiFID2 59 u l-MAR 60 ġew adottati fil-perjodu 2016 - 2018.

6.1. In-natura legali u t-trattament fiskali tal-kwoti tal-emissjonijiet

In-natura legali tal-kwoti madwar il-pajjiżi tvarja minn strumenti finanzjarji u assi intanġibbli għal drittijiet tal-proprjetà u għal komoditajiet. Skont is-sottomissjonijiet tal-Artikolu 21 fl-2018, mill-inqas ħames pajjiżi parteċipanti (DE, IE, IT, NO, SE) irrapportaw li implimentaw jew ipprevedew bidliet fil-leġiżlazzjoni nazzjonali, fil-biċċa l-kbira fir-rigward tal-implimentazzjoni tal-MiFID2 61 .

Fir-rigward tat-trattament fiskali tal-kwoti, tliet pajjiżi biss irrapportaw li t-taxxa fuq il-valur miżjud (VAT) tapplika għall-ħruġ ta’ kwoti tal-emissjonijiet. Għall-kuntrarju, il-VAT hija dovuta fuq it-tranżazzjoni ta’ kwoti tal-emissjonijiet fis-suq sekondarju f’ħafna mill-pajjiżi parteċipanti (kollha ħlief CY, EE, IS, LI).

Il-maġġoranza tal-pajjiżi rrapportaw li huma japplikaw il-mekkaniżmu tar-reverse charge fuq tranżazzjonijiet domestiċi li jinvolvu kwoti tal-emissjonijiet. Id-deroga tar-reverse charge tittrasferixxi r-responsabbiltà għall-ħlas tat-tranżazzjoni tal-VAT mill-bejjiegħ għax-xerrej ta’ oġġett jew servizz u tikkostitwixxi salvagwardja effettiva kontra l-frodi tal-VAT. F'Novembru 2018, il-Kunsill adotta emenda 62 għad-Direttiva 2006/112/KE (id-Direttiva tal-VAT) sabiex jestendi l-applikazzjoni tad-deroga lil hinn minn tmiem l-2018, sat-30 ta’ Ġunju 2022. L-Istati Membri huma mħeġġa jkomplu japplikaw il-mekkaniżmu tar-reverse charge sabiex jipprovdu protezzjoni adegwata kontinwa lis-suq tal-karbonju.

Il-kwoti tal-emissjonijiet għall-korporazzjonijiet jistgħu jiġu ntaxxati wkoll (pereżempju permezz tal-applikazzjoni ta’ taxxa korporattiva). Sittax-il pajjiż irrapportaw li ma kienx hemm taxxa bħal din.

7. MONITORAĠĠ, RAPPORTAR U VERIFIKA TAL-EMISSJONIJIET

7.1. Żviluppi Ġenerali

Il-Kummissjoni tkompli tħeġġeġ titjib fl-implimentazzjoni tal-pajjiżi tal-MRR u l-AVR, abbażi tal-gwida u l-mudelli pprovduti 63 .

L-esperjenza fl-implimentazzjoni ta’ dawn iż-żewġ regolamenti wriet il-ħtieġa għal aktar titjib, kjarifika u simplifikazzjoni tar-regoli MRVA għal promozzjoni ulterjuri tal-armonizzazzjoni, għal tnaqqis tal-piż amministrattiv għall-operaturi u għall-pajjiżi parteċipanti u għal titjib ulterjuri tal-effiċjenza tas-sistema.

Minn Frar 2017, il-pajjiżi parteċipanti ġew ikkonsultati bil-ħsieb li jiġu aġġornati dawn iż-żewġ Regolamenti sabiex issir tħejjija għall-fażi 4 tal-EU ETS, u biex jiġu mtejba u ssimplifikati l-proċessi tal-MRVA.

Huwa fatt li l-effiċjenza tas-sistema ta’ konformità tjiebet peress li l-MRR ippermetta li l-pajjiżi jagħmlu r-rapportar elettroniku obbligatorju. Fl-2018, 16-il pajjiż parteċipanti rrappurtaw l-użu ta’ mudelli elettroniċi jew formati ta’ fajls speċifiċi għal pjanijiet ta’ monitoraġġ, rapporti ta’ emissjonijiet, rapporti ta’ verifikazzjoni u / jew rapporti ta’ titjib ibbażati fuq ir-rekwiżiti minimi stabbiliti mill-Kummissjoni. Tnax-il pajjiż parteċipant jirrapportaw li jużaw xi forma ta’ sistema tal-IT awtomatizzata għar-rapportar tal-EU ETS.

7.2. Monitoraġġ applikat

Skont ir-rapporti tal-Artikolu 21 sottomessi fl-2018, ħafna mill-installazzjonijiet jużaw il-metodoloġija bbażata fuq il-kalkolu 64 . 179 installazzjoni biss (inqas minn 1.7 %) fi 23 pajjiż ġew irrapportati li jużaw sistemi għall-kejl tal-emissjonijiet kontinwi. Dawn jintużaw bl-aktar mod frekwenti fil-Ġermanja, fi Franza u fir-Repubblika Ċeka. Filwaqt li n-numru ta’ pajjiżi huwa l-istess bħas-sena preċedenti, globalment hemm 29 installazzjoni oħra li qegħdin jużaw dan l-approċċ.

11-il pajjiż biss irrapportaw l-użu tal-approċċ ta’ riżerva minn 36 installazzjoni, li jkopru madwar 3.4 miljun tunnellata ta’ CO2e (meta mqabbla ma’ 5.1 miljun tunnellata ta’ CO2e fis-sena ta’ qabel). Installazzjoni waħda fin-Netherlands hija responsabbli għal 35 % tal-emissjonijiet globali rrapportati b’rabta mal-metodoloġija ta’ riżerva.

Il-valuri minimi prestabbiliti 65 tas-saffi tal-MRR huma ssodisfati mill-maġġoranza assoluta tal-installazzjonijiet. 106 installazzjonijiet biss tal-kategorija C (waħda iktar mis-sena preċedenti), jiġifieri 13.7 % (meta mqabbla ma’ 13 % tas-sena preċedenti) ġew irrapportati li jiddevjaw għal mill-inqas parametru wieħed tar-rekwiżit li jiġu applikati l-ogħla saffi għall-flussi minn sorsi maġġuri. Dawn id-devjazzjonijiet huma permessi biss meta l-operatur juri li l-ogħla saff mhuwiex teknikament vijabbli jew jimplika spejjeż mhux raġonevoli. Ladarba dawn il-kundizzjonijiet ma jibqgħux japplikaw, l-operaturi għandhom itejbu s-sistema ta’ monitoraġġ tagħhom kif xieraq. Fil-perjodu ta’ rapportar 2013, ġie rrappurtat li 16 % tal-installazzjonijiet mit-total tal-Kategorija Ċ mhux qed jissodisfaw l-ogħla saffi b’xi mod jew ieħor. Għalhekk, sa mill-bidu tal-Fażi 3 tal-EU ETS qed jidher li hemm titjib fil-konformità tal-ogħla saff fl-installazzjonijiet tal-kategorija Ċ.

B’mod simili, rapporti mit-23 pajjiż parteċipanti jindikaw li b’mod globali, 21 % tal-installazzjonijiet tal-kategorija B huma permessi xi forma ta’ devjazzjoni mir-rekwiżiti prestabbiliti tal-MRR, meta mqabbla ma’ 22 % fis-sena preċedenti u ma’ 26 % fis-sena ta’ qabilha, li juri titjib kostanti fil-konformità tal-ogħla saff.

7.3. Verifika akkreditata

In-numru totali ta’ verifikaturi mhuwiex irrapportat fir-rapporti tal-Artikolu 21, iżda stima raġonevoli bbażata fuq in-numru akkreditat għall-kombustjoni (l-ambitu primarju tal-akkreditazzjoni) hija li globalment kien hemm mill-anqas 124 verifikatur akkreditat differenti involut fil-verifiki tal-2017. Dwar l-avjazzjoni, is-sottomissjonijiet tal-Artikolu 21 fl-2018 jindikaw li kien hemm 46 verifikatur individwali akkreditat għall-2017. Il-kooperazzjoni Ewropea għall-Akkreditazzjoni (EA) tipprovdi ħolqa ċentrali għall-Korpi Nazzjonali ta' Akkreditament (NABs) rilevanti u għal-listi tagħhom ta’ verifikaturi akkreditati tal-EU ETS 66 .

Ir-rikonoxximent reċiproku tal-verifikaturi fost il-pajjiżi parteċipanti qiegħed jaħdem b’suċċess: sitta u għoxrin pajjiż irrapportaw li mill-inqas verifikatur barrani wieħed huwa attiv fit-territorju tagħhom.

Il-konformità tal-verifikaturi mal-AVR hija għolja. Il-Polonja rrappurtat sospensjoni ta’ verifikatur wieħed, filwaqt li żewġ pajjiżi (PL u CZ) irrapportaw irtirar ta’ akkreditazzjoni fl-2017 ta’ wieħed u żewġ verifikaturi, rispettivament. Dan jikkompara ma’ sospensjoni waħda u ma' rtirar wieħed għall-2016 u l-ebda sospensjoni jew irtirar rapportati għall-2015. Il-Polonja biss irrapportat tnaqqis li sar fl-ambitu tal-akkreditazzjoni ta’ żewġ verifikaturi għall-2017, meta mqabbel ma’ tnaqqis ta’ verifikatur wieħed fl-2016, u erba’ pajjiżi li kienu rrappurtaw tnaqqis simili għal ħames verifikaturi fl-2015.

Disa’ pajjiżi rrapportaw ilmenti riċevuti dwar il-verifikaturi din is-sena (wieħed iktar mis-sena preċedenti). Madanakollu, in-numru globali tal-ilmenti huwa wkoll 12 % inqas. 95 % tal-ilmenti riċevuti huma rrappurtati bħala riżolti (simili għas-sena preċedenti meta din ir-rata kienet ta’ 96 %). Tnax-il pajjiż irrapporta l-identifikazzjoni ta' nuqqasijiet ta’ konformità tal-verifikaturi bħala parti mill-proċess ta’ skambju ta’ informazzjoni bejn in-NABs u l-awtoritajiet kompetenti (meta mqabbla ma’ disa’ fis-sena preċedenti).

8. ĦARSA ĠENERALI LEJN L-ARRANĠAMENTI AMMINISTRATTIVI

Mill-aħħar perjodu ta’ rapportar, ma ġiet osservata l-ebda bidla sinifikanti fl-arranġamenti amministrattivi tal-pajjiżi parteċipanti. Skont is-sottomissjonijiet tal-Artikolu 21 fl-2018, kien hemm, bħala medja, ħames (5) awtoritajiet kompetenti involuti fl-implimentazzjoni tal-EU ETS għal kull pajjiż. 67 Fir-rigward tal-koordinazzjoni bejn l-awtoritajiet, ġew irrapportati għodod u metodi differenti, bħal strumenti leġiżlattivi għall-ġestjoni ċentrali ta’ pjanijiet ta’ monitoraġġ jew ta’ rapporti ta’ emissjonijiet (fi 13-il pajjiż), għoti ta’ struzzjonijiet vinkolanti u gwida minn awtorità ċentrali kompetenti lill-awtoritajiet lokali (f’disa’ pajjiżi), gruppi ta’ ħidma jew laqgħat regolari bejn l-awtoritajiet (fi 15-il pajjiż), u l-użu ta’ pjattaforma tal-IT konġunta (fi 11-il pajjiż), fost l-oħrajn. Tmien pajjiżi (CY, EE, IE, IS, IT, LI, LU, MT) indikaw li l-ebda wieħed minn dawn ta’ hawn fuq ma huwa fis-seħħ.

Fir-rigward tat-tariffi amministrattivi imposti b’rabta mal-permessi u mal-pjanijiet ta’ monitoraġġ approvati, fl-2018 14-il pajjiż irrapportaw li ma jimponu l-ebda tariffa fuq l-operaturi tal-installazzjonijiet (CY, DE, EE, FR, GR, IE, LI, LT, LU, LV, MT, NL, SE, SK), l-istess bħas-sena preċedenti. Għal darb’oħra u simili għas-sena preċedenti, operaturi tal-inġenji tal-ajru fi 15-il pajjiż ma jħallsux tariffi (BE, CY, CZ, DE, EE, ES, GR, LI, LT, LU, LV, MT, NL, SE, SK). L-imposti jvarjaw b’mod sinifikanti skont il-pajjiż u s-servizz partikolari involut. Pereżempju, it-tariffi għall-permessi u għall-pjan ta’ monitoraġġ approvat għall-installazzjonijiet ivarjaw minn EUR 5 sa EUR 7690, u għall-avjazzjoni t-tariffi għall-pjan ta’ monitoraġġ approvat ivarjaw minn EUR 5 sa EUR 2400.

B’mod ġenerali, is-sistemi tal-pajjiżi parteċipanti huma effettivi ħafna meta jiġu allinjati mal-organizzazzjoni amministrattiva tagħhom. Il-komunikazzjoni bejn l-awtoritajiet lokali u l-qsim tal-aħjar prattiki bejn l-Awtoritajiet Kompetenti, inkluż permezz tal-attivitajiet tal-Forum ta’ Konformità tal-EU ETS u l-Konferenza ta’ Konformità tal-EU ETS annwali, jenħtieġ li tkompli tissaħħaħ u titħeġġeġ.

9. KONFORMITÀ U INFURZAR

L-EU ETS għandha rata għolja ħafna ta’ konformità: kull sena madwar 99 % tal-emissjonijiet huma koperti bin-numru meħtieġ ta’ kwoti fil-ħin. Fl-2017, madwar 1 % tal-installazzjonijiet li rrapportaw li kellhom emissjonijiet ma ċedewx kwoti li jkopru l-emissjonijiet kollha tagħhom sad-data ta’ skadenza tat-30 ta’ April 2018. Dawn l-installazzjonijiet ammontaw għal madwar 0.4 % tal-emissjonijiet tal-EU ETS. Fis-settur tal-avjazzjoni, il-livell ta’ konformità kien għoli ħafna wkoll: l-operaturi ta’ inġenji tal-ajru responsabbli għal 98 % tal-emissjonijiet tal-avjazzjoni tal-EU ETS ikkonformaw.

L-awtoritajiet kompetenti jibqgħu jwettqu verifiki ta’ konformità differenti fuq ir-rapporti tal-emissjonijiet annwali. Skont is-sottomissjonijiet tal-Artikolu 21 fl-2018, il-pajjiżi parteċipanti kollha jivverifikaw ir-rapporti tal-emissjonijiet annwali għall-kompletezza (100 % tar-rapporti ħlief ES 95 % , FR 99 %, SE 3 % u UK 59 %). Ir-rapporti jkomplu jindikaw li bħala medja, il-pajjiżi jivverifikaw viċin it-80 % tar-rapporti għal konsistenza mal-pjanijiet ta’ monitoraġġ (il-pajjiżi kollha) u madwar 74 % mad-data dwar l-allokazzjoni (il-pajjiżi kollha għajr FI, IT, MT, NO, u SE). Erbgħa u għoxrin pajjiż irrapportaw li huma jwettqu wkoll kontroverifiki ma’ data oħra.

Abbażi tas-sottomissjonijiet tal-Artikolu 21 fl-2018, l-awtoritajiet kompetenti fi ħmistax-il pajjiż wettqu stimi konservattivi dwar data nieqsa fil-każ ta’ 131 installazzjoni. Madankollu, 79 minn dawn ġew irrapportati mir-Renju Unit għal emissjonijiet fis-snin ta’ qabel l-2017, abbażi ta’ żbalji storiċi li kienu għadhom kemm ġew skoperti. Jekk id-data tar-Renju Unit ma tiġix ikkunsidrata fit-totali għall-2017, ġew irrapportati stimi konservattivi minn 52 installazzjoni (madwar 0.5 % tal-installazzjonijiet globali), meta mqabbla ma’ 57 installazzjoni (0.5 %) għall-2016 u 45 (0.4 %) għall-2015. Il-kwantità rrapportata tal-emissjonijiet affettwati tal-2017 kienet ta’ 2.8 miljun tunnellata ta’ CO2 (meta mqabbla ma’ 1.9 miljun tunnellata CO2 is-sena li għaddiet u 8.3 miljun tunnellata s-sena ta’ qabilha), madwar 0.2 % tal-emissjonijiet globali (meta mqabbla ma’ 0.1 % u 0.5 % għall-2016 u l-2015, rispettivament). L-aktar raġunijiet komuni mogħtija għat-twettiq ta’ stimi konservattivi kienu n-nuqqas ta’ rapport dwar l-emissjonijiet sal-31 ta’ Marzu jew rapporti dwar l-emissjonijiet li ma kinux kompletament konformi mar-rekwiżiti tal-MRR/AVR.

Stimi konservattivi dwar id-data li kienet nieqsa għall-avjazzjoni ġew irrapportati minn tmien (8) pajjiżi fir-rigward ta’ 33 operatur ta’ inġenji tal-ajru (madwar 6.1 % tat-total), u 0.8 % tal-emissjonijiet tal-avjazzjoni. Dan jikkumpara ma’ 18-il operatur ta’ inġenji tal-ajru (3.5 %) irrapportati minn erba’ pajjiżi s-sena li għaddiet.

Il-verifiki tal-awtoritajiet kompetenti jibqgħu importanti wkoll biex jissupplimentaw ix-xogħol tal-verifikatur. Għall-2017, il-pajjiżi kollha kkonfermaw li fil-każ ta’ installazzjonijiet huma jwettqu verifiki ulterjuri. Ħafna mill-pajjiżi rrapportaw approċċ simili dwar l-operaturi ta’ inġenji tal-ajru (għajr CY, EL, IT, LI, u RO). Ħafna mill-pajjiżi (għajr EL, IT, LU, MT, u SE) irrapportaw li wettqu kontrolli fuq il-post f’installazzjonijiet fl-2017.

Għall-2017, l-applikazzjoni ta’ penali għal emissjonijiet żejda ġiet irrapportata għal 30 installazzjoni minn disa’ pajjiżi (BE 1, BG 3, CZ 1, FR 1, IT 8, PL 1, PT 1, RO 6 u UK 8). Għall-avjazzjoni, il-penali għal emissjonijiet żejda ġew irrapportati għal 61 operatur ta’ inġenji tal-ajru (DE 7, ES 3, FR 1, IT 6, LT 1, NL 1, PL 1, PT 6, and UK 35).

Disa’ pajjiżi kkonfermaw il-ħruġ ta’ penali (b’żieda mal-penali għal emissjonijiet żejda) fil-perjodu ta’ rapportar tal-2017. Ma ġiet irrapportata l-ebda priġunerija, iżda ġew innotati multi, avviżi formali li jikkonċernaw 73 installazzjoni u 27 operatur ta’ inġenji tal-ajru, li jammontaw għal valur finanzjarju totali ta’ EUR 37,8 miljun 68 .

L-aktar nuqqasijiet komuni rrapportati għall-2017 kienu nuqqas ta’ rapportar tal-bidliet fil-kapaċità (24 każ), nuqqas ta’ sottomissjoni tar-rapporti annwali dwar l-emissjonijiet ivverifikati sal-iskadenza dovuta (23 każ), tħaddim mingħajr permess (17-il każ) u nuqqas ta’ tfassil ta’ pjan ta’ monitoraġġ approvat kif xieraq (11-il każ).

Il-ħames evalwazzjoni taċ-ċiklu ta’ konformità tal-EU ETS bdiet fil-bidu tal-2018. Din l-evalwazzjoni għandha l-għan li tidentifika kwistjonijiet ta’ konformità tal-EU ETS fil-livell tal-pajjiżi parteċipanti u tappoġġjahom fit-titjib tal-implimentazzjoni tagħhom tal-EU ETS billi tidentifika possibbiltajiet ta’ titjib, l-aħjar prattiki u ħtiġijiet ta’ taħriġ. L-evalwazzjoni l-ġdida se tibni fuq l-evalwazzjoni preċedenti tal-2014 u fuq il-ħidma ta’ reviżjoni ta’ konformità ulterjuri mwettqa fil-proġett ta’ Appoġġ EU ETS MRVA fl-2015-2016 li waqtu ġew ifformulati pjanijiet ta’ azzjoni biex jappoġġjaw pajjiżi parteċipanti fil-konformità tal-EU ETS tagħhom.

Novità ewlenija tal-evalwazzjoni l-ġdida hija test ta’ profiċjenza li fih Awtorità Kompetenti rappreżentattiva ta’ kull pajjiż hija mitluba tirrevedi kampjun ta’ pjan ta’ monitoraġġ, rapport ta’ emissjoni annwali u r-rapporti ulterjuri ta’ installazzjoni. Barra minn hekk, se jiġi analizzat sett ta’dokumenti tal-EU ETS MRVA għal installazzjoni speċifika f’kull pajjiż u se jiġu fformulati stħarriġiet speċifiċi għall-pajjiż biex jitlesta l-fehim tal-implimentazzjoni tal-EU ETS, l-ispezzjoni u l-infurzar kif ukoll l-MRVA.

10. KONKLUŻJONIJIET U ASPETTATTIVI

L-aktar żvilupp importanti tul is-sena li għaddiet kien l-adozzjoni ta’ riforma ambizzjuża tal-EU ETS għall-perjodu ta’ negozjar tagħha li jmiss. Ir-riforma tippermetti li l-EU ETS tikkontribwixxi biex jintlaħqu l-objettivi klimatiċi tal-UE 2030 u twettaq l-impenji tagħha skont il-Ftehim ta’ Pariġi. L-ETS riformata se twassal għal tnaqqis fl-emissjonijiet ta’ 43 % sal-2030 filwaqt li fl-istess ħin tissalvagwardja l-kompetittività tal-industrija Ewropea. Barra minn hekk, se tgħin lill-industrija u lis-settur tal-enerġija biex jilħqu l-isfidi tal-innovazzjoni u l-investiment għal tranżizzjoni għal emissjonijiet baxxi ta’ karbonju. Wara l-adozzjoni tal-leġiżlazzjoni riveduta, l-enfasi issa xxaqilbet lejn l-implimentazzjoni tad-dispożizzjonijiet il-ġodda qabel ma tibda il-Fażi 4. Ix-xogħol ta’ implimentazzjoni, b’mod partikolari dwar ir-rilokazzjoni tal-emissjonijiet tal-karbonju u l-allokazzjoni bla ħlas, kif ukoll dwar il-Fond ta’ Innovazzjoni għaddejj b’pass mgħaġġel (ara l-Appendiċi 6).

Il-bidliet leġiżlattivi miftiehma fis-snin reċenti biex jindirizzaw l-eċċess tal-kwoti wkoll bdew jagħtu l-frott. Prinċipalment minħabba l-posponiment lejn tmiem il-perjodu, l-eċċess ta’ kwoti diġà naqas b’mod sinifikanti u fl-2017 laħaq l-iktar livell baxx tiegħu sa mill-bidu tal-Fażi 3. It-tieni pubblikazzjoni ta’ din is-sena tal-indikatur tal-eċċess tar-Riżerva tal-Istabbiltà tas-Suq se tagħti lok għall-ewwel darba għat-trasferiment ta’ kwoti għar-riżerva. Flimkien mal-miżuri ta’ tisħiħ tal-ETS riformata, dan se jnaqqas il-volum tal-irkant matul l-ewwel tmien (8) xhur tal-2019 b’xi 40 % meta mqabbel mal-volum korrispondenti fl-2018. Minħabba l-ammont irduppjat ta’ kwoti li għandhom jitqiegħdu fir-riżerva għall-ewwel ħames snin tal-operat tagħha, huwa mistenni b’mod wiesa’ li l-eċċess se jkompli jonqos b’mod sostanzjali fis-snin li ġejjin. Il-progress fuq dawn il-fronti sarraf f’kunfidenza akbar mill-parteċipanti tas-suq kif muri permezz tas-sinjal tal-prezz tal-karbonju msaħħaħ matul l-aħħar sena.

Fil-qasam tal-avjazzjoni, sar ukoll progress importanti. Biex tipprovdi momentum kontinwu għall-proċess internazzjonali li jistabbilixxi skema globali biex jitrażżnu l-emissjonijiet tal-avjazzjoni, u biex tkun faċilitata l-implimentazzjoni futura tiegħu fl-UE, l-ambitu fi ħdan iż-ŻEE għall-avjazzjoni ġie estiż sal-2023. Il-livell ta’ ambizzjoni ġie miżjud ukoll – mill-2021, l-istess fattur lineari ta’ tnaqqis bħal dak għall-installazzjonijiet, għall-ewwel darba se japplika għall-avjazzjoni u għalhekk il-limitu massimu fuq il-kwoti tal-avjazzjoni se jonqos bi 2.2 % kull sena.

Fil-ħames sena tal-Fażi 3, l-istruttura tal-EU ETS baqgħet b’saħħitha u l-organizzazzjoni amministrattiva madwar l-Istati Membri wriet li kienet effettiva. Barra minn hekk, il-livell ġenerali ta’ trasparenza, il-protezzjoni tal-investitur u l-integrità fis-suq tal-karbonju żdiedu bil-klassifikazzjoni tal-kwoti tal-emissjonijiet bħala strumenti finanzjarji skont ir-regoli ġodda tas-suq finanzjarju. Sar ukoll pass importanti lejn il-protezzjoni kontinwa tas-suq Ewropew tal-karbonju kontra l-frodi tal-VAT, bl-adozzjoni ta’ emenda għad-Direttiva tal-VAT biex tiġi estiża l-applikazzjoni tad-deroga tal-mekkaniżmu tar-reverse charge minn tmiem l-2018 ’il quddiem.

L-ETS imsaħħa tissottolinja wkoll il-każ ta’ kollaborazzjoni attiva ma’ regolaturi u msieħba oħra barra mill-Ewropa li qed jiżviluppaw jew qed jimplimentaw is-swieq tal-karbonju.

Il-Kummissjoni se tkompli tissorvelja s-suq Ewropew tal-karbonju u ser tipprovdi r-rapport li jmiss fl-aħħar tal-2019.

ANNESS 

Appendiċi 1

Tabella 1: Numru ta’ kwoti bla ħlas allokati għall-immodernizzar tas-settur tal-elettriku

Tabella 2: Numru massimu ta’ kwoti bla ħlas fis-sena skont id-deroga mill-irkantar sħiħ għas-settur tal-enerġija

Appendiċi 2

Figura 1: Ħarsa ġenerali lejn l-irkanti tal-kwoti ġenerali mill-2013 sat-30 ta’ Ġunju 2018

___ Prezz tal-bejgħ fl-irkant

. Rata ta’ Kopertura

Appendiċi 3

Tabella 1: Sommarju tal-iskambu ta’ krediti internazzjonali sal-aħħar ta’ Ġunju 2018

Appendiċi 4

Tabella 1: Elementi ta’ provvista u domanda tal-ETS

Tabella 2: Kronoloġija tal-pubblikazzjoni tad-data

Appendiċi 5

Tabella 1: Deċiżjonijiet tal-Qorti tal-Ġustizzja rilevanti għall-funzjonament tal-EU ETS fil-perjodu Lulju 2017 sa Ġunju 2018

Appendiċi 6

Tabella 1: Il-qagħda attwali tal-implimentazzjoni tal-Fażi 4 tal-EU ETS

Appendiċi 7

Tabella 1: Kontribuzzjonijiet ta Stat Membru għar-Riżerva tal-Istabbiltà tas-Suq minn Jannar sa Awwissu 2019

(1)

Fl-2015, l-emissjonijiet GHG tal-UE kienu diġà 22 % taħt il-livelli tal-1990.

(2)

Skont il-projezzjonijiet nazzjonali, l-emissjonijiet ser ikomplu jonqsu sal-2020, iżda sabiex tintlaħaq il-mira tal-2030 se jkun meħtieġ li jiġu implimentati politiki addizzjonali.

(3)

COM (2015) 337, http://eur-lex.europa.eu/legal-content/MT/TXT/?uri=CELEX:52015PC0337

(4)

Id-Direttiva (UE) 2018/410 tal-Parlament Ewropew u tal-Kunsill tal-14 ta’ Marzu 2018 li temenda d-Direttiva 2003/87/KE biex ittejjeb it-tnaqqis kosteffettiv tal-emissjonijiet u investimenti b'emissjonijiet baxxi ta’ karbonju, u d-Deċiżjoni (UE) 2015/1814, ĠU L 76, 19.03.2018, p. 3

(5)

Ir-Regolament (UE) 2017/2392 tal-Parlament Ewropew u tal-Kunsill tat-13 ta' Diċembru 2017 li jemenda d-Direttiva 2003/87/KE biex jitkomplew il-limitazzjonijiet attwali tal-kamp ta' applikazzjoni fl-attivitajiet tal-avjazzjoni u ssir il-preparazzjoni biex tiġi implimentata miżura globali bbażata fuq is-suq mill-2021, ĠU L 350, 29.12.2017, p. 7

(6)

Ftehim bejn l-Unjoni Ewropea u l-Konfederazzjoni Żvizzera dwar il-kollegament tal-iskemi tan-negozjar ta’ emissjonijiet ta’ gassijiet serra tagħhom, ĠU L 322, 07.12.2017, p. 3

(7)

Id-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità u li temenda d-Direttiva tal-Kunsill 96/61/KE, ĠU L 275, 25.10.2003, p. 32.

(8)

Ir-rapporti ppubblikati fis-snin preċedenti jistgħu jinstabu hawnhekk: https://ec.europa.eu/clima/policies/ets_mt#tab-0-1

(9)

Id-data ta’ skadenza użata kienet id-29 ta’ Ġunju 2018.

(10)

Linji Gwida dwar ċerti miżuri ta' għajnuna mill-Istat fil-kuntest tal-iskema għan-negozjar ta’ kwoti ta’ emissjonijiet ta’ gassijiet serra wara l-2012, ĠU C 158, 05.06.2012, p. 4

(11)

Informazzjoni dwar il-konsultazzjoni pubblika tista’ tinstab hawn: https://ec.europa.eu/clima/consultations/public-consultation-establishment-innovation-fund_mt

(12)

Il-Bulgarija, ir-Repubblika Ċeka, il-Kroazja, l-Estonja, l-Ungerija, il-Latvja, il-Litwanja, il-Polonja, ir-Rumanija u s-Slovakkja

(13)

Saret eċċezzjoni għal tisħin distrettwali effiċjenti u sostenibbli fi Stati Membri bi PDG għal kull ras bi prezzijiet tas-suq taħt it-30 % tal-medja tal-UE fl-2013 (il-Bulgarija u r-Rumanija). Din l-eċċezzjoni tikkonċerna biss 30 % tal-fondi disponibbli għal dawn l-Istati Membri.

(14)

Għal skopijiet ta' referenza fir-rapporti tal-Artikolu 21, “pajjiżi parteċipanti” jew sempliċiment “pajjiżi” jinkludu t-28 Stat Membru tal-UE flimkien ma’ pajjiżi taż-ŻEE (l-Iżlanda, in-Norveġja u l-Liechtenstein).

(15)

L-emissjonijiet tal-bijomassa għandhom rata żero fl-EU-ETS, jiġifieri l-emissjonijiet għandhom jiġu rrapportati iżda l-ebda kwota ma għandha tiġi ċeduta għalihom.

(16)

Installazzjonijiet tal-kategorija C jarmu aktar minn 500 000 tunnellata ta’ CO2e fis-sena, installazzjonijiet tal-kategorija B jarmu bejn 500 000 u 50 000 tunnellata ta’ CO2e fis-sena, u l-installazzjonijiet tal-kategorija A jarmu inqas minn 50 000 tunnellata ta’ CO2e fis-sena. Barra minn hekk, ‘installazzjonijiet b’livelli baxxi ta’ emissjonijiet’ huma subsett tal-installazzjonijiet tal-kategorija A li jemettu anqas minn 25 000 tunnellata ta’ CO2e fis-sena. Ara r-Regolament tal-Kummissjoni (UE) Nru 601/2012 tal- 21 ta’ Ġunju 2012 dwar il-monitoraġġ u r-rapportar ta’ emissjonijiet ta’ gassijiet serra skont id-Direttiva 2003/87/KE tal-Parlament Ewropew u tal-Kunsill, ĠU L 181, 12.7.2012, p. 30

(17)

Ir-Regolament tal-Kummissjoni (UE) Nru 601/2012 tal-21 ta' Ġunju 2012 dwar il-monitoraġġ u r-rapportar ta' emissjonijiet ta' gassijiet serra skont id-Direttiva 2003/87/KE tal-Parlament Ewropew u tal-Kunsill, ĠU L 181, 12.7.2012, p. 30.

(18)

Eżempju ta’ operatur ta’ inġenju tal-ajru kummerċjali huwa linja tal-ajru tal-passiġġieri li tipprovdi servizzi lill-pubbliku ġenerali. Eżempju ta’ operatur ta’ inġenju tal-ajru mhux kummerċjali huwa inġenju tal-ajru privat.

(19)

Ir-Regolament tal-Kummissjoni (UE) Nru 2018/208 tat-12 ta’ Frar 2018, li jemenda r-Regolament (UE) Nru 389/2013 li jistabbilixxi Reġistru tal-Unjoni, ĠU L 39/3, 13.02.2018, p. 3

(20)

In-numru ta’ kwoti tal-avjazzjoni mqiegħda fiċ-ċirkolazzjoni sa mill-2013 huwa r-riżultat ta’ approċċ minn isfel għal fuq li jibda minn allokazzjoni bla ħlas (iddeterminat fuq il-bażi ta’ parametri referenzjarji bbażati fuq l-attivitajiet għall-attività tal-operaturi fi ħdan iż-ŻEE). In-numru ta’ kwoti rkantati mbagħad jinkiseb abbażi tal-fatt li l-allokazzjoni bla ħlas (inkluża riżerva speċjali għal distribuzzjoni aktar tard għal operaturi ta’ inġenji tal-ajru li qed jikbru malajr u għal min jidħol ġdid) jenħtieġ li tkun 85 % tat-total u l-irkantar jenħtieġ li jkun 15 %.

(21)

Iċ-ċifri aġġornati jinkludu skambji ta’ krediti internazzjonali minbarra l-allokazzjoni bla ħlas u l-ammonti rkantati.

(22)

Jinkludi informazzjoni mill-kalendarju tal-irkant tal-avjazzjoni tal-2018.

(23)

Iċ-ċifri jinkludu notifiki rċevuti mill-Istati Membri sa Ġunju 2018 u jistgħu jkunu soġġetti għal bidliet kbar minħabba notifiki aktar tard.

(24)

Ammont inizjali, qabel l-applikazzjoni tat-tnaqqis imsemmi hawn taħt fit-tabella.

(25)

Id-Deċiżjoni tal-Kummissjoni 2013/448/UE, ĠU L 240, 7.9.2013, p. 27.

(26)

Id-Deċiżjoni tal-Kummissjoni 2017/126/UE, ĠU L 19, 25.1.2017, p. 93.

(27)

Sentenza tal-Qorti tal-Ġustizzja tat-28 ta’ April 2016 fil-Kawżi Magħquda C-191/14, C-192/14, C-295/14, C-389/14 u C-391/14 sa C-393/14 Borealis Polyolefine GmbH et vs Bundesminister für Land- und Forstwirtschaft, Umwelt und Wasserwirtschaft et, EU:C:2016:311.

(28)

Id-Deċiżjoni tal-Kummissjoni (UE) 2017/2172 tal-20 ta’ Novembru 2017 li temenda d-Deċiżjoni 2010/670/UE rigward l-użu ta' dħul mhux imqassam mill-ewwel serje ta’ sejħiet għal proposti.

(29)

B’konformità mad-Deċiżjoni tal-Kummissjoni 2010/670/UE, il-proġetti magħżula skont l-ewwel sejħa kellhom jaslu għal deċiżjoni finali ta’ investiment sa tmiem l-2016, filwaqt li l-proġetti magħżula fit-tieni sejħa kellhom jagħmlu dan sa tmiem Ġunju 2018.

(30)

Barra minn hekk, ġew adottati modifikazzjonijiet għall-iskemi Franċiżi u Spanjoli.

(31)

https://assets.publishing.service.gov.uk/government/uploads/system/uploads/attachment_data/file/723181/Indirect_Cost_Compensation_EU_ETS_UK_Publication_2017_Revised.pdf

(32)

Ibbażat fuq ir-rata medja tal-kambju EUR/GBP għal 2017 ta’ 0.88723.

(33)

  https://www.strompreiskompensation.de/SPK/SharedDocs/news/SPK-Auswertungsbericht.html?__site=SPK  

(34)

https://www.cnc-nkc.be/sites/default/files/report/file/2018-08-13_rapportering_icl_2017_goedgekeurd_door_nkc_fr_en_nl.pdf

(35)

https://www.rvo.nl/subsidies-regelingen/subsidieregeling-indirecte-emissiekosten-ets

(36)

  http://www.lagie.gr/anakoinoseis/anakoinoseis/anakoinosi/article/1605/  

(37)

  http://ukmin.lrv.lt/lt/veiklos-sritvs/versloaplinka/pramone/valstybes-pagalba  

(38)

  http://www.envirofond.sk/_img/Prehlady/Dotacie/Dotacie_2017.pdf  

(39)

  https://www.ecologique-solidaire.gouv.fr/sites/default/files/Informations%20sur%20la%20compensation%20des%20coûts%20indirects%20en%20France.pdf  

(40)

https://tem.fi/documents/1410877/2414868/Päästökauppadirektiivin+mukaiset+tiedot+2017+maksetusta+kompensaatiotuesta/86ca7fc7-04f7-446b-843d-c4c6fb861386/Päästökauppadirektiivin+mukaiset+tiedot+2017+maksetusta+kompensaatiotuesta.pdf

(41)

  http://www.mincotur.gob.es/PortalAyudas/emisionesCO2/concesion/2017/Paginas/Resolucion.aspx u http://www.mincotur.gob.es/PortalAyudas/emisionesCO2/concesion/2017/Paginas/PropComplementaria.aspx

(42)

Ir-raġuni għall-paragun tal-ħlasijiet tal-2017 mad-dħul mill-irkant tal-2016 hija li l-ħlasijiet li saru fl-2017 jikkostitwixxu kumpens għall-ispejjeż indiretti mġarrba mill-konsumaturi għax-xiri tal-enerġija fis-sena kalendarja 2016.

(43)

Il-volumi tal-kwoti ġenerali ġew determinati b'kunsiderazzjoni għad-Deċiżjoni 1359/2013/UE. Il-volumi tal-kwoti tal-avjazzjoni ġew stabbiliti b'kunsiderazzjoni għad-Deċiżjoni Nru 377/2013/UE u għar-Regolament (UE) Nru 421/2014.

(44)

 Fl-2012 saru l-irkanti bikrija tal-kwoti tal-Fażi 3 fid-dawl tal-prattika kummerċjali mifruxa fis-settur tal-elettriku ta’ bejgħ ta’ enerġija fuq bażi bil-quddiem u xiri tal-inputs meħtieġa (inklużi l-kwoti) meta jbigħu l-produzzjoni tagħhom.

(45)

  http://ec.europa.eu/clima/policies/ets/auctioning/documentation_mt.htm

(46)

Aktar informazzjoni dwar l-użu tad-dħul mill-irkant mill-Istati Membri hija disponibbli fir-Rapport ta’ Progress dwar l-Azzjoni Klimatika 2018: COM(2018) 716 final, https://eur-lex.europa.eu/legal-content/MT/TXT/PDF/?uri=CELEX:52015DC0576&from=EN

(47)

Data tal-PDG kif irrapportata fuq: http://epp.eurostat.ec.europa.eu/tgm/table.do?tab=table&init=1&plugin=1&language=en&pcode=tec00115  

(aċċessata f’Lulju 2018)

(48)

Id-Deċiżjoni Nru 1359/2013/UE tal-Parlament Ewropew u tal-Kunsill tas-17 ta’ Diċembru 2013 li temenda d-Direttiva 2003/87/KE fejn tiċċara d-dispożizzjonijiet dwar l-għażla taż-żmien tal-irkant tal-kwoti tal-gassijiet serra, ĠU L 343, 19.12.2013, p. 1.

(49)

Id-Deċiżjoni (UE) 2015/1814 tal-Parlament Ewropew u tal-Kunsill tas-6 ta’ Ottubru 2015 dwar l-istabbiliment u l-funzjonament ta' riżerva tal-istabbiltà tas-suq għall-iskema ta' negozjar tal-emissjonijiet tal-gassijiet serra tal-Unjoni u li temenda d-Direttiva 2003/87/KE, ĠU L 264, 9.10.2015, p. 1.

(50)

C(2018) 2801 final, https://eur-lex.europa.eu/legal-content/MT/TXT/PDF/?uri=OJ:C:2018:169:FULL&from=EN

(51)

C(2017) 3228 final, https://eur-lex.europa.eu/legal-content/MT/TXT/PDF/?uri=OJ:C:2017:150:FULL&from=EN

(52)

C(2018) 2801 final, https://eur-lex.europa.eu/legal-content/MT/TXT/PDF/?uri=OJ:C:2018:169:FULL&from=EN

(53)

Ir-Regolament (UE) 2017/2392 tal-Parlament Ewropew u tal-Kunsill tat-13 ta' Diċembru 2017 li jemenda d-Direttiva 2003/87/KE biex jitkomplew il-limitazzjonijiet attwali tal-kamp ta' applikazzjoni fl-attivitajiet tal-avjazzjoni u ssir il-preparazzjoni biex tiġi implimentata miżura globali bbażata fuq is-suq mill-2021, ĠU L 350, 29.12.2017, p. 7

(54)

Dawn in-numri ma jqisux l-għeluq tal-operaturi tal-inġenji tal-ajru.

(55)

Sa tmiem Ġunju 2018.

(56)

Id-Deċiżjoni Nru 377/2013/UE tal-Parlament Ewropew u tal-Kunsill tal-24 ta’ April 2013 għal deroga temporanja mid-Direttiva 2003/87/KE li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità Test b’relevanza għaż-ŻEE, ĠU L 113, 25.4.2013, p. 1.

(57)

COM(2015) 576 final, https://eur-lex.europa.eu/legal-content/MT/TXT/PDF/?uri=CELEX:52015DC0576&from=EN

(58)

https://ec.europa.eu/info/law/markets-financial-instruments-mifid-ii-directive-2014-65-eu/amending-and-supplementary-acts/implementing-and-delegated-acts_mt

(59)

https://ec.europa.eu/info/law/market-abuse-regulation-eu-no-596-2014/amending-and-supplementary-acts/implementing-and-delegated-acts_mt

(60)

Il-klassifikazzjoni tal-kwoti ta’ emissjoni ta’ MiFID2 skont strumenti finanzjarji fil-livell tal-UE ma teħtieġx ir-(ri)klassifikazzjoni legali awtomatika tal-kwoti skont il-liġi nazzjonali, peress li hija magħmula għall-finijiet tal-applikazzjoni tar-regolament tas-swieq finanzjarji tal-UE u mhijiex immirata biex tittratta man-natura legali tal-kwoti tal-emissjonijiet (abbażi tal-liġi privata) jew it-trattament tal-kontabilità tagħhom.

(61)

Direttiva tal-Kunsill (UE) 2018/1695 tas-6 ta’ Novembru 2018 li temenda d-Direttiva 2006/112/KE dwar is-sistema komuni ta’ taxxa fuq il-valur miżjud fir-rigward tal-perjodu ta’ applikazzjoni tal-mekkaniżmu tar-reverse charge fakultattiv fir-rigward ta’ provvisti ta’ ċerti merkanzija u servizzi suxxettibbli għall-frodi u tal-Mekkaniżmu ta’ Reazzjoni Rapida kontra l-frodi tal-VAT, ĠU L 282, 12.11.2018, p. 5–7

(62)

Mudelli u dokumenti ta’ gwida tal-MRR u tal-AVR jistgħu jinstabu hawnhekk: https://ec.europa.eu/clima/policies/ets/monitoring_mt#tab-0-1

(63)

Ir-raġuni ewlenija għal dan hija li l-metodoloġija bbażata fuq il-kejl tinvolvi t-tnedija ta’ riżorsi sinifikanti u għarfien għall-kejl kontinwu tal-konċentrazzjoni ta’ GHGs rilevanti, li ħafna mill-operaturi ż-żgħar ma għandhomx.

(64)

Ir-Regolament tal-Kummissjoni (UE) Nru 601/2012 jirrikjedi li l-operaturi kollha jilħqu ċerti saffi minimi, fejn sorsi akbar ta’ emissjonijiet huma meħtieġa jilħqu saffi ogħla (li jinvolvu kwalità tad-data aktar affidabbli), filwaqt li għal raġunijiet ta’ kosteffiċjenza għandhom japplikaw rekwiżiti anqas stretti għal sorsi iżgħar.

(65)

Lista tal-EA ta’ punti ta’ aċċess għall-NABs li jakkreditaw il-verifikaturi għall-EU ETS: http://www.european-accreditation.org/information/national-accreditation-bodies-having-been-successfully-peer-evaluated-by-ea  

(66)

F’xi każijiet, il-pajjiżi jistgħu jkunu qegħdin jirrapportaw diversi awtoritajiet reġjonali/lokali bħala awtorità kompetenti waħda.

(67)

Dan it-total jeskludi multi imposti fuq is-settur tal-avjazzjoni fil-Portugall billi l-valuri tal-multi għadhom ma ġewx iddeterminati minħabba proċessi ta’ sanzjonar li għaddejjin bħalissa.

(68)

L-Ungerija użat id-deroga tal-Artikolu 10c fl-2013 biss.

(69)

Id-data ta’ konformità għas-snin ta’ qabel tista’ tiġi kkoreġuta retroattivament minħabba, pereżempju sottomissjonijiet tard.

(70)

Komunikazzjoni mill-Kummissjoni C (2018) 2801 final tal-15.5.2018, disponibbli fuq https://ec.europa.eu/clima/sites/clima/files/ets/reform/docs/c_2018_2801_en.pdf ippubblikata skont id-Deċiżjoni (UE) 2015/1814 tal-Parlament Ewropew u tal-Kunsill tas-6.10.2015 (‘Deċiżjoni MSR’).