EUR-Lex Access to European Union law
This document is an excerpt from the EUR-Lex website
Document 52017BP1679
Resolution (EU) 2017/1679 of the European Parliament of 27 April 2017 with observations forming an integral part of the decision on discharge in respect of the implementation of the budget of the European Institute of Innovation and Technology for the financial year 2015
Riżoluzzjoni (UE) 2017/1679 tal-Parlament Ewropew tas-27 ta' April 2017 li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Istitut Ewropew tal-Innovazzjoni u t-Teknoloġija għas-sena finanzjarja 2015
Riżoluzzjoni (UE) 2017/1679 tal-Parlament Ewropew tas-27 ta' April 2017 li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Istitut Ewropew tal-Innovazzjoni u t-Teknoloġija għas-sena finanzjarja 2015
ĠU L 252, 29.9.2017, p. 244–248
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
29.9.2017 |
MT |
Il-Ġurnal Uffiċjali tal-Unjoni Ewropea |
L 252/244 |
RIŻOLUZZJONI (UE) 2017/1679 TAL-PARLAMENT EWROPEW
tas-27 ta' April 2017
li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Istitut Ewropew tal-Innovazzjoni u t-Teknoloġija għas-sena finanzjarja 2015
IL-PARLAMENT EWROPEW,
— |
wara li kkunsidra d-deċiżjoni tiegħu dwar il-kwittanza għall-implimentazzjoni tal-baġit tal-Istitut Ewropew tal-Innovazzjoni u t-Teknoloġija għas-sena finanzjarja 2015, |
— |
wara li kkunsidra r-rapport speċjali tal-Qorti tal-Awdituri Nru 12/2016 bit-titolu “L-użu li l-aġenziji jagħmlu minn għotjiet: mhuwiex dejjem xieraq u mhux dejjem jista' jintwera li huwa effettiv”, |
— |
wara li kkunsidra l-Artikolu 94 u l-Anness IV tar-Regoli ta' Proċedura tiegħu, |
— |
wara li kkunsidra r-rapport tal-Kumitat għall-Kontroll tal-Baġit (A8-0127/2017), |
A. |
billi, skont ir-rapporti finanzjarji tiegħu, il-baġit finali tal-Istitut Ewropew tal-Innovazzjoni u t-Teknoloġija (“l-Istitut”) għas-sena finanzjarja 2015 kien jammonta għal EUR 266 566 618, li jirrappreżenta żieda ta' 14,35 % meta mqabbel ma' dak tal-2014; |
B. |
billi, skont ir-rapporti finanzjarji tiegħu, il-kontribuzzjoni kumplessiva tal-Unjoni għall-baġit tal-Istitut għall-2015 ammontat għal EUR 215 030 200, li tirrappreżenta żieda ta' 26,63 % meta mqabbla ma' dik għall-2014; |
C. |
billi l-Qorti tal-Awdituri (il-“Qorti”), fir-rapport tagħha dwar il-kontijiet annwali tal-Istitut għas-sena finanzjarja 2015 (“ir-rapport tal-Qorti”), stqarret li kisbet assigurazzjonijiet raġonevoli li l-kontijiet annwali tal-Istitut huma affidabbli, iżda ma setgħetx tikseb biżżejjed evidenza xierqa għall-awditjar dwar il-legalità u r-regolarità tat-tranżazzjonijiet ta' bażi, |
D. |
billi, fil-kuntest tal-proċedura ta' kwittanza, l-awtorità ta' kwittanza tisħaq fuq l-importanza partikolari li tissaħħaħ ulterjorment il-leġittimità demokratika tal-istituzzjonijiet tal-Unjoni permezz ta' titjib fit-trasparenza u r-responsabilità, permezz tal-implimentazzjoni tal-kunċett ta' bbaġitjar abbażi tal-prestazzjoni u governanza tajba tar-riżorsi umani, |
Bażi għal opinjoni kwalifikata dwar il-legalità u r-regolarità tat-tranżazzjonijiet ta' bażi
1. |
Ifakkar li l-kontribuzzjoni tal-Unjoni għall-baġit tal-Istitut għall-perjodu finanzjarju 2014-2020 hija pprovduta skont il-pakkett finanzjarju tal-Orizzont 2020, u li l-Istitut huwa marbut bid-dispożizzjonijiet tar-Regolament (UE) Nru 1290/2013 (“ir-regoli ta' Orizzont 2020”); ifakkar, barra minn hekk, li l-Orizzont 2020 huwa l-programm suċċessur tas-Seba' Programm Kwadru, li dam mill-2007-2013 u li l-Istitut ma pparteċipax fih; |
2. |
Jirrimarka li mill-1 ta' Jannar 2014, il-bażi ġuridika għall-ħlas lura ta' spejjeż indiretti eliġibbli relatati mal-għotjiet hija l-Artikolu 29(1) tar-regoli tal-Orizzont 2020, flimkien mal-Artikolu 90(1) tal-imsemmi regolament finanzjarju tal-Istitut (1) li jipprovdi għal rimborż b'rata fissa ta' 25 % tal-ispejjeż eliġibbli indiretti relatati mal-għotjiet; jinnota, madankollu, li, skont l-Artikolu 75(8) tar-regoli finanzjarji preċedenti tal-Istitut (2), li tħassru b'effett mill-1 ta' Jannar 2014, il-limitu għal rimborż b'rata fissa tal-ispejjeż indiretti għal korpi pubbliċi mingħajr skop ta' qligħ, l-istabbilimenti ta' edukazzjoni ogħla, organizzazzjonijiet ta' riċerka jew impriżi żgħar jew ta' daqs medju seta' jiżdied għal 40 %; |
3. |
Jinnota li, skont ir-rapport tal-Qorti, l-Istitut, fil-ftehimiet ta' għotjiet tiegħu tal-2014 iffirmati fi Frar 2014, ipprovda għal rimborż b'rata fissa ta' 40 % tal-ispejjeż eliġibbli indiretti li jmorru kontra r-regoli tal-Orizzont 2020 diġà fis-seħħ f'dak iż-żmien; jinnota, barra minn hekk, l-opinjoni tal-Qorti li, minħabba li l-Istitut ma pparteċipax fis-Seba' Programm Kwadru, l-Artikolu 57 tar-Regoli tal-Orizzont 2020, li jittratta t-tranżizzjoni mis-Seba' Programm Kwadru għall-Orizzont 2020 ma japplikax għall-Istitut u l-Qorti għalhekk identifikat dawk ir-rimborżi bħala irregolari; |
4. |
Jinnota li, skont ir-rapport tal-Qorti, l-iżbalji identifikati bħala riżultat ta' verifika ex post ta' kampjun ta' għotjiet tal-2015, wara li ġie korrett ħlas eċċessiv ta' dawk ir-rimborżi b'rata fissa, wassal għal rata ta' żbalji residwi ta' 2 % għal għotjiet tal-2014; jinnotali skont il-Qorti, ir-rata ta' żball magħquda għaż-żewġ żbalji ta' verifika ex-post li ġew identifikati u rimborżi b'rata fissa kienet ta' 4,9 % tan-nefqa totali tal-Istitut għall-2015, li wassal biex il-Qorti ħarġet opinjoni kwalifikata dwar il-legalità u r-regolarità tat-tranżazzjonijiet li fuqhom huma bbażati l-kontijiet tal-Istitut; |
5. |
Jinnota, madankollu, li l-ftehimiet ta' għotjiet tal-Istitut kienu bbażati fuq sejħa annwali għat-tħejjija tal-pjanijiet tan-negozju tal-komunità ta' konoxxenza u innovazzjoni (KKI) tal-2014, li ġew imnedija mill-Istitut f'April 2013; jinnota, barra minn hekk, li, skont ir-regoli finanzjarji tal-Istitut, kif ukoll l-Artikolu 189 tar-Regolament ta' Delega tal-Kummissjoni tar-Regolament (UE) Nru 1268/2012 (3), is-sejħa tal-Istitut ippermettiet lill-benefiċjarji tal-għotjiet li jaqgħu taħt il-kategoriji deskritti fl-Artikolu 75(8) tar-regoli finanzjarji tal-Istitut li jistabbilixxu l-baġits tal-proġetti tagħhom, għal attivitajiet ippjanati għall-2014, bl-użu tar-rata fissa ta' rimborż ta' 40 % għall-ibbaġitjar ta' spejjeż indiretti; jinnota li l-KKI li pparteċipaw fis-sejħa ta' April 2013, ibbażaw irwieħhom fuq dik id-dispożizzjoni meta fasslu u ssottomettew din il-proposta; |
6. |
Jinnota, barra minn hekk, li l-bord ta' tmexxija tal-Istitut, wara l-evalwazzjoni tal-pjanijiet ta' negozju tal-KKI tal-2014 mill-esperti esterni, iddeċieda dwar l-allokazzjoni tal-fondi għall-KKI għall-2014 fil-5 ta' Diċembru 2013, qabel ma adotta r-regoli ta' Orizzont 2020; jikkonstata, abbażi tal-informazzjoni fornuta mill-Istitut, li l-ftehimiet ta' għotja tal-2014 ġew iffirmati skont il-kundizzjonijiet inizjali tas-sejħa annwali; |
7. |
Huwa tal-opinjoni li l-miżuri tranżitorji skont l-Artikolu 57(2) tar-regoli tal-Orizzont 2020 ma kinux maħsuba li jkunu ristretti biss għall-assistenza mogħtija taħt is-Seba' Programm Kwadru, iżda wkoll għal azzjonijiet attwali oħrajn fil-qasam tar-riċerka u l-innovazzjoni li kienu suġġetti għar-regoli ta' Orizzont 2020 wara d-dħul fis-seħħ tiegħu, bħall-ftehimiet ta' għotja tal-Istitut tal-2014; jenfasizza li l-iskop ta' din il-miżura tranżitorja stipulata mill-Artikolu 57 tar-regoli tal-Orizzont 2020 huwa li tipprovdi ċertezza tad-dritt u biex tiżgura l-kontinwità tal-qafas ġuridiku applikabbli fiż-żmien tal-bidu ta' tali azzjonijiet; jirrikonoxxi li l-ftehimiet tal-għotja sussegwenti tal-Istitut huma konformi mar-regoli tal-Orizzont 2020 fis-seħħ, b'mod partikolari fir-rigward tal-applikazzjoni tar-rata fissa ta' rimborż ta' 25 % tal-ispejjeż indiretti eliġibbli relatati ma' għotjiet, kif ukoll li l-ebda miżura korrettiva ulterjuri ma tista' tittieħed mill-Istitut rigward din il-kwistjoni; jinnota wkoll li kwalunkwe tentattiv biex jiġu rkuprati l-fondi meqjusa bħala irregolari mill-Qorti jistgħu jwasslu għal azzjonijiet legali minn ħafna benefiċjarji tal-Istitut, li jaf jirriżultaw f'danni sinifikanti fir-reputazzjoni tal-Istitut, kif ukoll għall-Orizzont 2020 u l-Kummissjoni b'mod ġenerali; |
Kummenti dwar il-legalità u r-regolarità tat-tranżazzjonijiet
8. |
Jinnota li, skont ir-rapport tal-Qorti, l-Istitut informa l-KKIs fl-2015 li l-kontribuzzjoni finanzjarja tagħhom matul l-ewwel ħames snin (2010–2014), ma jaqbiżx il-limitu ta' 25 % tan-nefqa globali rispettivi tagħhom; jinnota, madankollu d-definizzjoni fqira ta' attivitajiet komplementari tal-KKI (KCAs) xekklet milli ssir valutazzjoni ċara ta' jekk l-ispejjeż assoċjati mal-KCA għandhomx jiġu aċċettati jew le fil-kontribuzzjoni massima mill-EIT; jinnota li l-Istitut u l-Kummissjoni aċċettaw ir-rakkomandazzjoni tal-Qorti biex titneħħa l-kundizzjoni ta' finanzjament ta' 25 % sabiex jittaffa l-piż tar-rappurtar operazzjonali u dak finanzjarju minn fuq sħab tal-KKI; jirrikonoxxi li, sakemm tali emenda tiġi addottata, l-Istitut għandu jimplimenta l-bażi legali applikabbli; |
Ġestjoni baġitarja u finanzjarja
9. |
Jinnota li, skont il-kontijiet finali tal-Istitut, l-isforzi ta' monitoraġġ baġitarju matul is-sena finanzjarja 2015 irriżultaw f'rata ta' implimentazzjoni baġitarja ta' 90,58 %, li tfisser tnaqqis ta' 3,55 % meta mqabbla mal-2014; jinnota li r-rata ta' eżekuzzjoni tal-approprjazzjonijiet ta' pagament kienet 96,49 %, li tfisser tnaqqis ta' 4,02 % meta mqabbla mal-2014; |
10. |
Jinnota li, skont ir-rapport tal-Qorti, għalkemm l-Istitut jitħalla jerġa' jdaħħal l-approprjazzjonijiet mhux użati fil-baġit ta' dawn it-tliet snin, ma kienx adatta l-proċess tiegħu fil-ħin biex jiddaħħlu mill-ġdid EUR 26 600 000 disponibbli mill-ftehimiet ta' għotja tal-2014 fil-baġits tal-2015 sal-2017; jinnota, barra minn hekk, li dawk l-approprjazzjonijiet irriżultaw mill-użu inqas milli mistenni tal-fondi mill-KKIs; jinnota li fl-2015 l-Istitut wettaq reviżjoni tal-baġit, kif ukoll talab lill-KKIs jirrevedu l-pjanijiet ta' negozju tagħhom għall-2015 u l-baġits li ġew sottomessi kif emendati; jinnota li, minħabba t-tnaqqis tal-baġits tal-KKIs, l-Istitut jista' jiddiżimpenja l-ammonti mhux minfuqa, li kienu mbagħad ikkanċellati u mdaħħla mill-ġdid fl-estimi tad-dħul u l-infiq għall-2016; jinnota li dan irriżulta f'titjib fil-ġestjoni tal-baġit tal-Istitut f'kollaborazzjoni mill-qrib mal-KKIs; |
Impenji u riporti
11. |
Jinnota li skont ir-rapport tal-Qorti, il-livell ta' riporti tal-approprjazzjonijiet impenjati għat-Titolu II kienu ta' EUR 400 000 (44 %) meta mqabbla ma' EUR 500 000 (36 %) fl-2014; jirrikonoxxi li dawn ir-riporti huma prinċipalment relatati ma' kuntratti għal servizzi tal-IT li jkomplu wara tmiem is-sena, u għal laqgħat li għadhom ma ġewx fatturati; |
12. |
Jinnota li r-riporti ħafna drabi jistgħu jkunu parzjalment jew għal kollox ġustifikabbli min-natura pluriennali tal-programmi operattivi tal-Aġenziji u li mhux neċessarjament jindikaw dgħufijiet fl-ippjanar u fl-implimentazzjoni tal-baġit, u li mhux dejjem ikunu kontra l-prinċipju baġitarju tal-annwalità, b'mod partikolari jekk jiġu ppjanati min qabel u kkomunikati lill-Qorti; |
Kontrolli interni
13. |
Ifakkar li, skont l-Artikolu 34 tar-regoli tal-Orizzont 2020, iċ-ċertifikat dwar id-dikjarazzjonijiet finanzjarji mitlub mill-imsieħba tal-KKI li talbu rimborż ta' iktar minn EUR 325 000 huwa li jikkontribwixxi għall-verifika ex-ante tal-Istitut ta' rendikonti tal-ispejjeż; jinnota li, skont ir-rapport tal-Qorti l-kwalità ta' dawn iċ-ċertifikati tvarja b'mod sinifikanti, li jillimita l-aċċertament li jista' jinkiseb minnhom u li jeħtieġ li l-Istitut iwettaq kontrolli addizzjonali; jinnota li, skont l-Istitut, japplika metodoloġija taċ-ċertifikati tal-awditjar imfassal mid-Direttorat Ġenerali tal-Kummissjoni għar-Riċerka u l-Innovazzjoni għall-Orizzont 2020, li jibdew mill-ftehimiet ta' għotja tal-2014; jinnota, barra minn hekk, li l-metodoloġija riveduta tinkludi struzzjonijiet aktar dettaljati u proċeduri miftiehma kif ukoll 63 sejba fattwali standard li jkopru l-kategoriji kollha tal-ispejjeż; jirrikonoxxi li l-Istitut żviluppa strateġija komprensiva għall-assigurazzjoni tal-għotjiet mibnija fuq verifiki ex-ante u ex-post, inkluż iċ-ċertifikat dwar id-dikjarazzjonijiet finanzjarji, sabiex tiġi żgurata l-legalità u r-regolarità tat-tranżazzjonijiet; |
Prevenzjoni u ġestjoni tal-kunflitti ta' interess u t-trasparenza
14. |
Jinnota li d-dikjarazzjonijiet annwali ta' interessi għall-membri tal-bord ta' tmexxija, tad-direttur interim u tal-persunal fil-maniġment superjuri huma ppubblikati fuq il-websajt tal-Istitut; jinnota wkoll li eżami analitiku dwar id-dikjarazzjonijiet li jkunu ġew ippreżentati hija mwettqa biex tiġi vverifikata l-preċiżjoni fattwali tagħhom; josserva li, fil-każ tal-esperti, l-Istitut isegwi r-regoli tal-Orizzont 2020 dwar il-kunflitti ta' interess; |
15. |
Jinnota li l-Istitut beħsiebu jikkonkludi r-regoli interni tiegħu dwar l-informaturi fl-ewwel nofs tal-2017; jistieden lill-Istitut biex jadotta l-politika tal-informaturi interna li se trawwem kultura ta' trasparenza u l-obbligu ta' rendikont fuq il-post tax-xogħol, biex b'mod regolari jinforma u jħarreġ l-impjegati dwar id-dmirijiet u d-drittijiet tagħhom fir-rigward ta' dik il-politika, biex jiżgura l-protezzjoni tal-informatur minn ritaljazzjoni, biex isegwi s-sustanza tat-twissijiet tal-informaturi f'waqthom u biex jistabbilixxi mezz għal rappurtar intern anonimu; jappella lill-Istitut biex jippubblika rapport annwali dwar l-għadd ta' każijiet ta' informaturi u dwar kif ġew segwiti u biex jipprovdi dawk ir-rapporti annwali lill-awtorità ta' kwittanza; jitlob lill-Istitut biex iżomm lill-awtorità ta' kwittanza infurmata dwar il-progress fir-rigward ta' din il-kwistjoni; |
16. |
Jinnota li, skont il-Qorti, għall-għażla ta' esperti esterni li jevalwaw il-proposti u l-pjanijiet ta' negozju tal-KKI, l-Istitut jagħmel użu mill-Artikolu 89 tar-Regolament Finanzjarju tal-Istitut biex jidderoga mill-obbligu li jniedi sejħa għal espressjoni ta' interess; jinnota, madankollu, li l-Istitut għadu ma stabbiliex bis-sħiħ proċeduri interni biex jirregola l-implimentazzjoni ta' din id-deroga; jinnota li, fil-prattika, l-Istitut stabbilixxa l-grupp ta' esperti tiegħu billi uża listi ta' esperti u bażijiet ta' data eżistenti ta' istituzzjonijiet u korpi oħra tal-Unjoni u individwi li ma kinux fuq dawn il-listi, fuq rakkomandazzjonijiet mingħand l-Istitut tat-Tmexxija u l-membri tal-persunal; madankollu jilqa' t-titjib li sar fil-proċess ta' għażla ta' esperti għal proposti tal-KKI u jinkoraġġixxi lill-Istitut biex jimpenja ruħu biex itejjeb l-effiċjenza u l-effikaċja ta' dan il-proċess u jiżgura trasparenza massima u l-integrità tiegħu billi jistabbilixxi miżuri interni rilevanti, filwaqt li jiżgura n-nuqqas ta' kunflitti ta' interess potenzjali; |
17. |
Jinnota bi tħassib li l-Istitut ma ħax inizjattivi speċifiċi sabiex tiżdied it-trasparenza dwar il-kuntatti tiegħu mal-partijiet interessati u mal-lobbisti; jappella lill-Istitut biex idaħħal fis-seħħ politika proattiva ta' trasparenza fir-rigward tal-lobbying; |
Proċeduri ta' reklutaġġ
18. |
Jinnota b'sodisfazzjon li l-Istitut irnexxielu jgħaqqad il-persunal meħtieġ permezz ta' serje ta' miżuri implimentati fl-2015 u fl-2016 biex jitjiebu l-ġestjoni tal-persunal, il-proċess tar-reklutaġġ u l-ambjent tax-xogħol; josserva li, minn Diċembru 2016, l-Istitut jimpjega 59 membru tal-persunal (f'63 pożizzjoni awtorizzata), li jirrappreżenta l-akbar numru ta' membri tal-persunal impjegat fl-istorja tal-Istitut, u li r-reklutaġġ għal pożizzjonijiet vakanti li fadal għadu għaddej; jirrikonoxxi, madankollu, li l-azzjonijiet meħuda mill-Istitut ma jistgħux jikkumpensaw bis-sħiħ għall-effetti negattivi tal-koeffiċjent ta' korrezzjoni baxx u li qed jonqos b'mod stabbli li qed jaffettwa l-livelli tas-salarji fl-Ungerija; |
Kummenti oħra
19. |
Jinnota li, skont il-Qorti, il-mira oriġinali stabbilita mill-Kummissjoni għall-Istitut biex jikseb awtonomija finanzjarja kienet l-2010; jinnota, barra minn hekk, li l-Istitut kiseb l-awtonomija finanzjarja parzjali f'Ġunju 2011, bil-kundizzjoni ta' approvazzjoni ex-ante kontinwa ta' tranżazzjonijiet relatati ma' għotjiet u ta' akkwisti 'l fuq minn EUR 60 000 mid-Direttorat Ġenerali tal-Kummissjoni għall-Edukazzjoni u l-Kultura; jinnota li, skont l-Istitut, huwa talab li l-Kummissjoni tniedi mill-ġdid il-proċess li jwassal għal awtonomija finanzjarja sħiħa; jirrikonoxxi, barra minn hekk, li l-Kummissjoni tistabbilixxi pjan direzzjonali u skeda taż-żmien tal-proċess f'Mejju 2016 u jistenna bil-ħerqa l-evalwazzjoni tal-awtonomija finanzjarja tal-Kummissjoni li hija mistennija fl-ewwel nofs tal-2017; jinnota li l-Istitut jittama li se jingħata awtonomija finanzjarja sħiħa qabel tmiem l-2016 u jitlob li l-Istitut jirrapporta lill-awtorità ta' kwittanza dwar l-iżviluppi relatati ma' din il-kwistjoni; |
20. |
Jinnota li, skont il-Qorti, minkejja li kien hemm raġuni valida, il-qafas operazzjonali kumpless tal-Istitut u l-problemi ta' ġestjoni tiegħu kienu ta' impediment għall-effikaċja kumplessiva tiegħu; jinnota li l-Istitut għandu l-kapaċità li jappoġġa l-iskema sħiħa tal-innovazzjoni minn negozji li għadhom jibdew għal proġetti mmotivati mill-innovazzjoni mmexxija minn ħafna sħab tal-KKI, madankollu, ibati minn nuqqas ta' koordinazzjoni fil-livell tal-Unjoni ma' Direttorati Ġenerali rilevanti tal-Kummissjoni, u l-interazzjoni bejn il-KKI u inizjattivi oħra tal-Unjoni mhijiex biżżejjed; |
21. |
Jinnota li l-Istitut jiffinanzja l-programm “EIT Digital Masters”, li jgħaqqad flimkien somma f'daqqa ta' massimu ta' EUR 8 000 għal kull student minbarra l-ispejjeż attwali, inklużi spejjeż indiretti abbażi ta' rata fissa; jinnota li, skont il-Qorti, dan il-mudell qatt ma ġie ddefinit formalment u ma jippermettix li ssir distinzjoni bejn l-attivitajiet koperti mis-somma f'daqqa u dawk koperti mill-ispejjeż reali; jinnota li, skont l-Istitut, huwa għandu jimxi lejn il-mudell ta' somma f'daqqa għall-finanzjament ta' tali programmi, sabiex jiġi ssimplifikat ir-rapportar tal-ispejjeż, ladarba jkun hemm biżżejjed data ta' statistika disponibbli biex jiġi stabbilit tali ammont wieħed; jistieden lill-Istitut jirrapporta lill-awtorità ta' kwittanza dwar l-implimentazzjoni ta' mudell ta' finanzjament ġdid; |
22. |
Jinnota li, skont ir-rapport tal-Qorti, entità legali tal-KKI waħda ħallset rinumerazzjoni addizzjonali fuq il-prestazzjoni ta' EUR 646 000 għal madwar 55 membru tal-persunal tagħha, abbażi tad-deċiżjoni tal-bord superviżorju tal-KKI u li l-Istitut rimborża kollox; jinnota li, skont l-opinjoni tal-Qorti, il-ħlas ta' tali remunerazzjoni bbażata fuq il-prestazzjoni bl-użu ta' fondi pubbliċi jikkostitwixxi prattika mhux tas-soltu; madankollu, jaċċetta li l-KKIs huma organizzazzjonijiet mmexxija min-negozju, immirati lejn is-sostenibilità finanzjarja u fejn l-użu ta' elementi varjabbli bħala parti minn rimunerazzjoni bażika jista' jipprovdi inċentiv qawwi għal prestazzjoni tajba u jiżgura li jkun hemm valur għall-flus; jinnota, barra minn hekk, li l-Orizzont 2020 jipprovdi espressament għal komponenti varjabbli ta' rimunerazzjoni bażika bħala spejjeż eliġibbli; jenfasizza l-fatt li l-kontribut tal-Istitut għall-pagi mħallsa lil persunal għall-ġestjoni tal-KKIs, inkluż ir-remunerazzjoni abbażi tal-prestazzjoni, għandu jinżamm taħt il-limitu massimu stabbilit mill-Istitut tagħha fil-ftehimiet ta' għotja tal-2016 u fil-futur; jinnota li taħt ir-regoli riformati b'żewġ limiti massimi li applikaw mill-2016, il-livelli għoljin ta' remunerazzjoni bbażata fuq il-prestazzjoni addizzjonali mħallsa fl-2015 ma għadhomx possibbli; |
23. |
Jinnota li l-prinċipju ta' ġestjoni finanzjarja tajba nkiser ukoll meta sieħeb tal-KKI akkwista servizzi ta' relazzjonijiet pubbliċi b'rati ta' kuljum li jvarjaw minn EUR 800 sa EUR 3 250 għal kull persuna, li ġew rimborżati kompletament ukoll mill-Istitut; |
24. |
Jinnota li, fl-2015, 45 membru tal-persunal tal-Istitut ipparteċipaw f'“avvenimenti oħrajn” li l-ispiża tagħhom kienet ta' EUR 10 730,21 (EUR 238,45 kull persuna); |
25. |
Jinnota bi tħassib li l-viżibilità ġenerali tal-Istitut hija baxxa u xi wħud mis-sħab tal-KKI mhumiex konxji dwar l-affiljazzjoni tagħhom mal-Istitut; jappella għal viżibilità aħjar u l-promozzjoni tal-marka tal-Istitut bħala komunità tal-innovazzjoni unika; jilqa' s-suċċess riċenti fl-inklużjoni ta' 18-il membru tal-komunita' tal-Istitut fil-lista Forbes 30 taħt it-30 sena, li fiha fost l-aqwa innovaturi u intraprendituri żgħażagħ Ewropej; |
26. |
Jirreferi, fir-rigward tal-kummenti l-oħrajn li jakkumpanjaw id-deċiżjoni tiegħu dwar il-kwittanza li huma ta' natura orizzontali, għar-riżoluzzjoni tiegħu tas-27 ta' April 2017 (4) dwar il-prestazzjoni, il-ġestjoni finanzjarja u l-kontroll tal-aġenziji. |
(1) Id-deċiżjoni tal-bord ta' tmexxija tal-Istitut Ewropew tal-Innovazzjoni u t-Teknoloġija (EIT) tas-27 ta' Diċembru 2013 dwar l-adozzjoni tar-regolament finanzjarju għall-Istitut Ewropew tal-Innovazzjoni u t-Teknoloġija.
(2) Id-deċiżjoni tal-Istitut Ewropew tal-Innovazzjoni u t-Teknoloġija tal-20 ta' April 2009 li tadotta r-regolament finanzjarju għall-Istitut Ewropew tal-Innovazzjoni u t-Teknoloġija.
(3) Ir-Regolament ta' Delega tal-Kummissjoni (UE) Nru 1268/2012 tad-29 ta' Ottubru 2012 dwar ir-regoli tal-applikazzjoni tar-Regolament (UE, Euratom) Nru 966/2012 tal-Parlament Ewropew u tal-Kunsill dwar ir-regoli finanzjarji applikabbli għall-baġit ġenerali tal-Unjoni (ĠU L 362, 31.12.2012, p. 1).
(4) Testi adottati, P8_TA(2017)0155 (ara l-paġna 372 ta' dan il-Ġurnal Uffiċjali).