52015TA1209(27)

This document is an excerpt from the EUR-Lex website

EUROPA
EUR-Lex home
EUR-Lex - 52015TA1209(27) - EN

Help

Search tips

Need more search options? Use the Advanced search

Document 52015TA1209(27)

Help

Rapport dwar il-kontijiet annwali tal-Aġenzija Ferrovjarja Ewropea għas-sena finanzjarja 2014 flimkien mar-risposta tal-Aġenzija

ĠU C 409, 9.12.2015, pp. 238–246 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Date of document:: 08/09/2015; Data ta' adozzjoni

Author:: Il-Qorti Ewropea tal-Awdituri
Form:: Rapport

Treaty:

Trattat dwar il-Funzjonament tal-Unjoni Ewropea

Legal basis:

12012E287

Link

Select all documents mentioning this document

Instruments cited:

Link

Related document(s):

32016B1546 Relation
32016B1548 Relation

EUROVOC descriptor:

Subject matter:

Estimi

Directory code:

01.60.20.00 Kwistjonijiet ġenerali, finanzjarji u istituzzjonali / Disposizzjonijiet finanzjarji u baġitarji / Baġit

HTML

PDF

Official Journal

9.12.2015

Il-Ġurnal Uffiċjali tal-Unjoni Ewropea

C 409/238

RAPPORT

dwar il-kontijiet annwali tal-Aġenzija Ferrovjarja Ewropea għas-sena finanzjarja 2014 flimkien mar-risposta tal-Aġenzija

(2015/C 409/27)

INTRODUZZJONI

L-Aġenzija Ferrovjarja Ewropea (l-Aġenzija Ewropea tal-Ferroviji) (minn hawn ’il quddiem “l-Aġenzija”, magħrufa wkoll bħala l-“ERA”), li tinsab f’Lille u f’Valenciennes, inħolqot bir-Regolament (KE) Nru 881/2004 tal-Parlament Ewropew u tal-Kunsill (1). Il-kompitu tal-Aġenzija huwa li żżid il-livell ta’ interoperabbiltà tas-sistemi ferrovjarji u li tiżviluppa approċċ komuni għas-sigurtà sabiex tikkontribwixxi għall-ħolqien ta’ settur ferrovjarju Ewropew aktar kompetittiv b’livell għoli ta’ sigurtà (2).

INFORMAZZJONI LI TAPPOĠĠA D-DIKJARAZZJONI TA’ ASSIGURAZZJONI

L-approċċ tal-awditjar meħud mill-Qorti jinkludi proċeduri analitiċi tal-awditjar, ittestjar dirett tat-tranżazzjonijiet u valutazzjoni tal-kontrolli ewlenin tas-sistemi ta’ superviżjoni u kontroll tal-Aġenzija. Dan huwa ssupplimentat b’evidenza pprovduta mix-xogħol ta’ awdituri oħrajn u analiżi tar-rappreżentazzjonijiet tal-maniġment.

DIKJARAZZJONI TA’ ASSIGURAZZJONI

Skont id-dispożizzjonijiet tal-Artikolu 287 tat-Trattat dwar il-Funzjonament tal-Unjoni Ewropea (TFUE), il-Qorti awditjat:

(a)	il-kontijiet annwali tal-Aġenzija, li jinkludu r-rapporti finanzjarji (3) u r-rapporti dwar l-implimentazzjoni tal-baġit (4) għas-sena finanzjarja li ntemmet fil-31 ta' Diċembru 2014, u

(b)	il-legalità u r-regolarità tat-tranżazzjonijiet li fuqhom huma bbażati dawk il-kontijiet.

Ir-responsabbiltà tal-maniġment

Il-maniġment huwa responsabbli mit-tħejjija u l-preżentazzjoni ġusta tal-kontijiet annwali tal-Aġenzija u mil-legalità u r-regolarità tat-tranżazzjonijiet ta’ bażi (5):

(a)

Ir-responsabbiltajiet tal-maniġment fir-rigward tal-kontijiet annwali tal-Aġenzija jinkludu t-tfassil, l-implimentazzjoni u ż-żamma ta’ sistema ta’ kontroll intern rilevanti għat-tħejjija u l-preżentazzjoni ġusta ta’ rapporti finanzjarji li jkunu ħielsa minn kwalunkwe dikjarazzjoni skorretta materjali, sew jekk minħabba frodi u sew jekk minħabba xi żball; l-għażla u l-applikazzjoni ta’ politiki kontabilistiċi xierqa fuq il-bażi tar-regoli kontabilistiċi adottati mill-uffiċjal tal-kontabbiltà tal-Kummissjoni (6); it-tħejjija ta’ stimi kontabilistiċi li jkunu raġonevoli fiċ-ċirkustanzi. Id-Direttur japprova l-kontijiet annwali tal-Aġenzija wara li l-uffiċjal tal-kontabbiltà tagħha jkun ħejjiehom fuq il-bażi tal-informazzjoni kollha disponibbli u jkun stabbilixxa nota biex takkumpanja l-kontijiet li fiha huwa jiddikjara, fost l-oħrajn, li għandu aċċertament raġonevoli li dawn jippreżentaw stampa vera u ġusta tal-pożizzjoni finanzjarja tal-Aġenzija fl-aspetti materjali kollha.

(b)

Ir-responsabbiltajiet tal-maniġment fir-rigward tal-legalità u r-regolarità tat-tranżazzjonijiet ta’ bażi u l-konformità mal-prinċipju ta’ ġestjoni finanzjarja tajba jikkonsistu fit-tfassil, l-implimentazzjoni u ż-żamma ta’ sistema ta’ kontroll intern effettiva u effiċjenti li tinkludi superviżjoni adegwata u miżuri xierqa għall-prevenzjoni ta’ irregolaritajiet u frodi u, jekk meħtieġ, proċedimenti legali għall-irkupru ta’ fondi mħallsa jew użati ħażin.

Ir-responsabbiltà tal-awditur

Ir-responsabbiltà tal-Qorti hija li, fuq il-bażi tal-awditu tagħha, tipprovdi lill-Parlament Ewropew u lill-Kunsill (7) b’dikjarazzjoni ta' assigurazzjoni dwar l-affidabbiltà tal-kontijiet annwali u dwar il-legalità u r-regolarità tat-tranżazzjonijiet ta’ bażi. Il-Qorti tmexxi l-awditu tagħha skont l-Istandards Internazzjonali tal-Awditjar u l-Kodiċijiet tal-Etika tal-IFAC u l-Istandards Internazzjonali tal-Istituzzjonijiet Supremi tal-Awditjar tal-INTOSAI. Dawn l-istandards jeżiġu li l-Qorti tippjana u twettaq l-awditu biex tikseb aċċertament raġonevoli dwar jekk il-kontijiet annwali tal-Aġenzija jkunux ħielsa minn kwalunkwe dikjarazzjoni skorretta materjali u dwar jekk it-tranżazzjonijiet li fuqhom huma bbażati jkunux legali u regolari.

L-awditu jinvolvi t-twettiq ta' proċeduri biex tinkiseb evidenza għall-awditjar dwar l-ammonti u d-divulgazzjonijiet fil-kontijiet u dwar il-legalità u r-regolarità tat-tranżazzjonijiet ta’ bażi. Il-proċeduri magħżula jiddependu fuq il-ġudizzju tal-awditur, li huwa bbażat fuq valutazzjoni tar-riskji ta’ dikjarazzjoni skorretta materjali tal-kontijiet u ta’ nuqqas ta’ konformità materjali mit-tranżazzjonijiet ta’ bażi mar-rekwiżiti fil-qafas legali tal-Unjoni Ewropea, sew jekk minħabba frodi u sew jekk minħabba xi żball. Meta jivvaluta dawn ir-riskji, l-awditur iqis kwalunkwe kontroll intern rilevanti għat-tħejjija u l-preżentazzjoni ġusta tal-kontijiet, kif ukoll is-sistemi ta’ superviżjoni u kontroll li jkunu implimentati biex jiġu żgurati l-legalità u r-regolarità tat-tranżazzjonijiet ta’ bażi, u jfassal proċeduri tal-awditjar li jkunu xierqa skont iċ-ċirkustanzi. L-awditu jinvolvi wkoll l-evalwazzjoni tal-adegwatezza tal-politiki kontabilistiċi, ir-raġonevolezza tal-istimi kontabilistiċi u l-preżentazzjoni kumplessiva tal-kontijiet. Fit-tħejjija ta' dan ir-rapport u d-Dikjarazzjoni ta' Assigurazzjoni, il-Qorti qieset ix-xogħol tal-awditjar li l-awditur indipendenti estern wettaq fuq il-kontijiet tal-Aġenzija kif stipulat fl-Artikolu 208(4) tar-Regolament Finanzjarju tal-UE (8).

Il-Qorti tqis li l-evidenza għall-awditjar miksuba hija suffiċjenti u xierqa biex tipprovdi bażi għad-dikjarazzjoni ta’ assigurazzjoni tagħha.

Opinjoni dwar l-affidabbiltà tal-kontijiet

Fl-opinjoni tal-Qorti, il-kontijiet annwali tal-Aġenzija jippreżentaw b’mod ġust, fl-aspetti materjali kollha, il-pożizzjoni finanzjarja tagħha fil-31 ta’ Diċembru 2014 u r-riżultati tal-operazzjonijiet tagħha u l-flussi tal-flus tagħha għas-sena li ntemmet dakinhar, skont id-dispożizzjonijiet tar-Regolament Finanzjarju tagħha u r-regoli kontabilistiċi adottati mill-uffiċjal tal-kontabbiltà tal-Kummissjoni.

Opinjoni dwar il-legalità u r-regolarità tat-tranżazzjonijiet li fuqhom huma bbażati l-kontijiet

Fl-opinjoni tal-Qorti, it-tranżazzjonijiet li fuqhom huma bbażati l-kontijiet annwali għas-sena li ntemmet fil-31 ta’ Diċembru 2014 huma legali u regolari fl-aspetti materjali kollha.

10.	Il-kummenti li ġejjin ma jixħtux dubju fuq l-opinjonijiet tal-Qorti.

KUMMENTI DWAR IL-ĠESTJONI BAĠITARJA

11.

Il-livell kumplessiv ta' approprjazzjonijiet impenjati kien għoli f'livell ta' 97 %. Madankollu, kien hemm ukoll livell għoli ta' approprjazzjonijiet impenjati riportati għall-baġit operazzjonali (it-Titolu III) f'livell ta' EUR 2,2 miljun, jiġifieri 37,7 % (2013: EUR 1,6 miljun, jiġifieri 25 %) minħabba fi proġetti operazzjonali li ddewmu (sigurtà, Is-Sistema Ewropea tal-Ġestjoni tat-Traffiku Ferrovjarju – ERTMS) u proġetti tal-IT li ddewmu. Din is-sitwazzjoni tmur kontra l-prinċipju baġitarju tal-annwalità.

KUMMENTI OĦRA

12.

Meta kienet qed timplimenta kuntratt qafas multiplu dwar is-segwitu tal-proġett ERTMS, l-Aġenzija reġgħet fetħet proċedura ta’ kompetizzjoni għall-għoti ta’ kuntratt speċifiku. Madankollu, kemm il-ponderazzjoni eċċessiva tal-kwalità kif ukoll il-valur massimu għoli tal-kuntratt fil-ftuħ mill-ġdid tal-offerta rriżultaw f’offerti finanzjarji qrib għall-valur massimu tal-kuntratt. Dan huwa f’kontradizzjoni mal-objettiv tal-ftuħ mill-ġdid ta' proċedura ta’ kompetizzjoni, li huwa li tiġi żgurata kompetizzjoni fuq il-prezz.

SEGWITU GĦALL-KUMMENTI MIS-SNIN PREĊEDENTI

13.

Ħarsa ġenerali lejn l-azzjonijiet korrettivi li ttieħdu b’rispons għall-kummenti tal-Qorti mis-snin preċedenti tingħata fl-Anness I.

Dan ir-Rapport ġie adottat mill-Awla IV, immexxija mis-Sur Milan Martin CVIKL, Membru tal-Qorti tal-Awdituri, fil-Lussemburgu fil-laqgħa tagħha tat-8 ta' Settembru 2015.

Għall-Qorti tal-Awdituri

Vítor Manuel da SILVA CALDEIRA

President

(1) ĠU L 220, 21.6.2004, p. 3.

(2) L-Anness II jagħti sommarju tal-kompetenzi u l-attivitajiet tal-Aġenzija. Huwa ppreżentat għal skopijiet ta’ informazzjoni.

(3) Dawn jinkludu l-karta tal-bilanċ u r-rapport tal-prestazzjoni finanzjarja, it-tabella tal-flussi tal-flus, ir-rapport tat-tibdil fl-assi netti u sommarju tal-politiki kontabilistiċi sinifikanti u noti oħra ta’ spjegazzjoni.

(4) Dawn jinkludu l-kont tar-riżultat baġitarju u l-anness għall-kont tar-riżultat baġitarju.

(5) L-Artikoli 39 u 50 tar-Regolament ta' Delega tal-Kummissjoni (UE) Nru 1271/2013 (ĠU L 328, 7.12.2013, p. 42).

(6) Ir-regoli kontabilistiċi adottati mill-uffiċjal tal-kontabbiltà tal-Kummissjoni huma dderivati mill-Istandards Internazzjonali tal-Kontabbiltà għas-Settur Pubbliku (IPSAS) maħruġa mill-Federazzjoni Internazzjonali tal-Kontabilisti jew, fejn rilevanti, l-Istandards Internazzjonali tal-Kontabbiltà (IAS)/l-Istandards Internazzjonali tar-Rappurtar Finanzjarju (IFRS) maħruġa mill-Bord dwar l-Istandards Internazzjonali tal-Kontabbiltà.

(7) L-Artikolu 107 tar-Regolament (UE) Nru 1271/2013.

(8) Ir-Regolament (UE, Euratom) Nru 966/2012 tal-Parlament Ewropew u tal-Kunsill (ĠU L 298, 26.10.2012, p. 1).

ANNESS I

Segwitu għall-kummenti mis-snin preċedenti

Sena

Kumment tal-Qorti

Status tal-azzjoni korrettiva

(Ikkompletata/Għadha għaddejja/Pendenti/M/A)

2011

Ir-Regolament Fundatur tal-Aġenzija jistabbilixxi perjodi massimi ta’ impjieg għall-persunal temporanju rreklutat mill-Aġenzija mill-professjonisti tas-settur ferrovjarju. Skont dawn id-dispożizzjonijiet, l-Aġenzija se jkollha tissostitwixxi nofs il-persunal operazzjonali tagħha fil-perjodu 2013-2015, u dan jista’ joħloq taqlib kbir fl-attivitajiet operazzjonali tal-Aġenzija (1).

Għadha għaddejja

2011

Hemm lok biex jittejbu l-proċeduri ta’ reklutaġġ tal-Aġenzija sabiex jiġu żgurati bis-sħiħ it-trasparenza u t-trattament indaqs tal-kandidati. Pereżempju, l-avviżi ta’ postijiet battala ma tawx informazzjoni dwar l-għadd minimu ta’ snin ta’ studji postsekondarji jew universitarji meħtieġa għalkemm dan intuża bħala kriterju tal-għażla. Il-marki minimi meħtieġa għall-intervisti u għal-listi ta’ riżerva, il-punteġġi tal-kriterji tal-għażla, il-mistoqsijiet għat-testijiet bil-fomm u bil-miktub u l-ponderazzjonijiet bejn it-testijiet bil-miktub u bil-fomm ma ġewx stabbiliti qabel ma ġew eżaminati l-applikazzjonijiet.

Għadha għaddejja

2012

L-Aġenzija ma tikkonformax mal-Istandard ta' Kontroll Intern tagħha fir-rigward tal-kontinwità tal-operat; ma hemmx pjanijiet approvati għall-Kontinwità tan-Negozju u l-Irkupru minn Diżastru fl-IT.

Ikkompletata

2013

Hemm lok biex jittejbu l-preċiżjoni u d-dokumentazzjoni ta’ informazzjoni użati fil-proċeduri ta’ akkwist tal-Aġenzija.

Ikkompletata

2013

Skont ir-regolament fundatur tal-Aġenzija (1), il-persunal għandu jikkonsisti minn:—

—	impjegati temporanji reklutati mill-Aġenzija għal massimu ta’ ħames snin minn fost professjonisti mis-settur ferrovjarju, abbażi tal-kwalifiki u l-esperjenza tagħhom fil-qasam tas-sigurtà u l-interoperabbiltà ferrovjarja;

—	uffiċjali assenjati jew sekondati mill-Kummissjoni jew mill-Istati Membri għal massimu ta’ ħames snin; u

—	ħaddiema oħra biex iwettqu kompiti implimentattivi jew segretarjali.

Fi tmiem l-2013, 136 impjegat temporanju kienu jaħdmu għall-Aġenzija. Ir-regolament fundatur jistipula wkoll li matul l-ewwel 10 snin ta' operat tal-Aġenzija, il-perjodu ta’ 5 snin għalihom jista’ jiġi estiż b'massimu ta’ 3 snin oħra meta meħtieġ biex tiġi garantita l-kontinwità tan-negozju. L-Aġenzija użat din il-possibbiltà bħala prattika standard sa nofs l-2013. Barra minn hekk, fil-perjodu minn Settembru 2013 sa Marzu 2014, l-Aġenzija impjegat mill-ġdid erba’ impjegati temporanji (għal perjodu ta’ tmien snin) li l-kuntratti tagħhom mal-ERA kienu intemmu fl-2013 wara l-perjodu massimu ta’ tmien snin.

Fl-2013, l-Aġenzija adottat deċiżjoni ġdida bi ftehim mal-Bord Amministrattiv tagħha u l-Kummissjoni, skont liema l-impjegati temporanji jista’ jkollhom kuntratti indefiniti. Il-proposta għal regolament fundatur rivedut għall-ERA tinkludi dispożizzjonijiet simili iżda mhuwiex ċar jekk u meta din se tiġi adottata mill-Parlament u mill-Kunsill.

Għadha għaddejja

2013

L-Aġenzija tinsab f’Lille u f'Valenciennes. Kif semmiet il-Qorti fir-Rapport Annwali Speċifiku tagħha għas-sena finanzjarja 2006, huwa probabbli li l-ispejjeż jistgħu jitnaqqsu jekk l-operat kollu jiġi ċċentralizzat f’post wieħed. Dan għandu mnejn ukoll jiffaċilita ftehim komprensiv dwar is-sede mal-Istat Membru ospitanti, biex b’hekk jiġu kkjarifikati l-kundizzjonijiet li taħthom l-Aġenzija u l-persunal tagħha joperaw.

Għadha għaddejja

(1) L-Artikolu 24(3) tar-Regolament (KE) Nru 881/2004.

ANNESS II

L-Aġenzija Ferrovjarja Ewropea (Lille u Valenciennes)

Kompetenzi u attivitajiet

Oqsma ta’ kompetenza tal-Unjoni li jidderivaw mit-Trattat

(L-Artikolu 91(1) tat-Trattat dwar il-Funzjonament tal-Unjoni Ewropea)

“Għall-finijiet tal-implimentazzjoni tal-Artikolu 90, u filwaqt li jitqiesu l-fatturi partikolari tat-trasport, il-Parlament Ewropew u l-Kunsill, li jaġixxu skont il-proċedura leġiżlattiva ordinarja u wara li jikkonsultaw mal-Kumitat Ekonomiku u Soċjali u l-Kumitat tar-Reġjuni, għandhom jistabbilixxu:

(a)	regoli komuni li japplikaw għat-trasport internazzjonali lejn jew mit-territorju ta' Stat Membru jew li jaqsam it-territorju ta' Stat Membru wieħed jew aktar,

(b)	il-kundizzjonijiet li jirregolaw il-mod li bih trasportaturi mhux residenti jistgħu joperaw servizzi ta' trasport f’xi Stat Membru,

(c)	miżuri li jtejbu s-sigurtà fit-trasport,

(d)	provvedimenti oħra xierqa.”

Kompetenzi tal-Aġenzija

(Ir-Regolament (KE) Nru 881/2004 tal-Parlament Ewropew u tal-Kunsill)

Għanijiet

Li tikkontribwixxi, f'materji tekniċi, għall-implimentazzjoni tal-leġiżlazzjoni tal-Unjoni mmirata lejn:

—	it-titjib tal-pożizzjoni kompetittiva tas-sistemi ferrovjarji,

—	l-iżvilupp ta’ approċċ komuni għas-sigurtà fis-sistema ferrovjarja Ewropea,

sabiex tikkontribwixxi għall-ħolqien ta’ żona ferrovjarja Ewropea mingħajr fruntieri u għall-garanzija ta’ livell għoli ta’ sigurtà.

Kompiti

Li tindirizza rakkomandazzjonijiet lill-Kummissjoni dwar:

—	il-metodi komuni tas-sigurtà (CSM) u l-miri komuni tas-sigurtà (CSTs) stipulati fid-Direttiva fuq is-Sigurtà tal-Linji tal-Ferrovija (2004/49/KE),

—	iċ-ċertifikati tas-sigurtà u l-miżuri fil-qasam tas-sigurtà,

—	l-iżvilupp ta’ speċifikazzjonijiet tekniċi għall-interoperabbiltà,

—	il-kompetenzi vokazzjonali,

—	ir-reġistrazzjoni ta’ vetturi ferrovjarji.

Li tagħti opinjonijiet dwar:

—	ir-regoli nazzjonali tas-sigurtà,

—	il-monitoraġġ tal-kwalità tax-xogħol tal-korpi nnotifikati,

—	l-interoperabbiltà tan-netwerk trans-Ewropew.

3.	Li tikkoordina lil korpi nazzjonali: Il-koordinazzjoni tal-awtoritajiet nazzjonali tas-sigurtà u l-entitajiet (korpi) investigattivi nazzjonali (kif deskritt fid-Direttiva 2004/49/KE, l-Artikoli 17 u 21).

Pubblikazzjonijiet u databases:

—	rapport dwar il-prestazzjoni tas-sigurtà (kull sentejn),

—	rapport dwar il-progress fl-interoperabbiltà (kull sentejn),

—	database pubbliku ta’ dokumenti tas-sigurtà,

—	reġistru pubbliku ta’ dokumenti dwar l-interoperabbiltà.

Governanza

Bord Amministrattiv

Magħmul minn rappreżentant wieħed minn kull Stat Membru, erba’ rappreżentanti mill-Kummissjoni, u sitt rappreżentanti, mingħajr dritt għall-vot, mis-setturi professjonali kkonċernati.

Direttur

Maħtur mill-Bord Amministrattiv fuq proposta mill-Kummissjoni.

Awditu estern

Il-Qorti Ewropea tal-Awdituri.

Awtorità ta’ kwittanza

Il-Parlament Ewropew, fuq rakkomandazzjoni mill-Kunsill.

Riżorsi disponibbli għall-Aġenzija fl-2014 (2013)

Baġit

EUR 25,7(25,8) miljun

Persunal fil-31 ta’ Diċembru 2014

Postijiet elenkati fit-tabella tal-persunal: 140 (143)

Postijiet okkupati fil-31.12.2014: 132 (135)

Persunal ieħor: 19 (15)

Total tal-persunal: 151 (150), li minnhom allokati għal:

—	kompiti operazzjonali: 117 (116)

—	kompiti amministrattivi: 34 (34)

Prodotti u servizzi fl-2014

Żvilupp ta’ pjan ta' programm li jistabbilixxi l-miri intermedjarji għat-twassil ta' ċertifikat uniku tas-sigurtà.

Monitoraġġ ta' u rapport ta' kull sentejn dwar il-prestazzjoni tas-sigurtà.

Evalwazzjoni tat-traspożizzjoni tad-Direttiva fuq is-Sigurtà.

Awditi tal-ASN.

Valutazzjonijiet tan-NIB.

Abbozzar ta’ rakkomandazzjoni dwar Metodu Komuni tas-Sigurtà. rivedut għall-valutazzjoni tas-CSTs u l-NRVs.

Rappurtar annwali dwar is-CSTs.

Tmexxija ta' programm pilota fuq matriċi ta’ monitoraġġ regolatorja ġdida.

Analiżi tal-qafas attwali dwar il-valutazzjoni u s-superviżjoni mill-ASN.

Implimentazzjoni ta' TSIs b’ambitu ġeografiku estiż u gwida, appoġġ u għoti ta’ pariri lis-settur ferrovjarju u lill-Istati Membri meta jkunu qed jimplimentaw it-TSIs telematiċi.

Reviżjoni tal-PRM TSI.

Għeluq tal-punti miftuħin li fadal.

Żvilupp tad-Database ta’ Dokumenti ta’ Referenza.

Faċilitar tal-prova tal-awtorizzazzjonijiet għal “one-stop-shop”.

Faċilitar tal-migrazzjoni għar-Raba' Pakkett Ferrovjarju.

Segwitu tal-iżvilupp, l-ittestjar u l-implimentazzjoni tal-ERTMS.

Żvilupp ta’ pjan direzzjonali li jippermetti l-komunikazzjonijiet tal-ETCS dwar teknoloġiji tar-radju skambjati f'pakkett (packet-swtiched).

Żvilupp u pubblikazzjoni ta’ dokumenti ta’ linji gwida għas-simplifikazzjoni u l-istandardizzazzjoni tal-inġinerija fir-rigward tal-ERTMS.

Appoġġ ta' operazzjonijiet armonizzati mal-ERTMS.

Kooperazzjoni mal-Aġenzija Eżekuttiva INEA fl-evalwazzjoni ta’ proġetti speċifiċi tal-ERTMS.

Implimentazzjoni kontinwa tal-għodod u r-riżorsi xierqa sabiex issir organizzazzjoni moderna li tista' tadatta malajr għal kwalunkwe bidla.

Sors: Anness ipprovdut mill-Aġenzija.

IT-TWEĠIBA TAL-AĠENZIJA

11.	L-Aġenzija ħadet notta tal-kumment tal-Qorti u kompliet ittejjeb il-monitoraġġ tal-implimentazzjoni baġitarja ta', b'mod partikolari, it-titolu III li għandha tgħin biex jintlaħaq livell aċċettabbli ta' approprjazzjonijiet li għandhom jiġu riportati fil-futur.

12.	L-Aġenzija ħadet nota tal-kumment tal-Qorti u qiegħda tħejji gwida interna dwar l-użu tal-ftuħ mill-ġdid ta' proċedura ta' kompetizzjoni biex tiżgura kompetizzjoni aħjar dwar il-prezz.

Top

All

Choose the experimental features you want to try