4.11.2016   

MT

Il-Ġurnal Uffiċjali tal-Unjoni Ewropea

C 407/98

—

wara li kkunsidra t-talba għat-tneħħija tal-immunità ta' Udo Voigt, mibgħuta fid-9 ta' Frar 2015 mill-imħallef li jippresiedi l-Kammergericht ta' Berlin (Ref. (3) 161 Ss 189/14 (14/15)) u mħabbra fis-seduta tal-plenarja tal-25 ta' Marzu 2015,

—

wara li sema' lil Udo Voigt skont l-Artikolu 9(5) tar-Regoli ta' Proċedura tiegħu,

—

wara li kkunsidra l-Artikoli 8 u 9 tal-Protokoll Nru 7 dwar il-Privileġġi u l-Immunitajiet tal-Unjoni Ewropea, kif ukoll l-Artikolu 6(2) tal-Att tal-20 ta' Settembru 1976 dwar l-elezzjoni tal-Membri tal-Parlament Ewropew b'suffraġju universali dirett,

—

wara li kkunsidra s-sentenzi tal-Qorti tal-Ġustizzja tal-Unjoni Ewropea tat-12 ta' Mejju 1964, tal-10 ta' Lulju 1986, tal-15 u l-21 ta' Ottubru 2008, tad-19 ta' Marzu 2010, tas-6 ta' Settembru 2011 u tas-17 ta' Jannar 2013 (1),

—

wara li kkunsidra l-Artikolu 46 tal-Liġi Fundamentali tar-Repubblika Federali tal-Ġermanja,

—

wara li kkunsidra l-Artikolu 5(2), u l-Artikoli 6(1), u (9) tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Affarijiet Legali (A8-0192/2015),

A.

billi l-imħallef li jippresiedi l-Kammergericht ta' Berlin ressaq talba għat-tneħħija tal-immunità parlamentari ta' Udo Voigt b'rabta ma' azzjoni legali dwar reat allegat;

B.

billi, skont l-Artikolu 9 tal-Protokoll Nru 7 dwar il-Privileġġi u l-Immunitajiet tal-Unjoni Ewropea, il-Membri jgawdu, fit-territorju tal-Istat tagħhom stess, l-immunitajiet mogħtija lil membri tal-parlament ta' pajjiżhom;

C.

billi, skont l-Artikolu 46(2) tal-Liġi Fundamentali tar-Repubblika Federali tal-Ġermanja, membru tal-parlament ma jistax jiġi miżmum responsabbli jew arrestat għal reat punibbli mingħajr l-awtorizzazzjoni tal-parlament, għajr għal ċerti ċirkostanzi speċifiċi;

D.

billi Udo Voigt jinsab akkużat b'inċitament u insulti kollettivi f'pubblikazzjoni maħruġa mill-Partit Demokratiku Nazzjonali tal-Ġermanja, li hu kien responsabbli għaliha bħala l-president tal-partit, fi żmien it-Tazza tad-Dinja tal-FIFA tal-2006;

E.

billi l-akkużi huma manifestament mhux relatati mal-pożizzjoni ta' Udo Voigt bħala Membru tal-Parlament Ewropew u jirriżultaw mill-pożizzjoni tiegħu bħala President tal-Partit Demokratiku Nazzjonali tal-Ġermanja;

F.

billi l-azzjonijiet allegati mhumiex marbuta ma' opinjonijiet espressi jew voti mitfugħa mill-Membru tal-Parlament Ewropew fil-qadi ta' dmirijietu skont l-Artikolu 8 tal-Protokoll Nru 7 dwar il-Privileġġi u l-Immunitajiet tal-Unjoni Ewropea, filwaqt li jiġi kkunsidrat li l-akkuża hija marbuta ma' azzjonijiet imwettqa fl-2006, ferm qabel ma Udo Voigt ġie elett fil-Parlament Ewropew fl-2014;

G.

billi Udo Voigt isostni li t-tul tal-proċeduri, li bdew fl-2006, għandu l-għan li jostakolaw ix-xogħol parlamentari tiegħu; billi, madankollu, it-talba preżenti għat-tneħħija tal-immunità hija sostnuta bi proċeduri ulterjuri li nfetħu bħala azzjoni ta' rimedju minn Udo Voigt innifsu, u għaldaqstant il-prinċipju nemo auditur propriam turpitudinem allegans japplika għal din l-oġġezzjoni;

H.

billi ma hemm l-ebda suspett li l-proċeduri huma attentat ta' ostakolu għax-xogħol parlamentari ta' Udo Voigt (fumus persecutionis), inkwantu li dawn bdew għadd ta' snin qabel ma huwa ħa l-kariga tas-siġġu tiegħu fil-Parlament Ewropew;

1.

Jiddeċiedi li jneħħi l-immunità ta' Udo Voigt;

2.

Jagħti istruzzjonijiet lill-President tiegħu sabiex jgħaddi minnufih din id-deċiżjoni u r-rapport tal-kumitat responsabbli tiegħu lill-Kammergericht ta' Berlin u lil Udo Voigt.