EUR-Lex Access to European Union law
This document is an excerpt from the EUR-Lex website
Document 52013AE1233
Opinion of the European Economic and Social Committee on the ‘Communication from the Commission to the European Parliament, the Council, the European Economic and Social Committee and the Committee of the Regions — Protecting businesses against misleading marketing practices and ensuring effective enforcement — Review of Directive 2006/114/EC concerning misleading and comparative advertising’ COM(2012) 702 final
Opinjoni tal-Kumitat Ekonomiku u Soċjali Ewropew dwar “Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Il-protezzjoni ta’ negozji kontra prattiki qarrieqa ta’ kummerċjalizzazzjoni u biex jiġi garantit infurzar effettiv — Analiżi tad-Direttiva 2006/114/KE dwar reklamar qarrieqi u komparattiv” COM(2012) 702 final
Opinjoni tal-Kumitat Ekonomiku u Soċjali Ewropew dwar “Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Il-protezzjoni ta’ negozji kontra prattiki qarrieqa ta’ kummerċjalizzazzjoni u biex jiġi garantit infurzar effettiv — Analiżi tad-Direttiva 2006/114/KE dwar reklamar qarrieqi u komparattiv” COM(2012) 702 final
ĠU C 271, 19.9.2013, p. 61–65
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
19.9.2013 |
MT |
Il-Ġurnal Uffiċjali tal-Unjoni Ewropea |
C 271/61 |
Opinjoni tal-Kumitat Ekonomiku u Soċjali Ewropew dwar “Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Il-protezzjoni ta’ negozji kontra prattiki qarrieqa ta’ kummerċjalizzazzjoni u biex jiġi garantit infurzar effettiv — Analiżi tad-Direttiva 2006/114/KE dwar reklamar qarrieqi u komparattiv”
COM(2012) 702 final
2013/C 271/11
Relatur: is-Sur PEGADO LIZ
Nhar id-19 ta’ Frar 2013, il-Kummissjoni Ewropea ddeċidiet, b’konformità mal-Artikolu 304 tat-Trattat dwar il-Funzjonament tal-Unjoni Ewropea, li tikkonsulta lill-Kumitat Ekonomiku u Soċjali Ewropew dwar
il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni – Il-protezzjoni ta’ negozji kontra prattiki qarrieqa ta’ kummerċjalizzazzjoni u biex jiġi garantit infurzar effettiv – Analiżi tad-Direttiva 2006/114/KE dwar reklamar qarrieqi u komparattiv
COM(2012) 702 final.
Is-Sezzjoni Speċjalizzata għas-Suq Uniku, il-Produzzjoni u l-Konsum, inkarigata sabiex tipprepara l-ħidma tal-Kumitat dwar is-suġġett, adottat l-Opinjoni tagħha nhar id-29 ta’ April 2013.
Matul l-490 sessjoni plenarja tiegħu li saret fit-22 u t-23 ta’ Mejju 2013 (seduta tat-22 ta’ Mejju), il-Kumitat Ekonomiku u Soċjali Ewropew adotta din l-opinjoni b’129 vot favur u 8 astensjonijiet.
1. Konklużjonijiet u rakkomandazzjonijiet
1.1 |
Il-KESE huwa tal-fehma li din il-Komunikazzjoni u l-proposti tagħha jeħtieġu attenzjoni u diskussjoni partikolari. |
1.2 |
Il-KESE jappoġġa l-fehma tal-Kummissjoni li hija meħtieġa regolamentazzjoni iktar stretta sabiex jiġu pprojbiti b’mod effettiv ċerti prattiki ta’ bejgħ aggressivi min-naħa tal-kumpaniji ta’ direttorju, u li jiġu inforzati sanzjonijiet eżemplari u disważivi kontrihom. |
1.3 |
Minħabba l-urġenza apparenti biex tittieħed pożizzjoni immedjata dwar din il-kwistjoni, u d-daqs u l-gravità preżunti ta’ dawn il-prattiki f’termini ekonomiċi fil-livell Ewropew, il-KESE jaċċetta li l-Kummissjoni għandha tippreżenta immedjatament proposta leġislattiva speċifika dwar din il-kwistjoni, abbażi ta’ valutazzjoni tal-impatt. |
1.4 |
Il-KESE jemmen li għal dan il-għan għandu jiġi adottat regolament qafas, possibbilment żviluppat permezz ta’ atti ddelegati, sabiex jiġi żgurat infurzar iktar uniformi u effettiv fl-Istati Membri kollha. |
1.5 |
Fid-dawl tan-natura tagħha, il-KESE jemmen li l-bażi legali adatta għandha tinkludi, iżda ma tistax tkun limitata għad-dispożizzjonijiet tat-Trattat dwar is-suq intern u l-kamp ta’ applikazzjoni tagħha m’għandux ikun ristrett għal tranżazzjonijiet transkonfinali. |
1.6 |
Barra minn hekk, il-KESE jwissi dwar il-ħtieġa li tingħata atttenzjoni lin-natura trans-Ewropea ta’ ħafna minn dawn il-prattiki, li jirrikjedu azzjoni internazzjonali koordinata. |
1.7 |
Madankollu, il-KESE jemmen li l-aħjar mod kif jiġu stabbiliti regoli koerenti u konsistenti li jipprojbixxu prattiki qarrieqa ta’ kummerċjalizzazzjoni huwa li ssir reviżjoni konġunta tad-Direttiva 2006/114/KE u d-Direttiva 2005/29/KE sabiex jiġu indirizzati fl-istess ħin ir-relazzjonijiet bejn in-negozji u dawk bejn in-negozji u l-konsumaturi, billi jiġu preżervati l-ispeċifiċitajiet tat-tnejn li huma fi ħdan qafas komuni, u għal din ir-raġuni jħeġġeġ lill-Kummissjoni biex tibda azzjoni fuq medda qasira ta’ żmien. |
1.8 |
Il-KESE jħeġġeġ lill-Kummissjoni biex tiżviluppa u tinforza miżuri komplementarji sabiex jitjiebu l-informazzjoni u t-tixrid, il-kooperazzjoni bejn l-awtoritajiet amministrattivi, il-pjattaformi pubbliċi-privati u l-organizzazzjonijiet rappreżentattivi tal-partijiet interessati, kif ukoll il-mekkaniżi ta’ reazzjoni bil-ħeffa sabiex jitwaqqfu dawn il-prattiki u jiġi żgurat kumpens għall-ħsara, l-iżjed permezz tal-ħolqien immedjat ta’ sistema ġudizzjarja Ewropea għal azzjonijiet ta’ grupp, li tħabbar iktar minn tletin sena ilu u mbagħad ġie pospost diversi drabi. |
1.9 |
Il-KESE jesprimi r-rieda tiegħu li jinvolvi l-membri tiegħu fil-ħidma futura f’dan il-qasam, billi jemmen li jista’ jikkontribwixxi l-esperjenza tal-membri tiegħu, li huma rappreżentanti tas-soċjetà ċivili tat-tliet gruppi ta’ interess rappreżentati fi ħdan il-KESE u li huma partikolarment adatti u kkwalifikati għal dan ix-xogħol. |
2. L-isfond u l-aspetti soċjoekonomiċi tal-proposta
2.1 |
Mhux kollox jista’ jiġi ġġustifikat f’isem in-negozju. Fil-qasam tal-komunikazzjoni kummerċjali bejn in-negozji, b’mod partikolari, hemm regoli bażiċi li huwa essenzjali li jiġu rispettati sabiex jiġu żgurati kompetizzjoni bla distorsjonijiet u suq li jiffunzjona tajjeb. U jekk ma jiġux rispettati b’mod volontarju, ikollhom isiru obbligatorji u infurzati. |
2.2 |
F’din il-Komunikazzjoni l-Kummissjoni tressaq sensiela ta’ miżuri biex jiġu miġġielda ċerti prattiki qarrieqa ta’ kummerċjalizzazzjoni li jwettqu l-kumpaniji tar-reklamar, b’mod speċjali dawk li joriġinaw minn skemi qarrieqa tal-kumpaniji ta’ direttorju. |
2.3 |
L-għan huwa li jingħata ħarsien aħjar lin-negozju, b’mod speċjali fejn huma kkonċernati l-SMEs, l-iżjed b’rabta ma’ prattiki li jikkonsistu f’kumpaniji ta’ direttorju li jibagħtu talbiet mhux mixtieqa u mhux mitluba fejn jistiednu lin-negozji jirreġistraw jew jaġġornaw id-dettalji tagħhom f’direttorju tan-negozju, taparsi b’xejn, meta fil-fatt ikunu soġġetti għal miżati annwali sussegwenti li ma jkunux ġewx negozjati jew aċċettati minn qabel. |
2.4 |
Wara li wettqet konsultazzjoni pubblika, il-Kummissjoni ħabbret l-intenzjoni tagħha li ssaħħaħ id-Direttiva 2006/114/KE li tikkonċerna reklamar qarrieqi u komparattiv billi tipprojbixxi b’mod espliċitu prattiki bħall-ħabi tal-intenzjoni kummerċjali ta’ komunikazzjoni ta’ reklamar u, fl-istess waqt, issaħħaħ l-infurzar transkonfinali. |
2.5 |
Il-Komunikazzjoni ssemmi wkoll:
|
2.6 |
Il-Kummissjoni testima li l-ħsara finanzjarja kkawżata minn dan it-tip ta’ attività tilħaq bejn EUR 1 000 u 5 000 fis-sena għal kull kumpanija kkonċernata. |
3. Kummenti dwar il-kontenut tal-Komunikazzjoni
3.1 Aspetti sostantivi
3.1.1 |
Kif diġà ntqal f’Opinjoni preċedenti, il-KESE jirrikonoxxi li l-komunikazzjoni kummerċjali b’mod ġenerali, u r-reklamar b’mod partikolari, fil-forom kollha tagħha, taqdi rwol soċjali u ekonomiku importanti ħafna, li ġie deskritt fil-qosor b’mod tajjeb mill-International Advertising Association (IAA – l-Assoċjazzjoni Internazzjonali tar-Reklamar), li l-fehma tagħha tenfasizza b’mod partikolari r-rwol tal-komunikazzjoni kummerċjali fit-tixrid tal-innovazzjoni, it-tħeġġiġ tal-kreattività u tad-divertiment, biex tipprovdi inċentivi għall-kompetizzjoni u twessa’ l-għażla (1). |
3.1.1.1 |
Minkejja dan, filwaqt li huwa ċar li xi kumpaniji tar-reklamar jaġixxu b’mod mhux korrett fil-mod kif jippubbliċizzaw il-prodotti tagħhom u kif jippruvaw jiġbdu l-klijenti, huwa importanti għall-Kummissjoni li tenfasizza l-fatt li għalkemm ħafna ilmenti dwar prattiki qarrieqa jinvolvu kumpaniji li jwettqu dan it-tip ta’ attività, dan ma jfissirx li anke fil-każ partikolari ta’ kumpaniji ta’ direttorju mhijiex attività leġittima essenzjali għall-ħajja ekonomika tal-kumpaniji li jużawhom biex jirreklamaw l-attivitajiet tagħhom. |
3.1.2 |
Il-KESE jirrikonoxxi r-rilevanza u ż-żmien adatt ta’ din il-Komunikazzjoni anke jekk tiffoka l-iżjed fuq il-problemi li jinħolqu mill-mod kif il-kumpaniji ta’ direttorju jiġbdu l-klijenti. |
3.1.3 |
Il-KESE josserva li l-Kummissjoni għandha raġun tenfasizza n-natura transkonfinali ta’ din il-problema u li tixtieq tiggarantixxi mhux biss regoli u prattiki adegwati iżda anke li dawn jiġu implimentati b’mod effiċjenti, u li jistgħu jiġu monitorjati u soġġetti għal superviżjoni u pieni. |
3.1.4 |
Il-KESE jiddispjaċih li l-Komunikazzjoni ma ġietx preċeduta minn valutazzjoni tal-impatt adatta li kienet tipprovdi argumenti iktar b’saħħithom għall-għażliet proposti billi l-ispejjeż u l-benefiċċji fil-fatt ma ġewx identifikati jew evalwati b’mod ċar. |
3.1.4.1 |
Barra minn hekk, ġiet tard wisq il-valutazzjoni tal-impatt li kienet diġà ġiet imħabbra mill-Kummissjoni fil-laqgħa tagħha tal-partijiet interessati tal-1 ta’ Marzu 2013, u anke jekk f’dan l-istadju l-ambitu u l-kontenut ġenerali tagħha mhumiex magħrufa, mhijiex deċiżiva biżżejjed biex tippermetti li ssir għażla informata. |
3.1.5 |
Barra minn hekk, mhux biss mill-perspettiva pura ta’ interpretazzjoni legali iżda wkoll f’termini ta’ protezzjoni aktar effiċjenti u effettiva tan-negozju, il-KESE mhuwiex ċert li l-kwistjoni fil-qofol tat-tħassib tal-Kummissjoni tista’ fil-fatt tiġi mħaddna fid-direttiva li l-Kummissjoni qed tipproponi li tirrevedi. |
3.1.5.1 |
Fil-fatt, il-prattika li qed tiġi kkunsidrata hija komunikazzjoni kummerċjali f’sens usa’; mhuwiex reklamar iżda tattika ta’ bejgħ aggressiva u qarrieqa, li għandha titqiegħed fil-kuntest ħafna iżjed wiesa’ ta’ prattiki kummerċjali mhux ġusti u abbużivi, u anke tal-liġi kriminali. |
3.1.5.2 |
Fil-fatt, il-kunċett tar-reklamar jeskludi mill-ambitu tiegħu kull tip ta’ komunikazzjoni fejn il-promozzjoni ta’ prodotti jew servizzi speċifiċi mhijiex intenzjonata jew suġġerita b’mod indirett, inklużi komunikazzjonijiet li jseħħu f’relazzjonijiet kummerċjali li m’għandhomx l-għan li jfornu prodotti jew servizzi ġodda. |
3.1.5.3 |
Skont id-Direttiva 2005/29/KE, prattika kummerċjali titqies bħala qarrieqa jekk ikun fiha informazzjoni mhux vera, u għalhekk ma tkunx korretta fattwalment jew fi kwalunkwe mod ieħor, inkluża l-preżentazzjoni globali, tqarraq jew aktarx se tqarraq il-konsumatur medju, anke jekk l-informazzjoni hija korretta fattwalment, b’rabta ma’ element wieħed jew iktar minn dawn li ġejjin, u fi kwalunkwe każ twassal jew aktarx twassal biex konsumatur jieħu deċiżjoni f’tranżazzjoni li kieku ma kienx jieħu. Fi kliem ieħor, id-definizzjoni ta’ prattiki qarrieqa mhijiex limitata għall-promozzjoni ta’ prodotti, u tista’ tiġi estiża għal sitwazzjonijiet fejn il-promozzjoni ta’ prodott ma tkunx suġġerita u għal komunikazzjonijiet li jseħħu f’relazzjonijiet kummerċjali. |
3.1.6 |
Barra minn hekk, fil-“Green Paper dwar prattiki kummerċjali inġusti fil-katina tal-provvista alimentari u mhux alimentari minn negozju għal negozju fl-Ewropa” (2) il-Kummissjoni sewwa għamlet li wissiet kontra r-riskju ta’ kunflitt u rduppjar bejn id-diversi azzjonijiet tal-UE li jimmiraw lill-istess gruppi u arranġamenti simili mhux koordinati, biex b’hekk tinħoloq aktar konfużjoni matul it-traspożizzjoni ta’ atti legali mill-Istati Membri (3). |
3.1.7 |
Il-KESE jiddispjaċih li l-Kummissjoni Ewropea għadha ma organizzatx diskussjoni dwar id-diversi għażliet, u lanqas ma qajmithom matul il-konsultazzjoni pubblika, fejn għażlet minflok li tagħżel l-għażla li tista’ ssarraf f’inqas vantaġġi għall-kumpaniji, b’mod speċjali l-SMEs. Billi l-Kummissjoni tidher li diġà ddeċidiet liema għażla beħsiebha tadotta f’Ottubru li ġej, kif tħabbar, jidher pjuttost bla skop li tiġi ppreżentata valutazzjoni tal-impatt li tinkludi ħames għażliet, meta l-għażla kienet diġà fatta mill-bidu nett. |
3.1.8 |
Minħabba l-urġenza apparenti biex tittieħed pożizzjoni immedjata dwar il-kwistjoni ċentrali tal-kumpaniji ta’ direttorju, li diġà ntweriet fi studji u riżoluzzjonijiet preċedenti tal-PE, u l-enormità u l-gravità estimata ta’ dawn il-prattiki f’termini ekonomiċi fil-livell Ewropew (4), il-KESE jaċċetta li l-Kummissjoni għandha tippreżenta immedjatament proposta leġislattiva speċifika dwar din il-kwistjoni, sabiex jiġu evitati sitwazzjonijiet fejn kumpaniji jiġu assedjati minn theddid kontinwu ta’ azzjoni legali f’ġurisdizzjonijiet barranin, bi “spejjeż amministrattivi” dejjem jiżdiedu u telefonati kważi ta’ theddid minn kumpaniji li jirkupraw id-dejn. |
3.1.8.1 |
Barra minn hekk, mhumiex biss l-SMEs iżda wkoll il-professjonisti, l-NGOs, il-libreriji, l-istabbilimenti edukattivi privati u anke d-dipartimenti tal-awtoritajiet pubbliċi li kienu taħt il-mira ta’ dawn il-prattiki. Huwa għalhekk li għandhom jiġu inklużi, meta dan ikun adatt, fl-ambitu tagħha billi jiġi estiż il-kunċett ta’ “kummerċjant” biex ikopri dawk kollha li jistgħu jkunu taħt il-mira ta’ dawn il-prattiki u li mhumiex protetti minn strumenti leġislattivi oħra. |
3.1.9 |
Madankollu, il-KESE jemmen li approċċ iktar koerenti kien jestendi l-kunċett ta’ prattiki kummerċjali mhux ġusti, fil-forma ta’ prattiki qarrieqa u aggressivi, flimkien ma’ lista sewda mehmuża bħala anness għad-Direttiva 2005/29/KE, biex jinkludi relazzjonijiet bejn in-negozji. |
3.1.10 |
It-twessigħ tal-ambitu ta’ din id-direttiva kien ikollu vantaġġ ieħor, dak li tiġi żgurata armonizzazzjoni aħjar billi l-Istati Membri ma jkollhomx joħolqu atti legali jew leġislattivi ġodda biex jittrasponu d-direttiva, iżda biss jestendu l-ambitu tal-liġijiet domestiċi li diġà jeżistu dwar prattiki kummerċjali mhux ġusti. Dan kien jiżgura li l-leġislazzjoni tal-UE tiġi applikata b’mod korrett (5). |
3.1.11 |
Barra minn hekk, emenda żgħira għad-Direttiva 2006/114/KE, fuq il-linji ambigwi ssuġġeriti mill-Kummissjoni, mhux se tiżgura protezzjoni għall-SMEs fis-sitwazzjonijiet imsemmija fil-Komunikazzjoni. Barra mill-fatt li dawn il-prattiki huma aggressivi u mhux azzjonijiet qarrieqa, skont it-tifsira tad-Direttiva 2005/29/KE, joriġinaw ukoll minn relazzjonijiet kummerċjali stabbiliti preċedentement, u għalhekk ma jistgħux jiġu inklużi fil-qafas tar-reklamar. |
3.1.12 |
Huwa għalhekk li mingħajr preġudizzju għall-punt imqajjem fi 3.1.8, il-KESE jargumenta li l-Kummissjoni se jkollha tieħu passi fil-futur qrib biex tadotta approċċ orizzontali, tippromovi iktar konsistenza fir-regoli relatati mal-liġi tal-kompetizzjoni u l-proprjetà intellettwali u industrijali, u tiżgura protezzjoni aktar uniformi tal-prattiki kummerċjali kollha fis-suq tal-konsumaturi u fir-relazzjonijiet kuntrattwali kollha bejn il-kummerċjanti, f’konformità mar-riżoluzzjoni tal-PE dwar suq tal-konsumaturi aktar effiċjenti u ġust. |
3.1.13 |
Għaldaqstant, il-KESE jenfasizza l-ħtieġa għal aktar koordinaazzjoni bejn DĠ JUST, DĠ COMP, DĠ MARKT u DĠ ENTR fir-rigward tal-azzjonijiet li jridu jittieħdu f’dan il-qasam u fi proposti futuri ta’ politika u leġislattivi li jsegwu l-prijoritajiet politiċi stabbiliti fis-Small Business Act. |
3.1.14 |
Minkejja dak li ntqal hawn fuq, u li kieku l-Kummissjoni kellha tagħmel għażla oħra, il-KESE jenfasizza l-ħtieġa li l-kunċett ta’ prattiki qarrieqa ta’ kummerċjalizzazzjoni li huma “l-iżjed dannużi” jiġi definit f’termini konkreti u li jkun speċifiku fil-kontenut tiegħu sabiex ikun ċar liema huma l-prattiki kummerċjali li jitqiesu li jeħtieġu aktar protezzjoni mill-oħrajn. |
3.1.15 |
Il-KESE jixtieq ukoll li l-Kummissjoni tagħti indikazzjoni iktar ċara tas-sitwazzjonijiet li jridu jiżdiedu mal-“lista sewda”, filwaqt li japprova bis-sħiħ l-eżistenza tagħha, billi l-lista ta' prattiki pprojbiti b’mod kategoriku għandha tkun kemm jista’ jkun preċiża u eżawrjenti. Il-Kummissjoni tista’ diġà ssib biżżejjed materjal biex tipprepara l-lista sewda fit-tweġibiet għall-investigazzjoni tagħha u l-kontribut ta’ diversi partijiet interessati fil-laqgħa li saret fl-1 ta’ Marzu 2013 (6). |
3.1.16 |
F’dan il-każ il-KESE jixtieq ukoll li l-Kummissjoni tikkunsidra jekk tkunx idea tajba li titfassal lista griża ta’ prattiki li jistgħu jkunu illegali f’ċirkostanzi speċifiċi li għandhom jiġu evalwati fil-qorti skont il-każ. |
3.1.17 |
B’mod simili, il-KESE jemmen li barra mit-tfassil ta’ listi, se jkun neċessarju wkoll li tissaħħaħ u tiġi ċċarata t-tifsira ta’ reklamar qarrieqi jew reklamar komparattiv illegali f’approċċ sistematiku f’qafas legali wiesa’ li jiżgura li prattiki ġodda inġusti jkunu koperti mil-leġislazzjoni riveduta. |
3.1.18 |
Minkejja l-punt li tqajjem f’3.1.8, il-KESE jemmen li l-qafas legali tad-Direttiva 2005/29/KE se jkollu jitwessa’ f’ħin f’waqtu, l-iżjed sabiex jiġi żgurat li l-protezzjoni attwali għall-konsumaturi tiġi estiża u applikata b’mod ugwali lil xi intrapriżi żgħar u mikro, taħt kundizzjonijiet definiti b’mod preċiż u rigoruż, meta jkunu f’sitwazzjonijiet komparabbli, kif diġà jseħħ fis-sistemi legali ta’ diversi Stati Membri, u kif jitolbu bix-xieraq l-assoċjazzjonijiet u l-organizzazzjonijiet li jirrappreżentaw dawn in-negozji (7). |
3.1.19 |
Fil-fatt, il-KESE jemmen li dawn huma żewġ aspetti differenti ta’ sitwazzjoni komuni u li għandna kull interess li nirrivedu d-Direttiva 2005/29/KE, fid-dawl tal-valutazzjoni reċenti ta’ din id-direttiva (8), b’mod simultanju u b’mod parallel mad-Direttiva 2006/114/KE, billi huma interkonnessi u komplementarji (9). |
3.1.20 |
In-natura ta’ dawn il-prattiki u l-attivitajiet ta’ kumpaniji ħatja ta’ ksur tal-liġi huma xhieda tal-ħtieġa għal strument ġudizzjarju għal azzjoni kollettiva ta’ grupp, li tiggarantixxi reazzjonijiet effiċjenti u protezzjoni aħjar għall-kummerċjanti fis-soluzzjoni ta’ kull tilwim li jista’ jinqala’, mhux biss biex dawn il-prattiki jitwaqqfu (10), iżda wkoll biex jiġi żgurat kumpens adegwat għall-ħsara mġarrba. |
3.2 Aspetti formali
3.2.1 |
Il-KESE jemmen li l-Kummissjoni għandha tikkjarifika l-bażi legali għal dawn il-miżuri f’dan l-istadju, u b’mod aktar speċifiku, jekk huma intenzjonati biss biex jappoġġjaw l-ikkompletar tas-suq intern jew għal raġunijiet oħra. |
3.2.2 |
B’mod ugwali, il-KESE jemmen li l-istrument legali l-iżjed adegwat sabiex dan iseħħ huwa regolament, sabiex tiġi żgurata aktar ċertezza legali u armonizzazzjoni effettiva. |
4. Analiżi tal-metodoloġija
4.1 |
Fir-rigward tal-kalendarju propost, il-KESE jilqa’ b’sodisfazzjon il-passi stabbiliti mill-Kummissjoni, jiġifieri t-twaqqif immedjat ta’ netwerk ta’ awtoritajiet biex iżidu l-infurzar tad-direttiva dwar reklamar qarrieqi u komparattiv, u biex jaqsmu informazzjoni. |
4.2 |
Il-KESE jilqa’ wkoll it-twaqqif ta’ proċedura ta’ kooperazzjoni fl-infurzar, simili għal dik prevista fir-Regolament (KE) Nru 2006/2004 tal-Parlament Ewropew u tal-Kunsill dwar il-kooperazjoni bejn l-awtoritajiet nazzjonali responsabbli għall-infurzar tal-liġijiet dwar il-protezzjoni tal-konsumatur, u b’hekk jiġu introdotti obbligi ta’ għajnuna reċiproka bejn l-Istati Membri f’dan il-qasam, u miżuri sabiex jiġu identifikati l-awtoritajiet tal-infurzar, mingħajr ħsara għall-għażliet li jinvolvu pjattaformi pubbliċi-privati, kif jiġri fil-Pajjiżi l-Baxxi, u l-estensjoni tal-kooperazzjoni biex tinkludi organizzazzjonijiet rappreżentattivi tal-partijiet interessati.. |
4.3 |
Bħala riżultat ta’ dan, il-KESE jissuġġerixxi li jiġu segwiti prattiki fil-qasam tal-protezzjoni tal-konsumaturi (11) u s-soluzzjoni ta’ tilwim u t-twaqqif ta’ netwerk Ewropew sabiex l-SMEs jiġu megħjuna fis-soluzzjoni ta’ tilwim transkonfinali billi l-kumpaniji li ġew imqarrqa jiġu diretti lejn il-mekkaniżmi legali l-iżjed adatti. |
4.4 |
Il-KESE jemmen ukoll li jridu jiġu stabbiliti attivitajiet ta’ taħriġ, informazzjoni u ta’ qsim ta’ prattiki tajba għan-negozji kollha sabiex jiġu avżati dwar il-perikli inerenti f’dawn il-prattiki. |
4.5 |
Barra minn hekk, u jekk inżommu f’moħħna l-fatt li l-biċċa l-kbira tal-prattiki qarrieqa jseħħu f’ambjent diġitali, il-KESE jemmen li huwa neċessarju li jiġi promoss approċċ aktar assertiv u adegwat lejn il-protezzjoni tal-SMEs, filwaqt li jitqiesu l-prattiki ta’ provvedituri intermedjarji tal-internet u r-relazzjonijiet kuntrattwali li jinħolqu minn pjattaformi bħall-eBay jew pjattaformi mfassla speċifikament għal tranżazzjonijiet kummerċjali bejn kummerċjanti. |
4.6 |
Il-KESE jixtieq iżid jgħid li l-Kummissjoni trid tqis id-dimensjoni internazzjonali ta’ dawn il-prattiki fil-kuntest tar-rappreżentazzjoni tagħha fl-OECD (12). L-UE u l-Istati Membri tagħha huma mħeġġa jiddiskutu mal-OECD l-estensjoni tal-“Linji Gwida għall-Protezzjoni tal-Konsumaturi minn Prattiki Kummerċjali Qarrieqa Transkonfinali” (Guidelines for Protecting Consumers from Fraudulent Commercial Practices Across Borders) biex jinkludu r-relazzjonijiet bejn l-intrapriżi. Il-KESE jissuġġerixxi li l-EUROPOL twaqqaf proġett ta’ riċerka dwar il-frodi marbuta mal-kummerċjalizzazzjoni għall-massa fl-UE: id-dimensjoni tal-ħsara finanzjarja u l-għadd ta’ vittmi; ir-rwol tal-ikbar atturi transkonfinali u l-possibbiltà li l-qligħ jiġi investit f’attivitajiet jew negozji mhux legali. |
4.7 |
Fl-aħħar nett, il-KESE jiġbed l-attenzjoni għall-fatt li hemm bżonn li l-Kummissjoni tressaq pakkett finanzjarju, għax dan huwa vitali biex jiġu implimentati l-miżuri proposti. |
4.8 |
Fir-rigward tal-ħidma futura, il-KESE jixtieq isemmi b’mod speċifiku r-rieda tiegħu li jipparteċipa f’din il-ħidma permezz tar-rappreżentanti tiegħu, billi jemmen li jista’ jikkontribwixxi l-esperjenza tal-membri tiegħu, li huma rappreżentanti tas-soċjetà ċivili tat-tliet gruppi ta’ interess rappreżentati fi ħdan il-KESE, u li huma partikolarment adatti u kkwalifikati għal dan ix-xogħol. |
Brussell, 22 ta’ Mejju 2013.
Il-President tal-Kumitat Ekonomiku u Soċjali Ewropew
Henri MALOSSE
(1) ĠU C 351, 15.11.2012, p. 6.
(2) COM(2013) 37 final.
(3) Irrid niftakru wkoll il-problemi li nħolqu b’rabta mat-traspożizzjoni tad-Direttiva 2005/29/KE, li ġew rikonoxxuti mill-Parlament Ewropew (ara State of play of the Implementation of the provisions on advertising in the unfair commercial practices legislation, IP/A/IMCO/ST/2010-04, PE 440.288).
(4) Ara d-data pprovduta minn Netherlands Fraudehelpdesk.nl.
(5) Barra minn hekk, fir-riżoluzzjoni tiegħu dwar prattiki kummerċjali inġusti u reklamar qarrieqi, il-Parlament Ewropew kien diġà qajjem tħassib li diversi Stati Membri kienu ħolqu aktar konfużjoni għall-konsumaturi u n-negozji billi ddiżaggregaw il-“lista sewda” inkluża fl-Anness I għad-Direttiva 2005/29/KE bit-traspożizzjoni u l-implimentazzjoni tagħha fis-sistemi legali tagħhom.
(6) L-eżempji jinkludu:
a) |
Prattiki ta’ tranżazzjonijiet onlajn fejn informazzjoni dwar it-tranżazzjoni ma tingħatax bl-istess mod lil kull min huwa involut, u b’hekk jirriżulta f’diskriminazzjoni kontra wħud mill-partijiet. |
b) |
Irkanti onlajn u prattiki ta’ bejgħ (eBay). Huwa ċar issa li f’sitwazzjonijiet bħal dawn xi kultant jaqbel li wieħed jirreġistra bħala konsumatur għaliex dan joffri sensiela aħjar ta’ garanziji. |
c) |
Prattiki li jinvolvu l-preżentazzjoni ta’ prodotti li għandhom ikunu ċertifikati iżda li ma jkollhom l-ebda akkreditazzjoni. |
d) |
Prattiki fejn kumpaniji jgħidu li jagħmlu parti minn awtorità pubblika u jġiegħlu lil kummerċjanti jissottoskrivu għal servizz jew jixtru prodott billi jingannawhom biex jaħsbu li qed jikkonformaw ma’ regolamenti tat-taxxa jew tas-sikurezza. |
e) |
Prattiki li jinvolvu l-bejgħ transnazzjonali ta’ prodotti mingħajr avviż minn qabel lix-xerrejja li servizzi ta’ wara l-bejgħ mhumiex garantiti barra mill-pajjiż tal-oriġini tal-prodott. |
f) |
Prattiki li jinvolvu t-twaqqif ta’ websajts komparattivi maħsuba l-iżjed biex jikkonvinċu lill-kummerċjanti biex jixtru prodott billi jippreżentawh bħala l-iżjed adatt għall-profil tan-negozju tagħhom. Fir-realtà, diversi minn dawn l-għodod komparattivi, b’mod speċjali fis-settur finanzjarju, ma joffru l-ebda informazzjoni dwar in-natura tal-websajt jew il-mudell ta’ finanzjament tagħha. |
g) |
Prattiki ta’ reklamar diġitali “mistura” li jinvolvu l-iktar il-konsumaturi/negozji (fil-biċċa l-kbira minnhom imħallsa mill-kumpanija) li jitfgħu tweġibiet fuq netwerks soċjali fejn jinkoraġġixxu ’l-kummerċjanti biex jużaw dik il-kumpanija. |
h) |
Prattiki li jinvolvu l-użu ta’ testijiet komparattivi skaduti jew li saħansitra lanqas biss jeżistu. |
i) |
Prattiki li jassumu minn qabel il-kunsens implikat ta’ kummerċjant biex jixtri prodott jew jissottoskrivi għal servizz. |
(7) Dan jikkorrispondi għall-għażla 5 fil-valutazzjoni tal-impatt li qed tiġi mfassla bħalissa.
(8) COM(2013) 138 final, 14.3.2013.
(9) L-Awstrija hija eżempju wieħed ta’ allinjament bejn id-Direttiva 2006/114/KE u d-Direttiva 2005/29/KE billi matul it-traspożizzjoni, il-kelma “konsumatur” ġiet sostitwita b’“il-mira ta’ prattiki kummerċjali”, u b’hekk ma jkun hemm l-ebda dubju li d-dispożizzjonijiet tad-Direttiva 2005/29/KE huma applikati wkoll għar-relazzjonijiet bejn kummerċjanti (ara IP/A/IMCO/ST/2010-04, PE 440.288 li hemm referenza għaliha fin-nota ta’ qiegħ il-paġna 3 hawn fuq).
(10) Għalhekk huwa essenzjali li jiżdied l-istrument leġislattiv futur fil-lista inkluża fl-Anness I għad-Direttiva 2005/29/KE.
(11) http://ec.europa.eu/consumers/index_mt.htm
(12) Id-dimensjoni internazzjonali tal-fenomenu toħroġ fid-dieher bl-International Mass-Marketing Fraud Working Group (IMMFWG) (Grupp ta’ Ħidma Internazzjonali għall-Frodi fil-Kummerċjalizzazzjoni tal-Massa), netwerk indipendenti magħmul minn korpi ta’ sigurtà, ta’ regolazzjoni u ta’ protezzjoni tal-konsumaturi minn seba’ pajjiżi (l-Awstralja, il-Belġju, il-Kanada, il-Pajjiżi Baxxi, in-Niġerja, ir-Renju Unit u l-Istati Uniti) u l-Europol. L-għan tal-Grupp huwa li jiffaċilita l-iskambju internazzjonali tad-data u l-informazzjoni, li jikkoordina operazzjonijiet transkonfinali maħsubin biex jinterċettaw u jwaqqfu każijiet ta’ frodi fil-kummerċjalizzazzjoni tal-massa u lil dawk li jwettquhom, iżda wkoll biex isaħħaħ l-għarfien u l-edukazzjoni tal-pubbliku fil-qasam tal-frodi fil-kummerċjalizzazzjoni tal-massa ta’ natura internazzjonali.
Ara “Mass-marketing fraud: a threat assessment” IMMFWG, Ġunju 2010.