EUR-Lex Πρόσβαση στο δίκαιο της Ευρωπαϊκής Ένωσης
Το έγγραφο αυτό έχει ληφθεί από τον ιστότοπο EUR-Lex
Έγγραφο 52011IP0262
Policy options for progress towards a European contract law for consumers and businesses European Parliament resolution of 8 June 2011 on policy options for progress towards a European Contract Law for consumers and businesses (2011/2013(INI))
L-għażliet politiċi għall-progress lejn Liġi Kuntrattwali Ewropea għall-konsumaturi u n-negozji Riżoluzzjoni tal-Parlament Ewropew tat- 8 ta’ Ġunju 2011 dwar l-għażliet politiċi għall-progress lejn Liġi Kuntrattwali Ewropea għall-konsumaturi u n-negozji (2011/2013(INI))
L-għażliet politiċi għall-progress lejn Liġi Kuntrattwali Ewropea għall-konsumaturi u n-negozji Riżoluzzjoni tal-Parlament Ewropew tat- 8 ta’ Ġunju 2011 dwar l-għażliet politiċi għall-progress lejn Liġi Kuntrattwali Ewropea għall-konsumaturi u n-negozji (2011/2013(INI))
ĠU C 380E, 11.12.2012, σ. 59 έως 66
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
11.12.2012 |
MT |
Il-Ġurnal Uffiċjali tal-Unjoni Ewropea |
CE 380/59 |
L-Erbgħa 8 ta’ Ġunju 2011
L-għażliet politiċi għall-progress lejn Liġi Kuntrattwali Ewropea għall-konsumaturi u n-negozji
P7_TA(2011)0262
Riżoluzzjoni tal-Parlament Ewropew tat-8 ta’ Ġunju 2011 dwar l-għażliet politiċi għall-progress lejn Liġi Kuntrattwali Ewropea għall-konsumaturi u n-negozji (2011/2013(INI))
2012/C 380 E/09
Il-Parlament Ewropew,
— |
wara li kkunsidra l-Green Paper mill-Kummissjoni tal-1 ta’ Lulju 2010 dwar l-għażliet politiċi għall-progress lejn Liġi Kuntrattwali Ewropea għall-konsumaturi u n-negozji (COM(2010)0348), |
— |
wara li kkunsidra d-Deċiżjoni 2010/233/UE tal-Kummissjoni tas-26 ta’ April 2010 dwar it-twaqqif ta’ Grupp Espert rigward il-Qafas Komuni ta’ Referenza fil-qasam tal-liġi kuntrattwali Ewropea (1), |
— |
wara li kkunsidra l-Komunikazzjoni mill-Kummissjoni tal-11 ta’ Lulju 2001 dwar il-Liġi Kuntrattwali Ewropea (COM(2001)0398), |
— |
wara li kkunsidra l-Komunikazzjoni mill-Kummissjoni tat-12 ta’ Frar 2003 bit-titolu ‧Liġi Kuntrattwali Ewropea aktar Koerenti – Pjan ta’ Azzjoni‧ (COM(2003)0068), |
— |
wara li kkunsidra l-Komunikazzjoni mill-Kummissjoni tal-11 ta’ Ottubru 2004 bit-titolu ‧Il-Liġi Ewropea dwar il-Kuntratti u r-reviżjoni tal-acquis: prospettivi għall-futur‧ (COM(2004)0651), |
— |
wara li kkunsidra r-rapport mill-Kummissjoni tat-23 ta’ Settembru 2005 bit-titolu ‧L-Ewwel Rapport Annwali ta’ Progress dwar il-Liġi Ewropea tal-Kuntratti u r-Reviżjoni tal-Acquis‧ (COM(2005)0456) u r-rapport mill-Kummissjoni tal-25 ta’ Lulju 2007 bit-titolu ‧It-Tieni Rapport dwar il-Progress tal-Qafas ta’ Referenza Komuni‧ (COM(2007)0447), |
— |
wara li kkunsidra l-Komunikazzjoni mill-Kummissjoni tat-22 ta’ Ottubru 2009 dwar in-Negozju Transkonfinali san-Negozju Elettroniku tal-Konsum fl-UE (COM(2009)0557), |
— |
wara li kkunsidra r-riżoluzzjoni tiegħu tat-3 ta’ Settembru 2008 dwar qafas komuni ta’ referenza għal-liġi Ewropea dwar il-kuntratti (2), |
— |
wara li kkunsidra r-riżoluzzjoni tiegħu tat-12 ta’ Diċembru 2007 dwar il-Liġi Ewropea dwar il-Kuntratti (3), |
— |
wara li kkunsidra r-riżoluzzjoni tiegħu tas-7 ta’ Settembru 2006 dwar il-Liġi Ewropea dwar il-Kuntratti (4), |
— |
wara li kkunsidra r-riżoluzzjoni tiegħu tat-23 ta’ Marzu 2006 dwar il-liġi Ewropea dwar il-kuntratti u r-reviżjoni tal-acquis: prospettivi għall-futur (5), |
— |
wara li kkunsidra r-riżoluzzjonijiet tiegħu tas-26 ta’ Mejju 1989 (6), tas-6 ta’ Mejju 1994 (7), tal-15 ta’ Novembru 2001 (8) u tat-2 ta’ Settembru 2003 (9) dwar il-kwistjoni, |
— |
wara li kkunsidra l-Artikolu 48 tar-Regoli ta’ Proċedura tiegħu, |
— |
wara li kkunsidra r-rapport tal-Kumitat għall-Affarijiet Legali u l-opinjonijiet tal-Kumitat għas-Suq Intern u l-Ħarsien tal-Konsumatur u tal-Kumitat għall-Affarijiet Ekonomiċi u Monetarji (A7-0164/2011), |
A. |
billi l-inizjattiva dwar il-liġi kuntrattwali Ewropea, li għandha l-għan li tindirizza l-problemi tas-Suq Uniku maħluqa, fost l-oħrajn, minn entitajiet diverġenti tal-liġi kuntrattwali, ilha tiġi diskussa s-snin, |
B. |
billi, b’segwitu tal-kriżi finanzjarja globali, jidher aktar importanti minn qatt qabel li jiġi previst reġim koerenti ta’ Liġi Kuntrattwali Ewropea sabiex jintlaħaq il-potenzjal sħiħ tas-suq intern u b’hekk jgħin ħalli jintlaħqu l-għanijiet tal-Ewropa 2020, |
C. |
billi s-Suq Uniku għadu frammentat, minħabba f’ħafna fatturi, inkluż in-nuqqas ta’ implimentazzjoni tal-leġiżlazzjoni eżistenti fil-qasam tas-Suq Uniku, |
D. |
billi jinħtieġu aktar studji biex wieħed jifhem aktar għaliex is-suq intern għadu frammentat u x'inhu l-aħjar mod li bih dawn il-problemi jistgħu jiġu ttrattati, fosthom kif tista' tiġi żgurata l-implimentazzjoni tal-leġiżlazzjoni eżistenti, |
E. |
billi fil-Green Paper imsemmija hawn fuq il-Kummissjoni tindika sensiela ta’ alternattivi rigward strument dwar il-Liġi Kuntrattwali Ewropea li jistgħu jgħinu fl-iżvilupp ta’ imprenditorija fit-tisħiħ tal-fiduċja pubblika fis-Suq Uniku, |
F. |
billi l-Grupp ta’ Esperti mwaqqaf biex jgħin lill-Kummissjoni fit-tħejjija ta’ proposta għal Qafas Komuni ta’ Riferiment (QKR) beda l-ħidma tiegħu, flimkien ma’ laqgħa ta’ diskussjoni mal-partijiet interessati, |
G. |
billi d-diverġenza tad-dritt kuntrattwali f'livell nazzjonali ma tikkostitwixxix l-uniku ostakolu għall-SMEs u l-konsumaturi f’dak li għandu x’jaqsam mal-attivitajiet transkonfinali minħabba li jħabbtu wiċċhom ma’ problemi oħrajn inkluż il-barrieri lingwistiċi, is-sistemi differenti ta’ tassazzjoni, il-kwistjoni tal-affidabilità tan-negozjanti online, l-aċċess limitat għall-broadband, il-litteriżmu diġitali, il-problemi ta’ sigurtà, il-kompożizzjoni demografika tal-popolazzjoni tal-Istati Membri individwali, il-problemi dwar il-privatezza, ir-rispons għall-ilmenti, u d-drittijiet tal-proprjetà intellettwali, eċċ., |
H. |
billi, skont studju tal-Kummissjoni mwettaq fl-2008, tliet kwarti tal-bejjiegħa bl-imnut jbigħu biss fis-suq nazzjonali, u l-bejgħ transkonfinali sikwit isir biss fi ftit Stati Membri (10), |
I. |
billi huwa neċessarju li jkun hemm distinzjoni bejn it-tranżazzjonijiet transkonfinali konvenzjonali u l-kummerċ elettroniku, fejn jeżistu problemi speċifiċi u l-kostijiet tat-tranżazzjoni huma differenti; billi huwa wkoll neċessarju, għall-finijiet ta’ valutazzjonijiet futuri tal-impatt, li jiġu definiti b'reqqa u bi preċiżjoni kif inhuma komposti l-kostijiet tat-tranżazzjoni, |
J. |
billi huwa ċar li l-applikazzjoni ta’ liġi barranija (dwar il-konsumatur) għat-tranżazzjonijiet transkonfinali skont ir-Regolament Ruma I (11) ġiet meqjusa li tinvolvi spejjeż ta’ tranżazzjoni kunsiderevoli għan-negozji, b’mod partikulari għall-SMEs, li, fir-Renju Unit biss, ġew stmati li jlaħħqu l-Eur 15 000 għal kull negozju u għal kull Stat Membru (12), |
K. |
billi tinħtieġ aktar informazzjoni dwar il-kostijiet tat-tranżazzjoni li jirriżultaw mill-applikazzjoni tal-Artikolu 6(2) u tal-Artikolu 4(1), punt (a) tar-Regolament Ruma I, filwaqt li jitqies li r-Ruma I ilu jiġu applikat biss minn Diċembru 2009, |
L. |
billi dawn l-ispejjeż ta’ tranżazzjoni huma pperċepiti bħala ostakoli kunsiderevoli għall-kummerċ transkonfinali, kif ġie kkonfermat minn 50 % tal-bejjiegħa bl-imnut Ewropej, intervistati fl-2011, li diġà jwettqu kummerċ transkonfinali, li stqarru li l-armonizzazzjoni tal-liġijiet applikabbli fit-tranżazzjonijiet transkonfinali madwar l-UE żżid il-livell ta’ bejgħ transkonfinali tagħhom, filwaqt li 41 % qalu li l-bejgħ tagħhom ma jiżdidx; billi, mill-banda l-oħra, fost il-bejjiegħa li ma jbigħux transkonfinalment, 60 % qalu li l-livell tagħhom ta’ bejgħ transkonfinali ma jiżdidx b’riżultat ta’ ambjent regolatorju aktar armonizzat, filwaqt li 25 % stqarru li dan jiżdied (13), |
M. |
billi wħud mill-ostakoli l-aktar evidenti li l-konsumaturi u l-SMEs iħabbtu wiċċhom magħhom fir-rigward tas-Suq Uniku huma l-kumplessità tar-relazzjonijiet kuntrattwali, termini u kundizzjonijiet inġusti tal-kuntratti, informazzjoni inadegwata u insuffiċjenti u proċeduri ineffiċjenti u li jieħdu ħafna ħin, |
N. |
billi huwa ta’ importanza fuq kull ħaġa oħra li kull inizjattiva min-naħa tal-UE jkollha tirrispondi għall-ħtiġijiet u t-tħassib reali kemm tan-negozjanti kif ukoll tal-konsumaturi; billi dan it-tħassib jestendi wkoll għall-problemi legali/lingwistiċi (dispożizzjonijiet ta’ termini u kundizzjonijiet standard għan-negozji ż-żgħar fl-ilsna kollha tal-UE) u d-diffikultajiet fl-eżekuzzjoni tal-kuntratti bejn il-fruntieri (dispożizzjonijiet ta’ miżuri awtonomi tal-UE fil-qasam tad-Dritt proċedurali), |
O. |
billi, skont studju tal-Kummissjoni, ġie stmat li s-suq onlajn għadu frammentat: skont studju li sar, 61 % minn 10 964 ordni transkonfinali ta’ prova li saru fallew u li jidher li x-xiri transkonfinali jżid il-probabilità li l-konsumaturi jsibu offerti li jkunu irħas (14) u li jsibu prodotti li ma jkunux disponibbli onlajn fuq livell nazzjonali (15), filwaqt li ċ-ċifra ta’ 61 % tidher ferm għolja u titlob li jsiru aktar studji, verifiki u valutazzjonijiet, |
P. |
billi l-armonizzazzjoni gradwali ma tegħlibx b’mod effettiv l-ostakoli fis-suq intern li jirriżultaw minn drittijiet kuntrattwali nazzjonali diverġenti, kull miżura f’dan il-qasam għandha tkun ibbażata fuq evidenza ċara li tali inizjattiva tagħmel differenza vera li ma tkunx tista’ tinkiseb b’miżuri oħra anqas intrużivi, |
Q. |
billi Liġi Kuntrattwali Ewropea komuni tkun ta’ benefiċċju għall-konsumaturi u, b'mod partikolari, tikkontribwixxi għal aktar kummerċ transkonfinali li jkun faċilment aċċessibbli fis-suq intern, |
R. |
billi n-negozjati dwar id-Direttiva dwar id-Drittijiet tal-Konsumaturi (16) wrew kemm hu diffiċli biex tiġi armonizzata l-liġi tal-konsumatur applikata għall-kuntratti mingħajr ma jkun imminat l-impenn komuni għal livell għoli ta’ protezzjoni tal-konsumaturi fl-Ewropa u x’limiti dan kollu jimponi fuq il-proċess, |
S. |
billi kwalunkwe passi meħuda fil-qasam tal-Liġi Kuntrattwali Ewropea għandhom iqisu r-regoli nazzjonali obbligatorji, u għandhom ikunu konsistenti mad-Direttiva dwar id-Drittijiet tal-Konsumatur li hija mistennija, li se jkollha impatt sinifikanti fuq il-kontenut u l-livell tal-armonizzazzjoni ta’ strument futur possibbli fil-qasam tad-Dritt Kuntrattwali Ewropew; billi jkun neċessarju li jkun hemm monitoraġġ kostanti u bir-reqqa tal-implimentazzjoni tiegħu fix-xhur li jiġu wara ħalli jkun hemm definizzjoni dwar il-kamp ta’ applikazzjoni tal-istrument fakultattiv (OI), |
T. |
billi kwalunkwe prodott aħħari fil-qasam tal-Liġi Kuntrattwali Ewropea jrid ikun realistiku, fattibbli, proporzjonat u meqjus sew, qabel ma jiġi modifikat, jekk ikun meħtieġ, u adottat formalment mill-koleġiżlaturi Ewropej, |
1. |
Jappoġġja azzjoni biex jiġi indirizzat l-għadd ta’ ostakoli differenti li jiffaċċjaw dawk li jixtiequ jidħlu fi transazzjonijiet transkonfinali fis-Suq Intern u jqis li, flimkien ma’ miżuri oħra, il-proġett tal-Liġi Kuntrattwali Ewropea jista’ jkun utli biex jintlaħaq il-potenzjal sħiħ tas-suq intern, li jinvolvi benefiċċji sostanzjali kemm mil-lat ekonomiku kif ukoll mil-lat ta’ impjiegi; |
2. |
Jilqa' d-dibattitu apert dwar il-Green Paper u jħeġġeġ lis-servizzi responsabbli tal-Kummissjoni jagħmlu analiżi komprensiva tar-riżultati ta’ din il-konsultazzjoni; |
3. |
Jenfasizza l-importanza ekonomika tal-SMEs u tan-negozji tal-manifattura tal-artiġjanat fl-ekonomija Ewropea; jinsisti, għalhekk, fuq il-ħtieġa li jkun żgurat li l-prinċipju ‧l-ewwel aħseb fiż-żgħir‧ promoss mill-'Att dwar in-Negozji ż-Żgħar' jiġi implimentat sew u jitqies bħala prijorità fid-dibattitu dwar inizjattivi tal-UE marbuta mal-liġi kuntrattwali; |
In-natura ġuridika tal-istrument tal-Liġi Kuntrattwali Ewropea
4. |
Jilqa’ l-pubblikazzjoni riċenti tar-riżultati tal-istudju tal-fattibilità li sar mill-Grupp ta’ Esperti dwar il-liġi kuntrattwali Ewropea u l-impenn tal-Kummissjoni li tkompli għaddejja bil-konsultazzjoni dwar il-kamp ta’ applikazzjoni u l-kontenut tal-istrument fakultattiv u f’dan is-sens iħeġġeġ lill-Kummissjoni tkompli għaddejja b’diskussjoni ġenwinament aperta u trasparenti mal-partijiet kollha interessati bħala parti mill-proċess tagħha tat-teħid tad-deċiżjonijiet dwar kif għandu jintuża l-istudju tal-fattibilità; |
5. |
Jirrikonoxxi l-ħtieġa għal aktar progress fil-qasam tal-liġi kuntrattwali u huwa favur, fost għażliet oħrajn, l-alternattiva 4 li jitwaqqaf strument fakultattiv permezz ta’ regolament; wara stima tal-impatt u kjarifika tal-bażi ġuridika; jemmen li dan l-istrument fakultattiv jista’ jkun ikkomplementat permezz ta’ ‘kaxxa tal-għodda’ li tista’ tiġi approvata permezz ta’ ftehim interistituzzjonali; jitlob li jinħolqu “mudelli Ewropej ta’ kuntratti standard”, tradotti fl-ilsna kollha tal-UE, marbutin ma’ sistema alternattiva għar-riżoluzzjoni tat-tilwim li ssir online, li jista’ jkollhom il-vantaġġ li jkunu soluzzjoni kosteffikaċi u aktar sempliċi, sew għall-partijiet kontraenti kif ukoll għall-Kummissjoni; |
6. |
Jemmen li huwa biss bl-użu tal-forma ġuridika ta’ Regolament li jistgħu jingħataw iċ-ċarezza u ċ-ċertezza ġuridika neċessarji; |
7. |
Jisħaq li Regolament li jwaqqaf strument fakultattiv tad-Dritt Kuntrattwali Ewropew jista’ jtejjeb il-funzjonament tas-suq intern minħabba fl-effett dirett, bil-benefiċċji għan-negozji (tnaqqis fil-kostijiet b’riżultat tat-tneħħija tal-ħtieġa ta’ regoli dwar il-kunflitt bejn id-Drittijiet), għall-konsumaturi (ċertezza ġuridika, fiduċja, livell għoli ta’ ħarsien għall-konsumatur), u għas-sistemi ġudizzjarji tal-Istati Membri (ma jkunx hemm aktar il-ħtieġa li jiġu eżaminati d-Drittijiet barranin); |
8. |
Jilqa’ l-fatt li l-alternattiva magħżula tqis kif xieraq il-prinċipju tas-sussidjarjetà u hija bla ħsara għall-poteri leġiżlattivi tal-Istati Membri fil-qasam tad-Dritt Kuntrattwali u Ċivili; |
9. |
Jemmen li ‘kaxxa tal-għodda’ tista’ possibbilment titqiegħed fil-prattika fuq diversi stadji, b’bidu bħala għodda tal-Kummissjoni, filwaqt li, ladarba jkun hemm ftehim bejn l-istituzzjonijiet, hija tiġi kkonvertita f’għodda għal-leġiżlatur tal-Unjoni; jirrimarka li din il-‘kaxxa tal-għodda’ tkun tipprovdi l-isfond u l-pedament ġuridiku meħtieġa li bihom ikunu jistgħu joperaw l-istrument fakultattiv u t-termini u l-kundizzjonijiet standard, u li hi għandha tkun ibbażata fuq evalwazzjoni tar-regoli nazzjonali obbligatorji dwar il-protezzjoni tal-konsumatur fi ħdan l-acquis eżistenti dwar il-liġi tal-konsumatur, iżda wkoll ’il barra minnu; |
10. |
Huwa tal-fehma li jekk l-istrument fakultattiv ikun ikkumplimentat b''kaxxa tal-għodda', ikun hemm informazzjoni aktar ċara disponibbli dwar dak l-istrument tal-UE, billi tingħata għajnuna lill-partijiet ikkonċernati ħalli jifhmu aħjar drittijiethom u jagħmlu għażliet infurmati meta jidħlu f’kuntratti fuq il-bażi ta’ dik is-sistema, u li l-qafas legali jkun jinftiehem aktar u ma jkunx oneruż wisq; |
11. |
Jemmen li l-partijiet kollha, kemm jekk fi tranżazzjonijiet B2B jew B2C, għandhom ikunu liberi jagħżlu jew ma jagħżlux l-istrument fakultattiv bħala alternattiva għad-dritt nazzjonali jew internazzjonali (opt-in) u għalhekk jitlob lill-Kummissjoni tikkjarifika r-relazzjoni li biħsiebha li jkun hemm bejn l-istrument fakultattiv u r-Regolament Ruma I u l-konvenzjonijiet internazzjonali, inkluża l-Konvenzjoni tan-Nazzjonijiet Uniti dwar il-Kuntratti għall-Bejgħ Internazzjonali ta’ Prodotti (CISG); iqis, madankollu, li jinħtieġ li titteħed aktar azzjoni biex jiġi żgurat li l-istrument fakultattiv joffri protezzjoni lill-konsumaturi u lin-negozji żgħar minħabba l-pożizzjoni tagħhom bħala s-sħab kummerċjali f'pożizzjoni aktar dgħajfa, u li jiġi evitat li jkun hemm konfużjoni meta wieħed jagħżel il-liġi applikabbli; għaldaqstant jistieden lill-Kummissjoni tikkumplimenta l-istrument fakultattiv b’tagħrif addizzjonali li jispjega f'lingwaġġ ċar, preċiż u li jinftiehem x’inhuma d-drittijiet tal-konsumaturi u li dawn ma jkunux kompromessi, ħalli l-konsumaturi jkabbru l-fiduċja tagħhom fl-istrument fakultattiv u jkunu f’qagħda li jagħmlu għażla infurmata dwar jekk ikunux iridu jikkonkludu kuntratt fuq din il-bażi alternattiva; |
12. |
Iqis li l-istrument jiġġenera valur miżjud Ewropew, b’mod partikulari billi jiżgura li jkun hemm ċertezza ġuridika permezz tal-ġurisdizzjoni tal-Qorti tal-Ġustizzja, u jipprovdi, fl-istess ħin, il-potenzjal li jingħelbu l-ostakoli kemm ġuridiċi kif ukoll lingwistiċi, peress li l-istrument ikun naturalment disponibbli fil-lingwi kollha tal-UE; jisħaq li, biex jinħoloq fehim aħjar tal-mod li bih jiffunzjonaw l-istituzzjonijiet Ewropej, iċ-ċittadini Ewropej għandu jkollhom l-opportunità li jkollhom kull tip ta’ tagħrif marbut mal-istrument fakultattiv tradott b’għodod ta’ traduzzjoni online aċċessibbli u li jintużaw faċilment, ħalli jkunu jistgħu jaqraw it-tagħrif meħtieġ f’ilsienhom stess; |
13. |
Jara vantaġġ prattiku possibbli fin-natura flessibbli u volontarja ta’ strument opt-in; madankollu jistieden lill-Kummissjoni tikkjarifika l-iżvantaġġi ta’ dan l-istrument kemm għall-konsumaturi kif ukoll għan-negozji u tikkjarifika aħjar liema parti kontraenti jkollha l-għażla bejn l-istrument fakultattiv u d-dritt “normalment” applikabbli u kif il-Kummissjoni biħsiebha tnaqqas l-kostijiet tat-tranżazzjoni; jistieden lill-Kummissjoni tinkludi fi kwalunkwe proposta għal strument fakultattiv mekkaniżmu għall-monitoraġġ u reviżjoni regolari, bl-involviment mill-qrib tal-partijiet kollha kkonċernati ħalli tiżgura li l-istrument fakultattiv jimxi mal-acquis eżistenti fir-rigward tal-liġi kuntrattwali, partikularment ir-Ruma I, mal-ħtiġiet tas-suq u mal-iżviluppi ġuridiċi u ekonomiċi; |
L-ambitu tal-applikazzjoni tal-istrument
14. |
Jemmen li għandhom jiġu koperti kemm il-kuntratti bejn in-negozji kif ukoll il-kuntratti bejn l-impriżi u l-konsumaturi; jenfasizza li l-istrument irid joffri livell għoli ta’ protezzjoni tal-konsumatur, sabiex il-konsumaturi jiġu kkumpensati għall-protezzjoni li s-soltu jgawdu skont il-liġi nazzjonali tagħhom; juri x-xewqa li jkun hemm aktar spjega dwar kif dan jista’ jintlaħaq; jemmen għalhekk li l-livell ta’ ħarsien tal-konsumatur għandu jkun ogħla mill-protezzjoni minima mogħtija mill-Acquis tal-Konsumatur u jkopri regoli nazzjonali obbligatorji, minħabba li jridu jinstabu soluzzjonijiet sodisfaċenti għall-problemi tad-dritt internazzjonali privat; iqis li dan il-livell għoli ta’ ħarsien tal-konsumatur huwa wkoll fl-interessi tan-negozji billi jkunu huma li jaħsdu l-frott tal-istrument fakultattiv jekk il-konsumaturi tal-Istati Membri kollha jkollhom fiduċja li l-għażla tal-istrument fakultattiv ma ċċaħħadhomx mill-ħarsien; |
15. |
Jindika li, sabiex igawdi mill-leġittimità u l-appoġġ politiċi, il-benefiċċji ta’ Dritt Kuntrattwali Ewropew għandhom ikunu kkomunikati b’mod pożittiv liċ-ċittadini; |
16. |
Jinnota li d-dispożizzjonijiet tal-liġi kuntrattwali li jirregolaw il-kuntratti B2B u B2C, rispettivament, għandhom ikunu mfassla, b'rispett għat-tradizzjonijiet komuni tas-sistemi ġuridiċi nazzjonali u b'attenzjoni partikolari għall-protezzjoni tal-parti kontraenti d-dgħajfa, jiġifieri l-konsumatur; |
17. |
Jirrimarka li xi elementi essenzjali tal-liġi tal-konsumaturi applikati għall-kuntratti diġà huma inkorporati f'diversi ġabriet ta’ regoli Ewropej u li xi partijiet importanti tal-acquis tal-konsumatur x'aktarx li jiġu kkonsolidati fid-Direttiva dwar id-Drittijiet tal-Konsumatur (CRD); jinnota li d-Direttiva msemmija hawn fuq tipprovdi regolamentazzjoni unika li l-konsumaturi u n-negozji jistgħu jidentifikaw faċilment; għalhekk, jisħaq fuq l-importanza li wieħed jistenna l-eżitu tan-negozjati dwar is-CRD qabel ma tittieħed kwalunkwe deċiżjoni; |
18. |
Barra minn hekk jemmen, meta jitqiesu n-natura speċjali tal-kuntratti differenti, speċjalment il-kuntratti B2C u B2B, il-prinċipji ewlenin nazzjonali u internazzjonali tal-liġi kuntrattwali, u l-prinċipju fundamentali ta’ livell għoli ta’ ħarsien tal-konsumatur, li l-prattiki settorjali eżistenti u l-prinċipju tal-libertà kuntrattwali għandhom jitħarsu fir-rigward tal-kuntratti B2B; |
19. |
Hu tal-fehma li Liġi Kuntrattwali Ewropea komuni fakultattiva tista’ ttejjeb l-effiċjenza tas-suq intern mingħajr ma taffettwa s-sistemi nazzjonali tal-liġi kuntrattwali fl-Istati Membri; |
20. |
Jemmen li l-istrument fakultattiv għandu jkun disponibbli fuq bażi “opt-in” f’sitwazzjonijiet transkonfinali fl-ewwel istanza u li jinħtieġ jingħataw garanziji li l-Istati Membri jkunu jistgħu jipprevjenu kull użu ħażin tal-istrument fakultattiv f’sitwazzjonijiet transkonfinali mhux ġenwini; iqis ukoll li l-effetti ta’ opt-in nazzjonali fuq l-korpi nazzjonali tal-liġi kuntrattwali jistħoqqilhom analiżi speċifika; |
21. |
Jirrikonoxxi li l-kummerċ elettroniku jew il-kuntratti ta’ bejgħ mill-bogħod jirrappreżentaw sehem importanti tat-tranżazzjonijiet transkonfinali; jemmen li, filwaqt li l-istrument fakultattiv m’għandux ikun limitat għal dawn it-tipi ta’ tranżazzjonijiet, jista’ jkun utli li jiġu introdotti limiti oħrajn meta l-istrument ikun qed jiġi applikat fl-ewwel istanza, u sakemm tinkiseb biżżejjed esperjenza tal-applikazzjoni tiegħu; |
22. |
Jenfasizza l-importanza speċjali li jiġi ffaċilitat il-kummerċ elettroniku fi ħdan l-UE, meta jitqies li dan is-settur għadu sottożviluppat, u jeħtieġ li jiġi vvalutat jekk sistemi kuntrattwali nazzjonali differenti jistgħux jirrappreżentaw ostakolu għall-iżvilupp ta’ dak is-settur, li sew in-negozji kif ukoll il-konsumaturi bir-raġun iqisuh bħala mutur potenzjali ta’ tkabbir għall-ġejjieni; |
23. |
Jemmen li l-kamp ta’ applikazzjoni ta’ ‘kaxxa tal-għodda’ jista’ jkun wiesa’ mhux ħażin, filwaqt li kwalunkwe strument fakultattiv għandu jkun limitat għall-kwistjonijiet fundamentali tal-liġi kuntrattwali; jemmen li ‘kaxxa tal-għodda’ għandha tibqa’ koerenti mal-istrument fakultattiv u jkun fiha, fost l-“għodda” tagħha, kunċetti meħuda mill-medda kollha ta’ tradizzjonijiet ġuridiċi, inklużi regoli derivati, inter alia, mill-Abbozz tal-Qafas Komuni ta’ Riferenza (DCFR) (17) akkademiku u l-‘Principes contractuels communs’ u ‧Terminologie contractuelle commune’ (18); u li r-rakkomandazzjonijiet tiegħu dwar id-dritt kuntrattwali tal-konsumatur għandhom ikunu msejsa fuq livell ġenwinament għoli ta’ ħarsien; |
24. |
Jistieden lill-Kummissjoni u lill-Grupp tal-Esperti jikkjarifikaw x'għandu jitqies bħala “kwestjonijiet essenzjali tad-dritt kuntrattwali"; |
25. |
Jara l-benefiċċji fi strument fakultattiv li jkollu dispożizzjonijiet speċifiċi għall-aktar tipi frekwenti ta’ kuntratti, l-aktar għall-bejgħ ta’ prodotti u għall-għoti ta’ servizzi; itenni t-talba preċedenti tiegħu sabiex il-kuntratti ta’ assigurazzjoni jiddaħħlu fil-kamp ta’ applikazzjoni tal-istrument fakultattiv, minħabba li jemmen li dan l-istrument ikun ta’ siwi partikulari għall-kuntratti ta’ assigurazzjoni ta’ skala żgħira; jenfasizza li, fil-qasam tal-liġi kuntrattwali tal-assigurazzjoni, diġà saret ħidma preliminari bil-Prinċipji tal-Liġi Kuntrattwali Ewropea tal-Assigurazzjoni (PEICL), li għandhom jiġu integrati f'korp ta’ liġi kuntrattwali Ewropea u għandhom jiġu riveduti u mtejba aktar; madankollu jappella għal attenzjoni fir-rigward tal-inklużjoni ta’ servizzi finanzjarji minn kwalunkwe strument tal-liġi kuntrattwali propost f’dan l-istadju u jistieden lill-Kummissjoni tistabbilixxi grupp iddedikat ta’ esperti minn fost is-servizzi għal kwalunkwe ħidma futura ta’ tħejjija dwar is-servizzi finanzjarji biex jiġi żgurat li kwalunkwe strument futur ikun iqis il-karatteristiċi speċifiċi possibbli tas-settur tas-servizzi finanzjarji u kwalunkwe inizjattiva relatata mmexxija minn partijiet oħra tal-Kummissjoni, u jinvolvi lill-Parlament Ewropew fi stadju bikri; |
26. |
Jirrimarka li tqajmu xi kwistjonijiet speċifiċi li għalihom strument fakultattiv jista’ jkun ta’ benefiċċju, bħad-drittijiet diġitali u l-proprjetà benefiċjarja; iqis li, mill-banda l-oħra, jista’ jkun hemm il-ħtieġa li jiġu esklużi ċerti tipi ta’ kuntratti kumplessi tad-dritt pubbliku; jitlob li Grupp ta’ Esperti jeżamina l-possibilità tal-inklużjoni tal-kuntratti fil-qasam tal-jeddijiet tal-awturi bl-iskop li titjieb il-qagħda tal-awturi li ħafna drabi jkunu l-parti l-aktar dgħajfa f'relazzjoni kuntrattwali; |
27. |
Jemmen li l-istrument fakultattiv għandu jkun koerenti mal-acquis eżistenti fid-Dritt kuntrattwali; |
28. |
Ifakkar li għad fadal ħafna mistoqsijiet li jridu jingħataw tweġiba u ħafna problemi li jridu jiġu solvuti rigward Liġi Kuntrattwali Ewropea; jistieden lill-Kummissjoni tqis il-każistika, il-konvenzjonijiet internazzjonali dwar il-bejgħ tal-prodotti, bħall-Konvenzjoni tan-Nazzjonijiet Uniti dwar Kuntratti għall-Bejgħ Internazzjonali ta’ Prodotti (CISG), kif ukoll l-impatt tad-Direttiva dwar id-Drittijiet tal-Konsumatur; jenfasizza l-importanza tal-armonizzazzjoni tal-liġi kuntrattwali fl-UE filwaqt li jitqiesu r-regolamenti nazzjonali rilevanti li jipprovdu livell għoli ta’ ħarsien f'kuntratti B2C; |
L-applikazzjoni fil-prattika ta’ strument tal-Liġi Kuntrattwali Ewropea
29. |
Iqis li l-konsumaturi u l-SMEs għandhom jingħataw benefiċċji reali mill-istrument fakultattiv, u li l-istrument għandu jitfassal b’manjiera li tkun sempliċi, ċara u ekwilibrata, biex b’hekk tkun faċli li tintuża u attraenti għall-partijiet kollha; |
30. |
Jemmen li, filwaqt li strument fakultattiv ikollu l-effett li jipprovdi korp ġuridiku uniku, xorta tibqa’ l-ħtieġa li jiġu stabbiliti termini u kundizzjonijiet standard tal-kummerċ li jistgħu jiġu prodotti b’mod sempliċi u komprensibbli, li jkunu disponibbli immedjatament għan-negozji u, b’mod partikulari, għall-SMEs, u b’xi forma ta’ ċertifikazzjoni li tiżgura l-fiduċja tal-konsumaturi; jinnota li t-termini u l-kundizzjonijiet tal-kuntratti standard imsejsin fuq strument fakultattiv joffru aktar ċertezza ġuridika minn termini standard għall-UE kollha msejsin fuq drittijiet nazzjonali, li jkabbru l-possibilità ta’ interpretazzjonijiet nazzjonali differenti; |
31. |
Ifakkar li għad hemm il-prijorità li tibqa’ ssir ħidma dwar modi alternattivi ta’ soluzzjoni tat-tilwim transkonfinali (ADR), li hu rapidu u kost-effettiv b’mod partikulari għall-SMEs u għall-konsumaturi, iżda jenfasizza li, jekk il-partijiet jużaw korp wieħed tad-dritt ipprovdut mill-istrument fakultattiv, is-soluzzjoni alternattiva tat-tilwimiet tiġi ffaċilitata aktar; jistieden lill-Kummissjoni tikkunsidra sinerġiji meta tiġi biex tressaq proposta; jinnota li l-Grupp ta’ Ħidma dwar ir-Riżoluzzjoni Online tat-Tilwim tal-UNCITRAL wera interess ukoll fl-istrument fakultattiv bħala mezz għalbiex tiġi ffaċilitata r-Riżoluzzjoni Alternattiva tat-Tilwim (19) u għalhekk jirrakkomanda li l-Kummissjoni ssegwi l-iżviluppi fil-kopri internazzjonali l-oħrajn; |
32. |
Jissuġġerrixxi li t-titjib tal-funzjonament u l-effettività tas-sistemi transkonfinali ta’ rimedju jista’ jiġi ffaċilitat billi jkun hemm rabta diretta bejn l-istrument fakultattiv u l-Proċedura Ewropea tal-Ordni ta’ Ħlas u l-Proċedura Ewropea għal Talbiet Żgħar; huwa tal-fehma li għandha tinħoloq ittra elettronika qabel l-azzjoni ħalli tassisti lill-kumpaniji fil-ħarsien ta’ jeddijiethom, b'mod partikolari fil-qasam tal-proprjetà intellettwali u l-proċedura Ewropea għat-talbiet iż-żgħar; |
33. |
Huwa mħasseb li l-konsumaturi rarament iħossu li għandhom għażla fir-rigward tat-termini tal-kuntratti u li jsibu ma’ wiċċhom sitwazzjoni ta’ “jekk hekk jew xejn”; jemmen b’saħħa li jekk l-istrument fakultattiv ikun ikkumplimentat minn “kaxxa tal-għodod” u minn ġabra ta’ termini u kundizzjonijiet standard, tradotti fil-lingwi kollha, dan iservi ta’ kuraġġ sabiex jidħlu atturi ġodda fis-swieq madwar l-Unjoni Ewropea, u b’hekk tissaħħaħ il-kompetizzjoni u titwessa’ l-għażla ġenerali disponibbli għall-konsumaturi; |
34. |
Jenfasizza li għalkemm is-suq intern innifsu huwa l-prova aħħarija ta’ kwalunkwe strument finali, irid ikun stabbilit minn qabel li l-inizjattiva tirrappreżenta valur miżjud għall-konsumaturi u ma tikkomplikax it-tranżazzjonijiet transkonfinali, kemm għall-konsumaturi kif ukoll għan-negozji; jenfasizza l-ħtieġa li jitwaqqfu regoli dwar l-għoti, lill-partijiet kollha li jistgħu jkunu interessati u kkonċernati (inklużi l-qrati nazzjonali), ta’ informazzjoni adegwata dwar l-eżistenza u l-funzjonament tal-istrument; |
35. |
Jinnota li, f’dak li għandu x’jaqsam mal-objettiv tad-Dritt Kuntrattwali Ewropew, l-importanza ta’ ġurisdizzjoni Ewropea funzjonanti f'materji ċivili ma għandhiex tiġi injorata; |
36. |
Iħeġġeġ lill-Kummissjoni biex, b'kollaborazzjoni mal-Istati Membri, twettaq testijiet u kontrolli ta’ kwalità biex taċċerta ruħha li l-istrumenti proposti tal-Liġi Kuntrattwali Ewropea jkunu faċli biex jintużaw u jintegraw għalkollox il-preokkupazzjonijiet taċ-ċittadini, filwaqt li jipprovdu valur miżjud għaċ-ċittadini u n-negozji, isaħħu s-Suq Uniku u jiffaċilitaw il-kummerċ transkonfinali; |
Il-parteċipazzjoni tal-partijiet interessati, u l-valutazzjoni tal-impatt
37. |
Jenfasizza l-importanza vitali li jkun hemm il-parteċipazzjoni ta’ partijiet interessati minn madwar l-Unjoni u minn setturi differenti tal-attività, inklużi professjonisti legali u jfakkar lill-Kummissjoni tagħmel konsultazzjoni wiesgħa u trasparenti mal-partijiet interessati kollha qabel ma tieħu deċiżjoni msejsa fuq ir-riżultati tal-Grupp tal-Esperti; |
38. |
Japprezza l-fatt li l-gruppi ta’ esperti u tal-partijiet interessati t-tnejn ġejjin minn sfond ġeografiku u settorjali varjat; jemmen li l-kontribut tal-partijiet interessati se jsir dejjem aktar importanti ladarba tispiċċa l-fażi ta’ konsultazzjoni u ladarba titnieda din il-proċedura leġiżlattiva, li trid tkun inklużiva u trasparenti kemm jista’ jkun; |
39. |
Ifakkar, f’konformità mal-prinċipji tar-Regolamentazzjoni Aħjar, il-ħtieġa ta’ valutazzjoni komprensiva u wiesgħa tal-impatt, li tanalizza alternattivi differenti ta’ politiki, fosthom dik li ma tittiħidx azzjoni mill-Unjoni, u li tiffoka fuq iż-żewġ kwistjonijiet prattiċi, bħall-konsegwenzi potenzjali għall-SMEs u għall-konsumaturi, l-effetti li jista’ jkun hemm fuq il-kompetizzjoni inġusta fis-Suq Intern u li jiġi indikat speċifikament l-impatt ta’ dawn is-soluzzjonijiet kemm fuq l-acquis Komunitarju kif ukoll fuq is-sistemi ġuridiċi nazzjonali; |
40. |
Iqis, sa dak iż-żmien li titlesta għalkollox tali valutazzjoni tal-impatt, li, filwaqt li l-armonizzazzjoni fuq livell tal-UE tal-prattiki tal-liġi kuntrattwali tista’ tkun mezz effiċjenti ta’ kif jiġu żgurati l-konverġenza u sitwazzjoni ta’ kundizzjonijiet indaqs għal kulħadd, madankollu, minħabba l-isfidi tal-armonizzazzjoni tas-sistemi ġuridiċi mhux biss tal-Istati Membri imma wkoll ta’ reġjuni b’kompetenzi leġiżlattivi dwar din il-kwestjoni, strument fakultattiv jista’ jkun aktar fattibbli sakemm jiġi żgurat li dan jimplika valur miżjud kemm għall-konsumaturi kif ukoll għan-negozji; |
41. |
Jinsisti li l-Parlament għandu jkun ikkonsultat bis-sħiħ u jkun involut fil-qafas tal-proċedura leġiżlattiva ordinarja f'dak li għandu x'jaqsam ma’ kull strument fakultattiv futur li għandu jiġi ppreżentat mill-Kummissjoni Ewropea u li kwalunkwe strument fakultattiv propost ikun soġġett għall-iskrutinju u l-emendar skont dik il-proċedura; |
*
* *
42. |
Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni. |
(1) ĠU L 105, 27.4.2010, p. 109.
(2) ĠU C 295 E, 4.12.2009, p. 31.
(3) ĠU C 323 E, 18.12.2008, p. 364.
(4) ĠU C 305 E, 14.12.2006, p. 247.
(5) ĠU C 292 E, 1.12.2006, p. 109.
(6) ĠU C 158, 26.6.1989, p. 400.
(7) ĠU C 205, 25.7.1994, p. 518.
(8) ĠU C 140 E, 13.6.2002, p. 538.
(9) ĠU C 76 E, 25.3.2004, p. 95.
(10) Ewrobarometru 224, 2008, p. 4.
(11) ĠU L 177, 4.7.2008, p. 6.
(12) UK Federation of Small Businesses, Dokument ta’ pożizzjoni dwar Ruma I (2007).
(13) Flash Eurobarometer 300, 2011 http://ec.europa.eu/consumers/strategy/docs/retailers_eurobarometer_2011_en.pdf
(14) COM(2009)0557, p.3.
(15) Ibid, p. 5.
(16) COM(2008)0614.
(17) Von Bar, Clive, Schulte-Nölke et al. (ed.), Principles, Definitions and Model Rules of European Private Law – Draft Common Frame of Reference (DCFR), 2008.
(18) B. Fauvarque-Cosson, D. Mazeaud (dir.), collection ‧Droit privé comparé et européen‧, Volumi 6 u 7, 2008.
(19) Ir-Rapport tal-Grupp ta’ Ħidma III tal-Kummissjoni tan-Nazzjonijiet Uniti dwar id-Dritt Internazzjonali tal-Kummerċ (ir-Riżoluzzjoni Online tat-Tilwim) dwar il-ħidma fit-tnejn u għoxrin sessjoni (Vjenna, 13-17 ta’ Diċembru 2010), p. 8, 10.