52010PC0165

[pic] | IL-KUMMISSJONI EWROPEA |

Brussel 15.4.2010

KUMM(2010)165 finali

2008/0223 (COD)

KOMUNIKAZZJONI MILL-KUMMISSJONI LILL-PARLAMENT EWROPEW skont l-Artikolu 294(6) tat-Trattat dwar il-Funzjonament tal-Unjoni Ewropea dwar

il-pożizzjoni tal-Kunsill fl-ewwel qari dwar l-adozzjoni ta' proposta emendata għal Direttiva tal-Parlament Ewropew u tal-Kunsill dwar il-prestazzjoni tal-enerġija tal-bini (riformulazzjoni)

2008/0223 (COD)

KOMUNIKAZZJONI MILL-KUMMISSJONI LILL-PARLAMENT EWROPEW skont l-Artikolu 294(6) tat-Trattat dwar il-Funzjonament tal-Unjoni Ewropea dwar

il-pożizzjoni tal-Kunsill fl-ewwel qari dwar l-adozzjoni ta' proposta emendata għal Direttiva tal-Parlament Ewropew u tal-Kunsill dwar il-prestazzjoni tal-enerġija tal-bini (riformulazzjoni)

1. SFOND

Id-data tat-trażmissjoni tal-proposta lill-PE u lill-Kunsill (COM(2008)0780 – COD/2008/0223): | it-13 ta' Novembru 2008 |

Id-data tal-opinjoni tal-Kumitat Ekonomiku u Soċjali Ewropew: | it-13 ta’ Mejju 2009 |

Id-data tal-opinjoni tal-Kumitat tar-Reġjuni: | l-24 ta’ April 2009 |

Id-data tal-opinjoni tal-Parlament Ewropew, l-ewwel qari: | it-23 ta’ April 2009 |

Id-data tal-adozzjoni tal-pożizzjoni tal-Kunsill fl-ewwel qari: | 14 ta’ April 2010 |

2. GĦAN TAL-PROPOSTA TAL-KUMMISSJONI

L-għan tar-riformulazzjoni tad-Direttiva 2002/91/KE tal-Parlament Ewropew u tal-Kunsill tas-16 ta’ Diċembru 2002 dwar il-prestazzjoni tal-enerġija tal-bini (“EPBD”) huwa li tiċċara u tissimplifika ċerti dispożizzjonijiet, twessa’ l-ambitu u ssaħħaħ uħud mid-dispożizzjonijiet tagħha sabiex ittejjeb l-effett tagħhom, u tipprovdi għar-rwol ewlieni tas-settur pubbliku. L-għanijiet u l-prinċipji tad-Direttiva attwali nżammu u xorta għadu f'idejn l-Istati Membri biex jiddeterminaw ir-rekwiżiti konkreti tal-prestazzjoni tal-enerġija.

3. KUMMENTI DWAR IL-POŻIZZJONI TAL-KUNSILL fl-EWWEL QARI

3.1. Kummenti ġenerali dwar il-Pożizzjoni tal-Kunsill

It-test tal-Pożizzjoni nnegozjata tal-Kunsill huwa, fis-sustanza, f'konformità mal-proposta tal-Kummissjoni u għalhekk għandu jiġi appoġġat.

3.2. Ftehim dwar il-Pożizzjoni tal-Kunsill fl-istadju tal-ewwel qari

Il-Pożizzjoni nnegozjata tal-Kunsill hija riżultat tan-negozjati interistituzzjonali f'żewġ passi. L-ewwel pass kopra l-kontenut tal-proposta u t-tieni pass l-adattament tal-proposta tat-Trattat dwar il-Funzjonament tal-Unjoni Ewropea f'dak li għandu x'jaqsam mal-atti delegati u implimentattivi (l-Artikoli 290 u 291 tat-TFUE) kif ukoll il-bażi legali.

Fir-rigward tal-kontenut tal-proposta, fit-30 ta' Novembru 2009, il-president tal-Kumitat ITRE, is-Sur Herbert Reul, ikkonferma li l-Parlament jaqbel mat-test kif intlaħaq ftehim dwaru fl-aħħar diskussjoni politika li saret fis-17 ta' Novembru 2009 u li ġie approvat mill-Coreper fl-20 ta' Novembru 2009.

Fir-rigward tal-adattament tal-proposta tat-Trattat dwar il-Funzjonament tal-Unjoni Ewropea, il-kompromess milħuq ġie approvat mill-Coreper fl-24 ta' Marzu 2010 u kkonfermat mill-president tal-Kumitat ITRE tal-Parlament, is-Sur Reul, fil-25 ta' Marzu 2010. Il-pożizzjoni nnegozjata tal-Kunsill ġiet adottata formalment bi proċedura bil-miktub fl-14 ta' April 2010.

Is-suġġetti ewlenin tan-negozjati li ntlaħaq ftehim dwarhom huma kif ġej:

Tibdil tal-bażi legali (preambolu): minħabba d-dħul fis-seħħ tat-Trattat dwar il-Funzjonamenttal-Unjoni Ewropea, il-koleġiżlaturi qablu li jbiddlu l-bażi legali għall-Artikolu 194(2) tat-TFUE. Żdied paragrafu mal-Artikolu 1 li jenfasizza li d-Direttiva tistabbilixxi rekwiżiti minimi li ma jipprevenux lill-Istati Membri milli jżommu jew jintroduċu miżuri iktar stretti. Il-Kummissjoni taqbel ma' dawn it-tibdiliet, li ma jimmodifikawx il-proċedura tat-teħid tad-deċiżjonijiet applikabbli.

Dispożizzjonijiet dwar atti delegati u implimentattivi (l-Artikoli 22 sa 26): id-Direttiva tiddelega s-setgħat lill-Kummissjoni biex tadotta l-qafas ta' metodoloġija komparattiva tal-Artikolu 5 (sat-30 ta' Ġunju 2011) u biex tadatta l-progress tekniku (il-punti 3 u 4 tal-Anness I) għal perjodu ta' 5 snin – li jiġġedded awtomatikament – wara d-dħul fis-seħħ tad-Direttiva. Il-Parlament u l-Kunsill jistgħu jirrevokaw id-delegazzjoni ta' setgħat meta jridu u joġġezzjonaw għall-att delegat fi żmien xahrejn wara n-notifika, bil-possibbiltà li jitolbu għal estensjoni ta' xahrejn addizzjonali. Fuq talba tal-Parlament, ġiet inkluża dikjarazzjoni tal-Kummissjoni dwar in-notifika tal-atti delegati waqt il-perjodu tal-vaganzi tal-istituzzjonijiet, flimkien ma' dikjarazzjoni konġunta tal-Parlament Ewropew, il-Kunsill u l-Kummissjoni li tiddikjara li d-dispożizzjonijiet ta' din id-Direttiva mhumiex se jikkostitwixxu preċedent fuq il-pożizzjonijiet tagħhom dwar atti delegati ( Ara l-Anness I ).

Il-Kummissjoni hija mitluba wkoll li tadotta att implimentattiv, skont il-proċedura konsultattiva tal-Artikolu 3 tad-Deċiżjoni 1999/468/KE, biex tistabbilixxi skema volontarja ta' ċertifikazzjoni komuni għall-prestazzjoni tal-enerġija ta' bini mhux residenzjali (l-Artikolu 10 (9).

L-aħjar rekwiżiti minimi f’sens ta’ nefqa tal-prestazzjoni tal-enerġija u qafas ta' metodoloġija komparattiva (l-Artikolu 5 u l-Anness III): il-Kummissjoni se tiżviluppa metodoloġija komparattiva biex tikkalkula l-aħjar livelli f'sens ta' nefqa tal-prestazzjoni tal-enerġija għall-bini. L-Istati Membri se jiġġustifikaw kwalunkwe diskrepanza sinifikanti u jippreżentaw pjan li jippreżenta l-passi xierqa.

Bini eżistenti (l-Artikolu 7): din id-dispożizzjoni ġiet rinfurzata billi titlob li l-bini eżistenti kollu li għaddej minn rinnovament kbir ikollu jilħaq ir-rekwiżiti tal-prestazzjoni tal-enerġija u li r-rekwiżiti tal-prestazzjoni tal-enerġija jiġu stabbiliti wkoll għall-elementi tal-bini.

Sistemi tekniċi tal-bini (l-Artikolu 8): dispożizzjoni ġdida teħtieġ l-istabbiliment tar-rekwiżiti tal-prestazzjoni tal-enerġija għas-sistemi tekniċi tal-bini (eżempju t-tisħin, l-ilma sħun, u s-sistemi tal-arja kundizzjonata).

Bini b'konsum ta' enerġija kważi żero (l-Artikolu 9): inħoloq kunsens dwar id-definizzjoni tal-'bini b'konsum ta' enerġija kważi żero' u dwar il-ħtieġa għall-iżvilupp ta' pjanijiet nazzjonali biex jiżdied l-għadd tagħhom. L-Istati Membri għandhom jiżguraw li sal-31 ta' Diċembru 2018, il-bini l-ġdid okkupat u f'idejn awtorità pubblika u sal-31 ta' Diċembru 2020, bini ġdid ieħor ikun 'bini b'konsum ta' enerġija kważi żero'.

Inċentivi finanzjarji u ostakoli tas-suq (l-Artikolu 10): dan l-artikolu l-ġdid iddaħħal biex jenfasizza l-importanza ta' finanzjament xieraq. L-Istati Membri għandhom ifasslu lista ta' miżuri eżistenti u proposti u l-Kummissjoni għandha tippreżenta analiżi tal-fondi disponibbli. Dikjarazzjoni tal-Kummissjoni dwar il-finanzjament għall-effiċjenza fl-użu tal-enerġija fil-bini tindika r-rwol tagħha fl-appoġġ għall-użu ta' strumenti ta' finanzjament sabiex jinkiseb settur tal-bini Ewropew effiċjenti fl-użu tal-enerġija u b'użu baxx tal-karbonju ( ara l-Anness II ).

Ċertifikati tal-prestazzjoni tal-enerġija (l-Artikoli 11 sa 13): din id-dispożizzjoni ġiet rinfurzata billi ttejjeb il-kontenut taċ-ċertifikati, ġie rinforzat l-obbligu li ċ-ċertifikat jintwera fil-bini pubbliku u ddaħħlet il-ħtieġa li l-indikatur tal-prestazzjoni stabbilit fiċ-ċertifikat jiġi indikat fir-riklamar tad-djar.

Spezzjoni tas-sistemi tat-tisħin u tal-arja kundizzjonata (l-Artikoli 14 sa 16) u esperti u sistemi ta' kontroll indipendenti (l-Artikolu 18 u l-Anness II): iktar flessibbiltà lill-Istati Membri fir-rigward tal-ispezzjonijiet tas-sistemi tal-arja kundizzjonata ntrabtet ma' rekwiżit biex ikunu żgurati sistemi indipendenti ta' kontroll għaċ-ċertifikati u rapporti dwar l-ispezzjonijiet tas-sistemi tat-tisħin u tal-arja kundizzjonata.

Klawżola ta' reviżjoni (l-Artikolu 19): il-klawżola ta' reviżjoni saret iktar speċifika billi ġiet stabbilita data biex tiġi evalwata d-Direttiva (l-1 ta' Jannar 2017).

Traspożizzjoni (l-Artikolu 28): l-adozzjoni tal-miżuri ta' traspożizzjoni mill-Istati Membri nbidlet għal 'sentejn wara d-dħul fis-seħħ' tad-Direttiva. Id-dati tal-applikazzjoni tad-dispożizzjonijiet nazzjonali li jittrasponu ħafna mid-dispożizzjonijiet tad-Direttiva issa huma 'sentejn u sitt xhur' u 'tliet snin' wara d-dħul fis-seħħ tad-Direttiva. Ingħata żmien addizzjonali (sal-31 ta' Diċembru 2015) għall-applikazzjoni tal-Artikolu 11(1) u (2) għal unitajiet waħdiena li jinkrew.

4. KONKLUŻJONI

Il-Pożizzjoni tal-Kunsill tilħaq l-għanijiet tal-proposta inizjali tal-Kummissjoni. Il-Kummissjoni għalhekk tappoġġa t-test.

Anness I

Dikjarazzjoni tal-Parlament Ewropew, il-Kunsill u l-Kummissjoni

dwar l-Artikolu 290 tat-TFUE

"Il-Parlament Ewropew, il-Kunsill u l-Kummissjoni jiddikjaraw li d-dispożizzjonijiet ta' din id-Direttiva għandhom ikunu mingħajr preġudizzju għal kwalunkwe pożizzjoni futura tal-istituzzjonijiet fir-rigward tal-implimentazzjoni tal-Artikolu 290 tat-TFUE jew atti leġiżlattivi individwali li fihom dawn id-dispożizzjonijiet."

Dikjarazzjoni tal-Kummissjoni

"Il-Kummissjoni Ewropea tinnota li minbarra f'każijiet fejn l-atti leġiżlattivi jipprovdu għal proċedura ta' urġenza, il-Parlament Ewropew u l-Kunsill jikkunsidraw li n-notifika tal-atti delegati għandha tikkunsidra l-perjodi tal-vaganzi tal-istituzzjonijiet (fix-xitwa, fis-sajf u waqt l-elezzjonijiet Ewropej), sabiex jiġi żgurat li l-Parlament Ewropew u l-Kunsill ikunu kapaċi jeżerċitaw il-prerogattivi tagħhom fi ħdan il-limiti tal-ħin stabbiliti fl-atti leġiżlattivi rilevanti, u hija lesta li taġixxi skont dan."

Anness II

Dikjarazzjoni tal-Kummissjoni dwar il-Finanzjament għall-Effiċjenza fl-użu tal-Enerġija fil-Bini

“Il-Kummissjoni tenfasizza r-rwol kruċjali li għandhom l-istrumenti ta’ finanzjament sabiex tirnexxi t-trasformazzjoni tas-settur tal-bini Ewropew f’wieħed effiċjenti fl-użu tal-enerġija u b’użu baxx tal-karbonju. Il-Kummissjoni se tkompli tinkuraġġixxi lill-Istati Membri jużaw b’mod estensiv il-fondi disponibbli skont il-Fond Ewropew għall-Iżvilupp Reġjonali (bħalissa sa 4 % tal-ammonti nazzjonali totali tal-Fond Ewropew għall-Iżvilupp Reġjonali, li jirrappreżentaw ammont ta’ EUR 8 biljuni, jistgħu jintużaw biex jiżdiedu l-effiċjenza fl-użu tal-enerġija u l-użu tal-enerġija rinnovabbli fis-settur tad-djar, flimkien mal-appoġġ finanzjarju mhux limitat li diġà huma disponibbli għall-enerġija sostenibbli f’bini pubbliku u kummerċjali/industrijali) u se tappoġġa wkoll lill-Istati Membri biex jużaw aħjar il-fondi disponibbli kollha u l-finanzjament li jista’ jaġixxi bħala azzjoni biex tistimula l-investimenti fl-effiċjenza fl-użu tal-enerġija.

Barra minn hekk, il-Kummissjoni se tesplora l-possibbiltà li tiżviluppa iktar l-inizjattivi eżistenti kollha, bħall-inizjattiva tal-Bliet Għaqlin (Smart Cities)[1] jew l-użu tal-baġit tal-Ewropa II – Enerġija Intelliġenti, pereżempju, għall-fini tal-qsim tal-għarfien u l-assistenza teknika sabiex jiġu stabbiliti fondi nazzjonali li jistgħu jerġgħu jintużaw.

Barra minn hekk, il-Kummissjoni għandha tipprepara sinteżi u analiżi tal-mekkaniżmi ta’ finanzjament li huma attwalment applikabbli fl-Istati Membri u tikkunsidra s-sejbiet biex tipprova xxerred l-aqwa prattiki madwar l-UE.

Fl-aħħar nett, il-Kummissjoni, wara l-analiżi msemmija fl-Artikolu [9a(4)] tad-Direttiva [2010/XXX/KE], se tikkunsidra l-iżvilupp possibbli ta’ inċentivi finanzjarji fil-ġejjieni (inter alia fir-rigward tal-istrumenti Komunitarji msemmija għal din il-fini fl-Artikolu 9a(4a)) u l-aqwa użu tagħhom għall-investimenti fl-effiċjenza fl-użu tal-enerġija mtejba tal-bini.

[1] SET-Plan COM (2009) 519