22.10.2010   

MT

Il-Ġurnal Uffiċjali tal-Unjoni Ewropea

CE 286/5

A.

billi r-rispett għad-drittijiet tal-bniedem huwa wieħed mill-valuri bażiċi tal-Unjoni (Artikolu 2 TUE) u huwa wkoll rifless fl-azzjoni esterna tagħha, fejn l-Artikolu 21(1) TUE jistipula li “l-azzjoni tal-Unjoni fix-xena internazzjonali għandha tiġi ggwidata mill-prinċipji li ispiraw il-ħolqien, l-iżvilupp u t-tkabbir tagħha u li hija tfittex li tippromwovi fil-bqija tad-dinja: id-demokrazija, l-istat tad-dritt, l-universalità u l-indiviżibilità tad-drittijiet tal-bniedem u l-libertajiet fundamentali, ir-rispett lejn id-dinjità tal-bniedem, il-prinċipji tal-ugwaljanza u s-solidarjetà u r-rispett lejn il-prinċipji tal-Karta tan-Nazzjonijiet Uniti u l-liġi internazzjonali”,

B.

billi l-Unjoni hija impenjata fil-ġlieda kontra t-terroriżmu fid-dimensjonijiet kollha tiegħu – kemm jekk dan joriġina jew jitwettaq ġewwa l-fruntieri tal-Unjoni kif ukoll barra minnhom – filwaqt li taġixxi fi ħdan il-limiti ċari definiti mill-istat tad-dritt u fir-rispett tad-drittijiet fundamentali; billi trid tingħata attenzjoni kbira biex ikun żgurat li f’dan il-qasam partikulari d-drittijiet tal-bniedem ikunu rispettati bis-sħiħ u li l-miżuri kollha adottati sabiex jiġġieldu t-terroriżmu jkunu proporzjonati, xierqa u effettivi,

C.

billi l-mezzi li bihom l-Unjoni biħsiebha tilħaq l-għanijiet enfasizzati hawn fuq, fosthom il-ġlieda kontra t-terroriżmu, jinkludu miżuri restrittivi (sanzjonijiet) (għalkemm mhumiex limitati biss għalihom) kontra gvernijiet ta’ Stati terzi, persuni fiżiċi jew ġuridiċi, gruppi jew entitajiet mhux Statali; billi għadu dibattibbli jekk in-NU u l-UE ppreżentawx biżżejjed evidenza li turi s-suċċess ta’ dawn is-sistemi biex irażżnu l-finanzjament ta’ atti terroristiċi; u filwaqt li jqis l-impatt sinifikanti li dawn is-sistemi kellhom fuq il-kredibilità tal-impenn tan-NU u tal-UE favur id-drittijiet tal-bniedem,

D.

billi, b’konformità mal-prattika ġenerali tal-UE, hawnhekk mhi qed issir l-ebda distinzjoni bejn it-termini “sanzjonijiet” u “miżuri restrittivi” (15); billi l-Kunsill irrimarka li s-sanzjonijiet għandhom ikunu mmirati b’mod li jkollhom l-akbar impatt possibbli fuq dawk li l-imġiba tagħhom is-sanzjonijiet huma intenzjonati li jolqtu; fit-twettiq ta’ dan huma għandhom ikunu mmirati bi preċiżjoni sabiex jitnaqqsu kemm jista' jkun l-effetti negattivi fuq livell umanitarju, ir-riskju ta’ konsegwenzi mhux intenzjonati għal persuni li ma jkunux fil-mira, u l-effetti negattivi li jista’ jkun hemm fuq pajjiżi ġirien,

E.

billi l-Artikolu 215(2) TFUE jistipula li “meta deċiżjoni li tkun adottata skond il-Kapitolu II tat-Titolu V tat-Trattat dwar l-Unjoni Ewropea tipprovdi hekk, il-Kunsill jista' jadotta miżuri restrittivi taħt il-proċedura prevista fil-paragrafu 1 kontra persuni fiżiċi jew ġuridiċi, kontra gruppi jew kontra entitajiet mhux Statali”; u billi l-Artikolu 75, l-ewwel paragrafu, TFUE jipprevedi li “fejn meħtieġ sabiex jitwettqu l-objettivi previsti fl-Artikolu 67, fir-rigward tal-prevenzjoni u l-ġlieda kontra t-terroriżmu u attivitajiet marbuta ma' dan, il-Parlament Ewropew u l-Kunsill, li jaġixxu permezz ta' regolament skond il-proċedura leġislattiva ordinarja, għandhom jiddefinixxu qafas għal miżuri amministrattivi fir-rigward tal-movimenti tal-kapital u tal-pagamenti, bħall-iffriżar ta' fondi, assi finanzjarji jew benefiċċji ekonomiċi li jappartjenu lil, jew li jkunu proprjetà ta', jew miżmuma minn, persuni fiżiċi jew ġuridiċi, gruppi jew entitajiet mhux statali”,

F.

billi t-tieni subparagrafu tal-Artikolu 275, TFUE jipprevedi wkoll li “l-Qorti għandha tkun kompetenti […] sabiex tiddeċiedi dwar rikorsi, mressqa skond il-kondizzjonijiet stabbiliti fir-raba' subparagrafu tal-Artikolu 263 ta' dan it-Trattat dwar il-legalità ta' deċiżjonijiet li jipprovdu miżuri restrittivi kontra persuni fiżiċi jew ġuridiċi adottati mill-Kunsill abbażi tal-Kapitolu 2 tat-Titolu V tat-Trattat dwar l-Unjoni Ewropea”,

G.

billi l-Artikolu 16(2) TFUE jistieden lill-Parlament u lill-Kunsill biex jistabilixxu qafas ċar u stabbli għall-protezzjoni tad-data b’regoli li “għandhom x'jaqsmu mal-protezzjoni tal-individwi fir-rigward tal-ipproċessar ta' data personali mill-istituzzjonijiet, il-korpi u l-organi tal-Unjoni, kif ukoll mill-Istati Membri meta jwettqu attivitajiet li jaqgħu fil-kamp ta' applikazzjoni tad-dritt tal-Unjoni, u mal-moviment liberu ta' din id-data”. billi dan l-istess Artikolu jgħid li “l-ħarsien ta' dawn ir-regoli għandu jkun suġġett għall-kontroll minn awtoritajiet indipendenti”; billi l-implikazzjoni hija li r-regoli msemmija hawn fuq ikunu japplikaw ukoll għall-proċess ta’ data personali mill-istituzzjonijiet tal-Unjoni fil-qasam tal-politika barranija u ta’ sigurtà Ewropea; billi l-Artikolu 29 TUE (fil-Kapitolu 2 li għandu t-titolu “Dispożizzjonijiet speċifiċi dwar il-politika estera u ta’ sigurtà komuni”) għandu jitqies bħala deroga mill-Artikolu 16 TFUE li jirrikjedi li “l-Kunsill jadotta deċiżjoni li tistabbilixxi r-regoli li għandhom x'jaqsmu mal-protezzjoni tal-individwi fir-rigward tal-ipproċessar ta' data personali mill-Istati Membri meta jwettqu attivitajiet li jaqgħu fil-kamp ta' applikazzjoni tad-dritt tal-Unjoni, u r-regoli li għandhom x'jaqsmu mal-moviment liberu ta' din id-data”; billi, l-istess bħall-Artikolu 16(2) TFUE, huwa jipprevedi li “l-ħarsien ta' dawn ir-regoli għandu jkun suġġett għall-kontroll minn awtoritajiet indipendenti”,

H.

billi fil-kawża msemmija hawn fuq Kadi u Al Barakaat International Foundation vs il-Kunsill u l-Kummissjoni, il-Qorti tal-Ġustizzja annullat ir-Regolament (KE) Nru 881/2002 fejn kien jikkonċerna lis-Sur Yassin Abdullah Kadi u l-Al Barakaat International Foundation, u qieset li l-awtorità Komunitarja li tiddeċiedi li tiffriża l-fondi u r-riżorsi ekonomiċi ta’ individwu jew ta’ entità skont ir-Regolament (KE) Nru 881/2002 teħtieġ li tgħarraf lill-individwu jew lill-entità kkonċernati bir-raġunijiet li fuqhom ittieħdet id-deċiżjoni, sabiex jiġu rrispettati d-drittijiet tad-difiża, l-aktar id-dritt tas-smigħ u d-dritt ta’ reviżjoni ġudizzjarja, u li, minħabba li dawk il-persuni jew entitajiet ma kinux ġew mgħarrfa bl-evidenzi miġjuba kontrihom, huma ma kinux f’pożizzjoni li jiddefendu d-drittijiet tagħhom fir-rigward ta’ dik l-evidenza f’kundizzjonijiet sodisfaċenti quddiem il-ġudikatura Komunitarja,

I.

billi l-każistika tal-Qorti tal-Prim’Istanza tal-Komunitajiet Ewropej tenfasizza li r-reviżjoni ġudizzjarja hija aktar u aktar meħtieġa minħabba li tikkostitwixxi l-unika salvagwardja proċedurali li tiżgura li jintlaħaq bilanċ ġust bejn il-ħtieġa li jiġi miġġieled it-terroriżmu internazzjonali u l-ħarsien tad-drittijiet fundamentali (16); billi d-deċiżjonijiet preċedenti tal-Qorti tal-Prim’Istanza (Kawżi magħquda T-110/03, T-150/03 u T-405/03 Sison v il-Kunsill  (17) ikkonfermaw tliet deċiżjonijiet konsekuttivi tal-Kunsill li jirrifjutaw l-aċċess, lill-avukati ta’ Jose Maria Sison, għad-dokumenti li fuqhom il-Kunsill kien ħa d-deċiżjoni li jinkludih fil-lista tal-persuni suġġetti għal miżuri restrittivi speċifiċi skont l-Artikolu 2(3) tar-Regolament (KE) Nru 2580/2001,

J.

billi xi studji wrew li fis-sistemi nazzjonali, l-iffriżar tal-assi huwa miżura proviżorja meħuda sakemm tittieħed deċiżjoni ġudizzjarja dwar is-sehem ta’ persuna f’attivitajiet kriminali, filwaqt li jitqies li fil-livell tan-NU u tal-UE, dawn is-sanzjonijiet m’għandhomx jitqiesu bħala miżuri proviżorji sakemm tittieħed deċiżjoni ġudizzjarja, iżda alternattivi de facto għad-deċiżjonijiet ġudizzjarji (18),

K.

billi r-riżoluzzjoni tal-Kunsill tas-Sigurtà tan-Nazzjonijiet Uniti S/RES/1822 (2008) wasslet għal xi titjib, primarjament: il-ħtieġa li d-dikjarazzjonijiet tar-raġunijiet fuqhiex persuna tiġi elenkata jkunu pubblikati fuq il-websajt tal-Kumitat tas-Sanzjonijiet; l-obbligu tal-Istati Membri li skont il-liġijiet u l-prattiki domestiċi tagħhom, jieħdu l-miżuri kollha possibbli biex jinnotifikaw jew jinformaw fil-waqt l-individwu elenkat jew l-entità msemmija u jinkludu ma' din in-notifika kopja tal-porzjon rilaxxat pubblikament tad-dikjarazzjoni tal-każ u informazzjoni relevanti oħra; il-ħolqien ta’ “punt fokali” li fih il-persuni fuq il-lista s-sewda jkunu jistgħu jressqu l-ilment tagħhom (19); reviżjoni sħiħa tal-ismijiet kollha tal-Lista Konsolidata,

L.

billi għad ma hemm ebda mekkaniżmu legali internazzjonali għall-kontroll/reviżjoni tal-eżattezza tat-tagħrif li jiffurma l-bażi ta' Kumitat tas-Sanzjonijiet tan-NU dwar il-lista s-sewda jew il-ħtieġa u l-proporzjonalità tal-miżuri adottati; billi l-individwu għad ma għandu ebda dritt ta' aċċess għal qorti jew korp kważi ġuridiku fil-livell tan-NU (20),

1.

Iqis li huwa importanti li ssir riflessjoni fuq qafas ġenerali għas-sanzjonijiet immirati kollha implimentati mill-UE kontra persuni fiżiċi jew ġuridiċi, entitajiet jew korpi, li jiżgura r-rispett għad-drittijiet fundamentali ta' dawk fil-mira;

2.

Huwa tal-fehma li fil-qasam speċifiku tas-sanzjonijiet kontra t-terroriżmu, id-distinzjoni bejn theddidiet “esterni” u “interni” hija diffiċli biex tiġġustifikaha fil-prattika, speċjalment meta dawn is-sanzjonijiet jistgħu jiksru wkoll id-drittijiet taċ-ċittadini u r-residenti tal-UE skont il-Karta (21) iqis li għandu jiġi stabbilit qafas legali skont l-Artikolu 75 tat-TFUE għal miżuri dwar il-movimenti kapitali u l-ħlasijiet, bħall-iffriżar ta' fondi, assi finanzjarji jew benefiċċji ekonomiċi li jappartjenu jew huma proprjetà inkella miżmuma minn, persuni fiżiċi jew ġuridiċi, gruppi jew entitajiet mhux statali, inkluż (kif osservat ukoll mill-Kumitat għal-Afarijiet Legali tiegħu) għal miżuri restrittivi għal ċerti persuni u entitajiet assoċjati ma' Usama bin Laden, in-netwerk ta’ Al-Qaida u t-Taliban; dan l-approċċ għandu jippermetti livell xieraq ta’ responsabilità diretta demokratika permezz tal-intervent tal-Parlament minħabba l-proċedura ta’ kodeċiżjoni (proċedura leġiżlattiva ordinarja);għandu jitqies ukoll l-involviment xieraq tal-parlamenti nazzjonali;

3.

Iqis li fir-rigward ta' miżuri futuri – bħal miżuri restrittivi fir-rigward taż-Żimbabwe u ċerti miżuri speċifiċi restrittivi għal ċerti persuni fiżiċi u ġuridiċi, entitajiet u korpi fid-dawl tal-qagħda fis-Somalja, meħuda skont l-Artikolu 215(2) tat-TFUE – il-possibbiltà ta' konsultazzjoni fakultattiva tal-Parlament għandha titqies (skont il-Kunsill Ewropew “Dikjarazzjoni Solenni dwar l-Unjoni Ewropea”, magħmula fi Stuttgart fid-19 ta' Ġunju 1983, li tipprovdi għall-konsultazzjoni fakultattiva tal-Parlament dwar kwistjonijiet internazzjonali anki fejn ma kien hemm xejn fit-Trattati); dan l-approċċ jista' jkun ikkunsidrat bħala li hu konformi mal-ispirtu tat-Trattat ta' Lisbona u f’konformità mar-rwol preċedenti tal-Parlament (konsultattiv) f'dan il-qasam;

4.

Itenni r-rikjesta tiegħu għal valutazzjoni fil-fond tal-implimentazzjoni, fuq bażi annwali, tad-dispożizzjonijiet li jippreskrivu miżuri restrittivi u l-effettività tagħhom, flimkien ma’ trasmissjoni xierqa u f’waqtha tal-informazzjoni lill-Parlament f’dawn il-kwistjonijiet; iqis li għal dan il-għan, is-sanzjonijiet għandhom dejjem ikunu akkumpanjati minn minn kriterji ta' referenza ċari;

5.

Jistieden lill-Kummissjoni biex tistabbilixxi netwerk ta’ esperti indipendenti mqabbda biex jipproponu lill-Kunsill l-aktar miżuri restrittivi pertinenti f’sitwazzjoni partikolari, jirrapportaw regolarment dwar bidliet fis-sitwazzjoni fid-dawl ta’ kriterji ta’ referenza u l-għanijiet fil-mira u, fejn xieraq, jissuġġerixxu kif is-sanzjonijiet għandhom jiġu implimentati b’mod aktar effettiv; iqis li l-istabbiliment ta’ netwerk ta’ dan it-tip iwassal għal trasparenza akbar, itejjeb il-kwalità tad-dibattitu dwar is-sanzjonijiet fuq livell ġenerali kif ukoll isaħħaħ l-applikazzjoni u l-monitoraġġ kontinwu ta’ sanzjonijiet f’każijiet speċifiċi;

6.

Ifakkar li l-attivitajiet tal-organizzazzjonijiet mhux governattivi jagħtu kontribut sostanzjali għall-iżvilupp, id-demokrazija u d-drittijiet tal-bniedem, u li jista' jkun ta' siwi li jiġu kkonsultati dwar il-politiki tal-UE kontra t-terroriżmu biex tinkiseb informazzjoni ta' valur dwar il-qagħda konkreta; ifakkar ukoll li miżuri repressivi kontra t-terroriżmu, ma għandhomx jostakolaw il-miri tagħhom fl-oqsma tal-iżvilupp, id-demokrazija u d-drittijiet tal-bniedem;

7.

Jenfasizza li l-kummenti li ġejjin jirreferu, inter alia, għas-sustanza tal-proposti mressqa mill-Kummissjoni fil-qafas legali li għadda, li issa m'għadhomx jgħoddu fid-dawl tal-qafas legali stabbilit mit-Trattat ta' Lisbona; jinnota li kull referenza għad-Deċiżjoni tal-Kunsill 1999/468/KE tat-28 ta’ Ġunju 1999 li tistabbilixxi l-proċeduri għall-eżerċizzju tal-poteri ta’ implimentazzjoni mogħtija lill-Kummissjoni (22), għandha titqies li m’għadhiex tgħodd;

8.

Jinnota li, sabiex jirrispetta l-impenji tiegħu fil-ġlieda kontra t-terroriżmu filwaqt li jirrispetta d-drittijiet tal-bniedem, qies l-iffriżar tal-fondi u r-riżorsi ekonomiċi ta’ ċerti persuni, gruppi u entitajiet bħala strument xieraq għal dan il-għan; jenfasizza li l-implimentazzjoni ta’ dawn il-miżuri għandha tkun akkumpanjata l-ħin kollu b'salvagwardji u garanziji b'saħħithom u adegwati, b'kunsiderazzjoni għall-konsegwenzi estremament iebsa tal-lista s-sewda għall-individwi u l-organizzazzjonijiet ikkonċernati; jinnota li, fir-rigward ta’ miżuri restrittivi għal ċerti persuni u entitajiet li għandhom x’jaqsmu ma’ Usama bin Laden, in-netwerk ta’ Al-Qaida u t-Taliban, japplika l-Artikolu 75 TFEU;

9.

Jindika l-ħtieġa ta' riflessjoni fil-fond dwar l-effetti sinifikanti li għandhom is-sanzjonijiet kontra t-terroristi fir-rigward tal-liġi kriminali u dwar il-ħtieġa li jkunu adottati rimedji adegwati fuq livell nazzjonali għal din is-sistema tal-listi s-suwed;

10.

Ifakkar li l-proċeduri ta' tqegħid fil-lista u t-tneħħija minnha fis-sistema tas-sanzjonijiet tan-NU u tal-UE kienu ikkritikati ferm minħabba li naqsu milli jipprovdu protezzjoni sodisfaċenti għad-drittijiet fundamentali (kemm proċedurali kif ukoll sostantivi) u għaċ-ċertezza ġuridika; jilqa' b'sodisfazzjon, għalhekk, l-inizjattivi reċenti li ttieħdu fil-livell tal-UE sabiex jinstab rimedju għan-nuqqasijiet imsemmija hawn fuq; jiddispjaċih madankollu, li l-Kunsill b'mod partikolari wera nuqqas ta' determinazzjoni sabiex ikun żgurat li r-Regolament (KE) Nru 881/2002 rivedut jirrispetta d-drittijiet fundamentali tal-persuni u l-entitajiet ikkonċernati;

11.

Jiddubita, fir-rigward tad-“dikjarazzjoni tar-raġunijiet” li trid tingħata, kemm il-proposta tal-Kummissjoni u kemm it-test tal-Kunsill jikkonformaw mar-rekwiżiti tas-sentenza fil-Każ imsemmi hawn fuq ta' Kadi u Al Barakaat International Foundation vs. il-Kunsill u l-Kummissjoni, li rreferew għall-obbligu li jkunu kkomunikati r-raġunijiet li għalihom, f'dawn il-każijiet, l-isem ta' persuna jew entità tkun ġiet inkluża fil-lista, filwaqt li titqies b'mod partikolari r-referenza magħmula għad-dritt tal-persuni u tal-entitajiet ikkonċernati li jkunu infurmati bl-evidenza mressqa kontrihom;

12.

Jenfasizza li l-evidenza f'xi każi tkun ibbażata primarjament fuq informazzjoni pprovduta mis-servizzi sigrieti ta' informazzjoni, li jistgħu joperaw skont regoli nazzjonali speċifiċi; itenni l-pożizzjoni tiegħu tal-2008 li l-privileġġ eżekuttiv m'għandux iżomm id-dritt ta' mħallef milli jeżerċita d-dritt sħiħ tiegħu jew li jwassal għall-impunità fil-każ ta' ksur tal-liġi internazzjonali; jistieden, f'dan ir-rigward, lill-parlamenti nazzjonali sabiex jeżerċitaw superviżjoni sħiħa fuq l-attivitajiet tal-gvernijiet tagħhom u jħeġġeġ l-implimentazzjoni sħiħa u rapida tal-qafas ġuridiku Ewropew skont l-Artikolu 15 TFUE; itenni l-ħtieġa li l-Parlament Ewropew jiġi assoċjat max-xogħol tal-Konferenza tal-Kumitati ta’ Superviżjoni tal-Entitajiet ta’ Intelliġenza tal-Istati Membri li diġà hija stabbilita;

13.

Jitlob għal valutazzjoni sħiħa u f’waqtha tal-effikaċja tas-sistemi ta' sanzjonijet tal-UE u tan-Nazzjonijiet Uniti għat-“terroristi”; apparti dan, jinnota bi tħassib li sanzjonijiet għat-“terroristi” jidhru li kellhom effett negattiv fuq is-soluzzjoni tal-konflitt u fuq l-isforzi għall-iżvilupp f'diversi reġjuni u jħeġġeġ sabiex dan il-fattur jitqies meta jkunu evalwati dawn is-sistemi;

14.

Iqis li għandu jitkompla b'mod urġenti t-titjib fil-prattiki tan-Nazzjonijiet Uniti dwar it-tqegħid fil-listi jew it-tneħħija minnhom u li l-Istati Membri għandhom jaħdmu wkoll sabiex itejbu l-proċeduri interni ta' sanzjonijiet immirati (ta’ implimentazzjoni), kif issuġġerit fir-rapport imsemmi hawn fuq u fl-addendum tal-Kumitat għall-Affarijiet Legali u d-Drittijiet tal-Bniedem tal-Assemblea Parlamentari tal-Kunsill tal-Ewropa;

15.

Iqis li l-intenzjoni tal-Pożizzjoni Komuni tal-Kunsill 2008/632/PESK u tal-proposta sussegwenti (abbozz ta' regolament) – li jestendu l-miżuri restrittivi għal individwi u entitajiet responsabbli għal każijiet ta' ksur tad-drittijiet tal-bniedem fiż-Żimbabwe lil hinn mill-gvern – għandhom ikunu appoġġati, bħalma hu t-tqegħid tal-leġiżlazzjoni f'konformità mad-deċiżjonijiet reċenti tal-Qorti tal-Ġustizzja dwar id-dritt fundamentali għal proċess xieraq għal individwi u entitajiet li huma fil-mira tal-miżuri restrittivi;

16.

Hu tal-opinjoni li għandu jsir monitoraġġ bir-reqqa sabiex ikun valutat jekk ir-raġunijiet li għalihom kienu adottati l-miżuri restrittivi għandhomx jippersistu, kif ukoll dwar il-mod li bih il-miżuri restrittivi jistgħu jkunu kombinati ma' inċentivi kredibbli li jippromwovu d-demokrazija u d-drittijiet tal-bniedem fiż-Żimbabwe;

17.

Jilqa’ u jappoġġa d-dipożizzjonijiet biex jiżguraw li l-UE tikkonforma mal-impenji internazzjonali tagħha li timplimenta immedjatament sanzjonijiet immirati adottati min-Nazzjonijiet Uniti kontra individwi u entitajiet li jinstabu involuti f'atti, jew li qed jappoggaw atti, li jheddu l-paċi, is-sigurtà jew l-istabilità tas-Somalja, li jkunu aġixxew b'mod li jikser l-embargo tal-armi jew li jkunu ħolqu ostakli biex titwassal l-għajnuna umanitarja.

18.

Jiddubita, madankollu, kif diġà enfasizzat hawn fuq, kemm it-testi attwali proposti mill-Kummissjoni huma adegwati fir-rigward tal-informazzjoni li se tkun provduta lill-persuni elenkati – dwar ir-raġunijiet li għalihom isem il-persuni jew l-entitajiet ikunu inklużi fil-lista kif ukoll dwar id-drittijiet ġuridiċi tagħhom – fid-dawl tal-każ hawn fuq imsemmi ta’ Kadi u Al Barakaat International Foundation vs. il-Kunsill u l-Kummissjoni;

19.

Josserva li, kif enfasizzat mill-Kumitat għall-Affarijiet Legali tiegħu, l-Artikolu 215 TFEU għandu japplika l-miżuri kkonċernati, iżda li sensiela ta’ kundizzjonijiet għandhom jiġu rrispettati: il-miżuri jridu, pereżempju, ikunu bbażati fuq proposta mill-Viċi President tal-Kummissjoni/ Rappreżentant Għoli tal-Unjoni għall-Affarijiet Barranin u l-Politika tas-Sigurtà u l-Kummissjoni trid tinkludi d-dispożizzjonijiet meħtieġa għas-salvagwardji legali;

20.

Huwa tal-opinjoni li l-Artikolu 291 TFEU għandu jitqies sabiex ikunu adottati miżuri ta’ implimentazzjoni meta l-Artikolu 215 TFEU jintuża bħala bażi legali għal proposti futuri;

21.

Jilqa' b'sodisfazzjon id-dispożizzjonijiet l-ġodda fil-proposta tal-Kummissjoni dwar l-Al-Qaida, imma jiġbed l-attenzjoni għall-kummenti tal-EDPS dwar il-protezzjoni tad-data personali, b'referenza partikolari biex ikunu ċċarati l-eżenzjonijiet mill-prinċipji tal-protezzjoni tad-data li jistgħu jkunu meħtieġa u d-dritt ta' aċċess għal informazzjoni klassifikata; jenfasizza l-fatt li dawn ir-riservi mill-EDPS jistgħu mutatis mutandis japplikaw għat-tliet proposti tal-Kummissjoni; jiddispjaċih li t-test tal-Kummissjoni jħassar ir-referenza ċara fl-Artikolu 7e(5) għad-drittijiet tas-suġġetti tad-data skont ir-Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwi fir-rigward tal-ipproċessar tad-data personali mill-istituzzjonijiet u l-entitajiet tal-Komunità kif ukoll dwar il-moviment ħieles ta' din id-data (23), li hi msemmija biss fl-Artikolu 7d(1);

22.

Jinnota li trasferimenti possibbli ta’ data għal pajjiżi terzi u organizzazzjonijiet internazzjonali għandhom ikunu konformi mal-Artikolu 9 tar-Regolament (KE) Nru 45/2001, bil-għan li tkun żgurata l-protezzjoni adegwata tad-data kkonċernata; il-proposta tista’ tinkludi stipulazzjonijiet f’dan ir-rigward u jistgħu wkoll ikunu meħtieġa arranġamenti man-NU; jinnota li l-proposta ma taffettwax ir-responsabilità li jista' jkun hemm fil-każ tal-ipproċessar u l-pubblikazzjoni illegali ta’ data personali

23.

Jenfasizza l-fatt li n-notifika tal-persuni u l-entitajiet ikkonċernati, kif mitlub mill-Qorti tal-Ġustizzja, għandha tkun komprensiva kemm jista' jkun, u li l-informazzjoni pprovduta dwar persuni fiżiċi elenkati f’annessi speċifiċi għandha tkun iċċarata (24);

24.

Jinnota li awtoritajiet indipendenti tal-protezzjoni tad-data jista' jkollhom rwol importanti fil-kontroll tal-legalità tal-ipproċessar tad-data personali fil-listi s-suwed tat-terroristi, u għalhekk għandhom rwol kważi ġudizzjarju li jista' jikkumplimenta b'mod effikaċi r-reviżjoni li ssir mill-awtoritajiet ġudizzjarji (25);

25.

Iqis li hu ta' importanza kbira li jkun adottat kemm jista’ jkun malajr qafas ġenerali dwar il-protezzjoni tad-data kif ipprovdut fl-Artikolu 16 TFUE u li jkunu adottati wkoll dispożizzjonijiet speċifiċi kif mitlub mill-Artikolu 39 TUE;

26.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-gvernijiet u l-parlamenti tal-Istati Membri u lis-Segretarji Ġenerali tan-Nazzjonijiet Uniti u tal-Kunsill tal-Ewropa.