(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

Skont l-Artikolu 7 tar-Regolament (KE) Nru 1831/2003 ġiet ippreżentata applikazzjoni għall-awtorizzazzjoni ta’ preparat tal-Enterococcus lactis NCIMB 11181 (preċedentement identifikat bħala Enterococcus faecium NCIMB 11181). Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(3)

L-applikazzjoni tikkonċerna l-awtorizzazzjoni ta’ preparat tal-Enterococcus lactis NCIMB 11181 bħala addittiv tal-għalf għall-użu fl-għalf u fl-ilma tax-xorb għat-tiġieġ tas-simna jew imrobbi għall-bajd, għal speċijiet oħra ta’ pollam tas-simna jew imrobbija għall-bajd, u għall-għasafar ornamentali, u titlob l-użu simultanju ta’ dak il-preparat fl-għalf mal-koċċidjostati monensina tas-sodju u d-dekokinat, u biex dak l-addittiv jiġi kklassifikat fil-kategorija “addittivi żootekniċi” u fil-grupp funzjonali “stabilizzaturi tal-flora intestinali”.

(4)

Fl-opinjoni tagħha tat-30 ta’ Jannar 2024 (2), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-preparat tal-Enterococcus lactis NCIMB 11181 huwa sikur għat-tiġieġ tas-simna jew imrobbi għall-bajd, għal speċijiet oħra ta’ pollam tas-simna jew imrobbija għall-bajd, u għall-għasafar ornamentali, kif ukoll għall-konsumaturi u għall-ambjent. L-awtorità kkonkludiet ukoll li l-formulazzjoni solida li tinħall fl-ilma tal-addittiv titqies li mhix irritanti għall-ġilda jew għall-għajnejn. Minħabba n-natura proteinaċa tal-aġent attiv, kemm il-formulazzjonijiet solidi kif ukoll dawk solidi li jinħallu fl-ilma tal-addittiv jitqiesu sensitizzaturi respiratorji. L-awtorità ma setgħetx tikkonkludi dwar il-potenzjal tal-formulazzjoni solida tal-addittiv li jkun irritanti għall-ġilda u għall-għajnejn jew dwar il-potenzjal taż-żewġ formulazzjonijiet tal-addittiv li jikkawżaw sensitizzazzjoni tal-ġilda. Barra minn hekk, ikkonkludiet li l-użu tal-Enterococcus lactis NCIMB 11181 huwa kompatibbli mal-koċċidjostati monensina tas-sodju u d-dekokinat. Wara l-valutazzjoni tad-data l-ġdida mressqa mill-applikant, fl-opinjoni tagħha tas-16 ta’ Settembru 2025 (3), l-Awtorità kkonkludiet li l-addittiv għandu potenzjal li jkun effikaċi bħala addittiv żootekniku għat-tiġieġ tas-simna meta jiġi ssupplimentat fi 3 × 1010 CFU/kg ta’ għalf komplet u fl-ilma tax-xorb fi 1,5 × 1010 CFU/L. Il-konklużjoni għat-tiġieġ tista’ tiġi estiża għat-tiġieġ imrobbi għall-bajd u estrapolata għal speċijiet minuri ta’ pollam tas-simna, il-pollam kollu mrobbi għall-bajd u l-għasafar ornamentali. L-Awtorità ma qisitx li hemm il-ħtieġa għal rekwiżiti speċifiċi ta’ monitoraġġ ta’ wara l-introduzzjoni fis-suq.

(5)

Il-Laboratorju ta’ Referenza stabbilit bir-Regolament (KE) Nru 1831/2003 kien tal-fehma li l-konklużjonijiet u r-rakkomandazzjonijiet li ntlaħqu f’valutazzjoni preċedenti dwar applikazzjoni oħra għall-awtorizzazzjoni tal-istess addittiv u vverifikati mill-Awtorità fl-opinjoni tagħha tal-1 ta’ Frar 2012 (4) huma validi u applikabbli għall-applikazzjoni attwali. Għalhekk, f’konformità mal-Artikolu 5(4), il-punt (a), tar-Regolament tal-Kummissjoni (KE) Nru 378/2005 (5), ma kienx meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni tqis li l-preparat tal-Enterococcus lactis NCIMB 11181 jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-użu ta’ dak il-preparat jiġi awtorizzat għall-pollam tas-simna u mrobbi għall-bajd jew għar-riproduzzjoni u għall-għasafar ornamentali. Barra minn hekk, il-Kummissjoni tqis li jenħtieġ li jittieħdu miżuri protettivi xierqa biex jiġu evitati l-effetti negattivi fuq is-saħħa tal-utenti tal-addittiv.

(7)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,