(1)

Fil-31 ta’ Lulju 2014, il-Kunsill adotta r-Regolament(UE) Nru 833/2014 (2) dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna.

(2)

Ir-Regolament (UE) Nru 833/2014 jagħti effett lil ċerti miżuri previsti fid-Deċiżjoni tal-Kunsill 2014/512/PESK (3).

(3)

Fit-23 ta’ Ġunju 2023, il-Kunsill adotta d-Deċiżjoni (PESK) 2023/1217, li temenda d-Deċiżjoni 2014/512/PESK.

(4)

L-attivitajiet li l-għan jew l-effett tagħhom huwa li jevitaw il-projbizzjonijiet stabbiliti fir-Regolament (UE) Nru 833/2014 jimminaw l-għan u l-effettività tal-miżuri restrittivi tal-Unjoni.

(5)

Sabiex jitnaqqas ir-riskju ta’ ċirkomvenzjoni tal-miżuri restrittivi, id-Deċiżjoni (PESK) 2023/1217 tipprojbixxi t-tranżitu mit-territorju tar-Russja ta’ oġġetti u teknoloġija li jistgħu jikkontribwixxu għat-titjib militari u teknoloġiku tar-Russja jew għall-iżvilupp tas-settur tad-difiża u tas-sigurtà tagħha, oġġetti u teknoloġija adatti għall-użu fl-industrija tal-avjazzjoni jew tal-ispazju u l-fjuwil tal-ġettijiet u l-addittivi tal-fjuwil, esportati mill-Unjoni.

(6)

L-Unjoni u pajjiżi terzi, bħala membri tal-komunità internazzjonali, jiddefendu l-prinċipji tad-dritt internazzjonali minquxa fil-Karta tan-Nazzjonijiet Uniti u jiddefendu l-integrità territorjali, is-sovranità u l-indipendenza tal-Ukrajna.

(7)

L-Unjoni tirrikonoxxi l-isforzi li saru mill-awtoritajiet nazzjonali f’ħafna pajjiżi terzi biex jitwaqqaf il-fluss ta’ oġġetti, teknoloġija u servizzi li huma koperti mill-miżuri restrittivi adottata mill-Unjoni bi tweġiba għall-gwerra ta’ aggressjoni tar-Russja kontra l-Ukrajna. L-Unjoni jenħtieġ li tappoġġa aktar lill-pajjiżi terzi f’dan l-isforz bil-mezzi kollha disponibbli.

(8)

Sabiex tiġi indirizzata ċ-ċirkomvenzjoni tal-miżuri restrittivi tal-Unjoni permezz ta’ ġuriżdizzjonijiet ta’ pajjiżi terzi, jenħtieġ li l-Unjoni ssaħħaħ b’mod rapidu l-kooperazzjoni bilaterali u multilaterali permezz tal-involviment diplomatiku mal-pajjiżi terzi inkwistjoni u l-għoti ta’ aktar assistenza teknika lilhom. Sabiex tiżviluppa, flimkien mal-Istati Membri, approċċ ikkoordinat bis-sħiħ għal dak il-għan, il-Kummissjoni ser iżżomm lill-Kunsill infurmat fuq bażi regolari.

(9)

Jenħtieġ li tittieħed azzjoni ulterjuri b’mod rapidu f’każijiet fejn l-isforzi tal-Unjoni fil-qafas tal-kooperazzjoni bilaterali jew multilaterali ma jagħtux ir-riżultat maħsub li tiġi evitata ċ-ċirkomvenzjoni minn persuni u entitajiet f’pajjiżi terzi tal-miżuri restrittivi adottata mill-Unjoni bi tweġiba għall-gwerra ta’ aggressjoni tar-Russja kontra l-Ukrajna. Tali azzjoni jenħtieġ li tkun immirata, proporzjonata u mmirata biss biex iċċaħħad lir-Russja mir-riżorsi li jippermettulha tkompli bil-gwerra ta’ aggressjoni tagħha kontra l-Ukrajna.

(10)

Jenħtieġ li l-Unjoni tadotta l-miżuri individwali xierqa li jindirizzaw l-involviment ta’ operaturi ta’ pajjiżi terzi fl-iffaċilitar taċ-ċirkomvenzjoni. Tali miżuri jistgħu jinkludu deżinjazzjonijiet individwali skont ir-Regolament tal-Kunsill (UE) Nru 269/2014 (4) jew miżuri oħra skont ir-Regolament (UE) Nru 833/2014, bħal pereżempju ż-żieda ta’ entitajiet fl-Anness IV għar-Regolament (UE) Nru 833/2014, inkluż abbażi ta’ informazzjoni u suġġerimenti riċevuti mill-Istati Membri.

(11)

L-Unjoni ser tidħol mill-ġdid fi djalogu kostruttiv mal-pajjiż terz inkwistjoni wara l-adozzjoni ta’ tali miżuri individwali, bil-ħsieb li jiġi żgurat li jiġu stabbiliti miżuri ta’ rimedju biex jiskoraġġixxu lil operaturi oħra milli jaġixxu b’mod simili. Il-Kunsill ser jiġi infurmat dwar dak l-involviment il-ġdid u l-eżitu tiegħu.

(12)

Jenħtieġ li l-Unjoni tkun tista’ tieħu miżuri ulterjuri meta, wara l-adozzjoni ta’ miżuri individwali u involviment ulterjuri mal-pajjiż terz, ikun evidenti, minħabba l-volum, it-tip jew in-natura sistemika taċ-ċirkomvenzjoni li tkun għaddejja, li dawk il-passi huma insuffiċjenti jew inadegwati biex jipprevjenu tali ċirkomvenzjoni fil-pajjiż terz ikkonċernat jew permezz tiegħu.

(13)

Għal dak l-għan, id-Deċiżjoni (PESK) 2023/1217 introduċiet il-possibbiltà li jittieħdu miżuri eċċezzjonali, tal-aħħar istanza, li jirrestrinġu l-bejgħ, il-forniment, it-trasferiment jew l-esportazzjoni ta’ oġġetti u teknoloġija sensittivi b’użu doppju, jew oġġetti u teknoloġija li jistgħu jikkontribwixxu għat-tisħiħ tal-kapaċitajiet militari, teknoloġiċi jew industrijali tar-Russja jew għall-iżvilupp tas-settur tad-difiża u tas-sigurtà tar-Russja, b’mod li jsaħħaħ il-kapaċità tagħha li tmexxi gwerra, u li l-esportazzjoni tagħhom lejn ir-Russja hija pprojbita skont ir-Regolament (UE) Nru 833/2014 lejn pajjiżi terzi fejn intwera li l-ġuriżdizzjoni tagħhom tinsab f’riskju kontinwu u partikolarment għoli li tintuża għal ċirkomvenzjoni.

(14)

Qabel ma tiġi ppreżentata proposta lill-Kunsill biex jipproċedi għal dawk il-miżuri tal-aħħar istanza, ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà u l-Kummissjoni ser jinfurmaw lill-Kunsill dwar id-dettalji tekniċi, dwar l-azzjonijiet ta’ djalogu meħuda u dwar il-miżuri ta’ infurzar.

(15)

Id-deċiżjonijiet biex pajjiż terz u oġġetti jew teknoloġija mmirata jiġu inklużi fil-kamp ta’ applikazzjoni ta’ dik il-miżura jenħtieġ li jkunu bbażati fuq l-inklużjoni mill-Kunsill, li jaġixxi unanimament, tal-pajjiż u l-oġġetti jew it-teknoloġija rilevanti fl-Annessi XIV għad-Deċiżjoni 2014/512/PESK.

(16)

Meta jiddeċiedi jekk jinkludix oġġetti u teknoloġija fil-mira u l-pajjiżi terzi kkonċernati minn dik il-miżura tal-aħħar istanza, abbażi ta’ dik il-proposta, il-Kunsill għandu jqis analiżi teknika bir-reqqa mill-Kummissjoni dwar il-kwistjonijiet ta’ ċirkomvenzjoni inkwistjoni, inkluż data kummerċjali disponibbli li turi li l-miżuri alternattivi li ttieħdu ma kinux effettivi, kif ukoll informazzjoni dwar l-isforzi mwettqa mill-Unjoni biex tindirizza l-kwistjoni mal-pajjiż terz inkwistjoni, u indikazzjoni ċara li tali sforzi ma rnexxewx.

(17)

(14) Qabel ma pajjiż terz jiġi inkluż fil-lista tal-pajjiżi kkonċernati minn dik il-miżura, jenħtieġ li l-Unjoni tinforma u tfittex b’mod attiv il-fehmiet tal-gvern ta’ dak il-pajjiż terz abbażi tas-sejbiet preliminari stabbiliti fl-analiżi teknika mill-Kummissjoni u tal-azzjoni ta’ rimedju li tkun ippjanat l-Unjoni. Il-Kunsill ser jiġi infurmat b’kull pass tal-involviment u bl-eżitu. Il-Kunsill ser jadotta tali deċiżjoni biss wara li tkun ġiet konkluża l-azzjoni ta’ djalogu finali ma’ dak il-pajjiż terz.

(18)

Il-Kunsill jenħtieġ li jirrieżamina l-kontenut tal-Anness XXXIII għar-Regolament (UE) Nru 833/2014 f’intervalli regolari, fuq il-bażi ta’ informazzjoni teknika dettaljata mill-Kummissjoni. Jeħtieġ li tali rieżami jqis l-objettivi tal-miżura u r-riżultat tal-involviment kontinwu mal-pajjiżi terzi kkonċernati, inkluż il-miżuri proposti mill-pajjiżi terzi dwar kif għandha tiġi indirizzata ċ-ċirkomvenzjoni.

(19)

Id-Deċiżjoni (PESK) 2023/1217 iżżid 87 entità ġdida mal-lista ta’ persuni ġuridiċi, entitajiet u korpi stabbilita fl-Anness IV għad-Deċiżjoni 2014/512/PESK, jiġifieri l-lista ta’ entitajiet li jappoġġaw direttament il-kumpless industrijali u militari tar-Russja fil-gwerra ta’ aggressjoni tagħha kontra l-Ukrajna, li fuqhom huma imposti restrizzjonijiet aktar stretti fuq l-esportazzjoni ta’ oġġetti u teknoloġija b’użu doppju, kif ukoll oġġetti u teknoloġija li jistgħu jikkontribwixxu għat-tisħiħ tas-setturi tad-difiża u tas-sigurtà tar-Russja. B’mod partikolari, b’kunsiderazzjoni tal-konnessjoni diretta bejn il-manifatturi ta’ Vetturi tal-Ajru mingħajr Ekwipaġġ militari Iranjani u l-kumpless militari u industrijali tar-Russja, jenħtieġ li jiżdiedu ma’ dik il-lista erba’ entitajiet addizzjonali f’pajjiżi terzi involuti fil-manifattura ta’ Vetturi tal-Ajru Mingħajr Ekwipaġġ u l-forniment tagħhom lir-Russja. Barra minn hekk, fid-dawl tar-rwol abilitanti ewlieni tal-komponenti elettroniċi għall-użu mill-kumpless militari u industrijali tar-Russja fl-appoġġ tal-gwerra ta’ aggressjoni kontra l-Ukrajna, huwa xieraq ukoll li jiġu inklużi f’dik il-lista ċerti entitajiet oħra f’pajjiżi terzi involuti fl-evażjoni tar-restrizzjonijiet kummerċjali kif ukoll ċerti entitajiet Russi involuti fl-iżvilupp, il-produzzjoni u l-provvista ta’ komponenti elettroniċi għall-kumpless militari u industrijali tar-Russja.

(20)

Id-Deċiżjoni (PESK) 2023/1217 tespandi l-lista ta’ oġġetti li jikkontribwixxu għat-titjib militari u teknoloġiku tar-Russja jew għall-iżvilupp tas-settur tad-difiża u tas-sigurtà tagħha, billi żżid oġġetti li ntużaw mir-Russja għall-gwerra ta’ aggressjoni tagħha kontra l-Ukrajna u oġġetti li jikkontribwixxu għall-iżvilupp jew il-produzzjoni tas-sistemi militari tagħha, inklużi komponenti elettroniċi, materjali semikondutturi, tagħmir tal-manifattura u tal-ittestjar għal ċirkwiti elettroniċi integrati u bordijiet ta’ ċirkwit stampati, prekursuri ta’ materjali enerġetiċi u prekursuri għal armi kimiċi, komponenti ottiċi, strumenti ta’ navigazzjoni, metalli użati fis-settur tad-difiża u tagħmir tal-baħar. Id-Deċiżjoni (PESK) 2023/1217 wkoll testendi l-lista ta’ armi tan-nar ristretti, il-partijiet, il-komponenti essenzjali u l-munizzjon tagħhom, u żżid tipi oħra ta’ armi.

(21)

Id-Deċiżjoni (PESK) 2023/1217 timponi aktar restrizzjonijiet fuq l-esportazzjonijiet ta’ oġġetti li jistgħu jikkontribwixxu b’mod partikolari għat-tisħiħ tal-kapaċitajiet industrijali Russi.

(22)

Id-Deċiżjoni (PESK) 2023/1217 tipprojbixxi l-bejgħ, il-liċenzjar jew it-trasferiment bi kwalunkwe mod ieħor ta’ drittijiet ta’ proprjetà intellettwali jew sigrieti kummerċjali, kif ukoll l-għoti ta’ drittijiet għall-aċċess jew l-użu mill-ġdid ta’ kwalunkwe materjal jew informazzjoni protetta permezz ta’ drittijiet ta’ proprjetà intellettwali jew li tikkostitwixxi sigrieti kummerċjali, relatati mal-oġġetti u t-teknoloġija li l-bejgħ, il-forniment, it-trasferiment jew l-esportazzjoni tagħhom, lil persuna, entità jew korp fir-Russja jew għall-użu fir-Russja huma pprojbiti.

(23)

Id-Deċiżjoni (PESK) 2023/1217 testendi s-suspensjoni tal-liċenzji tax-xandir fl-Unjoni ta’ ħames mezzi tal-media Russi taħt il-kontroll permanenti tat-tmexxija Russa u l-projbizzjoni kontra x-xandir tal-kontenut tagħhom.

(24)

Ir- Russja impenjat ruħha f’kampanja sistematika u internazzjonali ta’ manipulazzjoni tal-media u distorsjoni tal-fatti sabiex issaħħaħ l-istrateġija tagħha ta’ destabbilizzazzjoni tal-pajjiżi ġirien tagħha u tal-Unjoni u l-Istati Membri tagħha. B’mod partikolari, il-propaganda kienet immirat ripetutament u konsistentement lejn il-partiti politiċi Ewropej, speċjalment matul il-perjodi elettorali, kif ukoll lejn is-soċjetà ċivili, lil dawk il-persuni li jfittxu l-ażil, il-minoranzi etniċi Russi, il-minoranzi tal-ġeneru u l-funzjonament tal-istituzzjonijiet demokratiċi fl-Unjoni u fl-Istati Membri tagħha.

(25)

Sabiex tiġġustifika u tappoġġa l-gwerra ta’aggressjoni tagħha kontra l-Ukrajna, ir-Russja impenjat ruħha f’azzjonijiet ta’ propaganda kontinwi u miftiehma mmirati lejn is-soċjetà ċivili fl-Unjoni u l-pajjiżi ġirien, li jgħawġu u jimmanipulaw il-fatti b’mod serju.

(26)

Dawk l-azzjonijiet ta’ propaganda għaddew minn għadd ta’ mezzi tal-media taħt il-kontroll permanenti dirett jew indirett tat-tmexxija tal-Federazzjoni Russa. Tali azzjonijiet jikkostitwixxu theddida sinifikanti u diretta għall-ordni pubbliku u s-sigurtà tal-Unjoni. Dawk il-mezzi tal-media huma essenzjali u strumentali biex imexxu ‘l quddiem u jappoġġaw l-gwerra ta’ aggressjoni kontra l-Ukrajna, u għad-destabbilizzazzjoni tal-pajjiżi ġirien tagħha.

(27)

Fid-dawl tal-gravità tas-sitwazzjoni, u b’reazzjoni għall-azzjonijiet tar-Russja li jiddestabbilizzaw is-sitwazzjoni fl-Ukrajna, huwa meħtieġ, b’mod konsistenti mad-drittijiet u l-libertajiet fundamentali rikonoxxuti fil-Karta tad-Drittijiet Fundamentali tal-Unjoni Ewropea, b’mod partikolari mad-dritt għal-libertà tal-espressjoni u tal-informazzjoni kif rikonoxxut fl-Artikolu 11 tagħha, li jiġu introdotti aktar miżuri restrittivi biex jiġu sospiżi l-attivitajiet tax-xandir ta’ tali mezzi tal-media fl-Unjoni, jew diretti lejn l-Unjoni. Il-miżuri jenħtieġ li jinżammu sakemm tintemm l-gwerra ta’ aggressjoni kontra l-Ukrajna, u sakemm ir-Russja, u l-mezzi tal-media assoċjati tagħha, jieqfu jwettqu azzjonijiet ta’ propaganda kontra l-Unjoni u l-Istati Membri tagħha.

(28)

B’mod konsistenti mad-drittijiet u l-libertajiet fundamentali rikonoxxuti fil-Karta tad-Drittijiet Fundamentali tal-Unjoni Ewropea, b’mod partikolari mad-dritt għal-libertà tal-espressjoni u tal-informazzjoni, il-libertà ta’ intrapriża u d-dritt għall-proprjetà kif rikonoxxuti fl-Artikoli 11, 16 u 17 tagħha, dawk il-miżuri ma jżommux lil dawk il-mezzi tal-media u l-persunal tagħhom milli jwettqu attivitajiet oħra fl-Unjoni minbarra x-xandir, bħar-riċerka u l-intervisti. B’mod partikolari, dawk il-miżuri ma jimmodifikawx l-obbligu li jiġu rrispettati d-drittijiet, il-libertajiet u l-prinċipji msemmija fl-Artikolu 6 tat-Trattat dwar l-Unjoni Ewropea, minquxa fil-Karta tad-Drittijiet Fundamentali tal-Unjoni Ewropea, u fil-kostituzzjonijiet tal-Istati Membri, fl-oqsma ta’ applikazzjoni rispettivi tagħhom.

(29)

Sabiex tiġi żgurata l-konsistenza mal-proċess previst fid-Deċiżjoni 2014/512/PESK dwar is-sospensjoni tal-liċenzji tax-xandir, il-Kunsill jenħtieġ li jeżerċita setgħat ta’ implimentazzjoni biex jiddeċiedi, wara eżami tal-każijiet rispettivi, jekk il-miżuri restrittivi jibdewx japplikaw fid-data speċifikata f’dan ir-Regolament (UE) Nru 833/2014 fir-rigward ta’ diversi entitajiet elenkati fl-Anness XV tar-Regolament (UE) Nru 833/2014.

(30)

Id-Deċiżjoni (PESK) 2023/1217 testendi l-projbizzjoni fuq it-trasport ta’ oġġetti bit-triq fl-Unjoni minn trejlers u semitrejlers irreġistrati fir-Russja, anki meta jiġu rmonkati minn trakkijiet irreġistrati barra mir-Russja.

(31)

Tentattivi biex jiġu evitati l-miżuri restrittivi tal-Unjoni rriżultaw f’żieda qawwija ta’ prattiki qarrieqa minn bastimenti li jittrasportaw żejt grezz u prodotti tal-petroleum Russi. Konsegwentement, id-Deċiżjoni (PESK) 2023/1217 tipprojbixxi l-aċċess għall-portijiet u l-imgħalaq fit-territorju tal-Unjoni minn bastimenti involuti fi trasferimenti minn vapur għall-ieħor meta l-awtoritajiet kompetenti jkollhom raġuni valida biex jissuspettaw li bastiment qed jikser il-projbizzjoni fuq l-importazzjoni ta’ żejt grezz u prodotti tal-petroleum Russi bil-baħar fl-Unjoni jew qed jittrasporta żejt grezz jew prodotti tal-petroleum Russi mixtrija bi prezz ogħla mil-limitu massimu tal-prezz miftiehem mill-Koalizzjoni għal-Limitu Massimu tal-Prezzijiet. Dik il-projbizzjoni tapplika għall-bastimenti kollha, irrispettivament mill-bandiera tar-reġistrazzjoni tagħhom, u għal kwalunkwe trasferiment minn vapur għall-ieħor imwettaq fi kwalunkwe punt matul il-vjaġġ lejn il-portijiet jew l-imgħalaq ta’ Stat Membru. Fi kwalunkwe każ, il-bastimenti ser ikunu pprojbiti milli jiksbu aċċess għal portijiet u imgħalaq fit-territorju tal-Unjoni jekk ma jinnotifikawx lill-awtorità kompetenti mill-inqas 48 siegħa qabel dwar trasferiment minn vapur għall-ieħor li jseħħ f’żoni ġeografiċi speċifiċi. Barra minn hekk, dik il-projbizzjoni ser tkompli ssaħħaħ il-miżuri adottati mill-Istati Membri biex jipproteġu l-kosti tagħhom minn inċidenti ambjentali potenzjali kkawżati minn tali trasferimenti minn vapur għall-ieħor.

(32)

Id-Deċiżjoni (PESK) 2023/1217 tipprojbixxi wkoll l-aċċess għall-portijiet u l-imgħalaq fit-territorju tal-Unjoni minn bastimenti li l-awtoritajiet kompetenti jkollhom raġuni valida biex jissuspettaw li qed jinterferixxu ma’, jitfu jew inkella jiddiżattivaw is-sistemi ta’ identifikazzjoni awtomatika (AIS) tagħhom ta’ fuq il-bastiment meta jittrasportaw żejt grezz u prodotti tal-petroleum Russi bi ksur tar-Regolament SOLAS V/19, punt 2.4. Dik il-projbizzjoni ma tapplikax f’ċirkostanzi fejn l-AIS ta’ fuq il-bastiment jistgħu jintfew b’mod leġittimu f’konformità ma’ ftehimiet, regoli jew standards internazzjonali li jipprevedu l-protezzjoni ta’ informazzjoni dwar in-navigazzjoni, bħan-navigazzjoni f’ibħra b’riskju għoli ta’ sigurtà. Dik il-projbizzjoni tapplika wkoll għall-bastimenti kollha, irrispettivament mill-bandiera tar-reġistrazzjoni tagħhom, u għal kwalunkwe interferenza illegali fis-sistema tan-navigazzjoni fi kwalunkwe punt matul il-vjaġġ lejn il-portijiet jew l-imgħalaq ta’ Stat Membru.

(33)

Jenħtieġ li l-valutazzjoni mill-awtoritajiet kompetenti fil-kuntest ta’ dawk il-projbizzjonijiet tal-aċċess għall-portijiet issir abbażi ta’ analiżi tar-riskju li tippermetti lill-awtorità kompetenti tevalwa jekk hemmx biżżejjed ċirkostanzi fattwali biex tissuspetta ksur. Pereżempju, dik l-analiżi tar-riskju jenħtieġ li tqis jekk il-bastimenti kkonformawx ma’ kwalunkwe rekwiżit ta’ prenotifika ta’ trasferimenti minn vapur għall-ieħor u obbligi legali rilevanti oħra jew jekk innotifikawx it-trasport ta’ oġġetti perikolużi jew oġġetti li jniġġsu, jiġifieri ż-żejt grezz u l-prodotti tal-petroleum (5). Jenħtieġ li l-Kummissjoni tippubblika wkoll avviżi ta’ mġiba f’riskju ta’ sanzjonijiet marittimi sabiex tappoġġa l-analiżi tar-riskju tal-awtoritajiet kompetenti inkluż billi tagħmel użu mill-għodod tat-teknoloġija tal-informazzjoni xierqa.

(34)

Jenħtieġ li l-Kummissjoni, bl-assistenza tal-Aġenzija Ewropea għas-Sigurtà Marittima (EMSA), tappoġġa lill-awtoritajiet kompetenti permezz, fost l-oħrajn, tal-monitoraġġ u n-notifika ta’ trasferimenti suspettużi minn vapur għal vapur u inċidenti ta’ interferenza illegali mal-AIS ta’ fuq il-bastimenti, it-tifi jew id-diżattivazzjoni tagħhom bi kwalunkwe mod ieħor, u l-iffaċilitar tal-iskambju ta’ informazzjoni bbażat fuq is-Sistema tal-Unjoni għall-Iskambju ta’ Informazzjoni Marittima (“SafeSeaNet”), li tiffaċilita r-riċeviment, il-ħżin, l-irkupru u l-iskambju ta’ informazzjoni għall-fini tas-sikurezza marittima, is-sigurtà marittima u tal-portijiet, il-protezzjoni tal-ambjent tal-baħar u l-effiċjenza tat-traffiku marittimu u t-trasport marittimu. Jenħtieġ li l-awtoritajiet nazzjonali kompetenti skont it-tifsira tad-Direttiva tal-Kummissjoni 2014/100/UE (6) jipprovdu lill-awtoritajiet tal-port tagħhom, jekk ikunu differenti, aċċess għal dik is-sistema mingħajr dewmien. Bl-użu tas-SafeSeaNet, jenħtieġ li l-Kummissjoni, bl-assistenza tal-EMSA, tappoġġa lill-awtoritajiet nazzjonali kompetenti biex jimmonitorjaw b’kull mezz disponibbli kwalunkwe bastiment ta’ interess, b’mod partikolari dawk li jkunu qed jinnavigaw fil-limitu ta’ 200 mil nawtiku mill-kosta tal-Istati Membri.

(35)

Sabiex jimmitigaw l-għażla opportunistika tal-ġuriżdizzjoni, jenħtieġ li l-awtoritajiet kompetenti fi Stat Membru li jiċħdu l-aċċess għal bastiment jiskambjaw informazzjoni dwar tali ċaħda minnufih mal-awtoritajiet kompetenti l-oħra tal-Istati Membri, permezz tal-pjattaformi eżistenti għad-dispożizzjoni tagħhom. Jenħtieġ li l-Kummissjoni taħdem mill-qrib mal-EMSA biex tiffaċilita minnufih kwalunkwe aġġustament tekniku għas-SafeSeaNet abbażi tan-notifiki tal-awtoritajiet kompetenti.

(36)

Il-projbizzjonijiet relatati mal-aċċess għall-port japplikaw għal kwalunkwe bastiment, kemm jekk ikun irmiġġat f’port kif ukoll jekk ikun ankrat fil-ġuriżdizzjoni ta’ port ta’ Stat Membru. Fil-każ tal-Golf tal-Finlandja, dawk il-projbizzjonijiet jikkonċernaw kwalunkwe bastiment, kemm jekk ikun irmiġġat f’port kif ukoll jekk ikun ankrat fl-ilmijiet territorjali jew fl-ilmijiet interni ta’ Stat Membru.

(37)

Hemm previsti eżenzjonijiet u derogi xierqa biex bastimenti bħal dawn ikollhom aċċess għall-portijiet u l-imgħalaq fit-territorju tal-Unjoni għas-sikurezza marittima, inkluż it-tħassib ambjentali, għas-salvataġġ tal-ħajja fuq il-baħar u għal skopijiet umanitarji.

(38)

Id-Deċiżjoni tal-Kunsill (PESK) 2022/884 (7) u r-Regolament tal-Kunsill (UE) 2022/879 (8) jipprevedu li l-Istati Membri jridu jieħdu l-miżuri kollha meħtieġa biex jiksbu provvisti li jkunu alternattivi għall-importazzjonijiet ta’ żejt grezz mir-Russja bil-pipeline, biex dawk l-importazzjonijiet jsiru soġġetti għall-projbizzjonijiet malajr kemm jista’ jkun. F’konformità ma’ dan l-objettiv, id-deroga temporanja mogħtija lill-Ġermanja u lill-Polonja għall-provvista ta’ żejt grezz bil-pipeline mir-Russja permezz tal-parti tat-Tramuntana tal-pipeline taż-żejt ta’ Druzhba jenħtieġ li tintemm. L-importazzjoni taż-żejt li joriġina mill-Każakistan jew pajjiż terz ieħor u li qed jgħaddi mir-Russja permezz tal-pipeline taż-żejt ta’ Druzhba mhijiex ipprojbita.

(39)

Il-mekkaniżmu tal-limitu massimu tal-prezzijiet jipprovdi li proġetti speċifiċi li huma essenzjali għas-sigurtà tal-enerġija ta’ ċerti pajjiżi terzi jistgħu jiġu eżentati mil-limitu massimu tal-prezzijiet. L-eżenzjoni prevista fir-rigward mal-Proġett Sakhalin-2 (Сахалин-2), li jinsab fir-Russja, jenħtieġ li tiġi estiża sal-31 ta’ Marzu 2024 biex jiġu żgurati l-ħtiġijiet tal-Ġappun fir-rigward tas-sigurtà tal-enerġija.

(40)

Sabiex il-provvisti kritiċi tal-enerġija li mhumiex ipprojbiti li jiġu importati fl-Unjoni minn pajjiżi terzi ma jiġux imminati, huwa xieraq li jiġi garantit li l-manutenzjoni u t-tħaddim adegwati tal-infrastrutturi tal-pajpijiet tal-Pajpijiet tal-Konsorzju għall-pipeline tal-Baħar Kaspju (CPC, Caspian Pipeline Consortium), li jippermettu x-xiri, l-importazzjoni jew it-trasferiment ta’ oġġetti li jaqgħu taħt NM 2709 00 li joriġinaw mill-Każakistan u li jkunu qed jitgħabbew biss fir-Russja, jitilqu mit-territorju tagħha jew jittranżitaw minnu. Id-Deċiżjoni (PESK) 2023/1217 introduċiet derogi mill-projbizzjonijiet fuq il-bejgħ, il-forniment, it-trasferiment jew l-esportazzjoni direttament jew indirettament lil kwalunkwe persuna fiżika jew ġuridika, entità jew korp fir-Russja jew għall-użu fir-Russja ta’ ċerti oġġetti jew teknoloġija, fuq l-għoti ta’ finanzjament jew assistenza finanzjarja relatati, assistenza teknika, servizzi ta’ senserija jew servizzi oħra, jew fuq il-forniment ta’ servizzi tal-awditjar, servizzi ta’ inġinerija, servizzi ta’ konsulenza legali, servizzi ta’ ttestjar u ta’ analiżi tekniċi li huma strettament meħtieġa għal dak l-għan, li jkunu soġġetti għal kundizzjonijiet stretti biex jiġi evitat ir-riskju ta’ ċirkomvenzjoni.

(41)

Sabiex tiġi evitata ċ-ċirkomvenzjoni tal-projbizzjoni fuq il-forniment ta’ titoli trasferibbli lil persuni fir-Russja, id-Deċiżjoni (PESK) 2023/1217 estendiet dik il-projbizzjoni għal strumenti finanzjarji denominati fi kwalunkwe munita.

(42)

Id-Deċiżjoni (PESK) 2023/1217 introduċiet ukoll deroga mill-projbizzjoni li jiġu pprovduti ċertu servizzi lil entitajiet Russi meħtieġa għall-istabbiliment, iċ-ċertifikazzjoni jew l-evalwazzjoni ta’ firewall li jneħħi l-kontroll eżerċitat minn persuna elenkata fuq l-assi ta’ entità tal-Unjoni mhux elenkata li l-persuna elenkata għandha s-sjieda tagħha jew tikkontrolla, u li jiżgura li ma jkun hemm l-ebda benefiċċju għal din tal-aħħar, u b’hekk dik l-entità tkun tista’ tkompli l-operazzjonijiet kummerċjali tagħha.

(43)

Id-Deċiżjoni (PESK) 2023/1217 tkompli tiċċara l-evidenza meħtieġa għall-importazzjoni ta’ prodotti tal-ħadid u tal-azzar ipproċessati f’pajjiż terz li jinkorporaw prodotti tal-ħadid u tal-azzar li joriġinaw mir-Russja.

(44)

Id-Deċiżjoni (PESK) 2023/1217 introduċiet deroga mill-projbizzjoni fuq ix-xiri, l-importazzjoni jew it-trasferiment ta’ ċerti oġġetti li jiġġeneraw dħul sinifikanti għar-Russja u li huma meħtieġa għall-operat, il-manutenzjoni jew it-tiswija tal-vaguni tal-linja tal-metro 3 ta’ Budapest.

(45)

Id-Deċiżjoni (PESK) 2023/1217 introduċiet kjarifiki dwar l-awtoritajiet kompetenti li jirċievu notifiki ta’ titjiriet mhux skedati bejn ir-Russja u l-Unjoni.

(46)

Id-Deċiżjoni (PESK) 2023/1217 estendiet l-iskadenza għall-applikazzjoni ta’ deroga temporanja mill-projbizzjoni fuq il-forniment ta’ ċertu servizzi, bl-għan li jiġi ffaċilitat aktar l-iżvestiment mis-suq Russu ta’ operaturi tal-Unjoni. Sabiex jitħaffef l-iżvestiment ta’ operaturi Russi mis-suq tal-Unjoni, id-Deċiżjoni (PESK) 2023/1217 tintroduċi deroga temporanja mill-projbizzjoni fuq il-forniment ta’ servizzi ta’ konsulenza legali lil persuni ġuridiċi, entitajiet jew korpi stabbiliti fir-Russja. L-awtoritajiet kompetenti tal-Istati Membri jistgħu jawtorizzaw il-forniment, sal-31 ta’ Marzu 2024, ta’ servizzi legali obbligatorji, skont il-leġiżlazzjoni nazzjonali tal-Istat Membru, biex dawn l-iżvestimenti jiġu ffinalizzati.

(47)

Sabiex tiġi żgurata implimentazzjoni sħiħa u uniformi tal-miżuri restrittivi, huwa xieraq li l-Istati Membri jinfurmaw lill-Istati Membri l-oħra u lill-Kummissjoni dwar kwalunkwe awtorizzazzjoni miċħuda skont ir-Regolament (UE) Nru 833/2014, u li jikkondividu informazzjoni dwar talbiet għal awtorizzazzjoni li jkunu beħsiebhom jagħtu meta ċaħda tkun diġà ġiet innotifikata minn Stat Membru ieħor, sabiex tiġi evitata l-għażla opportunistika tal-ġuriżdizzjoni.

(48)

Huwa xieraq ukoll li jissaħħaħ l-iskambju ta’ informazzjoni dwar l-applikazzjoni u l-infurzar tar-restrizzjonijiet fuq l-esportazzjoni ta’ oġġetti sensittivi li jistgħu jintużaw biex jappoġġaw il-gwerra ta’ aggressjoni tar-Russja kontra l-Ukrajna, bħal oġġetti b’użu doppju u oġġetti elenkati fl-Anness VII għar-Regolament (UE) Nru 833/2014, sabiex jiġi miġġieled ir-riskju ta’ ċirkomvenzjoni minn persuni jew entitajiet involuti fl-akkwist ta’ oġġetti pprojbiti tal-Unjoni għall-użu fir-Russja, jew il-forniment ta’ servizzi pprojbiti, bi ksur tar-Regolament (UE) Nru 833/2014.

(49)

Huwa xieraq li d-dispożizzjonijiet dwar l-iskambju ta’ informazzjoni bejn l-awtoritajiet ta’ Stat Membru u mal-awtoritajiet ta’ Stati Membri oħra u l-Kummissjoni jiġu ċċarati aktar .

(50)

Id-Deċiżjoni (PESK) 2023/1217 testendi l-lista ta’ pajjiżi sħab li qed japplikaw sett ta’ miżuri ta’ kontroll tal-esportazzjoni sostanzjalment ekwivalenti għal dawk stabbiliti fir-Regolament (UE) Nru 833/2014.

(51)

Fl-aħħar nett, id-Deċiżjoni (PESK) 2023/1217 tagħmel ċerti korrezzjonijiet tekniċi fit-test operattiv u fl-Annessi, inkluż billi tħassar referenzi għal-perjodi tranżitorji li skadew, kif ukoll tirriorganizza l-istruttura ta’ ċerti Annessi għar-Regolament (UE) 833/214. Bħala konsegwenza ta’ dan tal-aħħar, il-projbizzjoni li tikkonċerna l-importazzjonijiet tal-faħam hija koperta bl-Artikolu 3i l-Anness XXI tar-Regolament (UE) Nru 833/2014; għaldaqstant l-Artikolu 3j u l-Anness XXII għar-Regolament Nru 833/2014 saru superfluwi u tħassru. It-tħassir ta’ referenzi għal perjodi ta’ tranżizzjoni li diġà skadew mhuwiex maħsub li jkollu effetti legali fuq kuntratti tal-imgħoddi jew li għadhom għaddejjin jew fuq l-applikabbiltà ta’ dawk il-perjodi ta’ tranżizzjoni.

(52)

Dawn il-miżuri jaqgħu fil-kamp ta’ applikazzjoni tat-Trattat dwar il-Funzjonament tal-Unjoni Ewropea u, għalhekk, b’mod partikolari bil-ħsieb li tiġi żgurata l-applikazzjoni uniformi tagħhom fl-Istati Membri kollha, hija neċessarja azzjoni regolatorja fil-livell tal-Unjoni.

(53)

Għaldaqstant, ir-Regolament (UE) Nru 833/2014 jenħtieġ li jiġi emendat skont dan,