(1)

L-Anness II tar-Regolament (UE) 2018/848 jistabbilixxi xi rekwiżiti għaż-żamma tar-rekords dwar ċerti regoli speċifiċi tal-produzzjoni. Ir-rekords jistgħu jkunu rilevanti għall-finijiet ta’ traċċabbiltà, kontroll intern tal-kwalità u għall-valutazzjoni tal-konformità mar-regoli dettaljati tal-produzzjoni organika stabbiliti f’dak l-Anness.

(2)

Minkejja d-dispożizzjonijiet dwar iż-żamma tar-rekords stabbiliti fil-punt (c) tal-Artikolu 9(10), l-Artikolu 34(5) u l-punt (a) tal-Artikolu 39(1) tar-Regolament (UE) 2018/848, huwa neċessarju li jiġu spjegati aktar ir-rekwiżiti minimi għaż-żamma tar-rekords f’kull qasam ta’ produzzjoni kopert mid-diversi partijiet tal-Anness II ta’ dak ir-Regolament.

(3)

Hemm bżonn ukoll li jiġu introdotti ċerti elementi speċifiċi biex tiġi żgurata l-konsistenza u bażi armonizzata għaż-żamma tar-rekords, li hija meqjusa kruċjali biex l-operaturi jkunu jistgħu jipprovdu evidenza tal-applikazzjoni effettiva tar-regoli dwar il-produzzjoni organika.

(4)

L-emendi li saru b’dan ir-Regolament huma mingħajr preġudizzju għar-rekwiżiti għaż-żamma tar-rekords stabbiliti f’atti oħra tal-Unjoni bħal dawk li jikkonċernaw l-ikel u s-sikurezza tal-ikel, l-għalf u s-sikurezza tal-għalf, is-saħħa u t-trattament xieraq tal-annimali, is-saħħa tal-pjanti, il-protezzjoni tal-pjanti u l-materjal riproduttiv tal-pjanti. Għalhekk, għall-finijiet tar-Regolament (UE) 2018/848, huma biss l-elementi komplementari li jippermettu l-verifika tal-konformità mar-regoli tal-produzzjoni organika li se jkollhom jiġu rreġistrati minn dawk l-operaturi li diġà jissodisfaw ir-rekwiżiti għaż-żamma tar-rekords skont atti oħra tal-Unjoni, mingħajr il-ħtieġa li jiġu dduplikati. Madankollu, ċerti rekwiżiti għaż-żamma tar-rekords huma ripetuti fl-Anness II tar-Regolament (UE) 2018/848 kif emendat b’dan ir-Regolament, minħabba li huma rilevanti għall-operaturi f’pajjiżi terzi.

(5)

Fir-rigward tar-regoli tal-produzzjoni tal-pjanti, għall-fini tar-reġistrazzjoni tad-data dwar l-użu ta’ fertilizzanti u kondizzjonaturi tal-ħamrija, huwa meħtieġ li jiġu inklużi ċerti parametri tal-applikazzjoni peress li l-użu tal-fertilizzanti fil-produzzjoni organika huwa soġġett għal restrizzjonijiet kemm kwantitattivi kif ukoll kwalitattivi, li għandhom jitqiesu meta l-miżuri agronomiċi ma jkunux biżżejjed biex jissodisfaw il-ħtiġijiet nutrizzjonali tal-pjanti.

(6)

L-użu ta’ prodotti għall-protezzjoni tal-pjanti u ta’ prodotti tat-tindif u tad-diżinfezzjoni, bħall-bijoċidi u d-deterġenti, huwa soġġett għal restrizzjonijiet fil-produzzjoni organika u huwa limitat għal każijiet fejn il-miżuri preventivi ma jfixklux l-okkorrenza u t-tixrid ta’ pesti u mard u fil-każijiet kollha għall-prodotti u s-sustanzi approvati skont l-Artikolu 24 tar-Regolament (UE) 2018/848. Mingħajr preġudizzju għar-rekwiżiti għaż-żamma tar-rekords stabbiliti fir-Regolamenti (KE) Nru 1107/2009 (2) u (KE) Nru 852/2004 (3) tal-Parlament Ewropew u tal-Kunsill, huwa meħtieġ li l-operaturi jintalbu jirreġistraw il-kundizzjonijiet dettaljati tal-applikazzjoni meta jkollhom jirrikorru għall-użu ta’ prodott għall-protezzjoni tal-pjanti, bijoċida jew deterġent sabiex, fejn rilevanti, juru l-konformità mar-restrizzjonijiet applikabbli, ir-rispett tal-frekwenza rakkomandata u l-perijodu ta’ qabel il-ħsad.

(7)

Peress li l-irqajja’ tal-art jista’ jkollhom karatteristiċi differenti u jospitaw għelejjel differenti, il-kundizzjonijiet agronomiċi jistgħu jvarjaw. Dan jimplika li, meta jiġu applikati inputs esterni, l-użu tagħhom ivarja minn roqgħa tal-art għal oħra. Għalhekk, l-inputs esterni jenħtieġ li jiġu rreġistrati b’rabta mar-roqgħa tal-art fejn jintuża l-input biex l-operaturi jkunu jistgħu jimmonitorjaw l-effikaċja u jipprovdu rekords xierqa għall-finijiet ta’ traċċabbiltà u, fejn rilevanti, evidenza dokumentarja relatata ma’ kwalunkwe deroga mir-regoli tal-produzzjoni tal-pjanti miksuba f’konformità mal-punt 1.8.5 tal-Parti I tal-Anness II tar-Regolament (UE) 2018/848.

(8)

Meta jinġabru l-pjanti selvaġġi u l-prodotti tagħhom, jeħtieġ li l-operaturi jintalbu jżommu rekords tal-ispeċijiet ikkonċernati u l-kwantitajiet u l-perijodi tal-ġbir f’ħabitat naturali speċifiku biex jippermettu t-traċċabbiltà u l-verifika tal-konformità mal-kundizzjonijiet tal-ħabitat naturali.

(9)

Fir-rigward tar-regoli dwar il-produzzjoni tal-bhejjem, fid-dawl tad-derogi possibbli minn dawk ir-regoli mogħtija skont il-punti 1.3.4.3, 1.3.4.4, 1.7.5, 1.7.8, 1.9.3.1(c) u 1.9.4.2(c) tal-Parti II tal-Anness II tar-Regolament (UE) 2018/848, jenħtieġ li l-operaturi jżommu disponibbli evidenza dokumentarja relatata ma’ tali derogi biex jippermettu t-traċċabbiltà u l-kontroll tal-konformità mal-kundizzjonijiet applikabbli.

(10)

Mingħajr preġudizzju għar-rekwiżiti tar-Regolament (KE) Nru 852/2004 u tar-Regolament (UE) 2016/429 tal-Parlament Ewropew u tal-Kunsill (4), jenħtieġ li l-operaturi jżommu rekords dettaljati dwar l-oriġini tal-annimali introdotti fl-azjenda u r-rekords veterinarji preċedenti rilevanti tagħhom sabiex ikunu jistgħu jiżguraw it-traċċabbiltà u juru l-konformità mal-kundizzjonijiet speċifiċi stabbiliti fil-Partijiet II u III tal-Anness II tar-Regolament (UE) 2018/848.

(11)

Barra minn hekk, sabiex tiġi ddokumentata l-konformità mal-ħtiġijiet nutrizzjonali speċifiċi għall-ispeċi u mar-regoli rilevanti dwar in-nutrizzjoni stabbiliti għall-gruppi differenti ta’ annimali fil-Parti II tal-Anness II tar-Regolament (UE) 2018/848, jenħtieġ li l-operaturi jżommu rekords dettaljati tar-reġim tal-għalf u tal-perijodi tar-ragħa.

(12)

Mingħajr preġudizzju għar-rekwiżiti għaż-żamma tar-rekords u l-identifikazzjoni stabbiliti fir-Regolamenti (KE) Nru 852/2004 u (UE) 2016/429, fir-Regolament (KE) Nru 1760/2000 tal-Parlament Ewropew u tal-Kunsill (5) u fid-Direttiva 2001/82/KE tal-Parlament Ewropew u tal-Kunsill (6), fid-dawl tal-limitazzjonijiet speċifiċi stabbiliti skont ir-regoli dwar il-produzzjoni organika, huwa xieraq li jiġu stabbiliti xi rekwiżiti speċifiċi għaż-żamma tar-rekords tat-trattamenti veterinarji u tat-tindif u d-diżinfezzjoni tal-bini, l-installazzjonijiet u l-annimali sabiex l-operaturi jkunu jistgħu juru lill-awtorità kompetenti jew lill-korp ta’ kontroll li r-rekwiżiti rilevanti ta’ effikaċja qed jiġu ssodisfati filwaqt li jiġi permess li jiġu vverifikati r-rekwiżiti speċifiċi tal-effikaċja.

(13)

Mingħajr preġudizzju għar-rekwiżiti ta’ traċċabbiltà stabbiliti fir-Regolament (KE) Nru 178/2002 tal-Parlament Ewropew u tal-Kunsill (7), sabiex ikunu jistgħu jsiru t-traċċabbiltà u l-verifika tal-konformità mar-regoli dwar il-produzzjoni organika, inklużi dawk dwar il-perijodi ta’ konverżjoni għall-ispeċijiet varji, jenħtieġ li l-operaturi jżommu rekords dettaljati dwar kwalunkwe annimal li ġej jew ħiereġ mill-azjenda.

(14)

Fost ir-rekwiżiti tal-akkomodazzjoni u tal-prattiki ta’ trobbija għat-tjur, hemm rekwiżiti speċifiċi li japplikaw għal ċerti sistemi ta’ trobbija fir-rigward tar-rispett ta’ perijodu fejn il-binjiet jitbattlu. Jenħtieġ li l-evidenza dokumentarja rilevanti tinżamm biex tippermetti monitoraġġ xieraq.

(15)

Minħabba r-rilevanza tal-pożizzjoni tal-imġiebaħ f’żoni li jenħtieġ li jiżguraw id-disponibbiltà tan-nektar u tat-trab tad-dakra minn għelejjel prodotti b’mod organiku jew minn żoni naturali mhux kontaminati jew minn għelejjel b’metodi ta’ impatt ambjentali baxx biex tiġi evitata kwalunkwe kontaminazzjoni ta’ mġiebaħ tan-naħal, huwa meħtieġ li l-operaturi jżommu mappa taż-żoni użati kif ukoll rekords ta’ kwalunkwe input estern użat u operazzjonijiet imwettqa fuq id-doqqajs.

(16)

Fir-rigward tar-regoli dwar il-produzzjoni tal-annimali tal-akkwakultura, fid-dawl tad-derogi possibbli minn dawk ir-regoli mogħtija skont il-punti 3.1.2.1(d) u (e) tal-Parti III tal-Anness II tar-Regolament (UE) 2018/848, jenħtieġ li l-operaturi jżommu evidenza dokumentarja relatata ma’ tali derogi biex jippermettu t-traċċabbiltà u l-kontroll tal-konformità mal-kundizzjonijiet applikabbli.

(17)

B’mod partikolari, l-użu ta’ inputs esterni huwa soġġett għal restrizzjonijiet skont ir-Regolament (UE) 2018/848 u għandu jiġi rreġistrat bħal fil-każ ta’ fertilizzanti jew nutrijenti użati fil-produzzjoni organika tal-alga, li jistgħu jintużaw biss meta awtorizzati skont l-Artikolu 24 ta’ dak ir-Regolament u li huma limitati għal faċilitajiet fuq ġewwa u li għandhom jiġu applikati f’ċerti kundizzjonijiet. Għalhekk, jenħtieġ li l-operaturi jirreġistraw tali użi biex juru l-konformità mal-kundizzjonijiet applikabbli.

(18)

Huwa neċessarju wkoll li jiġu stabbiliti rekwiżiti għaż-żamma tar-rekords fir-rigward tad-dispożizzjonijiet speċifiċi għaż-żgħar għal skopijiet ta’ tnissil u ta’ tkabbir, b’mod partikolari fir-rigward taż-żmien preċiż tal-okkorrenza tagħhom matul iċ-ċiklu tal-produzzjoni tal-annimali u perijodu inizjali ta’ konverżjoni.

(19)

Ir-reġimi tal-għalf tal-annimali tal-akkwakultura huma maħsuba biex jindirizzaw il-ħtiġijiet nutrittivi speċifiċi ta’ kull speċi fl-istadji varji tal-iżvilupp. Għalhekk, meta wieħed iqis id-dispożizzjonijiet dettaljati dwar il-materjali tal-għalf awtorizzati, inkluż meta jkunu ġejjin minn oriġini mhux organika, jenħtieġ li jinżammu rekords tar-reġim tal-għalf għal kull speċi kkonċernata, b’data għad-diversi stadji tal-iżvilupp.

(20)

Il-kura tas-saħħa tal-annimali tal-akkwakultura hija bbażata fuq il-prevenzjoni u l-monitoraġġ tal-benessri tal-annimali. Għalhekk, huwa neċessarju li jinżammu r-rekords tal-azzjonijiet varji stabbiliti biex jiġi limitat kemm jista’ jkun ir-rikors għal trattamenti veterinarji, li huma soġġetti għal limitazzjonijiet stretti f’termini ta’ frekwenza u numru skont it-tul taċ-ċiklu tal-ħajja tal-ispeċi kkonċernata. Jenħtieġ li jiġu stabbiliti r-rekwiżiti korrispondenti għaż-żamma tar-rekords.

(21)

Prattiki xierqa ta’ trobbija jiddeterminaw il-benessri tal-annimali. Fil-kuntest tal-akkwakultura, il-kwalità tal-ilma u l-limiti għad-densitajiet tal-ħażna u l-parametri kimiċi fiżiċi rilevanti huma fundamentali għall-benessri tal-annimali. Għalhekk, jenħtieġ li jkun hemm rekords ta’ tali data kif ukoll tat-tip u l-ħin tal-interventi mwettqa biex tiġi mmonitorjata ż-żamma tal-aħjar kundizzjonijiet għall-annimali tal-akkwakultura u l-miżuri meħuda biex jiġu rrispettati r-regoli tal-produzzjoni organika fl-istadji differenti tal-iżvilupp ta’ dawk l-annimali. Fl-akkwakultura organika, l-użu ta’ arjazzjoni huwa permess, iżda l-użu tal-ossiġenu huwa limitat għal każijiet speċifiċi. Għalhekk, jenħtieġ li jinżammu rekords dwar dawn it-tipi ta’ interventi.

(22)

Mingħajr preġudizzju għar-rekwiżiti għaż-żamma tar-rekords skont ir-Regolament (KE) Nru 852/2004, l-operaturi li jipproduċu ikel organiku pproċessat u/jew għalf organiku pproċessat jenħtieġ li jżommu rekords dettaljati biex juru l-konformità mar-regoli tal-produzzjoni organika, b’mod partikolari dwar il-miżuri ta’ prekawzjoni stabbiliti biex jiżguraw l-integrità tal-prodotti organiċi, il-kundizzjonijiet speċifiċi għall-użu ta’ inputs esterni u tal-prodotti tat-tindif u tad-diżinfezzjoni. Barra minn hekk, biex tkun tista’ ssir verifika xierqa tal-bilanċ tal-input u tal-output, jenħtieġ li l-operaturi jżommu disponibbli data dwar l-input użat u fil-każ ta’ prodotti komposti, ir-riċetti/formuli kompluti kif ukoll, fejn applikabbli, evidenza dokumentarja dwar l-awtorizzazzjonijiet għall-użu ta’ ingredjenti agrikoli mhux organiċi skont l-Artikolu 25 tar-Regolament (UE) 2018/848.

(23)

Mingħajr preġudizzju għar-rekwiżiti għaż-żamma tar-rekords skont ir-Regolament (KE) Nru 852/2004, l-operaturi li jipproduċu l-inbid organiku jenħtieġ li jżommu rekords dettaljati biex juru l-konformità mar-regoli tal-produzzjoni organika, b’mod partikolari fir-rigward ta’ kwalunkwe prodott estern u sustanza użata fil-produzzjoni tal-inbid u għat-tindif u d-diżinfezzjoni.

(24)

Mingħajr preġudizzju għar-rekwiżiti għaż-żamma tar-rekords skont ir-Regolament (KE) Nru 852/2004, l-operaturi li jipproduċu l-ħmira organika jenħtieġ li jżommu rekords dettaljati biex juru l-konformità mar-regoli tal-produzzjoni organika, b’mod partikolari fir-rigward tal-prodotti u s-sustanzi użati fil-produzzjoni tal-ħmira u għat-tindif u d-diżinfezzjoni.

(25)

Għalhekk jenħtieġ li l-Anness II tar-Regolament (UE) 2018/848 jiġi emendat skont dan.

(26)

Fl-interess taċ-ċarezza u taċ-ċertezza tad-dritt, jenħtieġ li dan ir-Regolament jibda japplika mid-data tal-applikazzjoni tar-Regolament (UE) 2018/848,