(1)

Ir-Regolament Delegat tal-Kummissjoni (UE) 2018/1229 (2) jispeċifika l-miżuri għall-prevenzjoni u l-indirizzar ta’ fallimenti tas-saldu, u jħeġġeġ id-dixxiplina fis-saldu. Dawk il-miżuri jinkludu l-monitoraġġ ta’ fallimenti ta’ saldu u l-ġbir u d-distribuzzjoni ta’ penali fi flus kontanti għal fallimenti ta’ saldu. Ir-Regolament Delegat (UE) 2018/1229 jispeċifika wkoll id-dettalji operazzjonali tal-proċess ta’ xiri sfurzat.

(2)

Il-partijiet ikkonċernati inkluż is-CSDs, CCPs, ċentri tan-negozjar, ditti tal-investiment u istituzzjonijiet ta’ kreditu, indikaw li minħabba żviluppi ġodda, bħal l-implimentazzjoni prevista fil-21-22 ta’ Novembru 2020 tal-mekkaniżmu ta’ penali stabbilit b’mod konġunt mis-CSDs li jużaw infrastruttura tas-saldu komuni, hemm bżonn ta’ iktar ħin biex jiġi adattati l-miżuri speċifikati fir-Regolament Delegat (UE) 2018/1229. Il-partijiet ikkonċernati affettwati indikaw ukoll li hemm bżonn iktar ħin għall-bidliet neċessarji fis-sistema tal-IT, għall-iżvilupp u l-aġġornament tal-messaġġi tal-ISO, u għall-ittestjar tas-suq u l-bidliet fl-arranġamenti kuntrattwali bejn il-partijiet ikkonċernati. L-Awtorità Ewropea tat-Titoli u s-Swieq (ESMA) hija tal-fehma li huwa xieraq li l-partijiet interessati jingħataw aktar ħin biex jadattaw għal dawk il-miżuri. Id-dħul fis-seħħ tar-Regolament Delegat (UE) 2018/1229 jenħtieġ li jiġi ddifferit.

(3)

Għalhekk jenħtieġ li r-Regolament Delegat (UE) 2018/1229 jiġi emendat kif xieraq.

(4)

Dan ir-Regolament huwa bbażat fuq l-abbozz tal-istandards tekniċi regolatorji ppreżentati mill-ESMA lill-Kummissjoni.

(5)

Il-kamp ta' applikazzjoni u l-impatt mistenni ta’ din l-emenda huma limitati għaliex jikkonċernaw biss dewmien qasir fid-data li fiha r-reġim ta’ dixxiplina tas-saldu l-ġdid se jkun applikabbli u l-parteċipanti tas-suq diġà pprovdew il-kontribut tagħhom. L-ESMA ma wettqet l-ebda konsultazzjoni pubblika miftuħa. Madankollu l-ESMA analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (3). Fl-iżvilupp tal-abbozz ta’ standards tekniċi regolatorji, l-ESMA ħadmet ukoll f’kooperazzjoni mill-qrib mal-membri tas-Sistema Ewropea ta’ Banek Ċentrali, Il-partijiet ikkonċernati ikkuntattjaw ukoll lill-Kummissjoni b’appoġġ ta’ dewmien fid-dħul fis-seħħ tar-Regolament Delegat tal-Kummissjoni (UE) 2018/1229.