(1)

L-Artikolu 11(15) tar-Regolament (UE) Nru 648/2012 ġie emendat bl-Artikolu 42(3) tar-Regolament (UE) 2017/2402 tal-Parlament Ewropew u tal-Kunsill (2). Dik l-emenda saret biex ikun aċċertat li, fir-rigward tar-rekwiżiti tal-marġini għad-derivattivi OTC ikklirjati mhux ċentralment, derivattivi assoċjati ma’ bonds koperti u derivattivi assoċjati ma’ titolizzazzjonijiet jiġu ttrattati bl-istess mod. Billi r-Regolament Delegat tal-Kummissjoni (UE) 2016/2251 (3) huwa bbażat fuq l-Artikolu 11(15) tar-Regolament (UE) Nru 648/2012, dak ir-Regolament Delegat jenħtieġ li jiġi emendat biex jirrifletti l-emenda li saret fl-Artikolu 11(15) tar-Regolament (UE) Nru 648/2012 u b’hekk biex jinkludi regoli dwar it-tekniki tal-mitigazzjoni tar-riskju għall-kuntratti tad-derivattivi OTC mhux ikklirjati minn kontroparti ċentrali konklużi minn entità bi skop speċjali tat-titolizzazzjoni b’rabta ma’ titolizzazzjoni.

(2)

F’konformità mal-Artikolu 11(15) emendat tar-Regolament (UE) Nru 648/2012, regoli bħal dawn dwar it-tekniki tal-mitigazzjoni tar-riskju għall-kuntratti tad-derivattivi OTC mhux ikklirjati minn kontroparti ċentrali u konklużi minn entità bi skop speċjali tat-titolizzazzjoni b’rabta ma’ titolizzazzjoni, jenħtieġ li jqisu l-impedimenti li jiffaċċjaw dawk l-entitajiet bi skop speċjali tat-titolizzazzjoni meta jipprovdu l-kollateral. Minħabba li l-entitajiet bi skop speċjali tat-titolizzazzjoni normalment ikunu strutturati b’tali mod li jiġġeneraw ftit li xejn eċċess ta’ likwidità, dawn għandhom inqas assi x’jużaw għall-iskambju tal-kollateral. Dak l-impediment ma jħallix lill-entitajiet bi skop speċjali tat-titolizzazzjoni jiskambjaw il-kollateral b’tali mod li jikkonforma mija fil-mija mar-rekwiżiti tar-Regolament Delegat (UE) 2016/2251. Għaldaqstant, taħt sett speċifiku ta’ kundizzjonijiet, l-entitajiet bi skop speċjali tat-titolizzazzjoni b’rabta ma’ titolizzazzjoni Sempliċi, Trasparenti u Standardizzata (“STS”) jenħtieġ li ma jkollhomx l-obbligu li jiddepożitaw il-kollateral. Dan suppost li jagħti lok għal daqsxejn ta’ flessibbiltà għall-entitajiet bi skop speċjali tat-titolizzazzjoni b’rabta ma’ titolizzazzjoni STS, filwaqt li jaċċerta li r-riskji għall-kontropartijiet tagħhom ikunu limitati. Madankollu, ma hemm l-ebda restrizzjoni għall-entitajiet bi skop speċjali tat-titolizzazzjoni b’rabta ma’ titolizzazzjoni STS biex jiġbru l-kollateral mill-kontropartijiet tagħhom u biex sussegwentement jirritornawh meta jkun dovut. Il-kontropartijiet ta’ entitajiet bi skop speċjali tat-titolizzazzjoni b’rabta ma’ titolizzazzjoni STS huma għaldaqstant obbligati li jiddepożitaw il-marġni ta’ varjazzjoni fi flus. Jenħtieġ li jkollhom id-dritt li jieħduh lura parzjalment jew kollu kemm hu, filwaqt li l-entitajiet bi skop speċjali tat-titolizzazzjoni jenħtieġ li jkollhom biss l-obbligu li jiġbru l-marġni ta’ varjazzjoni riċevut fi flus u li jiddepożitaw il-marġni ta’ varjazzjoni għall-ammont riċevut fi flus. Dan huwa konformi mal-premessa 41 tar-Regolament (UE) 2017/2402 li jirreferi għall-ħtieġa li tiġi żgurata l-konsistenza fit-trattament bejn derivattivi assoċjati ma’ bonds koperti u derivattivi assoċjati ma’ titolizzazzjonijiet, fir-rigward tal-obbligu tal-ikklirjar u tar-rekwiżiti tal-marġni dwar derivattivi OTC mhux ikklirjati ċentralment.

(3)

Għalhekk jenħtieġ li r-Regolament Delegat (UE) 2016/2251 jiġi emendat skont dan,

(4)

Dan ir-Regolament huwa bbażat fuq l-istandards tekniċi regolatorji abbozzati ppreżentati mill-Awtorità Bankarja Ewropea, l-Awtorità Ewropea tal-Assigurazzjoni u l-Pensjonijiet tax-Xogħol u l-Awtorità Ewropea tat-Titoli u s-Swieq lill-Kummissjoni.

(5)

L-Awtorità Bankarja Ewropea, l-Awtorità Ewropea tal-Assigurazzjoni u l-Pensjonijiet tax-Xogħol u l-Awtorità Ewropea tat-Titoli u s-Swieq għamlu konsultazzjonijiet pubbliċi miftuħin dwar l-istandards tekniċi regolatorji abbozzati li fuqhom huwa bbażat dan ir-Regolament, analizzaw il-kostijiet u l-benefiċċji potenzjali relatati u talbu l-opinjoni tal-Grupp tal-Partijiet Bankarji Interessati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (4), l-opinjoni tal-Grupp tal-Partijiet Interessati tal-Assigurazzjoni u r-Riassigurazzjoni u l-Grupp tal-Partijiet Interessati tal-Qasam tal-Pensjonijiet tax-Xogħol stabbiliti skont l-Artikolu 37 tar-Regolament (UE) Nru 1094/2010 tal-Parlament Ewropew u tal-Kunsill (5), u l-Grupp tal-Partijiet Interessati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (6).