(1)

Id-Direttiva 2008/98/KE tistabbilixxi obbligu għall-Istati Membri biex jinkludu l-prevenzjoni tal-iskart tal-ikel fil-programmi tagħhom għall-prevenzjoni tal-iskart u biex jimmonitorjaw u jivvalutaw l-implimentazzjoni tal-miżuri tagħhom ta' prevenzjoni tal-iskart tal-ikel billi jkejlu l-livelli tal-iskart tal-ikel fuq il-bażi ta' metodoloġija komuni. Il-Kummissjoni għandha tistabbilixxi dik il-metodoloġija komuni u tiffissa rekwiżiti minimi ta' kwalità għall-kejl uniformi tal-livelli tal-iskart tal-ikel abbażi tal-eżitu tal-ħidma tal-Pjattaforma tal-UE dwar it-Telf u l-Ħela tal-Ikel.

(2)

Id-definizzjoni ta' “ikel” stabbilita fir-Regolament (KE) Nru 178/2002 tal-Parlament Ewropew u tal-Kunsill (2) tinkludi l-ikel kollu kemm hu, tul il-katina kollha tal-provvista tal-ikel, mill-produzzjoni sal-konsum. L-ikel jinkludi wkoll partijiet li ma jittiklux, meta dawn ma jkunux isseparati mill-partijiet li jittieklu meta l-ikel ikun ġie prodott, bħal għadam marbut ma' laħam iddestinat għall-konsum mill-bniedem. Għalhekk, l-iskart tal-ikel jista' jinkludi oġġetti li jinkludu partijiet ta' ikel maħsuba li jiġu inġestiti u partijiet ta' ikel mhux maħsuba li jiġi inġestit.

(3)

L-iskart tal-ikel ma jinkludix telf fl-istadji tal-katina tal-provvista tal-ikel fejn ċerti prodotti jkunu għadhom ma sarux ikel kif definit fl-Artikolu 2 tar-Regolament (KE) Nru 178/2002, bħal pjanti li jittieklu li ma jkunux inħasdu. Barra minn hekk, ma jinkludix prodotti sekondarji mill-produzzjoni ta' ikel li jissodisfaw il-kriterji stabbiliti fl-Artikolu 5(1) tad-Direttiva 2008/98/KE, peress li dawn il-prodotti sekondarji mhumiex skart.

(4)

L-iskart tal-ikel għandu jiġi evitat u mnaqqas tul il-katina kollha tal-provvista tal-ikel. Peress li t-tipi ta' skart tal-ikel u l-fatturi li jikkontribwixxu għall-ġenerazzjoni tal-iskart tal-ikel ivarjaw b'mod sinifikanti bejn l-istadji differenti tal-katina tal-provvista tal-ikel, jenħtieġ li l-iskart tal-ikel jitkejjel b'mod separat għal kull stadju.

(5)

L-attribuzzjoni tal-iskart tal-ikel għall-istadji differenti tal-katina tal-provvista tal-ikel jenħtieġ li ssir f'konformità mal-klassifikazzjoni statistika komuni tal-attivitajiet ekonomiċi fl-Unjoni stabbilita bir-Regolament (KE) Nru 1893/2006 tal-Parlament Ewropew u tal-Kunsill (3) bħala “NACE Reviżjoni 2”. Fin-nuqqas ta' klassifikazzjoni pertinenti tan-NACE Rev. 2, l-attribuzzjoni lill-“unitajiet domestiċi” jenħtieġ li ssir b'referenza għall-punt 1.2 tat-Taqsima 8 tal-Anness I tar-Regolament (KE) Nru 2150/2002 tal-Parlament Ewropew u tal-Kunsill (4).

(6)

Filwaqt li d-Deċiżjoni tal-Kummissjoni 2000/532/KE (5) li tistabbilixxi Lista Ewropea tal-Iskart mhux dejjem tippermetti identifikazzjoni preċiża tal-iskart tal-ikel, din tista' tipprovdi gwida għall-awtoritajiet nazzjonali fil-kuntest tal-kejl tal-iskart tal-ikel.

(7)

Il-materjal agrikolu msemmi fl-Artikolu 2(1)(f) tad-Direttiva 2008/98/KE u l-prodotti sekondarji tal-annimali msemmija fl-Artikolu 2(2)(b) tad-Direttiva 2008/98/KE huma esklużi mill-kamp ta' applikazzjoni ta' dik id-Direttiva u għalhekk jenħtieġ li ma jitkejlux bħala skart tal-ikel.

(8)

Sabiex il-metodoloġija tkun applikabbli fil-prattika u sabiex il-piż li jirriżulta mill-monitoraġġ ikun proporzjonali u raġonevoli, xi flussi ta' skart, li mhumiex mistennija jinkludu l-iskart tal-ikel jew jinkludu l-iskart tal-ikel fi kwantitajiet negliġibbli, jenħtieġ li ma jitkejlux bħala skart tal-ikel.

(9)

Sabiex tittejjeb il-preċiżjoni tal-kejl tal-iskart tal-ikel, il-materjali mhux tal-ikel imħallta flimkien mal-iskart tal-ikel (eż. il-ħamrija jew l-imballaġġ) jenħtieġ li jiġu esklużi mill-piż tal-iskart tal-ikel sa fejn ikun possibbli.

(10)

Hemm diversi tipi ta' ikel, li normalment jintremew bħala ilma mormi jew imħallta miegħu, bħal pereżempju ilma fil-fliexken u ilma minerali, xorb u likwidi oħra. Bħalissa ma hemm l-ebda metodu għall-kejl ta' dan l-iskart li jiżgura livelli suffiċjenti ta' fiduċja u komparabbiltà tad-data rrappurtata. Għalhekk, jenħtieġ li dawn it-tipi ta' ikel ma jitkejlux bħala skart tal-ikel. Madankollu, jenħtieġ li l-Istati Membri jkollhom il-possibbiltà li jirrapportaw informazzjoni dwar dawn it-tipi ta' ikel fuq bażi volontarja.

(11)

Filwaqt li s-sustanzi li huma maħsuba għall-użu bħala materjali tal-għalf imsemmija fl-Artikolu 2(2)(e) tad-Direttiva 2008/98/KE huma esklużi mill-kamp ta' applikazzjoni ta' dik id-Direttiva u ma jenħtieġx għalhekk li jitkejlu bħala skart tal-ikel, l-informazzjoni dwar l-ikel li oriġinarjament kien maħsub għall-konsum mill-bniedem u mbagħad utilizzat għall-għalf tal-annimali (inkluż dawk li kienu oġġetti tal-ikel kif iddefinit fil-punt 3 tal-Parti A tal-Anness tar-Regolament tal-Kummissjoni (UE) Nru 68/2013 (6)) hija importanti għall-fehim ta' flussi materjali relatati mal-ikel u tista' tkun utli għall-ippjanar ta' politika mmirata għall-prevenzjoni tal-iskart tal-ikel. Għal din ir-raġuni, jenħtieġ li l-Istati Membri jkollhom il-possibbiltà li jirrapportaw din l-informazzjoni b'mod uniformi fuq bażi volontarja.

(12)

Sabiex tkun tista' ssir indikazzjoni preċiża tal-kwantitajiet ta' skart tal-ikel iġġenerati f'kull stadju tal-katina tal-provvista tal-ikel, jenħtieġ li l-Istati Membri jwettqu kejl iddettaljat tal-kwantitajiet tal-iskart tal-ikel. Jenħtieġ li tali kejl iddettaljat jitwettaq fuq bażi regolari għal kull stadju tal-katina tal-provvista tal-ikel u tal-anqas darba kull erba' snin.

(13)

Skont l-Artikolu 37(3) tad-Direttiva 2008/98/KE, l-Istati Membri għandhom jirrappurtaw il-kwantitajiet ta' skart tal-ikel fuq bażi annwali. Sabiex tiġi żgurata l-proporzjonalità u sabiex jitnaqqas il-piż amministrattiv, jenħtieġ li l-Istati Membri jingħataw firxa ta' metodi għall-kejl tal-iskart tal-ikel għall-finijiet ta' dawk ir-rapporti annwali, inklużi l-analiżijiet eżistenti tal-ġenerazzjoni tal-iskart tal-ikel, studji dedikati ġodda dwar l-iskart tal-ikel kif ukoll data miġbura għall-istatistika tal-iskart jew obbligi ta' rappurtar dwar l-iskart u data soċjoekonomika oħra, jew taħlita ta' dawn l-għażliet. Kemm jista' jkun, jenħtieġ li jintużaw sorsi stabbiliti ta' data bħas-Sistema Ewropea tal-Istatistika.

(14)

Sabiex jiġi żgurat monitoraġġ uniformi tal-flussi materjali fil-katina tal-provvista tal-ikel fil-kuntest ta' politika mmirata ta' prevenzjoni tal-iskart tal-ikel, jenħtieġ li jiġi żgurat li l-Istati Membri li jiddeċiedu li jkejlu l-iskart tal-ikel f'aktar dettall jew li jestendu l-kopertura tal-kejl fi flussi materjali relatati, jistgħu jagħmlu dan b'mod uniformi.

(15)

Sabiex jippermettu l-verifika tad-data rrappurtata u t-titjib tal-metodi tal-kejl u sabiex tiġi żgurata l-komparabbiltà ta' dawk il-metodi, jenħtieġ li l-Istati Membri jipprovdu informazzjoni addizzjonali marbuta mal-metodi ta' kejl u mal-kwalità tad-data miġbura,